ལྔ་བ་བདེ་བར་གནས་པའི་རྐྱེན་བསྟེན་པའི་སྒོ་ནས་བསྲུང་བ།
ལྔ་བ་བདེ་བར་གནས་པའི་རྐྱེན་བསྟེན་པའི་སྒོ་ནས་བསྲུང་བ་ལ།
སྲ་བརྐྱངས་ཀྱི་གཞི། གོས་ཀྱི་གཞི། ཀོ་པགས་ཀྱི་གཞི། སྨན་གྱི་གཞི། གནས་མལ་གྱི་གཞི་དང་ལྔ། དང་པོ་སྲ་བརྐྱངས་ནི། དབྱར་ཟླ་བ་གསུམ་གནས་པའི་མཐར་དགེ་འདུན་རྣམས་ཀྱི་ཆོས་གོས་རྣམ་གསུམ་གྱི་བྱིན་རླབས་སོ་སོ་བ་དབྱུང་ནས། སྣམ་སྦྱར་གཅིག བླ་གོས་གཅིག མཐང་གོས་གཅིག་སྟེ་གསུམ་ལ་བྱིན་རླབས་རྒྱབ་སྟེ་ ཟླ་བ་ལྔར་འཆང་འབྲལ་གྱི་ ལྟུང་བ་སོགས་མེད་པར་བག་ཡངས་གནང་བ་ཡིན་ཀྱང་བོད་འདིར་མ་དར་བར་གསུངས་སོ། །གཉིས་པ་གོས་ཀྱི་གཞི་ནི། འཚོ་བའི་ཡོ་བྱད་བཅུ་གསུམ་ལས། སྣམ་སྦྱར། བླ་གོས། རྔུལ་གཟན། རྔུལ་གཟན་གྱི་གཟན། མཐང་གོས། ཤམ་ཐབས་ཀྱི་གཟན་རྣམས་ནི། ཆེ་ཚད་སྲིད་དུ་ཁྲུ་ལྔ། ཞེང་དུ་ཁྲུ་གསུམ། ཆུང་ཚད་སྲིད་དུ་ཁྲུ་ཕྱེད་དང་ལྔ། ཞེང་དུ་ཁྲུ་ཕྱེད་དང་གསུམ། འབྲིང་ཚད་དེ་གཉིས་ཀྱི་བར་རོ། །ཕྱི་མ་གསུམ་ལ་དེར་མ་ཟད་ཞེང་དུ་ཁྲུ་དོ་དང་སྲིད་དུ་ཁྲུ་ལྔ་དང་བཞི་དང༌། ཆུང་ངུ་རྒྱབ་ནས་གཡོགས་པའི་པུས་མོ་གཉིས་ལྟོ་བ་དང་གསུམ་ཁེབ་པའི་འཁོར་གསུམ་ཁེབ་པ་ཡང་རུང་ལ། གདོང་ཕྱིས་སྲིད་ཞེང་གཉིས་ཀ་ཁྲུ་རེ། རྣག་གཟན་དང་གཡན་པ་དགབ་པ་གཉིས་སྲིད་དུ་ཁྲུ་དྲུག ཞེང་དུ་ཁྲུ་གསུམ། སྐྲ་བཟེད་སྲིད་དུ་ཁྲུ་གསུམ། ཞེང་དུ་ཁྲུ་ཕྱེད་དང་དོ། གདིང་བ་སྲིད་དུ་ཁྲུ་གསུམ། མི་ཆོག་ན་ཕྱེད་དང་ལྔ། ཞེང་དུ་ཁྲུ་དོ་དང་སོར་དྲུག རས་ཆེན་སྲིད་དུ་ཁྲུ་དགུ ཞེང་དུ་ཁྲུ་གསུམ་དང་སོར་བཅོ་བརྒྱད་ཡོད། སྣམ་སྦྱར་ཆེ་ཚད་ལ། སྣམ་ཕྲན་ཉེར་ལྔ། ཉེར་གསུམ། ཉེར་གཅིག་པ་གསུམ་ཡོད་པས། དེ་དག་གླེགས་བུ་ཕྱེད་དང་ལྔ་བ་ཡིན་ལ། འབྲིང་གསུམ་ནི་སྣམ་ཕྲན་བཅུ་དགུ། བཅུ་བདུན། བཅོ་ལྔ་དང་གླེགས་བུ་ཕྱེད་དང་བཞི་བ་ཡིན་ལ། ཆུང་ངུ་གསུམ་ནི་བཅུ་གསུམ། བཅུ་གཅིག དགུ་བ་དང༌། གླེགས་བུ་ཕྱེད་དང་གསུམ་པ་ཡིན་ནོ། །བླ་གོས་གསུམ་ནི། སྣམ་ཕྲན་བདུན་པ་དང༌། གླེགས་བུ་ཕྱེད་དང་གསུམ་པ་ཡིན་ནོ། །མཐང་གོས་ཐམས་ཅད་ལ་སྣམ་ཕྲན་ལྔ་དང༌། གླེགས་བུ་ཕྱེད་དང་གཉིས་པ་ཡིན་ནོ། །ཁེབས་པར་མ་གཡོགས་ན་རལ་ག་དཔུང་ཆད་བྱ་བ་ནི་མཐང་གོས་ཀྱི་ཕྱེད་ལས་ཆེ་བ་མི་རུང་བས་དེ་ཚད་ལྡན་ལོགས་སུ་བྱིན་གྱིས་རླབས་དགོས་ལ། དེ་ནས་སྒྲོ་གུའམ་གཟུངས་ཀྱི་འཐུད་དགོས་པས་ལྕགས་རི་སོགས་ཟུར་དུ་བྱའོ། །ཚལ་བུ་ཆེ་ཚད་སོར་བཞི་དང༌། ཆུང་ཚད་སོར་ ཕྱེད་དང་གསུམ་ནས་ཐེབ་སོར་གཅིག་གི་བར་དང༌། འབྲིང་དེ་གཉིས་ཀྱི་བར་ཡིན་ལ། ལྕགས་རི་འགྲེལ་ཆུང་ལས་སོར་བཞི་བར་གསུངས་པ་མ་གཏོགས་ཚད་ལུང་ན་མེད་པར་གསུངས་སོ། །དེས་ན་ལྕགས་རི་མ་རྩིས་པའི་ཆ་དེ་དུམ་པུར་བཅད་ནས་སྣམ་ཕྲན་དང་གླེགས་བུ་སོགས་གཅོད་དགོས་ལ། འཐུད་ཚེ་སྣམ་ཕྲན་རྣམས་ཕྱོགས་ཕྱོགས་སུ་ལྟ་བ་དང་གླེགས་བུ་རྣམས་བྱ་སྤུ་ནོན་ལྟར་ཕྱོགས་གཅིག་ལ་ལྟ་བར་བྱ། འཇལ་བྱེད་གདིང་བ། གཡན་པ་དགབ་པ། རས་ཆེན་གསུམ་རྡུལ་ཁྲུས་ཆོག་ལ། གཞན་རྣམས་ལུས་ཁྲུས་འཇལ་དགོས་པས། ལུས་ཁྲུ་ནི་རང་གི་སྤྱི་བོ་ནས་རྐང་མཐིལ་གྱི་བར་ཆ་བདུན་བྱས་པའི་ཆ་གཉིས་སོ། །གདིང་བ་དང་སྣམ་སྦྱར་གསར་བ་བྱེད་ཚེ་ནང་མ་དང་བཅས་ཉིས་རིམ་བྱས་ཆོག་མོད་ངེས་པར་བྱ་དགོས་པ་ནི་མ་ཡིན་ནོ། །ཞེས་འདུལ་བ་རིན་ཕྲེང་ལས་གསུངས་སོ། །གདིང་བ་གླེགས་བུ་ ཕྱེད་དང་གཉིས་ཡིན་ལ། འདུག་ཚེ་ཕྱེད་པ་རང་གི་མདུན་དང༌། ཕྱག་འཚལ་བ་དང་ཉལ་ཚེ་ཚར་མ་ཅན་སྔས་སུ་སྟོན་དགོས་སོ། །གོས་གཞན་དགུ་ལ་གླེགས་བུ་སོགས་མེད་དོ། །དེ་དག་དང༌། འཚོ་བའི་ཡོ་བྱད་ཕྲན་ཚེགས་ཞྭ་དང་སྐ་རགས་ལྷམ་ལྷུང་བཟེད་གྱི་ཤུབ་ཁ་གཡོགས་ལ་སོགས་པ་རུང་བའི་ཚོན་གྱི་ཁ་བསྒྱུར་ཏེ་རང་རང་གི་བྱིན་རླབས་བྱའོ། །དེ་ཡུལ་དགེ་སློང་ཡོད་ན་དེ་དང༌། མེད་ན་ཤཱ་རིའི་བུ་མདུན་དུ་དམིགས་ལ། ལྷ་དགོངས་གསོལ་བྱས་ནས་བྱིན་རླབས་བྱ་དགོས་པར་གསུངས་སོ། །རྒྱུན་དུ་འཆང་དགོས་པའི་ཡོ་བྱད་དྲུག་ནི། ཆོས་གོས་རྣམ་གསུམ། གདིང་བ། ཆུ་ཚགས། ལྷུང་བཟེད་དང་དྲུག་གོ །ལྷག་པའི་ཡོ་བྱད་གཞན་གྱིས་དང༌། མཁོ་བའི་ཡོ་བྱད་རང་གཞན་གཉིས་ཀའི་ཡིན་སྙམ་པའི་བསམ་པས་བཅང་དགོས་པས། བསམ་པ་དེ་སྐྱེས་ན་རང་རང་གི་བྱིན་རླབས་བྱའོ། །གསུམ་པ་ཀོ་པགས་ཀྱི་གཞི་ནི། སྤྱིར་དགེ་སློང་རྣམས་ཀྱིས་ཀོ་པགས་ལ་ལོངས་སྤྱོད་དུ་མི་རུང་བར་གསུངས་ཀྱང༌། མཐའ་འཁོབ་ཏུ་གྲང་ཚེ་ཤ་ཟ་རུང་བའི་ཀོ་པགས་ཀྱི་ལྷམ་དང༌། མིག་ནད་ཅན་ལ་དོམ་ལྤགས་གནང་བ་སོགས་ཤེས་པར་བྱའོ། །བཞི་བ་སྨན་གྱི་གཞི་ལ་བཞི་ལས། དང་པོ་དུས་རུང་གི་སྨན་ནི། བཟའ་བ་ཤ་སོགས་དང༌། བཅའ་བ་ཤིང་ཐོག་རྣམས་དང༌། བཏུང་བ་ཞོ་དང་འོ་མ་སོགས་རབ་བྱུང་རྣམས་ཀྱིས་གུང་ཚིགས་དུས་ཚུན་ཆད་ཁོ་ནར་སྤྱད་དུ་རུང་བར་གནང་བ་རྣམས་སོ། །གཉིས་པ་ཐུན་ཚོད་དུ་རུང་བའི་སྨན་ནི། རུས་ཐང་བུར་ཁུ་ཇ་སོགས་ནད་པས་སྲོད་ཐུན་ཚུན་ཆད་དུ་བྱིན་རླབས་དང་བྱིན་ལེན་གང་རུང་བྱས་ནས་སྤྱད་རུང་བའི་རིགས་ རྣམས་སོ། །གསུམ་པ་ཞག་བདུན་པའི་སྨན་ནི། བུ་རམ། མར། སྦྲང་རྩི། ཞག་སོགས་ནད་པས་ཞག་བདུན་བྱིན་གྱི་རླབས་ནས་སྤྱད་དུ་རུང་བ་སོགས་སོ། །བཞི་བ་འཚོ་བཅང་གི་སྨན་ནི། ཚིལ་དང་ཞག་སོགས་ནད་གསོས་ཀྱི་བར་དུ་བྱིན་རླབས་བྱས་ཏེ་སྤྱད་རུང་བ་དང༌། ཨ་རུ་ར་སོགས་རྙེད་དཀའ་བ་དང་བཅང་སླ་བའི་བྱིན་གྱིས་མ་རླབས་པར་མ་ཤི་བར་བཟུང་ཆོག་པ་རྣམས་སོ། །ཕྱི་མ་གསུམ་དུས་མ་ཡིན་པར་སྤྱོད་ཚེ་བསྙེན་པར་མ་རྫོགས་པ་ཡོད་ན་རུང་ཆུ་འདེབས་དགོས། མེད་ན་དུས་དྲན་བསྟེན་པ་ལས་རང་གིས་བཏབ་མི་ཆོག་གོ །འདི་དག་གསོག་འཇོག་མི་འབྱུང་བའི་ཆེད་དུ། བསྙེན་པར་མ་རྫོགས་པ་ལ་རེག་ཏུ་འཇུག་པ་སོགས་ཀྱིས་བྱིན་ལེན་འཇིག་པའི་ཆོ་ག་བྱ་དགོས་སོ། །ལྔ་བ་གནས་མལ་གྱི་གཞི་མ་སྤྲོས་སོ། །