གཉིས་པ་ལན་གདབ་པ།
གཉིས་པ་ལན་གདབ་པ་ནི།
སྒྲའི་བསྟན་བཅོས་ལས་བཤད་པ་དེ་རྒྱུ་མཚན་གཞན་མེད་པའི་དབང་དུ་བྱས་པ་ཡིན་ལ། རྩོམ་པའི་གོ་རིམ་མདོ་རྩ་བ་ལྟར་འཐད་དེ། གལ་ཏེ་མདོར་བསྡུས་སྔོན་ལ་བརྩམས་ན་ནི། འགལ་བའི་སྐྱོན་གསུམ་སྟེ། ལུང་ལས་དངོས་བཅས་རྣམས་གསུངས་པའི་རྗེས་སུ་མདོར་བསྡུས་ཕྱིས་གསུངས་པ་དང་འགལ་ལ། མདོར་བསྡུས་འདི་ཚིག་གི་ཆ་ནས་མདོར་བསྡུས་ཡིན་ཡང་དོན་གྱི་ཆ་ནས་རྒྱས་བཤད་ཡིན་པས། མདོར་བསྡུས་སྔོན་ལ་བརྩམས་ན་དོན་གྱི་ཆ་ནས་ཏེ། མདོར་བསྟན་རྒྱས་བཤད་ཀྱི་གོ་རིམ་དང་ཡང་འགལ་ཞིང༌། མདོར་བསྡུས་སྔོན་ལ་བརྩམས་ན་བཅས་པ་རྟོགས་པའི་གོ་རིམ་དང་ཡང་འགལ་ཞིང༌། དངོས་ཀྱི་བཅས་པ་སྔོན་ལ་རྟོགས་པ་ལ་བརྟེན་ནས་དེ་དང་འདྲ་བ་གཞན་ལ་སྦྱར་ཏེ། མདོར་བསྡུས་ཀྱི་བཅས་པ་ཕྱིས་རྟོགས་པར་འགྱུར་བ་ཡིན་པའི་ཕྱིར་རོ། །ཞེས་མཚོ་ཊཱིཀ་ལས་གསུངས་སོ། །དེ་ལ་འོ་ན་མཚོ་ཊཱིཀ་རང་ལ་གོང་གི་སྐྱོན་གསུམ་པོ་ཡོད་པར་ཐལ། འདུལ་བ་མདོར་བསྡུས་སྔོན་ལ་བཤད་པའི་ཕྱིར། ཁྱབ་པ་ཁས་ཟེར་ན་དཔྱད་པར་བྱའོ། །གཉིས་པ་དེ་ལས་འཕྲོས་པ་འདུལ་བ་མདོར་བསྡུས་ཀྱི་སྤྱི་དོན་ནི། འདུལ་བ་མདོར་བསྡུས་གང་ཞེ་ན། ལུང་ཕྲན་ཚེགས་ལས། སངས་རྒྱས་བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་ཀྱི་ཉེ་འཁོར་ཤིང་སཱ་ལ་ཟུང་གི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་ན་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་འདུལ་བ་རྒྱས་པར་བསྟན་ན། མདོར་བསྡུས་ཏེ་མ་བསྟན་པས་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །དགེ་སློང་དག་ཁྱེད་ཀྱིས་ངས་སྔོན་གནང་བ་ཡང་མེད་བཀག་པ་ཡང་མེད་པ་གང་ཡིན་པ་དེ། གལ་ཏེ་མི་རུང་བ་བསྟན་ཅིང་རུང་བ་དང་མི་མཐུན་ན། རུང་བ་མ་ཡིན་པའི་ཕྱིར་སྤྱད་པར་མི་བྱའོ། །གལ་ཏེ་རུང་བ་བསྟན་ཅིང་མི་རུང་བ་དང་མི་མཐུན་ན། རུང་བ་ཡིན་པའི་ཕྱིར་སྤྱད་པར་བྱ་སྟེ་འདི་ལ་འགྱོད་པར་མི་བྱའོ། །ཞེས་གསུངས་སོ། །དེ་ཉིད་མདོ་རྩ་བར་མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ་ཞེས་བསྡུས་སོ། །དེ་གཏན་ལ་འབེབས་པ་ལ། དགོས་པ་དབྱེ་བ་ངོ་བོ་མཚན་ཉིད་དང༌། །ངེས་ཚིག་གཞི་དང་རྒྱུ་མཚན་སྦྱར་ཚུལ་དང༌། །སྔར་བཅས་རྗེས་བཅས་གང་ཡིན་བརྟག་པ་སྟེ། །དགུ་ཡིས་འདི་དོན་རྣམ་པར་བཤད་པར་བྱ། །ཞེས་པ་ལྟར་དགུ་ལས། དང་པོ་དགོས་པའི་དོན་ནི། བྱ་བ་བྱེ་བྲག་གིས་གསལ་ཀ་མ་བཏོད་པའི་ཚུལ་ཁྲིམས་ཀྱི་འཇུག་ལྡོག་ལ་མཁས་པའོ། །གཉིས་པ་འདུལ་བ་མདོར་བསྡུས་ཀྱི་དབྱེ་བ་ནི། རྒྱུ་མཚན་གྱི་སྒོ་ནས་ཕྱེ་ན་དགག་སྒྲུབ་གནང་གསུམ་ལས། དགག་པའི་འདུལ་བ་མདོར་བསྡུས་ནི། འཐས་པར་གནས་པའི་བྱེ་མ་སྲོག་ཆགས་ཅན་དགེ་སློང་གིས་རྐོ་བ་བཀག་པ་ལྟ་བུའོ། །