ཤིས་ཚིག་དང་སྨོན་ཚིག
ཤིས་ཚིག་དང་སྨོན་ཚིག
སྐུ་གསུམ་ཐོབ་ཕྱིར་སྨོན་པ། ཚོང་རའི་མི་ཚོགས་འདྲ་བའི་གྲྭ་སློབ་ཚོགས། །འདུས་ཀྱང་རུང་ལ་འབྲལ་ཡང་ཞེན་དོན་མེད། །རང་སེམས་ཕན་པའི་ཐོས་བསམ་སྒོམ་པ་ཡི། །དམ་པའི་ཆོས་ལ་ནན་ཏན་བྱེད་པར་སྨོན། །འཇིག་རྟེན་ཆོས་བརྒྱད་སྟོན་གྱི་སྤྲིན་ཚོགས་འདྲ། །དེ་སླད་སྲིད་འབྱོར་བདེ་བས་ཡིད་མ་ཚིམ། །གཏན་བདེའི་ཐར་བའི་ལམ་སྣ་ཟིན་པའི་ཕྱིར། །ངེས་འབྱུང་བསམ་པས་རང་རྒྱུད་གཏམ་པར་སྨོན། །མ་རྒན་འགྲོ་རྣམས་སྲིད་མཚོར་རྟག་འཁྱམ་ན། །བཅོས་མིན་བརྩེ་བས་སེམས་མཆོག་བསྐྱེད་བྱས་ཏེ། །ཡང་དག་ལྟ་བས་ལྟ་ངན་མུན་བཅོམ་ནས། །དོན་གཉིས་མཐར་ཕྱིན་སྐུ་གསུམ་ཐོབ་ཕྱིར་སྨོན། །ངག་དབང་དངོས་གྲུབ་དཔལ་གྱིས་སྨྲས་སོ། །ཕུན་ཚོགས་དགེ་ལེགས་ལྡན་པའི་དཔལ་མངའ་བ། །རྣམ་དཔྱོད་ལོ་འདབ་ཡོན་ཏན་འབྱོར་བའི་དཔྱིད། །ཆུ་བོའི་རྒྱུན་བཞིན་ཚེ་རིང་རྟག་བརྟན་ཅིང༌། །དམ་ཆོས་བདུད་རྩིའི་དཔལ་ལ་རོལ་བར་སྨོན། །ལུགས་གཉིས་ཀྱི་མཁྱེན་དཔྱོད་ཡངས་བ་གང་གི་སྐྱེས་སྐར་ལ་བཀྲ་ཤིས་བདེ་ལེགས་ཞུ། ཐོག་མར་རྒྱ་ཆེན་གཞུང་ལ་ཐོས་བསམ་གནང༌། །བར་དུ་སྤང་བླང་འཇུག་ལྡོག་མ་ནོར་བྱ། །མཐའ་མར་གཡེང་མེད་སྒོམ་པས་ཉམས་ལེན་བརྩོན། །བྱ་བཞག་གང་བྱེད་བསྟན་འགྲོའི་དོན་ཆེན་སྨོན། །ཅེས་མི་ཚེ་གཅིག་གི་མདུན་ལམ་འདི་ལྟར་འཚོལ་བར་སྨོན་པ་དང་བཅས་ངག་དབང་དངོས་གྲུབ་དཔལ་གྱིས་བྲིས་པ་དགེའོ། །ལྷག་བསམ་གསེར་གྱི་མཎྡྲྲལ་གཙང་མའི་གཞིར། །ཚུལ་ཁྲིམས་བཀྲ་ཤིས་སྡུག་གུའི་རེ་ཁཱ་ཅན། །བསྟན་གཉིས་ཅོད་པན་ཐོགས་པའི་ངུར་སྨྲིག་འཛིན། །སྡེ་སྣོད་འཛིན་པའི་མཁན་པོར་མངའ་གསོལ་ལོ། །སྡེ་སྣོད་འཛིན་པ་ལྷ་རམས་པ་མཁན་པོ་ཚུལ་ཁྲིམས་མཆོག་འབུམ་རྙིང་དགོན་གྱི་མཁན་ཁྲིར་མངའ་གསོལ་ལ་དགའ་གུས་བཅས་ངག་དབང་དངོས་གྲུབ་དཔལ་ནས་གུས་ཕུལ། ཐུབ་པའི་གསུང་རབ་ཆོས་སྒོ་བྱེ་བའི་ཁྲོད། །ཀླུ་དབང་གཙུག་གི་ནོར་བུའི་དོ་ཀེར་བཞིན། །ཡུམ་གྱི་དགོངས་ཆེན་ཐོས་སྒོམ་བྱེད་པ་ཡི། །བློ་གྲོས་བཟང་པོའི་སློབ་མཐར་ཕྱིན་ལ་རངས། །ཞེས་པ་འདི་དངོས་གྲུབ་དཔལ་གྱིས་ཕུལ་བའོ། །ཨོཾ་སྭ་སྟི། བགྲང་ཡས་བསོད་ནམས་རྡུལ་མང་བརྩེགས་པའི་སྤོར། །མཁྱེན་གཉིས་འོད་བརྒྱས་ཤེས་བྱ་ཀུན་གསལ་ཞིང༌། །བརྩེ་ཆེན་སྟོན་པ་འགྲོ་བའི་གསོས་གྱུར་དེས། །བཀྲ་ཤིས་སྟོབས་བཅུས་སྲིད་འདི་ཡོངས་བཟླུམ་ཤོག ། སྐྱཻས་པའི་སྐྲ་དང་བཏགས་པའི་ཕུ་ཐུང་ལྷན། །སྲིད་འདུན་སེམས་པ་མཆིལ་མ་བཞིན་བོར་ཏེ། །ཐུབ་པའི་རྟུལ་ཞུགས་གཙང་མས་རབ་བརྒྱན་པའི། །ཉིང་དོན་ཐོས་བསམ་སྒོམ་ལ་འབད་འདི་རྨད། །ཐུབ་པའི་ཞལ་སྐྱིན་ཆོས་སྒོ་བྱེ་བའི་ཁྲོད། །ཀླུ་དབང་གཙུག་གི་ནོར་བུའི་དོ་ཀེར་བཞིན། །རྒྱལ་ཡུམ་དོན་ཀུན་ལྷམ་མེར་གསལ་བྱེད་ཀྱི། །རྣམ་དཔྱོད་ཉི་མའི་འོད་སྟོང་སྤྲོ་ལ་རངས། །ཞེས་པ་འདི་ནི་ངག་དབང་དངོས་གྲུབ་དཔལ་གྱིས་གངས་ལྗོངས་རིས་མེད་མཐོ་སློབ་ཀྱི་ཐེངས་དགུ་བའི་ཕར་ཕྱིན་མཐར་ཕྱིན་འཛིན་གྲྭའི་དཔྱད་རྩོམ་ཡུམ་དོན་ཀུན་གསལ་གྱི་ཤིས་ཚིག་ཏུ་རྗེས་སུ་ཡི་རང་བཅས་ཕུལ་བ་དགེའོ། །ཨོཾ་སྭ་སྟི། ཀུན་རྟོག་སྤྲིན་རིས་དབྱིངས་སུ་དག་པ་ལས། །ཐུགས་རྗེའི་ཆུ་འཛིན་ཕན་པའི་ཆབ་རྒྱུན་གྱིས། །སྐྱེ་དགུའི་བསམ་པའི་ལོ་འབྲས་སྨིན་བྱེད་པ། །ཐུབ་དབང་ལྷ་ཡི་ལྷ་དེར་ལན་བརྒྱར་འདུད། །ཐོག་མེད་དུས་ནས་ད་ལྟའི་སྲིད་འདི་བར། །སྐྱེ་ཤིའི་འཁོར་བ་རེས་མོས་བསྐོར་ན་ཡང༌། །དལ་བའི་རྟེན་ལ་ངུར་སྨྲིག་རྒྱན་འཆང་བ། །འདི་ཙམ་ཞིག་ཅེས་ཉིང་དོན་སྒྲུབ་པ་གལ། །དེ་སླད་འདས་པའི་བགྲང་བྱའི་རྡོག་པོ་འགར། །ཉིན་དང་ཞག་ལ་བརྩོན་པའི་ཁུར་བསྐྱེད་དེ། །ཕ་རོལ་ཕྱིན་གཞུང་ཐོས་བསམ་གོམས་པ་ལ། །བདག་ཀྱང་ཡི་རང་བསམ་པ་རབ་ཏུ་སྐྱེས། །ད་ལྟར་ཐོབ་པའི་མི་ཚེའི་ལམ་ཁ་འདི། །ཚེ་འདི་བདེ་ཞིང་ཕྱི་མར་ཕན་པ་དང༌། །རང་གྲོལ་གཞན་འདྲེན་ལམ་གྱི་མཆོག་རིག་སྟེ། །བློ་སེམས་གཅིག་གིས་ཡུན་དུ་འབད་པར་རེ། །བག་ཡོད་རྟུལ་ཞུགས་ཁྲིམས་ཀྱི་གཞི་བརྟན་ཞིང༌། །གཡོ་མེད་དད་དམ་བརྩོན་པའི་ཏིང་འཛིན་ལས། །ཟབ་རྒྱས་ཆོས་རབ་རྣམ་པར་འབྱེད་པ་ཡི། །བསླབ་གསུམ་ནོར་གྱིས་ཡིད་རབ་འགེངས་གྱུར་ཅིག ། ཅེས་ཕར་ཕྱིན་ཐེངས་བདུན་པའི་འཛིན་གྲྭའི་དཔྱད་རྩོམ་གྱི་ཤིས་ཚིག་ཏུ་དངོས་གྲུབ་དཔལ་གྱིས་བྲིས་པ་དགེའོ། །བསོད་ནམས་རྡུལ་མང་བརྩེགས་པའི་ས་འཛིན་སྤོར། །གཟུགས་སྐུའི་མེ་ཏོག་སྨིན་པའི་དུས་བཟང་ལ། །སྐུ་ཚེ་བསྐལ་བརྒྱར་ཞབས་པད་བརྟན་པ་དང༌། །མཛད་འཕྲིན་མཐར་རྒྱས་ཡོང་བའི་འཁྲུངས་སྐར་བསུ། །དངོས་གྲུབ་དཔལ་གྱིས་བྲིས་པའོ། །རྣམ་པར་རྒྱལ་དང་ཡིད་བཞིན་འཁོར་ལོ་དང༌། །ཚེ་དཔག་མེད་མགོན་ལ་སོགས་སྐྱབས་མཆོག་གི། །མཁྱེན་བརྩེ་ནུས་པའི་ཡེ་ཤེས་ཆོས་ཆེན་གྱིས། །གང་སྐུ་འགྲོ་བློའི་ཉི་མར་རྟག་བརྟན་ཤོག། ཅེས་པ་འདི་ནི་གཞན་གྱི་ངོར་དངོས་གྲུབ་དཔལ་གྱིས་བྲིས་པའོ། །ངག་གི་དབང་ཕྱུག་ཐུབ་དབང་ཉི་མའི་གཉེན། །ལུང་རྟོགས་བསྟན་འཛིན་འཕགས་བོད་མཁས་གྲུབ་སོགས། །ཤེས་རབ་སྤྱ ན་ལྡན་སྐྱབས་གནས་རྒྱ་མཚོ་ཡིས། །གང་སྐུ་བརྟན་ཞིང་མཛད་འཕྲིན་མཐར་རྒྱས་ཤོག ། ཅེས་པ་འདི་ནི་གང་གི་སློབ་ཚོགས་ཀྱི་ངོར་དངོས་གྲུབ་དཔལ་གྱིས་བྲིས་པའོ། །ལུང་དང་རིགས་ལམ་མེད་པའི་དཔེ་ཆ་བ། །ལག་སྡོམ་དཔའ་བོ་གཡུལ་ལ་ཆས་པ་འདྲ། །རང་གི་ནང་འགལ་རང་གིས་མི་ཤེས་པར། །འཁོར་གསུམ་མགོ་བོ་འཁོར་བ་ཤེས་པར་གྱིས། །དངོས་གྲུབ་དཔལ་གྱིས། མི་ལུས་ཡིད་བཞིན་ནོར་བུ་གཏེར་བའི་བདག། དྲིན་ཆེན་མ་ཡི་བརྩེ་སེམས་ལྷད་མེད་པར། །དྭངས་གཙང་ཆུ་བོའི་རྒྱུན་འབབ་ལོ་བརྒྱ་ཚོ། །དམ་ཆོས་བདུད་རྩིའི་དཔལ་ལ་སྤྱ ོད་པར་སྨོན། །ཞེས་པ་འདི་ཆོས་གྲོགས་དམ་པ་མཁན་ཆོས་དར་གྱི་མ་དྲིན་མོ་ཆེ་ལོ་གྲངས་བརྒྱད་ཅུར་ཕེབས་པའི་དུས་བཟང་ལ་དངོས་གྲུབ་དཔལ་གྱིས་ཕུལ་བ་དགེའོ། །བོད་ཀྱི་ཟོ་དོར་རྨ་ཆེན་གྱི། །གངས་རིའི་འདབས་ཀྱི་གསེར་ལྡན་གཞིར། །འཚར་ལོངས་བྱུང་བའི་དུས་བཟང་ལ། །བཀྲ་ཤིས་བདེ་ལེགས་འབྱུང་བར་ཤོག། ཅེས་ཡེ་ཤེས་ཤེས་རབ་ཀྱི་སྐྱེས་སྐར་ལ་སིདྡྷི་ཤྲཱི་ནས་ཕུལ་བའོ། །ཨོཾ་སྭ་སྟི། ངོ་མཚར་སྐྱེ་རབས་སྤྲུལ་བའི་བཀོད་པ་དང༌། །ས་ལམ་སྤངས་རྟོགས་ལམ་གྱི་རྩལ་རྫོགས་པའི། །རང་བྲིས་ཕྱི་ནང་གསང་བའི་ལེགས་གསུང་གིས། །ཡིད་བློ་བརྟན་པ་འཕྲོག་པའི་རྣམ་ཐར་ཅན། །བྱིས་པའི་དུས་ནས་གཞན་ལ་མ་བསླབས་པར། །འཕགས་ཡུལ་བརྡ་སྤྲོད་ཅི་དགར་སྨྲ་བ་ཡི། །སྐད་གཉིས་སྨྲ་བ་ཏཱ་ར་ནཱ་ཐ་ཞེས། །གངས་ཅན་མཁས་གྲུབ་ཁྲི་མ་འབུམ་གྱི་དབུས། །མཚན་གྱི་སྙན་པ་ཉི་ཟླ་བཞིན་འབར་བ། །གསུམ་ལྡན་རྡོ་རྗེ་འཛིན་པའི་གཙོ་བོ་དེས། །འཕགས་ཡུལ་ཆོས་ཀྱི་ཆུ་གཏེར་འཁྲིགས་པ་ལས། །གངས་ཅན་སྐྱེ་འགྲོའི་དཔལ་དུ་ལེགས་དྲངས་པ། །ད་ལྟར་ཉམས་མེད་ཇི་སྙེད་ཐོབ་པ་ཀུན། །ལྷག་བསམ་དྲི་མེད་འབད་པའི་ཁུར་བཞེས་ཏེ། །རིག་པའི་རྡོ་རྗེས་ཕྱོགས་བསྡུས་སྤེལ་བའི་དགེས། །རྒྱལ་བསྟན་དར་རྒྱས་སྐྱེ་རྒུ་ཀུན་བདེ་ཞིང༌། །ཁྱད་པར་ངེས་དོན་སྙིང་པོའི་རང་ལུགས་འཛིན། །ཀུན་མཁྱེན་ཆེན་པོ་ཤེས་རབ་རྒྱལ་མཚན་གྱི། །ཆོས་བརྒྱུད་མི་ནུབ་ཕྱོགས་མཐར་དར་རྒྱས་ཤོག། ཅེས་པ་འདི་ནི་སྨྲ་བའི་སྤོབས་བ་གཟེངས་སུ་མཐོ་བའི་རིག་པའི་རྡོ་རྗེས་རྗེ་བཙུན་ཏཱ་ར་ནཱ་ཐའི་མདོ་རྒྱུད་ཀྱི་གཞུང་ལུགས་བསྒྱུར་བ་ཕྱོགས་བསྡུས་མཛད་སྐབས་ཆེད་བརྗོད་དུ་ངག་དབང་དངོས་གྲུབ་ཀྱིས་ཕུལ་བའོ། །བཀྲ་ཤིས་གང་ཞིག་གནམ་ལོ་ལྕགས་གླང་ཤར། །བཀྲ་ཤིས་གང་ཞིག་ནད་མེད་བདེ་ལྡན་ཞིང༌། །བཀྲ་ཤིས་གང་ཞིག་བསམ་དོན་ཡིད་བཞིན་འགྲུབ། །བཀྲ་ཤིས་གང་ཞིག་རྒྱལ་ཁམས་བདེ་ལེགས་ཤོག། ངག་དབང་དངོས་གྲུབ་དཔལ་གྱིས་སྨོན་པའོ། །ཐུབ་མཆོག་དགོངས་པ་རྡོ་རྗེ་ཐེག་པའི་ཚུལ། །རིག་འཛིན་དུ་མས་ཤིང་རྟས་ལེགས་དྲངས་པ། །དངོས་གྲུབ་རླབས་ཕྲེང་འབུམ་གྱིས་ལེགས་བརྒྱན་ཏེ། །ཕྱི་མཐའ་བར་དུ་ནམ་ཡང་ཉམས་མེད་ཤོག ། དངོས་གྲུབ་དཔལ་གྱིས་སྨོན་པའོ། །འགྲོགས་ཡུན་རིང་ན་འཁོར་བའི་ཆོས་ཀུན་ལ། །སུན་སྣང་མི་སྐྱེ་གཅིག་ཀྱང་མི་སྲིད་པས། །དོན་གྱི་ངལ་གསོ་ཐར་བ་རིན་པོ་ཆེ། །རང་སེམས་ཆོས་ཀྱི་དྲི་ངད་ལྡང་བར་སྨོན། །ཞེས་དངོས་གྲུབ་དཔལ་ནས་དུས་འཁོར་གྱི་རྒྱུད་གསུང་བའི་ནག་ཟླའི་ཚེས་༡༥དུས་ཆེན་ལ། སྡིག་ཟས་ཕྱིར་དུ་གཞན་སྲོག་ཟ་བ་སོགས། །གཞན་ལ་གནོད་པའི་སྒོ་གསུམ་རབ་འདུལ་ནས། །བྱམས་དང་བརྩེ་བས་མ་རྒན་འགྲོ་རྣམས་དོན། །འཁོར་བ་སྲིད་མཐའི་བར་དུ་འབད་པར་སྨོན། །བདག་ལ་བརྟེན་ནས་སེམས་ཅན་ཐམས་ཅད་ལ། །ནམ་ཡང་གང་དུ་གནོད་པ་མེད་པ་དང༌། །བདག་གིས་བྱ་བ་གང་དང་གང་རྩོམ་པ། །ཐམས་ཅད་ཕན་བདེའི་དཔལ་དུ་འགྱུར་བར་ཤོག ། ངག་དབང་དངོས་གྲུབ་དཔལ་གྱིས་བྲིས་པ་དགེའོ། །