བདུན་པ་རིང་དུ་སོང་བ་བཤད་པ།
བདུན་པ་རིང་དུ་སོང་བ་བཤད་པ་ནི།
རྩ་བར། རིང་དུ་སོང་བ་འདིར་ནི་སྐད་ཅིག་དང༌། །
སྐད་ཅིག་ལ་ནི་འགོག་པར་འཇུག་འགྱུར་ཞིང༌། །
ཐབས་ཀྱི་ཕ་རོལ་ཕྱིན་ལེགས་འབར་བ་ཐོབ། །
ཅེས་ས་བདུན་པ་རི༷ང་དུ༷་སོ༷ང་བ༷་འདི་ལ་གནས་པའི་བྱང་སེམས་ཀྱི་འདི༷ར་ནི༷། སྐ༷ད་ཅི༷ག་ད༷ང་སྐ༷ད་ཅི༷ག་ལ༷་ནི༷་སྟེ་སྐད་ཅིག་མ་རེ་རེ་ལ། སྔར་ས་དྲུག་པའི་སྐབས་སུ་ཐོབ་ཟིན་པའི་འགོ༷ག་པ༷ར་སྙོམསཔར་འཇུ༷ག་པར་འགྱུ༷ར་བ་ཡིན་ཞི༷ང་དེ་ལ་གནས་ཏེ། ས་བཅུ་པའི་མདོ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་ས་དྲུག་པ་ཡན་ཆད་བྱང་ཆུབ་སེམས་དཔའི་འགོག་པ་ལ་སྙོམས་པར་འཇུག་སྟེ། བྱང་ཆུབ་སེམས་དཔའི་ས་བདུན་པ་འདི་ལ་གནས་པའི་བྱང་ཆུབ་སེམས་དཔའ་ནི་སེམས་ཀྱི་སྐད་ཅིག་དང་སེམས་ཀྱི་སྐད་ཅིག་ལ་ཡང་འགོག་པ་ལ་སྙོམས་པར་འཇུག་ཅིང་ལྡང་སྟེ། འགོག་པ་མངོན་སུམ་དུ་བྱས་ཞེས་ནི་མི་བྱའོ། །ཞེས་རྒྱས་པར་གསུངས་སོ། །ཡང་ས་བདུནཔ་འདིར་ནི་ཐ༷བས་མཁས་ཀྱི༷་ཕ༷་རོ༷ལ་ཏུ་ཕྱི༷ན་པ་ལེ༷གས་པར་འབར༷་བ༷་སྟེ་ཆེས་ཡོངས་སུ་དག་པདང་འཐོ༷བ་པ་ཡིན་ཏེ། རང་འགྲེལ་ལས། འདིའི་ཐབས་ལ་མཁས་པའི་ཕ་རོལ་ཏུ་ཕྱིན་པ་ཆེས་ཡོངས་སུ་དག་པར་ཡང་འགྱུར་རོ། །ཤེས་རབ་ཉིད་རྣམ་པ་ཁྱད་པར་དུ་ཞུགས་པ་ལ་ཐབས་དང་སྨོན་ལམ་དང་སྟོབས་དང་ཡེ་ཤེས་ཞེས་ཤེས་པར་བྱ་སྟེ། རབ་ཏུ་རྣམ་པར་འབྱེད་པའི་གནས་སྐབས་ཁོ་ནར་ཤེས་རབ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བརྗོད་ཀྱི་གཞན་དུ་ནི་མ་ཡིན་ནོ། །ཞེས་གསུངས་པའི་ཕྱིར་རོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱནརིན་ཆེན་སྒྲོན་མེ་ཞེས་བྱ་བ་ལས་སེ༷མས་བསྐྱེ༷ད་པ༷་བདུ༷ན་པའི་རྣམ་པར་བཤད་པ༷འོ༷། །