མི་རྒོད་རྣམ་འཇོམས།

༄༅། །མི་རྒོད་རྣམ་འཇོམས། སྤྱན་རས་གཟིགས་དབང་ཕྱུག་གི་གཟུངས། སེང་གེ་སྒྲའི་གཟུངས། དོན་ཡོད་ཞགས་པའི་སྙིང་པོ་བཅས་བཞུགས་སོ། །

རྒྱ་གར་སྐད་དུ། ཨཱརྻ་ཙོ་ར་བི་དྷ་ན་ས་ན་ནཱ་མ་དྷ་ར་ཎི། བོད་སྐད་དུ། འཕགས་པ་མི་རྒོད་རྣམ་པར་འཇོམས་པ་ཞེས་བྱ་བའི་གཟུངས། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཞབས་འབྲིང་བ་ཚེ་དང་ལྡན་པ་ཀུན་དགའ་བོ་དང་ཐབས་གཅིག་ཏུ། ལུས་འཕགས་རི་ལ་གཤེགས་པའི་ཚེ། ཚེ་དང་ལྡན་པ་ཀུན་དགའ་བོས། མི་རྒོད་ཕལ་པོ་ཆེ་ཞིག་རྒྱང་མ་ནས་མཐོང་ངོ༌། །མཐོང་ནས་ཀྱང་སྐྲག་སྟེ། སྤུ་ཟིང་ཞེས་བྱེད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་རྒོད་དག་ཅིག་གོ །བདེ་བར་གཤེགས་པ་མི་རྒོད་དག་ཅིག་གོ །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་མི་རྒོད་རྣམས་ཀྱིས་འཇིགས་སམ། གསོལ་པ། བཅོམ་ལྡན་འདས་འཇིགས་ལགས་སོ། །བདེ་བར་གཤེགས་པ་འཇིགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། མི་རྒོད་རྣམས་ཀྱིས་མ་འཇིགས་ཤིག །དེ་ནས་བཅོམ་ལྡན་འདས་ཀྱིས་དེའི་ཚེ། གཏི་མུག་ཆེན་པོའི་ཚོགས་རབ་ཏུ་གཞོམ་པ་འདི་བཀའ་བསྩལ་ཏོ། །ཏདྱ་ཐཱ། ཨ་ནུ་ལོ་མེ་པྲ་ཏི་ལོ་མེ། ཨ་ནུ་ལོ་མ། པྲ་ཏི་ལོ་མ། ཨ་ཏིཾ་ཀེ །པྲ་ཏིཾ་ཀེ །བཾ་ཀེ །ཨ་ཏི་པཾ་ཀེ །གོ་རི། གནྡྷ་རི། ཙནྜ་ལཱི། མ་ཏཾ་གི །པུཀྐ་སི། རི་མི་རི་མི། རིདྡྷི། མ་ཙེ་བིཥྚ་ཏི་ཙཽ་ར་པྲ་དནྟུ། བི་སྠ་ཧནྟུ། བྷ་མནྟུ། མཱ་མི་ཡནྟུ། ཡ་བད་གྲ་ན་ཐི་ན་མུཉྩ་མི་སྭཱ་ཧཱ། ཀུན་དགའ་བོ། །ངས་དཔག་ཚད་བཅུ་ཚུན་ཆད་ཀུན་ཏུ་སྲུང་བ་དང༌། མི་རྒོད་ཐམས་ཅད་དང༌། རི་སུལ་གྱི་གྲོང་ཁྱེར་གྱི་མི་ཐམས་ཅད་དང༌། གསེབ་ལམ་སྲུང་བ་ཐམས་ཅད་དང༌། གནོད་པར་སེམས་པ་ཐམས་ཅད་ཀྱི་རྐང་པ་བཅིངས་པར་བྱས་སོ། །རྨུགས་པར་བྱས་སོ། །རེངས་པར་བྱས་སོ། །ཇི་ལྟར་རྫ་མཁན་གྱིས་འཁོར་ལོ་བསྐོར་བའམ། ཇི་ལྟར་རྫ་མཁན་གྱིས་འཁོར་ལོ་ཡོངས་སུ་བསྐོར་བ་ལྟར། མི་རྒོད་རྣམས་འདར་བར་གྱུར་ཅིག །རེངས་པར་གྱུར་ཅིག །མགོ་རྨོངས་པར་གྱུར་ཅིག །བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་ནས། ཚེ་དང་ལྡན་པ་ཀུན་དགའ་བོ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཆོ་ག་ནི་ཤིང་ཀུན་དང༌། བོང་བུའི་སྤུ་བྲེགས་ཏེ། བུ་མོ་གཙང་མས་བཀལ་བའི་སྲད་བུ་ལ་ལན་ཉི་ཤུ་རྩ་གཅིག་བཟླས་བརྗོད་བྱའོ། །ཡང་ན་གོས་ཀྱི་མཐའ་མ་ལ་མདུད་པ་བོར་ཏེ། བདེ་བར་ཕྱིན་ནས་དགྲོལ་བར་བྱའོ། །འདི་ནི་གྲུབ་པའོ། །འཕགས་པ་མི་རྒོད་རྣམ་པར་འཇོམས་པ་ཞེས་བྱ་བའི་གཟུངས་རྫོགས་སོ།། །།