གཤིན་རྗེའི་ཀ་བསྟོད་བསྐུལ་པ།
དེ་ནས་གཤིན་རྗེའི་ཀ་བསྟོད་བསྐུལ་པ་ནི། ཀ་ཡེ་གསོན་དང་འཇམ་དཔལ་གཤིན་རྗེའི་གཤེད། །ཁ་དོག་དམར་དཀར་བསྐལ་པའི་མེ་དཔུང་འབར། །ག་ཤལ་དུག་སྦྲུལ་རྒྱུ་རློན་མགོ་ཕྲེང་འཕྱང་། །ང་རོ་ཧཱུཾ་ཧཱུཾ་ཕཊ་ཕཊ་འབྲུག་སྟོང་ལྡིར། །ཅ་ཅོ་རྒྱོབ་སོད་སྒྲ་སྒྲོག་གཤིན་རྗེའི་ཚོགས། །ཆ་ལུགས་མ་རུངས་འཇིགས་པའི་གཟུགས་ཅན་ལ། །ཇ་ཆང་སྨན་རཀ་གཏོར་མའི་མཆོད་པ་འབུལ། །ཉ་རྒྱས་ཟླ་ལྟར་ཐུགས་རྗེའི་འོད་དཀར་གྱིས། །ཏ་ཐཱ་ག་ཏའི་བསྟན་པ་རྒྱས་པར་མཛོད། །ཐ་མལ་རྨོངས་པའི་བསྟན་དགྲ་ལས་ངན་རྣམས། །ད་ནི་མྱུར་དུ་བསྒྲལ་བའི་དུས་ལ་བབ། །ན་མེད་དོན་ཆེན་འགགས་ལ་ཐུག་དུས་འདིར། །པ་དེ་པུ་དེའི་ཆོ་འཕྲུལ་ཅི་ལ་ཕན། །ཕ་རོལ་ལོག་པའི་དགྲ་དཔུང་རྩད་ནས་ཆོད། །བ་གླང་ལྟ་བུ་བླུན་རྨོངས་དགྲ་བོ་འདི། །མ་གཡེལ་མྱུར་དུ་ཁུག་ལ་བཙོན་དུ་ཆིངས། །ཙ་ཆེན་བཞི་ཡི་རཀྟ་དྲོངས་ལ་ཤོག །ཚ་གྲང་འདུ་བ་རྣམ་བཞི་ཁོངས་ནས་སློང་་།ཛ་ཡེའི་ཐུགས་ཀར་རྣམ་པར་ཤེས་པ་སྤོར། །ཝ་དང་སྟག་གཟིག་དབྱི་གཅན་ཤ་ལ་རོལ། །ཞ་གྲུམ་རིམས་ཡམས་ནད་ཀྱི་ཆར་པ་ཕོབ། །ཟ་བྱེད་གཤིན་རྗེའི་ཚོགས་ཀྱི་
རྔམས་ཟས་གྱིས། །འ་རེ་འུ་རེའི་འབྲུག་སྒྲོག་ཐོག་སེར་ཕོབ། །ཡ་མ་རཱ་ཙ་ལས་གཤིན་དྲུག་པོ་དང་། །ར་ཆེན་གཤིན་རྗེ་དགུ་ཁྲི་དགུ་འབུམ་དང་། །ལ་ཆེན་གཤིན་རྗེ་བདུན་བརྒྱ་ཉི་ཤུ་དང་། །ཤ་ཟ་སྲིན་པོ་དྲེགས་པ་སྡེ་བརྒྱད་ཀྱིས། །ས་ཆ་གང་དུ་འདུག་ཀྱང་དགྲ་བོ་སོད། །ཧ་ཧེ་གསང་སྔགས་བསྟན་པ་ངོ་མཚར་ཆེ། །ཨ་ལ་ལ་ཞེས་བསྟན་པ་རྒྱས་པར་མཛོད། །ཅེས་འཇམ་དཔལ་གཤིན་རྗེ་ཁྲོ་ཆུ་དུག་གདོང་ནག་པོའི་བསྟོད་ལས་བསྐུལ་པ་ཁྱི་ཕོ་ཕག་གི་ཟླ་བའི་ཚེས་བཅུ་ཉི་མ་ནག་པོ་ཆེན་པོའི་ཉིན་ལ་༧ སྔགས་འཆང་རཱ་ག་ཨ་སྱས་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།