ལེའུ་སོ་བཞི་པ། རྩ་གསུམ་ལྷ་ཚོགས་འགྲུབ་དང་མ་འགྲུབ་པའི། །ཚོད་འཛིན་རྟགས་ཡིག་འཕྲུལ་གྱི་མེ་ལོང་ཡོད། །
༼ངི༽ རི་ཆོས་མཚམས་ཀྱི་ཞལ་གདམས་ལས། རྟགས་ཡིག་འཕྲུལ་གྱི་མེ་ལོང་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ནཱི་སིདྡྷི་ཧཱུྃ། རྟེན་འབྲེལ་དངུལ་དཀར་ལས་གྲུབ་མེ་ལོང་དུ། །སོ་སོར་རྟོག་པའི་ཤེས་རབ་བཞིན་རས་ཀྱིས། །ལེགས་པར་བལྟས་པས་མཆོག་ཐུན་དངོས་གྲུབ་སོགས། །ལེགས་ཉེས་དངོས་སུ་བཀྲ་འདི་ཨེ་མ་ཧོ། །དེང་སང་མཆོག་ཏུ་རློམས་པའི་རྨོངས་པ་འགས། །ཉམས་དང་རྨི་ལམ་རྟགས་དང་མཚན་མ་སོགས། །ཀུན་རྫོབ་འཁྲུལ་པ་ཡིན་པས་འབྲས་མེད་ཅིང་། །དེ་འདྲ་བརྟག་པའང་འཁྲུལ་ཞེས་བཞད་གད་བྱེད། །མཐར་ཐུག་ངེས་པའི་དོན་ལ་ཤཱཀ་ཐུབ་ཀྱིས། །མཛད་པ་བཅུ་གཉིས་བསྟན་པའང་མི་བདེན་ཏེ། །མཐོང་བ་པོ་རྣམས་འཁྲུལ་པའི་དག་སྣང་ཙམ། །རིགས་དྲུག་སོ་སོའི་སྡུག་བསྔལ་མི་བདེན་ཏེ། །སོ་སོའི་ཀུན་
རྫོབ་འཁྲུལ་བའི་སྣང་བ་ཙམ། །ད་ལྟ་རང་ལུས་སྐྱེ་རྒས་ན་འཆི་དང་། །སྐྱིད་སྡུག་ཀུན་ཀྱང་མི་བདེན་འཁྲུལ་བ་ཉིད། །འོན་ཀྱང་མཐར་ཐུག་ངེས་དོན་ཆོས་ཀྱི་སྐུ་། །མངོན་དུ་མ་གྱུར་བར་དུ་ཐམས་ཅད་བདེན། །རྟགས་དང་རྟེན་འབྲེལ་ཀུན་ཀྱང་ཤིན་ཏུ་བདེན། །རྟེན་ཅིང་འབྲེལ་བར་འབྱུང་བ་མ་ལགས་པའི། །ཆོས་འགའ་ཡོད་པ་མ་ཡིན་ཀླུ་སྒྲུབ་གསུངས། །དང་པོའི་ས་ནས་བཅུ་པའི་ས་ཡི་བར། །ས་ཐོབ་པ་ཡི་རྟགས་རྣམས་རྨི་ལམ་དུ། །འབྱུང་བར་རྨི་ལམ་བསྟན་པའི་མདོ་ལས་གསུངས། །གསར་རྙིང་སྒྲུབ་གཞུང་ཀུན་ལས་འགྲུབ་པའི་རྟགས། །རབ་དངོས་འབྲིང་ཉམས་ཐ་མ་རྨི་ལམ་གསུངས། །མར་མི་དྭགས་སོགས་སྔར་བྱོན་གྲུབ་ཐོབ་རྣམས། །རྨི་ལམ་ལ་བརྟེན་ལུང་བསྟན་མགུར་སོགས་གསུངས། །དེ་ཕྱིར་མཚམས་སྒྲུབ་བྱེད་པའི་གང་ཟག་ལ། །རབ་ནི་མངོན་སུམ་ལྷ་ཡི་ཞལ་མཐོང་དང་། །དབང་བསྐུར་ཆོས་གསུངས་ལུང་དུ་སྟོན་པ་འབྱུང་། །དེ་ནི་སྐལ་ལྡན་སྐྱེས་བུ་ལས་ཅན་ཏེ། །དཔེར་ན་གནམ་ཆོས་ཐུགས་ཀྱི་གཏེར་ཁ་བཞིན། །དེ་ལའང་བསླུ་བ་ཡོད་མེད་བརྟག་དགོས་ཏེ། །ཁྲོ་བོའི་སྐུར་བསྒོམ་དྲག་སྔགས་རྫས་རྒོད་
བདུག །དེ་བྱས་ཡལ་ཞིང་མེད་ན་གདོན་གྱི་རྟགས། །མ་ཡལ་ཇེ་གསལ་སོང་ན་ལྷ་ཡི་རྟགས། །གསུངས་ཤིང་ལུང་དུ་བསྟན་པའི་ཚིག་དེ་ཀུན། །མདོ་རྒྱུད་དོན་དང་མི་འགལ་ལྷ་ཡི་རྟགས། །འགལ་ཞིང་ལོག་པར་སོང་ན་བདུད་ཡིན་ནོ། །དེང་སང་དེ་འདྲ་འོང་བ་རེས་འགའ་ཙམ། །དངོས་སུ་བག་དྲོ་བྱིན་འཐིབས་རིག་པ་དྭངས། །སེམས་དགའ་དད་པ་དག་སྣང་ངེས་ཤེས་འཕེལ། །གསོལ་བ་བཏབ་པས་དབང་མེད་མཆི་མ་འཁྲུགས། །དགུན་སྒང་ཡོན་ཆབ་ལ་ལ་རྡོ་ལྟར་ཁེངས། །ལ་ལ་མི་ཁེངས་ཡོན་ཆབ་འཛིན་པ་ཟེར། །གཏོར་མ་ལ་ལ་རྡོ་ལྟར་ཁེངས་པ་ན། །ལ་ལ་ཁེངས་པའི་ཞད་མེད་གཏོར་མ་འཛིན། །སྒྲུབ་པའི་དུས་སམ་དུས་བཟང་གསོལ་འདེབས་དུས། །ཕྱོགས་དེར་མེད་པའི་སྤོས་དྲི་ཆིལ་གྱིས་འབྱུང་། །རྔ་དང་རྔ་ལྕག་ཕྲེང་བ་ལུས་གོས་ལ། །མེ་འབར་སིར་སྒྲ་དང་བཅས་ཚྭ་ཚྭ་འཕྲོས། །ནང་མཆོད་ཁོལ་ཞིང་ཕྱུར་དང་རླངས་པ་འབྱུང་། །དམ་རྫ་ས་རིལ་བུ་ཁོལ་དང་འཕེལ་བ་དང་། །སྒྲུབ་ཁང་ཉེ་ལོགས་འཇའ་ཚོན་ཡང་ཡང་ཟུགས། །སྒྲུབ་ཁང་ཐད་དུ་སྤྲིན་འཇའ་འམ་འཇའ་གུར་ཕུབ། །རོལ་མོའི་སྒྲ་དང་སྔགས་སྒྲ་ཡང་ཡང་ཐོས། །
སྔར་དུས་ཡོད་པའི་སྲོ་ཤིག་ཐམས་ཅད་མེད། །ལྕེ་རུ་ཟ་མ་མྱོང་བའི་རོ་མཆོག་མྱོང་། །རྒས་པར་སིའུ་སྐྱེ་དང་སོ་ལ་ནི། །རིང་བསྲེལ་འཕེལ་སོགས་དངོས་སུ་འབྱུང་བ་དང་། །གཏོར་མ་ཞུ་དང་བདུད་རྩི་འབབ་པ་དང་། །གཏོར་མ་བདུད་རྩིར་ཞུ་བ་འགྲུབ་པའི་རྟགས། །འོན་ཀྱང་གཏོར་མ་ཞུ་དང་བདུད་རྩི་བབས། །དེ་གཉིས་བར་ཆད་དངོས་གྲུབ་བརྟག་དཀའ་སྣང་། །བྱིན་རླབས་རྟེན་མེད་ཐ་མལ་སྐྱེ་བོའི་ཁྱིམ། །མར་མེ་ཡང་ཡང་འཛིན་ན་གདོན་ཆེའི་རྟགས། །བསྙེན་སྒྲུབ་མ་བྱས་ཐ་མལ་སྐྱེ་བོ་ཡི། །སོ་ལ་རིང་བསྲེལ་བྱུང་ན་ནའམ་འཆི། །དེ་དག་མངོན་སུམ་འབྱུང་བའི་རྟགས་རྣམས་ཡིན། །ཁྱད་པར་བསྐྱེད་རྫོགསས་ཉམས་ལེན་བརྩོན་པ་དེའི། །ལུས་ནི་སུས་མཐོང་དད་གུས་སྐྱེ་བ་དང་། །ངག་ནས་ཅི་སྨྲས་ཆོས་སུ་སོང་བ་དང་། །ཡིད་ནི་གར་གཏད་ནད་གདོན་ཞི་ནུས་པ། །དེ་ནི་མཆོག་གི་རྟགས་སུ་གསུངས་ན་ཡང་། །བདུད་ཀྱིས་བྱིན་རླབས་ལ་ཡང་དེ་སྤྱི་འབྱུང་བས། །རང་དང་དེ་ལ་ལྟོས་པ་ཐམས་ཅད་ནི། །རིམ་བཞིན་དགེ་ལ་སྦྱོར་ན་ལྷ་ཡི་རྟགས། །སྤབས་ཀྱིས་སྡིག་ལ་སྦྱོར་ན་བདུད་ཡིན་ནོ། །ལྷ་རྟགས་བདུད་རྟགས་གང་
བྱུང་ཁྱད་མེད་དེ། །རློམ་སེམས་ང་རྒྱལ་ཁེངས་པ་རང་ཆེ་སྐྱེས། །དེ་ནི་ལྷ་རྟགས་ཡིན་ཀྱང་བདུད་དུ་འགྱུར། །དམན་ས་འཛིན་ཅིང་བསྐྱེད་རྫོགས་དགེ་སྦྱོར་བརྩོན། །རྟོགས་མཚན་བཟང་ལ་ང་རྒྱལ་རློམ་སེམས་མེད། །དེ་ནི་བདུད་རྟགས་ཡིན་ཀྱང་དངོས་གྲུབ་འཐོབ། །འོ་ན་རྟགས་ནི་དགོས་རྒྱུ་མེད་སྙམ་ན། །ལྷ་རྟགས་ཡིན་ན་དངོས་གྲུབ་ལེན་ཆོག་བྱ། །བླ་མ་ལྷ་དང་གདམས་པར་དད་གུས་བསྐྱེད། །གདོན་རྟགས་ཡིན་ན་གཟིར་མནན་བགེགས་རྣམས་བསྐྲད། །དབང་པོ་འབྲིང་ལ་ཉམས་ལ་རྟགས་འབྱུང་སྟེ། །ཉམས་ལ་མཐོང་ཉམས་ཤེས་ཉམས་རྣམ་པ་གཉིས། །མཐོང་ཉམས་ཞེས་པ་མངོན་སུམ་མ་ཡིན་ཞིང་། །གཉིད་དང་ཆ་འདྲེས་སད་རྒྱུ་ཞིག་ཀྱང་ཡོད། །གཉིད་པ་མ་ཡིན་མངོན་སུམ་ཡིན་འདྲ་བ། །དེ་འདྲ་སྐབས་སུ་མཐོང་བ་མཐོང་ཉམས་ཟེར། །དེ་ནི་མ་གཅིག་ལབ་སྒྲོན་གྱིས་ཀྱང་བཞེད། །གཉིད་པ་མིན་ཡང་མིག་ནི་བཙུམ་པ་ལ། །ཡིད་ལ་དྲན་པ་འདྲ་ཡང་དྲན་པ་མིན། །མངོན་སུམ་ཉིད་དུ་མཐོང་བ་ལྟ་བུར་གསལ། །དེ་དུས་ལྷ་སོགས་ཞལ་གཟིགས་གང་བྱུང་བ། །ཞལ་གཟིགས་གོ་ཆོད་ཀརྨ་པཀིས་བཞེད། །དེ་དང་འདྲ་འམ་
སྙམ་ཡང་མི་འདྲ་སྟེ། །སྔར་ཤིའི་མི་དང་ཕྱིན་མྱོང་ཡུལ་གྲུ་སོགས། །མངོན་སུམ་ལྟ་བུར་ཡིད་ལ་དྲན་པ་ནི། །རྟོག་ངོར་ཞེས་བྱ་སྙིང་པོ་མེད་པ་ནི། །དེ་སྐད་སློབ་དཔོན་མཚན་ཉིད་པ་རྣམས་གསུངས། །དེ་མིན་མཐོང་ཉམས་དང་ནི་ཤེས་ཉམས་ལ། །ཡི་དམ་ལྷ་ཡི་ཞལ་མཐོང་གསུང་ཐོས་ཚེ། །ཡེངས་པ་ལྟར་སོང་དྲག་སྔགས་བཟླ་བ་དང་། །བསྐྱེད་རིམ་ལ་སོགས་བསྒོམ་རྒྱུ་མི་རྙེད་ཀྱང་། །ལྷ་རྟགས་ཡིན་ནམ་བདུད་ཀྱི་ཆོ་འཕྲུལ་ཡིན། །སྐུ་གཟུགས་བཟང་ངན་སོགས་ཀྱིས་མི་འབྱེད་པས། །གླ་རྩིའི་དྲི་མ་སོགས་ནི་མ་ཡིན་པའི། །དྲི་བཟང་བྲོ་ན་ལྷ་ཡི་རྟགས་སུ་ངེས། །བསེ་དྲི་རུལ་དྲི་སྒོག་སྐྱའི་དྲི་མ་སོགས། །དྲི་ངན་ཞད་ཙམ་སྣང་བ་འདྲེ་ཡི་རྟགས། །ཉམས་དེ་ཡལ་རྗེས་རང་གི་སེམས་ལ་བརྟགས། །སྙིང་དགའ་ལྷག་གེར་འདུག་ན་ལྷ་ཡིན་ངེས། །ཉམས་སྣང་སྐུ་གཟུགས་སོགས་ནི་མ་མཐོང་བར། །ལེགས་ཉེས་སྨྲ་དང་གེགས་སེལ་བོགས་འདོན་ཚིག ། སྒྱུ་ཡི་དམ་མཁའ་འགྲོའི་ལུང་བསྟན་ཡིན་པ་ན། །ཐོག་ཏུ་འགྲོ་ཞིང་རང་ཡང་ཉམས་རྟོགས་སྐྱེ། །ས་བླ་འབྱུང་པོ་ཐེའུ་རང་རྟགས་ཡིན་ན། །འཕྲལ་དུ་ཐིག་ཀྱང་རང་གི་དགེ་སྦྱོར་
འགྲིབ། །ཟང་ཟིང་འདུ་ཡང་རིམ་གྱིས་མི་དགེར་སྤྱོད། །འཇིག་རྟེན་མཁའ་འགྲོས་ཉམས་ཚད་བྱེད་པའི་རྟགས། །ལུང་བསྟན་མང་ཞིང་གང་ཟེར་ཐིག་པ་ལ། །ང་རྒྱལ་སྐྱེས་ན་དེ་ནས་མི་ཐིག་སྟེ། །རང་ཡང་ལྷ་དང་འཁའ་འགྲོར་ལོག་ལྟ་སྐྱེ། །དམ་ཚིག་སེལ་ཞུགས་ལོག་པའི་ལམ་དུ་འགྲོ། །ལུང་བསྟན་བྱུང་ཞིང་ཐིག་ན་ང་རྒྱལ་སྤང་། །མ་ཐིག་བསླུས་། ནའང་ལོག་ལྟ་ཐེ་ཚོམས་སྤང་། །ལྟ་བའི་ཀློང་དུ་རོ་སྙོམས་ནུས་པ་ན། །ལུང་བསྟན་མཁན་དེ་བཟང་ངན་སུ་ཡིན་ཡང་། །གེགས་སུ་མི་འགྲོ་བྱང་ཆུབ་ལམ་དུ་འགྲོ། །དེ་བཞིན་ནམ་མཁར་ཡི་གེ་ཤར་བ་དང་། །བཀའ་ཤོག་འདྲ་བའི་ཡི་གེ་ལག་ཏུ་ཕྱིན། །རང་གཞན་དོན་གཉིས་གསལ་ཞིང་ཐིག་ན་ཡང་། །ང་རྒྱལ་རློམ་སེམས་མི་བྱ་གནད་དུ་ཆེ། །དེ་བཞིན་ཉམས་སྣང་རི་བྲག་མི་སྒྲིབ་པར། །གཟུགས་མཐོང་སྐད་ཐོས་མངོན་ཤེས་འདྲ་ན་ཡང་། །མངོན་ཤེས་ཡིན་སྙམ་ང་རྒྱལ་སྤང་བ་གཅེས། །དེ་བཞིན་ཉམས་སྣང་ཕ་རོལ་མི་གཞན་གྱིས། །ཁོ་རང་གང་བསམ་ཁ་ནས་ཟེར་སྣང་འབྱུང་། །དེ་ལ་བརྟེན་ནས་ཅི་བསམ་ཤེས་འདྲ་ཡང་། །ཉམས་ཀྱི་འཆར་སྒོ་ཡིན་པས་ང་རྒྱལ་སྤང་། །གང་ཟག་ཐ་མལ་
དངོས་ཉམས་རྟགས་མཚན་དཀོན། །རྟགས་རྣམས་རྨི་ལམ་བརྟག་དགོས་ལབ་སྒྲོན་གསུངས། །ཁྲུས་བྱེད་གོས་དཀར་གྱོན་དང་གངས་རིར་འཛེགས། །ནམ་ལངས་ཤེལ་རྙེད་མཆོད་རྟེན་བ་སྐོར་བ་བྱེད། །དེ་དག་སྒྲིབ་པ་དག་པའི་རྟགས་སུ་གསུངས། །ཉི་ཟླ་ཤར་དང་རྟ་ཞོན་གྱེན་ལ་རྒྱུག །དར་ཕྱར་དུང་འབུད་ཁྲོམ་འདུ་ཁྲི་ལ་འདུག །དེ་དག་བསོད་ནམས་རྒྱས་པའི་རྟགས་ཡིན་ནོ། །གོ་གྱོན་མཚོན་ཐོགས་བཙན་པའི་གནས་སུ་འདུག །མཁར་བརྩེགས་རྫོང་འདུག་སྲུང་བ་འགྲུབ་པའི་རྟགས། །དམག་དང་སེར་བ་བཟློག་དང་ཕུར་པ་བཅག །གཅན་གཟན་ཁ་བཅིང་བཟློག་པ་འགྲུབ་པའི་རྟགས། །གཡུལ་འགྱེད་བཙོན་བཟུང་བསད་བཅད་དྲག་པོའི་རྟགས། །མུན་རུབ་གོས་ངན་གྱོན་ཞིང་ཐུར་དུ་སོང་། །ལམ་ངན་འགྲིམ་རྨིས་ཚེ་བསོད་ཟད་པའི་རྟགས། །རང་ཉིད་བཙོན་བཟུང་ཁྲིབ་དང་སེར་བས་དེད། །མདའ་ཚུབ་བྱུང་རྨིས་བྱད་ཁ་ཟུགས་པའི་རྟགས་། །ཚེ་ཚད་སྨྲ་དང་སཱཙྪ་མང་པོ་རྨིས། །བདུད་རྩི་སིལ་ཐོག་སུས་ཟོས་ཚེ་འཕེལ་རྟགས། །སྐྲ་དང་ཁ་སྤུ་རིང་སྐྱེས་གཏེར་རྙེད་དང་། །རྩྭ་སྔོ་རིན་ཆེན་རྙེད་པ་ནོར་འཕེལ་
རྟགས། །བཟང་ངན་ཕལ་ཆེར་རིག་པས་དཔག་སྟེ་ཤེས། །འོན་ཀྱང་བཟང་བཟང་འདྲ་ལ་ངན་པའི་རྟགས། །བུད་མེད་རྒྱན་ཅན་མང་པོས་གླུ་གར་བཅས། །རང་ལ་བཀུར་སྟི་གུས་ཞབས་ཆེན་པོ་ནི། །མཁའ་འགྲོའི་སུན་མས་རང་ཉིད་ཚེ་འཕོའི་རྟགས། །དེ་ལ་སུན་བཟློག་བྱེད་པ་གནད་དུ་ཆེ། །ལྷ་མོ་སྒྲུབ་དུས་ཡིན་ན་སྐྱོན་ཆེར་མེད། །མེ་ཏོག་དམར་པོའི་ཐང་ལ་ཕྱིན་པ་དང་། །ལུས་ལ་མེ་ཏོག་དམར་པོས་བརྒྱན་པ་ན། །དབང་གི་ཕྲིན་ལས་བསྒྲུབ་ན་འགྲུབ་རྟགས་ཏེ། །དུས་མིན་བྱུང་ན་རང་ཉིད་འཆི་བའི་རྟགས། །མཁར་ཁང་བཙན་པོར་འདུག་པ་བཟང་ལགས་ཀྱི། །མཁར་ནི་དམར་པོ་རིང་པོའི་རྩེར་འདུག་ཅིང་། །མཐར་མར་འོབས་དང་ལྕགས་རི་མང་པོས་བསྐོར། །དེ་ནི་འཆི་བའི་རྟགས་སུ་གསུངས་པ་ཡིན། །ཉ་དང་དུག་སྤྲུལ་ཆེན་པོས་རང་ཉིད་དེད། རང་ཉིད་ཇུར་མིད་བྱས་ཏེ་མགོ་འམ་མཇུག །ཅུང་ཟད་ཁར་མ་ཤོང་བ་ཕྱིར་ལུས་པ། །རླུང་བཟུང་སྐབས་ཡིན་དབུ་མར་ཚུད་རྟགས་བཟང་། །དུས་མིན་རྨིས་ན་འཆི་འམ་གཏད་མནན་རྟགས། །གསེར་ནི་མང་པོ་རྙེད་པ་རྨིས་པ་ན། །ཉམས་ལེན་བརྩོན་སྐབས་ཡིན་ན་རྟོགས་པ་སྐྱེ། །ནོར་
སྒྲུབ་བྱེད་སྐབས་ཡིན་ན་དངོས་གྲུབ་འབྱུང་། །བྱ་བ་སྒྲུབ་ཁ་ཡིན་ན་ཕྱི་དལ་ཆེ། །དུས་མིན་རྨིས་ན་འཆི་བའི་རྟགས་ཡིན་ནོ། །དངུལ་ནི་མང་པོ་རྙེད་པ་རྨིས་པ་ན། །རྩ་རླུང་སྒོམ་སྐབས་ཐིག་ལེ་འཕེལ་བའི་རྟགས། །ཞི་བའི་ལས་དང་ནོར་སྒྲུབ་འགྲུབ་པའི་རྟགས། །དུས་མིན་རྨིས་ན་རྒྱལ་པོའི་བར་ཆད་ཡིན། །གཙུག་ལག་ཁང་དང་དགེ་འདུན་སྡེ་ཆེན་པོ། །དྲི་ཞིམ་དང་བ་འགྲོ་རྨིས་སྒྲིབ་དག་རྟགས། །སྒོག་ཧྲལ་དང་བ་མི་འགྲོ་རྒྱལ་འགོང་རྟགས། །དེ་སོགས་བཟང་རྟགས་ངན་པར་སྟོན་པ་རྣམས། །རྨི་ལམ་བཟང་ཡང་སད་ཚེ་སྙིང་མི་དགའ། །དེ་ནས་ངན་རྟགས་བཟང་བར་སྟོན་པ་ནི། །ལུས་ལ་རྣག་ཁྲག་སྐྱུགས་འགྲིམ་མི་གཙང་ཐོན། །རང་ལུས་མེས་བསྲེགས་ཐལ་བ་རླུང་ལ་བསྐུར། །དེ་དག་སྒྲིབ་པ་དག་པའི་རྟགས་ཡིན་ནོ། །རང་སྙིང་རང་ཟོས་རང་ཁྲག་རང་གིས་འཐུང་། །རང་ལུས་རང་གིས་གཏོར་ནས་རྗེས་མེད་བྱས། །ལུས་པོ་བསྐྱུར་ནས་གློ་སྒྱུ་སྙིང་རྒྱབ་ཏུ་གྱོན། །དེ་དག་ཉམས་རྟོགས་བཟང་པོ་སྐྱེ་བའི་རྟགས། །ཡི་དམ་མཁའ་འགྲོ་ཆོས་སྐྱོང་གང་སྒྲུབ་པའི། །སྐུ་དངོས་མཐོང་ངམ་བྲིས་སྐུ་ལྡེར་སྐུ་དང་། །རང་བྱོན་
ནམ་ནི་གསེར་སྐུ་ལེགས་པོ་མཇལ། །དེ་དག་སྐུ་ནི་འགྲུབ་པའི་རྟགས་སུ་གསུངས། །ལྷ་དེའི་རྒྱུད་དང་སྒྲུབ་ཐབས་གླེགས་བམ་དང་། །བྲིས་ལེགས་སྤོས་དྲི་ཅན་གྱི་དཔེ་ཆ་རྙེད། །ཤོག་སེར་གཏེར་བཏོན་གསུང་ནི་འགྲུབ་པའི་རྟགས། །ཌ་དྲིལ་ཕུར་པ་ཁཊ་ལ་སོགས་པ། །ཕྱག་མཚན་ལེགས་པོ་རྙེད་རྨིས་ཐུགས་འགྲུབ་རྟགས། །དེ་སོགས་ཕལ་ཆེར་རིགས་པས་བརྟགས་པས་ཤེས། །སྣུམ་ཞིང་བཀྲག་ཆེ་དང་བ་འགྲོ་ན་ལྷ། །ཐལ་མདོག་སྒོག་ཧྲལ་འགོང་པོའི་ལྟས་ཡིན་ནོ། །ནམ་སྲོད་རྨི་ལམ་བག་ཆགས་ངེས་པ་མེད། །ནམ་ཕྱེད་ལྷ་འདྲེའི་ཆོ་འཕྲུལ་ངེས་པ་མེད། །ཐོ་རངས་རྨི་ལམ་འབྲས་བུ་ཡོད་པ་སྟེ། །དེ་ཡང་ཙོག་པུའམ་སེང་གེའི་ཉལ་སྟབས་དགོས། །གཞོགས་གཡོན་སར་བསྟན་རྩ་རླུང་འཁྲུགས་པའི་ཕྱིར། །རྩུབ་པོ་རྨིས་ཀྱང་ངེས་པ་ཡོད་པ་མིན། །རྨི་ལམ་མང་ཡང་སད་ཚེ་བརྗེད་གྱུར་ན། །བཟང་ངན་ཇི་ལྟར་རྨིས་ཀྱང་ངེས་པ་མེད། །རྨི་ལམ་སྐྲག་སྔངས་བྱུང་བ་ལ་བརྟེན་ནས། །བསྐྱེད་རིམ་ཟིན་པ་རྩུབ་ཟིན་ཞེས་བྱའོ། །དེ་ཚེ་གདོན་སོགས་དྲག་པོས་བཏུལ་བ་ནི། །ནུས་པ་ཅུང་ཟད་ཐོན་པའི་རྟགས་ཡིན་ནོ། །འཛམ་ཟིན་ལན་འགར་
ཟིན་ན་བར་དོར་ཟིན། །རྨི་ལམ་དང་པོ་ཡི་དམ་ལྷ་བསྒོམས་པས། །དེ་ཉིད་རང་ཉིད་དངོས་སུ་གྱུར་པ་དང་། །ལྷ་དང་མཁའ་འགྲོ་མང་པོས་ཕྱག་འཚལ་དང་། །རིག་འཛིན་ཡི་དམ་མཁའ་འགྲོའི་ཚོགས་རྣམས་དང་། །རང་ཉིད་དབྱེར་མེད་གཅིག་ཏུ་མཐོང་བ་དང་། །དེ་དག་རྣམས་ཀྱིས་ཆོས་གསུངས་དབང་བསྐུར་དང་། །བརྡ་ཡི་ཚུལ་གྱིས་དམ་ཆོས་སྟོན་པ་དང་། །རྒྱ་བོད་རིག་འཛིན་ཡི་དམ་ཆོས་སྐྱོང་ཚོགས། །རང་དང་འབྲེལ་བ་ཡོད་མེད་སྣ་ཚོགས་པ། །ཡང་ཡང་ཞལ་མཇལ་གདམས་པ་བསྟན་པ་སོགས། །རང་གིས་ཡི་དམ་གང་སྒྲུབ་དེའི་རྟགས་ཏེ། །རྒྱལ་བ་ཐམས་ཅད་ཡེ་ཤེས་གཅིག་ཕྱིར་རོ། །རང་གི་སྐྱུར་ནས་གཞན་དེ་འདོན་མི་དགོས། །དེ་དག་བསྐྱེད་རིམ་འབྱོངས་པའི་རྟགས་ཡིན་ནོ། །དེ་ནས་ཐབས་ལམ་སྒོམ་པའི་རྣལ་འབྱོར་པ། །ལུས་ནི་རྡུང་གཏག་བཏང་བཞིན་ཆད་ཅིང་ཧྲལ། །སྒྱུར་སྙིང་འདོད་པ་གཏུམ་མོ་སྡུག་བསྔལ་སྒྱུ་དུས་། །དེ་ཡི་རྟགས་སུ་ཤེས་བྱས་སྙིང་རུས་བསྐྱེད། །ཞུ་སླ་འགྲང་དཀའ་དྲོད་ནི་ཅུང་ཟད་འབར། །ཕོ་ནད་ལ་སོགས་གཅོང་ནད་ཕལ་ཆེར་བྱུང་། །རླུང་དང་གཏུམ་མོ་གནད་དུ་
འགྲོ་བའི་རྟགས། །ཕྱི་ཡི་ལུས་པོ་འཁྱགས་པར་གྱུར་ན་ཡང་། །སེམས་ནི་དྲོ་བའི་སྣང་བས་འཁྱགས་མི་ཚོར། །དྲོད་ནི་ཕྱི་ནས་སྐྱེ་དང་ནང་ནས་སྐྱེ། །ཁོལ་བུར་སྐྱེ་སོགས་རྩ་། རིགས་ཁྱད་ཡིན་ཏེ། །གོས་ནི་སྤུ་ཅན་གྱོན་པར་མི་བྱ་སྟེ། །གྱོན་ན་དྲོད་ནི་ཨི་སྐྱེ་མི་ཚོར་གསུངས། །དྲོད་ནི་སྐྱེས་རིམ་གོས་ནི་ཇེ་སྲབ་བྱ། །གོས་ནི་སྲབ་པར་གོམས་འཇུག་གནད་ཡིན་གསུངས། །ལོ་གསུམ་བར་དུ་རས་རྐྱང་བྱས་པ་ན། །རྟོགས་ལྡན་རབ་ཀྱི་གྲལ་དུ་བརྩི་སྲོལ་གདའ། །རླུང་དང་འཁྲུལ་འཁོར་དམིགས་པ་མ་བྱས་ན། །ལུས་པོ་རྡོ་ལྟར་འཁྱགས་ཤིང་བྱས་མ་ཐག །དྲོ་འུར་འཕྲལ་དུ་དྲོད་ནི་འབར་བ་ན། །གཏུམ་མོ་ཉམས་ལེན་སྦྱོང་བའི་སྐབས་རང་ཡིན། །དམིགས་པ་བྱས་ཀྱང་ལྷག་ཏུ་མི་དྲོ་ལ། །ཉམས་ལེན་སེམས་ངོའི་སྟེང་དུ་བཞག་པ་ན། །དགུན་སྒང་རས་རྐྱང་བྱས་ཀྱང་མི་འཁྱགས་པ། །མཐར་ཕྱིན་མཆོག་གི་གཏུམ་མོ་ཡིན་ནམ་སྙམ། །དེ་ནི་གཏུམ་མོ་དྲོད་ཀྱི་དུས་ཡིན་ལ། །དྲོད་ཀྱི་སྟོབས་ཀྱིས་ཐིག་ལེ་འཕེལ་བའི་རྟགས། །བཟའ་བ་ཞེན་ཀྱང་ལུས་ཉམས་བཟང་བ་དང་། །ལུས་ཀྱི་བཀྲག་མདངས་རྒྱས་ཤིང་འདོད་ཆགས་འབར། །དེ་དང་
རྟོགས་པ་བསྲེས་པས་བདེ་སྟོང་འདྲེས། །རྟོགས་པས་མ་ནོན་སྡོམ་པ་འཆོར་བའི་སྐབས། །རྟོགས་པས་ནོན་ཅིང་ཉམས་ལེན་སྐྱོང་ནུས་ན། །རྩ་ཐིག་རླུང་གསུམ་དབང་དུ་འདུས་པའི་རྟགས། །ལྷའདྲེ་མི་གསུམ་མི་ནོར་ཟས་གསུམ་འདུ། །མཆོག་གི་དངོས་གྲུབ་མྱུར་དུ་ཐོབ་པར་གསུངས། །རྒྱུན་དུ་རླུང་ནི་ཆག་མེད་བཟུང་བ་ན། །རང་གཞན་དོན་ཀུན་རླུང་གི་རྟགས་ཀྱིས་ཤེས། །ལེགས་ཉེས་དགོངས་པ་ཞུ་མི་བྱུང་མ་ཐག །ཡང་ན་རང་གི་བྱ་བ་འགྲུབ་མི་འགྲུབ། །ལེགས་ཉེས་བྱ་བ་བརྟགས་པར་དྲན་མ་ཐག །རླུང་ནི་གཡས་ནས་རྒྱུ་ན་ངན་པ་སྟེ། །གཡོན་ནས་རྒྱུ་ན་ཤིན་ཏུ་བཟང་བ་ཡིན། །མཉམ་དུ་རྒྱུ་ན་འབྲིང་སྟེ་ཐག་མི་ཆོད། །ནང་དུ་རྔུབ་དང་ཐུག་ན་ཤིན་ཏུ་བཟང་། །ཕྱི་རུ་རྒྱུ་དང་ཐུག་ན་ཤིན་ཏུ་ངན། །ཁོང་དུ་གནས་དང་ཐུག་འབྲིང་ཐག་ཆོད་མེད། །གཡས་ནས་རྒྱུ་དང་ཕྱིར་འབུད་ངན་ཐོག་ཆོད། །གཡོན་དུ་རྒྱུ་དང་ནང་རྡུབ་བཟང་ཐག་ཆོད། །མཉམ་དུ་རྒྱུ་དང་ནང་གནས་ཐག་མི་ཆོད། །གཡས་རྒྱུ་ནང་ཆུབ་བཟང་ངན་འདྲེས་མ་སྟེ། །གཡོན་རྒྱུ་ཕྱིར་འབུད་དེ་བཞིན་བཟང་ངན་འདྲེས། །བཟང་ངན་འདྲེས་མ་རིམ་གྲོས་བཅོས་པ་
ཙམ། །ཐག་མི་ཆོད་པ་རྣམས་ལ་རིམ་གྲོས་བསླུས། །དེ་ལྟར་རྟོགས་ལྡན་བཟང་པོ་རྣམས་ལ་ནི། །རླུང་ལྟས་བརྟགས་པ་ཞུ་བ་དབུས་གཙང་ལུགས། །རྒྱུན་དུ་བཟུང་མཁན་མིན་པས་མི་ཐིག་གསུངས། །རང་ཉིད་ཕྱོགས་སུ་འགྲོ་བ་ལ་སོགས་ཚེ། །གོམ་པ་དང་པོ་བོར་བའི་དུས་དེ་རུ། །རླུང་ལྟས་ངན་ན་མི་འགྲོ་བཤོལ་བ་དང་། །བཟང་ན་མགོ་ཐོན་བར་ཆད་མེད་རྟགས་ཡིན། །དེ་ནས་རྫོགས་རིམ་ཁྲིད་ནི་བསྒོམས་པའི་རྟགས། །མི་རྟག་འཆི་བ་ཉུང་ཉུང་ཡང་ཡང་དྲན། །ཚེ་འདིའི་བྱ་བ་གལ་ཆེན་གང་བས་ཀྱང་། །ཉམས་ལེན་སྒྲུབ་པ་གལ་ཆེན་དོན་གོ་ན། །འཆི་བ་མི་རྟག་བསྒོམས་པའི་རྟགས་ཡིན་ནོ། །ཁས་བླངས་སྡོམ་པ་དམ་ཚིག་ལེགས་པར་བསྲུང་། །ཐོས་བསམ་སྒོམ་ལ་དུས་རྣམས་ཐམས་ཅད་དུ། །བྱ་རྒྱུ་ཆོས་ལས་མེད་པ་ཞིག་བྱུང་ན། །དལ་འབྱོར་རྙེད་དཀའ་བསྒོམས་པའི་རྟགས་ཡིན་ནོ། །བཙན་པོས་མི་བྱེད་ཀ་མེད་བསྡིགས་པའམ། །ཕྱུག་པོས་རྔན་པ་ཆེན་པོ་སྟེར་བའམ། །མི་བྱ་ཀ་མེད་རང་ལ་གལ་ཐུག་ཀྱང་། །རྩ་བ་བཞི་པོ་གཏོང་བར་མི་བྱེད་ན། །རྒྱུ་འབྲས་ཁྲིད་རིམ་བསྒོམས་པའི་རྟགས་ཡིན་ནོ། །རང་གིས་ཅི་བྱས་ལམ་དུ་མ་
སོང་ཞིང་། །རང་གིས་བློ་སེམས་ཆོས་ལ་གཏད་བཞིན་དུ། །མི་དགེ་མི་རུང་ནད་གདོན་དགྲས་མནར་ཡང་། །དཀོན་མཆོག་ལྷ་ལ་ལོག་ལྟ་མི་སྐྱེ་ཞིང་། །ཅི་མཛད་ཁྱེད་ཤེས་ད་དུང་བློ་གཏད་ན། །སྐྱབས་འགྲོའི་ཁྲིད་རིམ་བསྒོམས་པའི་རྟགས་ཡིན་ནོ། །རང་གིས་ཉེས་པ་རྡུལ་ཙམ་མ་བྱས་པར། །མི་ཁ་རྔན་ཆེན་སྲོག་ལ་བསྡོ་ཤོམ་ཡང་། །ནམ་ཞིག་དེ་ཡང་སངས་རྒྱས་སར་བཞག་ལ། །སྐྱེ་བ་ཚེ་རབས་གཏན་ནས་བརླག་བསམ་པའི། །སུ་ལའང་བསམ་ངན་དེ་ལྟར་མི་འཆང་བ། །བྱང་ཆུབ་སེམས་བསྐྱེད་བསྒོམས་པའི་རྟགས་ཡིན་ནོ། །དངོས་སུ་སེམས་དགའ་ཁམས་དྭངས་དབང་པོ་གསལ། །རྨི་ལམ་ཁྲུས་བྱས་ལུས་ལས་མི་གཙང་ཐོན། །བདུད་རྩི་འོ་མ་འཐུང་དང་ནམ་མཁར་འཕུར་། །རྡོར་སེམས་སྒོམ་བཟླས་བྱས་པའི་རྟགས་ཡིན་ཏེ། །ཉམས་ལེན་དགེ་སྦྱོར་གང་ཡང་མ་བྱས་པར། །འཕུར་བ་རྨིས་ན་ཆས་ཀ་ཇེ་བསྲབ་འགྲོ། །དངོས་སུ་ཟས་མ་ཟོས་སྒྱུ་ཀྱང་མི་ལྟོགས་ཤིང་། །ལུས་ཉམས་བཟང་ཞིང་ཡིད་དགའ་བདེ་ཉམས་སྐྱེ། །རྨི་ལམ་ལོ་ལེགས་རིན་ཆེན་གཏེར་ཁ་རྙེད། །གོས་བཟང་གྱོན་རྨིས་མཎྜལ་རྟགས་ཡིན་ནོ། །
དངོས་སུ་མོས་གུས་གདུང་ཤུགས་དབང་མེད་འབར། །བླ་མའི་མཚན་ནས་འབོད་ཅིང་རྒྱང་འབོད་འཆོར། །གསོལ་བ་འདེབས་དུས་དབང་མེད་མཆི་མ་འཁྲུགས། །རྨི་ལམ་བླ་མ་མཇལ་ཞིང་དབང་ལུང་གནང་། །གེགས་སེལ་བོགས་འདོན་ལེགས་ཉེས་ལུང་སྟོན་མཛད། །རང་ཉིད་བླ་མ་དེ་ཉིད་དངོས་གྱུར་དང་། །ངོ་བོ་དབྱེར་མེད་འདུག་པར་ཤེས་པ་རྨིས། །བླ་མའི་རྣལ་འབྱོར་བསྒོམས་པའི་རྟགས་ཡིན་ནོ། །དབང་པོ་ཚོགས་བརྒྱད་མི་གསལ་གཉིད་པ་བཞིན། །དྲན་པ་མེད་པར་ཡུན་རིང་ཐོམ་མེར་ལུས། །ཞི་གནས་འཐོམ་པོ་སྐྱེ་བའི་རྟགས་ཡིན་ནོ། །འགྱུ་བ་བགག་ནས་ཅི་ཡང་མི་དྲན་པར། །ཐོམ་མེར་འདུག་པ་སྒོམ་དུ་རློམ་པ་ནི། །རྒྱ་ནག་ཧྭ་ཤང་ལྟ་བ་སྐྱེས་རྟགས་སོ། །རང་སེམས་རང་དབང་ཐོབ་པ་ལྟ་བུ་ཡི། །དམིགས་པ་གང་ཡང་མི་འཕྲོ་ཡུན་རིང་གནས། །ཐུན་མོང་ཞི་གནས་སྐྱེས་པའི་རྟགས་ཡིན་ནོ། །རང་སེམས་མ་བཅོས་ལྷུག་པར་གཞག་པའི་ཚེ། །ཧ་ཅང་མི་འཕྲོ་ཡུན་རིང་གནས་པ་ན། །ཚད་ལྡན་ཞི་གནས་སྐྱེས་པའི་རྟགས་ཡིན་ནོ། །གནས་པ་དེ་ཡི་ངོ་བོར་བལྟས་པའི་ཚེ། །སྟོང་པར་མཐོང་བའི་ངང་ལ་ཡུན་རིང་གནས། །ཞི་ལྷག་ཟུང་
འཇུག་རྟོགས་པའི་རྟགས་ཡིན་ནོ། །སེམས་ཀྱི་བྱུང་གནས་འགྲོ་གསུམ་ཁ་དོག་དབྱིབས། །སོ་སོར་དཔྱད་པས་གཅིག་ཀྱང་མ་རྙེད་པ། །ཐུན་མོང་ལྷག་མཐོང་ཤར་བའི་རྟགས་ཡིན་ནོ། །རྟོག་པ་གང་སྐྱེས་ངོ་བོར་གཅེར་གཅེར་བལྟས། །རང་ཞི་ཆུ་དང་ཆུ་རླབས་ལྟར་མཐོང་ན། །འགྱུ་བ་ལྷག་མཐོང་ཤར་བའི་རྟགས་ཡིན་ནོ། །ཁབ་མིག་སྐུད་པ་སྤྲད་ལྟར་མ་ཡེངས་པར། །གནས་དང་འགྱུ་བའི་ངོ་བོ་གང་ཤར་བལྟ། །གནས་འགྱུ་རྐྱང་དེད་ཤེས་པའི་རྟགས་ཡིན་ནོ། །དེ་ནས་དེ་ལྟར་དཀའ་གནད་མི་དགོས་པར་། །དྲན་པ་ཙམ་ནས་ཐོག་ཏུ་ཁྲིག་ཁྲིག་སླེབས། །ཉམས་ལེན་སྐྱོང་བདེ་ཡོད་པའི་རྟགས་ཡིན་ནོ། །ལྟོ་གོས་གཏམ་སོགས་འདོད་པ་ཆུང་དུ་སོང་། །ཆོས་ཕྱོགས་ཡོན་ཏན་སྣ་མང་བསླབ་མི་འདོད། །ཉམས་ལེན་མོས་གུས་གཉིས་པོ་སྙིང་པོར་གོ །འཇིག་རྟེན་བྱ་བ་ཀུན་ཀྱང་དགོས་མེད་རྟོགས། །སྒོམ་ཆེན་གསར་པས་གསེར་མི་འདོད་པའི་དུས། །བདེ་ཉམས་བྲོད་ཀ་རྙེད་པའི་རྟགས་ཡིན་ནོ། །ཆོས་རྣམས་ཐམས་ཅད་སྟོང་པ་ཡིན་པར་རྟོགས། །སྟོང་སྐད་མཐོ་ཞིང་ལས་འབྲས་མི་འཛེམ་པ། །སྟོང་ལྟ་ཧད་པོ་སྐྱེས་པའི་རྟགས་
ཡིན་ནོ། །རང་གི་ཉམས་ལེན་ངེས་ཤེས་ཐེ་ཚོམ་མེད། །སུ་ལའང་མི་མགུ་ཞེ་ཡིས་ཞབས་ན་གནོན། །གསལ་ཉམས་བརྟན་པོ་སྐྱེས་པའི་རྟགས་ཡིན་ནོ། །ཡུན་རིང་བསྒོམས་ཀྱང་ཤེས་རྒྱུད་སྔར་ལས་རྩུབ། །ཀོ་ལོང་སེར་སྣ་ཕྲག་དོག་སྔར་ལས་ཆེ། །མི་གཞན་སྒོམ་ཆེན་ཟེར་ཞིང་མཚང་ནས་འབྲུ། །སྒོམ་ཆེན་རྙིང་པས་ལྷམ་ཀླད་བསྡུ་བའི་དུས། །རྩུབ་ཉམས་ཆེན་པོ་སྐྱེས་པའི་རྟགས་ཡིན་ནོ། །མེ་ཆེན་འབར་བའི་སྔོན་དུ་དུད་པ་བཞིན། །དེ་དབང་མ་ཤོར་ངོ་བོ་སྐྱོང་ནུས་ན།། །བོགས་ཆེན་མྱུར་དུ་སྐྱེ་བའི་རྟགས་ཡིན་ནོ། །སྔོན་གྱི་ཉམས་མྱོང་ཐམས་ཅད་ཤུན་པར་བུད། །སེམས་ཀྱི་ཉམས་མྱོང་ངག་གིས་བརྗོད་མི་ཤེས། །ངེས་ཤེས་ང་རྒྱལ་ཐམས་ཅད་འཇའ་ལྟར་ཡལ། །རང་སེམས་ངོ་བོ་རྟོགས་པའི་རྟགས་ཡིན་ནོ། །ཉམས་དང་རྨི་ལམ་དག་སྣང་གཅིག་ཀྱང་མེད། །ངེས་འབྱུང་སྐྱོ་ཤས་མོས་གུས་ཇེ་ཆེར་འབར། །བར་ཆད་མེད་ཅིང་མི་ཚེ་སྒྲུབ་ལ་སྐྱེལ། །རྟགས་མེད་རྟགས་ཀྱི་རྒྱལ་པོ་ཞེས་བྱ་སྟེ། །བཀའ་བརྒྱུད་རྣམས་ཀྱིས་དེ་ལ་ཐུགས་རྩིས་ཆེ། །རང་སེམས་རྟོགས་པའི་གདེང་ལ་འཕོ་འགྱུར་མེད། །མ་རྟོགས་འགྲོ་ལ་ཤུགས་འབྱུང་སྙིང་རྗེ་སྐྱེ།
ཟས་ནོར་སྙན་གྲགས་འདོད་པ་སྤུ་ཙམ་མེད། །ཁྲིད་རིམ་གདམས་ངག་ལོ་ཟླ་སྦྲེལ་ན་ཡང་། །བློ་འཛིན་མ་བྱས་དཔེ་ལ་མ་བལྟས་ཀྱང་། །སེམས་ལ་གང་ཕན་བཤད་རྒྱུ་ཟད་མཐའ་མེད། །གཞན་ཕན་འགྲོ་དོན་རན་པའི་རྟགས་ཡིན་ནོ། །དེ་ལྟར་བསྒྲུབས་པའི་རྟགས་ཡིག་མདོར་བསྡུས་འདི། །བླ་མ་བརྩོན་འགྲུས་རྒྱ་མཚོས་བསྐུལ་བྱས་ནས། །ཤིང་སྦྲུལ་མགོ་ཡི་ཟླ་བའི་ཡར་ཚེས་ལ། །དགེ་སློང་རཱ་ག་ཨ་སྱ་ཞེས་བྱ་བས། །དགོང་མོའི་ཐུན་མཚམས་འགའ་ཞིག་ལ་སྨྲས་པ། །བསྐུལ་བ་པོ་ཡིས་བརྗེད་ཐོ་ཡི་གེར་བཏབ། །བློ་དམན་འགའ་ལ་ཕན་ཐོགས་རྒྱ་ཆེར་ཤོག །ལེའུ་སོ་བཞི་པའོ་མངྒ་ལཾ།། །།