ལམ་གྱི་རྒྱུད།
༡ [༢] གཉིས་པ་ལམ་གྱི་རྒྱུད་ནི། གཞི་རྒྱུད་ལ་སྒྲིབ་བྱེད་ཀྱི་དྲི་མ་དེ་ཉིད་སྦྱོང་བྱེད་ཀྱི་ཐབས་སུ་གྱུར་པ་ལ་བྱ་སྟེ། གཞི་ཤེས་པར་བྱེད་པ་དང་མར་འབྲེལ། འབྲས་བུ་འཐོབ་པར་བྱེད་པ་དང་ཡར་འབྲེལ་བས་གཞི་འབྲས་བར་གྱི་བྱ་བྱེད་འབྲེལ་བ་ཅན་དུ་གནས་པའི་ཕྱིར་ན་ལམ་གྱི་རྒྱུད་དོ། །ངོ་བོའི་སྒོ་ནས་དབྱེ་ན། དབང་བསྐུར་བ་དང་།༡ དམ་ཚིག་རྣམས་དང་།༢
སྡོམ་པ་དང་།༣ ཏིང་ངེ་འཛིན་དང་།༤ ལས་དང་།༥ དངོས་གྲུབ་ཀྱི་སྦྱོར་བ་༦ རྣམས་སོ། །(༡)(༡) དེ་ལ་དབང་བསྐུར་བ་ནི། བུམ་པ་དང་། གསང་བ་དང་། ཤེས་རབ་ཡེ་ཤེས་དང་། དེ་ཁོ་ན་ཉིད་དང་། འཇིག་རྟེན་པ་དང་འཇིག་རྟེན་ལས་འདས་པ་དང་། སློབ་མའི་དབང་དང་། ཕྱིར་མི་ལྡོག་པ་དང་། ཐ་མལ་གྱི་དབང་དང་། མཆོག་གི་དབང་དང་། འཇུག་པའི་ཆོ་ག་དང་། དངོས་གཞི་དང་། རྗེས་སུ་གནང་བ་དང་། ལུང་བསྟན་པ་དང་། གཟེངས་བསྟོད་པ་དང་། ཡོན་དབུལ་བ་དང་བཅས་པ་རྣམས་ཏེ། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབབ་དང་ཆུ་ནན་དང་། །བསྒྲགས་དང་རིན་ཆེན་དོར་བ་དང་། །ལྷ་དབབ་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་མཐོང་བསྟན། །ཚོགས་མཆོད་ཡོན་དང་རྣམ་བཅོ་བརྒྱད། །འདི་ཡིས་ཡན་ལག་རྫོགས་པར་འགྱུར། །ཞེས་པ་ལྟ་བུའོ། (༢) དམ་ཚིག་ལ་ཡང་ངོ་བོའི་སྒོ་ནས་དབྱེ་ན་བསྲུང་བའི་དམ་ཚིག་དང་། བསྒྲུབ་པའི་དམ་ཚིག་གཉིས་ལས། དང་པོ་ནི། རྩ་བའི་ལྟུང་བ་དང་ཡན་ལག་གི་དམ་ཚིག་གཉིས་སོ། །དེ་ཡང་རིམ་པས་ལྟུང་བ་བཅུ་བཞི་དང་། སྦོམ་པོ་བརྒྱད་རྣམས་སོ། །ཇི་སྐད་དུ། སློབ་དཔོན་སྨད་པར་མི་བྱ་ཞིང་། །བདེ་གཤེགས་བཀའ་ལས་འདའ་མི་བྱ། །སྤུན་ལ་སྨད་པར་མི་བྱ་ཞིང་། །སེམས་ཅན་རྣམས་ལ་བྱམས་མི་སྤང་། །བྱང་ཆུབ་སེམས་ནི་དོར་མི་བྱ། །རང་གཞན་ཆོས་ལ་སྨད་
མི་བྱ། །མ་སྨིན་པ་ལ་གསང་མི་བསྒྲག །ཕུང་པོ་རྣམ་པར་སྨད་མི་བྱ། །དག་པའི་ཆོས་ལ་སོམ་ཉི་སྤངས། །གདུག་པ་ཅན་ལ་བྱམས་པ་སྤངས། །མིང་སོགས་བྲལ་ལ་དེར་མི་རྟོག །དད་ལྡན་སེམས་ནི་སུན་མི་དབྱུང་། །དམ་ཚིག་སྤངས་དང་བུད་མེད་སྨོད། །རྩ་བའི་ལྟུང་བ་ཞེས་བརྗོད་དོ། །ཞེས་བཤད་པ་ལ་སོགས་པ་རྣམས་དང་། གཞན་ཡང་ཏིང་ངེ་འཛིན་དང་། སྤྱོད་ལམ་དང་། བཟའ་བ་དང་མི་འབྲལ་བའི་ཡོ་བྱད་སོགས་སྒྲུབ་པའི་དམ་ཚིག་དང་། རིགས་ལྔ་སོ་སོའི་བརྟུལ་ཞུགས་ཏེ་ཏིང་ངེ་འཛིན་གྱི་དམ་ཚིག་དང་། ལས་དང་པོ་པ་དང་། ཅུང་ཟད་བརྟན་པ་ཐོབ་པ་དང་། བརྟན་པ་ཆེར་ཐོབ་པའི་དམ་ཚིག་དང་། སྐུ་གསུང་ཐུགས་རྡོ་རྗེའི་དམ་ཚིག་དང་། བུམ་དབང་དང་། གསང་དབང་དང་། ཤེར་དབང་གི་དམ་ཚིག་དང་། གཞན་ཡང་བསྙེན་པའི་དམ་ཚིག་དང་། འཇིག་རྟེན་པ་སོ་སོའི་བསྒྲུབ་པའི། ལས་སོ་སོའི། འཇིག་རྟེན་ལས་འདས་པའི་བསྒྲུབ་པའི། བསྒྲུབ་པ་ཆེན་པོའི་དམ་ཚིག་ལ་སོགས་པ་རྣམས་དང་། འདི་ལས་ཐུན་མོང་མ་ཡིན་པ་གཞན་རྣམས་ཀྱང་ཤེས་པར་བྱའོ། (༣) སྡོམ་པ་ནི། སྔགས་ཀྱི་ཚུལ་ཁྲིམས་དེ་འཐོབ་པར་བྱེད་པའི་ཆོ་ག་ནི། རིག་པ་འཛིན་པའི་སྡེ་སྣོད་འདིར་བཤད་པའི་དབང་བསྐུར་བའོ། །ཐོབ་པའི་དུས་ནི། དབང་སོ་སོའི་དངོས་གཞི་རྫོགས་པ་ནའོ། །ངོ་བོ་ནི། བྱིན་གྱིས་བརླབས་པའི་སེམས་ཀྱི་རྒྱུན་གྱི་ཁྱད་པར་ཉེས་པ་རྣམས་ཟློག་པར་བྱེད་པ་ཡོན་ཏན་གྱི་རྟེན་མཐུ་བརྟས་པའོ། །
དབྱེ་ན། ཐུན་མོང་དང་ཐུན་མིན་གཉིས་ལས། དང་པོ་ནི། བྱ་བ་སོགས་ཕྱི་རྒྱུད་ཀྱི་སྡོམ་པ་དང་། གཉིས་པ་ནི། བླ་ན་མེད་པའི་རྒྱུད་འདིར་བདེ་བས་བྱིན་གྱིས་རློབ་པ་སྟེ། བུམ་པ་དང་། གསང་བ་དང་། ཤེས་རབ་ཡེ་ཤེས་ཀྱི་སྡོམ་པ་རྣམས་ཏེ། འཇིག་རྟེན་པ་དང་། འཇིག་རྟེན་ལས་འདས་པ་གཉིས་གཉིས་སུ་རྟོགས་པར་བྱ་བ་ལ། གཏོང་བའི་དུས་ནི། སྤྱིར་རྩ་བའི་ལྟུང་བ་བྱུང་བ་དང་། བྱེ་བྲག་སྔགས་ཀྱི་ཐེག་པ་སྤང་བ་དེའི་ཚེ་ནའོ། །གསོ་བའི་ཆོ་ག་ནི། སྡིག་པ་ཡོངས་སུ་སྦྱངས་ནས་སླར་ཡང་དབང་བསྐུར་བའི་ཆོ་གས་བླངས་པ་ཡིན་ནོ། །༡ (༤) ཏིང་ངེ་འཛིན་ཀྱང་། མཚན་མ་དང་བཅས་པ་དང་མཚན་མ་མེད་པ་གཉིས་སོ། །དེ་ལ་བྱ་བའི་རྒྱུད་དུ་དེ་ཁོ་ན་ཉིད་བཞི་ལ་སོགས་པ་དང་། བླ་མེད་དུ་ཀུན་བཏགས་བསྐྱེད་རིམ་གྱི་རྣལ་འབྱོར་དང་། ༡ ཡོངས་གྲུབ་རྫོགས་རིམ་གྱི་རྣལ་འབྱོར་དང་། ༢ གཉིས་སུ་བྱུང་བའི་དང་པོ་ལའང་། ངོ་བོ་དང་། ཡན་ལག་དང་། དབྱེ་བ་དང་། གནས་སྐབས་དང་། དངོས་བཏགས་ཀྱི་ཁྱད་པར་རོ། དང་པོ་ནི། སྣང་བ་རིས་མེད་ལ་སྙིང་རྗེ་ཆེན་པོའི་འཕེན་པ་དང་ཏིང་ངེ་འཛིན་གྱི་ཞུ་བདེ་དང་མཚུངས་ལྡན་དུ་གྱུར་པའི་ལྷ་སྐུའི་རྣམ་པ་ཅན་སྲིད་པ་གསུམ་དང་ཆོས་མཐུན་དུ་བསྒོམས་པས་ལྷ་སྐུ་གསུམ་གྱི་སྨིན་བྱེད་དུ་འགྲོ་བ་གང་ཞིག་བསྐྱེད་རིམ་གྱི་ངོ་བོར་གནས་པ་ཡིན་ཏེ། ཡན་ལག་ནི། ཐུན་མཚམས་སམ་མཆོད་པ་དང་བསྟོད་པ་ལ་སོགས་པ་དང་རྣལ་འབྱོར་ཆེན་པོ་བརྒྱད་ལ་སོགས་པ་རྣམས་སོ། །དབྱེ་བ་ནི། དང་པོ་སྦྱོར་བ་དང་། དཀྱིལ་འཁོར་རྒྱལ་མཆོག་དང་། ལས་རྒྱལ་
མཆོག་དང་། བསྙེན་པ་དང་། ཉེར་སྒྲུབ་དང་། སྒྲུབ་པ་དང་། སྒྲུབ་པ་ཆེན་པོ་དང་། རྣལ་འབྱོར་དང་། རྗེས་སུ་རྣལ་འབྱོར་དང་། ཤིན་ཏུ་རྣལ་འབྱོར་དང་། རྣལ་འབྱོར་ཆེན་པོ་རྣམས་སོ། །གནས་སྐབས་སུ་སྦྱོར་ན་ལས་དང་པོ་པ་དང་། ཡེ་ཤེས་ཕེབས་པ་དང་། ཡེ་ཤེས་ལ་དབང་བ་དང་། ཡེ་ཤེས་ལ་ཆེས་དབང་བའོ། །བསྐྱེད་རིམ་དངོས་ནི། ཡན་ལག་བདུན་དང་ལྡན་པ་ཉིད་ཡིན་ལ་གཞན་རྣམས་ནི་བཏགས་པའོ། གཉིས་པ་ལའང་ངོ་བོ། ངེས་ཚིག །དབྱེ་བ་རང་བཞིན་དང་གསུམ་ལས། དང་པོ་ནི། རླུང་ཡིད་སེམས་གསུམ་དབུ་མར་ཐིམ་པས་བདེ་སྟོང་གི་ཡེ་ཤེས་མངོན་དུ་གྱུར་པ་གང་ཞིག་རྫོགས་རིམ་གྱི་ངོ་བོར་ངེས་པ་ཡིན་ཏེ། དབྱེ་ན། དངོས་དང་།༡ བཏགས་པ་དང་།༢ མཚན་མ་ཅན་དང་།༣ མཚན་མ་མེད་པ་དང་།༤ ཁྱབ་བྱེད་དང་།༥ ཁྱབ་བྱའི་རིམ་པ་རྣམས་སོ། །༦ ༡-དེ་ལ་དང་པོ་ནི། ཞུ་བའི་བདེ་བ་ལྷན་སྐྱེས་ཆེན་པོ་དང་། སྒྱུ་མའི་སྐུ་དང་། རང་བཞིན་ལྷན་སྐྱེས་དང་། ཟུང་འཇུག་གི་སྐུ་དང་། རླུང་དྷཱུ་ཏིར་ཐིམ་པའི་མཐར་ཐོབ་པ་ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བའི་སྣང་བ་གསུམ་དང་། དགའ་བ་གསུམ་དང་། དེ་རྣམས་དངོས་སུ་ཐོབ་པའི་ལམ་ཡིན་པ་དེ་རྣམས་ལ་རྫོགས་པའི་རིམ་པ་དངོས་ཞེས་བྱ་ལ། ༢- གཞན་དུ་རྩ་དང་། རླུང་དང་། ཕྲ་མོ་དང་། ཐིག་ལེའི་རྣལ་འབྱོར་དང་། ཕྱག་རྒྱའི་རིམ་པ་རླུང་དབུ་མར་འཇུག་པ་དང་། གནས་པ་དང་ཐིམ་པར་བྱེད་པའི་ལས་
ཅན་རྣམས་ནི་རྫོགས་རིམ་དངོས་མ་ཡིན་ཀྱང་དེ་འཐོབ་བྱེད་ཡིན་པས་རྫོགས་རིམ་དུ་བཏགས་པ་ཡིན་ལ། ༣- མཚན་མ་ཅན་གྱི་རྫོགས་རིམ་ལའང་དངོས་བཏགས་གཉིས་ལས། སྔ་མ་ནི། སེམས་དང་སེམས་ལས་བྱུང་བའི་མཚན་ཉིད་ཅན་གྱི་སྣང་བ་གསུམ་ནི་འོད་གསལ་བར་གནས་ཡོངས་སུ་མ་གྱུར་པ་སྟེ་སོ་སོའི་སྐྱེ་བོ་ཐམས་ཅད་དང་གཞན་ལ་ཡང་ཡོད་དོ། །ཕྱི་མ་ནི། སྒྲ་དོན་ཅན་གྱི་རྟོགས་པ་དང་། མཚུངས་ལྡན་དུ་གྱུར་པ་གང་ཡིན་པ་སྟེ། དོན་གྱི་འོད་གསལ་མ་ཐོབ་པའི་བར་དུ་ཅི་རིགས་པར་ཡོད་དོ། །༤- མཚན་མ་མེད་པའི་རྫོགས་རིམ་ཡང་དངོས་དང་བཏགས་པ་གཉིས་ལས། དང་པོ་ནི། འཕགས་རྒྱུད་ཀྱི་རྟོགས་པ་དང་། ཕྱི་མ་ནི། སོ་སྐྱེའི་གནས་སྐབས་ན་ཡང་ཡོད་དོ། །༥- ཁྱབ་བྱེད་ཀྱི་རྫོགས་པའི་རིམ་པ་ནི། སོ་སོར་སྡུད་པ་དང་། བསམ་གཏན་དང་། སྲོག་རྩོལ་དང་། འཛིན་པ་དང་། རྗེས་སུ་དྲན་པ་དང་། ཏིང་ངེ་འཛིན་དང་། དགའ་བ་བཞི་དང་། སྣང་བ་དང་། སྣང་བ་མཆེད་པ་དང་། སྣང་བ་ཉེ་བར་ཐོབ་པ་དང་། འོད་གསལ་བ་དང་། སྣང་ཕྱོགས་དང་། སྟོང་ཕྱོགས་དང་། བདེ་བའི་ཕྱོགས་དང་། ཕྱོགས་དང་བྲལ་བ་རྣམས་ཏེ་གང་རྫོགས་པའི་རིམ་པ་དེ་ཐམས་ཅད་ལ་ཁྱབ་པའི་ཕྱིར་རོ། །༦- ཁྱབ་པའི་རྫོགས་རིམ་ནི། ལུས་ངག་སེམས་གསུམ་རྣམ་པར་དབེན་པ་དང་།
བདག་བྱིན་གྱིས་བརླབ་པའི་རིམ་པ་དང་། འོད་གསལ་བ་དང་། ཟུང་འཇུག་དང་། རྫོགས་པའི་རིམ་པར་སྤྱོད་པའི་ཏིང་ངེ་འཛིན་དང་། བདག་བྱིན་གྱིས་བརླབ་པའི་སྒོ་དང་། སྣ་ཚོགས་རྡོ་རྗེ་དང་། ནོར་བུ་འགེངས་པ་དང་། ཛ་ལནྡྷ་ར་དང་། བསམ་མི་ཁྱབ་དང་། རང་བཞིན་གྱིས་བརླབ་དང་། དཀྱིལ་འཁོར་འཁོར་ལོ་དང་། རྒྱུད་ཀྱི་རིམ་པ་དང་། སྔགས་དང་། ཡེ་ཤེས་དང་། གསང་བའི་རིམ་པ་དང་། དབྱིབས་དང་། ཆོས་དང་། རྩ་རླུང་ཐིག་ལེའི་རིམ་པ་དང་། མེ་དང་། ལས་དང་། ཡེ་ཤེས་དང་། དམ་ཚིག་དང་། ཕྱག་རྒྱ་ཆེན་པོ་སྟེ་བཞི་དང་། སྙིང་གའི་ཐིག་ལེ་དང་། ནོར་བུ་དང་། སྤྲུལ་པ་དང་། མི་ཤིགས་པའི་རྣལ་འབྱོར་ལ་སོགས་དབྱེ་བའི་སྒོ་ནས་དཔག་ཏུ་མེད་པར་ཡོད་ལ། དེ་དག་གི་གནད་གང་ལ་བསྣུན་པའི་ཡུལ་ལུས་ཆགས་གནས་འཇིག་པའི་ཚུལ་ལ་ཇི་ལྟར་གནད་དུ་བསྣུན་ཞེ་ན། ཡུལ་དང་། དུས་དང་། ལུས་དང་། རླུང་དང་། དམིགས་པའི་གནད་རྣམས་སོ། །དེ་རྣམས་ཀྱིས་ཡོན་ཏན་མངོན་དུ་བྱེད་ཅིང་དྲི་མ་རྣམས་སྦྱོང་བར་བྱེད་པ་ཡིན་ཀྱང་ད་དུང་རྒྱུ་རྐྱེན་ལ་ལྟོས་དགོས་པའི་ཕྱིར་འདུ་བྱས་པའི་མཚན་ཉིད་ཅན་ནོ། །དེ་དག་རྣམས་ཀྱིས་ཡེ་ཤེས་ཕེབས་པ་ནི། ཚོགས་ལམ་ཆུང་ངུ་སྟེ་དྲན་པ་ཉེ་བར་བཞག་པ་དང་། ཡེ་ཤེས་ལ་ཆེས་དབང་བས་ཡང་དག་པའི་སྤོང་བ་སྟེ་ཚོགས་ཀྱི་ལམ་འབྲིང་པོ་དང་། དེ་ཉིད་སྤྱོད་པས་མཐར་ཕྱིན་ཅིང་ལྟ་སྟངས་རྣམས་ལ་ཐོགས་པ་མེད་པ་དང་། སངས་རྒྱས་རྣམས་མངོན་དུ་གྱུར་པ་དང་། སྐྱེ་བ་གཅིག་གིས་
ཐོགས་པ་ནི་རྫུ་འཕྲུལ་གྱི་རྐང་པ་ཅན་ཚོགས་ལམ་ཆེན་པོ་ཡིན་ནོ། །རྫོགས་རིམ་དངོས་ཀྱི་སེམས་དབེན་པ་ཐོབ་པ་ཞུ་བདེའི་མཐར་ཐུག་པ་དབང་པོ་ལྔའི་རང་བཞིན་དྲོད་དང་། རྩེ་མོ་ཞེས་བྱ་ལ། ཡེ་ཤེས་ཀྱི་སྐུ་ནི་ནམ་མཁའ་མཛོད་ཐོབ་པ་སྟོབས་ལྔ་དང་ལྡན་པ་བཟོད་པ་དང་། ཆོས་མཆོག་སྟེ་འདིར་རྩ་རླུང་ཐིག་ལེའི་འགྲོས་རྣམས་ཐིམ་པའི་ཡེ་ཤེས་ཡོན་ཏན་གྱི་གཞིར་གྱུར་པས་གོང་མའི་ལམ་དང་མཐུན་པ་བཅུ་གཉིས་སུ་དབྱེ་བ་ཡོད་ལ། དེའི་ཚེ་ཡེ་ཤེས་ཀྱི་སྐུ་ལ་སངས་རྒྱས་ཞེས་བཏགས་སོ། །དོན་དམ་པར་སོ་སོ་རང་གི་རིག་པ་ཐམས་ཅད་སྟོང་པ་འོད་གསལ་བ་ནི་བྱང་ཆུབ་ཀྱི་ཡན་ལག་མཐོང་བའི་ལམ་སྟེ་འདི་ལ་དགའ་བའི་རང་བཞིན་བདེན་པ་བཅུ་དྲུག་དང་ལྡན་ནོ། །སློབ་པའི་ཟུང་འཇུག་ནི་ས་ལྷག་མ་དགུ་དང་། ས་བཅུ་ཙམ་དང་། རྒྱུན་མཐའི་ཡེ་ཤེས་དག་ལས་རྣམ་གྲོལ་ལམ་དང་། ཁྱད་པར་གྱི་ལམ་ནི་ས་བཅུ་གཉིས་སམ་བཅུ་གསུམ་སྟེ་ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པ་སྟེ། འདི་རྣམས་ནི་སྒོམ་པའི་ལམ་འཕགས་ལམ་ཡན་ལག་བརྒྱད་དོ། རྒྱུད་ཀྱི་སྦྱོར་བ་ནི། (༥) ལས་དང་། དངོས་གྲུབ་ཀྱི་རྒྱུད་དོ། །དང་པོ་ནི། བསམ་གཏན་གྱི་ལས་དང་། སྦྱིན་སྲེག་གི་ལས་དང་། འཁྲུལ་འཁོར་གྱི་ལས་དང་། སྦྱོར་བའི་ལས་ཕལ་པ་དང་། གཞན་ཡང་ལས་ཆེན་བཅུ་གཉིས་ལ་སོགས་པ་རྣམས་སོ། །
(༦) དངོས་གྲུབ་ཀྱི་རྒྱུད་ལའང་གཉིས་ཏེ། དང་པོ་ནི། རྫས་ཀྱི་རིག་པ་འཛིན་པ་དང་། ལུས་དང་། ལོངས་སྤྱོད་དང་། འདོད་པ་དང་། གཟུགས་ཀྱི་རིག་པ་འཛིན་པ་དང་། གཟུགས་མེད་པར་འགྲོ་བའོ། །ངང་པ་དང་། མཁའ་ལྡིང་དང་། ཁྱུ་མཆོག་ལ་སོགས་བཞོན་པ་དང་། རྡོ་རྗེ་དང་། འཁོར་ལོ་དང་། པདྨ་ལ་སོགས་པ་དང་། རིན་པོ་ཆེ་བདུན་དང་། འཇིག་རྟེན་པ་རྣམས་ཀྱི་མཚོན་ཆ་དང་། ཡི་གེ་དང་། མིང་གི་སྔགས་ཀྱི་རིག་པ་འཛིན་པ་ལ་སོགས་པ་དང་། གཞན་ཡང་ལྷ་དང་ཀླུ་དང་། གནོད་སྦྱིན་དང་། སྲིན་པོ་ལ་སོགས་པ་བསྒྲུབས་པས་གཞན་ལ་བརྟེན་པའི་འཇིག་རྟེན་པའི་དངོས་གྲུབ་མཐའ་ཡས་པ་རྣམས་དང་། དེ་ལས་ཆེན་པོ་ཙམ་བསྡུས་པས་རིལ་བུ་སོགས་ཆེན་པོ་བརྒྱད་རྣམས་དང་། འདོད་པའི་རིག་འཛིན་དང་། གཟུགས་ཀྱི་རིག་འཛིན་རྣམས་སོ། །དེ་ལ་སྤྱོད་པ་ནི། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་དོ། །ཡང་ན་ཨ་བ་དྷཱུ་ཏི་དང་། ཀུན་བཟང་དང་། ཕྱོགས་ལས་རྣམ་པར་རྒྱལ་བ་དང་གསུམ་མོ། །