སངས་རྒྱས་ཀྱི་བསྟན་པ་ལ་དགྲ་བར་པ་བྱུང་བ།
༈ དེའི་རྗེས་སུ་དྷརྨ་ཙནྡྲའི་ཞང་པོའི་བུ་ཝ་ར་ཎ་སིའི་རྒྱལ་པོ་སངས་རྒྱས་ཕྱོགས་ཞེས་བྱ་བ་ཞིག་བྱུང་། དེ་རྒྱ་ནག་པོའི་ཡུལ་དུ་མདོ་སྡེ་སྨྲ་བའི་སློབ་དཔོན་འགའ་ཞིག་བརྫངས་པའི་དྲིན་ལན་དུ་གསེར་མི་ཁུར་བརྒྱ་ལ་སོགས་པ་མི་སྟོང་ཕྲག་བཅུའི་ཁུར་གྱི་ཡོ་བྱད་བཟང་པོ་དག་གི་སྐྱེས་བྱིན་ནོ། །ནོར་དེ་དག་གིས་དབུས་དང་ནུབ་ཕྱོགས་ཀྱི་རྒྱལ་ཕྲན་གཙོ་བོ་རྣམས་མགུ་བར་བྱས་ནས། ཐམས་ཅད་ཀྱིས་དམག་གི་དཔུང་རོགས་དང་བཅས་ཏེ་སྟག་གཟིག་གི་རྒྱལ་པོ་དང་དཔའ་བོ་ཕལ་ཆེར་བསད། ཉི་འོག་དང་ནུབ་ཕྱོགས་ཀྱི་རྒྱལ་ཁམས་ཕལ་ཆེར་ལ་སངས་རྒྱས་ཕྱོགས་ཀྱིས་ལུང་བཏང་ནས་སྔར་གྱི་ལྷ་ཁང་ཉམས་པ་ཐམས་ཅད་གསོས། དཔལ་ན་ལེནྡྲར་ཆོས་གཞི་བརྒྱད་ཅུ་རྩ་བཞི་བཙུགས་པ་ལས་རྒྱལ་པོ་ཉིད་ཀྱིས་བདུན་ཅུ་རྩ་གཅིག། གཞན་རྣམས་བཙུན་མོ་དང་བློན་པོས་བཙུགས། དགེ་འདུན་རྣམས་རྒྱལ་པོའི་ཁང་བཟང་གི་རྩེ་མོར་མཆོད་ཅིང་། མུ་སྟེགས་བྱེད་རྣམས་ལ་སྒོ་ཁང་གི་ཕྱི་རོལ་དུ་ཟས་དག་སྟེར་རོ། །དེ་ནས་ལྷོ་ཕྱོགས་ཀྱི་ཡུལ་ཀྲྀཥྞ་རཱ་ཛར་སློབ་དཔོན་མཱ་ལེ་ཀ་བུ་དྷི་ཞེས་བྱ་བ་བྱུང་། ཆོས་གཞི་ཉི་ཤུ་ཙམ་བཙུགས་ཐེག་ཆེན་དར་བར་བྱས། མཐར་ཏུཥྐཱི་དམག་གིས་བཀྲོངས་ཁྲག་འོ་མར་ཟགས། ཁོང་ནང་ནས་མེ་ཏོག་མང་པོ་ཐོན་ནས་བར་སྣང་ཁེངས་པར་བྱས་སོ། །སློབ་དཔོན་ཀུན་ཏུ་བཟང་པོ་ཞེས་བྱ་བ་གཅིག་ཀྱང་བྱུང་སྟེ་དེས་ཀྱང་བསྟན་པ་ལ་བྱ་བ་ཆེར་བྱས་འགྲོ་ཕན་རྒྱ་ཆེར་བྱུང་བར་གྲགས་སོ། །