རྒྱས་པའི་སྦྱིན་སྲེག་ཚེ་བསོད་དཔལ་འབར།
ཟབ་ཆོས་པདྨ་དྲག་ཁྲོས་ལས༔ རྒྱས་པའི་སྦྱིན་སྲེག་ཚེ་བསོད་དཔལ་འབར་བཞུགས༔ ཐོད་ཕྲེང་རྩལ་ལ་ཕྱག་འཚལ་བསྟོད༔ པདྨ་དབང་གི་རྣལ་འབྱོར་པས༔ ཚེ་དང་བསོད་ནམས་རྒྱས་པའི་ཕྱིར༔ རྒྱས་པའི་མེ་མཆོད་འདི་ལྟར་བྱ༔ མཎྜལ་སེར་པོ་གུར་གུམ་དང་༔ དྲི་བཟང་ཆང་གིས་ཆག་ཆག་གདབ༔ ཚངས་པའི་ཐིག་ནི་ལེགས་པར་སྤྲོ༔ ལྷ་གྲངས་མཉམ་པའི་པད་འདབ་ལ༔ རྡོ་རྗེ་སེར་པོ་མེ་རིས་བསྐོར༔ སེར་པོའི་ཤིང་ལ་ཐབ་ཁུང་བརྩིག༔ གྲུ་བཞི་རྒྱ་ཁྱོན་མཛེས་པར་བྱ༔ ཡམ་ཤིང་དག་གི་ངོས་ལ་ནི༔ ཚེ་བསོད་རྒྱས་པའི་འདོད་གསོལ་འབྲི༔ སྲེག་རྫས་སེར་ཆས་ཅི་མང་བསགས༔ མེ་ལྷ་སེར་པོ་རྒྱན་ལྡན་བསྐྱེད༔ སྤྱན་འདྲེན་མཆོད་བསྟོད་ཚུལ་བཞིན་བྱ༔ མེ་ལྷའི་ལྟོ་བར་ལྷ་ཚོགས་རྣམས༔ སྐུ་མདོག་སེར་པོར་སྒྱུར་བར་བྱ༔ ཡང་ན་མེ་ལྷ་འོད་དུ་བཞུ༔ ལྷ་ཚོགས་མེ་ཡི་ཀློང་དུ་བསྐྱེད༔ སྲེག་རྫས་འབུལ་ཞིང་གསོལ་བ་གདབ༔ པུཥྟིངྐུ་རུ་ཡེ་སྭཱ་ཧཱ༔ སྔགས་དང་འདོད་གསོལ་སྦྱར་བ་ལ༔ སྲེག་རྫས་ཡམ་ཤིང་ཅི་མང་འབུལ༔ བསྟོད་པས་བསྟོད་ཅིང་འཕྲིན་ལས་བཅོལ༔ ཡེ་ཤེས་པ་གཤེགས་དམ་ཚིག་བསྡུ༔ བསྔོ་སྨོན་བརྗོད་ཅིང་མཐའ་རྒྱས་སྐྱོང་༔ པདྨ་དྲག་པོའི་རྣལ་འབྱོར་པས༔ རྒྱས་པའི་སྦྱིན་སྲེག་འདི་བརྩམས་ན༔ ཚེ་བསོད་ཉམས་རྟོགས་མཐའ་རུ་རྒྱས༔ གང་བརྩམས་འཕྲིན་ལས་འགྲུབ་པར་འགྱུར༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ས་མ་ཡཱ༔ རྒྱ་རྒྱ་རྒྱ༔ རིག་འཛིན་ཉི་མ་གྲགས་པས་ཤངས་ཟབ་བུ་ལུང་ནས་གདན་དྲངས་པའོ། །མངྒ་ལཾ། །