ལྔ་བ་བསམ་གཏན་གཟུགས་མེད་སྦྱིན་སོགས་དང༌།།ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌།ཡུལ་གང་ལ་འཇུག་པ།

ལྔ་བ་བསམ་གཏན་གཟུགས་མེད་སྦྱིན་སོགས་དང༌།།ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌།ཡུལ་གང་ལ་འཇུག་པ་དང༌། དེའི་བྱེད་ལས་བསྟན་ཚུལ་ཇི་ལྟར་ཡིན་ཞེས་པའི་ལན།

བསམ་གཏན་གཟུགས་མེད་སྦྱིན་སོགས་དང༌། །ཞེས་སོགས་ཀྱིས་བསྟན་པའི་འཇུག་སྒྲུབ་ཀྱི་ངོ་བོ་དང༌། ཡུལ་གང་ལ་འཇུག་པ་དང༌། དེའི་བྱེད་ལས་བསྟན་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ལ་འཇུག་སྒྲུབ་གྱི་ངོ་བོའམ་འཇུག་སྒྲུབ་གྱི་མཚན་ཉིད། ཐེག་ཆེན་སྦྱོར་ལམ་ཡན་གྱི་སྒོམ་བྱུང་གི་རྟོགས་པ་ལ་གནས་པའི་སྐབས་ཀྱི་བྱང་སེམས་ཀྱི་སྒྲུབ་པ་དེ་ཡིན་ཏེ། ཉ་ཊཱིཀ་ལས། འཇུག་པའི་སྒྲུབ་པ་ནི། བྱང་སེའི་སྒྲུབ་པ་གང་ཞིག་སྦྱོར་བའི་བྱ་བ། འདིར་སྨོས་འཇུག་སྒྲུབ་ཀྱི་མཚན་ཉིད། འཇུག་ཡུལ་ཐེག་ཆེན་དགུ་ཆར་རམ་གང་རུང་ལ་འཇུག་ཅིང་འཛེག་པའི་སྒྲུབ་པའོ། །དབྱེ་ན་དགུའོ། །ཞེས་གསུངས་སོ། །འཇུག་ཡུལ་ནི་མདོ་ལུགས་མ་ལས། འཇུག་པའི་བསྒྲུབ་པ་ཞེས་པའི་རྒྱུ་ཅི་ཞེ་ན། རྣམ་ཀུན་མཁྱེན་པའི་ཚུལ་དེ་ཆོས་ཐམས་ཅད་དངོས་པོའི་ངོ་བོ་ཉིད་མེད་པ་ལ་སློབ་ཅིང་འཇུག་པའི་བསྒྲུབ་པ་ཡིན་པའི་ཕྱིར་རོ། །ཞེས་གསུངས་ལ། ཉ་ཊཱིཀ་ལས། དབྱེ་ན་དུ་ཞེ་ན། བསམ་གཏན་གཟུགས་མེད་ནས། རྣམ་ཀུན་མཁྱེན་པའི་ཚུལ་ལ་འཇུག་པའི་སྒྲུབ་པ་ཞེས་དགུའོ། །ཞེས་གསུངས་པ་ལྟར་འཇུག་ཡུལ་དགུ་ཡོད་ན་མདོ་ལུགས་མ་ལས། བསམ་གཏན་གཟུགས་མེད་སྦྱིན་སོགས་དང༌། །ཞེས་པ་ནས། ཆེད་དུ་བྱ་དང་མངོན་ཤེས་དྲུག །ཅེས་པ་རྣམས་ཀྱིས་སྒྲུབ་པའི་ངོ་བོ་སྟོན་ཏོ། །རྣམ་ཀུན་མཁྱེན་པའི་ཚུལ་ལ་ནི། །འཇུག་པའི་བསྒྲུབ་པ་ཞེས་པས་ཡུལ་གང་ལ་འཇུག་པ་སྟོན་ནོ། །ཞེས་འཇུག་ཡུལ་རྣམ་ཀུན་མཁྱེན་པའི་ཚུལ་ལས་གཞན་མ་གསུངས་པའི་རྒྱུ་མཚན་གང་ཡིན་བརྟག་པར་བྱའོ། །འཇུག་ཡུལ་རྣམ་ཀུན་མཁྱེན་པའི་ཚུལ་ལ། ཉ་ཊཱིཀ་ལས། དེ་ནས་འཚང་རྒྱ་བར་སྤྲོ་བས་འབྲས་བུ་རྣམ་པ་ཐམས་ཅད་མཁྱེན་པའི་ཚུལ་ལ་ཡང་དག་པར་གནས་པའི་མཚན་ཉིད་ཀྱི་སྒྲུབ་པ་སྟེ། རྣམ་མཁྱེན་ཉིད་ཐོབ་ནས་ཀྱང་ཆོས་ཀྱི་འཁོར་ལོ་བསྐོར་བར་བྱེད་དོ། །ཞེས་སོ། །ཞེས་གསུངས་མོད་རང་ལུགས་ལ་འཐད་མིན་དཔྱད། ཡང་ཉ་ཊཱིཀ་ལས། ཆེན་པོ་བདུན་དང་ལྡན་པས་འདི་ཐེག་ཆེན་ནོ། །མཚན་གཞི་ནི། དེ་བདུན་ཡང་དེ་ཡིན་ཞིང༌། ཞེས་པ་ནས། ཐེག་ཆེན་གྱི་ས་བཅུ་ལམ་ལྔ་སོགས་མཐའ་ཡས་སོ། །ཞེས་ཆེན་པོ་བདུན་དང་ལམ་ལྔ་ཐེག་ཆེན་ཡིན་པར་གསུངས་པ་ལ་མདོ་ལུགས་མ་ལས། རིགས་པས་དཔྱད་ན་ཅིར་ཡང་མ་གྲུབ་ཙམ་གྱི་སྟོང་ཉིད་ནི་སྙིང་པོ་མེད་པའི་ཕྱིར། ཡེ་ཤེས་དང་ཐེག་ཆེན་མ་ཡིན་ཏེ། ཞེས་དང༌། དེས་ན་སྐབས་འདིའི་སྟོང་ཉིད་ཀྱི་ངོ་བོ་ནི་ཐེག་ཆེན་དང༌། ཡེ་ཤེས་ཡིན་པའི་ཕྱིར་གཞན་སྟོང་ཟབ་མོ་ཡིན་གྱི། དཔྱད་ན་མ་གྲུབ་ཙམ་གྱི་རང་སྟོང་ནི་མ་ཡིན་ཏེ། ཞེས་གསུངས་པས་ཐེག་ཆེན་ཡིན་པ་ལ་ཆེན་པོ་བདུན་ལྡན་དང༌། རང་སྟོང་མ་ཡིན་པ་དགོས་པ་ཡིན་མིན་ཅུང་ཟད་དཔྱད་རྒྱུ་སྣང༌། ཡང་བྱང་སེམས་ཚོགས་ལམ་འཇུག་སྒྲུབ་ཡིན་པར་ཐལ། དེ་བྱང་སེམས་ཀྱི་སྒྲུབ་པ་གང་ཞིག་སྦྱོར་བའི་བྱ་བ་ཡིན་པའི་ཕྱིར། ཁྱབ་སྟེ། ཉ་ཊཱིཀ་ལས། འཇུག་པའི་སྒྲུབ་པ་ནི། བྱང་སེའི་སྒྲུབ་པ་གང་ཞིགསྦྱོར་བའི་བྱ་བ། དབྱེ་ན་དགུའོ། །ཞེས་གསུངས་པས་སོ་ཞེ་ན། ཚོགས་ལམ་ལ་འཇུག་སྒྲུབ་ཡོད་པ་མི་འཐད་དེ། འཇུག་སྒྲུབ་ཀྱི་ས་མཚམས་ཉ་ཊཱིཀ་ལས། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། དེ་ལ་གོ་ཆ་དང་འཇུག་པའི་སྒྲུབ་པ་དག་ནི་གོ་རིམ་བཞིན་དུ་བརྒྱུད་པ་དང་དངོས་སུ་སྦྱོར་བའི་རང་བཞིན་ཚོགས་དང་མོས་པས་སྤྱོད་པའི་སས་བསྡུས་པ་ཡིན་ནོ། །ཞེས་དང༌། མདོ་ལུགས་མ་ལས། འཇུག་པའི་བསྒྲུབ་པ་ནི། སྦྱོར་ལམ་ཉིད་ནས་རྩོམ་སྟེ། སྐབས་འདིར་ཚེ་དང་ལྡན་པ་གང་བོས་ཞུ་བ་གསུམ་གསོལ་བ་ལས་དང་པོ་པའི་ལམ་གྱིས་གོ་སྒྲུབ་དང༌། ཞེས་དང༌། ཕར་ཕྱིན་དོན་བསྡུས་ལས། འཇུག་སྒྲུབ་ཀྱི་མཚན་ཉིད། གང་ཞིག སྦྱོར་བའི་བརྩོན་འགྲུས་ཅན་གྱི་བྱ་བ། དབྱེ་ན་དགུ། ས་མཚམས་དྲོད་ནས་རྒྱུན་མཐའི་བར་ན་ཡོད།ཅེས་སོགས་ཚོགས་ལམ་ན་འཇུག་སྒྲུབ་ཡོད་པར་གཞུང་ཚད་ཐུབ་གང་ལས་མ་བཤད་པས་སོ། །རྩ་བར། ཐེག་ཆེན་ལ། །འཛེག་པ་ཡིན་པར་ཤེས་པར་བྱ། །ཞེས་པས་འཇུག་སྒྲུབ་ཀྱི་བྱེད་ལས་བསྟན་ཚུལ་ནི། མདོ་ལུགས་མ་ལས། ལས་ཅི་ཞིག་བྱེད་པར་ཤེས་པར་བྱ་ཞེ་ན། ཐེག་ཆེན་ལ་འཛེག་པ་ཡིན་པར་ཤེས་པར་བྱའོ། །ཁྲི་བརྒྱད་སྟོང་པ་ལས་དེ་ཐེག་པ་ཆེན་པོ་དེ་ལ་ཞོན་ཏེ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་སངས་རྒྱས་ཀྱི་ཞིང་དག་པར་བྱེད། སེམས་ཅན་ཡོངས་སུ་སྨིན་པར་བྱེད་ཅེས་གསུངས་སོ། །མདོ་ལས་ཞོན་ཞེས་པར་འབྱུང་ཞིང་འདིར་འཛེགས་ཅེས་པར་འབྱུང་ངོ༌། །ཞེས་དང༌། ཉ་ཊཱིཀ་ལས། གང་དུ་ན། ཐེག་ཆེན་ལ་དང་པོར་འཇུག་ཅིང་ཕྱིས་གོང་ནས་གོང་དུ་ཁྱད་པར་རྟོགས་པས་འཛེག་པ་ཡིན་པར་རོ། །ཞེས་གསུངས་པའི་ཕྱིར་རོ། །