གསུམ་པ་ཉམས་ན་ཕྱིར་བཅོས་པ།

གསུམ་པ་ཉམས་ན་ཕྱིར་བཅོས་པ་ལ།

ལྟུང་བ་ཕྱིར་བཅོས་དང༌། རྩོད་པ་ཕྱིར་བཅོས་གཉིས་ལས། དང་པོ་ནི། ཕམ་པ་དང་ཕམ་འདྲ་འཆབ་བཅས་བྱུང་བ་དག་གིས་དགེ་འདུན་གྱི་གནས་མལ་སོགས་ལ་ལོངས་སྤྱོད་ན་ངན་སོང་གི་རྒྱུ་ཁོ་ནར་འགྱུར་བས། དགེ་འདུན་གྱི་གནས་ནས་བསྐྲད་དེ་རང་གིས་གཉེན་པོ་སྟོབས་བཞི་ཚང་བའི་སྒོ་ནས་ལྟུང་བཤགས་དང་ཡིག་བརྒྱ་སོགས་ལའང་འབད་ནས་རྣམ་སྨིན་དག་པའི་ཐབས་ཙམ་བྱ་བ་ལས་ཚེ་དེར་སླར་སྡོམ་པ་སྐྱེ་བའི་སྐལ་བ་མེད་པར་འདུལ་གཞུང་རྒྱ་མཚོ་ལྟ་བུ་ལས་ཡང་ཡང་གསུངས་པས་དེ་བཞིན་དུ་གནས་པ་ལས་རང་བཟོས་འདུལ་བ་རྩོམ་པ་ནི་ཡ་མཚན་པའི་གནས་སུ་སྣང་སྟེ། འདུལ་བའི་བཅས་མཚམས་ཐམས་ ཅད་སངས་རྒྱས་ཁོ་ན་ལ་དབང་བ་ཡིན་ནོ། །ཕམ་པ་དང་ཕམ་འདྲ་རྣམས་ལ་ཆབ་སེམས་སྐད་ཅིག་ཀྱང་མ་བྱུང་ན། དགེ་འདུན་ལས་སྡོམ་པ་དང་བསླབ་པ་ནོད་ནས་ཇི་སྲིད་འཚོའི་བར་དུ་ཁྱད་པར་ཅན་གྱི་སྤྱོད་པ་ལྔ་སྤོང་ཞིང༌། དམན་སྤྱོད་ལྔ་དང་དུ་བླངས་ནས་སྟོབས་བཞིས་བཤགས་པར་བྱའོ། །ལྷག་མ་ནི་དགེ་འདུན་ལས་སྤོ་མགུ་དབྱུང་གསུམ་ནོད་སྤྱོད་སོགས་བྱ་ཞིང་སྟོབས་བཞིས་བཤགས་པར་བྱ་ལ། ཕྱིན་ཆད་སྲོག་ལ་བབས་ཀྱང་མི་བྱ་སྙམ་པའི་སྡོམ་སེམས་ཁྱད་པར་བ་དང་ལྡན་པའི་གསོ་སྦྱོང་གི་སྐབས་ཀྱི་ཕྱིར་བཅོས་ལྟ་བུས་ཀྱང་འདག་ལ། དེ་སྐབས་སྟོབས་བཞི་ཚང་ན་རྣམ་སྨིན་དག་པས་དེ་ལ་འབད་པར་བྱའོ། །སྤང་ལྟུང་ནི། སྤང་ལྟུང་བྱུང་བའི་གཞིའི་རྫས་དང་ལྟུང་བ་དེ་བྱུང་བའི་ཕྱིས་རྙེད་པའི་ཡོ་བྱད་རྣམས་དགེ་སློང་གཞན་ལ་གནས་ཐ་དད་དུ་ཞག་གཅིག་སྤང་བྲལ་སྔོན་དུ་བཏང་ནས་གསོ་སྦྱོང་ལྟ་བུའི་ཚེ་ན་དེ་སྐབས་ཀྱི་དེས་ཆོག་ལ། མིན་ན་ཞག་བཅུ་འཆང་སྤང་ལྟ་བུ་ལ་སྤང་ལྟུང་དེས་མ་གོས་པའི་དགེ་སློང་ཞིག་གི་མདུན་དུ་ལྷམ་ཕུད་ཕྱག་གསུམ་འཚལ། སྙན་གསན་ཕུལ། སྟོབས་བཞི་ཚང་བའི་སྒོ་ནས། གནས་བརྟན་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ་ལྟུང་བ་ཉེས་བྱས་ཀྱི་སྡེ་ཚན་ལས་གོས་ཞག་བཅུ་འཆང་སྤང་གི་ལྟུང་བ་བྱུང་བ་དགུང་ ཞག་དུ་མར་བཅབས་པའི་ཉེས་པ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ཉེས་པ་དེ་གནས་བརྟན་གྱི་མདུན་དུ་མཐོལ་ལོ། །མི་འཆབ་པོ། །འཆགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ་བཟླས། མཐོང་སྡོམ་འདྲི། ཐབས་ལེགས་བྱས་པས་བཅབས་ཉེས་བཤགས། འདི་བཅབས་ཉེས་མེད་ན་མི་དགོས། དེ་ནས་གནས་བརྟན་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་ལ། ལྟུང་བ་ལྟུང་བྱེད་ཀྱི་སྡེ་ཚན་ལས། གོས་ཞག་བཅུ་འཆང་སྤང་གི་ལྟུང་བ་བྱུང་སྟེ། བདག་དགེ་སློང་མིང་འདི་ཞེས་བགྱི་བའི་ལྟུང་བ་དེ་གནས་བརྟན་གྱི་མདུན་དུ་མཐོལ་ལོ།མི་འཆབ་པོ། །འཆགས་སོ། །མཐོལ་ཞིང་བཤགས་ན་བདག་བདེ་བ་ལ་རེག་པར་གནས་པར་འགྱུར་གྱི། མ་མཐོལ་མ་བཤགས་ན་ནི་མི་འགྱུར་རོ། །ཞེས་ལན་གསུམ། མཐོང་སྡོམ་འདྲི། ཐབས་ལེགས་བྱ། འདི་ནི་དངོས་གཞིའི་ཕྱིར་བཅོས་སོ། །འདིས་སྤང་ལྟུང་གཞན་རྣམས་ཕྱིར་བཅོས་ཚུལ་ཤེས་པར་བྱའོ། །ལྟུང་བྱེད་འབའ་ཞིག་པ། སོར་བཤགས། ཉེས་བྱས། མ་རྫོགས་པ་རྣམས་ཀྱི་རྩ་ལྟུང་མ་གཏོགས་པའི་ཉེས་བྱས་རྣམས་ཕྱིར་བཅོས་ཚུལ་ནི། སྤང་བྲལ་སྔོན་དུ་གཏོང་མི་དགོས་ཤིང་ལྟུང་བའི་མིང་རིགས་བརྗེ་བ་མ་གཏོགས་འདི་དང་འདྲ་བ་ཡིན་ལ། བྱིན་འཕྲོག་ལ་གཞི་དེ་འཕྲོག་ཡུལ་ལ་ཕྱིར་སྟེར་བ་དང༌། ཁབ་རལ་ལ་ཁབ་རལ་དེ་བཅགས་པ་དང༌། ཁྲི་རྐང་སོགས་ཚད་ལྷག་རྣམས་ལ་ལྷག་པ་བཅད་པ་སྔོན་དུ་འགྲོ་དགོས་པ་དང༌། སོར་བཤགས་ལ་དགེ་འདུན་ལ་མཐོལ་བ་སྔོན་དུ་འགྲོ་དགོས་པ་སོགས་ཁྱད་པར་རོ། །བཤགས་ཡུལ། རབ་ལྟུང་བྱེད་ལྟ་བུའི་སྡེ་ཚན་དང༌། མ་མཐའ་ཞག་བཅུ་འཆང་སྤང་ལྟ་བུའི་ལྟུང་བ་མིང་མཐུན་པས་མ་གོས་པ་དགོས་ལ། བཤགས་མཁན་གྱི་རྟེན་ཡང་ལྟུང་བ་སྔ་མ་ལ་འགྱོད་སེམས་དང་ཕྱིན་ཆད་མི་བྱེད་སྙམ་པའི་སྡོམ་སེམས་མེད་པར་ལྟུང་བ་ལས་ལྡང་མི་ནུས་པས། མཐོང་སྡོམ་དྲིས་པ་ཡིན་ལ། དེས་ན་བཤགས་པ་ཚིག་ཙམ་དུ་མ་སོང་བ་གལ་ཆེའོ། །བཤགས་ཡུལ་གཏན་མེད་ན་ནི། རྩ་བར། གཞན་ལས་ནི་དེ་དང་བཅས་པའི་བཤགས་པའོ། །ཞེས་པ་ལྟར། ཡིད་ཀྱིས་འགྱོད་སེམས་དང་སྡོམ་སེམས་དྲག་པོ་བྱས་ན། བསྡམ་བྱའི་ཉེས་བྱས་ལྟར་ལྟུང་བ་ལས་ལྡང་ལ། མཐོལ་བ་བྱས་ན་བཅབས་ཉེས་མི་བྱུང་ཞིང་ལྟུང་བའི་འཕེལ་ཁ་ཆད་འགྲོ་བས་ཤིན་ཏུ་ལེགས་ལ། དེ་ལྟར་མ་བྱས་ན་ཞག་རེ་བཞིན་བཅབས་ཉེས་དང་དངོས་གཞི་རྣམས་ཉིས་འགྱུར་བཞི་འགྱུར་དུ་འཕེལ་བས། ལྟུང་བ་བྱུང་བ་ན་དེ་མ་ཐག་ཏུ་མཐོལ་བ་དང་བཤགས་པ་ལ་འབད་པར་བྱ་བ་གལ་ཆེའོ། །