བརྒྱད་པ་ས་བརྒྱད་པ་མི་གཡོ་བ།
བརྒྱད་པ་ས་བརྒྱད་པ་མི་གཡོ་བ་ལ། ས་འདིར་སྨོན་ལམ་ལྷག་ཅིང་འགོག་པ་ལས་སློང་ཚུལདང༌། ཉོན་མོངས་ཐམས་ཅད་ཟད་པར་བསྟན་པ་དང༌། དབང་བཅུ་ཐོབ་པར་བསྟན་པ་དང་གསུམ། དང་པོ་ནི། རྩ་བར། ཡང་ཡང་སྔར་དགེ་ལས་ལྷག་ཐོབ་བྱའི་ཕྱིར། །གང་དུ་ཕྱིར་མི་ལྡོག་པ་ཉིད་འགྱུར་བ། །མི་གཡོ་དེ་ལ་བདག་ཉིད་ཆེ་དེ་འཇུག །ཅེས་ས་བདུན་པ་ལ་གནས་པའི་བྱང་སེམས་ཀྱི་དེ་ནི་ཡ༷ང་དང་ཡ༷ང་དུ་སྔ༷ར་གྱི་ཚོགས་གཉིས་ཀྱི་དགེ༷་བ་ལ༷ས་བརྒྱ་འགྱུར་སྟོང་འགྱུར་གྱི་ལྷ༷ག་པའི་ཚོགས་གཉིས་ཀྱི་དགེ་བ་ཐོ༷བ་པར་བྱ༷འི་ཕྱི༷ར་དུ། ས་ག༷ང་དུ༷་བྱང་སེམས་དེ་ཕྱི༷ར་མི༷་ལྡོ༷ག་པ༷་ཡི་གང་ཟག་ཉི༷ད་དུ་འགྱུ༷ར་བ༷་ཡི་ས་བརྒྱད་པ་མི༷་གཡོ༷་བ་དེ༷་ལ༷་བྱང་སེམས་བད༷ག་ཉི༷ད་ཆེ༷ན་པོ་དེ༷་འཇུ༷ག་པར་འགྱུར་ཏེ། ས་བཅུ་པའི་མདོ་ལས། ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། རྒྱ་མཚོ་ཆེན་པོར་འགྲོ་བའི་གྲུ་བོ་ཆེ་ནི་རྒྱ་མཚོ་ཆེན་པོ་ལ་མ་ཐུག་གི་བར་དུ་ཆེད་དུ་བསྐྱོད་ཅིང་འགྲོ་བར་བྱ་བ་ཡིན་ཏེ། གང་གི་ཚེ་རྒྱ་མཚོ་ཆེན་པོ་ལ་ཕྱིན་མ་ཐག་ཏུ་རླུང་གི་དཀྱིལ་འཁོར་གྱིས་བསྐྱོད་ནས་ཆེད་དུ་འབད་མི་དགོས་པར་འགྲོ་སྟེ། དེས་རྒྱ་མཚོ་ཆེན་པོ་ལ་ཉིན་གཅིག་གིས་ཅི་ཆོད་པ་དེ་ནི་སྔོན་ཆད་དུ་བསྐྱོད་ཅིང་འགྲོ་བས་ལོ་བརྒྱར་ཡང་དེ་སྲིད་དུ་ཚད་མེད་པར་ཕྱིན་པར་མི་ནུས་སོ། །ཀྱེ་རྒྱལ་བའི་སྲས་དག་དེ་བཞིན་དུ། བྱང་ཆུབ་སེམས་དཔའ་དགེ་བའི་རྩ་བའི་ཚོགས་ཤིན་ཏུ་བསགས་པ་ཐེག་པ་ཆེན་པོ་ཡང་དག་པར་བསྒྲུབས་པ་ཡང༌། བྱང་ཆུབ་སེམས་དཔའི་སྤྱོད་པའི་རྒྱ་མཚོར་ཕྱིན་ནས་ལྷུན་གྱིས་གྲུབ་པའི་ཡེ་ཤེས་ཀྱིས་ཡུད་ཙམ་ཅིག་ལ་ཐམས་ཅད་མཁྱེན་པའི་ཡེ་ཤེས་ཅི་ཙམ་གནོན་པ་དེ་ནི་སྔོན་གྱི་ཆེད་དུ་བྱ་བའི་ལས་ཀྱིས་བསྐལ་པ་འབུམ་དུ་ཡང་དེ་སྙེད་དུ་དཔག་ཏུ་མེད་པ་གནོན་པར་མི་ནུས་སོ། །ཞེས་གསུངས་པའི་ཕྱིར་རོ། །རྩ་བར། འདི་ཡི་སྨོན་ལམ་ཤིན་ཏུ་དག་འགྱུར་ཞིང༌། །རྒྱལ་བ་རྣམས་ཀྱིས་འགོག་ལས་སློང་བར་མཛད། །ཅེས་གཞན་ཡང་ས་བརྒྱད་པའི་བྱང་ཆུབ་སེམས་དཔའ་འདི༷་ཡི༷་སྔོན་དོན་དམ་པའི་སེམས་དང་པོ་བསྐྱེད་སྐབས་སུ་སྨོན་ལམ་ཆེན་པོ་བཅུ་ལ་སོགས་པའི་སྨོན་ལམ་འབུམ་ཕྲག་གྲངས་མེད་པ་བཅུ་བཏབ་པའི་སྨོ༷ན་ལ༷མ་ཤི༷ན་ཏུ༷་ད༷ག་པའམ་སྨོན་ལམ་ཆེས་ལྷག་པར་འགྱུ༷ར་བ་ཡིན་ཏེ། ས་བརྒྱད་པ་འདིར་ནི་སྨོན་པའི་ཡུལ་དང་སྨོན་ལམ་འདེབས་ཚུལ་མཐའ་དག་ལ་ཆེས་མཁས་པ་ཡིན་ཞི༷ང༌། བཏབ་མ་ཐག་སྨོན་འབྲས་འགྲུབ་པར་བྱེད་ནུས་པའི་སྨོན་ལམ་གྱི་ངོ་བོར་གྱུར་པའི་ཤེས་རབ་ཁྱད་པར་ཅན་ས་བདུན་པ་མན་ཆད་ལ་མེད་པ་འདིར་ཐོབ་པའི་ཕྱིར་རོ། །ས་བརྒྱད་པ་ལ་གནས་པའི་བྱང་སེམས་འདི་འགོག་པ་ཆོས་ཉིད་ལ་མཉམ་པར་བཞག་པ་ན། རྒྱ༷ལ་བ༷་རྣ༷མས་ཀྱི༷ས་འགོ༷ག་པ་ལ་སྙོམས་པར་ཞུགས་པའི་ས་བརྒྱད་པའི་མཉམ་བཞག་ཡེ་ཤེས་དེ་ལ༷ས་སླར་ཡང་སློ༷ང་བ༷ར་མཛ༷ད་པ་ཡིན་ཏེ། རང་འགྲེལ་ལས། བྱང་ཆུབ་སེམས་དཔའ་རྣམས་ཀྱིས་མི་གཡོ་བ་འདི་ནི་གཞོན་ནུའི་སར་རྣམ་པར་གཞག་སྟེ། དགུ་པར་ནི་རྒྱལ་ཚབ་ཐོབ་ལ། བཅུ་པར་ནི་འཁོར་ལོས་སྒྱུར་བ་ལྟར་རྒྱལ་བ་རྣམས་ཀྱིས་དབང་བསྐུར་རོ། །
བྱང་ཆུབ་སེམས་དཔའ་ས་མི་གཡོ་བར་འགོག་པ་ལ་སྙོམས་པར་ཞུགས་པར་གྱུར་པ་ན། སངས་རྒྱས་བཅོམ་ལྡན་འདས་རྣམས་ཀྱིས་འགོག་པ་ལས་སློང་བར་ཡང་མཛད་དོ། །ཇི་སྐད་དུ། ཀྱེ་རྒྱལ་བའི་སྲས་དག་དེ་ལྟར་བྱང་ཆུབ་སེམས་དཔའི་ས་མི་གཡོ་བ་འདི་ལ་གནས་པའི་བྱང་ཆུབ་སེམས་དཔའ་སྔོན་གྱི་སྨོན་ལམ་གྱི་སྟོབས་བསྐྱེད་པ་དང༌། ཆོས་ཀྱི་སྒོའི་རྒྱུན་དེ་ལ་གནས་པ་དེ་ལ་སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས་པའི་ཡེ་ཤེས་ཉེ་བར་བསྒྲུབ་པར་མཛད་དོ། །དེ་ལ་འདི་སྐད་ཅེས་ཀྱང་བཀའ་སྩལ་ཏེ། རིགས་ཀྱི་བུ་ལེགས་སོ་ལེགས་སོ། །
སངས་རྒྱས་ཀྱི་ཆོས་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པ་ཡང་ཡིན་ན། འོན་ཀྱང་རིགས་ཀྱི་བུ་གང་ངེད་ཀྱི་སྟོབས་བཅུ་དང་མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཕུན་སུམ་ཚོགས་པ་དེ་ཁྱོད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཡོངས་སུ་བཙལ་བའི་ཕྱིར་སྦྱོར་བ་བྱོས་ཤིག །བརྩོན་འགྲུས་རྩོམས་ཤིག །བཟོད་པའི་སྒོ་འདི་ཉིད་ཀྱང་མ་དོར་ཞིག །རིགས་ཀྱི་བུ་ཁྱོད་ཀྱིས་དེ་ལྟར་ཞི་བའི་རྣམ་པར་ཐར་པ་ལ་གནས་པ་ཐོབ་ཀྱང་བྱིས་པ་སོ་སོའི་སྐྱེ་བོ་མ་ཞི་བ་རབ་ཏུ་མ་ཞི་བ་ཉོན་མོངས་པ་སྣ་ཚོགས་ཀུན་ཏུ་འབྱུང་བར་གྱུར་པ་རྣམ་པར་རྟོག་པ་རྣམ་པ་སྣ་ཚོགས་ཀྱིས་ཡིད་གཡེན་སྤྱོ་བ་འདི་དག་ལ་སོམསཤིག ཅེས་སོགས་གསུངས་སོ། །
གཉིས་པ་ཉོན་མོངས་ཐམས་ཅད་ཟད་པར་བསྟན་པ་ནི།
རྩ་བར། ཆགས་པ་མེད་པའི་བློ་ནི་སྐྱོན་རྣམས་དག་དང་ལྷན་ཅིག་མི་གནས་ཕྱིར། །ས་བརྒྱད་པ་ལ་དྲི་མ་དེ་དག་རྩར་བཅས་ཉེ་བར་ཞི་འགྱུར་ཞིང༌། །ཉོན་མོངས་ཟད་ཅིང་ཁམས་གསུམ་བླ་མར་གྱུར་ཀྱང་སངས་རྒྱས་རྣམས་ཀྱི་ནི། །འབྱོར་པ་མཁའ་ལྟར་མཐའ་བྲལ་མ་ལུས་ཐོབ་པར་ནུས་མ་ཡིན། །ཞེས་ས་བརྒྱད་པའི་ཉོན་མོངས་བདེན་འཛིན་གྱི་ཆ༷གས་པ༷་མེ༷ད་པ༷འི་བློ༷་ཡེ་ཤེས་ནི༷་ཆགས་སོགས་ཉོན་མོངས་པའི་སྐྱོ༷ན་རྣ༷མས་མ་ལུས་པ་ད༷ག་ད༷ང་ཡུན་རིང་དུ་མི་གནས་པར་ལྷ༷ན་ཅི༷ག་ཏུ་མི༷་གན༷ས་པའི་ཕྱི༷ར་ན་ས༷་བརྒྱ༷ད་པ༷་ལ༷་ནི་རྣམ་པར་མི་རྟོག་པ་སྟེ་སྐབས་འདིའི་རྣམ་པར་མི་རྟོག་པ་ནི་རྩོལ་བ་རགས་པའི་སྒོ་ནས་ཡུལ་ལ་མི་རྟོག་པའི་རྣམ་པར་མི་རྟོག་པའི་ཡེ་ཤེས་ཀྱི་ཉི་མ་ཤར་ནས་མུན་པ་ལྟ་བུའི་ཉོན་མོངས་པའི་དྲི༷་མ༷་དེ༷་ད༷ག་རྩ༷་བ་སྟེ་ས་བོན་དང་བཅ༷ས་པ་ཉེ༷་བ༷ར་ཞི༷་བར་འགྱུ༷ར་ཞི༷ང་སྤངས་པའོ། །
ས་བཅུ་པའི་མདོ་ལས། འདིར་དེ་ཉིད་ཀྱི་ཚེ་མྱ་ངན་ལས་འདས་པར་འགྱུར་ཏེ། ཞེས་དང༌། རང་འགྲེལ་ལས། ཁམས་གསུམ་ན་སྤྱོད་པ་གང་ཡིན་པ་དེ་དག་ཐམས་ཅད་ཀྱང་རྩ་བ་དང་བཅས་པར་ཞི་བ་ཁོ་ནར་འགྱུར་ལ། དེ་དེ་སྤངས་པས་ས་གསུམ་གྱི་བླ་མ་ཉིད་དུ་གྱུར་དུ་ཟིན་ཀྱང་བྱང་ཆུབ་སེམས་དཔའ་འདིས་གནས་སྐབས་དེར་སངས་རྒྱས་བཅོམ་ལྡན་འདས་རྣམས་ཀྱི་འབྱོར་པ་ཐོབ་པར་མི་ནུས་ཏེ། དེ་ཐོབ་པར་བྱ་བའི་ཕྱིར་འདིས་བསྒྲིམ་པར་བྱ་དགོས་སོ། །ཞེས་གསུངས་པའི་ཕྱིར་རོ། །དེ་བཞིན་དུ་འཕགས་པ་ག་ཡཱ་མགོའི་རིའི་མདོ་ལས། གཞན་ཡང་མདོར་བསྡུས་པའི་ལམ་གཉིས་ཏེ། གཉིས་གང་ཞེ་ན། ཤེས་པའི་ལམ་དང་སྤོང་བའི་ལམ་མོ། །དེ་ལ་ཤེས་པའི་ལམ་ནི་ས་དང་པོ་ནས་བཟུང་སྟེ་ས་བདུན་པའི་བར་དུའོ། །སྤོང་བའི་ལམ་ནི་ས་བརྒྱད་པ་ནས་བཟུང་སྟེ་ས་བཅུ་པའི་བར་དུའོ། །ཞེས་གསུངས་སོ། །ས་བརྒྱད་པར་ཉོན་མོངས་སྤངས་པ་ནི་ས་བརྒྱད་པའི་སྟོད་ཙམ་དུ་ཡིན་གྱི་ཐོབ་མ་ཐག་ཏུ་སྤངས་པ་མིན་ནོ། །དེ་ལྟར་ས་བརྒྱད་པའི་སྐབས་སུ་ཉོ༷ན་མོ༷ངས་པ་མ་ལུས་པ་ཟ༷ད་ཅི༷ང་ཉོན་མོངས་རྒྱུད་ལ་ཡོད་པ་ལ་ཁམས་གསུམ་གྱི་འགྲོ་བ་དང་མི་མཐུན་པར་གྱུར་པའི་སྒོ་ནས། ས་གསུམ་མམ་ཁམ༷ས་གསུ༷མ་གྱི་བླ༷་མ༷ར་གྱུ༷ར་ཟིན་ཀྱ༷ང༌། ས་བརྒྱད་པ་པའི་བྱང་སེམས་འདིས་ཉོན་མོངས་པ་ཟད་པའི་སྐབས་དེར། སང༷ས་རྒྱ༷ས་རྣ༷མས་ཀྱི༷་ནི༷་སྟོབས་བཅུ་མཚན་དཔེ་ལ་སོགས་པའི་ཡོན་ཏན་གྱི་འབྱོ༷ར་བ༷་ནམ་མཁ༷འ་ལྟ༷ར་མཐ༷འ་དང་བྲ༷ལ་བ་མ༷་ལུ༷ས་པ་ཐམས་ཅད་ཐོ༷བ་པ༷ར་ནུ༷ས་པ་མ༷་ཡི༷ན་པས་ན། དེ་ཐོབ་པར་བྱ་བའི་ཕྱིར་དུ་བྱངསེམས་དེ་ས་བརྒྱད་པའི་སྐབས་འདིར་ཚོགས་བསགས་པ་ལ་བསྒྲིམ་པར་བྱ་དགོས་སོ། །
གསུམ་པ་དབང་བཅུ་ཐོབ་པར་བསྟན་པ་ནི།
གལ་ཏེ་ས་བརྒྱད་པ་འདིར་ཁམས་གསུམ་གྱི་ཉོན་མོངས་པ་སྤངས་ན་འཁོར་བར་སྐྱེ་བ་འགོག་པ་ཡིན་ཞིང༌། འཁོར་བར་སྐྱེས་ནས་སེམས་ཅན་གྱི་དོན་དངོས་སུ་སྒྲུབ་པའི་སྒོ་ནས་ཚོགས་མ་བསགས་པར་ཚོགས་རྫོགས་པར་བྱེད་ཚུལ་མེད་པས་ནས། ས་བརྒྱད་པའི་བྱང་སེམས་འདིས་སངས་རྒྱས་ཀྱི་རྒྱུའི་ཆོས་མ་ལུས་པ་ཇི་ལྟར་ཡོངས་སུ་རྫོགས་པར་བྱེད་ཅེ་ན། རྩ་བར། འཁོར་བ་འགགས་ཀྱང་དབང་རྣམས་བཅུ་པོ་ཐོབ་པར་གྱུར་ཞིང་དེ་དག་གིས། །སྲིད་པའི་འགྲོ་བར་རང་གི་བདག་ཉིད་སྣ་ཚོགས་སྟོན་པར་བྱེད་པར་འགྱུར། །
ཞེས་ལས་ཉོན་གྱིས་འཁོར་བར་སྐྱེ་བ་འགག་ཀྱང་ཚོགས་རྫོགས་པར་བྱེད་པ་འཐད་དེ། ས་བརྒྱད་པའི་བྱང་སེམས་འདིའི་ལས་ཉོན་གྱི་དབང་གིས་འཁོར་བར་འཁོ༷ར་བ༷་ནི་འག༷ག་ཀྱ༷ང༌། ས་བརྒྱད་པའི་སྐབས་འདིར་ཡེ་ཤེས་ལ་དབང་བ་ལ་སོགས་པའི་དབ༷ང་རྣ༷མས་བཅུ༷་པོ༷་ཐོ༷བ་པ༷ར་འགྱུ༷ར་བ་ཡིན་ཞི༷ང་དབང་བཅུ་པོ་དེ༷་ད༷ག་གི༷ས་ས་བརྒྱད་པའི་བྱང་སེམས་འདིས་ཡིད་ཀྱི་རང་བཞིན་གྱིས་ལུས་བཟུང་ནས་སྲི༷ད་པ༷འི་འགྲོ༷་བ༷་ར༷ང་གི༷་བད༷ག་ཉི༷ད་དམ་རང་གི་ལུས་སྣ༷་ཚོ༷གས་པ་མཐའ་ཡས་པ་སྟོ༷ན་ཅིང༌། སེམས་ཅན་གྱི་དོན་སྒྲུབ་པ༷ར་བྱེ༷ད་པ༷ར་འགྱུ༷ར་བའི་ཕྱིར་རོ། །དེ་ལ་དབང་བཅུ་ནི། རང་འགྲེལ་ལས། ཇི་སྐད་དུ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་ཚེ་ཚད་བྱིན་གྱིས་རློབ་པས་ཚེ་ལ་དབང་བ་འཐོབ་པོ། །ཏིང་ངེ་འཛིན་ངེས་པར་སེམས་པ་དཔག་ཏུ་མེད་པའི་ཡེ་ཤེས་ཀྱིས་འཇུག་པས་སེམས་ལ་དབང་བ་འཐོབ་པོ། །འཇིག་རྟེན་གྱི་ཁམས་ཐམས་ཅད་རྒྱན་བཀོད་པ་དུ་མས་རབ་ཏུ་བརྒྱན་པའི་བྱིན་གྱིས་རླབས་ཀུན་ཏུ་སྟོན་པས་ཡོ་བྱད་ལ་དབང་བ་འཐོབ་པོ། །ལས་ཀྱི་རྣམ་པར་སྨིན་པ་བྱིན་གྱི་རླབས་ཀྱིས་དུས་ཇི་ལྟ་བ་བཞིན་དུ་སྟོན་པས་ལས་ལ་དབང་བ་འཐོབ་པོ། །འཇིག་རྟེན་གྱི་ཁམས་ཐམས་ཅད་དུ་སྐྱེ་བ་ཀུན་ཏུ་སྟོན་པས་སྐྱེ་བ་ལ་དབང་བ་འཐོབ་པོ། །སངས་རྒྱས་ཀྱི་ཞིང་དང༌། དུས་གང་དུ་ཅི་དགའ་བར་མངོན་པར་རྫོགས་པར་བྱང་ཆུབ་པ་ཀུན་ཏུ་སྟོན་པས་སྨོན་ལམ་ལ་དབང་བ་འཐོབ་པོ། །འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱིས་རབ་ཏུ་གང་བ་ཀུན་ཏུ་སྟོན་པས་མོས་པ་ལ་དབང་བ་འཐོབ་པོ། །སངས་རྒྱས་ཀྱི་ཞིང་ཐམས་ཅད་དུ་རྫུ་འཕྲུལ་གྱི་རྣམ་པར་འཕྲུལ་པ་ཀུན་ཏུ་སྟོན་པས་རྫུ་འཕྲུལ་ལ་དབང་པོ་འཐོབ་པོ། །དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སངས་རྒྱས་ཀྱི་ཆོས་མ་འདྲེས་པ་དང༌། མཚན་དང་དཔེ་བྱད་བཟང་པོ་དང༌། མངོན་པར་རྫོགས་པར་བྱང་ཆུབ་པ་ཀུན་ཏུ་སྟོན་པས་ཡེ་ཤེས་ལ་དབང་བ་འཐོབ་པོ། །མཐའ་དང་དབུས་མེད་པའི་ཆོས་ཀྱི་སྒོ་སྣང་བ་ཀུན་ཏུ་སྟོན་པས་ཆོས་ལ་དབང་བ་འཐོབ་པོ་ཞེས་རྒྱས་པར་གསུངས་པ་ལྟ་བུའོ། །ཞེས་གསུངས་སོ། །དབུ༷་མ༷་ལ༷་འཇུ༷ག་པ༷འི་ཚིག་དོན་ཟླ་བ་གྲགས་པའི་དགོངས་རྒྱནརིན་ཆེན་སྒྲོན་མེ་ཞེས་བྱ་བ་ལས་སེ༷མས་བསྐྱེ༷ད་པ༷་བརྒྱ༷ད་པའི་རྣམ་པར་བཤད་པ༷འོ༷།། །།