བཅུ་གཅིག་པ་མི་འཇིགས་པ་སེངྒེ་ཁྲི་སོགས་གདན་དང་རྒྱན་འབུལ་བ།
བཅུ་གཅིག་པ་མི་འཇིགས་པ་སེངྒེ་ཁྲི་སོགས་གདན་དང་རྒྱན་འབུལ་བ་ནི།
མི་འཇིགས་སེངྒེ་རིན་ཆེན་ཁྲི། །པདྨ་ཉི་ཟླའི་གདན་མཆོག་དང༌། །རྣ་རྒྱན་དང་ནི་གདུ་བུའམ། །མགུལ་རྒྱན་སོར་གདུབ་དམ་པ་དང༌། །གསེར་ལས་བྱས་པའི་མཆོད་ཕྱིར་ཐོགས། །དབུ་རྒྱན་དར་དཔྱངས་དོ་ཤལ་བཅས། །རྒྱལ་མཚན་དམར་དང་དེ་བཞིན་སེར། །དཀར་དང་ནག་དང་སེར་སྐྱ་དང༌། །དེ་བཞིན་གོས་ནི་སྣ་ཚོགས་དང༌། །མེ་ཏོག་ཕྲེང་བ་དུ་མ་དང༌། །བླ་བྲེ་དག་དང་དར་དཔྱངས་པའི། །མདའ་དང་ཡོལ་བས་ཤིན་དུ་མཛེས། །དེ་བཞིན་བཟའ་བཅའ་བཏུང་བ་ཡི། །རབ་མཉམ་བཞག་པས་མཆོད་པར་བྱ། །མི་འཇིགས་པ་བཞིའི་མཚོན་དོན་སེངྒེ་བཏགས་པའི་རིན་པོ་ཆེ་ཁྲི་གྲངས་མེད་པ་དང༌། འཁོརབའི་སྐྱོན་གྱིས་མ་གོས་པའི་པདྨའི་གདན་དང༌། མ་རིག་པའི་མུན་པ་སེལ་བའི་ཉི་མའི་གདན་དང༌།ཉོན་མོངས་པའི་ཚ་གདུང་སེལ་བའི་ཟླ་བའི་གདན་མཆོག་ཏུ་གྱུར་བ་དང༌། ཕྱིན་དྲུག་མཚོན་པའིརིན་པོ་ཆེའི་རྣ་རྒྱན་དང་ནི་གདུ་བུའམ་རིན་པོ་ཆེའི་མགུལ་རྒྱན་དང༌། རིན་པོ་ཆེའི་སོར་གདུབ་དང༌།རིན་པོ་ཆེའི་རྐང་གདུབ་དམ་པ་དང༌། གསེར་ལས་བྱས་པའི་མཆོད་ཕྱིར་ཐོགས་དང༌། ཕུང་པོ་ལྔརིགས་ལྔར་གནས་གྱུར་པས་རིན་པོ་ཆེའི་དབུ་རྒྱན་དང༌། དར་དཔྱངས་དང༌། དོ་ཤལ་དང་བཅས་པ་དང༌། གཞན་ཡང་རྒྱལ་མཚན་དམར་པོ་དང༌། དེ་བཞིན་དུ་སེར་པོ་དང༌། དཀར་པོ་དང་ནགཔོ་དང་སེར་སྐྱ་ལ་སོགས་པ་གྲངས་མེད་སྤྲུལ་བ་དང༌། དེ་བཞིན་གོས་ནི་དཀར་གསེར་དམར་ལྗང་ལ་སོགས་པ་སྣ་ཚོགས་དང༌། ཨུ་དུམ་ཝ་རའི་མེ་ཏོག་སོགས་ཀྱི་ཕྲེང་བ་དུ་མ་དང༌། དཀྱིལ་འཁོརགྱི་རྒྱན་རིན་པོ་ཆེའི་བླ་བྲེ་སྣ་ཚོགས་དག་དང༌། དར་དཔྱངས་པའི་ཕན་གདུགས་དང༌། ཐབསཤེས་ཀྱིས་མ་རིག་པ་འབིག་པར་མཚོན་པའི་མདའ་དུ་མ་དང༌། ཡོལ་བའི་ཁ་ཏོག་ཤིན་དུ་མཛེས་པ་དུ་མ་དང༌། དེ་བཞིན་དུ་བཟའ་བ་དང་བཅའ་བ་བཏུང་བའི་རིགས་སྣ་ཚོགས་པ་ཚོགས་ཞིང་གི་གྲངས་དང་རབ་ཏུ་མཉམ་པར་མདུན་དུ་བློས་དམིགས་པའི་བཞག་ཏེ་མཆོད་ཡུལ་དཔལ་ལྡན་བླ་མ་ཁྱབ་བདག་རྡོ་རྗེ་འཆང་དང་རྒྱལ་བ་སྲས་དང་བཅས་པ་དེ་དག་ལ་མཆོད་པར་བྱའོ། །