ཁ རིག་འཛིན་བརྡའ་བརྒྱུད།
གཉིས་པ་རིག་འཛིན་བརྡ་ཡི་བརྒྱུད་པ་ནི། ཇི་སྐད་དུ། ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱིས་ཚེ་ཐུང་བཀའ་རྙིང་སྟོར། །བསྟན་སྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་སྒྲུབ་ཚུགས་ཞན། །དེ་ཚེ་རིག་པའི་རྣམ་རྟོག་ཤར། །ཞེས་རྩོལ་མེད་ཨ་ཏིའི་བསྟན་པ་འབྱུང་བའི་དུས་དྲུག་ལ་བབས་པའི་ཚེ། སུམ་ཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྨི་ལྟས་ཁྱད་པར་ཅན་བཞི་བྱུང་བ་དང་མཐུན་པར་རྡོ་རྗེ་སེམས་དཔས་རྩ་དབང་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་ལྷའི་གནས་སུ་དར། དེ་ནས་མི་ཡུལ་དུ་གསང་བའི་བདག་པོས་དུར་ཁྲོད་མེ་རི་འབར་བར་མཁའ་འགྲོ་དང་། མཁའ་འགྲོ་མ། གྲུབ་པ་དང་། རིག་པ་འཛིན་པའི་ཚོགས་ལ་གསང་བ་སྔགས་ཀྱི་ཆོས་བསྟན་པའི་ཚེ་སློབ་དཔོན་དགའ་རབ་རྡོ་རྗེ་མི་ཡུལ་དུ་བྱོན་པ་སྟེ། ཇི་སྐད་དུ། སྒྲ་ཐལ་འགྱུར་རྩ་བའི་རྒྱུད་ལས། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། །ཞེས་པ་ལྟར་ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བར། བདེ་བྱེད་བརྩེགས་པའི་མཆོད་རྟེན་ཞེས་གྲགས་པ་ལྷ་ཁང་ཆེན་པོ་གཅིག་ལ་ལྷ་ཁང་ཆུང་ངུ་སྟོང་དྲུག་བརྒྱ་བརྒྱད་ཀྱིས་བསྐོར་བའི་དཔལ་འབྱོར་ཕུན་སུམ་ཚོགས་པའི་གནས་སུ། ཡབ་རྒྱལ་པོ་དྷ་ཧེ་ན་ཏ་ལོ་དང་ཡུམ་བཙུན་མོ་བརྩོན་རྒྱལ་གཉིས་ལ་སྲས་མོ་པྲ་ར་ནི་བྱ་བའི་དགེ་སློང་མ་ཞིག་བྱུང་། དེ་ཉིད་ཡུལ་དེ་ནས་དཔག་ཚད་ཙམ་འདས་པའི་གསེར་གྱི་བྱེ་མ་བརྡལ་བའི་མཚོ་གླིང་ཞིག་ཏུ་རྩའི་སྤྱིལ་བུ་ཆུང་ངུ་ཞིག་ལ་བརྟེན་ཏེ། གཡོག་མོ་བདེ་བའི་སྙིང་ལྡན་མ་བྱ་བ་དང་ལྷན་གཅིག་ཏུ་རྣལ་འབྱོར་བསྒོམས་ཤིང་གནས་སོ། །ཤིང་མོ་གླང་གི་ལོའི་དབྱར་ཟླ་ར་བའི་ཚེས་བརྒྱད་ཀྱི་ཐོ་རངས་ཁའི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་གྱུར་པ་ལས་ཉི་མ་སྤྱི་བོ་ནས་མར་དང་ཟླ་བ་རྐང་མཐིལ་ལས་ཡར་ཐིམ་པ་རྨིས་སོ། །དེའི་ནང་པར་མཚོ་ཀུ་ཏྲིའི་འགྲམ་དུ་ཁྲུས་བྱས་ནས་ཁ་ཤར་དུ་ཕྱོགས་ནས་འདུག་པ་ལ། ཕྱག་ན་རྡོ་རྗེ་གསེར་གྱི་ངང་པ་ཞིག་ཏུ་སྤྲུལ་ནས་ལྷའི་བུ་སེམས་ལྷག་ཅན་ཡི་གེ་ཧཱུྃ་ཞིག་ཏུ་བསྡུས། སྤྲུལ་པའི་བྱ་ངང་པ་བཞི་དང་བཅས་ནམ་མཁའ་ལས་བབ་སྟེ་སྲས་མོའི་མདུན་དུ་ཁྲུས་བྱས་པའི་མཐར་སྤྲུལ་གཞི་ནམ་མཁའ་ལ་འཕུར། སྤྲུལ་པའི་གཙོ་བོ་གསེར་གྱི་བྱས་སྲས་མོའི་སྙིང་ཁར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་བསྟིམས་ནས་སྔར་གྱི་གནས་སུ་འཕུར་རོ། །དེ་ནས་མི་རིང་བར་ཟླ་དུས་ཚང་བ་ན་རྩིབ་མ་གཡས་པའི་གོ་བར་ནས་ཁྱེའུ་མཚན་དང་དཔེ་བྱད་ཀྱིས་བརྒྱན་པ་ཞིག་བལྟམས་པ་ན། ཡུམ་དགེ་སློང་མ་ཤིན་ཏུ་ངོ་ཚ་ནས་སྨྲས་པ། ཕ་མེད་བུ་འདི་འདྲེ་བས་གཞན་པ་སུ། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་འབྱུང་བའི་དཔེ་ནི་སུས་མཐོང་མེད། །རྒྱལ་ཁམས་ཆོས་མེད་འདི་ནི་སུ་ལ་སྲིད། །ཅེས་སོགས་སྨྲེ་སྔགས་མང་དུ་བཏོན་ཏེ་ཐལ་དོང་དུ་བསྐྱུར་བ་ན་སྒྲ་དང་འོད་ལ་སོགས་པའང་བྱུང་བར་གྱུར་ཏོ། །དེ་ནས་ཞག་གསུམ་ནས་བལྟས་པས་ཅི་ཡང་མ་ཉེས་པར་མཐོང་བས་སྤྲུལ་བ་ཡིན་པར་ཤེས་ཏེ་བཀུར་སྟི་ཆེན་པོ་དང་བཅས་པས་སྤྱན་དྲངས་པ་ན། བར་སྣང་ནས་ལྷ་རྣམས་ཀྱིས། མགོན་པོ་ཆེན་པོ་བཅོམ་ལྡན་འདས། །བདག་ཀྱང་རབ་ཏུ་སྐྱབས་པ་དང་། །ནམ་མཁའི་རྡོ་རྗེ་དེང་བདག་གསོལ། །ཞེས་བཀྲ་ཤིས་པར་བརྗོད་ཅིང་མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས་ཏེ་ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་དང་གུར་གུམ་གྱི་ཆར་འབེབས་པ་སོགས་བྱུང་ངོ་། །ལོ་བདུན་སོང་བ་ན་སྲས་ཀྱིས་ཡུམ་ལ། ཀྱེ་བདག་གིས་པཎྜི་ཏ་རྣམས་ལ་ཆོས་ཀྱི་གཏམ་བགྲོ་གླེང་བྱེད་པར་འཚལ་ན་ཡུམ་བདག་ལ་ཅི་བདེར་གནང་བ་སྩོལ་ཅིག །ཅེས་གསུངས་པ་ན། ཡུམ་གྱིས་བུ་ཁྱོད་ནི་ཤིན་ཏུ་གཞོན་པས་པཎྜི་ཏ་རྣམས་མཁས་ཤིང་གཞུངས་པས་ཁྱོད་ཀྱིས་ཐུབ་པ་དཀའ་འོ་ཟེར། ཅིས་ཀྱང་བགྱི་བར་གསོལ་བ་ན། རྒྱལ་པོས་ཁྱེའུ་འདི་ནི་གཞོན་པས་པཎྜི་ཏ་རྣམས་དང་ཆོས་ཀྱི་གཏམ་འོང་པ་དཀའ་མོད་ཀྱི། འོན་ཀྱང་ལུས་ལ་སྐྱེས་བུ་ཆེན་པོས་མཚན་མང་པོ་འདུག་པས་སྤྲུལ་བ་ཡིན་ཡང་སྲིད་སྙམ་ནས་མཆོད་གནས་པཎ་ཆེན་ལྔ་བརྒྱ་ལ་ཚུལ་དེ་བསྙད། དེ་ནས་པཎྜི་ཏ་རྣམས་ལ་ཕྱག་མཛད་ཅིང་བགྲོ་གླེང་དང་བརྒལ་བརྟག་གི་རིམ་པ་མང་དུ་མཛད་པས་པཎྜི་ཏ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་མཆོད་ནས་པྲ་ཛྙཱ་བྷ་བ་ཞེས་མཚན་གསོལ། རྒྱལ་པོ་ངོ་མཚར་ཞིང་དགའ་བས་དགའ་རབ་རྡོ་རྗེ་ཞེས་མཚན་བཏགས། སྔར་ཡུམ་གྱིས་ཐལ་དོང་དུ་བསྐྱུར་ཀྱང་མ་ཉེས་པས་རོ་ལངས་ཐལ་མདོག་ཏུ་གསོལ། དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ཅེས་བྱ་བར་བྲག་རི་ཤིན་ཏུ་འཇིགས་པ་ཡི་དྭགས་ཀྱི་ཚོགས་མངོན་སུམ་དུ་རྒྱུ་བ་ཞིག་གི་སྟེང་དུ་རྩྭའི་སྤྱིལ་བུར་ལོ་སུམ་ཅུ་རྩ་གཉིས་ཀྱི་བར་དུ་ཏིང་ངེ་འཛིན་ལ་བཞུགས་པའི་ཚེ། ས་ཆེན་པོ་ལན་དུ་མར་གཡོས་ཤིང་ནམ་མཁའ་ལས་མུ་སྟེགས་ཀྱི་བསྟན་པ་ཉམས་པར་བྱས་སོ་ཞེས་སྒྲ་གྲག དེ་མུ་སྟེགས་ཀྱི་རྒྱལ་པོས་ཐོས་པས་གཤེད་མ་བཏང་ནས་སློབ་དཔོན་བཀྲོང་བར་བརྩམས་པ་ན་ནམ་མཁའི་ལམ་ནས་གཤེགས་པ་མཐོང་བས་རྒྱལ་པོ་འཁོར་བཅས་དད་དེ་སངས་རྒྱས་པའི་བསྟན་པར་ཞུགས། དེ་ནས་ཐེག་པ་ཕྱི་ནང་གི་སྡེ་སྣོད་རྣམས་དང་། ཁྱད་པར་འོད་གསལ་རྫོགས་པ་ཆེན་པོ་ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས། རྡོ་རྗེ་སེམས་དཔས་ཞལ་མངོན་སུམ་དུ་བསྟན་ནས་རིག་པ་སྤྱི་བླུགས་ཀྱི་དབང་གིས་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན། ཚིག་གི་རྒྱུད་རྣམས་ཡི་གེར་འགོད་པའི་ལུང་བྱིན་ཏེ་རི་མཱ་ལ་ཡའི་རིན་ཆེན་སྤུངས་པ་རྒྱས་པའི་རྩེ་མོར་སློབ་དཔོན་ཉིད་དང་། རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་དང་། བདེ་བྱེད་སེར་མོ། ཡོན་ཏན་མཐའ་ཡས་པའི་མཁའ་འགྲོ་མ་གསུམ་གྱིས་ལོ་གསུམ་གྱི་བར་དུ་ཚིག་དང་ཡི་གེར་དཀར་ཆག་ཏུ་བཏབ། རང་བྱུང་རང་བབ་ཀྱི་ཡི་གེ་སྤྲུལ་བའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་བཀོད་ནས་མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་སུ་གསོལ། དེ་ནས་རྡོ་རྗེ་གདན་གྱི་བྱང་ཤར་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་དབུས་སུ་མཆོད་རྟེན་ཆེན་པོ་ཡོད་ཅིང་སེམས་ཅན་རབ་ཏུ་གདུག་པ་ཚོགས་པའི་གནས་སུ་བྱོན་ནས་མཁའ་འགྲོ་མ་ཉི་མའི་འོད་ཟེར་སོགས་ལ་ཆོས་བསྟན་པས་མཁའ་འགྲོ་མ་འབུམ་ཕྲག་མང་པོ་འཇའ་ལུས་སུ་གྲུབ་ཅིང་། སློབ་དཔོན་ཉིད་ཀྱང་ཆུ་བོ་དན་ཏིག་བྱ་བར་འོད་ཕུང་དུ་ཡལ་ལོ། །
དེ་ལས་སློབ་དཔོན་འཇམ་དཔལ་བཤེས་གཉེན་གྱིས་གསན་པ་སྟེ། ཇི་སྐད་དུ། ཐལ་འགྱུར་ལས། དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུ་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་པ་ལྟར་མ་གྷ་དྷ་རྡོ་རྗེ་གདན་གྱི་ནུབ་ཕྱོགས་སུ་ཡབ་བྲམ་ཟེ་དཔལ་ལྡན་སྐྱོང་དང་། ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་ལ་འཇམ་དཔལ་གྱི་སྤྲུལ་པ་ཁྱེའུ་མཚན་དང་ལྡན་པ་ཞིག་བྱུང་སྟེ། མཚན་ལ་བྲམ་ཟེ་སྙིང་པོ་གྲུབ་པའམ་བདེ་མཆོག་སྙིང་པོ་ཞེས་སུ་གྲགས། ནང་བའི་ཆོས་སྒོར་ཞུགས་ནས་རིག་པའི་གནས་ལྔ་ལ་མཁས་པའི་དགེ་སློང་རྒྱུ་འབྲས་ཀྱི་ཆོས་ཐམས་ཅད་ཐུགས་སུ་ཆུད་པ་ཞིག་ཏུ་གྱུར་ཏོ། །པཎྜི་ཏ་ལྔ་བརྒྱའི་མཆོག་ཏུ་གྱུར་པའི་ཚེ་སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བས་རྒྱུ་འབྲས་ལས་འདས་པའི་ཆོས་རྩོལ་མེད་རྫོགས་པ་ཆེན་པོ་སྒྲོག་གོ་ཞེས་ཕྱོགས་ཀུན་ཏུ་གྲགས། དེའི་ཚེ་བྲམ་ཟེ་སྙིང་པོ་གྲུབ་པ་ལ་རྗེ་བཙུན་འཇམ་དཔལ་གྱིས་ལུང་བསྟན་པ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་། མཚོ་ཆེན་པོ་ཀུ་ཤའི་འགྲམ། དུར་ཁྲོད་གསེར་གླིང་ཧེ་ཆེན་བརྡལ་བའི་འདབས་རྡོ་རྗེ་གླིང་གི་ཕུག་པ་ན། སངས་རྒྱས་ཐམས་ཅད་ཀྱིས་རྩོལ་མེད་བསྟན་པའི་སྒྲོན་མེར་དབང་བསྐུར་བ་རྡོ་རྗེ་སེམས་དཔའི་སྤྲུལ་པ་དགའ་རབ་རྡོ་རྗེ་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་རྩོལ་མེད་སྐད་ཅིག་ལ་འཚང་རྒྱ་བའི་ཆོས་ཡོད་པས་དེ་ལོངས་ལ་སྡུད་པ་པོ་གྱིས་ཤིག་ཅེས་ལུང་བསྟན་ཏོ། །དེར་པཎྜི་ཏ་གཞན་རྣམས་ན་རེ། རྒྱུ་འབྲས་ལས་འདས་པའི་ཆོས་ཡོད་པ་མི་རིགས་པས་སུན་དབྱུང་བར་འཐད་ཅེས་བགྲོས་སོ། །བྲམ་ཟེ་སྙིང་པོ་གྲུབ་པས་མཁྱེན་བཞིན་དུ་ཆོས་དང་གང་ཟག་གི་ཆེ་བ་འབྱིན་པའི་ཕྱིར་ཞལ་འཆམ་པའི་ཚུལ་གྱིས་རཱ་ཛ་ཧསྟི་སོགས་པཎྜི་ཏའི་མཆོག་བདུན་དང་ལྷན་ཅིག་ཏུ་སོང་ངོ་། །དགའ་རབ་རྡོ་རྗེའི་དྲུང་དུ་ལྷགས་ནས་རྒྱུའི་སྡེ་སྣོད་གསུམ་དང་འབྲས་བུ་གསང་སྔགས་ཕྱི་ནང་གང་གི་སྒོ་ནས་བརྩད་ཀྱང་མ་ཐུབ། བདེ་མཆོག་སྙིང་པོས་པཎྜི་ཏ་གཞན་རྣམས་ལ་འུ་ཅག་གིས་རྩོད་པ་ནོངས་པས་སྤྲུལ་བའི་སྐུ་འདི་ལས་རྒྱུ་འབྲས་ལས་འདས་པའི་ཆོས་མི་ཞུའམ་ཞེས་བགྲོ་བ་ལྟར་མཛད་པས། ལ་ལ་ནི་སྐྱེངས་ནས་ངོ་གནག་པར་གྱུར་ཅིང་། ལ་ལ་ནི་འོ་ཅག་གིས་བརྩད་ཅིང་བརྙས་པ་བྱས་པས་ཞུ་བར་མི་སྤོབས་ཟེར། དེར་བདེ་མཆོག་སྙིང་པོ་ལ་སོགས་པས་བཤགས་པ་བྱ་བར་བགྲོས་ཏེ་པཎྜི་ཏ་རྣམས་ཀྱིས་དགའ་རབ་རྡོ་རྗེ་ལ་ཕྱག་དང་སྐོར་བ་བྱས། སྙིང་པོ་གྲུབ་པས་རང་གི་ལྕེ་བཅད་དེ་བཤགས་པ་བྱ་བར་དགོངས་པ་ན། རིག་འཛིན་དགའ་རབ་རྡོ་རྗེས་མཁྱེན་ཏེ་ཚིགས་སུ་བཅད་པ་འདི་སྐད་གསུངས་སོ། །མཉམ་ཉིད་ཕྱོགས་བྲལ་ལྷུན་གྲུབ་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་བཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་ལྟར་ཞུགས། །ཐེག་བརྒྱད་ངང་ལ་གཉིས་བཟུང་ཡིན་མིན་གྱི། །ཞེ་འདོད་ཕྱོགས་རིས་དབྱིངས་ལ་ཕྱོགས་སུ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞན་དུ་འཚོལ། །ལྷུན་གནས་བདེ་བོར་རྩོལ་བས་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡི་ཐང་ཆད་ཡུས་རྒྱས་སྙིང་རེ་རྗེ། །དེ་བས་ཕྱོགས་འཛིན་ཞེན་པའི་དུག་ཆོམས་ལ། །མཉམ་ཉིད་ཕྱོགས་བྲལ་བདེ་བའི་དོན་ལ་ཞུགས། །ཞེས་གསུངས་ནས་ཁྱོད་ཀྱིས་ལྕེ་བཅད་པས་སྡིག་པ་མི་འདག །རྒྱུ་འབྲས་ལས་འདས་པའི་ཆོས་ཁྱད་དུ་འཕགས་པ་ཞིག་རྩོམས་དང་དེས་སྡིག་པ་དག་པར་འགྱུར་རོ་གསུངས། ཕྱིས་སུ་བྱང་སེམས་སྡེ་ལ་འགྲེལ་པ་གསེར་ཞུན་བརྩམས་ཤིང་བཀའི་བསྡུ་བ་པོ་མཛད། དེར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་བའི་ཕྱིར་རིན་པོ་ཆེའི་མཎྜལ་སྣ་ཚོགས་པ་ཕུལ་ནས་སྙིང་པོའི་དོན་ཞུས་པས། སེམས་སྡེའི་སྐོར་རྩ་བའི་རྒྱུད་བརྒྱད་དང་། ཡན་ལག་གི་རྒྱུད་མཐའ་ཡས་པ། དབང་མན་ངག་ལ་སོགས་པ་རྒྱས་པར་གནང་། དེ་ནས་ཀློང་སྡེའི་སྐོར་ཕྱི་ནང་གསང་བའི་རྒྱུད་ཆེ་ཆུང་། དགོངས་པ་གཏད་རྒྱའི་སྐོར་ལ་སོགས་པ་རྒྱུད་མན་ངག་དང་བཅས་པས་མཚོན་ཨ་ཏི་ཡོ་གའི་རྒྱུད་དཔག་ཏུ་མེད་པ་གསུངས་སོ། །དེས་ཀྱང་ཐུགས་མ་ཚིམས་པར་ཕྱག་དང་སྐོར་བ་བྱས་ཏེ་རིན་པོ་ཆེའི་མེ་ཏོག་ཕུལ་ནས་གསོལ་བ་བཏབ་པས། རྒྱལ་ཐབས་སྤྱི་བླུགས་ཀྱི་དབང་བསྐུར། རང་གྲོལ་མངོན་སུམ་དུ་སྟོན་པ་མན་ངག་སྡེའི་སྐོར་ཡང་བྱིན་ཏེ་ཕྱི་ལྟར་འཇམ་དཔལ་བཤེས་གཉེན་དང་ནང་ལྟར་རྡོ་རྗེ་བདེ་བ་རྩལ་དུ་མིང་བཏགས། སླར་ཆུ་བོ་དན་ཏིག་བྱ་བར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ། འཇམ་དཔལ་བཤེས་གཉེན་གྱིས་གདུང་ཚིག་ལན་གསུམ་བཏོན་པས་ནམ་མཁའ་འོད་ཕུང་གི་དཀྱིལ་ནས་སྐུ་མངོན་སུམ་སྣང་བར་མཛད་དེ། གསེར་གྱི་ཟ་མ་ཏོག་སེན་གང་བ་གཅིག་ཕྱག་ཏུ་བབ་པས་ཚིག་གསུམ་གནད་དུ་བརྡེག་པའི་མན་ངག་འདས་རྗེས་སུ་འདུག་པ་གཟིགས་པ་ཙམ་གྱིས་ཐུགས་སུ་ཆུད། དགའ་རབ་རྡོ་རྗེ་དང་རྟོགས་པ་མཉམ་པ་བྱུང་བས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། །བྱ་བྲལ་རྣམས་ལ་ཀློང་གི་སྡེ། །གནད་གཙོ་བ་ལ་མན་ངག་སྡེ། །ཞེས་པ་ལྟར་རྫོགས་ཆེན་སྡེ་གསུམ་དུ་ཕྱེས་ཤིང་གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣ་རྒྱུད་གཉིས་སུ་ཕྱེས་ནས་རྣ་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་རེ་ཞིག་སྤེལ་བའི་སྣོད་མ་རྙེད་པས་རྡོ་རྗེ་གདན་གྱི་བྱང་ཤར་ཕ་ཝང་རྡོ་རྗེ་རྒྱ་གྲམ་གྱིས་རྒྱས་བཏབ་པའི་འོག་ཏུ་སྦས་ཏེ་མི་སྣང་བར་བྱས། རྒྱལ་པོ་དྷ་ཧེ་ན་ཏ་སོགས་ལ་དགོངས་པའི་དོན་སྟོན་བཞིན་སོ་ས་གླིང་གི་དུར་ཁྲོད་དུ་ལོ་བརྒྱ་དང་ཉི་ཤུ་རྩ་དགུའི་བར་ཏིང་ངེ་འཛིན་ལ་བཞུགས་ཤིང་། དེར་མི་སྡུག་པའི་མཁའ་འགྲོ་མ་རྣམས་དང་སྤྱོད་པ་ལ་གནས་པའི་སྒྲུབ་པ་པོ་སེམས་ཅན་དཔག་ཏུ་མེད་པའི་དོན་མཛད་དོ། །སློབ་དཔོན་སངས་རྒྱས་ཡེ་ཤེས་ཞབས་ཀྱང་འདིའི་སློབ་མ་ཡིན་ཞིང་གྲོལ་བའི་ཐིག་ལེ་དང་། སྒྲུབ་ཐབས་ཀུན་བཟང་སོགས་བསྟན་བཅོས་ཀྱང་ཤིན་ཏུ་མང་པོ་མཛད་ལ། སློབ་དཔོན་འདིའི་རྫོགས་རིམ་གྱི་མན་ངག་བོད་དུ་འགྱུར་བ་རྣམས་སེམས་སྡེ་ཁོ་ནའི་གྲུབ་མཐའ་གཙང་སིང་ངེ་བར་གནས་ཞེས་སྔོན་གྱིས་མཁས་པ་དག་གསུངས་ཤིང་། འགའ་ཞིག་གིས་སློབ་དཔོན་ཤྲཱི་སེང་ཧ་དང་གཅིག་ཡིན་ཞེས་ཀྱང་བཞེད་དོ། །
དེ་ཉིད་ལས་རིག་འཛིན་ཆེན་མོ་ཤྲཱི་སེངྷས་གསན་པ་སྟེ། ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། ཁྱིམ་བདག་རིགས་སྐྱེས་ཤྲཱི་སེང་། །ཞེས་བྱ་བ་ཡིས་འཛིན་པར་འགྱུར། །ཞེས་པ་ལྟར། རྒྱ་ནག་པོའི་གྲོང་ཁྱེར་ཤོ་ཁྱམ་ཞེས་པར་ཁྱིམ་བདག་དགེ་བའི་ཡིད་ཅན་དང་། ཡུམ་སྣང་བ་གསལ་བ་རབ་ཏུ་མཁྱེན་མ་གཉིས་ཀྱི་སྲས་སུ་སྐུ་འཁྲུངས། ལོ་བཅོ་ལྔ་ནས་སློབ་དཔོན་ཧ་རི་བྷ་ལ་སོགས་པཎྜི་ཏ་ལྔ་བརྒྱ་ལས་སྒྲ་ཚད་སོགས་ཐུན་མོང་གི་རིག་པ་རྣམས་ལོ་གསུམ་ལ་སྦྱངས་པ་མཛད་པས་མཁས་པ་ཆེན་པོར་གྱུར། སྐབས་ཤིག་ནུབ་ཕྱོགས་ཀྱི་གྲོང་ཁྱེར་གསེར་གླིང་བྱ་བར་འགྲོ་བའི་ལམ་བར་ནས་འཕགས་པ་སྤྱན་རས་གཟིགས་ནམ་མཁར་བྱོན་ཏེ་སྐལ་ལྡན་འབྲས་བུ་ངེས་པར་འདོད་ན་རྒྱ་གར་གྱི་དུར་ཁྲོད་སོ་ས་གླིང་དུ་སོང་ཞིག ཅེས་ལུང་བསྟན་པས་སློབ་དཔོན་ཉིད་ཡིད་ཚིམས་པར་མ་གྱུར་ཏེ་ད་དུང་འབྲས་བུ་བླ་ན་མེད་པ་གོ་སླ་བའི་ཕྱིར་གསང་སྔགས་ཀྱི་རྒྱུད་གཞན་ལ་མཁས་པར་བྱ་སྙམ་དུ་དགོངས་ཏེ་རི་བོ་རྩེ་ལྔ་རུ་གདོལ་བའི་རིགས་ཀྱི་སློབ་དཔོན་བྷེ་ལ་ཀིརྟི་ལས་སྔགས་ཕྱི་ནང་གི་ཆོས་མ་ལུས་པར་གསན་ཅིང་ཉམས་འོག་ཏུ་ཆུད་པར་མཛད། རབ་ཏུ་བྱུང་ནས་དགེ་སློང་སྡེ་སྣོད་འཛིན་པ་མཛད་ཅིང་ལོ་སུམ་ཅུའི་བར་དུ་སྦྱངས་པའི་ཡོན་ཏན་ལ་གནས། སླར་འཕགས་པའི་ལུང་གིས་སྔོན་བཞིན་བསྐུལ་བས་རྒྱ་གར་དུ་བགྲོད་པའི་ལམ་ལ་དཀའ་བ་མེད་པ་ཞིག་དགོངས་ཏེ་ལོ་གསུམ་དུ་སྒྲུབ་པ་ལ་བཞུགས་པས་རིག་པ་འཛིན་པའི་སྐུར་གྱུར། དེ་ནས་ཞབས་ས་ལ་ཁྲུ་གང་ཙམ་གྱིས་མ་རེག་པར་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་ཆེན་པོ་འཇམ་དཔལ་བཤེས་གཉེན་དང་མཇལ་བ་སྟེ། ཐོག་མར་ཞལ་མཇལ་སྐབས་སློབ་དཔོན་འཇམ་དཔལ་བཤེས་གཉེན་ཐོང་གཤོལ་ཕྲག་པ་ལ་བཟུང་ནས་ཤམ་ཐབས་ཐོད་དུ་བཅིངས་པ་ཞིག་འདུག་པས་ངོ་མ་ཤེས་ཤིང་། དེ་ནི་པཎྜི་ཏའི་ཆ་བྱད་དམ་ཡང་ན་རྣལ་འབྱོར་བའི་ཆས་སུ་འོང་སྙམ་ནས་བཟའ་བ་ཞིག་བསླངས་པས། ངའི་ཆུང་མ་ལ་སློངས་ཟེར། དེ་ནས་གྲོང་ཁྱེར་དུ་ཕྱིན་ནས་བསླངས་པས། ཕྱག་རྒྱ་མས་ཚོང་དུས་ནས་བྱེའུ་མཆིལ་བ་བདུན་ཉོས་པ་བཙོས་ཤིང་འབྲས་ཆན་དང་བསྲེས་ནས་དྲངས། ང་དགེ་སློང་ཡིན་པས་བཟའ་བ་མི་རུང་བྱས་པས་རྗེས་སུ་ཡི་རང་ཟེར། ཕར་ལག་མཐིལ་དུ་བཞག་པ་མོས་ཕུས་བཏབ་པས་ཐམས་ཅད་ཅོ་དིར་གྱིས་ནམ་མཁའ་ལ་དེངས་སོང་། ཅུང་ཟད་ནས་ཁྱིམ་བཙུན་བྱུང་སྟེ་འདི་ལ་བཟའ་བ་བྱིན་ནམ་ཟེར་བར། ཆུང་མས་བཟའ་བ་བྱིན་ཀྱང་ཁོང་མི་འདོད་པ་གདའ་ཞུས་པར། གང་ཟག་འཆིང་བ་ཅན་གསུངས། ཤྲཱི་སེངྷས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞལ་འདོན་མཛད་པས་སློབ་དཔོན་གྱིས་དང་པོ་མལ་ན་གཟིམས་བཞིན་གསན། དེ་ནས་བཞེངས་ཏེ་གསན་ཞིང་ཐམས་ཅད་རྫོགས་པ་ན་དོན་ལ་ལྟ་ཅི་ཚིག་ལའང་རྨོངས་གསུངས་པས་ད་གཟོད་འཇམ་དཔལ་བཤེས་གཉེན་ཡིན་པ་དགོངས། རྗེས་སུ་བཟུང་བར་གསོལ་བ་བཏབ་པས་བླ་མས་ཀྱང་དགྱེས་བཞིན་དུ་གནང་། ལོ་ཉེར་ལྔའི་བར་ལ་གདམས་པ་དང་རྗེས་སུ་གདམས་པ་རྣམས་བསྩལ་པའི་རྗེས་སུ་སློབ་དཔོན་ཉིད་སྐུ་འོད་ཕུང་དུ་ཡལ། དེའི་ཚེ་ཤྲཱི་སེངྷས་སྨྲེ་སྔགས་ཀྱི་གདུང་དབྱངས་བཏོན་པས་ནམ་མཁའ་ནས་སློབ་དཔོན་གྱི་སྐུ་དངོས་སུ་བསྟན་ཏེ་རིན་པོ་ཆེའི་ཟ་མ་ཏོག་སེན་གང་བ་ཞིག་ཕྱག་ཏུ་གཏད་པར་སྒོམ་ཉམས་དྲུག་པ་ཞེས་བྱ་བའི་འདས་རྗེས་བབ་པས་སློབ་དཔོན་ཉིད་དོན་གྱི་གདེང་དང་ལྡན་པར་གྱུར་ཏོ། །དེ་ནས་སློབ་དཔོན་ཤྲཱི་སེངྷས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ཏེ་རྒྱ་ནག་ཏུ་བྱོན་ཞིང་། རྫོགས་པ་ཆེན་པོའི་མན་ངག་གི་སྡེ་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པའི་སྐོར་བཞིར་ཕྱེས་ནས་སྐོར་སྔ་མ་གསུམ་ལ་སྤྲོས་བཅས་ཀྱི་དོན་དུ་བསྡེབས་ནས་བྱང་ཆུབ་ཤིང་གི་ལྷ་ཁང་བྱ་འདབས་སུ་གཏེར་དུ་སྦས། གསང་བ་བླ་ན་མེད་པའི་སྐོར་མཁའ་འགྲོས་ལུང་བསྟན་པ་ལྟར་བཀྲ་ཤིས་ཁྲི་སྒོའི་ཀ་བར་སྨོན་ལམ་གྱི་རྒྱས་བཏབ་ནས་སྦས། སློབ་དཔོན་ཉིད་བསིལ་སྦྱིན་ཞེས་པའི་དུར་ཁྲོད་ཆེན་པོ་རུ་གདུག་པའི་མི་མ་ཡིན་རྣམས་ཀྱིས་བཀུར་སྟི་དང་བཅས་པས་ཏིང་ངེ་འཛིན་ལ་བཞུགས་སོ། །
སློབ་དཔོན་དེ་ལས་མཁས་པ་ཛྙཱ་ན་སུ་ཏྲའམ་ཡེ་ཤེས་མདོ་དང་པཎ་ཆེན་བཱི་མ་ལ་གཉིས་ཀྱིས་གསན་པ་སྟེ། དེ་ལ་ཛྙཱ་ན་སུ་ཏྲ་ནི། ཐལ་འགྱུར་ལས། དེ་རྗེས་འཛིན་པ་གདོལ་བའི་རིགས། །ཛྙཱ་ན་སུ་ཏྲས་འདི་ཉིད་འཛིན། །ཞེས་པ་ལྟར། ཤར་ཕྱོགས་ཀ་མ་ཤཱི་ལའི་གྲོང་ཁྱེར་དུ་ཡབ་གདོལ་བའི་རིགས་ཨུ་པ་རྡ་ཛ་ན་བྱ་བ་དང་། ཡུམ་རྒྱ་མཚོ་མ་བྱ་བའི་བུ་སྦྲུལ་གྱི་གདེངས་ཀས་མཚན་པ་ཞིག་བྱུང་བ་ཕ་མ་གཉིས་སྐྲགས་ཏེ་དུར་ཁྲོད་དུ་བསྐྱལ་བས་ཁྱེའུ་ན་རེ། སྙིང་པོའི་དོན་ལ་ཐུགས་ཕངས་པའི་སྤྲུལ་པ་ཡིན་ཞིང་ལས་ཀྱིས་འབྲེལ་བའི་ཕ་མ་ཡིན་པས་གསོས་ཤིག་ཅེས་ཟེར་བས། བདེན་པར་བཟུང་ནས་བླངས་ཏེ་གསོས། ཁྱེའུ་དེ་གཞན་ལས་སྐྱེད་ཆེ་ཞིང་བློ་གྲོས་དང་ལྡན་པར་གྱུར་ནས་རྒྱལ་པོ་ཧསྟི་དང་། སྲས་མོ་པྲ་ར་ནི་སོགས་ལས་སེམས་ཕྱོགས་ཀྱི་ཆོས་མང་དུ་གསན། དེ་ནས་རེ་ཞིག་ན་སློབ་དཔོན་བཱི་མ་ལ་ནས་སློབ་དཔོན་ཤྲཱི་སེངྷའི་རྣམ་ཐར་གསན་པས་འབད་རྩོལ་ཆེན་པོས་རྒྱ་ནག་ཏུ་བྱོན་ཏེ་མཁའ་འགྲོ་མས་ལུང་བསྟན་པ་བཞིན་བསིལ་སྦྱིན་དུ་ཤྲཱི་སེངྷ་དང་མཇལ། ལོ་དགུའི་བར་དུ་རྫོགས་ཆེན་གསུངས་ནས་སྙན་བརྒྱུད་དཔེ་དང་བཅས་པ་གནང་། དེས་ཚིམས་ནས་བྱོན་པར་བརྩམ་པ་ན། སློབ་དཔོན་གྱིས་གཏད་པ་མེད་དོ་གསུངས་པས། ཡེ་ཤེས་མདོ་དོགས་པ་སྐྱེས་ཏེ་སླར་ཡང་རབ་ཏུ་ཟབ་པའི་གདམས་པ་གནང་བར་ཞུས་པས། ཕྱི་སྤྲོས་བཅས་ཀྱི་དབང་རྫོགས་པར་གནང་ནས་གསང་བ་བླ་ན་མེད་པའི་མན་ངག་རྣམས་ལོ་གསུམ་གྱི་བར་དུ་གནང་། དེ་ནས་ཉམས་སུ་བླང་བར་ཞུས་པས། སྤྲོས་མེད་ཀྱི་དབང་རྫོགས་པར་གནང་ཞིང་རི་བོ་ཀོ་ས་ལའི་རྩེ་མོར་འཁོར་འདས་རུ་ཤན་དབྱེ་བའི་སྤྱོད་པ་མཛད་ཅིང་རབ་ཏུ་སྤྲོས་མེད་ཀྱི་དབང་དང་། རིམ་པས་ཤིན་ཏུ་སྤྲོས་མེད་ཀྱི་དབང་ཡང་རྫོགས་པར་གནང་། དེ་ནས་ལོ་བཅུ་དྲུག་ཏུ་ཉམས་སུ་བླངས་པས་སྒོམ་པར་མཛད། སློབ་དཔོན་འདི་ཁྱད་པར་གྱི་སྤྱོད་པ་སྣ་ཚོགས་པར་གནས་པས་དུས་གཞན་ཞིག་ཏུ་ལི་ཡུལ་གྱི་རྒྱལ་པོས་སྤྱན་དྲངས་ནས་དེར་བཞུད་པའི་ཞག་བདུན་ན། སྒྲ་དང་ལྟས་ཆེན་པོ་བྱུང་བས་ནམ་མཁར་གཟིགས་ཚེ་ཤྲཱི་སེང་ཧ་བཞུགས་པ་མཇལ་བས་སྨྲེ་སྔགས་ཀྱི་གདུང་ཚིག་བཏོན་པས་གཟེར་བུ་བདུན་པའི་ཞལ་ཆེམས་ཕྱག་ཏུ་བབས་པ་དང་། བཀྲ་ཤིས་ཁྲི་སྒོའི་ཀ་བ་ན་ཡོད་པའི་སྙིང་ཐིག་གསང་བའི་མན་ངག་གི་དཔེ་རྣམས་ལོངས་ལ་དུར་ཁྲོད་བྷ་སིང་དུ་སོང་ཞིག་ཅེས་པ་ཐོས། དེ་ནས་གསང་བའི་དཔེ་རྣམས་བཏོན་ནས་རྒྱ་གར་གྱི་དུར་ཁྲོད་བྷ་སིང་དུ་བྱོན་ཞིང་དེར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་རྣམས་ལ་གསང་བ་སྙིང་ཐིག་གི་ཆོས་ཀྱི་འཁོར་ལོ་བསྐོར་ཏེ་བཞུགས་བཞིན། བཱི་མ་ལའང་རྗེས་སུ་བཟུང་ནས་གསང་བ་མཆོག་གི་གདམས་པ་ཐམས་ཅད་ལྷག་མེད་དུ་བསྩལ་བའི་མཐར་སྐུ་འོད་ཕུང་དུ་ཡལ་ལོ། །
སློབ་དཔོན་བཱི་མ་མི་ཏྲའམ་པཎ་ཆེན་དྲི་མེད་བཤེས་གཉེན་ནི། ཐལ་འགྱུར་ལས། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་སྟེ་སློབ་དཔོན་འདིའི་རྣམ་ཐར་གདུལ་བྱའི་མོས་སྣང་ལྟར་སྣ་ཚོགས་པར་བཞུགས་པ་ལས་ལོ་རྒྱུས་ཁ་ཅིག་ལྟར་ན། ཕ་མེད་ཀྱི་བུར་གྱུར་བས་ཡུམ་གནོད་དེ་གཡོག་མོ་བྱེ་མའི་ཁུང་དུ་སྦ་བར་མངགས། ཉིན་འགའི་རྗེས་བལྟས་ཙ་ན་མིག་བཀྲ་ཧྲིག་གེ་མ་ཤི་བར་འདུག་པས་སྤྲུལ་པའི་སྐུ་ཡིན་པར་ཤེས་ནས་བླངས། རིག་པའི་གནས་ལྔ་ལ་བསླབས་པས་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར། སློབ་དཔོན་ཛྙཱ་ན་སུ་ཏྲ་དང་སྐྱེ་བ་སྔ་མ་སྤུན་ཟླར་གྱུར་པའི་རྟེན་འབྲེལ་ལས་ཐུགས་ཤིན་ཏུ་མཐུན་པར་གནས་ཤིང་། རེ་ཞིག་ན་སྐྱོ་སངས་ལ་ལྷན་དུ་ཕེབས་སྐབས་རྡོ་རྗེ་སེམས་དཔའ་ནམ་མཁའ་རུ་མངོན་སུམ་དུ་བྱོན་ནས། ཀྱེ་རིགས་ཀྱི་བུ་གཉིས། ཁྱེད་གཉིས་སྐྱེ་བ་ལྔ་བརྒྱ་པཎྜི་ཏའི་ལུས་བླངས་ཤིང་དམ་པའི་ཆོས་སྤྱད་ཀྱང་འབྲས་བུ་མ་ཐོབ། ད་ཡང་མི་ཐོབ་པས་ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་འཚང་རྒྱ་བར་འདོད་ན་རྒྱ་ནག་པོའི་བྱང་ཆུབ་ཤིང་དྲུང་གི་ལྷ་ཁང་དུ་སོང་ཞིག །ཅེས་ལུང་བསྟན་པས་བཱི་མ་མི་ཏྲ་བརྩོན་འགྲུས་ཆེ་བས་དེ་ཉིད་དུ་ལྷུང་བཟེད་བླངས་ཏེ་བྱོན། ལུང་བསྟན་ལྟར་སློབ་དཔོན་ཤྲཱི་སེང་ཧ་མཇལ་ནས་ལོ་ཉི་ཤུའི་བར་ལ་སྙན་བརྒྱུད་ཕྱི་ནང་གསང་གསུམ་གྱི་གདམས་པ་བསྩལ་ཀྱང་དཔེ་མ་གནང་། བཱི་མ་ལ་ཐུགས་ཚིམས་ཏེ་སླར་རྒྱ་གར་དུ་བྱོན་ནས་ཛྙཱ་ན་སུ་ཏྲ་ལ་ཇི་ལྟར་བྱུང་བ་རྣམས་བསྙད་དེ་རང་ཉིད་སྤྱོད་པ་ལ་གནས་པར་མཛད། རེ་ཞིག་ན་མཁའ་འགྲོའི་ལུང་གིས། ཀྱེ་སྐལ་ལྡན། སྔར་བས་ཟབ་པའི་སྙིང་ཐིག་གི་གདམས་པ་བཞེད་ན་དུར་ཁྲོད་ཆེན་པོ་བྷ་སིང་གི་ནགས་སུ་སོང་ཞིག །ཅེས་ལུང་བསྟན་པ་བཞིན་དེ་ཉིད་དུ་བྱོན་པས་ཛྙཱ་ན་སུ་ཏྲ་དང་མཇལ་ཞིང་ཆེས་ཟབ་པའི་གདམས་པས་རྗེས་སུ་བཟུང་བར་གསོལ་བ་བཏབ། སློབ་དཔོན་གྱིས་ཆོ་འཕྲུལ་སྣ་ཚོགས་པ་སྣང་བར་མཛད་ནས་སྤྲོས་བཅས་སྤྲོས་མེད་ཀྱི་དབང་རྣམས་བསྐུར། རི་བོ་སྣང་བྱེད་ཀྱི་རྩེ་མོར་འཁོར་འདས་རུ་ཤན་འབྱེད་པའི་སྤྱོད་པ་དང་། ཤིན་ཏུ་སྤྲོས་མེད་ཀྱི་དབང་རྣམས་རྫོགས་པར་མཛད་པས་ཐུན་མོང་མ་ཡིན་པའི་རྟོགས་པ་འཁྲུངས། ཤངས་ཀྱི་རྩེ་མོར་ཡི་གེ་ཨ་དཀར་པོ་ཟགས་ལ་ཁད་པ་གཅིག་ཀྱང་བྱུང་། དེ་ནས་རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་སེམས་ཀྱི་དེ་ཉིད་ཁོ་ན་རྗེན་པར་མཐོང་། དབང་དེ་དག་གི་རིམ་པ་བཞིན་རྫོགས་པ་ཆེན་པོ་སྐོར་བཞིའི་གདམས་པ་དཔེ་དང་བཅས་པ་མ་ལུས་པ་གནང་། ལོ་བཅུའི་བར་ལ་ཞུན་མཐར་བཅད་ཅིང་ཛྙཱ་ན་སུ་ཏྲ་འོད་ཕུང་དུ་ཡལ་བའི་ཚེ་བཱི་མས་སྨྲེ་སྔགས་དང་གདུང་དབྱངས་བཏོན་པ་ན། སླར་ཡང་སྐུ་མངོན་སུམ་དུ་སྣང་བར་མཛད་ནས་རིན་པོ་ཆེ་སྣ་ལྔའི་ཟ་མ་ཏོག་ཅིག་ཕྱག་ཏུ་གཏད་པ་ལས་བཞག་ཐབས་བཞི་པ་ཞེས་པའི་འདས་རྗེས་ཐོབ་ཅིང་ཚིག་དོན་ལ་འཁྲུལ་བ་མེད་པའི་གདེང་ཐོབ་པར་གྱུར་ཏོ། །དེ་ནས་སློབ་དཔོན་བཱི་མ་ཉིད་ཤར་ཕྱོགས་ཀ་མ་རུའི་གྲོང་ཁྱེར་དུ་རྒྱལ་པོ་སེངྒེ་བཟང་པོའི་བླ་མཆོད་དུ་ལོ་ཉི་ཤུར་བཞུགས་ཤིང་། དེ་ནས་ནུབ་ཕྱོགས་སུ་གྲོང་ཁྱེར་བྷིར་ཡ་ཞེས་པར་རྒྱལ་པོ་དྷརྨ་པཱ་ལའི་མཆོད་གནས་ཀྱང་མཛད། དེའི་འོག་ཏུ་རབ་ཏུ་སྣང་བྱེད་ཅེས་པའི་དུར་ཁྲོད་ཆེན་པོར་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་སྤྱོད་པ་སྤྱད་ཅིང་གདུག་པའི་ཚོགས་ལ་ཆོས་སྟོན་ཞིང་བཞུགས། གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས། ཚར་གཅིག་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་སྦས། ཚར་གཅིག་ཁ་ཆེའི་ཡུལ་གསེར་གླིང་ཞེས་པའི་བྲག་སྐྱིབས་སུ་སྦས། ཚར་གཅིག་དུར་ཁྲོད་དེར་མཁའ་འགྲོ་མ་རྣམས་ཀྱི་མཆོད་པའི་རྟེན་དུ་བཞག །སློབ་དཔོན་འདི་འཕོ་བ་ཆེན་པོའི་སྐུ་གྲུབ་པས་འཕགས་ཡུལ་དུ་ཅི་རིགས་པར་བཞུགས་ཤིང་བོད་དང་རྒྱ་ནག་ཏུ་བྱོན་ནས་འགྲོ་དོན་རྒྱ་ཆེར་མཛད་ཚུལ་གྱི་རྣམ་ཐར་ཡང་ཤིན་ཏུ་མང་ངོ་། །
ཡང་རིག་འཛིན་ཤྲཱི་སེང་ཧ་ལས་སློབ་དཔོན་ཆེན་པོ་པདྨས་གསན་པ་སྟེ། སྤྱིར་སློབ་དཔོན་ཆེན་པོ་འདི་ཉིད་སྐུ་གསུམ་གྱི་སྟོན་པ་རྒྱ་མཚོའི་ངོ་བོ་ཡིན་པས་བརྒྱུད་པ་བྲེང་ཆགས་ཀྱི་མཚན་ཉིད་ལ་ལྟོས་པ་མེད་ཀྱང་ཚུར་མཐོང་གི་སྣང་ངོར་པཎ་གྲུབ་སྤྱི་ལྟར་བླ་བརྒྱུད་བར་མ་ཆད་པ་ལས་ཟབ་མོའི་མན་ངག་གི་བདུད་རྩི་གསན་བཞེས་ཀྱི་ཚུལ་བསྟན་པ་སྟེ། བཏགས་གྲོལ་སྙིང་པོའི་རྒྱུད་ལས། སྟོན་པ་ཀུན་བཟང་ཡབ་ཡུམ་གྱིས། །ཉིད་ལས་མི་གཞན་སེམས་དཔའི་སྣོད། །བྱིན་གྱིས་རླབས་ཀྱི་བདག་ཉིད་ལ། །བཏགས་པས་གཅིག་ཤེས་ཀུན་གྲོལ་ལོ། །བཅིངས་དང་གྲོལ་བའི་མཐའ་ལས་འདས། །རྡོ་རྗེ་སེམས་དཔའི་བྱིན་རླབས་ཀྱིས། །རང་བྱུང་དགའ་རབ་ཐུགས་ལ་ཤར། །སེང་ཧ་ཉིད་ལ་རྒྱུད་གཏད་པ། །འབྲས་བུ་ཡོངས་རྫོགས་བཏགས་གྲོལ་རྒྱུད། །ཨོ་རྒྱན་པདྨ་ཉིད་ལ་གཏད། །ལྔ་ལྡན་བུ་ལ་འདི་སྟོན་ཅིག །ཅེས་གསུངས་པ་ལྟར་དགའ་རབ་རྡོ་རྗེ་དང་འཇམ་དཔལ་བཤེས་གཉེན་ལས་ཀྱང་གསན་པར་གྲགས་ཀྱང་། གཙོ་ཆེར་རྡོ་རྗེ་ཕག་མོས་ལུང་བསྟན་པ་ལྟར་གུ་རུ་ཤྲཱི་སེང་ཧ་ལས་བླ་མ་བསྟེན་ནས་གསན་པའི་ཚུལ་མཛད་པ་སྟེ། དེ་ཡང་བདག་ཉིད་ཆེན་པོ་འདིའི་གསང་བ་བསམ་མི་ཁྱབ་པའི་རྣམ་ཐར་བཀའ་གཏེར་གྱི་ཡི་གེ་རྣམས་ལས་སྣ་ཚོགས་པ་བྱུང་བ་ལས། འདིར་ཐང་ཡིག་སོགས་གཏེར་མ་ཡོངས་གྲགས་ཀྱི་ལུགས་སུ་བྱས་ཏེ་ཅུང་ཟད་གླེང་བ་ལ། ཇི་སྐད་དུ། དབུས་འགྱུར་འཆང་ལུང་བསྟན་པའི་མདོ་ལས། ང་ནི་འདི་ནས་མི་སྣང་ནས། །ལོ་ནི་བཞི་གཉིས་ལོན་པ་ན། །དྷ་ན་ཀོ་ཤའི་མཚོ་གླིང་དུ། །པདྨ་གེ་སར་སྡོང་པོ་ལས། །ཀུན་ལས་ལྷག་པའི་སྐྱེས་བུ་འབྱུང་། །ཞེས་དང་། བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །ཨོ་རྒྱན་ཡུལ་དུ་ང་ཉིད་འབྱུང་། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོར་འགྱུར། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིགས་སྔགས་འཆང་། །ཞེས་མདོ་རྒྱུད་དུ་མ་ནས་གསལ་བར་བསྟན་པ་ལྟར་དེ་བཞིན་གཤེགས་པ་ཐམས་ཅད་ཀྱི་གསུང་གི་རྡོ་རྗེའི་བདག་ཉིད་སངས་རྒྱས་འོད་དཔག་ཏུ་མེད་པའི་སྤྲུལ་སྐུ་སྟེ། དེ་ཡང་ནུབ་ཕྱོགས་ཨོ་རྒྱན་གྱི་ཡུལ་གྱི་ལྷོ་ནུབ་སྲིན་ཡུལ་དང་ཐག་ཉེ་བའི་རྒྱ་མཚོའི་གླིང་དུ། སངས་རྒྱས་ཐམས་ཅད་ཀྱི་བྱིན་རླབས་ལས་བྱུང་བའི་པདྨའི་སྡོང་པོ་ཁ་དོག་སྣ་ཚོགས་པའི་སྦུབས་སུ་བདེ་ལྡན་ཞིང་གི་མགོན་པོའི་ཐུགས་ཀ་ནས་གསེར་གྱི་རྡོ་རྗེ་ཧྲཱིས་མཚན་པ་ཞིག་སྤྲོས་པ་ལས། རྫུས་སྐྱེས་ཀྱི་ཁྱེའུ་ལོ་བརྒྱད་པའི་ན་ཚོད་མཚན་དང་དཔེ་བྱད་ཀྱིས་བརྒྱན་པར་སྤྲུལ་ཏེ་བཞུགས་ཤིང་། ལྷ་དང་མཚོ་གླིང་གི་མཁའ་འགྲོ་མ་རྣམས་ལ་ཟབ་མོའི་ཆོས་སྟོན་པར་མཛད་པའི་ཚེ་ན། ཡུལ་དེའི་རྒྱལ་པོ་ཨིནྡྲ་བྷོ་དྷི་ལ་སྲས་མེད་པས་དཀོན་མཆོག་མཆོད་ཅིང་དཀོར་མཛོད་སྦྱིན་པ་བཏང་བ་ཟད་དེ་རྒྱ་མཚོའི་གླིང་ནས་ཡིད་བཞིན་གྱི་ནོར་བུ་བླངས་ཏེ་ཚུར་བྱོན་པའི་དུས་ཆོས་བློན་ཀྲིཥྞ་འཛིན་གྱིས་ཐོག་མར་མཇལ། དེ་ནས་རྒྱལ་པོས་མཇལ་ཞིང་སྲས་ཀྱི་སྐལ་བར་བྱོན་པར་གསོལ་བ་བཏབ་པ་ལྟར་ཞལ་གྱིས་བཞེས་ནས་ཕོ་བྲང་དུ་སྤྱན་དྲངས། ནོར་བུའི་མཐུ་ལས་བྱུང་བའི་རིན་པོ་ཆེའི་ཁྲིའི་སྟེང་ལ་བཞུགས་སུ་གསོལ་ཏེ་པདྨ་འབྱུང་གནས་དང་མཚོ་སྐྱེས་རྡོ་རྗེ་ཞེས་མཚན་གསོལ། གཞོན་ནུའི་རོལ་རྩེད་ཀྱིས་གདུལ་བྱ་མཐའ་ཡས་པ་སྨིན་པར་མཛད་ཅིང་མཁའ་འགྲོ་འོད་འཆང་མ་ཁབ་ཏུ་བཞེས། ཟས་གོས་རིན་པོ་ཆེའི་ཆར་གྱིས་སྐྱེ་བོ་ཐམས་ཅད་ཚིམས་པར་བྱས་ཤིང་ཨོ་རྒྱན་གྱི་རྒྱལ་སྲིད་ཆོས་བཞིན་དུ་བསྐྱངས་པས་རྒྱལ་པོ་ཐོར་ཅོག་ཅན་ནམ་པདྨ་རྒྱལ་པོར་གྲགས། དེའི་ཚེ་རྒྱལ་སྲིད་བཟུང་བས་གཞན་དོན་རླབས་ཆེན་མི་འགྲུབ་པར་དགོངས་ནས་ཡབ་ལ་ཞུས་ཀྱང་མ་གནང་བས་ཕོ་བྲང་ཡང་རྩེ་ནས་གར་མཛད་དེ་རྩེ་གསུམ་ཤོར་བའི་བརྫུ་བག་གིས་བདུད་བློན་གྱི་བུ་དབྱིངས་སུ་སྤར། བུ་བསད་པའི་ཁྲིམས་ཀྱིས་དུར་ཁྲོད་དུ་སྤྱུགས་པས། བསིལ་བའི་ཚལ་དང་། དགའ་བའི་ཚལ། སོ་ས་གླིང་རྣམས་སུ་བརྟུལ་ཞུགས་ཀྱི་སྤྱོད་པ་མཛད་པ་ན། མཁའ་འགྲོ་བདུད་འདུལ་མ་དང་ཞི་བ་འཚོས་དབང་བསྐུར་ཞིང་བྱིན་གྱིས་བརླབས། དུར་ཁྲོད་ཀྱི་མཁའ་འགྲོ་མ་རྣམས་དབང་དུ་བསྡུས་པའི་ཚེ་ཤཱནྟ་རཀྵི་ཏ་ཞེས་གྲགས། ངྷ་ན་ཀོ་ཥའི་མཚོ་གླིང་དུ་བྱོན་ཏེ་གསང་སྔགས་མཁའ་འགྲོའི་བརྡ་སྐད་ཀྱིས་བསྒྲུབས་པས་མཚོ་གླིང་གི་མཁའ་འགྲོ་མ་དབང་དུ་བསྡུས། རྩུབ་འགྱུར་ཚལ་དུ་སྤྱོད་པ་མཛད་པས་རྡོ་རྗེ་ཕག་མོས་ཞལ་བསྟན་ནས་བྱིན་གྱིས་བརླབས། རྒྱ་མཚོའི་ཀླུ་དང་བར་སྣང་གི་གཟའ་སྐར་ཐམས་ཅད་དམ་ལ་བཞག གནས་གསུམ་གྱི་དཔའ་བོ་མཁའ་འགྲོ་མ་རྣམས་ཀྱིས་དངོས་གྲུབ་བསྩལ་ཏེ་མཚན་རྡོ་རྗེ་དྲག་པོ་རྩལ་དུ་གྲགས་སོ། །དེ་ནས་རྡོ་རྗེ་གདན་དུ་བྱོན་ནས་ཆོ་འཕྲུལ་སྣ་ཚོགས་བསྟན་པས་མི་རྣམས་ཀྱིས་ཁྱོད་སུ་ཡིན་དྲིས་པ་ལ། རང་བྱུང་གི་སངས་རྒྱས་ཡིན་པར་ཞལ་གྱིས་བཞེས་པ་ཡིད་མ་ཆེས་ཏེ་སྐུར་པ་བཏབ་པ་ན། དགོས་པའི་དབང་མང་དུ་གཟིགས་ནས་ཟ་ཧོར་གྱི་ཡུལ་དུ་བྱོན་ཏེ་སློབ་དཔོན་པྲ་བྷ་ཧསྟི་ལས་རབ་ཏུ་བྱུང་བའི་མཚན་ཤཱཀྱ་སེངྒེར་གྲགས། ཡོ་གའི་རྒྱུད་རྣམས་ཚར་བཅོ་བརྒྱད་གསན་པས་དེ་ཉིད་དུ་ལྷ་རྣམས་ཀྱི་ཞལ་མཐོང་། སླར་ལྷོ་ཕྱོགས་བྷཻདྷེའི་ཡུལ་གྱི་དུར་ཁྲོད་སྐུ་ལ་རྫོགས་སུ་མཁའ་འགྲོ་མ་རྣམས་ཀྱིས་མཆོད་ནས་ཆོས་གསུངས་པས་མཚན་ཉི་མ་འོད་ཟེར་དུ་གྲགས། དེ་ནས་ནགས་ཚལ་དྲྭ་བ་ཅན་དུ་བྱོན་ནས་སྲས་མོ་གོ་མ་དེ་ཝིས་ཕྱི་ནང་གསང་བའི་དབང་བསྐུར་ཞིང་། སློབ་དཔོན་འཇམ་དཔལ་བཤེས་གཉེན་དང་མཇལ་ཚེ་ངས་ཁྱོད་འདུལ་བའི་དུས་ལ་མ་སླེབས་པས་མཁའ་འགྲོ་གསང་བ་ཡེ་ཤེས་དགེ་སློང་མའི་ཚུལ་དུ་བྱོན་པ་ཀུན་དགའ་མོ་ལས་ཞུས་ཞེས་ལུང་བསྟན། དེ་ལས་ཕྱི་ནང་གསང་བའི་དབང་རྣམས་རྫོགས་པར་མཛད། སངས་རྒྱས་གསང་བ་ལས་ཕར་ཕྱིན་དང་སྒྱུ་འཕྲུལ་སོགས་མདོ་སྔགས་ཀྱི་ཆོས་མང་པོ་གསན། གཞན་ཡང་འཕགས་ཡུལ་གྱི་མཁས་གྲུབ་དུ་མ་ལས་རིག་པའི་གནས་ཐམས་ཅད་གསན་ཅིང་སྦྱངས་པའི་ཚུལ་བསྟན་པས་ཆོས་ཐམས་ཅད་ཚར་རེ་རེས་མཁས་པར་མཁྱེན་པས་མཚན་བློ་ལྡན་མཆོག་སྲེད་དུ་གྲགས། དེ་ནས་སྤྲུལ་པའི་སྐུ་དགའ་རབ་རྡོ་རྗེ་དང་། འཇམ་དཔལ་བཤེས་གཉེན། ཤྲཱི་སེང་ཧ་གསུམ་ལས་རྫོགས་པ་ཆེན་པོ་དོན་བརྒྱུད་ཀྱི་མན་ངག་རྒྱལ་ཐབས་སྤྱི་བླུགས་ཀྱི་ཚུལ་དུ་ཐོབ་པས་ཟབ་གསལ་གཉིས་སུ་མེད་པའི་ཡེ་ཤེས་ཀྱི་དགོངས་པར་རང་དབང་བརྙེས། ཁྱད་པར་སློབ་དཔོན་ཤྲཱི་སེངྷའི་མདུན་ནས་ལོ་ཉི་ཤུ་རྩ་ལྔའི་རིང་འོད་གསལ་རྫོགས་པ་ཆེན་པོའི་ཚིག་དོན་གྱི་ཆ་ཐམས་ཅད་ལྷག་མེད་དུ་གསན་པའི་ཚུལ་ནི། རྡོ་རྗེ་ཕག་མོས་ལུང་བསྟན་ལས། སྐལ་ལྡན་འབྲས་བུ་ཚེ་གཅིག་ངེས་པའི་ལུང་། །གང་དང་མི་འདྲ་ཀུན་ཀྱིས་མ་རྟོགས་པ། །ཤྲཱི་སེངྷ་རྡོ་རྗེའི་ཐུགས་ལ་གནས། །རྩུབ་འགྱུར་ཚལ་དུ་དགོངས་པ་རྙེད་པར་འགྱུར། །ཞེས་གསུངས་པ་དང་། སྐད་ཅིག་གིས་རྩུབ་འགྱུར་ཚལ་གྱི་དུར་ཁྲོད་ཆེན་པོར་རྫུ་འཕྲུལ་གྱིས་བྱོན་ཏེ་སློབ་དཔོན་ཤྲཱི་སེངྷ་ལ་ཕྱག་དང་སྐོར་བ་མཛད་ནས་རྗེས་སུ་བཟུང་བར་ཞུས་པས་གནང་སྟེ། རྫོགས་པ་ཆེན་པོ་ནམ་མཁའ་དང་མཉམ་པའི་རྒྱུད་ལ་སོགས་པ་སེམས་ཀློང་མན་ངག་གི་སྐོར་མཐའ་དག་གསུངས་ཤིང་། ཁྱད་པར་དུ་ཐིག་ལེ་ཕྱི་ནང་གསང་བའི་སྐོར་མ་ལུས་པ་གསན་དུས། ཡང་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་ལོངས་སྤྱོད་རྫོགས་པ་སྐུའི་ཞིང་ཁམས་མཐོང་ཞིང་། ཆོས་ཀྱི་སྐུའི་ཞིང་ཁམས་སུ་སངས་རྒྱས་པའི་གདམས་ངག་གཅིག་གནང་བར་འཚལ་ཞེས་གསོལ་བ་དང་། ཤྲཱི་སེངྷས་གསུངས་པ། རིགས་ཀྱི་བུ་ཤིན་ཏུ་ལེགས་ཀྱི་ཆོས་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་ཞེ་ཕུགས། ཐེག་པ་ཐམས་ཅད་ལས་འདས་ཤིང་། མཁའ་འགྲོ་ཐམས་ཅད་ཀྱི་སྙིང་ཏིག གསང་བ་བས་ཀྱང་ཆེས་ཤིན་ཏུ་གསང་བའི་དོན། འོད་གསལ་རྡོ་རྗེ་སྙིང་པོའི་ཐེག་པ་ཆེན་པོ། སེམས་ལས་འདས་པ། ཡིད་དཔྱོད་དང་བྲལ་བ། རྣམ་པར་ཤེས་པ་ཐམས་ཅད་ཀྱི་སྤྱོད་ཡུལ་དུ་མ་གྱུར་པ། ཡིན་མིན་གྱི་མཐའ་ལ་མི་གནས་ཤིང་། ལྟ་སྒོམ་བསྐྱེད་རྫོགས་ཀྱི་ཡུལ་ལས་འདས་པ། དུས་གསུམ་རྒྱལ་བ་ཐམས་ཅད་ཀྱི་ཡུམ། རིག་འཛིན་ཆེན་པོ་རྣམས་ཀྱི་ཉེ་ལམ། མཐར་ཐུག་པའི་མན་ངག་བླ་ན་མེད་པ། ལོ་གསུམ་གྱིས་སངས་རྒྱས་ཀྱི་བྱང་ཆུབ་འགྲུབ་པའི་གདམས་པ་ཞིག་ཡོད་ཀྱིས་བསྟན་པར་བྱའོ། །གསུངས་ནས། རྫོགས་པ་ཆེན་པོ་ཡང་གསང་བླ་ན་མེད་པ་མཁའ་འགྲོ་སྙིང་ཏིག་གི་དབང་དང་། དེའི་ཉམས་ལེན་མན་ངག་གི་ཡི་གེ་རབ་ཏུ་མང་པོ་དང་། དེའི་རྒྱབ་རྟེན་དུ་སྒྲ་ཐལ་འགྱུར་རྩ་བའི་རྒྱུད། ཡི་གེ་མེད་པ་གཞིའི་རྒྱུད། སྐུ་གདུང་འབར་བ་རྟགས་ཀྱི་རྒྱུད། རྫོགས་པ་རང་བྱུང་དབང་གི་རྒྱུད། ངོ་སྤྲོད་སྤྲས་པའི་རྒྱུད། སྒྲོན་མ་འབར་བའི་རྒྱུད། རིག་པ་རང་ཤར་གྱི་རྒྱུད། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད། རིན་པོ་ཆེ་སྤུངས་པའི་རྒྱུད། ཉི་ཟླ་ཁ་སྦྱོར་གྱི་རྒྱུད། ནོར་བུ་ཕྲ་བཀོད་ཀྱི་རྒྱུད། རིག་པ་རང་གྲོལ་གྱི་རྒྱུད། མུ་ཏིག་ཕྲེང་བའི་རྒྱུད། ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱུད། བཀྲ་ཤིས་མཛེས་ལྡན་གྱི་རྒྱུད། སེང་གེ་རྩལ་རྫོགས་ཀྱི་རྒྱུད། ཀློང་དྲུག་པའི་རྒྱུད། ཀུན་ཏུ་བཟང་མོ་ཀློང་གསལ་ཉི་མའི་རྒྱུད་དང་བཅོ་བརྒྱད་ཡོངས་སུ་རྫོགས་པར་གསུངས་ཤིང་བསྟན་པ་གཏད་དོ། །དེ་ནས་དུར་ཁྲོད་ཆེན་པོ་སོ་ས་གླིང་དུ་བྱོན་ཏེ་ལོ་གསུམ་ཉམས་སུ་བླངས་པས་སྐྱེ་ཤི་གཉིས་སྤངས་ཆུའི་ཟླ་བ་ལྟ་བུའི་སྐུ་གྲུབ་ནས་རྫུ་འཕྲུལ་གྱིས་གནས་རྣམ་པ་སྣ་ཚོགས་སུ་མི་དང་མི་མིན་གྱི་འགྲོ་བ་རབ་ཏུ་མང་པོ་ལ་ཕན་པར་མཛད་ཅིང་། ཁྱད་པར་རྒྱ་གར་གྱི་རྒྱལ་པོ་ངྷརྨ་པ་ལའི་མཆོད་གནས་སུ་ཉིན་པར་བཞུགས་ཤིང་། མཚན་མོ་དུར་ཁྲོད་ཆེན་པོ་བསིལ་བའི་ཚལ་དང་། སོ་ས་གླིང་དང་། རབ་ཏུ་སྣང་བྱེད་དང་། དགའ་བྱེད་དང་། བྷ་སིང་དང་། ཐ་ཆུང་དང་། འཇིགས་བྱེད་ལ་སོགས་པར་བྱོན་ཏེ། མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ། །དེ་ནས་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་སྲས་མོ་མནྡ་ར་བ་ཞེས་མཁའ་འགྲོའི་མཚན་དང་ལྡན་པ་དེ་དབང་དུ་བསྡུས་ནས་སྒྲུབ་རྟེན་གྱི་ཕྱག་རྒྱ་མོར་ཁྲིད་ནས་བལ་ཡུལ་བྲག་ཕུག་མཱ་ར་ཏི་ཀར་ཚེའི་སྒྲུབ་པ་ཟླ་བ་གསུམ་མཛད་པས་མགོན་པོ་ཚེ་དཔག་མེད་དངོས་སུ་བྱོན་ནས་དབང་བསྐུར་ཞིང་ཉིད་དང་གཉིས་སུ་མེད་པར་བྱིན་གྱིས་བརླབས། ཚེ་རྒྱུད་བྱེ་བ་ཕྲག་བརྒྱ་གནང་བས་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས་ནས་སྐྱེ་འཆི་མེད་པ་རྡོ་རྗེའི་སྐུ་གྲུབ་ནས་ཟ་ཧོར་གྱི་རྒྱལ་ཁམས་འདུལ་བའི་དོན་ལ་གཤེགས། རྒྱལ་བློན་རྣམས་ཀྱིས་ལོག་པའི་སྤྱོད་པས་མེ་ལ་བསྲེགས་པ་ན་ཏིལ་མར་མཚོར་འཁྱིལ་བའི་དབུས་སུ་པདྨའི་སྡོང་པོའི་རྩེར་བཞུགས་པའི་རྫུ་འཕྲུལ་བསྟན་ནས་དད་པ་ལ་བཀོད་ཅིང་ཐམས་ཅད་ཆོས་ལ་བཙུད། སླར་ཨོ་རྒྱན་གྱི་རྒྱལ་ཁམས་འདུལ་བའི་ཕྱིར་བསོད་སྙོམས་ལ་ཕེབས་པས། ཡུལ་མི་རྣམས་ཀྱིས་ངོ་ཤེས་ཏེ་སྔོན་གྱི་བདུད་བློན་རྣམས་ཀྱིས་ཙནྡན་གྱི་མེ་ལ་བསྲེགས་པས་མཚོ་དབུས་པདྨའི་སྡོང་པོར་ཡབ་ཡུམ་གཉིས་བཞུགས་ཏེ། སེམས་ཅན་རྣམས་འཁོར་བ་ལས་སྒྲོལ་བ་མཚོན་ཕྱིར་ཐོད་ཕྲེང་སྐུ་ལ་གསོལ་བའི་རྫུ་འཕྲུལ་བསྟན་པས་པདྨ་ཐོད་ཕྲེང་རྩལ་དུ་གྲགས། རྒྱལ་པོའི་བླ་མཆོད་ལོ་བཅུ་གསུམ་མཛད་ནས་རྒྱལ་ཁམས་ཐམས་ཅད་ཆོས་ལ་བཀོད། བཀའ་འདུས་ཆོས་ཀྱི་རྒྱ་མཚོའི་སྨིན་གྲོལ་བསྩལ་ཏེ་རྒྱལ་པོ་ཡབ་ཡུམ་སོགས་ལས་ཅན་ཐམས་ཅད་མཆོག་གི་རིག་འཛིན་གྱི་ས་ལ་བཀོད་པས་མཚན་པདྨ་རྒྱལ་པོར་གྲགས། སྐུ་ལ་རྫོགས་པ་སོགས་དུར་ཁྲོད་ཆེན་པོ་རྣམས་སུ་བྱོན་ཏེ་མཁའ་འགྲོ་རྣམས་ལ་གསང་སྔགས་ཀྱི་ཆོས་བསྟན། ཕྱི་ནང་གི་དྲེགས་པ་ཅན་ཐམས་ཅད་ཀྱི་སྲོག་སྙིང་བླངས་ནས་བསྟན་སྲུང་དུ་བསྐོས་པ་སོགས་མཛད་པའི་ཚེ་མཚན་ཉི་མ་འོད་ཟེར་གྲགས། རྡོ་རྗེ་གདན་དུ་མུ་སྟེགས་ཀྱི་སྟོན་པ་ལྔ་བརྒྱས་བསྟན་པ་ལ་རྒོལ་བ་རྩོམ་པའི་ཚེ་རྩོད་པ་དང་ནུས་པ་འགྲན་པས་སློབ་དཔོན་ཉིད་རྒྱལ། ཁོང་རྣམས་ཀྱིས་ངན་སྔགས་སྒྲུབ་པའི་ཚེ་མཁའ་འགྲོ་བདུད་འདུལ་མས་ཕུལ་བའི་དྲག་སྔགས་ཀྱིས་ཕྱིར་བཟློག་སྟེ་ཐོག་ཆེན་ཕབ་ནས་མུ་སྟེགས་ཀྱི་སྟོན་པ་རྣམས་བསྒྲལ། གྲོང་ཁྱེར་མེས་བསྲེགས། ལྷག་མ་སངས་རྒྱས་ཀྱི་བསྟན་པ་ལ་བཙུད་ནས་ཆོས་ཀྱི་རྒྱལ་མཚན་དགུང་དུ་བསྒྲེངས་བའི་ཚེ་སེང་གེ་སྒྲ་སྒྲོག་ཏུ་གྲགས་ཏེ། འདི་ཡན་ཆད་ཟག་པ་གསུམ་ཟད་ལམ་མཆོག་ཡོངས་སུ་རྫོགས་པ་ཚེ་དབང་རིག་འཛིན་གྱི་ཚུལ་དུ་བཞུགས་པ་ཡིན་ནོ། །དེ་ནས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་བལ་པོའི་རྒྱལ་པོ་དགེ་འཛིན་གྱི་སྲས་མོ་བལ་མོ་ཤཱཀྱ་དེ་བ་སྒྲུབ་རྟེན་མཛད་ནས་དཔལ་ཡང་དག་གི་སྒོ་ནས་མཆོག་གི་དངོས་གྲུབ་སྒྲུབ་པའི་ཚེ་འདྲེ་སྲིན་མཐུ་བོ་ཆེ་གསུམ་གྱིས་བར་ཆད་བྱས་ཏེ། ལོ་གསུམ་དུ་ཆར་མ་བབ། ནད་དང་མུ་གེ་བཏང་བ་ལ། རྒྱ་གར་དུ་བླ་མ་རྣམས་ལས་བར་ཆད་འདུལ་བའི་ཆོས་ལེན་པར་བཏང་བས་ཕུར་པའི་རྒྱུད་ལུང་མི་ཁུར་གཉིས་བརྫངས་པ་ཕེབས་པ་ཙམ་གྱིས་བར་ཆད་རང་བཞིན་གྱིས་ཞི། ཆར་བབ་ཅིང་ནད་མུག་རྒྱུན་ཆད། ཡབ་ཡུམ་གཉིས་མཆོག་གི་དངོས་གྲུབ་བརྙེས་ཏེ་ཕྱག་རྒྱ་ཆེན་པོའི་རིག་འཛིན་གྱི་སྐུར་བཞུགས་སོ། །གཞན་ཡང་དུས་སྐབས་ཅི་རིགས་པར། ཨོ་རྒྱན་གྱི་གླིང་ཕྲན་ཧུརྨུ་ཛུ་དང་། སི་ཀོ་ངྷ་ར་དང་། ངྷ་ན་ཀོ་ས་དང་། རུཀྨ་སོགས་དང་། ཏི་ར་ཧུ་ཏི་སོགས་ཐ་རུའི་རྒྱལ་ཁམས་དང་། ཀཱ་མ་རུ་ལ་སོགས་པ་རྣམས་སུ་གཅིག་དང་དུ་མའི་རོལ་གར་གྱིས་གདུལ་བྱའི་སྐལ་པ་དང་འཚམས་པར་ཆོས་སྟོན་པ་དང་མཆོག་དང་ཐུན་མོང་གི་དངོས་གྲུབ་ཀྱིས་སེམས་ཅན་མང་པོ་ལ་ཕན་བཏགས་པ་སྟེ། ཧོར་དང་རྒྱ་ནག་སོགས་འདུལ་བ་ལ་རྒྱལ་པོ་མངོན་ཤེས་ཅན་དང་། རྣལ་འབྱོར་པ་སྟོབས་ལྡན་དུ་སྤྲུལ་པ་དང་། ཞང་ཞུང་ཡུལ་དུ་ཏ་བི་ཧྲི་ཙ་ཞེས་རང་བྱུང་གི་ཁྱེའུར་སྤྲུལ་ནས་རྫོགས་ཆེན་སྙན་བརྒྱུད་ཀྱི་གདམས་པས་སྐལ་ལྡན་མང་པོ་འོད་ལུས་སུ་བསྐྱལ་བས་མཚོན་ཡུལ་རིས་དང་སྐད་རིགས་མི་གཅིག་པ་རྣམས་སུ་གང་འདུལ་གྱི་ཕྲིན་ལས་སྣ་ཚོགས་པས་སྐྱེ་རྒུ་རྣམས་ཐར་ལམ་དུ་བཀོད་པའི་ཕྲིན་ལས་ནི་ཚད་གཟུང་དུ་མེད་པ་སྟེ་རྒྱལ་བའི་ཕྲིན་ལས་བསམ་མི་ཁྱབ་པའི་ཆོས་ཉིད་དོ། །ཁྱད་པར་རང་ཅག་གངས་རིའི་ལྗོངས་པ་རྣམས་ལ་རྒྱལ་བསྟན་མདོ་སྔགས་ཀྱི་བསྟན་པ་ཉི་མ་ཤར་བ་ལྟར་བྱུང་བ་སློབ་དཔོན་འདི་ཉིད་ཁོ་ནའི་བཀའ་དྲིན་དང་ཕྲིན་ལས་ཡིན་པ་སྔོན་གྱི་རྒྱལ་རབས་ཆོས་འབྱུང་དག་ན་རྒྱས་པར་གསལ་ཞིང་འོག་ཏུ་ཡང་ཅུང་ཟད་འབྱུང་བར་འགྱུར་བས་འདིར་མི་སྤྲོའོ། །དེ་ལྟར་དངོས་རྒྱུད་རྫུ་འཕྲུལ་གྱི་རོལ་གར་ཚད་མེད་པས་རྒྱ་བལ་བོད་གསུམ་གཙོ་བོར་གྱུར་པའི་གདུལ་བྱ་མཐའ་ཡས་པ་སྨིན་གྲོལ་གྱི་ས་ལ་བཀོད་ནས་སྤྱི་ལོ་༨༧༦པར་རྔ་ཡབ་སྲིན་པོའི་གླིང་དུ་སྐུ་ལུས་མ་སྤངས་པར་འཇའ་འོད་ཀྱི་ཀློང་ནས་མངོན་སུམ་དུ་གཤེགས་པར་མཛད་དོ། །དེ་ཡན་ཆད་རིག་འཛིན་བརྡའི་བརྒྱུད་པ་སྟེ་སྟོན་པའི་ཐུགས་ཡེ་ཤེས་རིག་པའི་རང་རྩལ་ལས་ཤར་བ་ཁོ་ན་ལས་གང་ཟག་རང་རྒྱུད་པ་མིན་པས། བརྡ་ཐབས་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་སོང་བ་ཤ་སྟག་ཡིན་ཕྱིར། རིག་འཛིན་བརྡ་ཡི་བརྒྱུད་པ་ཞེས་གསང་ཆེན་སྔ་འགྱུར་པའི་བརྡ་ཆད་ཐུན་མོང་མ་ཡིན་པའོ། །
སྨྲས་པ།
སྐུ་གསུམ་སྟོན་པའི་ལྷ་ལམ་ཡངས་པར་ཐུགས་རྗེའི་སྤྲིན་ཆེན་རབ་དཀྲིགས་པས། །རྣམ་གསུམ་ཡོ་ག་འབྲས་བུའི་ཐེག་པ་སྨིན་གྲོལ་བདུད་རྩིའི་ཆོས་ཆར་འབེབས། །བརྒྱུད་གསུམ་བླ་མའི་ཞལ་ཆབ་མ་ཉམས་བྱིན་བརྒྱུད་རྟོགས་པའི་ཟིལ་མངར་ཅན། །ས་གསུམ་གདུལ་བྱའི་བསོད་ནམས་ཞིང་སར་དུས་ཀུན་དགེ་བའི་དཔྱིད་དུ་འཇོ། །གཞི་དབྱིངས་སྟོང་གསལ་ཆོས་སྐུའི་ཞིང་ཁམས་རྒྱ་ཆད་ཕྱོགས་ལྷུང་ཀུན་དང་བྲལ། །གདོད་ནས་ཡེ་གྲོལ་ཆོས་སྐུའི་སྟོན་པ་ཁྱབ་བདག་རིགས་དྲུག་ཀུན་ཏུ་བཟང་། །ཉིད་ལས་མི་གཞན་རྒྱལ་བ་རྒྱ་མཚོ་ཡེ་ཤེས་དག་པའི་འཁོར་ཚོགས་ལ། །བྱིན་གྱིས་བརླབས་པའི་ངོ་བོར་སྣང་བ་སྐྱེ་མེད་བརྗོད་བྲལ་དགོངས་པའི་གསུང་། །ངེས་པ་ལྔ་ལྡན་ལོངས་སྐུའི་ཕོ་བྲང་ལྷུན་གྲུབ་སྟུག་པོ་བཀོད་པའི་ཞིང་། །མཆོག་ཏུ་མི་འགྱུར་ཁ་སྦྱོར་བདུན་ལྡན་ལོངས་སྤྱོད་རྫོགས་སྐུ་རྣམ་སྣང་མཛད། །ཐ་མི་དད་ཅིང་སྤྲོ་བསྡུ་བྲལ་བ་རང་སྣང་དག་པའི་འཁོར་ཚོགས་ལ། །བསམ་གྱིས་མི་ཁྱབ་རང་གི་ངོ་བོས་བརྡ་ཐབས་རྟགས་ཀྱི་གསུང་མཆོག་སྣང་། །བྱེ་བ་ཕྲག་བརྒྱ་སྟོང་གསུམ་འཇིག་རྟེན་དག་དང་མ་དག་འགྲོ་མང་ཁམས། །དཔག་ཡས་སྒྱུ་འཕྲུལ་ཆུ་ཟླའི་རོལ་གར་སྣ་ཚོགས་སྤྲུལ་པའི་སྐུར་སྣང་བས། །ཐ་དད་དྲང་ངེས་མདོ་དང་སྔགས་ཀྱི་ཟབ་དང་རྒྱ་ཆེའི་ཆོས་ཚུལ་འབུམ། །མ་ལུས་གདུལ་བྱའི་དབྱངས་ཀྱིས་བསྙད་པ་སྒྲ་ཚིག་སྡེབ་སྦྱོར་ལེགས་པས་གསུངས། །ཇི་སྙེད་སྣང་ཞིང་སྲིད་པའི་ཆོས་སོ་ཅོག །ལྷ་སྔགས་བདེ་བ་ཆེན་པོའི་རོལ་རྩལ་དུ། །བསྐྱེད་པའི་རྣལ་འབྱོར་དག་མཉམ་དབྱེར་མེད་པས། །དཀྱིལ་འཁོར་གསུམ་དུ་རྟོགས་པ་མ་ཧཱའི་ལམ། །ཤེས་དང་ཤེས་བྱ་མཚན་བཅས་དངོས་སྣང་ཀུན། །ཐབས་མཆོག་མི་འགྱུར་ཞུ་བདེའི་ཡེ་ཤེས་ཁམས། །རྫོགས་པའི་རིམ་པས་བདེ་སྟོང་དབྱེར་མེད་དུ། །རྣལ་འབྱོར་ལམ་བྱེད་ལུང་ཆེན་ཨ་ནུའི་ལུགས། །སྣང་སྲིད་འཁོར་འདས་བཟང་ངན་མཚན་རྟོག་ཀུན། །གདོད་ནས་དག་པ་སྟོང་ཆེན་ཆོས་ཀྱི་སྐུར། །ཤར་གྲོལ་དུས་མཉམ་རིག་སྟོང་དབྱེར་མེད་དུ། །མ་ལུས་འུབ་ཆུབ་བྱར་མེད་ཨ་ཏིའི་གནད། །རྒྱལ་ཀུན་གསང་བ་བླ་ན་མེད་པའི་མཛོད། །ངེས་དོན་ཆོས་ཚུལ་རྒྱ་མཚོའི་ཉིང་ཁུའི་བཅུད། །ཟབ་ལས་ཆེས་ཟབ་ནང་རྒྱུད་ཡོ་ག་གསུམ། །བསྟན་པའི་སྙིང་པོ་རྡོ་རྗེ་ཐེག་པ་འཕགས། །ཐུབ་བསྟན་ཡོངས་སུ་རྫོགས་པའི་ཁང་བཟང་རྩེར། །གསང་ཆེན་བསྟན་པའི་བ་གམ་མངོན་མཐོ་ཞིང་། །སྡེ་གསུམ་ནོར་བུའི་ཏོག་གིས་ཉེར་མཛེས་པ། །སྔ་འགྱུར་ཆོས་ཀྱི་རྒྱལ་ཐབས་འདི་ཀོ་རྨད། །ཅེས་པ་ནི་གསང་སྔགས་རྡོ་རྗེ་ཐེག་པ་ནང་རྒྱུད་ཡོ་ག་གསུམ་གྱི་བསྟན་པ་རིན་པོ་ཆེ་ཇི་ལྟར་དར་ཚུལ་བཤད་པའི་སྐབས་ཀྱི་ཆེད་དུ་བརྗོད་པའི་ཚིགས་སུ་བཅད་པའི་ཕྲེང་བའོ། །
སྔ་འགྱུར་གྲུབ་དབང་རྒྱལ་བ་རྫོགས་ཆེན་པའི་གདན་རབས་ཆོས་བརྒྱུད་དང་བཅས་པའི་བྱུང་བ་བརྗོད་པའི་གཏམ་ཡིད་བཞིན་དབང་གི་རྒྱལ་པོའི་ཕྲེང་བ་ལས། གསང་ཆེན་རྡོ་རྗེ་ཐེག་པ་ནང་རྒྱུད་ཡོ་ག་རྣམ་གསུམ་གྱི་ཆོས་ཀྱི་འཁོར་ལོ་བསྐོར་ཚུལ་བྱེ་བྲག་ཏུ་བརྗོད་པའི་སྐབས་སྟེ་སརྒ་གསུམ་པ་རྫོགས་སོ།། །།