འཕགས་པ་བར་དུ་གཅོད་པ་ཐམས་ཅད་སེལ་བའི་གཟུངས་སྔགས།
༈ རྒྱ་གར་སྐད་དུ། ཨཱརྻ་སརྦ་ཨནྟ་ར་སཾ་གྲཱ་ས་དྷཱ་ར་ཎི་མནྟྲ། བོད་སྐད་དུ། འཕགས་པ་བར་དུ་གཅོད་པ་ཐམས་ཅད་སེལ་བའི་གཟུངས་སྔགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ། ཕྱག་ན་རྡོ་རྗེ་གཟུངས་སྔགས་འདི་སུས་འཛིན་པ་དང༌། འཆང་བ་དང༌། བཟླས་བརྗོད་བྱེད་པ་དེ་ལ་ནི་དུག་དང༌། མཚོན་གྱིས་འཆི་བ་དང༌། ལྟོགས་པ་དང༌། མཚོན་བརྒྱབ་པ་དང༌། གཅན་གཟན་མ་རུངས་པས་ཟ་བ་དང༌། མེས་འཚིག་པ་དང༌། ཆུར་འཆི་བ་དང༌། འགོ་བའི་རིམས་གཞན་ཡ་ང་བ་དང༌། མཛེའི་ནད་དང༌། གསོར་མི་རུང་བའི་ནད་ཡ་ང་བ་དང༌། གཡང་ལ་ལྷུང་བ་དང༌། གཞན་གྱི་བྱད་དང༌། ཟས་ཀྱིས་བརྣངས་པ་དང༌། བདག་རང་གིས་གསོད་པ་དང༌། དེ་ལྟར་གཤིས་ངན་དུ་འཆི་བ་བཅུ་གསུམ་གྱིས་རྐྱེན་བྱེད་པར་མི་འགྱུར་རོ། །ཕྱག་ན་རྡོ་རྗེ་གཟུངས་སྔགས་འདི་སུས་འཛིན་པ་དང༌། འཆང་བ་དང༌། བཟླས་བརྗོད་བྱེད་པ་དེ་ལ་ནི་ས་དང་ནམ་མཁའ་ལ་གནས་པའི་གེགས་དྲེགས་པ་ཅན་མ་རུངས་པ་རྣམས་ཀྱིས་ཀྱང་གླགས་རྙེད་པར་མི་འགྱུར་རོ། །ཕྱག་ན་རྡོ་རྗེ་གཟུངས་སྔགས་འདི་སུས་འཛིན་པ་དང༌། འཆང་བ་དང༌། བཟླས་བརྗོད་བྱེད་པ་དེ་ལ་ལས་ཀྱི་སྒྲིབ་པ་དང༌། ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་ཐམས་ཅད་བྱང་ཞིང་དག་སྟེ། བདེ་བ་ཅན་གྱི་འཇིག་རྟེན་དུ་སྐྱེ་བར་འགྱུར་རོ། །ཨོཾ་བཛྲ་ཙནྜ་མ་ཧཱ་རོ་ཥ་ན་ཧཱུཾ་ཕཊ། ཨ་པྲ་ཏི་ཧ་ཏ་བ་ལ་ཧཱུཾ་ཕཊ། སརྦ་བིགྷྣཾ་ཨནྟ་ར་ཡ་བི་ནཱ་ཤ་ཀ་ར་མཱ་ར་ཡ་ཧཱུཾ་ཕཊ། ཅེས་བརྒྱ་རྩ་བརྗོད་ན་འགྲུབ་བོ། །ངེས་པར་འགྲུབ་བོ་ཞེས་གསུངས་སོ། །འཕགས་པ་བར་དུ་གཅོད་པ་ཐམས་ཅད་སེལ་བའི་གཟུངས་སྔགས་རྫོགས་སོ།། །།