གཉེན་པོའི་ཚོགས་སྒྲུབ་བཤད་པ།
གཉེན་པོའི་ཚོགས་སྒྲུབ་བཤད་པ། གསུམ་པ་གཉེན་པོའི་ཚོགས་བྱེ་བྲག་ཏུ་བཤད་པ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། ཤེས་བྱ་ཆོས་ཅན། གཉེན་པོའི་ཚོགས་སྒྲུབ་བཤད་དུ་ཡོད་དེ། དེ་འཆད་པ་ལ་མཐོང་དང་ཞེས་སོགས་བར་སྐབས་ཀྱི་ཚིགས་སུ་བཅད་པ་གཅིག་གསུངས་པའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། ཐེག་ཆེན་གྱི་མཐོང་ལམ་དང་། སྒོམ་པའི་ལམ་དག་ལ་ཆོས་ཅན། གཉེན་པོ་རྣམ་པ་བརྒྱད་ཅེས་བྱ་བ་ཡིན་ཏེ། སྤང་བྱ་གཟུང་བ་དང་འཛིན་པའི་རྣམ་པར་རྟོག་པ་བརྒྱད་པོ་རྣམས་ཉེ་བར་ཞི་བར་བྱ་བའི་ཕྱིར་དུ་གྲངས་ཀྱི་སྒོ་ནས་བརྒྱད་ཡོད་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་གཉིས་ལས། དང་པོ་ལ། ཁ་ཅིག །ཤེས་སྒྲིབ་རྟོག་པའི་དངོས་གཉེན་བྱེད་པའི་བྱང་འཕགས་ཀྱི་མཁྱེན་པ་དེ། གཉེན་པོའི་ཚོགས་སྒྲུབ་ཀྱི་མཚན་ཉིད་ཟེར་ན། ས་གཉིས་པའི་བར་ཆེད་མེད་ལམ་ཆོས་ཅན། །མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ས་གཉིས་པའི་རྣམ་གྲོལ་ལམ་དེ། ཤེས་སྒྲིབ་རྟོག་པ་སྤངས་པའི་མཁྱེན་པ་ཡིན་པར་ཐལ་ལོ། ཁ་ཅིག །ཤེས་སྒྲིབ་རྟོག་པའི་དངོས་གཉེན་བྱེད་པའི་རིགས་སུ་གནས་པའི་བྱང་འཕགས་ཀྱི་མཁྱེན་པ་དེའི་མཚན་ཉིད་ཟེར་ན། གང་ཟག་གི་བདག་མེད་རྟོགས་པའི་ཐེག་ཆེན་གྱི་མཐོང་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། ཐེག་ཆེན་གྱི་རྟོགས་རིགས་སུ་གནས་པར་ཐལ། ཁ་ཅིག །རང་གི་ངོ་སྐལ་གྱི་སྤང་བྱ་ཤེས་སྒྲིབ་རྟོག་པའི་གཉེན་པོ་བྱེད་པའི་བྱང་འཕགས་ཀྱི་མཁྱེན་པ་དེའི་མཚན་ཉིད་ཟེར་ན། བྱང་སེམས་ཀྱི་མཐོང་ལམ་རྣམ་གྲོལ་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་མི་ནུས་ཏེ། ཁྱོད་ཀྱི་ངོ་སྐལ་གྱི་སྤང་བྱ་ཤེས་སྒྲིབ་མེད་པའི་ཕྱིར། གཉིས་པ་རང་ལུགས་ནི་
ཤེས་སྒྲིབ་རྟོག་པའི་གཉེན་པོ་བྱེད་པའི་བྱང་འཕགས་ཀྱི་མཁྱེན་པ་གཉེན་པོའི་ཚོགས་སྒྲུབ་ཀྱི་མཚན་ཉིད། གསུམ་པ་ནི། ཐེག་པ་ཆེན་པོའི་མཐོང་བ་དང་སྒོམ་པའི་ལམ་གཉིས་པོ་དག་ཁོ་ནའི་སྤང་བྱ་སེལ་བའི་ནུས་པའི་གནས་སྐབས་ཀྱི་ཁྱད་པར་ཆོས་ཅན། ཁྱོད་ལ་གཉེན་པོ་རྣམ་པ་བརྒྱད་ཡོད་དེ། སྤང་བྱ་མི་མཐུན་པའི་ཕྱོགས་ཀྱི་རབ་ཏུ་དབྱེ་བས་དེ་དག་ཉེ་བར་ཞི་བར་བྱ་བའི་ཕྱིར་དུ་བརྒྱད་ཡོད་པའི་ཕྱིར། མི་མཐུན་ཕྱོགས་ལ་བརྒྱད་དུ་དབྱེར་ཡོད་དེ། ཀུན་བརྟགས་དང་ལྷན་སྐྱེས་ཀྱིས་བསྡུས་པའི་གཟུང་བ་དང་འཛིན་པའི་རྣམ་པར་རྟོག་པ་བརྒྱད་ཡོད་པའི་ཕྱིར། ཤེས་བྱ་ཆོས་ཅན། མཐོང་སྤང་དང་སྒོམ་སྤང་གི་གཉེན་པོ། མདོ་ལས། བདེན་པ་གཉིས་ཀའི་རྣམ་པ་ལ་བརྟེན་ནས་མངོན་དུ་བྱས་པ་སྟེ་ཤེས་པར་བྱ་བར་བསྟན་ཏེ། ངེས་པར་འབྱུང་ས་འབྱུང་བྱེད་ཀུན་རྫོབ་ཏུ་ཁས་བླངས་པ་ཀུན་རྫོབ་བདེན་པ་ལ་བརྟེན་ནས་མཐོང་སྤང་གཟུང་འཛིན་གྱི་གཉེན་པོ་གསུངས་ལ། དོན་དམ་པར་དེ་བཀག་པ་དོན་དམ་བདེན་པ་ལ་བརྟེན་ནས་སྒོམ་སྤང་གཟུང་འཛིན་གྱི་གཉེན་པོ་ཤེས་པར་བྱ་བར་གསུངས་པའི་ཕྱིར། མི་མཐུན་ཕྱོགས་ཀྱི་གཉེན་པོ་བརྒྱད་དུ་ཡོད་དེ། གཟུང་བའི་རྣམ་པར་རྟོག་པ་ཀུན་ནས་ཉོན་མོངས་པའི་དངོས་པོ་ཙམ་དང་། གཉེན་པོ་རྣམ་བྱང་གི་རྟེན་ཅན་གྱི་གཟུང་རྟོག་གཉིས་དང་། འཛིན་པའི་རྣམ་པར་རྟོག་པ་གང་ཟག་རྫས་སུ་ཡོད་པ་དང་། སྐྱེས་བུ་བཏགས་པའི་རྟེན་ཅན་གྱི་འཛིན་རྟོག་གཉིས་ཀུན་བརྟགས་ལྷན་སྐྱེས་ཀྱི་ས་བོན་སོ་སོར་མཐོང་བའི་ལམ་དང་སྒོམ་པའི་ལམ་ལ་སྤོང་བའི་ཕྱིར།