ཨོ་རྒྱན་རྡོ་རྗེེ་འཆང་གི་བཀའ་དྲིན་རྗེས་དྲན་གྱི་བསྟོད་བསྔགས་ལྷའི་རྔ་ཆེན།

༄༅། །ཨོ་རྒྱན་རྡོ་རྗེེ་འཆང་གི་བཀའ་དྲིན་རྗེས་དྲན་གྱི་བསྟོད་བསྔགས་ལྷའི་རྔ་ཆེན་ཞེས་བྱ་བ་བཞུགས་སོ།། གདོད་མའི་མགོན་པོ་སྣང་བ་མཐའ་ཡས་ཀྱི། །ཐུགས་རྗེའི་རོལ་རྩེད་སནྡྷིུ{ནྡྷཱུ}འི་དྭངས་མཚོར་བསྒྱུར། །འདབ་སྟོང་པདྨའི་ཟེའུ་འབྲུས་བསྐྱེད་བསྲིངས་པ། །ཨོ་རྒྱན་རྡོ་རྗེ་འཆང་གིས་དགེ་ལེགས་མཛོད། ༡ །ཐུབ་དབང་མཛད་པ་ཐ་མའི་གཟིམས་ཁྲི་ལ། །ཞི་བར་མནལ་ནས་བཞི་ཟུང་བགྲང་བྱའི་ལོ། །ལྕགས་སྤྲེལ་སྣོན་ཟླའི་ཡར་དཀར་ཚེས་བཅུའི་ཉིན། །དུས་གསུམ་རྒྱལ་བའི་རིག་པ་འཛིན་ཁྱོད་འཁྲུངས། ༢ །ཆོས་སྐྱོང་རྒྱལ་པོ་འབྱོར་པའི་དབང་པོ་ཡིས། །སྲིད་བཟུང་མོད་ལ་ཏནྟྲའི་སྡེ་ཆར་བབས། །དྷརྨ་གཉྫོའི་བདག་པོར་མཁའ་འགྲོ་མས། །མངའ་གསོལ་མཚན་ནི་མཚོ་སྐྱེས་རྡོ་རྗེར་གྲགས། ༣ །བཙུན་མོ་འོད་འཆང་ལ་སོགས་ལྔ་བརྒྱའི་འཁོར། །འདོད་ཡོན་ལམ་བྱེད་ཚོམ་བུ་ཚོགས་བསྒྲུབས་ཀྱིས། །འཕུར་འགྲོའི་རྒྱལ་ཁམས་ཕུང་པོ་ལྷག་མེད་དུ། །འཇའ་ལྟར་ཡལ་བའི་ལོ་རྒྱུས་གཏམ་སྙན་མང་། ༤ །བརྒྱ་བྱིན་ཚོན་རིས་མདུན་མཁར་དཀྲིགས་པའི་ཀློང་། །རྡོ་རྗེ་སེམས་དཔའ་བྱོན་ནས་བརྡའ་ཐབས་བསྟན། །པདྨ་སམྦྷ་{སཾ་བྷཱ}རྣམ་ཤེས་རྒྱལ་ཁམས་ལས། །བརྒལ་ཏེ་ཡེ་ཤེས་རྒྱལ་ཁམས་བདག་གིར་བཟུང་། ༥ །ནང་གི་མུན་སེལ་ཉི་མ་འོད་ཟེར་ཉིད། །དུར་ཁྲོད་བརྒྱད་དུ་བརྟུལ་ཞུགས་སྤྱོད་པ་བསྐྱངས། །རིག་འཛིན་བརྒྱད་དང་བཀའ་ཡི་འགྲོ་བ་མཛད། །བདེ་གཤེགས་སྤྱི་དྲིལ་བབས་སོ་གཅིག་ཏུ་ཁུམས། ༦ །ཕྱི་ལྟར་ཤཱཀྱ་སེང་གེའི་ཆ་ལུགས་འཆང་། །བདུད་བཞིའི་གཡུལ་བཅོམ་ཆེ་བའི་ཡོན་ཏན་རྫོགས། །སྡེ་སྣོད་བཅུ་གཉིས་ཐུགས་ཀྱི་ཀློང་གསལ་ཀྱང་། །ཉེ་གནས་ཀུན་དགའ་བོ་ལ་མདོ་ཡང་དྲིས། ༧ །འོག་མིན་གནས་སུ་ཀུན་བཟང་ཧེ་རུ་ཀཿ། །མེ་རི་འབར་བར་ལས་ཀྱི་དབང་མོ་བསྟེན། །དགའ་རབ་རྡོ་རྗེ་ཆོས་ཀྱི་བྱུང་ཁུངས་བཙུན། །རྟོགས་གྲོལ་དུས་མཉམ་ཤྲཱི་སེང་ཉིད་ལས་སོ། ༨ །སངས་རྒྱས་པདྨ་རྒྱལ་པོ་མཆོག་ཉིད་ཀྱི། །སྔགས་ཀྱི་དགྱེས་སྡེ་མནྡ་ར་བས་བྱས། །མ་ར་ཏི་ཀར་ཚེ་དཔག་མེད་མགོན་གྲུབ། །རྡོ་རྗེའི་སྐུ་ལ་བགྲེས་རྒུད་མེད་དབང་ཐོབ། ༩ །བློ་ལྡན་མཆོག་སྲེད་སྦྱངས་པ་སྔོན་སོང་བས། །རྣམ་སྨིན་ཚེ་དབང་ཕྱག་ཆེན་ལྷུན་གྲུབ་ཀྱི། །རིག་འཛིན་རྣམ་བཞི་ཉི་ཟླའི་འགྲོས་ལས་མྱུར། །ལམ་མཆོག་སྣང་བཞིའི་ཡེ་ཤེས་ཕ་མཐར་སོན། ༡༠ །འབྱུང་ལྔའི་ཀློང་ན་གྲུབ་པའི་འཁོར་ལོས་སྒྱུར། །མ་འཚལ་ཟ་ཧོར་རྒྱལ་པོས་གསོན་བསྲེགས་ཚེ། །མེ་དཔུང་མཚོ་རུ་བསྒྱུར་པའི་རྫུ་འཕྲུལ་བསྟན། །གཙུག་ལག་འཛིན་པ་གདུལ་བྱའི་མཐིལ་དུ་གྱུར། ༡༡ །བསྟན་ལ་ཕྱིར་ཕྱོགས་མུ་སྟེགས་ཀླ་ཀློའི་ཁྱུ། །དངོས་སྟོབས་རིགས་པས་བཅོམ་ཞིང་ངན་སྔགས་བདག །མཐུ་རྩལ་གནམ་ལྕགས་ཐོག་གི་ངར་ལ་དྲངས། །མི་བསྙེངས་སེང་གེའི་སྒྲ་སྒྲོགས་ཁྱོད་དུ་བས། ༡༢ །འཕགས་ཡུལ་སུམ་སྟོང་དྲུག་བརྒྱ་བཞུགས་པའི་རིང་། །རྒྱ་གར་ཤར་ནུབ་ཆུ་བཞིན་མྱུལ་བྱས་ཏེ། །གཙུག་ལག་ཁང་ནི་འབུམ་ཚོ་བྱེ་བ་བཞེངས། །མདོ་སྔགས་བསྟན་པའི་རྒྱལ་མཚན་བསྒྲེངས་བར་མཛད། ༡༣ །མ་དད་ལོག་ལྟ་ཟློག་ཕྱིར་གྲུབ་པའི་འཕྲུལ། །ཆུ་བོ་གྱེན་ལྡོག་ཉི་མ་གཏེ་པོར་བཅུག །རྫུ་འཕྲུལ་སྟག་ལ་ཆིབས་སོགས་རེ་རེ་ནས། །བགྲང་འདོད་བྱིས་པའི་བློ་འདི་ཡོངས་རེ་གོལ། ༡༤ །བསྐལ་པ་སྐད་ཅིག་སྐད་ཅིག་བསྐལ་པ་རུ། །བཟླུམས་པའི་རྣམ་ཐར་འབྲེལ་བསྒྲིག་ག་ལ་བཏུབ། །གསང་བ་བསམ་མི་ཁྱབ་པའི་བདག་ཉིད་ཅན། །འབྱུང་ལྔས་གར་ཁྱབ་པད་འབྱུང་སྐུས་ཁྱབ་བོ། ༡༥ །འཕགས་ཡུལ་གྲུབ་བརྒྱའི་སྤྱི་མེས་ཐོད་ཕྲེང་རྩལ། །དུས་གསུམ་ས་ལེར་མཁྱེན་པའི་གོ་ས་ན། །མ་སངས་སྤུན་དགུས་དབང་བྱས་སྤྲེལ་ཚ་རྣམས། །སྡུག་བསྔལ་གསུམ་གྱིས་ཉམས་ཉེས་གྱུར་པ་གཟིགས། ༡༦ །ཁྱད་པར་བོད་ཡུལ་མུན་པའི་སྨག་རུམ་འདིར། །ཆོས་ཀྱི་སྒྲོན་མེ་སྦོར་བྱེད་ཁྲི་སྲོང་རྗེས། །སྤྱན་དྲངས་མཁན་སློབ་ཆོས་གསུམ་གདན་ཡང་འཛོམས། །གངས་ཅན་ལྗོངས་ཞེས་བརྗོད་པ་དོན་དང་ལྡན། ༡༧ །ཧས་པོ་རི་གོང་ལྷ་སྲིན་དམ་འདོགས་དུས། །རང་རང་སྲོག་སྙིང་མདོངས་གསོལ་ཕུལ་ནས་སུ། །ཅི་བགྱིས་བཀའ་བསྒྲུབ་ཁས་བླང་བྲོ་བོར་བས། །སྟོང་སྲོག་གཅིག་འདུས་རྡོ་རྗེ་ཁྲོ་སྐུར་བཞེངས། ༡༨ །ཚངས་ཆེན་ཐུགས་དམ་གཙུག་ལག་ས་འདུལ་ཚེ། །དཀར་ཕྱོགས་སྐྱོང་བ་མ་ལུས་བྲན་དུ་བཀོལ། །བསམ་ཡས་བརྩིགས་པ་མི་འདྲ་སྐྱེས་པ་འདྲ། །ཞིང་ཁམས་གཅིག་གི་ཚུལ་དུ་ལེགས་པར་བཞེངས། ༡༩ །ལུགས་གསུམ་མི་འགྱུར་ལྷུན་གྲུབ་གཞལ་ཡས་ཁང་། །རྟེན་དང་བརྟེན་པར་བཅས་པའི་ངོ་མཚར་སྣང་། །འཆི་མེད་གྲོང་ཁྱེར་ས་ལ་འཕོས་མཚུངས་ཀྱང་། །པད་འབྱུང་རབ་ཏུ་གནས་པའི་ཁྱད་པར་ཡོད། ༢༠ །དགེ་སློང་རྩེ་མོས་འདུལ་བའི་བསྟན་པ་བཙུགས། །སད་མི་མི་བདུན་བླ་ཡི་མཆོད་གནས་བསྐུར། །རྒྱ་བོད་ལོ་པཎ་བརྒྱ་རྩ་བསྡུས་ནས་སུ། །བཀའ་བསྟན་གངས་རིའི་ཁྲོད་དུ་རྒྱས་པར་བསྒྱུར། ༢༡ །འབུམ་ཕྲག་དྲུག་ཅུ་རྩ་བཞིའི་རྒྱུད་ཀྱི་དོན། །སྡེ་གསུམ་ཀློང་དགུའི་མན་ངག་ངེས་པ་རྣམས། །པད་འབྱུང་བི་མའི་དགོངས་བཅུད་བླ་ན་མེད། །ལས་ཅན་སྙིང་གི་བུ་དགུའི་དཔལ་དུ་ཤར། ༢༢ །བྲག་དམར་མཆིམས་ཕུའི་ཀེའུ་ཚང་གོང་མ་རུ། །གུ་རུ་པདྨས་གསང་སྔགས་དབང་མོ་ཆེ། །བསྐུར་བའི་མོད་ལ་རྗེ་འབངས་ཉི་ཤུ་ལྔ། །རྟོགས་གྲོལ་དུས་མཉམ་གྲུབ་པའི་གར་གྱིས་བྲེལ། ༢༣ །བོད་མོ་མཚོ་རྒྱལ་གསུམ་པའི་རྟེན་དུ་བཟུང་། །བཻ་རོ་ཙཱ་ནས་བཀའ་ཡི་བསྡུ་བ་བྱས། །ལྡན་མ་རྩེ་མང་ཡི་གེའི་རིས་སུ་བཀོད། །གསང་སྔགས་ཆོས་ཀྱི་འཁོར་ལོ་རྒྱ་ཆེར་བསྐོར། ༢༤ །དེ་ཚེ་མུ་སྟེགས་ཤན་ཞུགས་བོན་པོ་རྣམས། །ལྟ་སྤྱོད་མ་མཚུངས་གླགས་ལྟའི་གྱ་ཚིག་བགོས། །བསྟན་པ་རྒྱལ་དུ་བཙུགས་ནས་བརྩད་པའི་ཚེ། །རྟོག་གེའི་ལྕེ་ཆད་ཆོས་ལ་དག་ཐེར་བྱུང་། ༢༥ །ཚེ་སྤོང་བཟས་འཁུམས་སྡིག་བློན་ཁས་བཙན་པས། །རྒྱལ་པོའི་སྐུ་དབང་མ་འདུས་འཚོ་སྐལ་ཆད། །འོན་ཀྱང་མི་ལོ་བཅུ་གསུམ་སླར་ལ་བསྲིངས། །དེ་བར་འཛམ་གླིང་སུམ་གཉིས་བྲན་དུའང་བཀོལ། ༢༦ །བརྒྱ་དང་བཅུ་གཅིག་བོད་ལ་བཞུགས་པའི་རིང་། །རྗེ་ཡིས་བཞེད་བཀང་སྲས་ལ་ཕན་པ་བསྒྲུབ། །ས་གཞི་རྟ་རྨིག་ཙམ་ཡང་མ་ལུས་པར། །ཞབས་ཀྱིས་བཅགས་པའི་བཀའ་དྲིན་རྨད་དུ་བྱུང་། ༢༧ །གངས་བྲག་མཚོ་གསུམ་སྒྲུབ་གནས་བྱིན་བརླབས་ཤིང་། །མིང་ཅན་མིང་མེད་གཏེར་ཀ་འབུམ་སྦས་པ། །ལས་ཅན་བུ་དང་འཕྲད་པའི་སྨོན་ལམ་བཏབ། །མ་འོངས་བསྟན་འགྲོའི་བཙས་སུ་བཞག་པས་འཚེངས། ༢༨ །འགྲོ་ལྡིང་ཡུལ་དུ་མཁའ་འགྲོའི་ཚོགས་དཔོན་དུ། །བཞེངས་ནས་བརྟུལ་ཞུགས་གྲུབ་པའི་འཁོར་ལོས་སྒྱུར། །འཕགས་ཡུལ་གྲུབ་བརྒྱས་བསྐལ་པར་བསྐྲུན་པའི་འཕྲུལ། །སྐད་ཅིག་བཟླུམས་འདི་ཚངས་ཆེན་བློས་མི་འཆུན། ༢༩ །ལྷོ་ནུབ་སྲིན་པོ་འདུལ་དུ་ཉེ་བ་ན། །ཁྲ་འབྲུག་གཙུག་ལག་ཁང་གི་བར་ཁྱམས་སུ། །བཀའ་འདུས་ཚོམ་བུ་ཉེར་གཅིག་སྒྲུབ་ཆེན་འཛུགས། །བཀའ་བབས་ལས་ཅན་གྲུབ་པའི་ཚོགས་ཆེན་བརྡོལ། ༣༠ །བཀའ་དྲིན་འཁོར་མཐའ་མེད་པའི་དྲིན་ཅན་རྗེ། །ཕྱི་མཐའ་གཟིགས་པའི་སྤྱན་སྐྱོང་ཟླ་མེད་པའི། །བརྩེ་བའི་ཞལ་ཐེམས་བརྗེད་ཐོ་ཤུལ་དུ་བཞག །འཇའ་ཚོན་ལྟ་བུའི་སྐུ་ཡང་མི་སྣང་གྱུར། ༢༡ །ཟངས་མདོག་དཔལ་རིར་སྲིན་ཚོགས་དབང་དུ་བསྡུས། །རཀྴ་ཐོད་ཕྲེང་རྩལ་གྱི་གསོབ་ལ་ཞུགས། །མཐིང་འོད་འབར་མ་ཉི་དང་ཟེར་བཞིན་འགྲོག །མཚན་རྒྱུ་ཤ་རྗེན་བཟའ་ཀུན་གཙིགས་ལ་ཕབ། ༣༡ །རྔ་ཡབ་པདྨ་འོད་ཀྱི་ཕོ་བྲང་དུ། །རིག་འཛིན་དུ་མའི་ཚོགས་རྗེར་བཞེངས་པའི་མོད། །གསང་སྔགས་ཐེག་པ་ཆེན་པོའི་སྨིན་དབང་བསྐུར། །འགྲོ་འདུལ་གཏེར་འབྱིན་སྣ་ཚོགས་ཆོ་རོལ་འགྱེད། ༣༣ །སྙིགས་ལྔའི་གདུལ་བྱ་ཡལ་བར་མི་འདོར་བས། །སྣང་མུན་དུས་དྲུག་བརྩེ་བའི་སྤྱན་གྱིས་བཙའ། །ཡར་མར་ཚེས་བཅུའི་ཉི་ཟེར་ཆིབས་ནས་བྱོན། །མོས་གུས་ཅན་ལ་བྱིན་རླབས་རྒྱུན་ཆད་བྲལ། ༣༤ །རྗེས་འཇུག་ཕྱི་ནང་གསང་བའི་ཚོགས་མཆོད་ཤོམས། །བསྐྱེད་སྔགས་རྫོགས་པའི་ལས་རིམ་གཞུང་བསྲངས་ཚེ། །རྣམ་བཞིའི་རིག་འཛིན་གྲུབ་པའི་གསེང་ལམ་ནས། །ཆོས་ཉིད་དོན་གྱི་པད་འབྱུང་རང་ཞལ་མཇལ། ༣༥ །དུག་ལྔ་ལམ་ཁྱེར་ཡེ་ཤེས་ངོ་བོ་འཕྲོད། །འདའ་ཀ་འཆི་བྲོད་གདེང་ཚད་ཚགས་སུ་ཚུད། །འདི་ཕྱིའི་འདུན་མ་གཅིག་ཏུ་དྲིལ་བ་ཡི། །གདམས་ངག་ཟབ་དགུ་བསྟན་པས་འཚེངས་པར་གྱུར། ༣༦ །བགྲང་ཡས་འགྲོ་བློས་མི་འཆུན་རྒྱལ་ཀུན་གྱི། །བྱིན་ནུས་གཅིག་བསྡོམས་ཨོ་རྒྱན་རྡོ་རྗེ་འཆང་། །རྔ་ཡབ་གླིང་གི་ཆེ་བཙན་གུ་རུ་རྗེར། །ཞིང་རྡུལ་གྲངས་མཉམ་ལུས་སྤྲུལ་གུས་ཕྱག་བརྩེགས། ༣༧ །མི་མཇེད་ཞིང་གི་མི་གཙང་དངོས་ཀུན་བསལ། །བདག་པོས་བཟུང་དང་མ་བཟུང་མཆོད་པའི་སྤྲིན། །དཔག་མེད་བློ་ཡིས་བླངས་ཏེ་ཕྱུར་བུར་སྤུངས། །དུས་གསུམ་རྟག་པ་རྒྱུན་གྱིས་འཁོར་ལོར་དབུལ། ༣༨ །ཐོག་མེད་དུས་ནས་དཀར་མིན་དྲི་ཡིས་བགོས། །སྒོ་གསུམ་བག་མེད་དབང་གིས་མི་དགེའི་ལས། །གང་བསགས་གནོངས་འགྱོད་དྲག་པོའི་སྒོ་ནས་མཐོལ། །དག་གཙང་ཁྲུས་ཀྱི་ཆོ་གས་འཁྲུད་པར་གསོལ། ༣༩ །འདས་དང་མ་བྱོན་ད་ལྟར་བཞུགས་གྱུར་པའི། །མགོན་མཆོག་རྣམས་ཀྱི་མཛད་པའི་ཁུར་ཆེན་པོ། །བདག་ཉིད་ཁོ་ནས་ཁྱེར་ནས་གདུལ་འགྲོའི་དོན། །རྒྱ་ཆེར་མཛད་ལ་རྗེས་ཡིད་སུ་མི་རངས། ༤༠ །ད་དུང་སྲིད་པའི་རྒྱ་མཚོ་མ་སྐེམ་བར། །ཡིད་ཅན་སྒྲོལ་བའི་གྲུ་གཟིངས་ལེགས་ཚུགས་ལ། །གསང་ཆེན་ཆོས་འཁོར་བསྐོར་བའི་དར་པོ་ཆེ། །ལེགས་ཕྱར་སྐུར་བཞིའི་རྒྱལ་སར་དབུགས་དབྱུང་གསོལ། ཀུན་བཟོད་གཟུགས་སུ་མ་གྲུབ་དེ་སྲིད་དུ། །རྡོ་རྗེའི་སྐུ་ལ་འཕོ་འགྱུར་མི་མངའ་ཡང་། །ཞིང་འདིར་མྱང་འདས་མི་བཞེད་དོན་ལ་འདྲི ལ། །ངོ་མཚར་མིག་གི་བདུད་རྩིར་མངོན་སྣང་བྱོས། ༤༢ །ལྷག་བསམ་འོ་མཚོའི་རྫིང་ལས་ཉེར་འཐོན་པའི། །རབ་བསྔགས་པུཎྜ་རཱི་ཀའི་ཕྲེང་བ་འདི། །རྒྱལ་བའི་མགུར་ན་སྦ་བའི་ལེགས་བྱས་དགེ། །མ་རྣམས་གཏན་བདེ་ཐོབ་པའི་རྒྱུར་ཡང་བསྔོ། ༤༣ །ཆོས་རབ་རྣམ་འབྱེད་ལྷ་ཡི་རྔ་བོ་ཆེའི། །སྒྲ་དབྱངས་སྲིད་པའི་རྩེ་མོར་བསྒྲགས་བྱས་པས། །འགྲོ་ཀུན་མ་རིག་གཉིད་ལས་སློང་གྱུར་ཏེ། །ཡང་དག་ལམ་གྱི་སྣང་བ་རྒྱས་པར་ཤོག ༤༤ །ཟབ་གསང་རྫོགས་པ་ཆེན་པོའི་རིང་ལུགས་ལས། །ནམ་ཡང་མི་ཉམས་ཐེག་དགུའི་རྩེ་མོར་བགྲོད། །འོད་གསལ་སྣང་བཞིའི་ཡེ་ཤེས་མཐར་ཕྱིན་ནས། །འཕོ་ཆེན་འཇའ་ལུས་རྡོ་རྗེའི་སྐུ་འགྲུབ་ཤོག ༤༥ །དེ་མ་ཐོབ་ཀྱི་ཚེ་རབས་ཕྲེང་བར་ཡང་། །རྡོ་རྗེའི་སློབ་དཔོན་མིག་འབྲས་བཞིན་དུ་བསྟེན། །དམ་ཚིག་གཙང་མའི་མཁའ་ལས་ཉི་ཟླའི་སྣང་། །འགྱེད་པས་ཐར་གྲོལ་འདབ་བརྒྱ་བཞད་གྱུར་ཅིག ༤༦ །བདེ་ཆེན་སྡོམ་པ་ཆེན་པོའི་ལམ་བཟང་དུ། །མཐའ་ཀླས་སྲིད་པའི་ཡིད་ཅན་མ་ལུས་ཞུགས། །ཐར་པ་ཆེན་པོའི་གྲོང་ཁྱེར་བསྙེགས་བྱས་ནས། །མཐོ་རིས་གང་གཱའི་ཆུ་ངོགས་བརྟེན་གྱུར་ཅིག ༤༧ །ཐུབ་བསྟན་སྤྱི་དང་བྱེ་བྲག་སྔ་འགྱུར་གྱི། །རིང་ལུགས་མི་ཉམས་དབྱར་དུས་ཆུ་གཏེར་བཞིན། །གོང་ནས་གོང་འཕེལ་བཤད་སྒྲུབ་འཛུམ་དཀར་གྲོལ། །དྲི་མེད་ཆེས་ཆེར་རྒྱས་པའི་རྒྱུར་གྱུར་ཅིག ༤༨ །དཔལ་ལྡན་རྒྱལ་བ་གཉིས་པའི་མཛད་རླབས་འཕྲུལ། །རྣམ་འདྲེན་སྟོང་གི་ཕྲིན་ལས་མ་རྫོགས་པར། །དེ་སྲིད་རྒྱུན་མི་འཆད་པའི་བཀའ་དྲིན་གྱིས། །ཤས་ཙམ་འཚོབ་པའི་རེ་བ་ག་ལ་མཆིས། ༤༩ །འོན་ཀྱང་མི་ཕྱེད་དད་པའི་འོ་མཚོ་ལས། །ལེགས་པར་འཁྲུངས་གྱུར་པདྨ་དཀར་པོ་ཡི། །མཆོད་སྡོང་བར་སྣང་རྒྱས་པར་དཀྲིགས་པ་འདི། །སྲས་བཅས་རྒྱལ་བའི་སྤྱན་ལམ་མཛེས་པར་སྨོན། ༥༠ །བཅུ་ཕྲག་ལྔ་ལ་ཉག་མ་གཅིག་གིས་ལྷག །ཚིགས་སུ་བཅད་པ་བསྡེབས་པའི་བསྔགས་བརྗོད་ཕྲེང་། །བློ་ཆེན་བློ་ཡིས་མཛོད་པས་གསར་དུ་ཕྱུང། །བློ་གསར་མགུལ་ན་སྤ་བའི་རྒྱན་དུ་མཛོད། ༥༡ །དེ་ལྟར་ཨོ་རྒྱན་རྡོ་རྗེ་འཆང་གི་ཡོན་ཏན་ལ་ཆ་ཤས་ཙམ་བསྔགས་པའི་རབ་བྱེད་འདི་ཡང་། ཤེས་བྱའི་ཆོས་ཀུན་གཟིགས་པའི་མ་ཧཱ་པཎྜི་ཏ། སྒྲ་དབྱངས་ཟླ་བ་འཆི་མེད་ལང་ཚོ་མཆོག་ཏུ་རྒྱས་པའི་སྡེའི་ལེགས་བཤད་ལ་གཞི་བཅོལ་ནས། ཤཱཀྱའི་དགེ་ཚུལ་འཇམ་དབྱངས་མཁས་གྲུབ་རྒྱ་མཚོར་འབོད་པས་བྲིས་པའི་དགེ་བས་རང་གཞན་སེམས་ཅན་ཐམས་ཅད་ཤེས་རྒྱུད་གྲོལ་བའི་རྒྱུར་གྱུར་ཅིག། །།
༄༅། །ན་མོ་གུ་རུ་མ་ཧཱ་སུ་ཁ་ཡཻ། ཆོས་དབྱིངས་དང་མཉམ་རྒྱལ་བའི་ཞིང་ཀུན་ན། །མི་ཟད་རྒྱན་འཁོར་ལྔ་ཡི་བཀོད་པའི་སྤྲིན། །བསམ་མི་ཁྱབ་པར་སྲིད་པ་ཇི་སྲིད་བར། །སྟོན་མཛད་བདེ་མཆོག་པདྨ་རྒྱལ་པོར་འདུད། །ཁྱོད་ཀྱི་རང་བཞིན་ཟག་བྲལ་བདེ་བ་ཆེ། །སྲིད་ཞི་མཉམ་ཉིད་དུས་གསུམ་སྐྱེ་འགག་བྲལ། །འོད་གསལ་རང་བཞིན་ཟབ་ཞི་སྤྲོས་ལས་འདས། །འགྱུར་མེད་དོན་དམ་བདེན་པའི་མཚན་ཉིད་ལགས། །འགྲོ་བ་ཀུན་གྱི་སེམས་ཀྱི་ཆོས་ཉིད་དེ། །ལམ་ཞུགས་རྣམས་ཀྱི་ཟག་མེད་གསར་ཐོབ་ཆ། །ལམ་མཐར་ཕྱིན་པའི་ཡེ་ཤེས་ཆེན་པོ་སྟེ། །ཐམས་ཅད་ཀུན་ཡིན་རང་བཞིན་མཉམ་པ་ཉིད། །ཇི་ལྟར་ནམ་མཁའ་མཚོན་གྱིས་མི་ཕྱེད་བཞིན། །གློ་བུར་སྤྲོས་པས་དེ་ཉོན་མོངས་མི་འགྱུར། །གདོད་ནས་དག་པའི་ཆོས་ཉིད་བྱང་ཆུབ་སེམས། །ཁྱོད་ཀྱི་རང་བཞིན་གཙང་བའི་ཕ་རོལ་ཕྱིན། །རྒྱུ་ཡིས་མ་བསྐྱེད་རིག་པ་བྱང་ཆུབ་སེམས། །རྐྱེན་གྱིས་མི་ཤིགས་རྡོ་རྗེ་ནམ་མཁའི་དཀྱིལ། །ཇི་ལྟར་སྔོན་གྱི་དེ་བཞིན་ཕྱིས་དེ་བཞིན། །ཁྱོད་ནི་འགྱུར་མེད་རྟག་པ་དམ་པའི་གཤིས། །བདེ་སྡུག་སྣ་ཚོགས་སེམས་ཀྱིས་བཀོད་པ་སྟེ། །སེམས་དང་བྲལ་བའི་རིག་སྟོང་མཉམ་པ་ཆེར། །འགྱུར་བཅས་ཟུག་རྔུའི་མཚན་མ་ཇི་ལྟར་ཡོད། །ཁྱོད་ཀྱི་རང་མཚན་བདེ་བ་ཆེན་པོར་ཤེས། །བདག་དང་བདག་མེད་ཀུན་རྟོག་སྤྲོས་པ་སྟེ། །མཉམ་ཉིད་ཀློང་དུ་སྤྲོས་མཚན་ཀ་ནས་དག །སྤྲོས་བྲལ་དབྱིངས་ཉིད་འཁོར་འདས་ཆོས་ཀུན་གཞི། །ཀུན་ལ་དབང་བསྒྱུར་དམ་པའི་བདག་ཀྱང་ཡིན། །ཁྱོད་ནི་མཁའ་ལྟར་སྤྲོས་པ་ཀུན་ཞི་ཡང་། །སྤྲོས་པ་ཅན་ལ་སྣ་ཚོགས་སྤྲོ་ཚུལ་སྟོན། །སྤྲོས་ཙམ་ཉིད་ན་སྤྲོས་མཚན་ངང་གིས་དབེན། །ཟབ་པའི་ཚུལ་དེ་རྟེན་འབྱུང་རང་གཤིས་ལགས། །མཁའ་ཁྱབ་འགྲོ་ལ་གང་ལ་གང་འདུལ་གྱི། །རྣམ་འཕྲུལ་ཚད་མེད་བཀོད་པའི་སྤྲིན་ཆེན་ཡང་། །མ་སྐྱེས་ཆོས་ཉིད་མཉམ་པའི་ཀློང་དུ་གཅིག །ཇི་ལྟར་མཁའ་ལ་འབྱུང་བཞིའི་འདུ་འགོད་བཞིན། །གཟོད་ནས་དག་ཕྱིར་འཁོར་བ་མ་དམིགས་ན། །གདུལ་བྱ་འདུལ་བྱེད་སྤང་གཉེན་གང་དུ་འཚོལ། །ཇི་ལྟར་སྒྱུ་མས་སྤྲུལ་པའི་བཀོད་པ་བཞིན། །ཡེ་ཤེས་ཡངས་པའི་སྤྱོད་ཡུལ་བསམ་མི་ཁྱབ། །འཁོར་བའི་ཆོས་ཀུན་དམིགས་སུ་ཡོད་མིན་ཏེ། །མྱ་ངན་འདས་པའི་ཆོས་ཀྱང་དེ་དང་མཚུངས། །གང་གིས་གང་བཅིངས་སུ་ཞིག་གང་གིས་བཀྲོལ། །ཀུན་མཉམ་ཡངས་པ་ཆེན་པོར་བདག་དགའ་འོ། །དེ་སླད་བསམ་གྱིས་མི་ཁྱབ་ཆོས་ཉིད་ལ། །བསམ་བྱ་མང་པོའི་ཀུན་རྟོག་སྤྲོས་པས་ཅི། །བརྗོད་བྲལ་གཉུག་མ་དོན་གྱི་བླ་མ་ལ། །བསལ་བཞག་སྤངས་ལེན་བྲལ་བས་ཕྱག་བགྱིའོ། །བདེ་སྟོང་འདུ་འབྲལ་མེད་པའི་མཆོད་པའི་གར། །མི་ཕྱེད་རོ་མཉམ་ཆེན་པོར་འབུལ་བགྱི་ཞིང་། །གཟུང་འཛིན་འཁྲུལ་རྟོག་རང་གྲོལ་མཉམ་ཉིད་ཀློང་། །བཤགས་བྱ་བཤགས་བྱེད་བྲལ་བར་བཤགས་ཤིང་སྡོམ། །ཟག་མེད་རང་ངོ་ཤེས་པའི་དགེ་ཚོགས་ལ། །ཡིད་དཔྱོད་མཚན་འཛིན་བྲལ་བས་ཡི་རངས་ཤིང་། །འོད་གསལ་རྒྱུན་ཆད་མེད་པའི་ཆོས་འཁོར་མཆོག །དུས་བཞི་མཉམ་པ་ཆེན་པོར་བསྐོར་བར་བསྐུལ། །འདིས་མཚོན་དུས་གསུམ་བསགས་ཡོད་དགེ་ཚོགས་རྒྱུན། །འཁོར་གསུམ་སྤྲོས་མཚན་ལས་འདས་འོད་གསལ་དབྱིངས། །ཟག་མེད་ཆོས་དབྱིངས་ཆེན་པོར་སྔོ་བྱེད་ན། །མི་ཕྱེད་རོ་མཉམ་རྡོ་རྗེའི་དོན་རྟོགས་ཤོག །ཅེས་པའང་སྐྱེ་ཀུན་གུ་རུའི་བྲན་དུ་སྨོན་པ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བྲིས་པའི་དགེ་བས་རང་གཞན་ཀུན་གྱི་རྒྱུད་ལ་བདེ་བ་ཆེན་པོ་པདྨའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག