འབྲས་བུའི་རྒྱུད།
[༣] གསུམ་པ་འབྲས་བུའི་རྒྱུད་ནི། དེ་ལྟར་གཞི་རྒྱུད་སྒྲིབ་བྱེད་ཀྱི་དྲི་མ་དེ་ལམ་བསྒོམ་སྟོབས་ཀྱིས་དག་པ་ལས་གཞི་ལ་ཇི་ལྟར་ཡོད་པའི་ཡོན་ཏན་མངོན་དུ་གྱུར་པ་ནི་འབྲས་བུ་སྟེ། སྙིང་པོའི་འགྲེལ་པ་ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་པས་བླ་ན་མེད་པ་མཆོག་གི་འབྲས་བུ་དོན་དུ་གཉེར་
བ་རྣམས་བསམ་པ་ཡོངས་སུ་རྫོགས་པའི་ཕྱིར་འབྲས་བུ་དང་། ནམ་ཡང་རྒྱུན་མི་འཆད་པས་ན་རྒྱུད་དོ། །དབྱེ་ན་དངོས་དང་བཏགས་པ་གཉིས་ལས། དངོས་ནི། མི་སློབ་པའི་ཟུང་འཇུག་རྡོ་རྗེ་འཆང་ཆེན་པོ་སྒྱུ་མའི་སྐུ་དང་། སློབ་པའི་ཟུང་འཇུག་གི་སེམས་ཅན་འབྲས་བུ་དངོས་མིན་ཀྱང་དེར་བཏགས་པ་སྟེ་ཁམས་གསུམ་པ་མ་ཡིན་པའི་ཕྱིར་དང་། ཡོན་ཏན་བརྒྱད་ཚན་གཉིས་ལ་དབང་འབྱོར་པའོ། །མི་སློབ་པའི་སངས་རྒྱས་ཀྱི་སའི་ཡོན་ཏན་བྱང་ཆུབ་ཀྱི་ཕྱོགས་རྣམས་དང་། ཚད་མེད་པ་དང་། དབང་བཅུ་དང་། སྟོབས་བཅུ་དང་། ཤེས་པ་བཅུ་དང་། མ་འདྲེས་པ་བཅོ་བརྒྱད་དང་། མི་འཇིགས་པ་དང་། ཉོན་མོངས་མེད་པ་དང་། མཁྱེན་པ་དང་། ཐུགས་རྗེ་ཆེན་པོ་དང་། ཟད་པར་དང་། ཟིལ་གནོན་དང་། རྣམ་ཐར་ལ་སོགས་རྒྱུའི་སྡེ་སྣོད་ལས་བཤད་པ་རྣམས་དང་། སྔགས་སུ་བཤད་པའི་ཟུང་འཇུག་གི་ཡེ་ཤེས་ཁྱད་པར་བ་ཡང་། ཇི་སྐད་དུ།(རིམ་པ་གཉིས་དེ་ཁོ་ན་ཉིད་བསྒོམ་པ་ལས།) རྟག་པ་དང་ནི་མི་གདུང་དང་། །བསིལ་བ་དང་ནི་གཅིག་པ་དང་། །བདེ་བ་དང་ནི་དྲི་མེད་དང་། །དགའ་བ་དང་ནི་ཡིད་དངས་པ། །ཞེས་མྱོང་བརྒྱད་དང་། (རྒྱུད་ཕྱི་མ་ལས།) སྐུ་ཡི་དབང་ཕྱུག་དང་ནི་གསུང་གི་དབང་ཕྱུག་དང་། །དེ་བཞིན་དུ་ནི་ཐུགས་ཀྱི་དབང་ཕྱུག་དང་། །རྫུ་འཕྲུལ་ཀུན་འགྲོ་གནས་ཀྱི་དབང་ཕྱུག་དང་། །ཅི་འདོད་སྐྱེད་དང་ཡོན་ཏན་བརྒྱད་པའོ། །ཞེས་དབང་ཕྱུག་བརྒྱད་དང་། (སློབ་དཔོན་ཆེན་པོ་ངག་དབང་གྲགས་པས།)ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་
འགོག་པ་མེད། །ཅེས་ཁ་སྦྱོར་བདུན་དང་། (སྤྱོད་བསྡུས་ཆགས་འགྱུར་ལས།) གཟུགས་ཕྲ་རེག་པ་ཡང་བ་དང་། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བསྟན་པ། །དབང་ཕྱུག་ཉིད་དང་འདོད་དགུར་བསྒྱུར། །ཞེས་ཡོན་ཏན་བརྒྱད་ལ་སོགས་པ་དང་། གཞན་ཡང་རང་བཞིན་མེད་པ་ལ་སོགས་པས་ཟབ་པ་རྣམས་དང་། བསོད་ནམས་དང་ཡེ་ཤེས་ལ་སོགས་པ་རྒྱ་ཆེ་བ་རྣམས་དང་། ཡུལ་ཐམས་ཅད་ལ་སོགས་པར་ཁྱབ་པ་རྣམས་དང་། རྒྱུན་མི་འཆད་པ་ལ་སོགས་ཀྱིས་རྟག་པ་རྣམས་དང་། ཁ་སྦྱོར་ཆེན་པོ་ལ་སོགས་པས་བདེ་བ་རྣམས་ཀྱི་བདག་ཉིད་ཆོས་དང་། ལོངས་སྤྱོད་རྫོགས་པ་དང་། སྤྲུལ་པ་དང་། བདེ་བ་ཆེན་པོ་ལ་སོགས་པ་སྐུའི་བྱེ་བྲག་རྣམས་སོ། །དེ་དག་རྣམས་ཀྱིས་བརྗོད་བྱ་རྒྱུད་གསུམ་གྱི་རྣམ་པར་བཞག་ལ། རྗོད་བྱེད་ཐེག་པའི་རིམ་པ་ཡང་གསུམ་སྟེ། ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་པའི་མཚན་ཉིད་སྡེ་གསུམ་དང་། ཕྱི་རྒྱུད་སྡེ་གསུམ་སྟེ་ཐེག་པ་སྔ་མ་གཉིས་འདིར་ཡིག་ཚོགས་ལ་འཇིགས་པས་གཞན་དུ་ཤེས་ཤིང་།