དཔལ་སྟག་ལུང་པ་ཆེན་པོ་རིག་འཛིན་ཚེ་དབང་བཀྲ་ཤིས་ཀྱི་དག་སྣང་རྩ་བ་གསུམ་གྱི་ལས་བྱང་མདོར་བསྡུས་སྙིང་པོའི་ཡང་བཅུད།
༈ དཔལ་སྟག་ལུང་པ་ཆེན་པོ་རིག་འཛིན་ཚེ་དབང་བཀྲ་ཤིས་ཀྱི་དག་སྣང་རྩ་བ་གསུམ་གྱི་ལས་བྱང་མདོར་བསྡུས་སྙིང་པོའི་ཡང་བཅུད་བཞུགས། །ན་མོ་གུ་རུ་པདྨ་ཀ་རཱ་ཡ། དེ་ལ་རྩ་གསུམ་སྙིང་པོའི་བཅུད་ཐིག་གི་ཕྲིན་ལས་ཤིན་ཏུ་མདོར་བསྡུས་པས་ཉམས་སུ་བླང་
བའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ལ་གཉིས། ཆོ་གར་མ་གཏོགས་པའི་སྦྱོར་བ་དང་། ཆོ་གར་གཏོགས་པའི་སྦྱོར་བའོ། །དང་པོ་ནི། གནས་དབེན་ཞིང་ཉམས་དགའ་བར་བྱི་དོར་ལེགས་པར་བྱ། གུང་དུ་རྩ་བ་གསུམ་གྱི་སྐུ་གསུང་ཐུགས་ཀྱི་རྟེན་ཇི་ལྟར་རིགས་པ་དང་། དཀྱིལ་འཁོར་རས་བྲིས་སམ། ཚོམ་བུ། དེ་མིན་སྒྲུབ་གཏོར་གྱི་མདུན་དུ་སྨན་རཀ་གཏོར་མཆོད་སོགས་སྤྱི་ལྟར། དབང་སྐུར་སོགས་དང་འབྲེལ་ན་དབང་རྫས་སོགས་གཞུང་ལྟར་བཤམ། གཉིས་པ་ནི། དབང་ཐོབ་ཅིང་དམ་ཚིག་དང་ལྡན་པའི་རྣལ་འབྱོར་པས་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ། ཚིག་བདུན་གསོལ་འདེབས་ཀྱིས་ཐོག་དྲངས་བརྒྱུད་འདེབས་རྒྱས་པ་གཞུང་ནས་འབྱུང་བ་ལྟར་རམ་བསྡུ་ན། སྤྲོས་བྲལ་ཆོས་དབྱིངས་སྐུ་གསུམ་གྱི་རྗེས། ཆོས་སྐུ་སྣང་མཐའ་ལོངས་སྐུ་སྤྱན་རས་གཟིགས། །སྤྲུལ་སྐུ་པད་འབྱུང་མཁའ་འགྲོ་མཚོ་རྒྱལ་དང་། །ལོ་ཆེན་བཻ་རོ་ཀ་བ་དཔལ་བརྩེགས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །རིག་འཛིན་ཆེན་པོ་ཚེ་དབང་བཀྲ་ཤིས་ཞབས། །བཀའ་བབས་ཆོས་བདག་བརྒྱུད་ལྡན་བླ་མ་དང་། །བཀའ་དྲིན་མཉམ་མེད་རྩ་བའི་བླ་མ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །
བྱིན་རླབས་དངོས་གྲུབ་ཕྲིན་ལས་ཀུན་གྱི་གཏེར། །བླ་མ་ཡི་དམ་མཁའ་འགྲོ་རབ་འབྱམས་དང་། །ཆོས་སྲུང་ནོར་ལྷ་གཏེར་བདག་ཚོགས་རྣམས་ལ། གསོལ་བ༴ དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བདག་གཞན་ཐུན་མོང་ལམ་གྱིས་རྒྱུད་སྨིན་ཅིང་། །གསང་ཆེན་སྙིང་པོའི་མྱུར་ལམ་ལ་བརྟེན་ནས། །རིག་འཛིན་བླ་མའི་གོ་འཕང་མྱུར་ཐོབ་ཤོག །ཅེས་སྔོན་དུ་འགྲོ་བས། །བགེགས་གཏོར་དངོས་སུ་བཤམས་པ་ཡོད་ན་རྃ་ཡྃ་ཁྃ་གིས་བསང་། ཨོཾ་ཨཱཿཧཱུྃ་ཧོས་བརླབ། ཨོཾ་སརྦ་བྷཱུ་ཏ་ཨཱ་ཀརྵཱ་ཡ་ཛཿས་མགྲོན་དགུག །ཨོཾ་སརྦ་བིགྷཱན་ན་མསྶརྦ་ཏ་ཐཱ་ག་ཏ་སོགས་ལན་གསུམ་གྱིས་བསྔོ་། ཧཱུྃ། །བླ་མ་རྣམས་ཀྱི་བྱིན་རླབས་དང་། །ཡི་དམ་ལྷ་ཡི་ཏིང་འཛིན་དང་། །མཁའ་འགྲོ་རྣམསཾ་ཀྱི་མཐུ་རྩལ་གྱིས། །དངོས་གྲུབ་བར་ཆད་བྱེད་པའི་བགེགས། །ལོག་པར་འདྲེན་པའི་བདུད་ཀྱི་ཚོགས། འདི་རུ་མ་འདུག་གཞན་དུ་དེངས། ཧཱུྃ་ཧཱུྃ་ཨུརྩ་ཊྚ་ཡ་ཕྲཊ། དང་སུམ་བྷ་སོགས་བརྗོད་པས་བསྐྲད། མཚམས་གཅོད་སྲུང་འཁོར་ནི། ཧྲཱིཿ བདག་ཉིད་འགྱུར་མེད་སོགས། སྐྱབས་འགྲོ་སེམས་བསྐྱེད། ཨོཾ་ཨཱཿཧཱུྃ། སྐྱབས་གནས་དམ་པ་སོགས། ཡན་ལག་བདུན་པ། ཨོཾ་ཨཱཿཧཱུྃ། ཆོས་རྣམས་ཐམས་ཅད་སོགས། མཆོད་པ་བྱིན་རླབས། །རྃ་ཡྃ་ཁྃ། ཨོཾ་ཨཱཿཧཱུྃ། རང་གི་གནས་གསུམ་
སོགས་རིག་འཛིན་འཇའ་ཚོན་སྙིང་པོའི་ཡང་ཟབ་དཀོན་མཆོག་སྤྱི་འདུས་གཏེར་གཞུང་སོར་བཞག་ལྟར་བཏང་བས་རུང་སྟེ་འདི་གཉིས་གཏེར་ཁ་སྔ་ཕྱིའི་ཚུལ་དུ་གསུང་པས་སོ། །གཉིས་པ་དངོས་གཞི་ལ། དང་པོ་དམ་ཚིག་པ་བསྐྱེད་པ་ནི། ཨོཾ་སྭ་བྷཱ་ཝ་སོགས་ནས། རྒྱས་གདབ་བོ། །ཨོཾ་ཨཱཿཧཱུྃ། ཨོཾ་ཧཱུྃ་ཏྲཱྃ་ཧྲཱིཿཨཱཿ ཡེ་ཤེས་པ་སྤྱན་དྲང་པ་ནི། ཧཱུྃ། སྔོན་གྱི་སོགས་ནས། དངོས་གྲུབ་སྩོལ། ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ། ཞེས་མང་དུ་བཟླ་ཞིང་བྱིན་དབབ། བཞུགས་སུ་གསོལ་བ་ནི། ཧྲཱིཿ ལྷུན་གྲུབ་བདེ་ཆེན་ཕོ་བྲང་འདིརཿ བླ་མ་རྩ་གསུམ་ལྷ་ཚོགས་རྣམས༔ དགྱེས་པའི་ཚུལ་གྱིས་བཞུགས་ནས་ཀྱང་༔ བྱིན་རླབས་དངོས་གྲུབ་རྣམ་གཉིས་སྩོལ༔ ཨོཾ་ཨཱཿཧཱུྃ་གུ་རུ་དེ་བ་ཌཱ་ཀི་ནཱི་ས་མ་ཡ་ཏིཥྛ་ལྷན། ཕྱག་འཚལ་བ་ནི། ན་མོ། སྐྱེ་འགག་འགྱུར་མེད་ཕྲིན་ལས་རྫོགས༔ རང་བྱུང་ཐུགས་རྗེས་འགྲོ་རྣམས་སྒྲོལ༔ ཡིད་བཞིན་དངོས་གྲུབ་ཆར་འབེབས་པའི༔ རྩ་གསུམ་ལྷ་ལ་ཕྱག་འཚལ་ལོ༔ ཨ་ཏི་པཱུ་ཧོ༔ པྲ་ཏིཙྪ་ཧོ༔ མཆོད་པ་འབུལ་བ་ནི། ལྗགས་སྒྲིག་ལྟར་རྒྱས་པར་བྱ་བའམ། བསྡུ་ན། ཨོཾ་ཨཱཿཧཱུྃ། མཆོད་འོས་ཕྱི་ནང་སོགས་དཀོན་མཆོག་སྤྱི་འདུས་གཏེར་གཞུང་སོར་བཞག་ལྟར་བྱ། བསྟོད་པ་ནི། གདོད་ནས་རྣམ་དག་རང་རིག་ལྷ༔
སྣང་ཚུལ་ཞི་དང་ཁྲོ་བོའི་ཚུལ༔ བླ་མ་ཡི་དམ་མཁའ་འགྲོ་ལ༔ གུས་པའི་ཡིད་ཀྱིས་ཕྱག་འཚལ་བསྟོད༔ ཅེས་དང་ཡི་གེ་བརྒྱ་པ་བརྗོད། བཟླས་པ་ནི། །དཀྱིལ་འཁོར་ལྷ་ཚོགས་ཐམས་ཅད་ཀྱི། །ཐུགས་ཀའི་ས་བོན་སྔགས་ཕྲེང་གི། །འོད་ཀྱིས་ཕྱོགས་བཅུའི་བདེ་གཤེགས་ཀྱི། །བྱིན་རླབས་བསྡུས་ཏེ་བདག་ལ་ཐིམ། །ཨོཾ་ཨཱཿཧཱུྃ་བཛྲ་གུ་རུ་པདྨ་དེ་ཝ་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ། ཞེས་དངོས་གྲུབ་སྐུལ་བའི་བཟླས་པ་ཅི་ནུས་དང་། ཚིག་བདུན་གསོལ་འདེབས་ཀྱང་ལན་ཉེར་གཅིག་བརྗོད་ཅིང་གསོལ་བ་གདབ། མཐར་དབྱངས་གསལ་རྟེན་སྙིང་གིས་སྔགས་ཀྱི་ལྷག་ཆད་ཁ་བསྐང་ཞིང་བྱིན་རླབས་བརྟན་པར་བྱའོ། །གསུམ་པ་རྗེས་ཚོགས་མཆོད་ནི། ཧྲཱིཿ བདག་ཉིད་ལྷ་ཡི་སོགས་བྱིན་རླབས། རང་བཞིན་སྐུ་གསུམ་སོགས་སྤྱན་འདྲེན། ཨོཾ་ཨཱཿཧཱུྃ། ཚོགས་མཆོད་འོད་ཕུང་འབར་བ་བཞིན་སོགས་མཆོད་བཤགས་བསྒྲལ་གསུམ། སྐོང་རྫས་བསང་སྦྱང་། ནམ་མཁའི་སྔགས་རྒྱས་བརླབ། ཧྲཱིཿ མ་བཅོས་སྤྲོས་བྲལ་སོགས་དཀོན་མཆོག་སྤྱི་འདུས་ཀྱི་ཆ་ལག་རིག་འཛིན་འཇའ་ཚོན་སྙིང་པོའི་ལྗགས་སྒྲིག་ལྟར་མཐར་ཆགས་སུ་བཏང་། བར་འདིར་རྩ་གསུམ་ཆོས་སྲུང་གི་གཏོར་བསྔོ་བྱེད་པར་གསུངས་པས་ཟུར་བཀོལ་ལྟར་གྱི་རྗེས། ཨོཾ་ཨཱཿཧཱུྃ། བླ་མ་རྒྱ་མཚོ་སོགས་གནམ་ཕུད་ཕུལ་
རྗེས་ཚོགས་ལ་རོལ། ལྷག་གཏོར་བྱིན་རླབས་སྔོན་དུ་འགྲོ་བས། ཨོཾ་ཨཱཿཧཱུྃ། ལྷག་ལ་དབང་བའི་སོགས་ཀྱིས་ལྷག་མ་བསྔོ། ཆད་མདོ། བརྟན་སྐྱོང་། གཏོར་བྲོ་རྣམས་དཀོན་མཆོག་སྤྱི་འདུས་སོར་བཞག་དང་། གཏང་རག་གི་མཆོད་བསྟོད་སྔོན་དུ་འགྲོ་བས། ཨོཾ་ཨཱཿཧཱུྃ། །བདག་གཞན་བླ་མེད་ཚོགས་མཆོད་འདི་དག་གིས། །སྡིག་སྒྲིབ་ཉམས་ཆགས་མ་ལུས་ཀུན་བྱང་སྟེ། །ཚེ་འདི་ཉིད་ལ་རིག་འཛིན་མཆོག་འགྲུབ་ཅིང་། །བྱིན་རླབས་རྩལ་དབང་གཟི་བྱིན་ནུས་མཐུར་ལྡན། །སྐུ་གསུམ་ཐུགས་ཀྱི་དངོས་གྲུབ་སྩལ་དུ་གསོལ། །ཀཱ་ཡ་ཝཱ་ཀ་ཙིཏྟ་སིདྡྷི་ཧཱུྃ། ཞེས་རྒྱུན་གྱི་དངོས་གྲུབ་གསོལ། མ་རྙེད་ཡོངས་སུ་མ་ཚང་དང་སོགས་ཀྱིས་ནོངས་པ་བཤགས། མདུན་བསྐྱེད་རྟེན་ཡོད་ན་བརྟན་བཞུགས་བྱ། གང་ལྟར་ཡང་། ཆོས་ཉིད་སྐྱེ་བ་མེད་པ་ལས། །འགག་མེད་དཀྱིལ་འཁོར་ལྷ་ཚོགས་ཤར། །འགག་པ་ཉིད་ན་འགག་མེད་པ། །སྤྲོས་བྲལ་ཀ་དག་ཀློང་དུ་ཐིམ། །ཞེས་ལྷར་སྣང་འོད་གསལ་དུ་བསྡུ། སླར་ཡང་རང་རིག་ལྷ་ཡི་སྐུ། །སྒོ་གསུམ་དཀྱིལ་འཁོར་རང་གསལ་བས། །སྣོད་བཅུད་གདོད་ནས་དག་པའི་ལྷ། །གཟུང་འཛིན་གཉིས་མེད་ཀློང་དུ་ཤར། །ཞེས་ཐུན་མཚམས་ཀྱི་ལྷ་སྐུར་ལྡང་། དགེ་བ་འདི་ཡིས་མྱུར་དུ་བདག །བླ་མ་རྩ་གསུམ་འགྲུབ་གྱུར་ནས། །འགྲོ་བ་གཅིག་
ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་སོགས་བསྔོ་སྨོན་རྒྱས་བསྡུས་གང་འོས་དང་། ཤིས་བརྗོད་ནི། ཨེ་མ་ཧོ། །ཤེས་བྱའི་དོན་ལ་མ་རྨོངས་པའི། ཞེས་སོགས་ཇི་ལྟར་རིགས་པས་མཐའ་བརྟེན་ནས་མེ་ཏོག་གི་ཆར་ཕབ་པས་དགེ་ལེགས་སུ་བྱའོ།། །།