ལེའུ་བཅུ་གཅིག་པའི་རྣམ་པར་བཤད་པ།

༈ སྤྱི་དོན་གཉིས་པ་ལམ་བསྐྱེད་པ་དང་རྫོགས་པའི་རིམ་པ་བསྟན་པ་ལ་གཉིས་ཏེ། ཐ་མལ་གྱི་མངོན་ཞེན་བཟློག་པ་བསྐྱེད་པའི་རིམ་པ་དང་། སྙིང་པོའི་དོན་ལ་འཇུག་པ་རྫོགས་པའི་རིམ་པའོ། །དང་པོ་ལ་གཉིས་ཏེ། ཐབས་བསྐྱེད་པའི་རིམ་པ་ཚོགས་ཀྱི་དཀྱིལ་འཁོར་བསྟན་པ་དང་། དེའི་ཡན་ལག་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། དོན་གྱི་འབྲེལ་དགོད། ཚིག་གི་དོན་བཤད་པ། སྐབས་ཀྱི་དོན་བསྡུ་བའོ། །

དང་པོ་ནི། གཞི་དཀྱིལ་འཁོར་དུ་དབང་བསྐུར་བ་དེ༵་ནས༵་ལམ་བསྐྱེད་པའི་རིམ་པ་ཐབས་སྣང་བའི་དངོས་པོ་ལམ་དུ་བསླང་བའི་ཕྱིར། དེ༵་བཞི༵ན་གཤེ༵གས་པ༵་ཐབས་ཀྱིས་རོལ་པས་དགྱེས༵་པ༵་ཆེན༵་པོས༵་ཀུན་ཏུ་བཟང་པོ་ཉིད་ཐབས་སྣང་བའི་སྒྱུ༵་འཕྲུལ༵་འདོད་ཡོན་ལྔ་ལ་སོགས་པ་འཁོར་བའི་ཆོས་ཉོན་མོངས་པའི་རྣམ་པར་སྣང་བ་རྣམས་ཤེས་རབ་སྟོང་པའི་རང་བཞིན་དུ་གནས་པས་དྲྭ༵་བའི༵་ངོ་བོ་སྟེ་ཡེ་ནས་སྤང་བླང་དང་དགག་སྒྲུབ་གཉིས་སུ་མེད་པའི་ཆོས་ཉིད་ཟུང་འཇུག་ཆེན་པོ་ནི་ཡེ་ནས་སངས་རྒྱས་པའི་ཕྱིར་ཆོས་ཐམས་ཅད་ཀྱི་གནས་ལུགས་སམ་རྒྱལ༵་པོ༵་ཞེས་བྱའོ། །དེ་ཉིད་ཤེས་པར་བྱ་བའི་ཕྱིར་འདོད་ཡོན་དང་ཉོན་མོངས་པ་མ་སྤངས་པར་ཇི་ལྟར་སྣང་དུས་ཉིད་ནས་ཡེ་ཤེས་ཆེན་པོར་དབང་སྒྱུར་བ་ཞེས༵་བྱ༵་བ༵འི་ཏིང༵་ངེ༵་འཛི༵ན་དམ་པ་ལ༵་ཡབ་ཡུམ་སྙོམ༵ས་པ༵ར་ཞུག༵ས་ན༵ས་ཐམས་ཅད་ཐར་ལམ་དུ་བསྟན་པའི་ཆེད༵་དུ༵་བརྗོད༵་པ༵་འདི༵་སྐད་ཅེས་བརྗོད༵་པར་མཛད་དོ༵། །

གཉིས་པ་ལ་གཉིས་ཏེ། གཞི་ལྷུན་གྱིས་གྲུབ་པའི་དཀྱིལ་འཁོར་ཤེས་པར་བྱ་བ་དང་། ལམ་ཐབས་དང་ཤེས་རབ་ཀྱི་དཀྱིལ་འཁོར་ཉམས་སུ་བླང་བའོ། །

དང་པོ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སྟོང་པའི་ངང་ལས་བྱུང་བར་རྒྱུ༵་གཅི༵ག་པ༵་ཡིན་ཏེ། ཏིང་ངེ་འཛིན་རྒྱལ་པོ་ལས། ཇི་ལྟར་བར་སྣང་ཅུང་ཟད་སྤྲིན་མེད་ལས། །སྐད་ཅིག་ཏུ་ནི་སྤྲིན་གྱི་དཀྱིལ་འཁོར་སྣང་། །བྱུང་ནས་ཞིག་སྟེ་སྤྲིན་གྱི་དཀྱིལ་འཁོར་མེད། །ཐོག་མ་གང་ལས་བྱུང་བ་བརྟག་པར་བྱ། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་སོ། །དེ་ལྟར་སྟོང་པའི་ངང་ལས་དང་པོར་བྱུང་བར་མ་ཟད། ད་ལྟ་སྣང་དུས་ཉིད་ནས་ཀྱང་ཡི༵ག་འབྲུ༵་ཨའི༵་ཚུལ༵་དུ་རང་བཞིན་གྱིས་མ་སྐྱེས་པའི་ངོ་བོ་སྣང་སྟོང་གཉིས་སུ་མེད་པར་གནས་ཏེ། ལྷའི་བུས་ཞུས་པའི་མདོ་ལས། (༢༠༢)ཆོས་ཐམས་ཅད་རང་བཞིན་གྱིས་རྣམ་པར་དག་པ་ཨའི་ཚུལ་དུ་གནས་སོ། །ཞེས་སོ། །དེའང་སྣང་བ་ནི་ༀ། སྟོང་པ་ནི་ཨཱཿ གཉིས་སུ་མེད་པ་ནི་ཧཱུྃ་གི་རང་བཞིན་དུ་གནས་པས་སྣང་བཞིན་དུ་སྟོང་སྟོང་བཞིན་དུ་སྣང་སྣང་བ་དང་སྟོང་པ་གཉིས་སུ་མེད་པ་སྟེ། རྩ་བ་ཤེས་རབ་ལས། རྨི་ལམ་ཇི་བཞིན་སྒྱུ་ཇི་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དུ་ནི་འཇིག་པའང་གསུངས། །ཞེས་པ་དང་། གང་ཕྱིར་སྟོང་པ་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །མེ་ཡི་རང་བཞིན་ཚ་བས་བྱིན་གྱིས་བརླབས་པ་ལྟར་ཆོས་ཐམས་ཅད་ཀྱི་རང་བཞིན་ཡེ་ནས་དཀྱིལ་འཁོར་གྱི་རང་བཞིན་དུ་སངས་རྒྱས་པར་བྱི༵ན་གྱིས༵་བརླ༵བས་དང༵་སྟེ་མ་དག་པ་མེད་ཅིང་དག་པ་འབའ་ཞིག་གི་ཚུལ་དུ་གནས་ཏེ། གསང་རྒྱུད་ལས། ཆོས་ཀུན་ཡེ་ནས་དཀྱིལ་འཁོར་དུ། །བྱིན་གྱིས་བརླབས་པ་རྣམ་པར་དག །ཅེས་སོ། །དེའང་སྟོང་པ་ཆོས་སྐུ་སྣང་བ་ལོངས་སྐུ་སྣ་ཚོགས་སུ་སྣང་བ་སྤྲུལ་པ་སྐུའི་རང་བཞིན་ནི། གཟུགས་ཐམས་ཅད་སྐུའི་དཀྱིལ་འཁོར། སྒྲ་ཐམས་ཅད་གསུང་གི་དཀྱིལ་འཁོར། ཆོས་ཉིད་ཐམས་ཅད་ཐུགས་ཀྱི་དཀྱིལ་འཁོར་དུ་གནས་སོ། །དེ་ལྟར་གནས་པའི་རང་བཞིན་རྣམས་ཀྱང་དུས་གཞན་ནམ་ལྐོག་ཏུ་གྱུར་པ་ལ་སོགས་པ་མ་ཡིན་པར་སྣང་དུས་འདི་ཉིད་ནས་ཕྱི་སྣང་བ་ཡུམ་ནང་ཕུང་པོ་ཡབ་རྟོག་ཚོགས་ལྷའི་རང་བཞིན་དུ་གནས་པའི་ངོ་བོ་མངོ༵ན་སུམ༵་པ༵ར་སྣང་ཞིང་སྣང་དུས་ཉིད་ནས་མཉམ་པ་ཉིད་ཀྱི་ངང་ལས་མི་གཡོ་བའི་དགོངས་པ་སྟོན་པ་ཡིན་ཏེ། ཀུན་བྱེད་ལས། ཀུན་རྒྱུ་བྱང་ཆུབ་སེམས་ལས་ནི། །སེམས་ཀྱི་ངོ་བོ་འབྱུང་ཆེན་ལྔ། །སྟོན་པ་བྱང་ཆུབ་སེམས་ལྔ་བྱུང་། །སྐུ་ནི་ལོངས་སྤྱོད་རྫོགས་པའི་སྐུ། །ཆོས་ནི་རང་གི་ངོ་བོས་འཆད། །སྟོན་ནི་རང་གི་རང་བཞིན་སྟོན། །སྟོན་པ་ལོངས་སྤྱོད་རྫོགས་སྐུ་སྟེ། །དགོངས་པ་ཉིད་ལ་ཉིད་མི་རྟོག །ཆོས་རྣམས་གཞན་ལའང་རྟོག་མི་བྱེད། །བྱང་ཆུབ་སེམས་ཀྱི་སྟོན་པ་ལྔས། །ཀུན་ཀྱང་ཆོས་ཉིད་དེ་བཞིན་སྟོན། །ཞེས་སོ། །དེ་བཞིན་དུ་ཡེ་ཤེས་ཡོད་པར་དུག་ལྔས་སྟོན་པ་དང་། སྐུ་ལྔ་སེམས་ཀྱིས་སྟོན་པ་དང་། ཡུམ་ལྔ་འབྱུང་ལྔས་སྟོན་པ་སྟེ། བཞིན་དང་གཟུགས་བརྙན་ལས་ཀྱང་གསལ་བར་ཆོས་རྣམས་ཀྱི་རང་གི་མཚན་ཉིད་སངས་རྒྱས་པའི་ཆོས་ཉིད་དང་སྣང་ལ་ངོས་གཟུང་མེད་པའི་ཆོས་ཅན་དུ་མངོན་དུ་སྟོན་པའོ། །དེ་ལྟར་གནས་པའི་དོན་གཞིའི་གནས་ལུགས་རང་གི་བསོད་ནམས་དང་བླ་མ་དམ་པའི་ཐུགས་རྗེས་བྱིན་གྱིས་བརླབས་པ་ལ་བརྟེན་ནས་ཕྱིན་ཅི་མ་ལོག་པར་རབ༵་ཏུ༵་རྟོག༵ས་པ༵་རྣམ༵་པ༵་བཞི༵་ཡི༵ས་ཆོས་ཐམ༵ས་ཅ༵ད་ཡེ་ནས་མངོ༵ན་པར་རྫོག༵ས་པར་བྱང་ཆུབ་པའི་རྒྱལ༵་པོ༵་ཆེ༵ན་པོར་རྟོགས་པ་ན། སྣང་སྲིད་འཁོར་འདས་ཀྱི་ཆོས་རྣམས་ལ་སྤོང་ལེན་མེད་པར་ཕྱམ་གཅིག་ཡེ་ཤེས་ཀྱི་རོལ་པར་འཆར་བས་གསང་ཆེན་(༢༠༣)དོན་གྱི་གནས་ལུགས་སོ། །དེ་ནི་དབྱིངས་དེ་བཞིན་ཉིད་དུ་བཤད་པའོ། །བསྐྱེད་རིམ་ལྟར་ན། རྒྱུ་གཅིག་པ་ཏིང་ངེ་འཛིན་གསུམ་དང་། ཡིག་འབྲུ་ལྷ་སོ་སོའི་སྙིང་པོ་བསྐྱེད་པ་དང་། བྱིན་གྱིས་བརླབས་པ་ལྷའི་དཀྱིལ་འཁོར་དུ་བསྐྱེད་པ་དང་། མངོན་སུམ་པ་དེའི་ངང་ལ་ལྷན་ཅིག་པའི་རྫོགས་པ་བསྒོམ་པར་རབ་ཏུ་རྟོགས་པ་རྣམ་པ་བཞི་ཡིས་ཆོས་ཐམས་ཅད་ཤེས་པར་བྱེད་པའོ། །རྫོགས་རིམ་དང་སྦྱར་ན། རྒྱུ་གཅིག་པ་འཁོར་འདས་སེམས་སུ་གཅིག་པའོ། །ཡིག་འབྲུའི་ཚུལ་སྐྱེ་བ་མེད་པའི་ངང་དུ་རྟོགས་པའོ། །བྱིན་གྱིས་བརླབས་པ་དེ་ལྟར་མཉམ་པར་འཇོག་པ་ཐུགས་རྡོ་རྗེའི་ངོ་བོར་གཉིས་སུ་མེད་པར་གྱུར་པའོ། །མངོན་སུམ་པ་སོ་སོ་རང་གི་རིག་པའི་ཡེ་ཤེས་ཀྱིས་བསྒོམ་པ་ལས་རྟོགས་པ་སྟེ། ལམ་རིམ་ལས། རྒྱ་མཚོ་དྭངས་པའི་གཟུགས་བརྙན་ལྟར། །སྒྲ་རྟེན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བར། །རང་གསལ་གསུམ་བྲལ་མི་སྒུལ་པས། །ངེས་པར་གདེང་དུ་གང་བྱས་པ། །ཐོས་བསམ་བརྟེན་པའི་ལྟ་མཐར་ཕྱིན་། །ཅེས་སོ། །ཟུང་འཇུག་ལྟར་ན། རྒྱུ་གཅིག་པ་བསྐྱེད་རྫོགས་དང་བདེན་གཉིས་སུ་གཅིག་པ་དང་། དེའི་ངོ་བོ་རྟག་ཆད་ལས་འདས་པ་ཡི་གེ་སྤྲིན་དུ་གནས་པ་དང་། དབྱིངས་རང་བཞིན་གྱིས་དག་པའི་ངང་ལས་བསྐྱེད་རྫོགས་སུ་རང་སྣང་བར་བྱིན་གྱིས་བརླབས་པ་དང་། དེ་ཉིད་རིག་པས་ཐག་ཆོད་ཅིང་མི་འགལ་བར་མངོན་དུ་རྟོག་ནས་ཉིན་མཚན་དུ་བརྩོན་པ་སྟེ། རྔམ་གློག་ལས། རྟོག་པ་ཡང་ནི་རྣམ་པ་བཞིར། །རྣལ་འབྱོར་ནང་པ་བཞེད་པ་སྟེ། །རྒྱུ་གཅིག་པ་དང་ཡི་གེའི་ཚུལ། །བྱིན་གྱིས་བརླབས་དང་མངོན་སུམ་ལས། །རྫོགས་ཆེན་དོན་ལ་འཇུག་འགྱུར་ཏེ། །རྒྱུ་ནི་བདེན་གཉིས་ཅིག་ཅར་དུ། །གཅིག་པས་གཅིག་པའི་མཚན་ཉིད་དང་། །སྐུ་གསུང་ཐུགས་ཀྱི་དཀྱིལ་འཁོར་དུ། །ཆོས་ཀུན་རང་བཞིན་རྟོགས་པ་དང་། །སྐྱེ་མེད་དབྱིངས་ཀྱི་བྱིན་རླབས་ལས། །ཆོས་ཀུན་སྣང་བར་ཤེས་པ་དང་། །དེ་ལྟ་བུ་ཡི་རང་བཞིན་ཏེ། །གཞན་ལ་མ་བརྟེན་མི་འགལ་བར། །མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་སོ། །གཞུང་འདི་ལྟ་བུ་ནི་ཕྱོགས་གཅིག་པུ་འདི་ཁོ་ན་ཡིན་ནོ་ཞེས་པའང་མི་རུང་སྟེ། རྡོ་རྗེའི་ཚིག་བརླིང་ཞིང་གང་དུའང་སྦྱར་དུ་ཡོད་པའི་ཕྱིར་རོ། །

གཉིས་པ་ལམ་ཐབས་དང་ཤེས་རབ་ཀྱི་དཀྱིལ་འཁོར་ཉམས་སུ་བླངས་པ་ལ་གསུམ་སྟེ། ཅིར་སྣང་ཡེ་ཤེས་ཀྱི་དཀྱིལ་འཁོར། རོལ་པ་ཚོགས་ཀྱི་དཀྱིལ་འཁོར། གང་བསྒྲུབ་ཐབས་ཀྱི་ཡན་ལག་གོ། །དང་པོ་ལ་གཉིས་ཏེ། སྣང་སེམས་གཉིས་མེད་ཀྱི་དཀྱིལ་འཁོར་སྤྱིར་བསྟན་པ་དང་། སྦྱོར་སྒྲོལ་གཉིས་མེད་ཀྱི་དཀྱིལ་འཁོར་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། འཛིན་བྱེད་(༢༠༤)ཡབ་ཀྱི་དཀྱིལ་འཁོར། གཟུང་ཡུལ་ཡུམ་གྱི་དཀྱིལ་འཁོར། རོལ་པ་གཉིས་སུ་མེད་པའི་དཀྱིལ་འཁོར་རོ། །

དང་པོ་ལའང་གཉིས་ལས། ཞི་བའི་དཀྱིལ་འཁོར་དུ་ཤེས་པར་བྱ་བ་ནི་ལུས་ཀྱི་ཡ༵ན་ལ༵ག་ལྔ་དང་མིག་ལ་སོགས་པའི་དབ༵ང་པོ༵་དང་དེ་དག་གི་རྣ༵མ་པར་ཤེ༵ས་པའི་ཚོགས་དང་བཅས་པ་ཀུན༵་ཐ་མལ་གྱི་རྣམ༵་པ་རང་མཚན་པ་མི༵ན་པར་ཨོ༵ཾ་སྟེ་ཡེ་ཤེས་ལྔའི་རང་བཞིན་དུ༵་ཤེ༵ས་པ༵ར་བྱ༵་ཞིང་དེའི་མཚོན་བྱེད་དུ་ཡབ་ལྔ་སེམས་དཔའ་བརྒྱད་སྒོ་བ་བཞི་ཐུབ་པ་དྲུག་དང་བཅས་པའི་རང་བཞིན་མེ་ལོང་ནང་གི་གཟུགས་བརྙན་ལྟར་མེད་བཞིན་སྣང་བའི་རིགས་ལྔ་ལོངས་སྤྱོད་རྫོག༵ས་པ༵འི་དཀྱི༵ལ་འཁོ༵ར་ཉིད༵་དུ༵་བསྒོམ༵་མོ། །

གཉིས་པ་ཁྲོ་བོའི་དཀྱིལ་འཁོར་དུ་ཤེས་པར་བྱ་བ་ནི་ཡང༵་ན༵་གདུལ་བྱའི་དབང་ངམ་རང་གི་མོས་པའི་དབང་གིས་ཕུང་པོ་དང་དབང་ཤེས་ཀུན་ཡེ་ཤེས་ལྔའི་ངོ་བོ་རབ་ཏུ་ཁྲོས༵་པ༵འི་དཀྱི༵ལ་འཁོ༵ར་དུ༵་བསྒོ༵མ་པར་བྱའོ། །

གཉིས་པ་ཡུམ་གྱི་དཀྱིལ་འཁོར་ལའང་གཉིས་ལས། དང་པོ་ཞི་བའི་ཡུམ་དུ་ཤེས་པར་བྱ་བ་ནི་སྣང་སྲིད་སྐྱེ་འགྲོས་བསྡུས་པའི་གཟུགས༵་ཐམས་ཅད་དང་སྒྲ༵་དང་དྲི༵་དང་རོ༵་དང་རེག༵་བྱ་ལ༵་སོག༵ས་ཁོངས་ནས་ཆོས་དང་འབྱུང་བ་ལྔར་སྣང་བ་ཐམས་ཅད། ཐ་མལ་པའི་གཟུགས་སྒྲ་ལ་སོགས་པའི་རྣམ༵་པ་དེ་དག་ཏུ་མི༵ན་པར་མཱུྃ་སྟེ་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དུ༵་ཤེ༵ས་པ༵ར་བྱ༵་ཞིང་། དེའི་མཚོན་བྱེད་སྒོ་མ་བཞི་སེམས་མ་བརྒྱད་ཡུམ་ལྔའི་རྣམ་པ་སྟེ། སྣང་ལ་ངོས་གཟུང་མེད་པ་ཡུམ༵་གྱི༵་དཀྱི༵ལ་འཁོ༵ར་ཉིད༵་དུ༵་བསྒོ༵མ་པར་བྱའོ། །

གཉིས་པ་ཁྲོ་བོའི་ཡུམ་དུ་གསལ་བ་ནི་ཡང༵་ན༵་གདུལ་བྱའམ་རང་གི་མོས་པའི་དབང་གིས་ཁྲོ༵་མོ༵འི་དཀྱིལ༵་འཁོ༵ར་བསྒོམ༵་མོ། །

གསུམ་པ་རོལ་པ་གཉིས་སུ་མེད་པའི་དཀྱིལ་འཁོར་ནི། ལུས་ལ་བགོ་བའི་གོ༵ས་དང་འདོགས་པའི་རྒྱན༵་དང་བཟ༵འ་བ་དང་བཏུང༵་བ་ངག་གི་གླུ༵་དང་བརྗོད་པའི་ཚིག༵་དང་ལུས་ཀྱི་རྣམ་འགྱུར་རྐང་པའི་བྲོ༵་དང་ལག་པའི་གར༵་དང་ཉེ་བར་སྤྱད་པའི་ཡོ་བྱད་ཀྱི་ཚོག༵ས་ཅི་དང་ཅི་སྤྱོད་པ་ཐམས་ཅད་ཀྱི༵་སྤྲིན༵་ཕུང༵་ཆེན་པོ་ལ༵་ཐ་མལ་གྱི་སྣང་བ་མ་ཡིན་པར། སྣང་སྟོང་ངམ་ཡབ་ཡུམ་གཉིས་སུ་མེད་པའི་རང་བཞིན་ཧཱུ༵ྃ་སྟེ་གཉིས་མེད་བདེ་བ་ཆེན་པོའི་ཆོས་ཉིད་དུ་ཤེས༵་པ༵ས་ཆགས་ཞེན་མེད་ལ་ཚོགས་ཀྱི་ཡོ་བྱད་རྨི་ལམ་ལྟར་བདེན་མེད་ཀྱི་ངང་ནས་ལྷ་མོ་དྲུག་གི་རང་བཞིན་དུ་རབ༵་ཏུ་ལོངས་སྤྱོད༵་ན༵་འབྲས་བུ་མཆོག་དང་ཐུན་མོང་གི་དངོས་གྲུབ་ངོ༵་མཚ༵ར་བའི་རང་བཞིན་འབྱུ༵ང་བ༵འི་དཀྱི༵ལ་འཁོ༵ར་ཕུང་པོ་ཁམས་དང་སྐྱེ་མཆེད་ན་བཞུགས་པའི་སངས་རྒྱས་ཐམས་ཅད་མཉེས༵་པས་མྱུར་དུ་བྱང་ཆུབ་འགྲུབ་པའི་ཕན་ཡོན་རླབས་པོ་ཆེ་ཐོབ་པར་བྱེད་དོ། །

གཉིས་པ་སྦྱོར་སྒྲོལ་གཉིས་མེད་ཀྱི་དཀྱིལ་འཁོར་ལ་གསུམ་སྟེ། སྦྱོར་བ་གནས་སུ་དག་པ་བདེ་ཆེན་བྱང་ཆུབ་མཆོག་གི་དཀྱིལ་འཁོར་དང་། སྒྲོལ་བ་གནས་སུ་དག་པ་ཐབས་ཆེན་གསང་བའི་དཀྱིལ་འཁོར། སྦྱོར་སྒྲོལ་གྱི་ཉེས་པས་མི་གོས་པས་ཡེ་ཤེས་སྒྱུ་མའི་དཀྱིལ་འཁོར་རོ། །དང་པོ་ལ་གཉིས་ཏེ། (༢༠༥)སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། རྟེན་ཕྱག་རྒྱའི་དབྱེ་བ་དང་། བརྟེན་པ་ཡེ་ཤེས་ཀྱི་རང་བཞིན་ནོ། །དང་པོ་ལ་གཉིས་ཏེ། སྤྱིར་བསྟན་པ་དང་། བྱེ་བྲག་ཏུ་བཤད་པའོ། །

དང་པོ་ལ་གསུམ་ལས། བཅུ་གཉིས་མ་ནི་མཁའ་པད་འདབ་བརྒྱད་དང་ལྡན་པས་ཡབ་ཡུམ་གཉིས་ཀ་ལ་བདེ་བས་ཁྱབ་པར་བྱེད་པས་ལྷ་མོ་སྟེ། འཇམ་དཔལ་ལས། བདེན་དོན་རྣམ་པ་བཅུ་གཉིས་ལྡན། །ཞེས་སོ། །བཅུ་དྲུག་མ་ནི་འདབ་མ་བཞི་དང་ལྡན་པས་ཡབ་ལ་བདེ་བ་སྦྱིན་པའི་ཕྱིར་ཀླུ་མོ་སྟེ། དེ་ཉིད་རྣམ་པ་བཅུ་དྲུག་རིག །ཅེས་སོ། །ཉི་ཤུ་མ་ནི་འདབ་མ་གཉིས་དང་ལྡན་པས་ཡུམ་ལ་བདེ་བ་སྦྱིན་པའི་ཕྱིར་རིགས་ངན་མོ་སྟེ། རྣམ་པ་ཉི་ཤུའི་བྱང་ཆུབ་པའོ། །ཞེས་སོ། །དེའང་བཅུ་གཉིས་ནས་བཅོ་ལྔའི་བར་ལྷ་མོ། བཅུ་དྲུག་ནས་བཅུ་དགུའི་བར་ཀླུ་མོ། ཉི་ཤུ་ཕན་ཆད་རིགས་ངན་མོས་བསྡུས་པ་ཡིན་ནོ། །དེ་དག་ཀྱང་གཟུགས་བཟང་ཞིང་ཆགས་པ་ཆེ་བ། གཞན་དང་མི་འགྲོགས་ཤིང་གསང་ཐུབ་པ། སྦྱོར་ཐབས་ལ་མཁས་ཤིང་ཤེས་རབ་ཆེ་བ། སྒྲུབ་པ་པོ་ལ་གུས་ཤིང་སྙིང་ཉེ་བ། དད་བརྩོན་དང་སྙིང་རྗེ་ཆེ་བ། བདེ་བའི་རྩ་ཁྱད་པར་ཅན་ལྡན་པ་སྟེ། དེ་ལྟར་ན་ཡུམ་དེ་གསུམ་ནི་ཐུགས་གསུང་སྐུའི་ཡུམ་སྟེ་དངོས་གྲུབ་མྱུར་དུ་འཐོབ་བོ། །འདིར་ཁ་ཅིག་ལྷ་ཀླུའི་བུ་མོ་དངོས་སུ་འགུགས་པར་འདོད་པ་དང་། ཁ་ཅིག་གཟུགས་མཛེས་མི་མཛེས་བར་མ་གསུམ་ལ་འདོད་པ་དང་། ལས། ཡེ་ཤེས། ཕྱག་རྒྱ་ཆེན་པོ་གསུམ་ལ་འདོད་པ་ནི་གཞུང་གི་དགོངས་པ་མ་མཐོང་བ་སྟེ། རིམ་པ་ལྟར། རྣལ་འབྱོར་པ་ཀུན་གྱིས་བསྟེན་ཅིང་བདག་གིར་བྱ་བའི་ཡུལ་དུ་མ་གྱུར་པ་དང་། མི་མཛེས་པ་ལས་བདེ་བའི་འོས་མ་ཡིན་པ་དང་། ལས་ཀྱི་ལས་རྒྱ་དངོས་ཀྱི་རྟེན་ལ་སྦྱོར་བའི་རིམ་པར་གསུངས་པས་གནོད་དོ། །

གཉིས་པ་བྱེ་བྲག་ཏུ་བཤད་པ་ལ་དྲུག་སྟེ། པདྨ་ཅན། དུང་ཅན་མ། རི་མོ་ཅན། རི་དྭགས་ཅན་མ། གླང་པོ་ཅན། སྣ་ཚོགས་ཅན་མའོ། །དང་པོ་ལའང་གསུམ་ལས། པདྨ་ཅན་རབ་ནི་ལུས་ཧ་ཅང་རིང་བ་མ་ཡིན་ཐུང་བ་མ་ཡིན། བྱད་གཟུར་བ་མ་ཡིན་ལེབ་པ་མ་ཡིན། ཤ་རྩི་སྔོ་བ་མ་ཡིན་སེར་བ་མ་ཡིན། མཛེས་ཤིང་དཀར་ལ་དམར་ཆགས་པ་སྟེ། སྐྱེས་པ་བས་རྩ་སྣ་བདུན་ཅུ་རྩ་གཉིས་ཀྱིས་མང་བ། སྐྲ་སེར་ཞིང་ལི་བ། ལུས་ལ་ཙནྡན་གྱི་དྲི་བྲོ་ཞིང་ཁ་ནས་ཨུཏྤ་ལའི་ངད་ལྡང་བ། ལུས་རྒྱས་ཀྱང་སྐེད་པ་ཕྲ་བ། རྐང་ལག་བྱ་ལྟར་དམར་ཞིང་ཕྲ་བ། མཆུ་སྐོར་ཅུང་ཟད་ཆེ་ཞིང་མཆུ་ལ་པདྨའི་རི་མོ་ཡོད་པ། སོ་ལེགས་ཤིང་མཆུ་ལ་བུང་བ་འདུ་བ། ལྟེ་བ་ཟབ་ཅིང་པདྨའི་རི་མོ་ཡོད་པ་ས་ལའང་པདྨའི་རི་མོ་འབྲི་བ། ལྟེ་བའི་འོག་ནས་རི་མོ་འགྲེང་བུ་གསུམ་ཡོད་པ། སྨིན་མཚམས་སུ་རི་མོ་གསུམ་བསྒྲེང་བ། སྐྲ་མཚམས་(༢༠༦)དང་མུར་གོང་ནས་དར་ཐོད་ལྟ་བུའི་རི་མོ་ཡོད་པ། ལྕེ་ལ་རལ་གྲི་ལྟ་བུའི་རི་མོ་དང་། ཕྲག་གོང་ངམ་སོག་དབྲག་ན་གཡུང་དྲུང་འཁྱིལ་པ་ལྟ་བུའི་རི་མོ་ཡོད་པ། ནུ་མ་ཕྲ་ལ་འབུར་བ། བྷ་ག་རུབ་ཅིང་སྤུ་མེད་ཤ་ལྡན་མཐོན་པོ་རུས་སྦལ་གྱི་རྒྱབ་དང་འདྲ་བ་ཡོད་པ་སྟེ། བྱེད་པ་སྡུག་ཅིང་བཅོས་དཀའ་བ། མཐོང་བ་ཙམ་གྱིས་བདེ་བ་བསྐྱེད་ཅིང་། སྐད་ཐོས་པའམ་རེག་པས་རྟོག་པ་མི་རྟོག་པའི་ཡེ་ཤེས་སུ་བསྒྱུར་ཅིང་བདེ་བའི་ཏིང་ངེ་འཛིན་ངང་གིས་འཕེལ་བ་སྟེ། དེ་ལྟ་བུ་ཡོད་པའི་ཡུལ་ཕྱོགས་ཙམ་དུའང་བཀྲ་ཤིས་ཤིང་། རྣལ་འབྱོར་པའི་བདེ་བ་རྒྱས་པར་བྱེད་ལ། དེ་དང་རྩ་ཕྲད་ན་ཚེ་འདི་ཉིད་ལ་མཆོག་གི་གོ་འཕང་འཐོབ་པར་ངེས་སོ། །པདྨ་ཅན་འབྲིང་ནི་ཤ་དཀར་ཞིང་རུས་ཁྱིམ་ཆེ་ལ་ཡན་ལག་རགས་པ། སྤྱོད་ལམ་རྩིང་ཞིང་ཁོང་དལ་བ། འཇིག་རྟེན་གྱི་བྱ་བ་མཁས་ཤིང་བུ་ཚ་ཁྱེའུ་སྐྱེ་བ། གཞན་གྱིས་བཅོས་སུ་མི་བཏུབ་ཅིང་སྙིང་ཉེ་སྟེ། དེ་དང་རྩ་ཕྲད་ན་ལོ་དུས་ཚུན་ཆད་ཀྱི་འབྲས་བུ་འཐོབ་བོ། །པདྨ་ཅན་ཐ་མ་ནི་མདོག་དཀར་ཞིང་བྱད་ལེགས་ཀྱང་སྙིང་དུ་མི་སྡུག་པ། གཟུགས་འཆོས་ཤིང་བྱི་དོར་ལ་བརྩོན་པ། ཁ་ཡངས་ཤིང་གསང་མི་ཐུབ་པ། མིག་ཕྲ་ཞིང་བ་སྤུ་ཁ་ན་ཡང་བ་སྟེ། དེ་ནི་དཀར་མོ་མིག་སྒྱུ་མ་ཞེས་བྱ་བ་སྟེ་མི་བསྟེན་ནོ། །དེ་ལྟར་པདྨ་ཅན་ནི་ཀུན་ཏུ་བཟང་པོ་ཡེ་ཤེས་མཆོག་གི་ཡུམ་མོ། །གཉིས་པ་དུང་ཅན་མ་ལའང་གསུམ་ལས། རབ་ནི་མདོག་སྣུམ་ཞིང་སྐྲ་རྩེ་འཁྱིལ་པ། ཤ་སེར་ལ་རྩ་དམར་བ། སྤྱོད་ལམ་མཁས་ལ་འདུག་ཚུགས་ལེགས་པ། ཚིག་དལ་ལ་ཟུར་མིག་ལྟ་བ། ཤེས་རབ་ཆེ་ཞིང་ཟུར་ཙམ་གྱིས་གོ་བ། ཟུག་རྔུ་རྣོ་ཞིང་རྣམ་རྟོག་རགས་པ། ཤ་ལུས་སྦོམ་ཞིང་མཉེན་ལ་འབོལ་བ། སྐད་གདངས་ཆེ་ཞིང་དུང་བུས་པ་འདྲ་བ། ལྟེ་བ་ན་དུང་གཡས་སུ་འཁྱིལ་པ་ལྟ་བུའི་རི་མོ་ཡོད་པ་སྟེ། དེ་དང་རྩ་ཕྲད་ན་ཚེ་འདི་ཉིད་ལ་མཆོག་གི་གོ་འཕང་ཐོབ་བོ། །འབྲིང་ནི་རྒྱབ་ནས་བལྟས་ན་དགྱེ་བ་སྙམ་པ། མདུན་ནས་བལྟས་ན་དགུར་བ་སྙམ་པ། ལུས་མཛེས་ལ་རྡོམ་ཆུང་བ། བྲང་དགྱེ་ཞིང་ཨོལ་ཀོ་ལེགས་པ། བྱད་ཀྱི་གཟེངས་ཐུང་ཞིང་རྒྱས་པ། ཁྱིམ་དུ་བྱད་བྱིང་བྱིང་ཙུག་བྱེད་པ། ལུས་འདྲེས་ནས་སྙིང་ཉེ་ཞིང་བརྩེ་གདུང་ཆེ་བ་སྟེ། དེ་དང་ཕྲད་ན་ལོ་དང་ཟླ་བས་དངོས་གྲུབ་འགྲུབ་བོ། །ཐ་མ་ནི་ཤ་སེར་ལ་མིག་འབོར་ཆེ་བ། བློ་རྣོ་ལ་དྲན་པ་གསལ་བ། འདུག་མི་ཚུགས་ཤིང་འགྲོ་ལ་དགའ་བ། ལག་འཚུབ་ཅིང་བྱ་བྱེད་མང་བ། གཞུང་ངན་ཞིང་ཆད་ལ་མི་བཙན་པ། སྐྱེས་པ་མིག་ལ་འཚོ་ཞིང་མིག་སེར་ཆེ་བ་སྟེ། བཀྲ་མི་ཤིས་པས་མི་བསྟེན་ནོ། །དེ་ལྟར་དུང་ཅན་མ་ནི་དེ་བཞིན་གཤེགས་པའི་རིགས་ཀྱི་ཡུམ་མོ། །གསུམ་པ་རི་མོ་ཅན་ལའང་གསུམ་ལས། རབ་ནི་སྔོ་ལ་བྱད་དཀྱུས་དང་(༢༠༧)ཡན་ལག་རིང་བ། མཆུ་སྐོར་ཆེ་ཞིང་ཤ་ལུས་སྦོམ་པ། ཨོལ་ཀོ་ནས་པདྨའི་བར་དུ་གཉེར་ཆུང་ཡོད་པ། མིག་དཀྱུས་རིང་ཞིང་ལེགས་པ། སོ་རིང་ཐུང་མེད་ཅིང་མཉམ་པ། བྱད་དང་ལུས་ལ་རྨེ་བ་ཆུང་ངུ་ཡོད་ཅིང་སྐད་སྙན་པ། ཞི་དལ་ཆེ་ཞིང་སྤྱོད་ལམ་འཇམ་པ། གཟུགས་བཟང་ཞིང་ཞེ་ས་མཁས་པ། དབྱིབས་ཕྱེད་ཅིང་དཔྲལ་བར་རི་མོ་གསུམ་འགྲེང་བ། ལྷ་ཆོས་དང་མི་ཆོས་གང་ལའང་གོམས་འདྲིས་ཆེ་བ། སྐྲ་མཚམས་ན་ཐོད་བཅིངས་པ་ལྟ་བུའི་རི་མོ་གཅིག་གམ་གསུམ་ཡོད་པ་སྟེ། དེ་དང་ཕྲད་ན་ལོངས་སྤྱོད་དང་ལྡན་ཞིང་དངོས་གྲུབ་མྱུར་དུ་འཐོབ་བོ། །འབྲིང་ནི་རྟགས་དེ་དག་གི་སྟེང་དུ་དད་པ་དང་ཤེས་རབ་ཆེ་བ། གསང་ཐུབ་ཅིང་སྙིང་ཉེ་བའོ། །ཐ་མ་ནི་ཤ་རྩི་ནག་ལ་དཔྲལ་བ་སེར་བ། མིག་ཆུང་ལ་གཏིང་མིག་ཏུ་ཡོད་པ། ཁ་ཡངས་ཤིང་གཏམ་མང་བ། ཉོན་མོངས་ཆེ་ཞིང་གསང་མི་ཐུབ་པ་སྟེ་མི་བསྟེན་ནོ། །དེ་ལྟར་རི་མོ་ཅན་ནི་རིན་ཅེན་རིགས་ཀྱི་ཡུམ་མོ། །བཞི་པ་རི་དྭགས་ཅན་ནི། རི་དྭགས་ཀྱི་ལུས་འདྲ་བ་སྟེ། ཤ་རྒྱས་ཤིང་ནུ་མ་ཆེ་བ། སྨད་ཀྱི་ཤ་རྒྱས་ཤིང་བྷ་ག་རུབ་པ། དབུགས་དང་སྐྱེ་གནས་ལ་གླ་རྩི་བྲོ་བ། སྐེད་པ་ཕྲ་ཞིང་འགྲོས་དལ་བ། སྐྱེས་པ་ལ་མིག་མི་འཛུམ་པར་ལྟ་ཞིང་སྐད་སྙན་པ་སྟེ། དེ་དང་ཕྲད་ནའང་དངོས་གྲུབ་མྱུར་དུ་འཐོབ་བོ། །འདི་ཡི་འབྲིང་ནི་གཟུགས་མཛེས་ཤིང་སྐད་སྙན་པ། གུས་ཤིང་གསང་ཐུབ་པའོ། །ཐ་མ་ནི་དེ་ལས་ལྡོག་པ་སྟེ་མི་བསྟེན་ནོ། །དེ་ལྟར་རི་དྭགས་ཅན་ནི་རྡོ་རྗེའི་རིགས་ཀྱི་ཡུམ་མོ། །ལྔ་པ་གླང་པོ་ཅན་མ་རབ་ནི་མིག་དཀྱུས་རིང་ལ་སྨིན་དབྲག་ཡངས་པ། ལུས་མི་རིང་ཞིང་ཁོང་དལ་བ། གཞན་གྱི་ངག་མི་ཕྱོགས་ཤིང་སེམས་ཆུང་བ། རྣ་བ་ཆེ་ཞིང་ངོ་ཚ་ཆུང་བ། སྤྱོད་པ་རིགས་མ་རིགས་ཤེས་ཤིང་ལྷོད་ཆགས་པ། ཁ་དབང་ཆེ་ཞིང་ཤོགས་ཆེ་བ། དྲི་ཞིམ་ཞིང་ཡན་ལག་ཐུང་བ་སྟེ། དེ་ཉིད་རྩ་མང་བས་དངོས་གྲུབ་མྱུར་དུ་འགྲུབ་བོ། །འབྲིང་ནི་བྱད་སྔོ་ཞིང་གཟེངས་མཐོ་བ། ལུས་ཁྱིམ་ལེགས་ཤིང་ཤེད་ཆེ་བ། དོན་མི་འཆོར་ཞིང་བསླུར་མི་བཏུབ་པ། མདོ་ཆེ་ལ་སྤྲོ་རིང་བ་སྟེ་དཔལ་གྱི་མཚན་དང་ལྡན་པས་བསྟེན་ནོ། །ཐ་མ་ནི་རྣམ་འགྱུར་དང་གཏམ་མང་བ། རྫུན་ཆེ་ལ་ཁྲོ་འདོད་པ། དགའ་མི་དགའ་གཉིས་ཀ་སླ་བ། འདོད་ཆེ་ཞིང་སྟེར་ལ་མི་དགའ་བ་སྟེ། བྲེ་མོ་རྟ་རི་མའི་རིགས་ཞེས་བྱ་བ་ཡིན་པས་མི་བསྟེན་ནོ། །དེ་ལྟར་གླང་པོ་ཅན་ནི་པདྨའི་རིགས་ཀྱི་ཡུམ་མོ། །དྲུག་པ་སྣ་ཚོགས་ཅན་མ་རབ་ནི། གཟུགས་མཛེས་ཤིང་སྐེད་པ་ཕྲ་བ། སྐད་སྙན་ཞིང་གསང་ཐུབ་པ། ཤ་མདངས་གསལ་ཞིང་གཏིང་འཚེར་བ། ཅུང་ཟད་ཐུང་ཞིང་སྐྲ་ལི་བ། འགྲོས་མགྱོགས་ཞིང་གཏམ་བྲེལ་བ། བྱ་(༢༠༨)བཞག་མཁས་ཤིང་སྟོབས་ཆེ་བ། དཔྲལ་བ་ན་གཉེར་མ་རྡོ་རྗེ་རྒྱ་གྲམ་ལྟར་ཡོད་པ་སྟེ། དེ་དང་ཕྲད་ན་དངོས་གྲུབ་ཉེ་བའོ། །འབྲིང་ནི་དེའི་སྟེང་དུ་དད་པ་དང་ངོ་ཚ་ཤེས་ཤིང་སྤྲོ་ཐུང་བར་མངོན་པའོ། །ཐ་མ་ནི་དེ་དག་དང་མི་ལྡན་ཞིང་གོམ་པ་གྱ་ཚོམ་དུ་འདོར་བ། ཤ་རྩུབ་ཅིང་ཡན་ལག་རགས་པ། རྫུན་ཆེ་ཞིང་ཁྲོ་འདོད་པ། གཏམ་མང་ཞིང་དགོད་ཀ་ཡངས་པ། བརྟགས་ཤིང་མི་མཛེས་ལ་འཇིགས་པར་སྣང་བ། ངོ་ཚ་ཆུང་ཞིང་འཐབ་ལ་དགའ་བ། ཀུན་དང་མི་མཐུན་ཞིང་ཡིད་དུ་མི་འོང་བ་སྟེ། བཀྲ་མི་ཤིས་པས་མི་བསྟེན་ནོ། །དེ་ལྟར་སྣ་ཚོགས་ཅན་ནི་ལས་ཀྱི་རིགས་ཀྱི་ཡུམ་མོ། །མཚན་འདི་དག་ནི་ལོ་ཉི་ཤུ་མན་ཆད་དུ་གསལ་ཞིང་དེ་ནས་ཅུང་ཟད་མི་གསལ་བ་ཡིན་ནོ། །དེ་ལྟར་ལས་སུ་རུང་བའི་ཕྱག་རྒྱ་ནི། ཁྱད་པར་དུ་འཕགས་སྟེ། མཧཱ་མཱ་ཡཱ་ལས། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་སོ། །དེ་ལྟ་བུའི་ཕྱག་རྒྱ་མཚན་དང་ལྡན་པ་བཙལ་ནས། དགེ་བསྙེན་ནས་བཟུང་སྟེ། གསང་བའི་དབང་གི་བར་གྱིས་རྒྱུད་སྦྱངས་ཤིང་དག་པར་བྱས་ཏེ་གདོད་སྒྲུབ་པའི་གྲོགས་སུ་རུང་བ་ཡིན་ནོ། །ཇི་སྐད་དུ་ཧེ་བཛྲ་ལས། དང་པོར་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་ཉིད། །ཅེས་གསུངས་པ་དང་མཐུན་ནོ། །

གཉིས་པ་བརྟེན་པ་ཡེ་ཤེས་ཀྱི་རིམ་པ་ལ་གསུམ་སྟེ། སྔོན་དུ་བསྙེན་པ་བྱ་བ། སྒྲུབ་པ་དང་སྒྲུབ་པ་ཆེན་པོས་ལས་ལ་སྦྱར་བ། དངོས་གཞི་ཡེ་ཤེས་ཀྱི་དབྱེ་བའོ། །དང་པོ་ནི། རང་ཉིད་རླུང་སེམས་ལས་སུ་རུང་བས། ཉི་མ་འགར་དལ་བར་བྱ་སྟེ། བཅུད་ཅན་བཟའ་བ་དང་། བསྐུ་མཉེ་བྱ་བ་དང་། འདོད་པའི་གཏམ་དང་། བལྟ་བ་དང་། དགོད་པ་ལ་སོགས་པས་ལུས་ཀྱི་རྩ་རྣམས་བདེ་བས་རྒྱས་པར་བྱའོ། །གཉིས་པ་ནི། དེ་ནས་སྟན་བདེ་བ་ལ་ལྷའི་དཀྱིལ་འཁོར་ཡབ་ཡུམ་དུ་གསལ་བའི་མཁའ་གསང་རྡོ་རྗེ་དང་པདྨར་བྱིན་གྱིས་བརླབས་ཤིང་། དེའི་རྩེར་སངས་རྒྱས་ཀྱི་དཀྱིལ་འཁོར་བསྐྱེད་ཅིང་སྤྱན་དྲངས་པ་ལ། འཁྱུད་པ་དང་། འོ་བྱ་བ་དང་། སེན་མོ་གདབ་པ་དང་། ནུ་མ་མཉེ་བ་ལ་སོགས་པས་ཁམས་བྱང་ཆུབ་ཀྱི་སེམས་གཡོ་བར་བྱེད་པ་ནི་བསྒྲུབ་པའོ། །དེ་ནས་སྙོམས་པར་ཞུགས་པས་ཡབ་ཡུམ་གཉིས་སུ་མེད་པའི་རོལ་པ་ནི་སྒྲུབ་པ་ཆེན་པོའོ། །གསུམ་པ་ནི། དེའི་ཚེ་དྭངས་མ་སྤྱི་བོ་ནས་མགྲིན་པར་གཡོ་བ་ནི་དགའ་བའི་ཡེ་ཤེས། མགྲིན་པ་ནས་སྙིང་གར་བབས་པ་ནི་མཆོག་དགའི་ཡེ་ཤེས། སྙིང་ག་ནས་ལྟེ་བར་བབས་པ་ནི་དགའ་བྲལ་གྱི་ཡེ་ཤེས། ལྟེ་བ་ནས་གསང་བར་བབས་པ་ནི་ལྷན་ཅིག་སྐྱེས་དགའི་ཡེ་ཤེས་ཏེ། གཟུང་བ་དང་འཛིན་པའི་སྤྲོས་པ་མཐའ་དག་ཉེ་བར་ཞི་ཞིང་བསམ་(༢༠༩)གྱིས་མི་ཁྱབ་པའི་ཡེ་ཤེས་བདེ་བ་ཆེན་པོ་ནི་དགྱེས་མཉམ་མཆོག་གི་མཆོད་སྦྱིན་ཏེ། མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །ཅེས་སོ། །དེ་ནས་རྡོ་རྗེའི་ལམ་ནས་ཐིག་ལེ་དཀར་དམར་དྲངས་ཏེ། ལྟེ་བ་ནས་སྤྱི་བོའི་བར་གྱི་འཁོར་ལོ་བཞི་དང་དེའི་རྩ་འདབ་རྣམས་གང་བས་ཟག་པ་མེད་པའི་བདེ་བས་རྒྱས་ཤིང་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཀྱིས་ཁྱབ་པར་བསམ་པ་ནི་སྒྲུབ་པའི་ཉི་ཟླའི་སྙིང་པོ་དེ། དཀྱིལ་འཁོར་རྡོ་རྗེའི་ལྕེ་ཡིས་བླང་། །ཞེས་པའོ། །དེ་ནས་རྩ་རྣམས་སུ་འཁྲུལ་འཁོར་དང་། དམིགས་པ་དང་། དམིགས་པ་མེད་པའི་གནད་གསུམ་གྱིས་དགྲམ་ཞིང་། རང་བཞིན་སྤྲོས་པ་དང་བྲལ་བའི་ངང་དུ་ལ་བཟླ་བ་ནི་ཆོས་ཉིད་དོན་གྱི་ཡེ་ཤེས་ཀུན་ཏུ་བཟང་པོའི་དགོངས་པའོ། །དེའང་ཡེ་ཤེས་དང་པོས་ཞེ་སྡང་གི་རྟོག་པ་གནས་སུ་དག་པས་བདེ་བར་གསལ་ལ་རང་བཞིན་མེད་པ་མེ་ལོང་ལྟ་བུའི་ཡེ་ཤེས་སོ། །གཉིས་པ་ནི། ང་རྒྱལ་རློམ་སེམས་དག་ཅིང་ཡབ་ཡུམ་གཉིས་སུ་མེད་པས་མཉམ་པ་ཉིད་ཀྱི་ཡེ་ཤེས་སོ། །གསུམ་པ་ནི། འདོད་ཆགས་རགས་པའི་འཛིན་རྟོག་ནུབ་པས་བདེ་བའི་རང་བཞིན་སྟོང་པར་ཤེས་པ་སོ་སོར་རྟོག་པའི་ཡེ་ཤེས་སོ། །བཞི་པ་ནི། ཕྲག་དོག་དག་ཅིང་བདེ་སྟོང་གི་བྱ་བ་མཐར་ཐུག་པས་བྱ་བ་གྲུབ་པའི་ཡེ་ཤེས་སོ། །དེ་ནས་ཡས་བརྟན་གྱི་དགའ་བ་བཞི་མཐར་ཕྱིན་ཏེ། གང་དུའང་རྟོག་པ་མེད་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཏེ། སྦྱོར་བ་ཐམས་ཅད་ཡེ་ཤེས་སུ་དག་ཅིང་། ཡེ་ཤེས་བཞི་ཆོས་ཀྱི་དབྱིངས་སུ་དག་པ་ནི། ལྷ་ས་བོན་ལ་ཐིམ། ས་བོན་ནཱ་ད་ལ་ཐིམ། ནཱ་ད་བིན་དྷུ་ལ་ཐིམ། བིན་དྷུ་ཆོས་ཀྱི་དབྱིངས་སུ་ཐིམ་པ་ནི་རང་བཞིན་ལྔ་དང་སྦྱར་བ་སྟེ། དབྱིངས་དང་ཡེ་ཤེས་གཉིས་སུ་མེད་པ་ཀུན་བཟང་ཡབ་ཡུམ་གྱི་དགོངས་པ་མཐར་ཐུག་པའོ། །དེའང་ལེའུ་བཅུ་གསུམ་པར། སྙིང་པོའི་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ལས། །ཡེ་ཤེས་དགྱེས་ལ་མཆོད་པར་འབུལ། །ཞེས་པའི་དོན་འདིར་བསྟན་པ་ཡིན་ནོ། །

གཉིས་པ་གཞུང་གི་དོན་ལ་ལྔ་ལས། ཡུལ་གང་ལ་སྦྱར་བ་ནི་བཅུ་གཉིས་མ་ཐུགས་ཀྱི་གསང་ཡུམ་ལྷ༵་མོ༵་བཅུ་དྲུག་མ་གསུང་གི་གསང་ཡུམ་ཀླུ༵་མོ༵་ཉི་ཤུ་མ་སྐུའི་གསང་ཡུམ་རི༵གས་ང༵ན་མོ༵་རྣམས་ཀྱི་བཟང་ངན་དང་བྱེ་བྲག་སོ་སོར་དབྱེ༵་ནས་ངན་པ་དོར་བཟང་བ་བསྟེན་པའམ༵་ཡང༵་ན༵་མི༵་དབྱེ༵་བར༵་གང་རུང་ཡུལ་དུ་བྱེད་པའོ། །ཚུལ་ཇི་ལྟ་བུས་སྦྱར་ན་ནི་ལྷ་གཅིག་ལའང་བསྙེན་སྒྲུབ་བཞིས་བསྟེན་པ་ལྟར་འདིར་ཡང་ཕྱག་རྒྱའི་རྒྱུད་སྦྱོང་ཞིང་བྱང་ཆུབ་ཀྱི་སེམས་རྒྱས་པར་བྱེད་པས་བསྙེན༵་པ༵་དང༵་། འདུ་ཤེས་དག་པས་བལྟ་བ་དང་རེག་པ་ལ་སོགས་པ་ནི་ཉེ༵་བའི་བསྙེན༵་པ་(༢༡༠)དང༵་། ལྷར་གསལ་བས་འཁྱུད་པ་ལ་སོགས་པ་ནི་སྒྲུབ༵་པ༵་དང༵་། གཉིས་སུ་མེད་པར་རོལ་པས་འཁོར་ལོ་བཞི་ནས་གསང་བར་འབེབས་པ་ནི༵་སྒྲུབ༵་པ་ཆེ༵ན་པོའི༵་རིམ་པ་བཞིས་ཡེ་ཤེས་ལ་སྦྱོར་བའོ། །ངོ་བོ་གང་སྦྱོར་བ་ནི་དེ་ནས་ཡུམ༵་གྱི༵་པ༵དྨ༵འི་དཀྱིལ༵་འཁོར༵་དུ༵་གཉིས་སུ་མེད་པའི་བྱང་ཆུབ་ཀྱི་སེམས་ཡུངས་འབྲུ་ཙམ་གྱི་རྟེན་བསམ་པ་ལ། བདེ༵་བ༵་ཆེན་པོའི་རང་བཞིན་ཐུག༵ས་ཀྱི༵་དཀྱིལ༵་འཁོ༵ར་སངས་རྒྱས་ཀྱི་ཚོམ་བུས་བརྒྱན་པ་སྤྲོ༵་ཞིང་བསྐྱེད་ལ་ཡེ་ཤེས་པ་དབྱིངས་ནས་སྤྱན་དྲངས་ཤིང་བསྟིམ་སྟེ་བཞུགས་པའི། སངས༵་རྒྱས༵་ཀྱི་དཀྱི༵ལ་འཁོ༵ར་མ༵་ལུ༵ས་པ་ཐམས་ཅད་ལ༵། རོལ་པའི་མཆོད་པ་ཕུལ་བས། སྤྱན་དྲངས་པའི་ལྷ་དང་བདག་གི་ལུས་ཀྱི་གནས་སུ་རང་བཞིན་གྱིས་གྲུབ་པའི་དཀྱིལ་འཁོར་གྱི་ལྷ་ཐམས་ཅད་དགྱེ༵ས་པ་མཉམ༵་པའི་མཆོག༵་གི༵་སྦྱིན༵་པ་ཆེན་པོས༵་སོ་སོར་བསྟི༵མ་ཞིང་ཚིམ་པར་ཕུལ་བས་གཉིས་མེད་བདེ་བ་ཆེན་པོའི་དངོས་གྲུབ་ཐོབ་པར་བསམ་ཞིང་བྱང་ཆུབ་ཀྱི་སེམས་པདྨོར་འཁྱིལ་པ་འཛིན་པར་བྱེད་དོ། །དངོས་གྲུབ་ཇི་ལྟར་བླང་བ་ནི་དེ་ལྟར་བསྙེན་བསྒྲུབ་ཡན་ལག་བཞིས་བསྒྲུབ༵་པ་བྱས་པའི༵་མཁའ་གསང་གི་ཉི༵་མ་དང་ཟླ༵་བའི༵་སྙིང༵་པོ༵་དེ༵་རྩ་འཁོར་ལོ་བཞིའི་དཀྱི༵ལ་འཁོར༵་དུ་གསང་བ་རྡོ༵་རྗེའི༵་ལྕེ༵་ཡིས༵་བླང༵ས་ཏེ། མས་རིམ་གྱིས་དགང་ཞིང་ལུས་ཀྱི་གནས་ཐམས་ཅད་དུ་ཁྱབ་པར་དགྲམ་ཞིང་ཡེ་ཤེས་སུ་ལ་བཟླའོ། །འདི་ལ་ཁ་ཅིག་ལྷར་གསལ་བའི་ལྕེ་རྡོ་རྗེར་བསམ་པས་བླངས་ཏེ་ཁོང་དུ་འཐུང་བར་འདོད་པ་ནི་མ་ཡིན་ཏེ། སྦྱོར་བའི་དོན་མ་གོ་བ་ཡིན་ནོ། །བསྒྲུབ་པ་དེའི་འབྲས་བུ་ནི་རྫུ་འཕྲུལ་གྱིས་ནམ་མཁ༵འ་ལ་འགྲོ༵་བ་དང་མངོན་པར་ཤེས་པས་ཆོས་ཐམས་ཅད་མངོན་སུམ་དུ་གསལ༵་བར་རྟོགས་པ་དང་། ཏིང་ངེ་འཛིན་དང་ཡེ་ཤེས་ཀྱི་འོད་ཟེར་འབ༵ར་བས་ས་དང་ལམ་གྱི་ཁྱད་པར་གོང་མར་བགྲོད་པ་དང་། ཚེ༵་ཉི་ཟླ་དང་མཉམ་པས་རང་གཞན་གྱི་དོན་སྒྲུབ་ཅིང་རྡོ་རྗེའི་སྐུ་བརྙེས་པ་དང་། ལ༵་སོག༵ས་པའི་ཁོང་ནས་རལ་གྲི་དང་། མིག་སྨན་དང་། རིལ་བུ་དང་། གསེར་འགྱུར་དང་། རྐང་མགྱོགས་ལ་སོགས་པ་ཐུན་མོང་གི་གྲུབ་པ་བརྒྱད་ཐོབ་པར་བསྟན་ཏོ། །མཐར་ཐུག་ཀུན་ཏུ་བཟང་པོའི་ས་མཆོག་ཡི༵ད་བཞི༵ན་སྤྲིན༵་གྱི༵་བད༵ག་པོ༵ར་འགྱུར༵་ཞིང་སྐུ་དང་ཡེ་ཤེས་འདུ་འབྲལ་མེད་པས་འགྲོ་བའི་དོན་གཉིས་ལྷུན་གྱིས་གྲུབ་པའོ། །

གཉིས་པ་སྒྲོལ་བ་གནས་སུ་དག་པ་ཐབས་ཆེན་གསང་བའི་དཀྱིལ་འཁོར་ལ་གསུམ་ལས། གང་བསྒྲལ་བའི་ཡུལ་ནི་སྙིང་རྗེའི་ཞིང༵་དུ་གྱུར༵་པ་སྟེ། རྡོ་རྗེ་ཕུར་བ་ལས། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེ་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་པ་སྟེ། རང་ལ་ཞེ་སྡང་(༢༡༡)གི་སེམས་རང་མཚན་པ་མེད་ཅིང་སྙིང་རྗེས་འདྲོངས་པ་དགོས་སོ། །དེའང་ཞི་རྒྱས་ཀྱིས་མི་འདུལ་ཞིང་མངོན་སྤྱོད་ཀྱིས་འདུལ་བར་བྱ་བའི་སེམས་ཅན་ཏེ། མཆོག༵་མཐོ་རིས་ཀྱི་ལྷ་མི་དང༵་མཆོ༵ག་ཕྲན༵་ངན་སོང་གི་འགྲོ་བ་སྟེ་དབྱེ་ན་ཞིང་རྣམ་པ་བཅུ་པོ་རྣམས༵་སྡུག་བསྔལ་གྱི་རྒྱུ་དང་འབྲས་བུ་ལ་གནས་པས། དེ་དག་རང་རང་གི་སྡུག་བསྔལ་དེ་དང་བྲལ་བར་བྱ་བའི་ཕྱིར་བསྒྲལ་ལ། དེའང་དམ་ཚིག་གསལ་བཀྲ་ལས། དཀོན་ཅོག་སློབ་དཔོན་སྐུ་དགྲ་གཉིས། །དམ་ལས་ལོག་དང་འཁུ་བ་དང་། །འདུ་བར་འོངས་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་འདི། །རྣལ་འབྱོར་ཀུན་གྱིས་དང་དུ་བླང་། །ཞེས་སོ། །དེའང་གཞན་དོན་དུ་འགྱུར་བ། འགྱུར་བར་ཤེས་པ། སྙིང་རྗེ་ཆེན་པོ་གསུམ་ཡོད་པ་ལ་ནི། རྒྱུའི་ཐེག་པ་ལའང་མི་དགེ་བ་དང་པོ་བདུན་གནང་བའི་སྐབས་ཡོད་དེ། སེམས་དཔའ་ཆེ་ལ་མི་དགེ་བདུན་པོ་གནང་། །ཞེས་པ་དང་། མི་ནག་མདུང་ཐུང་ཅན་ལ་བྱ་བ་བཞིན་ནོ། །ཇི་ལྟར་བསྒྲལ་བའི་ཐབས་ནི་རྣལ་འབྱོར་པ་རབ་ཏིང་ངེ་འཛིན་གྱིས་སྒྲོལ་ལ། འབྲིང་ཏིང་ངེ་འཛིན་དང་སྔགས་དང་ཕྱག་རྒྱས་སྒྲོལ་ལ། ཐ་མས་དེ་དག་གི་སྟེང་དུ་འབྲུབ་ཁུང་དང་ལིངྒ་ལ་སོགས་པ་རྫས་དངོས་སུ་བསགས་ཏེ་གཟུགས་བརྙན་དང་བཅས་པས་སྒྲོལ་བ་ཡིན་པས། བཅའ་གཞི་ནི་དཀྱིལ་འཁོར་གྱི་ལྷོ་ནུབ་ཏུ་འབྲུབ་ཁུང་རོ་སོལ་གྱིས་བྱུགས་པ་ཨེ་གྲུ་གསུམ་འབར་བའི་ནང་དུ་མ་ལས་ཉི༵་མ་དང་ཨ་ལས་ཟླ༵་བ༵འི་སྟེང༵་དུ༵་ལིངྒ་མིང་རུས་དང་བཅས་པ་སྒྲོལ་བའི་ལས་ལ་མཁས༵་པའི༵་རྣལ་འབྱོར་པས༵་བཞག༵་སྟེ། ཏིང་ངེ་འཛིན་གྱིས་དགུག་གཞུག་བྱའོ། །དེའང་མཁས་ཚུལ་ལྔ་སྟེ། རང་བཞིན་གྱིས་སྒྲོལ་བའི་ལྟ་བ་ལ་མཁས་པ། ཏིང་ངེ་འཛིན་གྱིས་སྒྲོལ་བའི་སྒོམ་པ་ལ་མཁས་པ། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་ལ་མཁས་པ། ཐབས་ཆེན་གསང་བས་སྒྲོལ་བའི་གདམས་ངག་ལ་མཁས་པ། མངོན་ཕྱུང་ཟབ་མོས་སྒྲོལ་བའི་མཛད་སྤྱོད་ལ་མཁས་པའོ། །དེ་ནས་བདག་ཉིད་དཔའ་བོ་ཆེན་པོ་ཡབ་ཡུམ་གྱི་ངོ་བོར་བསྐྱེད་ལ་གདུག་པ་ཅན་བསྒྲལ་བར་བྱའོ་སྙམ་པའི་ང༵་རྒྱལ༵་དང་ལྡན་པས། ལག༵་པའི༵་སོར་མོ་བཅུ་ལ་དཔའ་བོ་འབྲུ་ལྔའམ་སྒྲོལ་གིང་བཅུའི་ས་བོན་ཧཱུྃ་བཅུ་ལས་གིང་ཕོ་བཅུར་བསྐྱེད་པའི་བར་དུ་ཟངས་གྲིའམ་ཕུར་པ་འདྲིལ་ཅིང་ལག་པའི་འདུ༵་བྱེད༵་ལིངྒའི་སྙིང་ལ་གཟིར་བས་ཤ་ཁྲག་དུམ་བུར་གཏིབས་ཏེ་སྒྲོལ་གིང་བཅུས་གཙོ་བོ་ལ་བསྟབས་ཤིང་དཀྱིལ་འཁོར་ལ་མཆོད་པར་བསྒོམ༵་མོ། །ཡང་སྒོ་གསུམ་གྱི་སྒྲིབ་པ་སྦྱངས་ཏེ། རྣམ་པར་ཤེས་པ་ཧཱུ༵ྃ་དཀར་པོ་གཅིག་ཏུ༵་གྱུར༵་པས༵་(༢༡༢)ལས་དང་བག་ཆགས་ཐམས་ཅད་རྣམ༵་པར༵་དག༵་ནས་ཧཱུྃ་དེ་ཉིད་རིམ་གྱིས་ཟླ་ཚེས་ཀྱི་དབྱིངས༵་སུ༵་ཐིམ༵་ནས་ཟླ་ཚེས་མེ་ལོང་ལྟ་བུའི་ཡེ་ཤེས་ཡོངས་སུ་གྱུར་པ༵་ལས༵། ཐུགས་ཀྱི་ཕྱག༵་རྒྱ༵་རྡོ་རྗེ་འོད་འབར༵་བ་གཅིག་ཏུ་གྱུར། དེ་ལས་རྡོ་རྗེ་སེམས་དཔའི་སྐུར༵་གྱུར༵་ཅིང་འོ༵ད་ཟེ༵ར་རབ་ཏུ་འཕྲོ༵་བས་བརྗི༵ད་པར་བསྒོམ་མོ། །དེའི་སྤྱི་གཙུག༵་ཏུ༵་འཁོར་བ་ལས་རྣམ༵་པར༵་རྒྱལ༵་བའི༵་རྟགས་སུ་ཀུན་ཏུ་བཟང་པོའི་སྐུ་ཚོན་གང་བ་གཅིག་བསྒོམ༵་སྟེ། རླུང་གི་དཀྱིལ་འཁོར་གྱི་སྟེང་དུ་ཟླ་བའི་གདན་ལ་བཞག་ནས། ཕཊ་ཀྱི་སྒྲས་འོག་མིན་དུ་འཕངས། དེ་བཞིན་གཤེགས་པའི་ཞལ་དུ་ཞུགས་ཡུམ་གྱི་མཁར་རྡོ་རྗེ་སེམས་དཔར་བསྐྱེད་དེ་དེ་བཞིན་གཤེགས་པའི་སྲས་སུ་བྱས་ནས་སེམས་ཅན་གྱི་དོན་བྱེད་པར་བསམ་མོ། །དེ་ལྟར་བསྒྲལ་བའི་ཕན་ཡོན་ནི་སྡིག་པ་ཅན་དེ་དག་ཕྱི་མ་ངན་སོང་མུ་མཐའ་མེད་པར་སྐྱེ་ངེས་མངོན་སྤྱོད་ཀྱིས་བསྒྲལ་བས་མཐོ་རིས་སུ་ཐར་པ་ཐོབ་པའི་ཐབས་འདི་ནི། ཐེག་པ་གཞན་ལས་ངོ༵་མཚ༵ར་བ་རྡོ་རྗེ་ཐེག་པའི་གསང་ཆེན་ཏེ་སྡིག་ཅན་ང༵ན་འ༵གྲོ་ལས་ཐར༵་ནས་གྲོལ་བ་ཐོབ་པའི༵་ཐབས༵་འདི་ནི་ཁྱད་པར་འཕགས་པའོ། །ཁ་ཅིག་གསོད་པ་འདི་ནི་ཞེ་སྡང་གི་ལས་ཡིན་པས་ལམ་དམ་པ་མ་ཡིན་ནོ་ཞེ་ན། དེའང་དམ་པ་རྣམས་ནི་ཞེ་སྡང་མེད་པའི་ཕན་སེམས་ཀྱིས་སྒྲོལ་པས་འགྲོ་བ་ཐར་པ་ལ་དགོད་པའི་ཕྱིར་ཉེས་པ་མེད་དེ། རིག་བྱེད་བླ་མ་ལས། གང་དུ་གདུག་པ་གདུག་སྤྱོད་པ། །དེ་ལ་ཉེས་པ་མ་མཐོང་ངོ་། །ཞེས་པ་དང་། རྣལ་འབྱོར་གྱི་རྒྱུད་དང་ངན་སོང་སྦྱོང་བ་ལས་ཀྱང་། བླ་མ་དམོད་བརྩོན་མ་རུངས་དང་། །དེ་སོགས་བྱེད་པ་ཚར་གཅོད་ན། །འགྲུབ་གྱུར་ཞེས་ནི་ཀུན་རིག་གསུངས། །ཞེས་པ་དང་། ཡང་བླ་མ་དམོད་ལ་བརྩོན་པ་དང་། །དཀོན་ཅོག་གསུམ་ལ་གནོད་པ་དང་། །སངས་རྒྱས་བསྟན་པ་འཇིག་པ་ནི། །སྔགས་མཁན་སྔགས་ཀྱིས་བསྒྲལ་བར་བྱ། །ཞེས་སོ། །

གསུམ་པ་སྦྱོར་སྒྲོལ་གྱི་ཉེས་པས་མི་གོས་པ་ཡེ་ཤེས་སྒྱུ་མའི་དཀྱིལ་འཁོར་ནི། དོན་དམ་པར་ཆོས་ཐམས་ཅད་ཀྱི་གནས་ལུགས་ཡེ༵་གདོད་མ་ནས༵་སྐྱེ༵་བ་མེ༵ད་པའི་དེ༵་བཞིན༵་ཉི༵ད་ཡིན་ཏེ། དཀོན་ཅོག་ཏ་ལ་ལའི་མདོ་ལས། ཆོས་ཀུན་མ་སྐྱེས་རྟག་ཏུ་ནམ་མཁའ་འདྲ། །ཞེས་པ་དང་། ཆོས་ཐམས་ཅད་འབྱུང་བ་མེད་པའི་མདོ་ལས། སངས་རྒྱས་ཡོད་མིན་སངས་རྒྱས་ཆོས་མེད་དེ། །ནམ་ཡང་སེམས་ཅན་མེད་པར་སུས་མཐོང་ཞིང་། །ནམ་མཁའ་འདྲ་བའི་ཆོས་ཉིད་སུས་ཤེས་པ། །དེ་ནི་མྱུར་དུ་སྐྱེས་བུ་གཙོ་བོར་འགྱུར། །ཞེས་སོ། །ཀུན་རྫོབ་སྣང་ཙམ་ཉིད་ནས་རང་བཞིན་མེད་བཞིན་དུ་རྐྱེན་གྱིས་སྣ་ཚོགས་སུ་སྣང་བའི་ཤིང་བུ་རྡེའུ་ལས་རྟ་གླང་དང་སྐྱེས་པ་བུད་མེད་ལ་སོགས་པའི་རྣམ་པར་ཤར་བའི་སྒྱུ༵་མ༵ར་སྣང༵་བ༵་དང་ངོས་གཟུང་མེད་པའི་མིག༵་ཡོར༵་གྱི་ཚུལ༵་ཏེ། ཡེ་ཤེས་སྣང་(༢༡༣)བ་རྒྱན་གྱི་མདོ་ལས། ཇི་ལྟར་སྒྱུ་མར་གྱུར་པའི་གཟུགས། །སྐྱེས་པ་མ་ཡིན་འོང་བ་མིན། །སྣ་ཚོགས་ཆོས་རྣམས་དེ་འདྲ་སྟེ། །སྐྱེས་པ་མ་ཡིན་འོང་བ་མིན། །ཞེས་སོ། །དེ་ལྟར་ཆོས་རྣམས་ཐམས་ཅད་ཡེ་ནས་དག་ཅིང་སྒྱུ་མའི་རང་བཞིན་ཡིན་པས་སྦྱོར་སྒྲོལ་ཡང་ཡེ་ནས་དག་ཅིང་སྒྱུ་མའི་རང་བཞིན་དུ་ཁོང་དུ་ཆུད་པའི་རྣལ་འབྱོར་པས། སྦྱོར༵་བ་དང་སྒྲོལ༵་བའི་བྱ༵་བ༵་ཀུན༵་བྱས༵་ཀྱང༵་བྱེད་དུས་ཉིད་ནས་ལས་གསོག་བྱེད་ཀྱི་ཉེས་པས་བསྐྱེད་པའི་སྦྱོར་སྒྲོལ་རང་མཚན་པ་རྡུལ༵་ཕྲ་རབ་ཀྱི་ཆ༵་ཙམ༵་ཡང༵་དོན་ལ་བྱས༵་པ༵་མེད༵་དེ། འཛིན་ཞེན་མེད་པའི་ཕྱིར་རོ། །དེ་སྐད་དུའང་ཡེ་ཤེས་རྒྱས་པ་ལས། ཇི་ལྟར་སྒྱུ་མའི་མཁན་པོ་དག །རང་གིས་སྤྲུལ་བའི་སྒྱུ་མ་ལ། །དགེ་དང་མི་དགེའི་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་པ་དང་། སྡུད་པ་ལས། སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཀྱང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་པ་དང་། རྣལ་འབྱོར་གྱི་རྒྱུད་ལས། སེམས་ཅན་ཐམས་ཅད་བསད་ན་ཡང་། །དེ་ལ་སྡིག་གིས་གོས་པ་མེད། །ཅེས་སོ། །དེའང་སྡིག་པ་རང་མཚན་པ་འབྱུང་བ་ལ་བདེན་ཞེན་རང་མཚན་ཡོད་པ་དགོས་ཤིང་ངོ་བོ་མ་གྲུབ་པ་དང་། འདུ་ཤེས་གཞན་དུ་གྱུར་པ་དང་། འཛིན་ཞེན་མེད་པ་སྨྱོ་བའི་གང་ཟག་གི་ཉེས་པས་ཀྱང་ལྟུང་བ་མེད་པར་བཞག་སྟེ། འདུལ་བ་མདོ་རྩ་ལས། རྨི་ལམ་ནི་མེད་པ་དང་འདྲའོ། །དེའི་འབྲས་བུ་ནི་མ་བྱས་པ་ཉིད་དོ། །ཞེས་པ་དང་། སྨྱོ་བ་དང་སེམས་འཁྲུགས་པ་ལ་ལྟུང་བ་མེད་དོ། །ཞེས་པ་དང་། ཤེས་གཙོ་འདུ་ཤེས་གཞན་དུ་གྱུར་པ་ཉིད་ནའོ། །ཞེས་པ་ལ་སོགས་པས་ཤེས་ཏེ། འདིར་ཡང་སྦྱོར་སྒྲོལ་རྨི་ལམ་ལྟར་ངོ་བོ་མེད་པར་རྟོགས་པ་དང་། འདུ་ཤེས་ལྷར་གྱུར་པ་དང་། སྨྱོན་པ་ལྟར་བདེན་ཞེན་མེད་པས་ཉེས་པ་མེད་པའོ། །

གཉིས་པ་རོལ་པ་ཚོགས་ཀྱི་དཀྱིལ་འཁོར་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གསུམ་སྟེ། མཚན་ཉིད། དབྱེ་བ། ཇི་ལྟར་བྱ་བའི་ཐབས་སོ། །

དང་པོ་ནི། ག་ན་ཙཀྲའི་སྒྲ་ལས་ཚོགས་ཀྱི་འཁོར་ལོ་སྟེ། དེའི་མཚན་ཉིད་གསང་སྔགས་ཀྱི་ཀུན་ཏུ་སྤྱོད་པའི་སྐབས་གང་ཞིག་རྟེན་དང་གང་ཟག་དང་ཡོ་བྱད་ཁྱད་པར་ཅན་ཚོགས་པ་སྟེ། ཀུན་གསལ་ལས། རྟེན་དང་གང་ཟག་ཡོ་བྱད་ཚོགས། །ཐབས་ཆེན་གསང་བས་ཚོགས་ཞེས་བྱ། །ཞེས་སོ། །

གཉིས་པ་ལ་གསུམ་སྟེ། དབྱེ་བ་དངོས་དང་། ལས་རིམ་དང་། གང་གི་དོན་དུ་བྱ་བའོ། །དང་པོ་ནི། རྡོ་རྗེ་ལས་རིམ་ལས། སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་པའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་(༢༡༤)ཚོགས་སུ་བཤད། །ལྷ་དང་དམ་ཅན་ཀུན་འདུས་པ། །འདུས་པ་ཆེན་པོའི་ཚོགས་སུ་བཤད། །ཚོགས་གཉིས་རྒྱུན་དུ་རྫོགས་བྱེད་པ། །ཚོགས་ཆེན་པོ་རུ་ངེས་པར་བརྟག །ཅེས་པས། རྣམ་པ་བཞི་སྟེ། སྐལ་ལྡན་འདུས་པའི་ཚོགས། འབྱོར་ལྡན་ཡོ་བྱད་ཀྱི་ཚོགས། དངོས་གྲུབ་ལྷའི་ཚོགས། བསོད་ནམས་ཡེ་ཤེས་ཀྱི་ཚོགས་སོ། །

དང་པོ་ནི། དམ་ཚིག་དང་ལྡན་པའི་རྣལ་འབྱོར་ཕོ་མོ་ཟུང་དུ་ཚོགས་པ་སྟེ་ཐབས་དང་ཤེས་རབ་ཀྱི་རང་བཞིན་མཚོན་པའོ། །དེའང་འདུས་པ་ཆུང་ངུའི་ཚེ་གཙོ་བོ་ཡབ་ཡུམ་ཙམ། སྐུ་གསུང་ཐུགས་ཀྱི་རང་བཞིན་ཟུང་གསུམ། རིགས་ལྔའི་མཚོན་བྱེད་ཟུང་ལྔ་སྟེ། གཉིས་དང་། དྲུག་དང་། བཅུ་ཚང་བའོ། །འདུས་པ་འབྲིང་ལ་དཀྱིལ་འཁོར་གྱི་ལྷའི་གྲངས་ཏེ་བརྒྱའོ། །འདུས་པ་ཆེན་པོ་ལ་དེ་ཡན་ཆད་རབ་ཏུ་མང་པོའོ། །དེ་སྐད་དུའང་གསང་རྒྱུད་ལས། འདུས་པ་ཆུང་ལ་གཉིས་དྲུག་བཅུ། །འབྲིང་ལ་དཀྱིལ་འཁོར་གྲངས་ཡིན་ཏེ། །ཆེན་པོ་རབ་ཏུ་མང་པོའོ། །ཞེས་སོ། །དེའང་རྣལ་འབྱོར་ཕོ་མོ་གང་རུང་མང་པོ་ཚོགས་ཀྱང་ཟུང་དུ་མ་འབྲེལ་བས་དཔའ་བོའི་དགའ་སྟོན་དང་། དཔའ་མོའི་སྟོན་མོ་ཞེས་པར་འགྱུར་རོ། །

གཉིས་པ་ནི། ཕྱི་ནང་གསང་བའི་ཡོ་བྱད་ཐམས་ཅད་ཡིན་ལ། ཁྱད་པར་དུ་ཤ་དང་ཆང་ནི་མེད་དུ་མི་རུང་བའི་ཐབས་དང་ཤེས་རབ་ཀྱི་རྫས་ཏེ་དེ་ལས། མཧཱ་མྃ་ས་བདུད་རྩིར་བཅས། །མེད་དུ་མི་རུང་དངོས་གྲུབ་རྫས། །བཟའ་བཏུང་འབྲུ་བཅུད་ཤིང་འབྲས་དང་། །འདོད་པའི་ཡོན་ཏན་ཐམས་ཅད་དོ། །ཞེས་སོ། །དེའང་གླུ་གར་དང་རོལ་མོའི་སྤྲིན་ཕུང་དུ་མས་བརྒྱན་པའོ། །

གསུམ་པ་ནི། རྟེན་དང་བརྟེན་པར་བཅས་པའི་དཀྱིལ་འཁོར་དམ་ཅན་རྒྱ་མཚོའི་ཚོགས་གཙོ་བོ་ལ་འཁོར་གྱིས་བསྐོར་བ་ཐམས་ཅད་དེ་དངོས་ཀྱི་སྐུ་དང་། མེ་ཏོག་གི་ཚོམ་བུ་ལྷར་བསྐྱེད་པ་དང་། ཏིང་ངེ་འཛིན་གྱིས་བསོད་ནམས་ཀྱི་ཞིང་དུ་སྤྱན་དྲངས་པ་ཐམས་ཅད་དོ། །

བཞི་པ་ནི། རྒྱུན་གྱི་ཚོགས་གཉིས་དང་ཁྱད་པར་དུ་ཚོགས་ཀྱི་འཁོར་ལོའི་ཚེ་ཐབས་བསྐྱེད་རིམ་དང་འབྲེལ་བའི་ཀུན་ཏུ་སྤྱོད་པ་སྣང་བཅས་ཐམས་ཅད་བསོད་ནམས་ཀྱི་ཚོགས་དང་། ཤེས་རབ་རྫོགས་རིམ་གྱིས་བསྡུས་པའི་ཟབ་མོ་སྐྱེ་མེད་དུ་རྟོགས་ཤིང་བསྒོམ་པ་རྣམས་ཡེ་ཤེས་སོ། །

གཉིས་པ་ལས་རིམ་ལ་གཉིས་ཏེ། ཞི་བ་དང་། ཁྲོ་བོའི་རིམ་པའོ། །དང་པོ་ནི། ཞི་བའི་ཚོགས་ཀྱི་ཚེ་རྣལ་འབྱོར་པ་རྣམས་ཞི་བའི་ཆ་ལུགས་དང་ཕྱག་མཚན་དང་མེ་ཏོག་ཕོག་པའི་ལྷའི་རྟགས་དང་ལྡན་པས་ཚོགས་ཁང་དུ་ཞུགས་པ་ན། གཤིན་རྗེ་གཤེད་ལ་སོགས་པའི་སྒོ་བ་བཞི་ཚོགས་ཁང་གི་སྒོ་ནས་སྡོད་པས། ལེགས་པར་འོངས་སམ་ཞེས་པའི་བརྡར་མཛུབ་མོ་གཅིག་བསྒྲེངས་པའི་ལན་དུ། འོངས་སོ་ཞེས་(༢༡༥)གཉིས་བསྒྲེངས་ཏེ་ནང་དུ་ཕྱིན་པ་ལས་ལས་ཀྱི་རྡོ་རྗེས་རིགས་གང་ཡིན་ཞེས་པའི་བརྡར། རྡོ་རྗེ་རྩེ་གསུམ་པའི་ཕྱག་རྒྱ་གདེངས་པའི་ལན་དུ། རིགས་གང་ལ་མེ་ཏོག་ཕོག་པའི་གཙོ་བོ་དེའི་ཕྱག་རྒྱ་བསྟན་ཏོ། །དེ་ནས་རྡོ་རྗེ་སློབ་དཔོན་ལ་ཕྱག་འཚལ་ཏེ། དབང་གི་རིམ་པས་བུམ་དབང་དགེ་བསྙེན། གསང་དབང་དགེ་ཚུལ། ཤེས་རབ་ཡེ་ཤེས་དགེ་སློང་། རྫོགས་པ་ཆེན་པོ་གནས་བརྟན་ཏེ། གཙོ་བོའི་ཕྱོགས་བཞི་ནས་རིགས་བཞི་གྲལ་རྐྱང་པའམ། གཡས་གཡོན་དང་གུང་ལ་རིགས་ལྔའི་དཀྱིལ་འཁོར་གྱི་གྲལ་མཚོན་པ་རྡོ་རྗེ་དང་འཁོར་ལོ་ལ་སོགས་པའི་ཕྱག་མཚན་གྲལ་མགོར་བཞག་པ་ནས་རིམ་གྱིས་འཁོད་དེ། ཆོ་ག་རྫོགས་པར་བྱེད་པ་ཡིན་ནོ། །གཉིས་པ་ཁྲོ་བོ་ལ་ཡང་ཚུལ་དེ་དང་འདྲ་བར་ཤེས་པར་བྱའོ། །ཞི་ཁྲོ་ཕྱོགས་གཅིག་པའི་ཚོགས་འཁོར་ལ་ནི་ཞི་བའི་རྣལ་འབྱོར་ཕོ་མོ་རྣམས་རྡོ་རྗེ་སློབ་དཔོན་གྱི་གཡས་གྲལ་དང་། ཁྲོ་བོ་རྣམས་གཡོན་གྲལ་ལ་འཁོད་དོ། །རྣལ་འབྱོར་ཕོ་མོ་ཡང་གྲངས་མཉམ་ན་ཤིན་ཏུ་ལེགས་སོ། །གསུམ་པ་གང་གི་དོན་དུ་བྱ་བ་ནི། ལས་བཞིའི་བྱེ་བྲག་གིས་ཤེས་པར་བྱ་སྟེ། རྣལ་འབྱོར་པ་གང་དག་དམ་ཚིག་གསོ་ཞིང་སྒྲིབ་པ་སྦྱོང་ན་ཞི་བའི་དོན་དུ་ཚོགས་ཀྱིས་བསྐངས་ཤིང་། ཚེ་དང་འབྱོར་པ་སྤེལ་ན་རྒྱས་པ། དབང་དང་དགུག་པའི་ཆེད་དུ་དབང་། བགེགས་དང་གདུག་པ་ཚར་གཅོད་པ་ལ་སོགས་པའི་དོན་དུ་དྲག་པོའི་རིམ་པ་སོ་སོའི་འདོད་དོན་བསྒྲུབ་པ་ལ་སྦྱོར་བ་ཡིན་ནོ། །

གསུམ་པ་ཇི་ལྟར་བྱ་བའི་ཐབས་ལ་ལྔ་སྟེ། དང་པོ་རྟེན་དང་ཡོ་བྱད་བཤམ་པ་ནི། གནས་དེར་མཚན་མོ་ལ་སོགས་པའི་ཚེ་ལྷའི་དཀྱིལ་འཁོར་རས་བྲིས་སམ་རྡུལ་ཚོན་ཚོམ་བུ་བཀོད་པའི་དྲུང་དུ་ཕྱི་ནང་གསང་བའི་མཆོད་པ་དང་། ཚོགས་ཀྱི་ཡོ་བྱད་ཅི་འབྱོར་པ་དང་། ནང་མཆོད་བདུད་རྩི་རིལ་བུས་བྲན་པ་རྣམས་བཤམ་མོ། །

གཉིས་པ་རྣལ་འབྱོར་ལ་གནས་པར་གསོལ་བ་གདབ་པ་ནི་རྣལ་འབྱོར་ཕོ་མོ་ཀུན་གྲལ་ལ་འཁོད་པ་ལ་ལས་ཀྱི་རྡོ་རྗེས་ཕྱག་འཚལ་ཞིང་མེ་ཏོག་གཏོར་ནས་ཕོད་ཀའི་ཕུ་དུང་པུས་མོར་བསྣོལ་ཞིང་འདུད་དེ། ཧོཿ དཔལ་ཀུན་ཏུ་བཟང་པོའི་རང་བཞིན་ཚད་མེད་པའི་ཐུགས་རྗེས་འགྲོ་བའི་དོན་ལ་བཞུགས་པ་བླ་མ་རྡོ་རྗེ་འཛིན་པ་ཆེ་གེ་མོས་གཙོ་མཛད་རྣལ་འབྱོར་གྱི་དབང་ཕྱུག་ཆེན་པོ་རྣམས་དགོངས་སུ་གསོལ། ཆོས་ཐམས་ཅད་རྫོགས་པ་ཆེན་པོའི་རང་བཞིན་དུ་གདོད་ནས་མངོན་པར་བྱང་ཆུབ་ཀྱང་། འགྲོ་བའི་ཁམས་རྣམས་མ་རིག་པའི་དབང་གིས་འཇིག་རྟེན་དྲུག་གི་ཕྱོགས་བཅུ་ཀུན་ཏུ་ཁྱབ་པ་ལ་དགོངས་ཏེ། ཐུགས་རྗེ་ཆེན་པོའི་རོལ་པས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་ཏིང་ངེ་འཛིན་ཟབ་(༢༡༦)མོས་རྣལ་འབྱོར་ལ་གནས་པར་ཞུ་འཚལ། ཞེས་དལ་བུས་བརྗོད་ནས་ཕྱག་བྱའོ། །

གསུམ་པ་ལྷའི་དཀྱིལ་འཁོར་བསྐྱེད་པ་ནི། དེ་ནས་བགེགས་ལ་གཏོར་མ་བྱིན་ནས་རྒྱ་མཚོའི་མཐར་བསྐྲད་དེ། མེ་རུ་མེ་དཔུང་མཚོན་ཆའི་ར་བ་ཁྲོ་བོ་བཅུ་དང་བཅས་པའི་མཚམས་བཅད་དེ་སྔར་བསྟན་པ་བཞིན་ལྷའི་དཀྱིལ་འཁོར་དུ་གསལ་བཏབ་ལ། མཆོད་པས་མཉེས་པའི་བར་དུ་མཉེས་པར་བྱ་སྟེ། ཚོགས་མཆོད་རྣམས་བསང་སྦྱངས་སྤེལ་བསྒྱུར་ཇི་ལྟ་བ་བཞིན་བྱའོ། །དེའང་ཐོད་པའི་སྣོད་ཡངས་ཤིང་རྒྱ་ཆེ་བར་ཤ་ལྔ་བདུད་རྩི་ལྔའི་རང་བཞིན་ལས་གྲུབ་པར་བྱིན་གྱིས་བརླབས་ཏེ་མཆོད་དོ། །

བཞི་པ་ལོངས་སྤྱོད་པ་ནི་ལག་པ་གཉིས་ཀྱི་མཐིལ་དུ་ཉི་མ་དང་ཟླ་བའི་དབུས་སུ་དཔའ་བོ་འབྲུ་ལྔ་དང་དཔའ་མོ་འབྲུ་ལྔ་ལས། ཚོགས་ཀྱི་ལྷ་ཡབ་ཡུམ་བཅུ་འདོད་ཡོན་ལྔའི་མཆོད་སྤྲིན་འགྱེད་པ་གསལ་བར་བསྐྱེད་ནས། བཟའ་བཏུང་ལ་རེག་པས་མཉེས་པར་བསམས་ལ། དེ་ནས་ཕུང་པོ་ཁམས་དང་སྐྱེ་མཆེད་ཀྱི་ལྷ་མཆོད་པར་བྱའོ། །དེ་ཡང་ལས་ཀྱི་རྡོ་རྗེས་ཕྱག་འཚལ་ཞིང་ཐབས་དང་ཤེས་རབ་ཀྱི་རྫས་པདྨའི་ཕྱག་རྒྱས་བྲིམ་ཞིང་། ཧཱུྃ། དཔའ་བོ་ཆེན་པོ་དགོངས་སུ་གསོལ། །འདི་ནི་ཆོས་རྣམས་བཟང་པོ་སྟེ། །འདུས་པ་རྣམས་ལ་ཐེ་ཚོམ་མེད། །བྲམ་ཟེ་ཁྱི་དང་གདོལ་པ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཞེས་པའི་ལན་དུ་ལེན་པ་པོས་ཀྱང་པདྨའི་ཕྱག་རྒྱས། ༀ། བདེ་བར་གཤེགས་པ་ཆོས་ཀྱི་སྐུ། །གཟུང་དང་འཛིན་པ་རྣམ་པར་སྤངས། །འདོད་ཆགས་ལ་སོགས་དྲི་མ་བྲལ། །དེ་བཞིན་ཉིད་ལ་གུས་ཕྱག་འཚལ། །ཨ་ལ་ལ་ཧོཿ ཞེས་པས་བླངས་ཏེ་ལོངས་སྤྱོད། དེའང་ཚོགས་ཀྱི་གྲལ་དུ་རྩོད་པ་དང་ཀུ་ཅོ་དང་ཐ་མལ་གྱི་སྣང་བས་བདེན་པར་ཞེན་པ་ལ་སོགས་པ་མི་བྱ་བར། ཚིམ་པ་དང་། དགའ་བ་དང་། འཛིན་ཞེན་མེད་པས། ལུས་ལྷ། ངག་སྔགས། སེམས་ཆོས་ཉིད་ཀྱི་དཀྱིལ་འཁོར་གསུམ་དུ་ཤེས་པར་བྱའོ། །

ལྔ་པ་མཇུག་གི་བྱ་བ་ནི། རྗེས་ལ་ལྷག་མའི་གཏོར་མ་བཏང་ལ། རྡོ་རྗེའི་གླུ་དང་། དཔལ་གྱི་བྲོ་དང་། བསྔོ་བ་དང་། བཀྲ་ཤིས་བརྗོད་པ་རྣམས་བྱའོ། །དེའི་ཕན་ཡོན་ཡང་། རྡོ་རྗེའི་དྲྭ་བ་ལས། བསོད་ནམས་ནང་ན་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། །ཞེས་སོ། །དེའང་རྣམ་པ་གསུམ་གྱིས་ཐེག་པ་འོག་མའི་མཆོད་སྦྱིན་ལས་འཕགས་ཏེ། ཡུལ་ལྷར་གསལ་བས་སངས་རྒྱས་ཡིན་པ་དང་། དངོས་གྲུབ་བདུད་རྩིར་གྱུར་པས་ཐ་མལ་མ་ཡིན་པ་དང་། བསམ་པ་ཆོས་ཉིད་དུ་(༢༡༧)རོལ་པས་འཛིན་ཞེན་མེད་པ་སྟེ། དེའི་ཕྱིར་ཐབས་ཀྱི་རང་བཞིན་རྡོ་རྗེའི་ཐེག་པ་ཤེས་རབ་ཁྱད་པར་ཅན་གྱིས་འཕགས་སོ། །

གཉིས་པ་གཞུང་གི་དོན་ལ་གཉིས་ཏེ། ཀུན་ཏུ་བཟང་པོའི་ཚོགས་མཆོད་མདོར་བསྟན་པ་དང་། དཀྱིལ་འཁོར་སོ་སོའི་རང་བཞིན་རྒྱས་པར་བཤད་པའོ། །

དང་པོ་ལ་གསུམ་ལས། རང་བཞིན་ཤེས་པར་བྱ་བ་ནི་དག་པ་གསུམ་དང་མཉམ་པ་བཞིས་ཆོས་ཐམས་ཅད་ཡེ་ནས་སངས་རྒྱས་པ་ཀུན་ཏུ་བཟང་པོའི་ཞིང་དུ་མཚོན་པ་སྟེ། དེའང་ཕྱི་སྣོད༵་ཀྱི་འཇིག་རྟེན་འབྱུང་བ་ལྔའི་ངོ་བོ་ཡུམ་ལྔའི་རང་བཞིན་དུ་དག་ཅིང་། ནང་བཅུད༵་ཀྱི་སེམས་ཅན་ཕུང་པོ་ལྔས་བསྡུས་པ་ཡབ་ལྔར་དག་ལ། རང་རང་གི་རྒྱུད༵་ཀྱི་དབང་པོ་རྣམ་པར་ཤེས་པ་དང་དེ་དག་གི་ཡུལ་རྣམས་སེམས་དཔའ་དང་སེམས་མ་དང་སྒོ་བ་ཡབ་ཡུམ་དུ་དག་པའོ། །ཡང་སྣོད་གཞལ་ཁང་། བཅུད་ལྷ་དང་ལྷ་མོ། རང་གི་རྒྱུད་ཡེ་ཤེས་ལྔའི་རང་བཞིན་དཀྱིལ་འཁོར་ཆེན་པོར་གནས་པ་རྣམ༵ས་ཡེ་ནས་སངས་རྒྱས་པའི་རང་བཞིན་དུ་རྣམ་པར་དག༵་པར་རྟོག༵ས་ཤི༵ང་། སྣང་སྲིད་འཁོར་འདས་ཀྱི་ཆོས་ཐམས་ཅད་དོན་དམ་པར་མ་སྐྱེས་པར་མཉམ་ཞིང་ཀུན་རྫོབ་ཏུ་སྒྱུ་མ་ལྟ་བུར་མཉམ༵་པ་གཉིས༵་དང་། ཕུང་པོ་ལྔ་སངས་རྒྱས་སུ་མཉམ་པ་དང་། རྣམ་ཤེས་བརྒྱད་ཡེ་ཤེས་སུ་མཉམ་པ་སྟེ། ལྷག༵་པའི༵་མཉམ༵་པ་གཉིས༵་ཀྱིས༵་ཆོས་ཐམས་ཅད་ལ་བཟང་ངན་བླང་དོར་མེད་པའི་དཀྱིལ༵་འཁོ༵ར་ཏེ། ཆོས་ཉིད་དོན་གྱི་གནས་ལུགས་ཇི་ལྟར་ཤར་ཞིང་སྣང་བ་དེ་དག་རང་བཞིན་ཀུན༵་ཏུ༵་བཟ༵ང་པོ༵འི་ཞིང༵་ཁམས་རྒྱ་ཆད་ཕྱོགས་ལྷུང་མེད་པས་འཁོར་འདས་ཀུན་ལ་ཁྱབ་པ་སྟེ། ཀུན་བྱེད་ལས། ཀྱེ། དཀྱིལ་ནི་མ་ནོར་དོན་གྱི་སྙིང་པོ་སྟེ། །འཁོར་ནི་འཁོར་འདས་བརྡལ་བ་ཡོངས་ལ་ཁྱབ། །ཅེས་སོ། །གང་གིས་ཤེས་པར་བྱ་བ་ནི། དེ་ལྟར་རྫོགས་པ་ཆེན་པོའི་རང་བཞིན་དུ་རྟོགས་པས་ཆོས་ཉིད་དོན་གྱི་དཀྱིལ་འཁོར་ལ་དབང་ཐོབ་པའི་ཚེ་སྒོ་གསུམ་གྱི་བྱེད༵་སྤྱོད༵་ཅི་བྱས་ཀྱང་བསོད་ནམས་དང་ཡེ་ཤེས་ཀྱི་ཚོགས་ཆེ༵ན་པོ་གཉིས༵་ངམ་ངམ་ཤུགས་ཀྱིས་རྫོགས་པར་གྱུར༵་ན༵ས་ཅི་སྣང་ཡེ་ཤེས་སུ་འཆར་བ་སྟེ། ནམ་མཁའ་ཆེ་ལས། ཆོས་ཀུན་སྐྱེ་མེད་ལྷུན་རྫོགས་ཤིང་། །ཡེ་ནས་གྲོལ་བར་རྟོགས་པ་ན། །ཀུན་སྤྱོད་བསྐྱེད་རྫོགས་ལྷུན་གྱིས་གྲུབ། །མ་བྱས་རང་བཞིན་རྫོགས་པར་སྣང་། །ཞེས་སོ། །དེའང་སྔར་སྨོས་པ་བཞིན་སྔགས་ཀྱི་ཡ༵ན་ལ༵ག་ལྔ་མ༵་ཉམ༵ས་ཤིང་ཡོ༵་བྱད༵་ལྔ་དང་ལྡན༵་པ་དང་ཆོ༵་ག༵་ལྔ་པོ་རྫོག༵ས་པ༵ར་ཤེ༵ས་པ༵་ཡི༵་རྣ༵ལ་འབྱོར༵་པས་དུས་ཁྱད་པར་ཅན་ལ་སོགས་པར་དུར་ཁྲོད་ལ་སོགས་པའི་གནས་སུ་རྟེན་གང་ཟག་ཚོག༵ས་ཀྱི་ཡོ་བྱད་རྣམས་ཡོངས་སུ་ཚོགས་པ༵འི་དཀྱིལ༵་འཁོ༵ར་གྱིས༵་མཉེས་པར་བྱས་ཏེ། བསྒྲུབས་ན་འབྲས་བུ་ནི་གནས་སྐབས་རིག་འཛིན་གསུམ་དང་འཕྲིན་ལས་བཞི་མཐར་ཐུག་ངེས༵་པར༵་ལེགས༵་པའི༵་དགོས༵་པ༵་བྱང་ཆུབ་འགྲུ༵བ་པར་འགྱུར་རོ། །

གཉིས་པ་དཀྱིལ་འཁོར་སོ་སོའི་རང་བཞིན་རྒྱས་པར་བཤད་པ་ལ་གཉིས་ཏེ། རྟེན་དཀྱིལ་འཁོར་གྱི་རང་བཞིན་དང་། དེ་ཇི་ལྟར་བསྒྲུབ་པའི་རིམ་པའོ། །དང་པོ་ལ་གཉིས་ཏེ། ཞི་བའི་དཀྱིལ་འཁོར་དང་། ཁྲོ་བོའི་(༢༡༨)དཀྱིལ་འཁོར་རོ། །དང་པོ་ལ་གསུམ་སྟེ། ཚོམ་བུ་ལྔ་པ། གསུམ་པ། གཅིག་པའི་དཀྱིལ་འཁོར་རོ། །

དང་པོ་ནི། རིགས་ལྔ༵་དང༵་རིགས་ལྔའི་ཞིང་ཡུམ་ལྔ་དང་གཉིས་སུ་མེད་པར་སྦྱོར༵་བ༵་ལས༵་ཚོམ༵་བུ༵་ལྔ༵་ཡི༵་ལྷ༵་ཡབ་ཡུམ་རྩ་བ་ལྔ་ལས་ཡབ་ཡུམ་བཅུ། རིགས་བཞི་པོ་རེ་རེའང་བཅུ་བཅུ་སྟེ། ལྔ་བཅུ་བཀོ༵ད་ལ༵་ཕྱི་རོལ་ཏུ་བསྲུང་བའི་འཁོར་ལོ་ཁོག་པ་སྟོང་པ་ཕྱོགས་མཚམས་བརྒྱད་སྟེང་འོག་གཉིས་ཏེ་རྩིབས་བཅུ་ལ་ཧཱུྃ་ཀ་ར་ལ་སོགས་པའི་ཁྲོ༵་བོ༵་བཅུ༵་དང༵་། རྡོ་རྗེ་སྒྲ་འབྱིན་མ་ལ་སོགས་པ་ཁྲོ༵་མོ༵་བ༵ཅུ་བར་ཆད་བསྲུང་བའི་འཁོ༵ར་ལོ༵འི་ཚུལ༵་དུ༵་རྣམ༵་པ༵ར་བསྒོ༵མ་པར་བྱའོ། །དེའང་དབུས་སུ་གཙོ་བོ་ཡབ་ཡུམ་ཀུན་ཏུ་བཟང་པོའི་རང་བཞིན་ལ། སེམས་དཔའ་རྡོ་རྗེ། རིན་ཅེན་རྡོ་རྗེ། ཆོས་ཀྱི་རྡོ་རྗེ། ལས་ཀྱི་རྡོ་རྗེ་བཞིའི་ཡུམ། བརྟན་མ་རྡོ་རྗེ། འབར་མ་རྡོ་རྗེ། སྡུད་མ་རྡོ་རྗེ། བསྐྱོད་མ་རྡོ་རྗེ་སྟེ་ཡབ་ཡུམ་བཅུའོ། །ཤར་དུ་མི་བསྐྱོད་པ་ཡབ་ཡུམ་ལ། རྡོ་རྗེ་སེམས་དཔའ། རྡོ་རྗེ་རྒྱལ་པོ། རྡོ་རྗེ་ཆགས་པ། རྡོ་རྗེ་ལེགས་པ་བཞིའི་ཡུམ། སྒེག་མོ། བདུག་པ། ལྕགས་ཀྱུ། རྡོ་རྗེ་སྒྲོལ་མའོ། །ལྷོར་རིན་ཅེན་འབྱུང་ལྡན་ཡབ་ཡུམ་ལ། རྡོ་རྗེ་རིན་ཅེན། རྡོ་རྗེ་གཟི་བརྗིད། རྡོ་རྗེ་རྒྱལ་མཚན། རྡོ་རྗེ་བཞད་པ་བཞིའི་ཡུམ། ཕྲེང་མ། མེ་ཏོག་མ། ཞགས་པ་མ། རྡོ་རྗེ་བདེ་མའོ། །ནུབ་ཏུ་འོད་དཔག་མེད་ཡབ་ཡུམ་ལ། རྡོ་རྗེ་ཆོས། རྡོ་རྗེ་རྣོན་པོ། རྡོ་རྗེ་འཁོར་ལོ། རྡོ་རྗེ་སྨྲ་བ་བཞིའི་ཡུམ། གླུ་མ། མར་མེ། ལྕགས་སྒྲོག་མ། རྡོ་རྗེ་གསལ་བཀྲ་མའོ། །བྱང་དུ་དོན་ཡོད་གྲུབ་པ་ཡབ་ཡུམ་ལ། རྡོ་རྗེ་ལས། རྡོ་རྗེ་བསྲུང་བ། རྡོ་རྗེ་གནོད་སྦྱིན། རྡོ་རྗེ་ཁུ་ཚུར་བཞིའི་ཡུམ། གར་མ། དྲི་ཆབ་མ། དྲིལ་བུ་མ། རྡོ་རྗེ་འབེབས་མའོ། །དེ་ལྟར་ལྔ་བཅུའི་ཕྱི་རོལ་ཏུ་ཁྲོ་བོ་བཅུ་ཡབ་ཡུམ་དང་བཅས་པས་ལྷ་བདུན་ཅུ་ནི་ཚོམ་བུ་ལྔ་པའོ། །སྤྱིར་ན་ཚོམ་བུ་ནི་སྒོ་དང་རྟ་བབས་ལ་སོགས་པ་གཞལ་མེད་ཁང་གི་རྣམ་པར་མེད་པའི་ལྷའི་གཙོ་འཁོར་ཡིན་ལ། དཀྱིལ་འཁོར་ནི་གཞལ་མེད་ཁང་དང་བཅས་པར་འདོད་ཀྱང་། འདིར་ལྷ་དེ་དག་སྐོར་ཚོམས་སུ་འདུག་པའི་ཆ་ནས་བཏགས་པ་ཡིན་ནོ། །

གཉིས་པ་ཚོམ་བུ་གསུམ་པའི་དཀྱིལ་འཁོར་ནི། དེ༵་བཞིན༵་གཤེགས་པའི་རིག༵ས་དང༵་རྡོ༵་རྗེའི༵་རིག༵ས་དང་པདྨ༵འི༵་རིག༵ས་ཏེ༵་རེ་རེའང་ཡབ་ཡུམ་བཅུ་བཅུའི་རང་བཞིན་སྐུ༵་གསུང༵་ཐུག༵ས་ཀྱི་ལྷ་སུམ་ཅུའི་དཀྱིལ་འཁོར་གྱི་མཐར་ཁྲོ༵་བོ༵འི་ཚོ༵གས་ཏེ་སྒོ་བ་ཡབ་ཡུམ་བརྒྱད་དང༵་ལྡན༵་པ༵་ཡི༵་ཚོམ༵་བུ༵་གསུམ༵་གྱི༵་ལྷ༵་རྣམས༵་བསྒོ༵མ་པར་བྱའོ། །

གསུམ་པ་ཚོམ་བུ་གཅིག་པའི་དཀྱིལ་འཁོར་ནི། རིག༵ས་ཐམས་ཅད༵་ཀྱི་ནང་ནས་དེ་བཞིན་ཉིད་ཀུན་ཏུ་བཟང་པོའི་རིག༵ས་ཏེ༵་རིགས༵་ལྔའི་དཀྱིལ་འཁོར་གྱི༵་གཙོ༵་བོ་རྣམ་པར་སྣང་མཛད་ཀྱི་རང་བཞིན་ནི། དེ་བཞིན་གཤེགས་པའི་དཀྱིལ་འཁོར་རིགས་ལྔར་ཕྱེ་བའི་ཐུགས་ཀྱི་ཐུགས་ཏེ་གཙོ་བོ་རྣམ་སྣང་མཐིང་གས་བརྒྱན་པ་ནི་ཐུག༵ས་ཀྱི༵་མཆོ༵ག །ལྷ་བཅུའི་དཀྱིལ་འཁོར་གྱི་མཐར་སྒོ་བ་ཡབ་ཡུམ་བརྒྱད་ཀྱི་ཁྲོ༵་བོའི༵་ཚོགས༵་དང༵་ལྡ༵ན་པ༵་ཡི༵་ཚོ༵མ་བུ༵་གཅིག༵་པའི༵་ལྷ༵་བཅོ་བརྒྱད་པོ་(༢༡༩)རྣམ༵ས་བསྒོམ༵་པར་བྱའོ། །

གཉིས་པ་ཁྲོ་བོའི་དཀྱིལ་འཁོར་ནི། ཁྲོ༵་བོ༵་ལྔ་དང་ཁྲོ༵་མོ༵་ཀྲོ་དྷཱི་ཤྭ་རི་ལྔའི༵་ཚོག༵ས་ཆེན༵་པོ༵་སྟེ་ཡབ་ཡུམ་བཅུ་དང་། དེ་དག་གི་བྱ་བ་བསྒྲུབ་པའི་ཕོ༵་ཉ༵་གནས་ཀྱི་མ་མོ་བརྒྱད་དང་། ཕྱག༵་བརྙ༵ན་ཡུལ་གྱི་ཕྲ་མེན་བརྒྱད་དང་། བཀ༵འ་ཉན༵་ཡེ་ཤེས་ཀྱི་སྒོ་མ་བཞི་དང༵་། ཅི༵་བགྱི༵འི་ལས་བྱེད་དབང་ཕྱུག་མ་ཉི་ཤུ་རྩ་བརྒྱད་ལ༵་སོག༵ས་པ་ཁྲག་འཐུང་ལྔ་བཅུ་རྩ་བརྒྱད་ཀྱི་ཚོག༵ས་རྣམ༵ས་ཀྱིས༵་འབར་བའི་དཀྱིལ་འཁོར་དུ་ཚོགས་སྒྲུབ་ནའང་། གནས་སྐབས་སུ་གདུག་པ་ཅན་ཚར་གཅོད་པ་ལ་སོགས་པ་དྲག་པོའི་ལས་རྣམས་དང་། མཐར་ཐུག་ངེས་པར་ལེགས་པའི་དགོངས་པ་མཆོག་གི་དངོས་གྲུབ་འགྲུབ་བོ། །

གཉིས་པ་དེ་ཉིད་ཇི་ལྟར་བསྒྲུབ་པའི་རིམ་པ་ལ་བཞི་སྟེ། ཚོམ་བུ་གཅིག་པ། གསུམ་པ། ལྔ་པ། རྡོ་རྗེའི་དབྱིངས་ཀྱི་དཀྱིལ་འཁོར་ཇི་ལྟར་བསྒྲུབ་པའོ། །

དང་པོ་ལའང་གཉིས་ལས། གང་ཟག་གང་གིས་བསྒྲུབ་པ་ནི་སེམས་ཉིད་རྣལ༵་མའི་དོན་ལ་བློ་ཆོས་ཉིད་དུ་འབྱོར༵་པ་སྟེ། དབྱེ་ན། གཞི་རང་བཞིན་གྱི་རྣལ་འབྱོར། ལམ་བསྐྱེད་རྫོགས་ཀྱི་རྣལ་འབྱོར། འབྲས་བུ་ལྷུན་གྲུབ་ཀྱི་རྣལ་འབྱོར་གསུམ་ལས། ལམ་མོ། །དེའང་རིམ་གཉིས་ལས། གཞི་དང་རང་བཞིན་འབྲས་བུའི་ཚུལ། །བསྐྱེད་དང་རྫོགས་པའི་རྣལ་འབྱོར་པས། །ཞེས་པ་དང་། དབུ་མ་ལས། སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་བསྒྲུབ་པ་ཁ་ཅིག་ལའོ། །ཞེས་སོ། །དེ་བཞིན་གཤེགས་པའི་གསང་བ་ཟབ་མོ་རྨད་དུ་བྱུང་བའི་སྔག༵ས་ཀྱི་ཚིག་དོན་འཆང༵་བར་བྱེད་པའོ། །དེའང་མནྟྲའི་སྒྲ་ལས་སྔགས་ཏེ། གསང་སྔགས། རིག་སྔགས། གཟུངས་སྔགས་གསུམ་གྱི་རང་བཞིན་འཆང་བའོ། །དང་པོ་ནི། ཕྱི་ནང་གི་ལྟ་སྒོམ་སྤྱོད་འབྲས་གསང་བ་རྨད་དུ་བྱུང་བས་འཁོར་བའི་སྡུག་བསྔལ་ལས་སྐྱོབ་པར་བྱེད་པའོ། །གཉིས་པ་ནི། དྲང་སྲོང་ལ་སོགས་པ་ཏིང་ངེ་འཛིན་ལ་དབང་ཐོབ་པའི་རིག་པའི་མཐུས་སྡུག་བསྔལ་ལས་སྐྱོབ་པའོ། །གསུམ་པ་ནི། བདེན་ཚིག་བགོས་པའི་ཚིག་འབྲས་བུ་ཕན་གནོད་བྱེད་པའོ། །དེ་ལྟ་བུའི་དོན་གྱིས་བསྒྲུབ་པར་བྱ་བའི་དངོ༵ས་གྲུབ༵་ནི༵་མཆོག་དང་ཐུན་མོང་གི་ཡོན་ཏན་ཕུན་སུམ་ཚོགས་པ་སྟེ། དེ་ཉིད་ཆོས་ཐམས་ཅད་ཡེ་ནས་མཉམ༵་པ་ཉིད་རང་བཞིན་རྫོག༵ས་པ་ཆེན་པོའི་ངང་དུ་ལྷུན༵་གྱིས་གྲུབ༵་ཅིང་དབྱེར་མེད་པ་ཕྱོགས་བྲལ་འཛིན་ཞེན་མེད་པའི་ངང༵་དུ་གནས༵་ཤིང༵་། བླང་དོར་མེད་པར་སྤྱོད༵་པས༵་ཅི༵་ལ༵འང་ཐོག༵ས་ཆགས་དང་ཞེན་པ་མེད༵་པའི༵་རང་བཞིན་ཆོས་ཐམ༵ས་ཅད༵་ཡེ༵་ནས༵་ངོ་བོ་གཅིག་ཅིང་དབྱེར༵་མེད༵་པར་རྟོགས་པའི་རྣལ་འབྱོར་པས་བསྒྲུབ་པ༵འོ༵། །དཀྱིལ་འཁོར་གང་བསྒྲུབ་པ་ནི་ཐུགས་རྡོ༵་རྗེ༵འི་རིག༵ས་སུ༵་རིགས་ཐམས༵་ཅད༵་ཀྱི་དཀྱི༵ལ་འཁོར་འདུས་པས། ལྷ་དང་གཞལ་ཡས་ཁང་པ་ཐམས་ཅད་ཡེ་ཤེས་ཀྱི་འོད༵་ཟེར་འཕྲོ༵་ཞིང་གཟི་བརྗིད་འབར༵་བར༵་རབ༵་ཏུ༵་བསྒོམ༵་ཞིང་། འདོད་ཡོན་ཐམས་ཅད་ལ་ཞེན་ཆགས༵་མེད༵་པ་ལྷ་ལ་ལྷ་མཆོད་ཚུལ༵་གྱིས༵་རོལ་ཞིང་བསྟིམ༵་པར༵་བྱ༵འོ། །དེའི་འབྲས་བུ་སེམས་ཉིད་གཉི༵ས་སུ་མེ༵ད་(༢༢༠)པའི་ཆོས་སྐུར་གྱུ༵ར་ནས༵་ལྷུན་གྱིས་གྲུབ་པའི་ཕྱག༵་རྒྱ༵་ཆེན༵་པོའི་གོ་འཕང་འཐོབ་བོ། །

གཉིས་པ་ཚོམ་བུ་གསུམ་པ་ནི། སྔ་མ་ལས་གཞན་ཡང༵་ན༵་སྐུ༵་མི་བསྐྱོད་པ་གསུང༵་འོད་དཔག་མེད་ཐུག༵ས་རྣམ་པར་སྣང་མཛད་ཀྱི་དཀྱིལ་འཁོར་ཉིད༵་བསྒྲུབ་པར་བྱ་སྟེ༵། སངས་རྒྱས་ཐམ༵ས་ཅད༵་ཀྱི་དཀྱིལ་འཁོར་མ༵་ལུས༵་པ་བསྡུ་ན་སྐུ༵་གསུང༵་ཐུག༵ས་ཀྱི་དཀྱིལ་འཁོར་དུ་འདུས་པའི་ཕྱིར་རོ། །དེ་བསྒྲུབ་པའི་བསྐྱེད་རྫོགས་ཀྱི་ཏིང༵་ངེ་འཛི༵ན་ཡང་ལྷའི་རྣམ་པར་གསལ༵་ཞིང་མཚན་དང་དཔེ་བྱད་དུ་འབ༵ར་བའི་འོད༵་ཟེ༵ར་འཕྲོ༵་བས་སེམས་ཅན་གྱི་དོན་བྱེད་པར་བསྒོམ་པའོ། །འདོད་ཡོན་ཐམས་ཅད་ཡུམ་དུ་བསམ་པ་ཡབ་ཀྱིས་རོལ་པས་གཉིས༵་སུ་མེད༵་པའི་ཆོས་དབྱིང༵ས་སྤྲོས་པ་དང་བྲལ་བའི་རང་བཞིན་གྱི༵་ང༵ང་དུ༵་ཐི༵མ་པ༵ར་བསམ་མོ། །འབྲས་བུ་ལྷུན་གྱིས་གྲུབ་པའི་རིག༵་འཛིན༵་གྱི་དངོས༵་གྲུབ༵་མཆོག༵་ཐོབ༵་པར་འགྱུར༵་རོ། །དེ་ལས་གདུལ་བྱའི་དོན་དུ་ལྷའི་དཀྱི༵ལ་འཁོ༵ར་མ༵་ལུས༵་པ་ཡོན་ཏན་གྱི་དཔལ་འབར༵་བ༵་འགྲུབ༵་ཅིང་། སེམས་ཅན་ཉོན༵་མོ༵ངས་པའི་སྡུག༵་བསྔ༵ལ་མ་ལུས་པ་སེ༵ལ་བ༵ར་མཛ༵ད་ནས། སེམས་ཅན་དེ་དག་རྡོ༵་རྗེའི༵་རིག༵ས་སུ༵་སྐྱེ༵་བ༵འི་གན༵ས་ལ་འགོད་པའི་འཕྲིན་ལས་བྱེད་དོ། །

གསུམ་པ་ཚོམ་བུ་ལྔ་པ་ལ་ཡང་གཉིས་ལས། གང་ཟག་གང་གིས་ཚུལ་ཇི་ལྟ་བུས་བསྒྲུབ་པའི་ཚུལ་ནི། སྔག༵ས་འཆང༵་བའི་རྣལ་འབྱོར་པས་དངོ༵ས་གྲུབ༵་ཡང༵་དག༵་པ་ནི༵་རྒྱུད་ལ་ཐོབ་པར་བྱ་བའི་ཕྱིར། ཡབ་ཡུམ་ཐབ༵ས་དང༵་ཤེ༵ས་རབ༵་ཏུ་གསལ་ཞིང་ཏིང་ངེ་འཛིན་གསུམ་ལ་སོགས་པའི་ཆོ་ག་ཐམ༵ས་ཅ༵ད་ཀྱི༵་ཚོམ་བུའི་དཀྱི༵ལ་འཁོ༵ར་ལྔ༵་དང༵་ཕྱི་རོལ་ཏུ་ཁྲོ༵་ཕྲེ༵ང་བསྒོ༵མ་མོ། །འདོད་ཡོན་ལ་ཆག༵ས་པ༵་མེ༵ད་པ༵འི་ཚུལ༵་གྱིས༵་ནི༵་ལྷ་ལ་ལྷ་ཐིམ་པའི་ཚུལ༵་གྱིས༵་མཆོད་བྱ་མཆོད་བྱེད་གཉི༵ས་སུ༵་འཛིན་ཞེན་མེ༵ད་པ༵ར་བསྟིམ༵་པ༵ར་བྱའོ༵། །འབྲས་བུ་དངོ༵ས་གྲུབ༵་མཆོ༵ག་གི༵་སྙིང༵་པོ༵་ལྷུན་གྱིས་གྲུབ་པའི་རིག་འཛིན་འགྲུ༵བ་བོ། །དེའང་ཁ་ཅིག་ཚོམ་བུ་གཅིག་པས་ཕྱག་རྒྱ་དང་། གསུམ་པས་ཚེས་དབང་དང་། ལྔ་པས་ལྷུན་གྱིས་གྲུབ་པའི་རིག་འཛིན་སོ་སོར་འགྲུབ་པར་འདོད་པ་ནི་མ་འབྲེལ་ཏེ། ཚོམ་བུ་རེ་རེས་ཀྱང་གནས་སྐབས་སུ་རིག་འཛིན་གསུམ་དང་མཐར་ཐུག་ལྷུན་གྱིས་གྲུབ་པའི་རིག་འཛིན་འགྲུབ་པའི་ཕྱིར་རོ། །

བཞི་པ་རྡོ་རྗེ་དབྱིངས་ཀྱི་དཀྱིལ་འཁོར་བསྒྲུབ་པ་ལའང་གཉིས་ལས། གང་ཟག་གང་གིས་ཇི་ལྟར་བསྒྲུབ་པ་ནི། རྣལ༵་འབྱོ༵ར་པ་ཡབ་ཐབ༵ས་དང༵་ཡུམ་ཤེས༵་རབ༵་ཀྱི་རང་བཞིན་གྱིས༵། དེ༵་བཞི༵ན་གཤེག༵ས་པ་ལྔ་དང༵་ལྔའི་ཡུ༵མ་དུ༵་བསྒོམ༵་ཞིང་དབང་པོ་དང་རྟོག་ཚོགས་སེ༵མས་དཔའ༵་དང་སེམས༵་མ༵་སྒོ་བ་ཡབ་ཡུམ་དང་བཅས་པ་ཉིད༵་དུ༵་བསྒོམ༵་པར་བྱའོ། །ལྷ་དེ་དག་ཀྱང་འོ༵ད་ཟེར༵་གྱི་ཚོགས་རྣམ༵་པ༵་མ༵ང་པོ༵་ཕྱོགས་བཅུར་འཕྲོ༵་བའོ། །(༢༢༡)འགྲེལ་པ་སྤར་ཁབ་ལས་འདི་སྒྱུ་འཕྲུལ་བསྡུས་པ་ལྷ་བཅོ་བརྒྱད་ཀྱི་དཀྱིལ་འཁོར་ཡིན་ནོ་ཟེར་བའང་མི་འགལ་མོད་ཀྱི། གཞུང་དུ་རྒྱལ་བ་བཞི་བཅུ་རྩ་གཉིས་ཀྱི་དཀྱིལ་འཁོར་དུ་གསལ་ལོ། །

གསུམ་པ་གང་སྒྲུབ་ཐབས་ཀྱི་ཡན་ལག་ལ་གསུམ་ལས། གང་བསྒྲུབ་པ་ཏིང་ངེ་འཛིན་གྱི་ཡན་ལག་ནི། ཆོས་ཐམས་ཅད་དཀྱིལ་འཁོར་དུ་སྒྲུབ་པའི་ཚེ་ཕྱི་ནང་གི་ལུས་དང་ལོངས་སྤྱོད་ལ་སོགས་པ་སྤྱད་པར་བྱ་བའི་ཡུལ་དང་། སྤྱོད་བྱེད་བདག་ཉིད་དཀྱིལ་འཁོར་གྱིས་རོལ་པས་སོ༵་སོ༵འི་སྔགས༵་དང༵་ཕྱག༵་རྒྱ༵་དང༵་ཏིང༵་ངེ་འཛིན༵་གྱི་རྣམ་པ་སྐབས་སུ་གང་བབ་པ་རྣམས་ཕྱིན་ཅི་མ་ལོག་པ་ཡང༵་དག༵་པར་སོ༵་སོར༵་གས༵ལ་ཞིང་མ་འདྲེས་པར་ཤེས་པར་བྱའོ། །ཇི་ལྟར་བསྒྲུབ་པ་མཐུན་པའི་ཡན་ལག་ནི་སྒྲུབ་པའི་གནས༵་མཚན་ཉིད་ཚང་ཞིང་བར་ཆད་མེད་པ་དང༵་ཉེ་བར་མཁོ་བའི་ལོ༵ངས་སྤྱོད༵་མཐའ་གཉིས་སུ་མ་ལྷུང་ཞིང་ཅི༵་བདེ༵་བར་ཡོད་པ་དང༵་། དེས་མཚོན་ནས་སྒྲུབ་པའི་གྲོགས་སུ་འགྱུར་བའི་ཡོ་བྱད་དང་རྟེན་དང་དམ་རྫས་ལ་སོགས་པ་མཐུན་པའི་རྐྱེན་རྣམས་མ༵་ཉམ༵ས་པར་ཚང་ཞིང་འགལ་རྐྱེན་མེད་ལ། སྒྲུབ་པའི་བློ༵་ནི༵། རྐྱེན་གཞན་གྱིས་མི་འཕྲོག་ཅིང་མཐའ་གཅིག་ཏུ་ཚུགས་པས་ཞེ་བཅད་རབ༵་དང་ལྡ༵ན་པའི་རྣལ་འབྱོར་པས༵། སྒྲུབ་པ་ལ་འཇུག་པའི་དང༵་པོ༵་ངས་མ་གྲུབ་ཀྱི་བར་དུ་སྟན་འདི་ལས་ལྡང་བ་དང་གནས་འདི་ནས་འགྲོ་བར་མི་བྱའོ་སྙམ་པ་ལ་སོགས་པའི་དམ༵་བཅའ་ཇི་ལྟར་ནོས༵་པ་བཞི༵ན་དུ༵་བརྟན་པར་བྱ༵་ཞིང་། སྒྲུབ་དུས་སུ་དེ་ལས་གཞན་པའི་བྱ་བ་ལ་བརྩོན་པ་དང་། རྟགས་དང་མཚན་མ་ངན་པའམ། མ་བྱུང་བས་སྒྱིད་ལུག་པ་དང་། ངས་མི་འགྲུབ་སྙམ་དུ་བདག་ཉིད་བརྙས་པས་ལེ༵་ལོ༵་རྣམས་དང་། སོས་དལ་དང་དུས་སུ་མི་སྒྲུབ་ཅིང་ལུས་ངག་ཆ་བབས་སུ་བྱེད་པའི་སྒྱིད༵་སྙོམ༵ས་ལ་ལུས་པ་རྣམས་མེད༵་པ༵་ཡི༵་སྒོ་ནས་བརྩོན་འགྲུས་བསྐྱེད་ཅིང་། སྔགས་དང་ཏིང་ངེ་འཛིན་ལ་སོགས་པ་ཡིན་ནམ་མ་ཡིན་ནམ་འབྲས་བུ་འབྱུང་ངམ་མི་འབྱུང་ངམ་སྙམ་པ་ལ་སོགས་པའི་ཐེ༵་ཚོམ༵་དང་ཡིད་གཉིས་མེད༵་པར༵་ཡིན་ངེས་སྙམ་པ་མཐའ་གཅིག་ཏུ་གཏིང་ཚུགས་པའི་བློས་སྒྲུབ༵་པར་བྱས༵་ན༵་གང་སྒྲུབ་ཀྱི་དཀྱིལ༵་འཁོ༵ར་ཐམ༵ས་ཅད༵་འགྲུབ༵་པར༵་འགྱུར༵་ཏེ། རྡོ༵་རྗེ༵་གས༵ང་བའི་མཆོག༵་སྐུ་དང་ཡེ་ཤེས་འདུ་འབྲལ་མེད་པའི་ཆོས་སྐུ་དམ༵་པ༵་འཐོབ༵་པར་འགྱུར་རོ། །ནམ་གྱི་ཚེ་སྒྲུབ་པ་དུས་ཀྱི་ཡན་ལག་ནི། སྒྲུབ༵་པའི༵་ཞག༵་ནི། ལེའུ་དགུ་པར། ཞག་ནི་སུམ་ཅུ་ཕྲག་དྲུག་གམ། །ཞེས་པ་ལ་སོགས་པ་དང༵་སྒྲུབ་པ་ལ་འཇུག་པའི་ཚེ༵ས་གྲང༵ས་དང་གཟའ་སྐར་ལ་སོགས་པ་ནི༵་རྒྱས་པའི་རྒྱུད༵་ལ༵ས། དུས་ནི་ཡར་(༢༢༢)ངོའི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པས། །གསང་མཆོག་དངོས་གྲུབ་ཐོབ་བྱའི་ཕྱིར། །གཟའ་སྐར་ཤིས་པའང་བླང་བར་བྱ། །ཞེས་སྨོ༵ས་པ༵་བཞིན༵་དུ༵་བཤད༵་པར་བྱའོ། །དེའང་སྤང་བླང་མེད་པས་ངེས་གཟུང་མི་འཐད་དོ་ཞེ་ན། ངོ་བོ་ལ་དེ་ལྟར་ཡིན་ཡང་ཀུན་རྫོབ་རྒྱུ་འབྲས་མི་བསླུ་བའི་རྟེན་འབྲེལ་གྱིས་མཐུན་པའི་ཚེ་འཇུག་གི་མི་མཐུན་པའི་ཚེ་མི་འཇུག་སྟེ། དྲོད་གཤེར་འཛོམ་དུས་ས་བོན་གདབ་ཀྱི་དེ་ལས་གཞན་གྱི་དུས་སུ་མི་གདབ་པ་དང་འདྲ་བར་ཤེས་པར་བྱ་སྟེ། རྔམ་གློག་ལས། རིག་བྱེད་དག་གི་ཡན་ལག་ལས། །དུས་རྣམས་ཤེས་པར་བྱ་བ་ནི། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚོད་བཟང་བ་ནི། །མཚན་མའི་རྟོག་པ་ཡིན་མོད་ཀྱང་། །བརྟགས་དང་དངོས་གྲུབ་མཚན་མ་འབྱུང་། །ཞེས་སོ། །འདིར་ཕྱིན་ཅི་ལོག་གི་གྲོང་ཁྱེར་ལྷུན་མཐོ་ཞིང་ཐེ་ཚོམ་གྱི་རྩིག་པ་བརྒལ་བར་དཀའ་བའི་ར་བས་བསྐོར་ནས། མཐོང་བ་དང་ཤེས་པ་རྒྱ་ཆུང་ངུར་གྱུར་པ་དག་ན་རེ། ཁྱེད་ཀྱི་གསང་བ་སྙིང་པོ་འདི་རྒྱུད་མ་ཡིན་ཏེ། རྒྱུད་ལ་ཁ་འཕངས་པས་སོ་ཞེ་ན། དེ་ལྟ་ན་ཁྱེད་རང་རྒྱུད་དུ་འདོད་པའི་ངེས་བརྗོད་བླ་མ་དང་། བརྟག་གཉིས་ལ་སོགས་པའང་རྒྱུད་མ་ཡིན་པར་འགྱུར་ཏེ། རྒྱུད་གཞན་ལ་ཁ་འཕངས་པའི་ཕྱིར་རོ། །དེའང་། ཇི་སྐད་མང་དུ་བརྗོད་པས་ཅི། །ཇི་ལྟར་དེ་ཉིད་བསྡུས་པ་ཡི། །དཀྱིལ་འཁོར་ཆོ་ག་བཞིན་དུ་བྱ། །ཞེས་པ་ལ་སོགས་པ་དང་། འཇམ་དཔལ་ལས་ཀྱང་། རྒྱུད་ཆེན་སྒྱུ་འཕྲུལ་དྲྭ་བ་ལས། ཞེས་འཕངས་སོ། །དེས་ན་སྟོན་པས་རྒྱུད་མཚུངས་པར་གསུངས་པའི་རང་བཞིན་གོང་འོག་གི་ཟློས་པ་སྤང་བ་དང་། རྩ་རྒྱུད་འདི་ལས་འཕྲོས་པའི་ཡན་ལག་གི་རྒྱུད་དང་འགྲེལ་པ་བསྒྲུབ་པའི་དོན་དུ་ཁ་འཕངས་ཏེ་གསུངས་པ་ཡིན་ནོ། །

གསུམ་པ་སྐབས་ཀྱི་དོན་བསྡུ་བ་ནི། ཆོས་ཐམས་ཅད་ཀུན་ཏུ་བཟང་པོའི་རོལ་པར་ཡེ་ནས་དག་པས་ཐམས་ཅད་སྤང་བླང་མེད་པར་སྤྱོད་པར་བྱའོ། །རྡོ༵་རྗེ༵་གསང༵་བའི༵་ངོ་བོ་རྒྱུད་འདི་ནི། ཚིག༵་ཏུ༵འོ༵། །ཞེས༵་གསུངས་དུས་ལྷུན་སྟུག་པོ་བཀོད་པའི་རང་སྣང་ཐམས་ཅད་སངས་རྒྱས་ཀྱི་རོལ་པ་ལས་གཞན་མ་ཡིན་པས་དེ༵་བཞིན༵་གཤེ༵གས་པ༵་ཉིད༵་ལ༵་དེ༵་བཞི༵ན་གཤེ༵གས་པ༵་ཉིད༵་ཆེ༵ད་དུ༵་གླེ༵ང་ངོ༵་ཞེས་བྱ་བ་སྟེ། ཡུལ་ཡུལ་ཅན་གཉིས་སུ་མེད་པར་མཚོན་པ་ཡིན་ནོ། །ཚུལ་འདིས་ཆོས་ཐམས་ཅད་རང་སྣང་དུ་བསྟན་ཏེ། རང་སྣང་ལ་རང་གི་སེམས་ཉིད་གཉིས་སུ་མེད་པ་རྨི་ལམ་དང་འདྲ་བར་ངོ་བོ་ཉིད་ཀྱིས་མ་སྐྱེས་པར་བསྟན་ཏོ། །ཆོས་ཉིད་གས༵ང་བའི༵་སྙིང༵་པོ༵་གང་སྣང་ཡེ་ཤེས་ཀྱི་རོལ་པ་དེ༵་ཁོ༵་ན༵་ཉིད༵་ངེས༵་པ༵་ལས༵། རྣལ་འབྱོར་པ་ལྟ་སྤྱོད་མཐུན་པ་ཀུན་འདུས་པ་དང་། དེ་རྣམས་ཀྱིས་འབྱོར་པའི་ཡོ་བྱད་བདེ་བར་(༢༢༣)སྤྱོད་པ་དང་། དེའི་དུས་སུ་ཡི་དམ་གྱི་ལྷ་དང་མཁའ་འགྲོ་དམ་ཅན་འདུ་བར་བྱེད་པ་དང་། ཞེན་འཛིན་མེད་པའི་སྒོ་ནས་རྒྱུད་ལ་ཚོགས་གཉིས་རྫོགས་པར་བྱེད་པས་ཚོག༵ས་ཀྱི༵་དཀྱི༵ལ་འཁོ༵ར་གྱི༵་དོན་ཏེ། གང་སྣང་གི་ཆོས་ཐམས་ཅད་ཐབས་ཤེས་ཀྱི་ལམ་དུ་བྱེད་པའི་ལེ༵འུ༵་སྟེ༵་བཅུ༵་གཅིག༵་པའི་རྣམ་པར་བཤད་པ༵འོ༵།། །།