གཉིས་པ་རྩོད་པ་ཕྱིར་བཅོས།
གཉིས་པ་རྩོད་པ་ཕྱིར་བཅོས་ནི།
རྩོད་པ་བཞི་སོགས་དགེ་འདུན་གྱི་རྩོད་པའི་རིགས་རྣམས་ཞི་བྱེད་ཀྱི་ཆོས་བདུན་ནི། ལོ་དྲི་ལས། མངོན་སུམ་༡དྲན་པ་༢མ་མྱོས་༣དང༌། །དེ་བཞིན་གང་མང་༤ངོ་བོ་ཉིད༥། །རྩ་རྣམས་བཀྲམ་པ་༦ལྟ་བུ་དང༌། །ཁས་བླངས་པར་༧ཡང་བྱ་བའོ། །ཞེས་པའི་རྩོད་པ་ཞི་བྱེད་ཀྱི་ཆོས་བདུན་གང་རུང་གིས་ཆོས་ཕྱོགས་སུ་ཞི་བར་བྱེད་པའོ། །དེ་ཡང་མདོར་བསྡུ་ན། དང་པོར་ཟས་གོས་སོགས་ཚེ་འདིའི་བདེ་ཐབས་ཙམ་གྱིས་ཆེད་དུ་སྡོམ་པ་བླངས་ན་མི་སྐྱེ་ཞིང༌། བླངས་ནས་ཀྱང་ལྟུང་བ་འབྱུང་བའི་རྒྱུ། བག་མེད། མ་གུས་པ། མི་ཤེས་པ། ཉོན་མོངས་མང་བ་བཞིས་དབང་དུ་སོང་སྟེ་བཅས་མཚམས་ཡལ་བར་དོར་ནས་ཁེ་ཚོང་སོགས་གཡོ་ཐབས་སྣ་ཚོགས་ཀྱིས་ནོར་བསྡུ་བ་དང༌། བླ་གཟུགས་འཆང་བ་འགའ་ཞིག་གིས་རང་དོན་དུ་ཚོང་ཟོང་དབང་བསྐུར་སོགས་བྱས་ཏེ། དཀོར་བསྡུ་བ་དང༌། མཁས་རློམ་ཅན་ལ་ལས། ཚུལ་འཆོས་ཁ་གསགས་སོགས་ཀྱིས་རྫས་བསྡུས་ཏེ། རང་ཉིད་ཉེས་ལྟུང་གི་གོང་བུར་བྱས་པ་དང༌། དེ་དག་གིས་དགེ་འདུན་ལ་ཇ་ཐུགས་འགྱེད་སོགས་བཏང་སྟེ། དགེ་འདུན་ལོག་འཚོ་ལ་སྦྱར་ན་ཕན་ཡོན་མེད་པར་མ་ཟད་རང་གཞན་གཉིས་ཀ་ཕོངས་པའི་རྒྱུར་འགྱུར་བར་གསུངས་ལ། དེ་ལྟར་ལེགས་པར་མ་བསྲུང་བའི་ཉེས་དམིགས་ནི། གཞུང་དམ་པ་ལས། ཚུལ་ཁྲིམས་ཉམས་པ་ཉེས་དམིགས་བཅུ་སྟེ། ཚུལ་ཁྲིམས་ཀྱིས་བདག་སྨད་པ་དང༌། གཞན་ལྷ་དང་སྟོན་པས་སྨད་པ་དང༌། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་སྨད་པ་དང༌། ཆོས་ཉིད་ཀྱིས་སྨད་པ་དང༌། ཕྱོགས་དང་ཕྱོགས་མཚམས་སུ་སྡིག་པ་མི་སྙན་པའི་སྒྲ་གྲགས་པར་འགྱུར་བ་དང༌། མ་རྟོགས་པའི་ཆོས་རྣམས་རྟོགས་པར་མི་འགྱུར་བ་དང༌། རྟོགས་པའི་ཆོས་རྣམས་ཉམས་པར་འགྱུར་བ་དང༌། སྔོན་ཐོས་པའི་ཆོས་རྣམས་བརྗེད་པར་འགྱུར་བ་དང༌། རྣམ་པར་འགྱོད་བཞིན་དུ་ཚེ་དུས་བྱེད་པ་དང༌། ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བས་དམྱལ་བར་སྐྱེའོ། །ཞེས་གསུངས་པས། སང་དང་ངན་སོང་གི་སྡུག་བསྔལ་གཉིས་གང་སྔར་འོང་མི་ཤེས་སྙམ་པའི་སྒོ་ནས་འདོད་ཆུང་ཆོག་ཤེས་ལ་གནས་ནས་ཚེ་འདིའི་བྱ་བཞག་རྦད་ཀྱིས་བཅད་དེ་བསླབ་པ་བསྲུང་བ་ལ་འབད་པར་བྱའོ། །དེ་ཡང་བག་མེད་ཀྱི་གཉེན་པོར་རྒྱུན་དུ་དྲན་ཤེས་བག་ཡོད་བསྟེན་ཏེ། མ་གུས་པའི་གཉེན་པོར་བསླབ་པའི་གནས་སོགས་ལ་གུས་པར་བྱ། མི་ཤེས་པའི་གཉེན་པོར་རང་རང་གི་སྡོམ་པ་གང་བླངས་མ་ཐག་པ་ནས་སློབ་དཔོན་མཁས་པ་བསྟེན་ཏེ་བསླབ་བྱ་མཐའ་དག་ཤེས་པར་བྱ་ཡི། འདི་དང་སྔགས་ཀྱི་བསླབ་བྱ་སྡོམ་པ་མ་ཐོབ་པས་བལྟ་མི་རུང་བར་གསུངས་སོ། །མ་མཐའ་རང་རང་གི་བསྲུང་བྱའི་གྲངས་ཙམ་བར་སྡོམ་ལྟ་བུའི་སྟེང་ནས་ངེས་པར་བྱེད། ཉོན་མོངས་པ་མང་བའི་གཉེན་པོར་རང་ལ་ཉོན་མོངས་གང་ཤས་ཆེ་བ་རྩལ་ཏུ་བཏོན་ནས་འབུར་འཇོམས་བྱས་ན་ལེགས་ཚོགས་ཐམས་ཅད་ཀྱི་རྩ་བ་ཚུགས་པར་འགྱུར་ལ།