གསུམ་པ་འདུལ་བ་མདོར་བསྡུས་ཀྱི་ངོ་བོ།

གསུམ་པ་འདུལ་བ་མདོར་བསྡུས་ཀྱི་ངོ་བོ་ནི།

ལུང་ལས་བྱ་བ་བྱེ་བྲག་གིས་གསལ་ཀ་མ་བཏོད་པའི་འདུལ་བའི་བསླབ་པའོ། །འོ་ན་གསལ་ཀ་བཏོད་མ་བཏོད་ཀྱི་ཁྱད་པར་ཅི་ཞེ་ན། འདུལ་བའི་ལུང་གང་ཡང་རུང་བར། དགག་བྱའི་རྒྱུ་མཚན་ལ་བརྟེན་ཏེ་བྱ་བའི་བྱེ་བྲག་དང་སྦྱར་ནས་ལྟུང་བ་སྡེ་ལྔ་ལས་གང་ཡང་རུང་བའི་མིང་གིས་གསལ་ཀ་བཏོད་པའམ། དགོས་པའི་རྒྱུ་མཚན་ལ་བརྟེན་ཏེ་བྱ་བའི་བྱེ་བྲག་དང་སྦྱར་ནས་སྒྲུབ་པའི་མིང་གིས་གསལ་ཀ་བཏོད་པའམ། དགག་པ་དང་དགོས་པ་མེད་པའི་རྒྱུ་མཚན་ལ་བརྟེན་ཏེ་བྱ་བའི་བྱེ་བྲག་དང་སྦྱར་ནས་ཉེས་པ་མེད་པའི་མིང་གིས་གསལ་ཀ་བཏོད་ན་གསལ་ཀ་བཏོད་པ་ཡིན་ལ། དེ་དག་ལས་གཞན་དུ་ན་གསལ་ཀ་མ་བཏོད་པ་ཉིད་ཡིན་ནོ། །མཚོ་ཊཱིཀ་མཆན་ལས། འོ་ན་མདུན་གྱི་ས་དཀར་པོ་རྐོ་བའི་ལྟུང་བྱེད་གསལ་ཀ་བཏོད་པ་ཡིན་ནམ་མ་བཏོད་པ་ཡིན། གཉིས་པ་ལྟར་ན་ལྟུང་བྱེད་དེ་མདོར་བསྡུས་ཀྱི་ལྟུང་བྱེད་ཡིན་པར་ཐལ། གསལ་ཀ་མ་བཏོད་པའི་ལྟུང་བྱེད་ཡིན་པའི་ཕྱིར་རོ། །དང་པོ་ལྟར་ན་འདུལ་བའི་ལུང་གང་ལས་ཀྱང༌། མདུན་གྱི་ས་དཀར་པོ་རྐོ་ན་ལྟུང་བྱེད་དོ་ཞེས་གསུངས་པ་མེད་ཅེ་ན། ས་རྐོ་ན་ལྟུང་བྱེད་དོ་ཞེས་དངོས་སུ་གསུངས་པས་མདུན་གྱི་ས་དཀར་པོ་རྐོ་བའི་ལྟུང་བྱེད་ཀྱང་གསལ་ཀ་བཏོད་པ་ཡིན་ནོ། །འོ་ན་དགེ་ཚུལ་གྱི་གསོ་སྦྱོང་ཡང་གསལ་ཀ་བཏོད་པ་ཡིན་པར་ཐལ། གསོ་སྦྱོང་བྱའོ་ཞེས་དངོས་སུ་གསུངས་པ་ཡིན་པའི་ཕྱིར་ཞེས་མཚུངས་སོ་ཞེ་ན། དེ་སྐད་དངོས་སུ་གསུངས་ཀྱང་དགེ་ཚུལ་གྱི་གསོ་སྦྱོང་གསལ་ཀ་དངོས་སུ་མ་བཏོད་ན་ཅི་འགལ་ཞེས་བརྗོད་དོ། །འོ་ན་ས་རྐོ་ན་ལྟུང་བྱེད་དོ་ཞེས་དངོས་སུ་གསུངས་ཀྱང་མདུན་གྱི་ས་དཀར་པོ་རྐོ་བའི་ལྟུང་བྱེད་གསལ་ཀ་མ་བཏོད་ན་ཅི་འགལ་ཞེས་མགོ་མཚུངས་སོ་ཞེས་རྒོལ་ན། ས་རྐོ་བ་བཀག་པ་དང་གསོ་སྦྱོང་བྱ་བ་ནི་དགག་པ་དང་སྒྲུབ་པ་གོ་རིམ་བཞིན་ཏེ། སྤྱི་བཀག་པས་བྱེ་བྲག་ཁེགས་པའི་ཕྱིར་དང་སྤྱི་བསྒྲུབས་པས་བྱེ་བྲག་མི་འགྲུབ་པའི་ཕྱིར་ན་མི་མཚུངས་སོ་སྙམ་མོ། །ཞེས་གསུངས་པ་ལ། འོ་ན་དགག་རྗེས་དགག་པ་དེ་རྗེས་བཅས་མཚན་ཉིད་པ་མིན་ཡང་སྒྲུབ་རྗེས་སྒྲུབ་པ་དེ་རྗེས་བཅས་མཚན་ཉིད་པར་བཞག་ཆོག་པར་ཐལ། སྤྱི་སྒྲུབ་པས་བྱེ་བྲག་སྒྲུབ་མི་ནུས་ལ་སྤྱི་དགག་པའི་བྱེ་བྲག་དགག་ནུས་པ་དེའི་ཕྱིར་རོ། །འདོད་མི་རིགས་ཏེ། མཚོ་ཊཱིཀ་༡༢༨ལས། དེ་ལྟར་སྔར་ནས་དགག་པ་བཅས་ཟིན་པ་དེ་བཞིན་དུ་སྔར་ནས་སྒྲུབ་པར་བཅས་ཟིན་པ་ཡང་རྒྱུ་མཚན་མཚུངས་པས་ན། སྒྲུབ་པ་བཅས་པའི་རྗེས་སུ་སྒྲུབ་པ་རྗེས་བཅས་ཀྱང་རྗེས་བཅས་ཀྱི་སྒྲས་བརྗོད་པ་དེ་ཆོས་ཅན། སྒྲུབ་པ་དེ་རྗེས་སུ་བཅས་པ་མཚན་ཉིད་པ་མ་ཡིན་ཏེ། སྔར་ནས་བཅས་ཟིན་པའི་ཕྱིར་ཞེས་གསུང་ངོ༌། །ཞེས་གསུངས་པའི་ཕྱིར་དང༌། གཞན་ཡང་དགེ་སློང་དྲུག་སྡེས་གསོ་སྦྱོང་བྱ་དགོས་པ་ཆོས་ཅན། གསལ་ཀ་མ་བཏོད་པར་ཐལ།གསོ་སྦྱོང་བྱའོ་ཞེས་པས་གསལ་ཀ་མ་བཏོད་གཞན་དགེ་སློང་དྲུག་སྡེས་གསོ་སྦྱོང་བྱ་ཞེས་པའི་ཚིག་མེད་པའི་ཕྱིར། ཁྱབ་སྟེ། མཚོ་ཊཱིཀ་མཆན་༣༦ལས། དགེ་ཚུལ་གྱི་གསོ་སྦྱོང་ནི་གང་ཟག་བྱེ་བྲག་གིས་གསལ་ཀ་མ་བཏོད་པ་ཡིན་མོད་ཀྱི། དེ་ཡང་བྱ་བ་བྱེ་བྲག་གིས་གསལ་ཀ་མ་བཏོད་པའི་ནང་དུ་འདུས་ཏེ། གང་ཟག་དེའི་བྱ་བ་བྱེ་བྲག་གིས་གསལ་ཀ་མ་བཏོད་པ་ཉིད་ཡིན་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །བཞི་པ་འདུལ་བ་མདོར་བསྡུས་ཀྱི་མཚན་ཉིད་ལ། སྤྱིར་ན་འདུལ་བ་མདོར་བསྡུས་སྤྱིའི་མཚན་ཉིད་ནི། འདུལ་བའི་བསླབ་པ་རྣམ་པར་བཞག་པའི་བདག་ཉིད་དུ་གྲུབ་པའི་བཀའ་གང་ཞིག ལུང་ལས་བྱ་བ་བྱེ་བྲག་གིས་གསལ་ཀ་མ་བཏོད་པའོ། །འདུལ་བ་མདོར་བསྡུས་བྱེ་བྲག་སོ་སོའི་མཚན་ཉིད་ནི། འདུལ་བའི་བསླབ་པ་རྣམ་པར་བཞག་པའི་བཀའི་བདག་ཉིད་དུ་གྲུབ་པའི་དགག་བྱའི་རྒྱུ་མཚན་གྱི་འབྲེལ་ཡུལ་གང་ཞིག ལུང་ལས་བྱ་བ་བྱེ་བྲག་གིས་གསལ་ཀ་མ་བཏོད་པ་དེ། དགག་པའི་འདུལ་བ་མདོར་བསྡུས་ཀྱི་མཚན་ཉིད་སོགས་ཡིན་ཏེ། མཚོ་ཊཱིཀ་ལས། སྤྱིའི་མཚན་ཉིད་དེ་ལ་དེ་ཅུང་ཟད་ཁ་བསྐངས་པ་སྟེ། གང་ཞིག་ཅེས་སྨོས་པ་དེ་ལ་དགག་བྱའི་རྒྱུ་མཚན་གྱི་འབྲེལ་ཡུལ་གང་ཞིག་དང༌། དགོས་པའི་རྒྱུ་མཚན་གྱི་འབྲེལ་ཡུལ་གང་ཞིག་དང༌། དགག་དགོས་མེད་པའི་རྒྱུ་མཚན་གྱི་འབྲེལ་ཡུལ་གང་ཞིག་ཅེས་ཁ་བསྐངས་ཏེ། །དགག་སྒྲུབ་གནང་གསུམ་གྱི་མདོར་བསྡུས་ཀྱི་མཚན་ཉིད་དུ་གོ་རིམ་བཞིན་དུ་སྦྱར་རོ། །བཅས་པའི་བདག་ཉིད་དུ་གནས་པ་གང་ཞིག་དང༌། ཡན་ལག་གི་བདག་ཉིད་དུ་གནས་པ་གང་ཞིག་ཅེས་ཁ་བསྐངས་ཏེ། རྒྱུ་ཚོགས་དང་བཅས་པའི་མདོར་བསྡུས་དང༌། ཡན་ལག་གི་མདོར་བསྡུས་ཀྱི་མཚན་ཉིད་དུ་སྦྱར་རོ། །གང་ཟག་གིས་སྦྱོར་མ་ཤེས་པ་གང་ཞིག་དང༌། གང་ཟག་གིས་སྦྱོར་ཤེས་པ་གང་ཞིག་ཅེས་ཁ་བསྐངས་སྟེ། ངོ་བོ་ཉིད་ཀྱི་མདོར་བསྡུས་དང༌། བྱེད་པའི་མདོར་བསྡུས་ཀྱི་མཚན་ཉིད་དུ་སྦྱར་རོ། །ཞེས་གསུངས་པའི་ཕྱིར་རོ། །