བཅུ་གཉིས་པ་མཆོད་པ་སྣ་ཚོགས་བསྡུས་ནས་མཆོད་པ།
བཅུ་གཉིས་པ་མཆོད་པ་སྣ་ཚོགས་བསྡུས་ནས་མཆོད་པ་ནི།
གསེར་ནི་བརྒྱ་སྟོང་དུ་མ་དང༌། །རིན་ཆེན་རྣམ་པ་སྣ་ཚོགས་དང༌། །རས་ནི་ཟུང་གྱུར་བརྒྱ་ཉིད་དང༌། །གླང་བོ་རྟ་དང་ཡུལ་འཁོར་དང༌། །ཆུང་མ་བཟང་དང་བུ་མོ་ཉིད། །བྲན་ཕོ་བྲན་མོ་སྲིང་མོ་དང༌། །བློ་ལྡན་ཀུན་ནས་དང་བ་ཡི། །བདག་ཉིད་ཀྱང་ནི་དབུལ་བར་བགྱི། །གསེར་གྱི་རིགས་ས་གསེར་དང་ཆུ་གསེར་དང་རྡོ་གསེར་དང་ཤིང་གསེར་ལ་སོགས་པ་དང༌། དགཔའི་ཞིང་གསེར་གྱི་རིགས་མི་འདྲ་བ་ནི་བརྒྱ་སྟོང་དུ་མ་ཡོད་པ་རྣམས་དང༌། རིན་པོ་ཆེ་རྣམ་པ་སྣཚོགས་ཅི་ཡོད་པ་དང༌། རས་ནི་ཟུང་གྱུར་སྟེ་སྟོད་གཡོག་དང༌། སྨད་གཡོག་གི་རྒྱུ་རས་སྣ་ཚོགསཔ་དཀྱིལ་འཁོར་གྱི་མཐའ་ལས་རས་ནི་ཟུང་དུ་འགྱུར་བ་བུབ་བརྒྱ་ཉིད་མཆོད་པའི་ཕྱིར་དུ་སྤུང་བ་སྟེ། མངོན་བརྗོད་བླ་མའི་རྒྱུད་ལས། གལ་ཏེ་དངོས་གྲུབ་མཆོག་འདོད་ན། །དྲི་དང་མེ་ཏོག་དེབཞིན་སྤོས། །ཆོ་ག་བཞིན་དུ་དེ་བཞིན་མཆོད། །མར་མེ་བརྒྱ་ཡང་དབུལ་བྱ་ཞིང། །དཔལ་ཧེ་རུ་ཀའི་དཀྱིལ་འཁོར་གནས། །དཔའ་བོ་རྣལ་འབྱོར་མ་རྣམས་མཆོད། །རྒྱལ་མཚན་དམར་དང་དེ་བཞིན་སེར། །ཞེས་པ་ནས་རས་ནི་ཟུང་འགྱུར་ཞེས་པ་ལྟར་རས་ཟུང་བུབ་བརྒྱ་སྟོང་དུ་མ་དང༌། གླང་བོ་ཆེ་དང་རྟ་མཆོག་དང་འཁོར་བསྒྱུར་གྱི་ཡུལ་ལྗོངས་འཁོར་གཡོག་དུ་མ་དང༌། རང་གི་ཆུངམ་བཟང་པོ་དང་བུ་མོ་ཉིད་དང༌། བྲན་ཕོ་དང༌། བྲན་མོ་དང༌། སྲིང་མོ་ལ་སོགས་པ་མཆོད་པའི་རྣམགྲངས་དེ་དག་ཐམས་ཅད་དང༌། གཞན་ཡང་བདག་གཅེས་པར་འཛིན་པ་དང་སེར་སྣ་ལ་སོགསཔ་སྤང་བའི་འཁོར་གསུམ་བདེན་སྟོང་དུ་རྟོགས་པའི་བློ་གྲོས་དང་ལྡན་ཞིང་མ་དད་པ་ལ་སོགས་པའི་རྙོགས་པ་དང་བ་ཡི་ཀུན་ནས་བསླངས་སྟེ་བདག་ཉིད་ཀྱི་ལུས་ཀྱང་ནི་ཁྱེད་ལ་དབུལ་བར་བགྱི་ཅེས་པ་སྟེ། དཔལ་སཾབྷོ་ཊའི་རྒྱུད་ལས། དེ་ནས་ཕྱག་འཚལ་མཆོད་ནས་ནི། །བླ་མ་ལ་ནི་ཡོན་རྣམས་དབུལ། །གསེར་ནི་སྟོང་ཕྲག་བརྒྱ་དང་ནི། །རིན་ཆེན་རྣམ་པ་སྣ་ཚོགས་དང༌། །གོས་ནི་ཟུང་འགྱུར་བརྒྱ་ཉིད་དང། །གླང་པོ་རྟ་དང་ཡུལ་འཁོར་ཉིད། །རྣ་ཆ་དང་ནི་རྐང་གདུབ་དང། །ནོར་བུ་དང་ནི་སོར་གདུབ་མཆོག །གསེར་ལས་བྱས་པའི་མཆོད་ཕྱིར་ཐོགས། །རང་གི་ཆུང་མ་བུ་མོ་དང། །བྲན་ཕོ་བྲན་མོ་སྲིང་མོ་ཉིད། །ཕྱག་འཚལ་ནས་ནི་དབུལ་བར་བྱ། །བདག་གི་དངོས་པོ་ཐམས་ཅད་ཀྱིས། །བློ་དང་ལྡན་པས་བླ་མར་དབུལ། །དེ་རིང་ཚུན་ཆད་བདག་བྲན་དུ། །ཁྱོད་ལ་བདག་ནི་འབུལ་ལགས་ཞེས། །དེ་ལྟར་ཞུ་བ་བྱས་གྱུར་པས། །མངོན་པར་འདོད་པའི་གནས་ཐོབ་ནས། །ད་ནི་སངས་རྒྱས་ཐམས་ཅད་ཀྱིས། །བདག་ལ་བཀའ་དྲིན་ལེགས་པར་སྐྱོབས། །ཞེས་གསུངས་སོ། །