གཉིས་པ་མངོན་སུམ་ལྟར་སྣང་གི་མཐའ་དཔྱད་པ།

གཉིས་པ་མངོན་སུམ་ལྟར་སྣང་གི་མཐའ་དཔྱད་པ་ལ།

མདོར། འཁྲུལ་དང་ཀུན་རྫོབ་ཤེས་པ་དང། །རྗེས་དཔག་རྗེས་སུ་དཔག་ལས་བྱུང། །དྲན་དང་མངོན་འདོད་ཅེས་བྱའོ། །མངོན་སུམ་ལྟར་སྣང་རབ་རིབ་བཅས། །ཞེས་རྟོག་པ་མངོནསུམ་ལྟར་སྣང་དྲུག་དང་རྟོག་མེད་མངོན་སུམ་ལྟར་སྣང་གཅིག་སྟེ་བདུན་དུ་བྱས་ནས་གསུངསཔའི་དོན་རྣམ་འགྲེལ་ལས། མངོན་སུམ་ལྟར་སྣང་རྣམ་པ་བཞི། །རྟོག་པའི་ཤེས་པ་རྣམ་གསུམ་དང༌། །རྟེན་བསླད་པ་ལས་བྱུང་བ་ཅན། །རྟོག་པ་མེད་པ་གཅིག་ཡིན་ནོ། །ཞེས་ཀུན་རྫོབ་ཤེས་པ་ལ་བརྡ་རྟེན་ཅན་དང༌། འཁྲུལ་དང་ཞེས་པའི་དོན་སྨིག་རྒྱུ་ཆུར་འཛིན་ལྟ་བུ་ལ་དོན་གཞན་ལ་སྒྲོ་འདོགས་པ་དང༌། ལྷག་མ་བཞི་ལྐོག་ཏུ་གྱུར་བའི་དོན་ཅན་དུ་བྱས་ནས་རྟོག་པ་མངོན་སུམ་ལྟར་སྣང་གསུམ་གསུངས་པ་མི་འཐད་པར་ཐལ། ཀུན་རྫོབ་ཤེས་པ་ཡང་ལྐོག་གྱུར་དོན་ཅན་དུ་བསྡུ་དགོས་པའི་ཕྱིར་ཏེ། དེ་ལྐོག་གྱུར་དོན་ཅན་ཡིན་པའི་ཕྱིར་ཟེར་ན། མ་ཁྱབ་སྟེ། ཀུན་རྫོབ་ཤེས་པ་རིགས་པ་ཅན་པས་དབང་ཤེས་རྟོག་མེད་དུ་འདོད་པའི་ལོག་རྟོག་སེལ་བའི་ཆེད་དུ་རྣམ་འགྲེལ་ལས་ལོགས་སུ་བཤད་པ་ཙམ་ཡིན་པའིཕྱིར། དེར་ཐལ། ཚད་མ་མདོ་ལས། འཁྲུལ་དང་ཀུན་རྫོབ་ཤེས་པ་གཉིས་རིགས་པ་ཅན་པས་དབང་ཤེས་དང་རྟོག་མེད་དུ་འདོད་པའི་ལོག་རྟོག་སེལ་བའི་ཆེད་དང༌། ཕྱི་མ་བཞི་དེའི་མཐུན་དཔེ་རུ་གསུངས་པ་ཡིན་པའི་ཕྱིར་ཏེ། རྣམ་འགྲེལ་ལས། དབང་སྐྱེས་མིན་པར་གྲུབ་དོན་དུ། །གཉིས་བཤད་འཁྲུལ་པ་མཐོང་ཕྱིར་རོ། །རྗེས་དཔག་སོགས་གྲུབ་བརྗོད་པ་ནི། །སྔ་མ་གཉིས་ཉིད་བསྒྲུབ་ཕྱིར་རོ། །ཞེས་དང༌། འགྲེལ་བཤད་རིན་ཆེན་འཕྲེང་བ་༣༡༣ལས། འཁྲུལ་དང་ཀུན་རྫོབ་ཤེས་པ་གཉིས་ཆོས་ཅན། རྟོག་པ་མངོན་སུམ་ལྟར་སྣང་དུ་བསྟན་པ་ལ་དགོས་པ་ཡོད་དེ། དབང་སྐྱེས་དེ་དབང་ཤེས་མིན་པར་གྲུབ་དོན་དུ་དེར་བཤད་པས་སོ། །དེར་འཆད་པའི་རྒྱུ་མཚན་ནི། དེ་ཆོས་ཅན། །དེ་ཡོད་དེ་རིགས་པ་ཅན་སོགས་ཁྱེད་གསུམ་འཁྲུལ་པ་དབང་ཤེས་སུ་འཁྲུལ་པ་མཐོང་བའི་ཕྱིར། རྗེས་དཔག་སོགསབཞི་ཆོས་ཅན་རྟོག་པར་གྲུབ་ཀྱང་མངོན་སུམ་ལྟར་སྣང་དུ་བརྗོད་པ་ལ་ནི་དོན་ཡོད་དེ། སྔ་མ་གཉིས་ཉིད་དབང་ཤེས་མིན་པའི་བསྒྲུབ་པའི་མཐུན་དཔེར་བསྟན་པའི་ཆེད་དུ་དེ་ལྟར་བསྟན་པའི་ཕྱིར། ཞེས་གསུངས་པའི་ཕྱིར། འདོད་ན། རིགས་པ་ཅན་པས་སྔ་མ་གཉིས་དབང་ཤེས་སུ་འཁྲུལ་བ་བཞིན་རྗེས་སུ་དཔག་པ་ལས་བྱུང་བའམ་རྟགས་ཅན་རྗེས་དཔག་ཡང་དེས་དབང་ཤེས་སུ་འཁྲུལ་རིགས་པར་ཐལ། རྟགས་ཅན་རྗེས་དཔག་དེས་ཀྱང་གཟུགསའཛིན་དབང་མངོན་དང་ཡུལ་ཉེ་བར་འཇུག་པའི་ཕྱིར། ཁྱབ་སྟེ། རིགས་པ་ཅན་པས་སྔ་མ་གཉིས་དབང་ཤེས་སུ་འཁྲུལ་བའི་རྒྱུ་མཚན་གཟུགས་འཛིན་པས་དབང་མངོན་དང་ཡུལ་ཉེབར་འཇུག་པས་ཡིན་པའི་ཕྱིར་ཏེ། རྣམ་འགྲེལ་ལས། །བརྡ་རྟེན་ཅན་དང་དོན་གཞན་ལ། །སྒྲོ་འདོགས་རྣམ་པར་རྟོག་པ་དག །མངོན་སུམ་ཉེར་འཇུག་ཅན་ཉིད་ཕྱིར། །འགའ་ཚེ་འཁྲུལ་པའི་རྒྱུ་ཡིན་ནོ། །ཞེས་དང༌། འགྲེལ་བཤད་རིན་ཆེན་འཕྲེང་བ་༣༡༤ལས། དེ་གཉིས་དབང་ཤེས་སུ་འཁྲུལ་རྒྱུ་ཅི་ཞེ་ན། བརྡ་རྟེན་དང་དོན་གཞན་ལ་སྒྲོ་འདོགས་པའི་རྣམཔར་རྟོག་པ་དག་ཆོས་ཅན། དུས་འགའ་ཞིག་གི་ཚེ་དབང་ཤེས་འཁྲུལ་པའི་རྒྱུ་ཡོད་པ་ཡིན་ཏེ། གཟུགས་འཛིན་དང་དམིགས་རྒྱུར་འཛིན་པའི་མངོན་སུམ་དང། ཉེ་བར་འཇུག་པའི་རྒྱུ་མཚན་གྱིས་དེར་འཁྲུལ་བས་སོ། །ཞེས་གསུངས་པས་དཔྱད། ཡང་གཏན་ཚིགས་རིགས་པའི་དོན་བསྡུས་ལས། གཉིས་པ་མངོན་སུམ་ལྟར་སྣང་ལ་མཚནཉིད་རང་གི་སྣང་ཡུལ་ལ་འཁྲུལ་པའི་བློ། ཞེས་གསུངས་པ་ལ། རང་གི་སྣང་ཡུལ་ལ་འཁྲུལཔའི་བློ་ཆོས་ཅན། མངོན་སུམ་ལྟར་སྣང་གི་རྫས་ཡོད་ཆོས་གསུམ་ཚང་བ་ཡིན་པར་ཐལ། མངོན་སུམ་ལྟར་སྣང་གི་མཚན་ཉིད་ཡིན་པའི་ཕྱིར། འདོད་ན། དེ་ཆོས་ཅན། རང་གི་མཚོན་བྱ་མངོན་སུམ་ལྟར་སྣང་གི་མཚན་ཉིད་བྱེད་པ་ལས་གཞན་གྱི་མཚན་ཉིད་མི་བྱེད་པ་ཡིན་པར་ཐལ། མངོན་སུམ་ལྟར་སྣང་གི་རྫས་ཡོད་ཆོས་གསུམ་ཚང་བ་ཡིན་པའི་ཕྱིར། འདོད་ན། དེ་ཆོས་ཅན། མངོན་སུམ་ལྟར་སྣང་ལས་གཞན་པའི་མཚན་ཉིད་བྱེད་པར་ཐལ། འཁྲུལ་ཤེས་ཀྱི་མཚན་ཉིད་བྱེད་པའི་ཕྱིར། མ་གྲུབ་ན། དེར་ཐལ། ཁྱོད་འཁྲུལ་ཤེས་ཀྱི་མཚན་ཉིད་ཡིན་པའི་ཕྱིར་ཏེ། བསྡུས་གྲྭའི་སྤྱི་དོན་༤༨༡ལས། རང་གི་སྣང་ཡུལ་ལ་འཁྲུལ་བའི་རིག་པ། འཁྲུལ་ཤེས་ཀྱི་མཚན་ཉིད། ཅེས་གསུངས་པའི་ཕྱིར་ཟེར་ན་དཔྱད། ཡང་རྟོག་མེད་མངོན་སུམ་ལྟར་སྣང་ཡིན་ན་རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་བློ་ཡིན་པས་ཁྱབ་པར་ཐལ། གཏན་ཚིགས་རིགས་པའི་དོན་བསྡུས་ལས། དབྱེ་ན་རྟོག་པ་དང་རྟོག་མེད་མངོན་སུམ་ལྟར་སྣང་གཉིས་སོ། །མཚན་ཉིད་ནི་རིམ་པ་ལྟར། རང་གི་སྣང་ཡུལ་ལ་འཁྲུལ་པའི་ཞེན་བློ་དང་རང་གི་བདག་རྐྱེན་དབང་པོ་སླད་པ་ལས་སྐྱེསཔའི་ཞེན་བྲལ་གྱི་བློའོ། །ཞེས་གསུངས་པའི་ཕྱིར། འདོད་ན། བདག་གསལ་བར་སྣང་བའི་ཡིད་ཤེས་དང༌། རྨི་ལམ་གསལ་བར་སྣང་བའི་ཡིད་ཤེས་གཉིས་ཆོས་ཅན། རང་གི་བདག་རྐྱེན་དབང་པོ་སླད་པ་ལས་སྐྱེས་པའི་ཞེན་བྲལ་གྱི་བློ་ཡིན་པར་ཐལ། རྟོག་མེད་འཁྲུལཤེས་ཡིན་པའི་ཕྱིར། འདོད་ན། གཉིད་དང་བག་ཆགས་སོགས་ཀྱིས་བསླད་པའི་དབང་གིས་རང་གི་སྣང་ཡུལ་དེ་ཕྱིན་ཅི་ལོག་ཏུ་སྣང་ན་རང་གི་སྣང་ཡུལ་ལ་འཁྲུལ་བས་ཁྱབ་པར་ཐལ། བདག་གསལ་བར་སྣང་བའི་ཡིད་ཤེས་དང༌། རྨི་ལམ་གསལ་བར་སྣང་བའི་ཡིད་ཤེས་གཉིས་རང་གི་བདག་རྐྱེན་དབང་པོ་སླད་པས་སྣང་ཡུལ་ལ་འཁྲུལ་ཚུལ་ཡོད་པའི་ཕྱིར། འདོད་ན། ཕལ་བའི་སྔོ་འཛིན་མིག་ཤེས་ཆོས་ཅན། རང་གི་སྣང་ཡུལ་ལ་འཁྲུལ་བའི་བློ་ཡིན་པར་ཐལ། བག་ཆགས་ཀྱི་དབང་གིས་རང་གི་སྣང་ཡུལ་སྔོན་པོ་དེ་ཕྱི་དོན་དུ་མ་གྲུབ་བཞིན་དུ་ཕྱི་རོལ་དོན་དུ་གྲུབ་པར་སྣང་བའི་ཕྱིར་ཟེར་ན་དཔྱད། ཡང་བསྡུས་གྲྭའི་སྤྱི་དོན་༣༤༨ལས། བསླད་པ་མངོན་སུམ་ལྟར་སྣང་ལ་བཞི་ཡོད་དེ། འཁྲུལརྒྱུ་ཡུལ་ལ་ཡོད་པའི་རྟོག་མེད་ལོག་ཤེས་དང༌།འཁྲུལ་རྒྱུ་རྟེན་ལ་ཡོད་པའི་དེ་དང༌། འཁྲུལ་རྒྱུ་གནས་ལ་ཡོད་པའི་དེ་དང༌། འཁྲུལ་རྒྱུ་དེ་མ་ཐག་རྐྱེན་ལ་ཡོད་པའི་དེ་དང་བཞི་ཡོད་པའིཕྱིར། དང་པོ་ནི། འགལ་མེ་མྱུར་དུ་བསྐོར་བ་ལས་འཁོར་མོ་ཡུག་ཏུ་བར་མ་ཆད་པར་སྣང་བའི་དབང་ཤེས་ལྟ་བུ་སྟེ། ཞེས་གསུངས་པ་མི་འཐད་པར་ཐལ། འགལ་མེ་མྱུར་དུ་བསྐོར་བ་ལས་འཁོར་མོ་ཡུག་ཏུ་བར་མ་ཆད་པར་སྣང་བའི་དབང་ཤེས་མ་འཁྲུལ་བའི་ཤེས་པ་ཡིནཔའི་ཕྱིར་ཏེ། སྒྱུ་མའི་རྟ་སྣང་བའི་དབང་མངོན་དང༌། སྨིག་རྒྱུའི་ཆུ་སྣང་བའི་དབང་མངོན་མ་འཁྲུལ་བའི་ཤེས་པ་ཡིན་པ་གང་ཞིག དེ་གཉིས་འཁྲུལ་མ་འཁྲུལ་ལ་མཚུངས་པའི་ཕྱིར། རྟགས་དང་པོ་གྲུབ་སྟེ། བསྡུས་གྲྭའི་སྤྱི་དོན་༣༥༠ལས། སྒྱུ་མའི་རྟ་སྣང་བའི་དབང་མངོན་དང༌། སྨིག་རྒྱུའི་ཆུ་སྣང་བའི་དབང་མངོན་ལ་སོགས་པ་ནི་མ་འཁྲུལ་བའི་ཤེས་པ་ཡིན་པསཅེས་གསུངས་པའི་ཕྱིར། འདོད་ན་སྔར་གྱི་ལུང་དང་འགལ། གོང་གི་རྟགས་གཉིས་པ་གྲུབ་སྟེ། སྒྱུ་མའི་རྟ་རྟར་སྣང་བའི་དབང་ཤེས་དང༌། སྨིག་རྒྱུའི་ཆུ་ཆུར་སྣང་བའི་དབང་ཤེས་གཉིས་འཁྲུལ་ཡང་སྒྱུ་མའི་རྟ་སྣང་བའི་དབང་མངོན་དང༌། སྨིག་རྒྱུའི་ཆུ་སྣང་བའི་དབང་མངོན་མ་འཁྲུལ་བ་ཡིན་ཞེས་ཞིབ་ཆ་འབྱེད་དགོས་པ་བཞིན། འགལ་མེ་འཁོར་ལོ་འཁོར་མོ་ཡུག་ཏུ་བར་མ་ཆད་པ་འཁོར་མོ་ཡུག་ཏུ་བར་མ་ཆད་པར་སྣང་བའི་དབང་ཤེས་འཁྲུལབ་ཡིན་ཡང་འགལ་མེ་མྱུར་དུ་བསྐོར་བ་ལས་འཁོར་མོ་ཡུག་ཏུ་བར་མ་ཆད་པར་སྣང་བའི་དབང་ཤེས་མ་འཁྲུལ་བའི་ཤེས་པ་ཡིན་པའི་ཁྱད་པར་འབྱེད་དགོས་པར་མཚུངས་པའི་ཕྱིརཟེར་ན་དཔྱད། ཡང་སྒྱུ་མའི་རྟ་སྣང་བའི་དབང་མངོན་མ་འཁྲུལ་བའི་ཤེས་པ་ཡིན་ན་སྒྱུ་མའི་རྟ་འཇོག་བྱེད་ལ་སྒྱུ་མའི་རྟ་སྣང་བའི་སྐབས་སུ་སྒྱུ་མའི་རྟའི་འོག་གི་ས་གཞི་སྣང་བའི་དབང་མངོན་འཇོག་པ་ལ་དགོས་པ་མེད་པར་ཐལ། སྒྱུ་མའི་རྟ་སྣང་བའི་དབང་མངོན་མ་འཁྲུལ་བའི་ཤེས་པ་ཡིན་པའི་ཕྱིར། འདོད་མི་རིགས་ཏེ། སྒྱུ་མའི་རྟ་འཇོག་བྱེད་ལ་རྣལ་འབྱོར་སྤྱོད་པའི་དབུ་མ་རང་རྒྱུད་པས་སྒྱུ་མའི་རྟ་རྟ་མ་ཡིན་པར་འཛིན་པའི་རྟོག་པ་ཉམས་མྱོང་གི་རང་རིག་དང༌། མདོ་སྡེ་སྤྱོད་པའི་རང་རྒྱུད་པས་སྒྱུ་མའི་རྟ་སྣང་བའི་སྐབས་སུ་སྒྱུ་མའི་རྟའི་འོག་གི་ས་གཞི་སྣངབའི་དབང་མངོན་འཇོག་པར་འདོད་པ་ལས། མདོ་སྡེ་བའི་ལུགས་ལ་ཕྱི་མ་ལྟར་ཁས་ལེན་དགོས་པའི་ཕྱིར་ཏེ། བསྡུས་གྲྭའི་སྤྱི་དོན་༣༥༠ལས། སྒྱུ་མའི་རྟ་ཡོད་པར་འཇོག་བྱེད་ཀྱི་ཚད་མ་ནི། རྣལ་འབྱོར་སྤྱོད་པའི་རང་རྒྱུད་པ་ལྟར་ན་སྒྱུ་མའི་རྟ་རྟ་མ་ཡིན་པར་འཛིན་པའི་རྟོག་པ་ཉམས་སུ་མྱོང་བའི་རང་རིག་གིས་སྔར་སྒྱུ་མའི་རྟ་དམིགས་སོ་སྙམ་དུ་ཡུལ་ཅན་གྱིསཡུལ་སྒྱུ་མའི་རྟ་དམིགས་པ་དྲན་པའི་ངེས་ཤེས་རང་སྟོབས་ཀྱིས་འདྲེན་ཅིང༌། སྒྱུ་མའི་རྟ་དམིགས་པ་དྲན་པའི་ངེས་ཤེས་ཀྱིས་སྒྱུ་མའི་རྟ་ཡོད་པར་འཇོག་པས་ན་རང་རིག་གིས་སྟོབསཤུགས་ཀྱིས་སྒྱུ་མའི་རྟ་འཇོག་པ་དང༌། དྲན་པ་དེ་ངེས་ཤེས་ཀྱིས་དངོས་སུ་སྒྱུ་མའི་རྟ་ཡོད་པར་འཇོག་པ་ཡིན་ནོ། །མདོ་སྡེ་སྤྱོད་པའི་རང་རྒྱུད་པ་ལྟར་ན་དབང་ཤེས་འཁྲུལ་བ་ལ་སྒྱུ་མའི་རྟ་རྟར་སྣང་བའི་དུས་སུ་བར་སྐབས་སུ་འོག་གི་ས་གཞི་དང་བར་སྣང་སོགས་ལ་ཚད་མར་སོང་བའི་མིག་གི་དབང་ཤེས་ཞིག་ཀྱང་སྐྱེ་བར་སྲིད་ལ་དེ་ལ་སྒྱུ་མའི་རྟ་ཡང་སྣང་བས་ན་དབང་ཤེས་དེས་སྒྱུ་མའི་རྟ་ཡོད་པར་འཇོག་པ་དང༌། དེ་འདྲའི་དབང་ཤེས་ཀྱིས་སྒྱུ་མའི་རྟའི་སྣང་བ་ཡོད་པ་ལ་ངེས་པ་རང་སྟོབས་ཀྱིས་འདྲེན་ཞིང་ངེས་ཤེས་ཀྱི་རྟོག་པ་དེས་ཀྱང་སྒྱུམའི་རྟ་ཡོད་པར་འཇོག་པས་ན་དབང་ཤེས་དང་ངེས་པའི་རྟོག་པ་གཉིས་པོ་དེ་སྒྱུ་མའི་རྟ་འཇོགབྱེད་ཀྱི་ཚད་མ་ཡིན་ནོ། །མདོ་སྡེ་བའི་འདོད་པ་ནི་ཕྱི་མ་ལྟར་རོ། །ཞེས་གསུངས་པའི་ཕྱིར། འདོད་མི་རིགས་ཏེ། མདོ་སྡེ་བའི་ལུགས་ལ་སྒྱུ་མའི་རྟའི་འོག་གི་ས་གཞི་མེད་པའི་ཕྱིར་ཏེ། སྒྱུ་མའི་རྟ་སྟེང་འོག་བྲལ་བའི་རྟག་པ་ཡིན་པའི་ཕྱིར། དེར་ཐལ། བསྡུས་གྲྭའི་སྤྱི་དོན་༣༥༡ལས། སྒྱུ་མའི་རྟ་དེ་ནི་རྟོག་པས་བཞག་པའི་ཀུན་བཏགས་ཀྱི་ཆོས་དང་རྟག་པ་ཡིན་ནོ། །ཞེས་གསུངས་པའི་ཕྱིར། སྒྱུ་མའི་རྟ་རྟག་པ་ཡིན་ན་སྒྱུ་མའི་རྟ་ལ་མགོ་ཡོད་མེད་དང་དེའི་མགོ་ལ་སྲབ་འཇོག་རྒྱུ་ཡོད་མེད་དང༌། བསྡུས་གྲྭའི་སྤྱི་དོན་༣༥༢ལས། ཐལ་འགྱུར་བས་སྨིག་རྒྱུའི་ཆུ་དང་སྒྱུ་མའི་རྟ་དང་དུང་སེར་པོ་སོགས་གཟུགས་ཀྱི་སྐྱེ་མཆེད་དུ་བཞག་པ་ཡིན་ལ། དེ་དག་དེ་ཡིན་པའི་རྒྱུ་མཚན་ནི།དཔེར་ན།སྒྱུ་མའི་རྟ་དང་དུད་འགྲོའི་རྟ་གཉིས་མིག་ཤེས་ལ་སྣང་བ་ཙམ་ལ་ནི་ཁྱད་པར་མེད། དོན་སྟེང་དུ་རང་ངོས་ནས་གྲུབ་མ་གྲུབ་དཔྱད་ན་ནི་མེད་པ་འདྲ་མཉམ་ཡིན་པས་ན་དེ་གཉིས་ཀྱི་གཟུགས་ཕན་ཚུན་ཅིག་ཤོས་མིག་ཤེས་ཀྱི་གཟུང་བྱ་ཡིན་ན་ཅིག་ཤོས་ཀྱང་ཡིན་དགོས། ཅིག་ཤོས་མིན་ན་ཅིག་ཤོས་ཀྱང་མིན་དགོས་པའི་ཕྱིར་ཞེས་བཞེད་པའོ། །ཞེས་གསུངས་པ་སོགས་ཀྱིས་དཔྱད། ཡང་བློ་རིག་ལས། རང་གི་སྣང་ཡུལ་ལ་འཁྲུལ་བའི་བློ། མངོན་སུམ་ལྟར་སྣང་གི་མཚན་ཉིད། མཚན་གཞི་ནི། རྗེས་དཔག་ལྟ་བུའོ། །ཞེས་གསུངས་པ་ལ། རྗེས་དཔག་ཆོས་ཅན། མངོན་སུམ་ཡིན་པར་ཐལ། མངོན་སུམ་ལྟར་སྣང་ཡིན་ན་མངོན་སུམ་ཡིན་དགོས་པའི་ཕྱིར། མ་གྲུབ་ན། དེར་ཐལ། རྟགས་ལྟར་སྣང་ཡིན་ན་རྟགས་ཡིན་དགོས་པ་གང་ཞིག མཚུངས་པའི་ཕྱིར། རྟགས་ཕྱི་མ་མ་གྲུབ་ན། མཚུངས་པར་ཐལ། སྤྱིར་བཏང་གི་གཞི་དེ་ཆོས་དེ་ལྟར་སྣང་ཡིན་པ་ལ་གཞི་དེ་ཆོས་དེ་ཡིན་དགོས་པའི་ཕྱིར། མ་གྲུབ་ན། དེར་ཐལ། སྤྱིར་བཏང་གི་གཞི་དེ་ཆོས་དེ་ལྟར་སྣང་ཡིན་པའི་ཚད་ཡོད་པའི་ཕྱིར་ཟེར་ནས་གཞི་དེ་ཆོས་དེ་ལྟར་སྣང་ཡིན་པའི་ཚད་ལ་གང་འཇོག་དཔྱད། ཡང་གངས་རི་སྔོན་པོར་སྣང་བའི་དབང་ཤེས་ཆོས་ཅན། རང་གི་སྣང་ཡུལ་ལ་འཁྲུལ་བའི་བློ་ཡིན་པར་ཐལ། མངོན་སུམ་ལྟར་སྣང་ཡིན་པའི་ཕྱིར། ཁྱབ་པ་ཁས། འདོད་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། རང་གི་སྣང་ཡུལ་ལ་འཁྲུལ་བའི་བློ་མ་ཡིན་པར་ཐལ། འཁྲུལ་ཤེས་མ་ཡིན་པའི་ཕྱིར། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། འཁྲུལ་ཤེས་མ་ཡིན་པར་ཐལ། ཁྱོད་འཁྲུལ་མེད་ཉིད་དུ་རྟོགས་རྒྱུ་ཡོད་པའི་ཕྱིར། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། ཁྱོད་འཁྲུལ་མེད་ཉིད་དུ་རྟོགས་རྒྱུ་ཡོད་པར་ཐལ། གངས་རི་སྔོན་པོར་སྣང་བའི་དབང་ཤེས་ཞེས་བརྗོདཔའི་སྒྲ་དེ་ལ་བརྟེན་ནས་ཁྱོད་འཁྲུལ་མེད་ཉིད་དུ་གོ་ནུས་པ་ཡིན་པའི་ཕྱིར། མ་གྲུབ་ན། གངས་རི་སྔོན་པོར་སྣང་བའི་དབང་ཤེས་ཞེས་བརྗོད་པའི་སྒྲ་ཆོས་ཅན། ཁྱོད་ལ་བརྟེནནས་གངས་རི་སྔོན་པོར་སྣང་བའི་དབང་ཤེས་དེ་འཁྲུལ་མེད་ཉིད་དུ་གོ་ནུས་པར་ཐལ། ཁྱོདགངས་རི་སྔོན་པོར་སྣང་བའི་དབང་ཤེས་ཀྱི་དངོས་མིང་ཡིན་པའི་ཕྱིར། ཁྱབ་སྟེ། ཁྱོད་ཆོས་དེའི་དངོས་མིང་ཡིན་ན་ཁྱོད་ལ་བརྟེན་ནས་ཆོས་དེ་འཁྲུལ་མེད་ཉིད་དུ་གོ་ནུས་པ་ཞིག་དགོསཔའི་ཕྱིར། མ་གྲུབ་ན། དེར་ཐལ། རྣམ་འགྲེལ་ལས། བློ་ནི་འཁྲུལ་པ་མི་འཇུག་པ། །རྟག་ཏུ་དངོས་དང་སྒྲོ་འདོགས་ལ། །སེང་གེ་བྲམ་ཟེའི་ཁྱེའུ་ལ། །དེ་ལྟར་བརྗོད་པའང་འཇིག་རྟེན་ཡོད། །ཅེས་གསུངས་པའི་ཕྱིར་ཟེར་ན་དཔྱད། ཡང་གངས་རི་སྔོ་སྣང་གི་དབང་ཤེས་ཆོས་ཅན། མ་འཁྲུལ་བ་ཡིན་པར་ཐལ། ཁྱོད་ཀྱི་སྣང་ཡུལ་རང་མཚན་ཡིན་པའི་ཕྱིར། ཁྱབ་སྟེ། ཤིང་གི་སྤྱི་བློ་ཆོས་ཅན། མ་འཁྲུལ་བ་ཡིན་པར་ཐལ། ཁྱོད་ཀྱི་སྣང་ཡུལ་རང་མཚན་ཡིན་པའི་ཕྱིར། ཞེས་བཀོད་པ་དེ་དང༌། ཤིང་གི་སྤྱི་བློ་ཆོས་ཅན། ཁྱོད་ཀྱི་སྣང་ཡུལ་རང་མཚན་མ་ཡིན་ཏེ། ཁྱོད་འཁྲུལ་ཤེས་ཡིན་པའི་ཕྱིར་ཟེར་བའི་སྒོ་ནས་འཁྲུལ་བ་ཡིན་མིན་སྒྲུབ་ཚུལ་ཡོད་པ་གང་ཞིག རྟགས་དེ་ལ་ཁྱབ་བ་ཡོད་དགོས་པའི་ཕྱིར། རྟགས་དང་པོ་གྲུབ་སྟེ། རྣམ་འགྲེལ་ལས། དེ་ཡིས་ཇི་ལྟར་ཀུན་བརྟགསཔ། །དེ་ནི་དམ་པའི་དོན་དུ་མེད། །གསལ་བ་རྣམས་ནི་རྗེས་མི་འགྲོ། །རྗེས་འགྲོ་གཞན་ནི་སྣང་བ་མེད། །ཅེས་དང༌། འགྲེལ་བཤད་རིན་འཕྲེང་༣༠ལས། དེ་ཡི་ནས་དོན་དུ་མེད་ལ། ཤིང་སྤྱི་ཆོས་ཅན། དོན་དམ་དུ་མེད་དེ། ཤིང་གི་སྤྱི་བློས་སྒྲོ་བཏགས་པས་སོ། །རང་མཚན་ཡོད་ན་གསལ་བ་དང་གཅིག་གམ་རྫས་ཐ་དད། གཅིག་ན་གསལ་བ། བ་ལང་ནག་སྒུར་ཆོས་ཅན། བ་ལང་གི་རིགས་སྤྱི་དང་གཅིག་མ་ཡིན་ཏེ། དཀར་ཟལ་ལ་རྗེས་སུ་མི་འགྲོ་བས་སོ། །གཉིས་པ་ལྟར་ན། བ་ལང་གི་གསལ་བ་ཆོས་ཅན། རང་ལ་རྫས་གཞན་དུ་གྱུར་པའི་ཁྱོད་ཀྱི་སྤྱི་མེད་པར་ཐལ། ཡོད་ན་མངོན་སུམ་གྱིས་དམིགས་དགོས་པ་ལ་མ་དམིགས་པས་སོ། །ཞེས་གསུངས་པའི་ཕྱིར་ཟེར་ན་དཔྱད། ཡང་རང་གི་འཛིན་སྟངས་ཀྱི་ཡུལ་ལ་འཁྲུལ་བའི་བློ་ཡིན་ན་རང་གི་འཛིན་སྟངས་ཀྱི་ཡུལ་མེད་དགོས་པར་ཐལ། འདོད་པའི་ཕྱིར། འདོད་ན། རང་གི་སྣང་ཡུལ་ལ་འཁྲུལ་བའི་བློ་ཡིན་ན་རང་གི་སྣང་ཡུལ་མེད་དགོས་པར་ཐལ། མཚུངས་པའི་ཕྱིར། འདོད་ན། གངས་རི་སྔོན་པོར་སྣང་བའི་དབང་ཤེས་ཆོས་ཅན། རང་གི་སྣང་ཡུལ་མེད་པར་ཐལ། རང་གི་སྣང་ཡུལ་ལ་འཁྲུལ་བའི་བློ་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེ་ཆོས་ཅན། རང་གི་སྣང་ཡུལ་ལ་འཁྲུལ་བའི་བློ་ཡིན་པར་ཐལ། འཁྲུལ་ཤེས་ཡིན་པའི་ཕྱིར། ཁྱབ་སྟེ། དེ་འཁྲུལ་ཤེས་ཀྱི་མཚན་ཉིད་ཡིན་པའི་ཕྱིར། མ་གྲུབ་ན། དེར་ཐལ། སྤྱི་དོན་ལས། རང་གི་སྣང་ཡུལ་ལ་འཁྲུལ་བའི་རིག་པ་འཁྲུལ་ཤེས་ཀྱི་མཚན་ཉིད། ཅེས་གསུངས་པའི་ཕྱིར། འདོད་ན། དེ་ཆོས་ཅན། རང་གི་སྣང་ཡུལ་མེད་པར་ཐལ། འཁྲུལ་ཤེས་ཡིན་པའི་ཕྱིར། རྟགས་ཁྱབ་ཁས། འདོད་མི་ནུས་ཏེ། སྣང་ཡུལ་ཤེས་པ་ཀུན་ལ་ཡོད་པ་ཡིན་པའི་ཕྱིར། མ་གྲུབ་ན། དེར་ཐལ། གཏན་ཚིགས་དོན་བསྡུས་ལས། སྣང་ཡུལ་ཤེས་པ་ཀུན་ལ་ཡོད། །ཞེས་གསུངས་པའི་ཕྱིར་ཟེར་ན་དཔྱད། ཡང་རྗེས་དཔག་ཡིན་ན་འཁྲུལ་ཤེས་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། རང་གི་སྣང་ཡུལ་རྟོགས་པའི་རྗེས་དཔག་ཆོས་ཅན། འཁྲུལ་ཤེས་ཡིན་པར་ཐལ། རྗེས་དཔག་ཡིན་པའི་ཕྱིར། ཁྱབ་པ་ཁས། འདོད་ན། རང་གི་སྣང་ཡུལ་རྟོགས་པའི་རྗེས་དཔག་ཆོས་ཅན། རང་གི་སྣང་ཡུལ་ལ་འཁྲུལ་པར་ཐལ། འཁྲུལ་ཤེས་ཡིན་པའི་ཕྱིར། ཁྱབ་པ་ཁས། འདོད་ན། རང་གི་སྣང་ཡུལ་རྟོགས་པའི་རྗེས་དཔག་ཆོས་ཅན། རང་གི་སྣང་ཡུལ་ལ་མ་འཁྲུལ་པར་ཐལ། རང་གི་སྣང་ཡུལ་རྟོགས་པའི་ཕྱིར། ཁྱབ་སྟེ། བུམ་པ་རྟོགས་ན་བུམ་པ་ལ་མ་འཁྲུལ་བས་ཁྱབ་པ་གང་ཞིག མཚུངས་པའི་ཕྱིར་ཟེར་ན་དཔྱད་དོ། །