འཇམ་དཔལ་ཁྲོ་ཆུ་དུག་གདོང་གི་ལས་མཐའ་བསྒྲལ་ལས་ཉུང་བ།
འཇམ་དཔལ་ཁྲོ་ཆུ་དུག་གདོང་གི་ལས་མཐའ་བསྒྲལ་ལས་ཉུང་བ་བཞུགས་སོ༔ ཐུན་ཁང་ལིང་ག་བསྐྱེད་ལ། དམིགས་བྱ་འགུགས་གཞུག་བྱས་ལ། ཧཱུྃ། ཆོས་སྐུ་ཞི་བའི་ངང་ལས་མ་གཡོས་ཀྱང་། །ཐབས་ཀྱི་ཆོ་འཕྲུལ་འཇམ་དཔལ་གཤིན་རྗེའི་གཤེད། །ཁྲག་འཐུང་རྔམ་བརྗིད་འབར་བའི་སྐུར་བཞེངས་ལ། །ཉོན་མོངས་མ་རིག་དུག་ལྔའི་ཕུང་པོ་ལ། །བསྟན་པ་བཤིག་པའི་དགྲ་བགེགས་ལ་སོགས་པ། །མྱུར་དུ་ཁུག་ལ་བསྒྲལ་བའི་ཕྲིན་ལས་མཛོད། །དང་པོ་ཐུན་གྱིས་བསད་པ་ནི། ཡུངས་དཀར་ནག་གིས་བྲབ་ཅིང་འདི་སྐད་དོ། །།ཧཱུྃ། ང་ནི་ལས་ཀྱི་གཤིན་རྗེ་ཡིན། །དགྲ་དང་བགེགས་ཀྱི་གཉེན་པོ་ཆེ། །ཡུངས་དཀར་རྒྱལ་པོ་ཤ་རི་རཾ། །དགྲ་བགེགས་སྟེང་དུ་དབབ་པར་བྱ། །ཁྲག་ཐུན་ནད་རླངས་ཆི་ལི་ལི། །མཚེ་ཡི་མདའ་འཕེན་ཟངས་སེ་ཟང་། །གནམ་ལྕགས་ཐོག་ཆེན་ཧྲི་ལི་ལི། །ཡུངས་ཀར་རྦབ་དྲིལ་ཤ་ར་ར། །དགྲ་བགེགས་སྟེང་དུ་དབབ་པར་བྱ། །ཕུང་པོ་གཏན་ནས་བརླག་པར་བྱ། །ཞེས་ཐུན་བརྡེག དེ་ནས་ཕུར་པ་ཐོགས་ལ། ཧཱུྃ། དམ་ཚིག་ཆེན་པོའི་དུས་ལ་བབ། །རྡོ་རྗེ་ཕུར་པ་ཀཱི་ལ་ཡ། །སྟོད་ནི་ཁྲོ་ཆེན་འབར་བའི་ཞལ། །སྐུ་སྨད་ཟུར་གསུམ་དབལ་
དང་ལྡན། །ཆང་ཟུང་རྩེ་ནས་གློག་སྟོང་འཁྱུག །ཆུ་སྲིན་ཁ་ནས་འབྲུག་ལྟར་ལྡིར། །སྐད་ཅིག་སྲོག་དང་བྲལ་བར་གྱིས། །དེ་ནས་རལ་གྲི་ཐོགས་ལ། ཧཱུྃ། འཇིགས་བྱེད་ཆེན་པོའི་དུས་ལ་བབ། །ཉམས་པའི་དམ་ཉམས་དགྲ་དང་བགེགས། །རིངས་པར་ཁུག་ལ་བསྒྲལ་ཆུག་ཅིག །མངོན་སྤྱོད་དྲག་པོའི་དུས་ལ་བབ། །མཚོན་ཆེན་འབར་བ་ཆེན་པོ་ཡིས། །ལུས་ནི་དུམ་བུར་གཏུབ་པར་བྱ། །དབང་པོ་རྩད་ནས་གཅོད་པར་བྱ། །རྡུལ་ཕྲན་བཞིན་དུ་གཏོར་བར་བྱ། །མངོན་སྤྱོད་དྲག་པོའི་ལས་མཛོད་ཅིག །རྡོ་རྗེའི་ཐོ་བ་ཐོགས་ལ༔ ཧཱུཾ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་འདའ་བྱེད་སྡིག་ཅན་འདི། །རྡོ་རྗེ་མེ་འབར་སྙིང་བསྲེགས་ནས། །ལུས་ངག་རྡུལ་ཕྲན་བཞིན་དུ་རློགས། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷའམ་འོན་ཏེ་བརླག་པར་འགྱུར། །རྡུལ་ཕྲན་བཞིན་དུ་མེད་པར་བྱ། །རིམ་པར་བཏབ་ལ་ལས་མཐའ་བསྡུའོ།། ༈ དེ་ནས་ཧོམ་ཁུང་གྲུ་གསུམ་ཚེར་མ་ཅན་གྱི་ཤིང་ལ་མེ་སྤར་ལ། གཙོ་བོ་བསྐྱེད་ལ། ཞལ་ཧོམ་ཁུང་གདངས་བའི་ནང་བསྟབ་པར་བསམས་ལ། ལིང་རོ་རྣམས་བསྲེག་པར་བྱ་སྟེ། ཧཱུྃ། འཇིགས་བྱེད་ཡ་མཱན་ཀ་ནི། །
སྲིད་པ་གསུམ་ལ་འཁོར་ལོ་བསྐོར། །འགྲོ་བ་ཀུན་གྱི་སྲོག་དབུགས་ལེན། །ཉམས་པར་གྱུར་པའི་དགྲ་དང་བགེགས། །འདི་ཡི་ལས་ཀྱིས་མཐའ་བསྡུས་ཏེ། །རྡུལ་ཕྲན་བཞིན་དུ་བརླགས་བྱས་ནས། །ཁྲོ་ཆུ་དུག་གདོང་ཞལ་དུ་བསྟབས། །འཆི་བདག་ནག་པོའི་ཞལ་དུ་བསྟབས། །ཚེ་བདག་དམར་པོའི་ཞལ་དུ་བསྟབས། །སྲོག་བདག་ནག་པོའི་ཞལ་དུ་བསྟབས། །བེ་བྷཱ་སྭ་ཏའི་ཞལ་དུ་བསྟབས། །ཟ་བ་ལྗང་དམར་ཞལ་དུ་བསྟབས། །ཡ་མ་རཱ་ཙའི་ཞལ་དུ་བསྟབས། །བཞེས་ཤིག་རོལ་ཅིག་ཁ་རཾ་ཁཱ་ཧི། ཞེས་བརྗོད། དེ་ནས་མངའ་གསོལ་ཟློག་པ་ཟོར་མདོས་སྦྱར། གཞན་ཡང་ཆོས་སྐྱོང་ཤེས་ཚད་སྐབས་འདིར་སྦྱར། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།