ལས་བཞིའི་ལས་སྦྱོར་སྒྲུབ་པ།
ལས་བཞིའི་ལས་སྦྱོར་སྒྲུབ་པ་བཞུགས་སོ།
དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དམ་ཅན་རྡོ་རྗེ་ལེགས་པ་ཡི། །ནང་སྒྲུབ་སྔགས་སྒྲུབ་དཀྱིལ་འཁོར་ལས། །འཇུག་པར་ལས་བཞིའི་སྒྲུབ་པ་ལ། །ལག་ལེན་དམར་རིམ་བཤད་པར་བྱ། །དེ་ལ་ཐོག་མར་ནང་སྒྲུབ་རྟགས་ཐོན་ནས། འདི་ལ་བཞི་སྟེ། ཞི་བའི་ལས་དང་། རྒྱས་པའི་ལས་དང་། དབང་གི་ལས་དང་། དྲག་པོའི་ལས་སོ། །དེ་ལྟར། སླར་ཐོག་མར་ཞི་བའི་ལས་བྱ་བ་ནི། དམིགས་པ་ལ་བརྟེན་ནས་ཕོ་ཉ་སྒྲུབ་པ་དང་། ༧ སྨན་ལ་བརྟེན་ནས་ནད་ཞི་བ་དང་། མཚོན་ཆ་ལ་བརྟེན་ནས་གཡུལ་ཞི་བ་དང་། རྫས་ལ་བརྟེན་ནས་བགེགས་ཞི་བ་དང་། འབྲུ་སྣ་ལ་བརྟེན་ནས་དབུལ་འཕོང་ཞི་བར་བྱེད་པ་དང་ལྔའོ།། ༧ དེ་ལ་དང་པོ་དམིགས་པ་ལ་བརྟེན་ནས་ཕོ་ཉ་སྒྲུབ་པ་ནི། ནང་སྒྲུབ་ཅི་འབྱོར་དང་། སྲུང་
འཁོར་རྟ་མགྲིན་འདོན་བསྙེན་པ་སོང་ནས། ཧཱུཾ། ཁྲོ་བོ་ཆེན་པོ་མི་བཟད་པ། ཆར་སྤྲིན་ལྟ་བུར་རབ་ཏུ་གནག །སྲེག་བྱེད་དབུས་ན་འཇིགས་གཟུགས་སྐུ། །རྟ་མགྲིན་རྒྱལ་ལ་ཕྱག་འཚལ་བསྟོད། །རྣལ་འབྱོར་ལས་བཞི་སྒྲུབ་པ་ལ། །སྒྲུབ་ཏུ་མི་སྟེར་བར་ཆད་བྱེད། །ཕུད་ལ་རློམས་ནས་དངོས་གྲུབ་བཅོམ། །འཚེ་བྱེད་ཕྱི་ནང་མ་གནས་ཤིག །ཨོཾ་ཧུ་ཤྲཱི་ཝ་བཛྲ་རཏྣ་པདྨ་ཀརྨ་རཀྵ་རཀྵ༔ ནང་སྒྲུབ་ཕྱག་རྡོར་བསྙེན་ལ། །ཧཱུྃ། སྣང་སྲིད་མ་ལུས་དབང་བསྡུས་ལ། །བཅོམ་ལྡན་སངས་རྒྱས་ཀུན་གྱི་ཐུགས། །མཐུ་སྟོབས་ནུས་པའི་བདག་པོ་ཆེ། །རྡོ་རྗེ་འཛིན་ལ་
ཕྱག་འཚལ་བསྟོད། །སྐུ་མདོག་ཆ་ལུགས་ལས་བཞིའི་མདོག །མི་ལ་དངོས་གྲུབ་འབྱུང་དུ་མི་སྟེར་བ། །ནང་གི་ལྷ་ལྟར་རྒྱུ་བའི་བགེགས། །གནོད་འཚེར་ནང་དུ་མ་འདུག་ཅིག་་ཨོཾ་བཛྲ་ཙཎྜ་འབྱུང་པོ་ཨུ་ཙ་ཏ་ཡ་ཕཊ༔ རྩ་སྔགས་སོང་ནས། མདུན་བསྐྱེད་ཐུགས་ཀར་ཧཱུཾ་ཡིག་དཀར་པོ་འཕྲོས། །སེམས་ཅན་ལ་ཕོག་ནད་གདོན་སྡིག་སྒྲིབ་དག །ཚུར་འདུས་ཞི་སྤྲུལ་དམ་ཅན་སྐུ་རུ་གྱུར། །སྐུ་མདོག་དཀར་པོ་ཞལ་གཅིག་ཞི་འཛུམ་གཟུགས། །ཕྱག་གཉིས་གཡས་ན་རིན་ཆེན་སྒྲོམ་བུ་ལ། །ནོར་བུ་ཆ་བདུན་རི་མོ་ཡོད་པ་ཚེའཛིན། །གཡོན་ན་བྷན་ནོར་བུས་གང་བ་བསྣམས། །དར་དང་རིན་ཆེན་མཛེས་པས་སྐུ་ལ་བརྒྱན། །སེང་གེ་མདོག་སྔོན་སྟེང་ན་རོལ་སྟབས་བཞུགས། །གཡས་སུ་རྣམ་ཐོས་སྲས་དང་རྒྱབ་ཏུ་ནི། །ཛམ་ལྷ་མཆེད་བརྒྱད་ནོར་རྒྱུན་གཡོན་དུ་ནི། །འབྲོག་གནས་མཆེད་ལྔ་མདུན་དུ་ཡེ་ཤེས་གྲགས། །ཨ་པར་ཙིཏྟ་གནོད་སྦྱིན་ཟངས་མདོག་དང་། །ལྷ་མོ་བརྟན་མ་ལོངས་སྤྱོད་སྨན་རྩི་དབང་། །ཞི་ཞལ་བགེགས་ཉམས་འབུམ་ཕྲག་བཞི་ཡི་འཁོར། །སྤྱི་བོའི་གཙུག་ཏུ་སངས་རྒྱས་སྨན་གྱི་བླ། །སྔོན་པོ་རྣམ་རྒྱལ་སྨན་འཛིན་སྤྲུལ་སྐུའི་
ཚུལ། །མཚན་དཔེས་རབ་རྒྱན་རྒྱལ་བ་རབ་འབྱམས་བསྐོར། །དམ་ཅན་གཡས་སུ་དམ་ཅན་རེ་མ་ཏི། །ཡེ་ཤེས་འཇིག་རྟེན་མ་མོའི་འཁོར་གྱིས་བསྐོར། །རྒྱབ་ཏུ་ས་ཡི་ལྷ་མོ་བརྟན་མ་ལ། །ས་འཛིན་སྨན་རྩི་འབྲུ་བཅུད་བདག་པོས་བསྐོར། །གཡོན་དུ་བོད་ཁམས་རྡོ་རྗེ་རབ་འབྱམས་མ། །བརྟན་མ་བཅུ་གཉིས་བྲན་གཡོག་འཁོར་གྱིས་བསྐོར། །མདུན་དུ་སྲུང་མ་ཞང་བློན་སྡེ་བདུན་དང་། །ཕོ་ཉ་ཞི་བྱེད་ལྷ་སྲིན་བསམ་མི་ཁྱབ། །ཀུན་བཟང་ཞི་ཞལ་འཛུམ་མདངས་ངང་ལ་བཞུགས། །དེ་ལྟར་ལྷ་ཚོགས་རང་སྲོག་འོད་ཟེར་ལས། །རང་རང་གནས་ནས་གནས་འདིར་གཤེགས་སུ་གསོལ། །དམ་གཙང་ཡིད་འོང་ཕོ་བྲང་ཉམས་དགའ་བ། །སྒྲུབ་མཆོག་ཞིང་དེར་བྱིན་ཆེན་དབབ་ཏུ་གསོལ། །སྨན་རྫས་འབྲུ་མཆོག་ནུས་པ་སྦྱར་དུ་གསོལ། །ཕྱི་ཡི་བར་ཆད་གདོན་བགེགས་ཞི་བར་མཛོད། །ནང་གི་ན་ཚ་སྡུག་བསྔལ་ཞི་བར་མཛོད། །ཚེ་ཡི་སྐག་དང་བདུན་ཟུར་ཞི་བར་མཛོད། །བཙའ་ཚིག་སད་སེར་མུ་གེ་ཞི་བ་དང་། །གློ་གོར་ཧོན་གོད་ཡམས་ཁ་ཞི་བར་མཛོད། །ཞི་བའི་ཕོ་ཉ་བཛྲ་འབར་བ་རྩལ། །ནམ་ཞིག་ཕྱི་མ་མུ་མཐའ་ཐུག་
གི་བར། །དཔའ་རྩལ་མི་འཇིགས་ཁྲི་ལ་བཞུགས་སུ་གསོལ། །ཡིད་འཕྲོག་མཆོད་རྫས་དྲི་ལྡན་སྨན་རྩི་དང་། །རང་ཡིད་དགའ་མཐུན་མཆོད་རྫས་དམ་རྫས་འབུལ། །འཇིགས་སླ་རྐང་གཉིས་ལྗོན་རྩེར་ལེགས་བསྲུབས་ནས། །ཐབས་ཤེས་གཉིས་བཀང་དྲི་ཟའི་ཀླུ་ཡིས་འབུལ། །སྲེག་བྱེད་དབུས་སུ་འཇིགས་མེད་བལྟམས་པའི་སྟེང་། །བསིལ་ཟེར་མདོག་ལྟར་ཚ་ཟེར་འབུམ་ལྟར་འཇིགས། །གཞོམ་མེད་དཔུང་དང་རིགས་བདག་བཅས་པ་དང་། །སྤྲུལ་གཞི་སྤྲུལ་བསྒྱུར་སྤྲུལ་པ་བཅས་ལ་བསྟོད། །འཇིགས་སླའི་འཇིགས་བརྒྱད་འཚེ་བྱེད་བཞི་བརྒྱ་དང་། །ཉེར་འཚེ་སུམ་སྟོང་དྲུག་བརྒྱ་སྟོང་ཕྲག་བརྒྱ། །ནམ་ཞིག་སྐར་ཚོགས་བྱང་ཆུབ་ཐོབ་བར་དང་། །རྐང་པ་བཞི་གཉིས་ལྗོན་པར་དུ་འཇིགས་པར། །མི་འབྲལ་མགོན་སྐྱབས་བར་ཆད་ཞི་བར་མཛོད། །རྣལ་འབྱོར་མ་ཐོགས་ཕྲིན་ལས་འགྲུབ་པར་མཛོད། །ཅེས་རང་ཉིད་ཡི་དམ་ཐུགས་ཀ་ནས་འོད་ཟེར་མཐིང་ནག་འཕྲོས། མདུན་བསྐྱེད་དམ་ཅན་ཐུགས་ཀར་ཕོག །དམ་ཅན་ཐུགས་ཀ་ནས་འོད་ཟེར་དཀར་པོ་འཕྲོས། བདག་གཞན་སེམས་ཅན་ཐམས་ཅད་ལ་ཕོག །ནད་གདོན་བར་ཆད་ཐམས་ཅད་བསལ་ནས། རང་མདུན་འདོན་ཆ་ལྟར་བྱུང་ནས་ཞི་བའི་ཕྲིན་ལས་ཐམས་
ཅད་བསྒྲུབ་པར་བསམ། རྩ་སྔགས་མཐར། བཛྲ་སཱ་དྷ་ཨོཾ་སྭཱ་ཧཱ། གྲངས་བསྙེན་འབུམ་ཐེར་ཡིན། དེ་ལྟར་དམིགས་པ་ལ་བརྟེན་ནས་ཕོ་ཉ་བསྒྲུབ་པའོ།། ༈ གཉིས་པ་སྨན་ལ་བརྟེན་ནས་ནད་ཞི་བར་བྱེད་པ་ནི། ཙནྡན། སླེ་ཏྲེ། གུ་གུལ་དཀར་ནག །ག་པུར། ལ་རྒོད། དུར་བྱེད། ཆུ་རྩ། བཟང་དྲུག །ལི་ཁྲི། རྡོག་གཅིག །ད་ལི། བབ་བླ། མུཟི། ནི་ར། སྤང་སྤོས། རྒྱ་སྤོས་དེ་རྣམས་ལ། ཕོ་ཉའི་སྔགས་ཀྱི་གྲངས་བསྙེན་ལ་བརྟེན་ནས། རིལ་བུ་བྱས་ཏེ་ནུབ་རེ་ཟ། ནད་ཐམས་ཅད་ཀྱི་འགོག་ཏུ་གྱུར། ནད་ལ་སྨན་མི་གཟུགས་ན་སྨན་གཟུངས་སོ། །གི་ཝཾ། མཚལ། རྡོ་དྲེགས། རེ་ཀོ །ཀོན་ནག །གཟའ་དུག །གླ་རྩི། ཤུ་དག །རུ་རྟ། སླེ་ཏྲེ། ཨ་རུ། མུཟི། གྲི་ཁྲག །ལོ་བརྒྱད་ཆུས་ས་རིལ་བུ་བྱས་ནས་ཞག་བདུན་ནང་སྒྲུབ་ལྟར་བྱས་ནས། ཟོས་ན་ཀུན་གྱི་སྨན་དུ་མཆོག །དེ་ལྟར་སྨན་ལ་བརྟེན་ནས་ནད་ཞི་བའོ། ༧ །གསུམ་པ་མཚོན་ལ་བརྟེན་ནས་གཡུལ་ཞི་བར་བྱེད་པ་ནི། སྐྱེར་པའི་མདའ་ལ་གྲི་ལྕགས་མདེའུ་བཙུགས། ཕོ་ཉའི་སྔགས་གྲངས་སོང་ནས་གཡུལ་དུ་འཕངས་ལ། བདུད་རྩི་ནམ་མཁའ་ལ་བཏོར་ནས། དམ་ཅན་ཆེན་པོ་དགྲ་ལྷ་ཆེན་པོ་གཡུལ་ཞི་བར་མཛོད་ཅིག །སོགས་འདོད་དོན་གསོལ་བ་གདབ། ཡང་ན་རལ་གྲི་ཡུ་བ་ལ་དར་ནག་བཏགས་ལ་རབ་གསེར། འབྲིང་དངུལ། ཐ་མ་མཚལ་གྱིས་བྲིས་ལ། ལྷ་བསྙེན་དང་། སྲོག་སྙིང་། ཕོ་ཉའི་སྔགས། དེ་མཐར་ཤམ་བུར། །
བཛྲ་ཁ་ཁ་ཡར་སྣོ་དུལ་མཚོན་ལ་དུ་རིལ་མི་ལི་རཀ་སྭཱ་ཧཱ། བྲིས་ནས་བརྟག་པ་ཕྱོགས་སུ་གཡུགས་ནས་ཞིའོ། །ཁྲབ་དང་ཕུབ་རྨོག་སོགས་གོ་ལ་བཏབ་ན་མཚོན་གྱི་གནོད་པ་ཞིའོ། །དེ་ལྟར་མཚོན་ལ་བརྟེན་ནས་གཡུལ་ཞིའོ། ༈ །བཞི་པ་རྫས་ལ་བརྟེན་ནས་བགེགས་ཞི་བར་བྱེད་པ་ནི། གུ་གུལ་དཀར་ནག །ཕག་ཚིལ། ར་རྟ་ཁྱི་གསུམ་ཁྲག །མི་གསུམ་བསད་པའི་གྲི། རྡོ་གྲིར་ཤི་བའི་ཤ་ཁྲག །ཕ་ཝཾ་ལོང་བུ། སྤྱང་བྲུན། གངས་སྦལ་ཤ །བྱི་ལ་ནག་པོའི་ཁྲག །ཡུགས་ས་སྟག་ལོའི་སྲིན་མཛུབ་ཕུག་པའི་ཁྲག སྲམ་ཤ །གཙང་པའི་ཤ །དེ་རྣམས་སྒྲུབ་པའི་སྐབས་སུ་སྔགས་བཏབ། དུས་རྒྱུན་གྲིབ་ཅི་རིགས་ལ་བདུག་ན་ཕན། གླ་རྩི། ར་ཁྲག །ཕག་ཁྲག །སྦལ་སྦྲུལ། །སྤྱང་། སྡོམ། སྡིག་ཁ་བརྒྱ། སྲམ་ཤ ཆུ་གླང་རྭ། གསེར་དངུལ་བྱི་རུ་དུང་མུ་མན་མུ་ཏིག་ཟངས་ལྕགས་རྣམས། ལོ་ཐོག་བགེགས་ཀྱིས་བཅོམ་པའི་དུས་བཙའ་ཚིག་སད་སེར་འོང་། བཙའ་བའི་དུས་སུ་རིན་ཆེན་བུམ་པའི་ནང་། རྫས་རྣམས་བཏབ། ཆུ་ནང་བ་འོ་བླུགས་པའི་སྔགས་ཤམ་བུ་འབུམ་ཐེར་བཏོན་ཏེ་ཞིང་ལ་གཏོར། ཨོཾ་ཀུ་ལ་བཤའ་ཡ་དམར་པོ་ཛྭ་ལ་ཧ་རོ་ཤཱནཾ་ཀུ་རུ་ཧཱུྃ། རང་མདུན་ཕོ་ཉི་སྣ་ལ་ཆུ་ཁ་དོག་སྣ་ལྔ་བབ། ལོ་ཐོག་ལ་བཙའ་བབ་པ་དེ་མེ་ལོང་གཡའ་དག་པ་བཞིན་དག་པར་བསམ། ༢ ཡང་ན་བཤའི་བྷ་ཏོ་ཆེན་པོའི་ནང་དུ་ལིང་ག་མགོ་བྱ། ལུས་དྲོད་པ་འདྲ་བ། ལག་པ་མིའི་ལག་པ་འདྲ་བ་གཅིག་མཇུག་མ་སྦྲུལ་ལ་དཔེའུ་རིས་
ལྟར་བྱས་ལ་བཀུག་གཞུག་སྤྱི་ལྟར་བྱས་ཏེ་ཡུལ་མི་ཕོ་མོ་རྣམས་ཀྱི་ཕོས་མཚོན་བཟུང་ལ་དེད། མོས་སླ་ང་བརྡུང་ལ་ཕོ་ལང་བཏབ། ལམ་གསུམ་འདུས་མདོར་མནན། ༧ ཚིག་ཤོར་ན་གོང་གི་རྫས་གླ་རྩི། བཙོད་ཁྲག ། གཉིས་བྱུང་ཀླུ་སྨན་བསྣན་ལ་ཟངས་བུམ་ཆུ་མིག་གཉེན་པོ་ལ་ཁྲུས་བྱས་ལ་རྩ་སྔགས་མཐར། ཀླུའི་དེད་དཔོན་ཆེན་པོ་ཆར་ཕོབ་ཅིག །ཅེས་རང་མདུན་ཕོ་ཉའི་ཐུགས་ཀ་ནས་འོད་ཟེར་དམར་པོ་ཟངས་ཀྱི་ལྕགས་ཀྱུའི་དབྱིབས་ཅན་འཕྲོས། ཕྱོགས་བཞིའི་ཀླུ་རྒྱལ་སྙིང་ནས་གཟུངས་ནས་རང་མདུན་དུ་བཀུག་པར་བསམ། བདག་བསྐྱེད་ཐུགས་ཀ་ནས་ཧཱུྃ་ཡིག་གི་རྣམ་པར་འོད་ཟེར་འཕྲོས་པས་ཀླུ་ལ་ཕོག་པས་ཀླུའི་རྒྱལ་པོས་དད་པས་དབང་པའི་སྲོག་སྙིང་ཕུལ་ནས་ཆར་བབས་པས་ལོ་ཏོག་གི་འཇིགས་པ་ཐམས་ཅད་ཞི་བར་བསམ། ༢ སད་བྱུང་ན་གོང་གི་རྫས་ལ་ལུག་རུ་སེར་པོ། རྨ་བྱའི་ཤ །དེ་ཕོའི་སྒོ་ང་། རྟ་མཚལ་བུའི་ཁྲག །ཀྱང་ལུད། དེ་རྣམས་ལ་རྩ་སྔགས་མཐར། ཨོཾ་ཤྲཱི་ཨ་འཐིན་སྤྲིན་སྡུས་སྔས་ས་པ་ར་སྭཱ་ཧཱ། དེ་ནས་གྲངས་བསྙེན་སོགས་ཆུ་ཕོ་རུ་གང་གི་ནང་དུ་བཏབ་ལ་སྒང་ཐུར་གྱིས་དཀྲུག་ལ། ཞོར་ལ་ལས་སྦྱོར་དུས་སུ་ནམ་ཕྱེད་ནས་ཉི་མ་ཤར་བར་རོ། །རང་ཉིད་ཡི་དམ་དང་མདུན་བསྐྱེད་དམ་ཅན་མདུན་གྱི་ཕོ་ཉ་དེ་རྣམས་ཀྱི་ཞལ་ནས་བསྐལ་པའི་སྤྲིན་བྱུང་ནས་ནམ་མཁར་སྤྲིན་གྱིས་ཁེང་པར་བསམ། ༢ སེར་བ་བྱུང་ན་ལྷ་བསྙེན་བཟླས་ལ་གོང་གིས་རྫས་རྣམས་མེ་ལ་བསྲེགས། བསྙེན་མཐར། ཨོཾ་རཾ་རཾ་འབར་བ་རྩལ་སརྦ་ཟློག༔
ཤར་དུ་ཟློག༔ ལྷོ་རུ་ཟློག༔ ནུབ་ཏུ་ཟློག༔ བྱང་དུ་ཟློག༔ རཾ་རཾ་ཧཱུྃ་ཧཱུྃ་ཕཊ༔ རང་ཉིད་ཕྱག་ན་རྡོ་རྗེའི་གདོང་སེར་བ་ལ་ཕྱོགས་ནས། སེར་བའི་སྣ་འདྲེན་ཁོ་རང་ཡིན་པས་སྔོན་དུ་ཁས་བླངས་ནས་ཡུལ་ཕྱོགས་གཞན་རྣམས་དགྲ་ཡུལ་དུ་ལོག་པར་བསམ། ༧ ཞོད་ཆེ་ན་གོང་གི་རྫས་མེ་ལ་བསྲེགས་ནས། ནཱ་ག་ར་ཙ་ཆར་ཆོད། བསྙེན་སྔགས་གྲངས་ཐེབས་ཤམ་བུ་འདོགས། ལོ་ལ་བགེགས་བསྲུང་བའོ།། ༧ ཕྱུགས་ལ་བགེགས་ཀྱི་གནོད་པ་བྱུང་ན། གོང་གི་རྫས་དང་། ཤ་ཚིལ་རོ་སོལ་བཟུང་ཐལ་བཟང་དྲུག་འབྲས་བུ་གསུམ་འབྲོང་སྙིང་སྟག་སེན། སྲེ་མོང་ཤ །བིས་ལོའི་ཤ །ཤུ་དག །གཙང་པ་རྒྱ་བོའི་ཤ །གྲི་ཤ་གྲི་ཁྲག་རྣམས་ལ་རྩ་སྔགས་འབུམ་བསྙེན་བཏབ། རྟ། ནོར། ལུག །ར། བ། བོང་བུ། ཁྱི་ལ་སོགས་པ་ལའང་བདུག་དང་བླུད་ནི་ཕན། དེ་ལྟར་རྫ་ས་ལ་བརྟེན་ནས་བགེགས་བསྲུངས་བའོ།། ༧ ལྔ་པ་འབྲུ་ལ་བརྟེན་ནས་དབུལ་འཕོང་ཞི་བ་ནི། ནས། །འབྲས། གྲོ། བྲ་བོ་ལ་ཕྱེ་བྱས་ནས་སྔགས་བཏབ། ཕྱེ་དེ་ཆུ་ཆེན་དུ་དོར་ན་ཆུ་དེ་ཁར་སོང་ཚད་གྱི་མི་དབུལ་འཕོང་སེལ། འབྲུ་སྣ་ལྔ་དཀར་ནག་གང་འཛོམས་ཕྱེ་ལ་བཤོས་བུ་ཟླུམ་པོ་རྩེ་རྒྱལ་ལ་རྩ་སྔགས་ཤམ་འབུར། ཨོཾ་ཨཱ་ཨཀོ་བྷེ་སིདྡྷི་ཕ་ལ་ཧཱུྃ། བང་མཛོད་དབུས་སུ་བཞག་ན་དབུལ་འཕོང་སེར་སྣ་ཞི་བར་འགྱུར་རོ། ༧ དྲུག་པ་འཁོར་ལོ་ལ་བརྟེན་ནས་ནད་ཞི་བ། བར་ཆད་ཞི་བ། ལྷ་སྲིན་གདུག་པ་ཞི་བ། སྐག་ཞི་བ། བདུན་ཟུར་ཞི་བ། གཤེད་
ཞི་བ། ཚེ་རིང་བ། བགེགས་ཞི་བ། གདོན་ཞི་བ། ལོ་དགྲ་ཞི་བ། ཕྱུགས་ནད་ཞི་བ་དང་བཅུ། དམ་ཅན་རྡོ་རྗེ་ལེགས་པ་ཞི་བར་སྒྲུབ་པ་ལས་སྦྱོར་བཅས་རང་གི་གྲྭ་རིགས་ཐམས་ཅད་ཀྱིས་ཡང་ཡང་བསྐུལ་ངོར། མངའ་བདག་ཉང་གི་མགར་ནག་དང་བསྟུན། །རྒྱུད་དང་མཐུན་པར་ཨ་རཱ་གས་འབུམ་དཀར་དུ་བྲིས། ཉེས་འགལ་མཆིས་ན་འཁོར་དུ་བཟོད་ནས་བཤགས།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།