བསྐྱེད་པ་མ་ཧཱ་ཡོ་ག ལྟ་བར་གཏན་ལ་འབེབས་བྱེད་རྟོགས་པ་བཞི་དག་པ་གསུམ་མཉམ་པ་བཞི་བདག་ཉིད་ཆེན་པོའི་གཏན་ཚིགས།
༈ ཕྱི་མ་དབང་བསྒྱུར་ཐབས་ཀྱི་ཐེག་པའམ་ནང་རྒྱུད་སྡེ་གསུམ་ཞེས་བསྐྱེད་རྫོགས་གསུམ་བྱེ་བྲག་ཏུ་བཤད་པ་ལ། དང་པོ། མ་ཧཱ་ཡོ་ག་སྟེ་རྣལ་འབྱོར་ཆེན་པོའི་གཞི་རྒྱུད་ཀྱི་གནས་ལུགས་དེ་
ཉིད་རྟོགས་བྱའི་ལྟ་བར་གཏན་ལ་འབེབས་པར་བྱེད་པ་ལ། རྟོག་གེ་དང་རིགས་པ་ལྟར་སྣང་གིས་གཏན་ལ་མི་དབབ་ཅིང་། ཀུན་ཁྱབ་ཚད་མ་གསུམ་གྱིས་གཏན་ལ་ཕབ་ཅིང་རང་རིག་མངོན་སུམ་གྱིས་རྟོགས་དགོས་པའི་ཕྱིར་རོ། །གཏན་ལ་འབེབས་བྱེད་ཀྱི་གཏན་ཚིགས་ཀྱང་། རྟོགས་པ་བཞིའི། དག་པ་གསུམ་གྱི། མཉམ་པ་བཞིའི། བདག་ཉིད་ཆེན་པོའི་གཏན་ཚིགས་དང་བཞི་ལས། དང་པོ་ནི། སྙིང་པོའི་རྒྱུད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོ་ཆེ། །ཞེས་པས། རྒྱུ་གཅིག་པའི་གཏན་ཚིགས་ཀྱིས་ཆོས་ཐམས་ཅད་རང་བྱུང་སྐྱེ་མེད་དུ་གཏན་ལ་ཕབ། ཡིག་འབྲུའི་ཚུལ་གྱི་གཏན་ཚིགས་ཀྱིས་ཆོས་ཐམས་ཅད་རོལ་པ་འགགས་མེད་དུ་གཏན་ལ་ཕབ། བྱིན་གྱིས་བརླབས་ཀྱི་གཏན་ཚིགས་ཀྱིས་ངོ་བོ་དབྱེར་མེད་དུ་གཏན་ལ་ཕབ། མངོན་སུམ་པའི་གཏན་ཚིགས་ཀྱིས་ཆོས་ཐམས་ཅད་མཚན་ཉིད་བློ་བྲལ་དུ་གཏན་ལ་ཕབ་པ་ནི་རྟོགས་པ་བཞིའི་གཏན་ཚིགས་སོ། གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་པས། དག་པ་གསུམ་གྱི་གཏན་ཚིགས་ཀྱིས་ཕྱི་ནང་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་དག་པ་ཆེན་པོར་གཏན་ལ་ཕབ། གསུམ་པ་ནི། མཉམ་གཉིས་ལྷག་པའི་མཉམ་ཉིད་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་པས་མཉམ་པ་བཞིའི་གཏན་ཚིགས་ཀྱིས་ཀུན་
རྫོབ་དང་དོན་དམ་གྱི་བདེན་པས་བསྡུས་པའི་ཆོས་ཐམས་ཅད་མཉམ་པ་ཆེན་པོར་གཏན་ལ་ཕབ། བཞི་པ་ནི། རང་བྱུང་ཡེ་ཤེས་གནས་མེད་སྣང་། །ཞེས་པས། བདག་ཉིད་ཆེན་པོའི་གཏན་ཚིགས་ཀྱིས་ཆོས་ཐམས་ཅད་སེམས་ཉིད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པར་གཏན་ལ་ཕབ་པ་སྟེ་འཇལ་བྱེད་ཀྱི་གཏན་ཚིགས་དེ་རྣམས་ཀྱིས་རང་བཞིན་རྒྱུའི་རྒྱུད་ཀྱི་གནས་ལུགས་མངོན་སུམ་དུ་རྟོགས་པ་ནི་རྣལ་འབྱོར་ཆེན་པོའི་གྲུབ་མཐའ་ཐུན་མོང་མིན་པ་སྟེ། རྒྱ་མཚོ་ལས། རྒྱ་མཚོ་དངས་པའི་གཟུགས་བརྙན་ལྟར། །སྒྲ་བརྙན་ཡིད་ལ་བྱེད་མིན་པར། །རང་རིག་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེང་དུ་གང་བྱས་པ། །ཐོས་བསམ་བསྒོམ་པའི་ལྟ་མཐར་ཕྱིན། །ཞེས་དང་། རྔམས་གློག་ལས། མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་སོ། །