མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་མདུན་ཕུལ་བ།
༈ མཆོག་སྤྲུལ་རིན་པོ་ཆེ་ཆོས་ཀྱི་བློ་གྲོས་མདུན་ཕུལ་བའོ། །རྡོ་རྗེ་འཆང་དངོས་བསྟན་པའི་ཉིན་བྱེད་ཆེན་པོའི་ཞབས་སྟེགས་ཀྱི་ཆུ་སྐྱེས་ག་ལ་བར། གང་ན་དྲང་སྲོང་ཀློག་པས་མི་ངལ་བའི་ནགས་ཀླུངས་སུ་དཀྱུ་བའི་ནེ་ཙོ་རིག་བྱེད་མཁན་གཞོན་ནུ་ཞིག་གིས་གདོང་མཆོག་ཏུ་དུད་པས་འདི་སྐད་དུ། རྡུལ་མུན་སྙིང་སྟོབས་ཀྱི་ཕ་རོལ་ཏུ་ནི་སོན། ཤེས་བྱ་ཐམས་ཅད་ལ་ཆགས་པ་དང་ཐོགས་པའི་ནེམ་ནུར་དང་ནི་བྲལ། ཡང་སྲིད་སླར་མི་ལེན་པའི་རྣམ་གྲོལ་གྱི་བཟོད་པ་ནི་ཐོབ་མོད་ཀྱི། སྨོན་ལམ་དང་སྙིང་རྗེའི་
འཕེན་པ་ཁོ་ནས་ཚུ་རོལ་མཐོང་བ་རྣམས་དང་སྤྱོད་ཡུལ་མཉམ་པར་སྣང་བའི་མཚན་དཔེའི་དཀྱིལ་འཁོར་འཚོ་ཞིང་གཞེས་ལ་ཆོས་ཀྱང་སྟོན་པ་ནི་ངོ་མཚར་ལས་ཀྱང་ངོ་མཚར་བྱེ་བ་ཕྲག་བརྒྱའི་སྙིང་པོས་ལྕི་བའི་བཀའ་དྲིན་གྱི་ཕུལ་དམ་པ་ཚངས་པའི་བློ་གྲོས་ཀྱིས་བགྲངས་ནའང་སླ་བའི་སྐབས་ཅི་ཞིག །བཀའ་སློབ་སེར་གོས་འཛིན་པའང་ཅང་ཤེས་བཟང་པོའི་གཞན་དབང་གིས་བཤུལ་ལམ་དུ་བསྐྱོད་པ་ཡངས་ཤིང་ཟོ་མདོག་བདེ་བ་ནས་རང་གནས་བསམ་གཏན་གྱི་ཁང་བུར་ཡིབས་པའི་ཟོལ་གྱིས་བག་ཕེབས་པར་མཆིས་ལགས། །འབྱུང་འགྱུར་གྱི་ཆར་ཡང་། འཆིང་བའི་མདུད་པ་རབ་ཏུ་གྲོལ། །ཀོ་ཊ་ཀ་སོགས་འགྲོ་ལྡོག་བྲལ། །ཆར་ཡང་སྲོག་གི་ཟུངས་སོང་བའི། །གསང་གསུམ་བསྐལ་བརྒྱར་ཏིཥྛནྟུ། །དེ་སྲིད་དུ་རྡུལ་དང་བྲལ་བའི་ཡེ་ཤེས་ཀྱི་སྤྱན་རས་ཀྱང་ཕྱོགས་འདིར་སྔ་མཁོ་བཞིན་གཟིགས་པའི་གོ་སྐབས་དབྱེ་བར་གསོལ་ན་ཅི་གནང་། བཀྲ་ཤིས་པའི་ལྷ་རྫས་ལ་རྟགས་ཀྱིས་སྤྲས་ཏེ་མཆོག་ཏུ་དགེ་བའི་ཚེས་ལ་ན་བ་ཀ་ཊི་མངྒ་ལ་དེ་བ་གྲྭཏཱ། བནྡ་ནཾ་ས་མདྲི་ཏམ།། །།