ལེའུ་བཅུ་གཉིས་པའི་རྣམ་པར་བཤད་པ།

༈ དོན་གཉིས་པ་དེའི་ཡན་ལག་བྱེ་བྲག་ཏུ་བཤད་པ་ལ་གསུམ་སྟེ། དོན་གྱི་འབྲེལ་དགོད། ཚིག་གི་དོན་བཤད། སྐབས་ཀྱི་དོན་བསྡུ་བའོ། །དང་པོ་ནི། ཚོགས་ཀྱི་དཀྱིལ་འཁོར་བཤད་པ་དེ༵་ནས༵་དེ༵་བཞི༵ན་གཤེ༵གས་པ༵་ཆོས་ཐམས་ཅད་གཉིས་སུ་མེད་པར་རོལ་པའི་དགྱེས༵་པ༵་ཆེ༵ན་པོ༵་ཀུན་ཏུ་བཟང་པོས་སྣང་སྲིད་ཀྱི་ཆོས་ཐམས་ཅད་ཡེ་ཤེས་ཀྱི་རོལ༵་མོ༵འི་སྤྲིན༵་འདོད་དགུ་ལྷུན་རྫོགས་སུ་འབྱུང་བའི་རང་བཞིན་ནམ་མཁའི་མཐའ་ཀླས་པ་ཀུན་ཏུ་རྣམ༵་པར༵་སྤྲོས༵་ཏེ༵། སངས་རྒྱས་ཀྱི་ཞིང་དང་འགྲོ་བ་དྲུག་གི་སྤྱོད་ཡུལ་ཐམས་ཅད་དུ་ལོངས་སྤྱོད་ཆེན་པོས་འབྱོར་བའི་རྒྱན༵་རང་རང་གི་སྣང་བ་དང་མཐུན་པར་བཀོད༵་པའི༵་ཏིང༵་ངེ༵་འཛིན༵་ལ༵་སྙོམ༵ས་པར༵་ཞུག༵ས་ནས༵་སྟོན་པ་ཉིད་ཀྱི་རང་སྣང་དག་པའི་འཁོར་བཀོད་པ་ན། བསྐུལ་ཞིང་ཞུ་བ་པོའི་རྣམ་པ་མེད་པར་ཆེད༵་དུ༵་བརྗོད༵་པ༵་འདི༵་དག་རང་བྱུང་དུ་བརྗོད༵་དོ༵། །ཞེས་སོ། །

གཉིས་པ་ལ་གསུམ་སྟེ། ཚོགས་ཀྱི་ཏིང་ངེ་འཛིན་ཕན་ཡོན་དང་བཅས་པ་སྤྱིར་བསྟན་པ། ཚོགས་བསྒྲུབ་པའི་འབྲས་བུ་བྱེ་བྲག་ཏུ་བཤད། ཚོགས་ཀྱི་རྟེན་དཀྱིལ་འཁོར་ཀུན་འདུས་པ་ཆེན་པོས་དོན་བསྡུ་བའོ། །དང་པོ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ཆོས་ཐམས་ཅད་ཡེ་ཤེས་ཀྱི་རོལ་པ་སྒྱུ༵་འཕྲུ༵ལ་དྲྭ༵་བ༵འི་ངོ་བོར་ཡུལ་ཡུལ་ཅན་ཡབ་ཡུམ་ཟུང་འབྲེལ་ཆེན་པོར་མངོན༵་པར་རྫོག༵ས་པ༵་ལྷ་དང་ལྷ་མོའི༵་དཀྱིལ༵་འཁོར༵་དུ་གནས་པ་ཉིད། བློས་གསལ་གདབ་ཅིང་གོམས་པར་བྱས་པའི་དོན་བརྟ༵ན་པའི༵་ཏིང༵་ངེ༵་འཛི༵ན་གྱི་འཕྲོ་འདུས་མཆོག་དང་ཐུན་མོང་གི་དངོས་གྲུབ་འགྲུབ་བོ། །

གཉིས་པ་ལ་ལྔ་ལས། བྲོ་གར་གྱི་ཏིང་ངེ་འཛིན་ཕན་ཡོན་དང་བཅས་པ་ལ་གཉིས་ལས། ཏིང་ངེ་འཛིན་ནི་ལུས་ཀྱི་མགོ་ལ་སོགས་པ་ཡན་ལག་ལྔ་རིགས་ལྔའི་དཀྱིལ་འཁོར་དུ་བསྐྱེད་ཅིང་། ས་གཞི་རྡོ་རྗེའི་རང་བཞིན་ལ་གནས་ཁང་ལྷའི་གཞལ་མེད་ཁང་མཛེས་པ་སངས་རྒྱས་ཀྱི་ཞིང་ཁམས་རྣམ་པར་དག་པར་མོས་པར་བྱས་ཏེ། རྐང་པས་བྲོ༵་དང་ལག་པའི་གར༵་གྱི་ཕྱག་རྒྱ་རྣམ་པ་སྣ་ཚོགས་པའི་འདུ༵་འཕྲོ༵་དང་། སྒྱུ་འཕྲུལ་དྲྭ་བ་གཉིས་སུ་མེད་པ་ལྷའི་རྣམ་པ་དང་བདེན་མེད་དུ་ཤེས་པའི་ངང་ནས་འགྲོ་འདུག་དང་ལག་པའི་འདུ་བྱེད་སོགས་ཐམས་ཅད་ལྷའི་རང་བཞིན་ལས་མི་འདའ་བའི་ཕྱིར་ན། བྲོ་གར་ལ་སོགས་པའི༵་(༢༢༤)བྱ་བ་ཅི་བྱེད་ཐམས་ཅད་ཕྱག༵་རྒྱ༵འི༵་སྒྲར་བརྗོད་དེ་མཛུབ་མོ་བརྐྱངས་བསྐུམས་ལ་སོགས་པ་ཕྱག་རྒྱར་འདོད་པ་མ་ཡིན་ནོ། །ཕན་ཡོན་ནི། དེ་ལྟར་བྱས་པ་ཡིས་ས་ལ་འཛུལ༵་ཞིང་རི་བྲག་རྣམས་ལ་ཐོགས་པ་མེད་པས་ས་འོག་གི་ཕྱག་རྒྱ་ཀླུ་མོ་རྣམས་དབང་དུ་བྱེད་པ་དང་། སྟེང་གི་ལམ༵་ནམ༵་མཁའ༵་ལ་བྱ་བཞིན་ཐོགས་པ་མེད་པར་འགྲོ༵་བས་ལྷ་དང་ལྷ་མ་ཡིན་ལ་སོགས་པ་དབང་དུ་བྱེད་པར༵་འགྱུ༵ར་རོ། །

གཉིས་པ་གླུའི་ཕྱག་རྒྱ་ལའང་གཉིས་ལས། ཏིང་ངེ་འཛིན་ནི་རང་གི་ལྐོག་མར་ཧྲཱིཿབཀོད་ལ་ངག་གི་གདངས་གླུ༵་སྙན་པོ་དང་དེའི་ཚིག༵་བསྟོད་པ་དང་ཤིས་པ་བརྗོད་པ་ལ་སོགས་པ་སྒྲ༵་ཡི༵་ཕྱག༵་རྒྱ༵་ཡིས༵་དཀྱིལ་འཁོར་གྱི་ལྷ་མཆོད་པའོ། །ཕན་ཡོན་ནི། གསུང་མི་ཟད་པ་རྒྱན་གྱི་འཁོར་ལོ་གཅིག་གིས་གོ་བར་ནུས་པ་ཆོས༵་ཀྱི༵་གསུང་དུང་གི་དངོས༵་གྲུབ༵་ཐོབ༵་པར༵་འགྱུར༵་རོ། །དེའང་འོད་ཟེར་ཀུན་ཏུ་བཀྱེ་བའི་མདོ་ལས། ང་ལ་འོད་ཟེར་ཡང་ཡོད་དེ། །དེ་མིང་ཆོས་ཀྱི་དུང་ཞེས་བྱ། །དབྱངས་གཅིག་ཐམས་ཅད་གོ་བ་ཡིས། །འཇིག་རྟེན་ཀུན་ཏུ་ཁྱབ་པར་བྱེད། །འོད་ཟེར་དེ་ཡི་དགེ་བའི་རྩ། །དཔག་མེད་དེ་ལས་སྐྱེས་པ་ཡིན། །ཞེས་པ་ལྟར་རོ། །དེའང་སངས་རྒྱས་ཀྱི་གསུང་ནི་གདུལ་བྱ་གང་ཡོད་དུ་ཉེ་རིང་མེད་པར་མོས་པ་དང་མཐུན་པར་ཐོས་པ་སྟེ། འཁོར་གྱི་ཁྱམས་དང་གངྒཱའི་ཀླུང་གི་བྱེ་མ་སྙེད་འདས་པའི་ཕ་རོལ་ལ་ཁྱད་མེད་པ་སྟེ་ནུབ་ཕྱོགས་འོད་ཟེར་ཅན་གྱི་འཇིག་རྟེན་དུ་མ་གལ་གྱི་བུས་ཕྱིན་ནས་ཤཱཀྱ་ཐུབ་པའི་ཆོས་སྔོན་བཞིན་ཐོས་པ་དང་། སྐལ་བ་མེད་ན་འཁོར་གྱི་ནང་ན་འཁོད་ཀྱང་མི་ཐོས་ཏེ་ཟ་མ་ཏོག་གསུངས་པ་ན་ཛེ་ཏཱའི་ཚལ་དུ་ཉན་ཐོས་ཀུན་གྱིས་མ་ཐོས་པ་བྱང་ཆུབ་སེམས་དཔས་ཐོས་པ་བཞིན་ནོ། །

གསུམ་པ་རྒྱན་དང་གོས་ཀྱི་ཕྱག་རྒྱ་ལའང་གཉིས་ལས། ཏིང་ངེ་འཛིན་ནི་ཏྲཱྃ་ལས་དབུ་རྒྱན་ལ་སོགས་པའི་རྒྱན་རྣམས་རིན་པོ་ཆེར་གསལ་ཞིང་། ཨ་ལས་གོས་རྣམས་ལྷའི་གོས་དང་ཞི་ཁྲོའི་ཆ་ལུགས་སུ་བྱིན་གྱིས་བརླབས་ཏེ། རིན་པོ་ཆེ་དང་རུས་པ་ལ་སོགས་པའི་རྒྱན༵་དང༵་སྟོད་གཡོགས་སྨད་དཀྲིས་ལ་སོགས་པའི་བགོ༵་བ་རྣམས་གྱོན་ནས་ལྷ་ལ་མཆོད་པའི༵་ཕྱག༵་རྒྱ༵་ཡིས༵་ལོངས་སྤྱོད་དོ། །ཕན་ཡོན་ནི་གནས་སྐབས་སུ་འོད་དང་གཟི་བརྗིད་སྲེད་མེད་ཀྱི་བུས་ཀྱང་མི་ཤིགས་པའི་གོ་ཆ་སྲ་བའི་གོས་སུ་འགྱུར་ཞིང་མཐར་ཐུག་མཚན་དང་དཔེ་བྱད་ཀྱིས་འབར༵་བ༵་འཁོར་ལོས་སྒྱུར་བ་དང་བྱང་ཆུབ་སེམས་དཔའ་ཡིན་ལ། དེའི༵་རྒྱལ༵་ཆེ༵་སངས་རྒྱས་ཀྱི་སྐུ་སྟེ་བདུད་དང་ཕྱིར་རྒོལ་བ་གང་གིས་ཀྱང་ཐུབ༵་པ་མེད༵་པའི་སྟོབས་བཅུས་གནོན་པ་འགྲུབ༵་བོ། །དེའང་འཛམ་བུ་གླིང་པའི་མི་བདུན་ལས་གྱད་གཅིག་སྟོབས་ཆེའོ། །དེ་བཞིན་དུ་གྱད་བདུན་ལས་ཤཱཀྱའི་གཞོན་ནུ་གཅིག་གོ། །(༢༢༥)དེ་བདུན་ལས་ལྷ་མ་ཡིན་དང་། ལྷ་དང་། གནོད་སྦྱིན་དང་། སྲེད་མེད་ཀྱི་བུ་དང་། ཉན་ཐོས་དང་། རང་སངས་རྒྱས་དང་། ས་ཐོབ་པའི་བྱང་ཆུབ་སེམས་དཔའ་སྟོབས་དང་སྒྱུ་རྩལ་བདུན་འགྱུར་གྱི་བར་དུ་འཕགས་ཤིང་། དེ་ཐམས་ཅད་ཀྱིས་ནམ་མཁའི་དབྱིངས་བཀང་བའི་སྟོབས་ལས་སངས་རྒྱས་འཕགས་པར་དཀོན་ཅོག་བརྩེགས་པ་ལས་གསུངས་པའི་ཚུལ་གྱིས་སྟོབས་བཅུའི་རྩལ་མངའ་བ་ཡིན་ནོ། །

བཞི་པ་བཟའ་བཏུང་གི་ཕྱག་རྒྱ་ལའང་གཉིས་ལས། ཏིང་ངེ་འཛིན་ནི། ཁྃ་ལས་བཟའ་བཏུང་བདུད་རྩིར་བྱིན་གྱིས་བརླབས་ཏེ། ཉ་དང་ཤ་ལ་སོགས་པའི་བཟ༵འ་བ་དང༵་ཇ་དང་ཆང་ལ་སོགས་པའི་བཏུང༵་བའི༵་ཕྱག༵་རྒྱ༵་ཡིས༵་ཕྱི་ནང་གི་ལྷ་མཆོད་དོ། །ཕན་ཡོན་ནི། རང་གི་ལུས་འདོད་དགུར་བསྒྱུར་བ་ཡིད༵་བཞིན༵་གྱི་ནོར་བུ་ལྟ་བུའི་སྐུ༵་དང༵་གསུང་རོ་བྲོ་བའི་མཆོག་གང་ལ་ལོངས་སྤྱད་པ་དེ་དག་རོ་བརྒྱ་དང་ལྡན་པའི་བདུད༵་རྩིར༵་འགྲུབ༵་བོ། །

ལྔ་པ་སྦྱོར་སྒྲོལ་གྱི་ཕྱག་རྒྱའི་ཏིང་ངེ་འཛིན་ནི་ཡབ་ཡུམ་ལྷར་གསལ་བའི་མཁའ་གསང་དུ་དཀྱིལ་འཁོར་སྤྱན་དྲངས་ཏེ། ཨཱ༵ཿལི་བདེ་བ་ཆེན་པོས་མཆོད་པ་དང་། ཞིང་དང་ཞིང་ཕྲན་གྱི་ཤ་ཁྲག་བདུད་རྩིར་གྱུར་པས་མཆོད་པ་ཀཱ༵་ལི༵་སྒྲོལ་བའི་ཕྱག༵་རྒྱ༵་ཡིས༵་མཉེས་པར་བྱའོ། །ཕན་ཡོན་ནི། སྦྱོར་བས་ཟག་པ་མེད་པའི་ཏིང་ངེ་འཛིན་ལ་སོགས་པ་མཆོག་དང་ཐུན་མོང་གི་དངོས་གྲུབ་ཐམ༵ས་ཅད༵་དང་སྒྲོལ་བས་གདུག་པ་ཅན་ཚར་བཅད་དེ། རང་གཞན་གྱི་གནོད་པ་ཞི་བ་དང་ཕ་རོལ་ཐར་པ་ལ་སོགས་པའི་འཕྲིན་ལས་རླབས་པོ་ཆེ་ཐམ༵ས་ཅད༵་འགྲུབ༵་པར༵་འགྱུར༵་རོ། །

གཉིས་པ་ཚོགས་སྒྲུབ་པའི་འབྲས་བུ་བྱེ་བྲག་ཏུ་བཤད་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། ངེས་ཚིག་དང་། དབྱེ་བའོ། །དང་པོ་ནི། བིདྱཱ་དྷཱ་ར་ཞེས་པས། བིདྱཱ་ནི་རིག་པ་སྟེ་ཤེས་རབ་དང་ཡེ་ཤེས་དང་སངས་རྒྱས་ཀྱི་གདུང་ངོ་། །དྷཱ་ར་ནི་འཛིན་ཅིང་འཆང་བ་སྟེ་དོན་ལ་སློབ་པའམ་ལྡན་པ་ཡིན་ནོ། །

གཉིས་པ་ལ་གཉིས་ཏེ། དབྱེ་བ་སྤྱིར་བསྟན་པ་དང་། རང་བཞིན་བྱེ་བྲག་ཏུ་བཤད་པའོ། །དང་པོ་ནི། ན་རཀ་སྐོང་བཤགས་ལས། རྣམ་སྨིན་ཚེ་དབང་ཕྱག་རྒྱ་ལྷུན་གྱིས་གྲུབ། །ཅེས་པས། རྣམ་པར་སྨིན་པའི་རིག་འཛིན། ཚེ་ལ་དབང་བའི་རིག་འཛིན། ཕྱག་རྒྱ་ཆེན་པོའི་རིག་འཛིན། ལྷུན་གྱིས་གྲུབ་པའི་རིག་འཛིན་ནོ། །དང་པོ་ནི། མཚན་ཉིད་གསུམ་ལྡན་ཏེ། ཡི་དམ་ལྷའི་རྣལ་འབྱོར་དུ་སྨིན་པ། ལུས་རྣམ་སྨིན་གྱི་གཟུགས་ལས་གནས་མ་གྱུར་པ། ལུས་རྒྱ་དང་བྲལ་ནས་ཕྱག་རྒྱ་ཆེན་པོའི་སྐུ་འཐོབ་པ་སྟེ། རྔམ་གློག་ལས། ཡིད་ཀྱི་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་(༢༢༦)ནས། །ཕྱག་རྒྱའི་སྐུ་ཉིད་གསལ་གྱུར་པ། །རྣམ་པར་སྨིན་ཞེས་དེ་ལ་བརྗོད་། །ཅེས་སོ། །གཉིས་པ་ནི། རྣམ་སྨིན་གྱི་ལུས་རྡོ་རྗེའི་ལུས་སུ་གནས་འགྱུར་ཞིང་དེ་ཉིད་མ་སྤངས་པར་སངས་རྒྱས་ཀྱི་ས་ལ་སྦྱོར་བས་ཕུང་པོ་ཟག་པ་མེད་ཅིང་ཡེ་ཤེས་ཀྱི་བློ་སྐྱེས་པ་སྟེ། ལུས་དང་ཕུང་པོར་བཅས་པ་ཡིས། །གནས་པར་དབང་བའི་རིག་གྲུབ་ཅིང་། །ལྷག་རྟོག་འབྱུང་ལས་ལུས་བཅས་འདས། །ཟག་ཀུན་ཟད་པའི་རིགས་ཆེན་དེ། །ཇི་ལྟར་སྤྱོད་ཀྱང་བཟློག་པ་མེད། །རང་དབང་ཐོབ་པས་དབུགས་དབྱུང་ཕྱིར། །སྐབས་འདིར་བདེན་པ་བར་མ་མཐོང་། །ཞེས་སོ། །

གསུམ་པ་ནི། རང་གི་ལུས་གང་བསྒོམ་པའི་ཆ་བྱད་དུ་གནས་གྱུར་པ་སྟེ། ཞུས་ལན་ལས། རང་ལས་རྒྱལ་བའི་ཕྱག་རྒྱ་ཆེ། །བསྒོམས་པས་མངོན་དུ་གྱུར་པའི་ལྷ། །མཚན་དང་དཔེ་བྱད་མངོན་ཤེས་ལྡན། །ཕྱག་རྒྱ་ཆེན་པོའི་རིག་འཛིན་གྲགས། །

ཞེས་སོ། །འོ་ན་སངས་རྒྱས་དངོས་སུ་འགྱུར་མོད་སྙམ་ན། ད་དུང་སྒྲིབ་པ་མཐའ་དག་མ་བྲལ་བས་བསྒྲུབ་དགོས་ཏེ། འདི་ལྟར་མངོན་རྟོགས་རྒྱན་ལས། སངས་རྒྱས་ཉིད་ནི་ཐོབ་པ་དང་། །ཞེས་ས་དང་པོར་སངས་རྒྱས་ཐོབ་པར་བཤད་ཀྱང་། ས་ལྷག་མའི་དྲི་མ་སྦྱོང་དགོས་པར་གསུངས་པ་བཞིན་དུ་འདིར་ཡང་ཤེས་པར་བྱ་སྟེ། རྡོ་རྗེ་ལས། བྱང་ཆུབ་ཕྱག་རྒྱའི་ཆ་ལུགས་སྐུ། །མཚན་དང་དཔེ་བྱད་ལ་སོགས་པས། །ཆ་ལུགས་མངོན་དུ་བྱུང་ན་ཡང་། །ཞི་བ་དེ་ཉིད་མཐོང་བ་མིན། །ཞེས་སོ། །

བཞི་པ་ནི། སྤངས་པ་དང་རྟོགས་པ་མཐར་ཕྱིན་པའི་སངས་རྒྱས་ཏེ། རྡོ་རྗེ་ལས། སྔ་མའི་རིགས་ལས་མཐུ་རྫོགས་པས། །བཤད་པ་བཞིན་དུ་དྲི་མ་སྦྱོངས། །

སངས་རྒྱས་ས་ཡི་ཤེས་རབ་གསུམ། །ལྷུན་གྱིས་གྲུབ་པའི་རིག་འཛིན་ནོ། །ཞེས་སོ། །

གཉིས་པ་རང་བཞིན་བྱེ་བྲག་ཏུ་བཤད་པ་ལ་བཞི་སྟེ། རྣམ་པར་འཕྲུལ་པའི་སྐྱེ་བ། ཟག་པ་མེད་པའི་བསྡུས་ཚུལ། ཕ་རོལ་ཏུ་ཕྱིན་པའི་རྫོགས་ཚུལ། མཐར་ཐུག་སའི་ཐོབ་ཚུལ་ལོ། །

དང་པོ་ནི། རིག་འཛིན་དེ་དག་གིས་འགྲོ་བའི་དོན་དུ་མིའི་གཙོ་བོ་འཁོར་ལོས་སྒྱུར་བའི་རྒྱལ་པོ་དང་། ལྷའི་གཙོ་བོ་ཚངས་པ་དང་བརྒྱ་བྱིན་ལ་སོགས་པ་དང་། ཚངས་པ་ཆེན་པོའི་སྐྱེ་བར་སྤྲུལ་ནས་གང་ལ་གང་འདུལ་གྱིས་དོན་བྱེད་དོ། །ཁ་ཅིག་རྣམ་སྨིན་གྱིས་མི། ཚེ་དབང་གིས་ལྷ། ཕྱག་རྒྱ་ཆེན་པོས་ཚངས་པ། ལྷུན་གྲུབ་ཀྱིས་ཀུན་གྱི་རོལ་པར་བཞེད་དེ་འགལ་བ་མེད་དོ། །

གཉིས་པ་ནི། རྣམ་སྨིན་ཚོགས་སྦྱོར་མཐར་ཐུག་གི་ས་དང་། ཚེ་དབང་མཐོང་ལམ་ཡན་ཆད་སློབ་པའི་ས་དང་། ཕྱག་རྒྱ་ཆེན་པོ་འཕགས་པའི་ཡེ་ཤེས་མཐོང་སྒོམ་གྱི་རྟོགས་པ་ཁྱད་པར་ཅན་གྱི་ས་དང་། ལྷུན་གྲུབ་སངས་རྒྱས་ཀྱི་སས་བསྡུས་ཀྱང་དེ་ཐམས་ཅད་(༢༢༧)ཕྱོགས་གཅིག་ཏུ་ཁྱད་པར་གྱི་ས་བཅུ་གསུམ་པས་བསྡུས་ཏེ། དེར་ངེས་པར་མངོན་དུ་བྱེད་པ་སྟེ། དཔེར་ན་ལྕགས་ཀྱུས་ཟིན་པའི་ཉ་ཆུ་ནང་ན་ཡོད་ཀྱང་སྐམ་སར་བཏོན་པ་དང་འདྲའོ། །དེའང་འཕགས་པའི་ཡེ་ཤེས་ཀྱི་ཆ་ནས་ཕྱག་རྒྱ་ཆེན་པོ་དང་། སྐྱེ་ཤི་མེད་པའི་ཆ་ནས་ཚེ་དབང་དུ་བཏགས་པའོ། །གཞན་ཡང་སར་ཆུད་པ། ས་ལ་གནས་པ། སར་སྨིན་པ་སྡེ་གསུམ་དུའང་བཤད་དོ། །ཁ་ཅིག་ཚེ་དབང་ས་དང་པོ། ཕྱག་རྒྱ་བརྒྱད་པ། ལྷུན་གྲུབ་བཅུ་པར་འདོད་ནི་སྒྱུ་འཕྲུལ་གྱི་དགོངས་པ་མ་དགོངས་ཏེ། དེ་ཚེ་བཅུ་དྲུག་ཚུན་ཆད་ཀྱི། །སྐུ་ལྔ་ལྷུན་གྱིས་རྫོགས་པ་ནི། །ཞེས་པ་དང་། ལུས་མ་བོར་བར་སངས་རྒྱས་ས། །ཞེས་ལྷུན་གྲུབ་སངས་རྒྱས་སུ་བཤད་པ་དང་ཡང་འགལ་ཞིང་། ཚེ་དབང་དང་ཕྱག་རྒྱའི་མཚན་ཉིད་མ་ཕྱེད་པར་སྣང་ངོ་། །

གསུམ་པ་ནི། རིམ་གྱིས་པས་ཕ་རོལ་ཏུ་ཕྱིན་པ་བཅུ་རིམ་གྱིས་སྦྱོང་ཞིང་ས་བཅུ་འཕར་བར་སྟོན་ལ། ཅིག་ཅར་པས་མྱུར་དུ་རྫོགས་པ་སྟེ། དེའང་ཆོས་ཐམས་ཅད་ལ་ཡོངས་སུ་འཛིན་པ་མེད་པས། སྦྱིན་པའི་ཕ་རོལ་ཏུ་ཕྱིན་པ་འབྲས་བུ་དང་བཅས་པ་བཙལ་བ་མེད་པར་ལྷུན་གྱིས་རྫོགས་པར་བསྟན་ཏོ། །དེ་བཞིན་དུ་མཉམ་པ་ཉིད་དུ་རིག་པས་གོས་པ་མེད་པ་དང་བླང་དོར་མེད་པ་ནི་ཚུལ་ཁྲིམས་སོ། །འཁྲུགས་པ་མེད་པ་དང་ཡེ་ཤེས་ཀྱི་མཚན་ཉིད་ཡོངས་སུ་རྫོགས་པ་ནི་བཟོད་པའོ། །ཉམས་པ་མེད་པ་དང་བྱེད་སྤྱོད་ཚོགས་སུ་གྱུར་པ་ནི་བརྩོན་འགྲུས་སོ། །དབང་པོ་ཡུལ་ལ་འཇུག་ཀྱང་མཉམ་པ་ཉིད་ལས་མི་གཡོ་ཞིང་ཆོས་ཐམས་ཅད་ཀྱི་རང་བཞིན་ལ་གནས་པ་ནི་བསམ་གཏན་ནོ། །རང་བཞིན་ཕྱིན་ཅི་མ་ལོག་པར་རྟོགས་པས་དངོས་པོ་དང་མཚན་མར་འཛིན་པ་ལས་འདས་པ་ནི་ཤེས་རབ་བོ། །བདག་ཀྱང་གཞན་གྱི་དོན་དུ་འགྱུར་བ་ནི་ཐབས་སོ། །ཞིང་དང་སྤྱོད་ཡུལ་ཡོངས་སུ་དག་པར་འགྱུར་བ་ནི་སྨོན་ལམ་མོ། །མི་མཐུན་པའི་ཕྱོགས་ཀྱིས་ཡོངས་སུ་མི་བརྫི་བ་ནི་སྟོབས་སོ། །དོན་ཇི་ལྟ་བ་བཞིན་རྟོགས་པ་ནི་ཡེ་ཤེས་ཏེ། ཕ་རོལ་ཏུ་ཕྱིན་པ་བཅུ་ལྷུན་གྱིས་རྫོགས་པས་ས་བཅུའང་དུས་ཡུན་རིང་མོ་ཞིག་ཏུ་སྦྱངས་མི་དགོས་པར་མྱུར་དུ་རྫོགས་པར་འགྱུར་རོ། །ས་རྣམས་ཀྱི་ངེས་ཚིག་དང་ཡོན་ཏན་ཡང་། མདོ་སྡེ་རྒྱན་ལས། བྱང་ཆུབ་ལ་ཡང་ཉེ་བ་དང་། །སེམས་ཅན་དོན་གྲུབ་མཐོང་བ་ལ། །རབ་ཏུ་དགའ་བ་སྐྱེ་འགྱུར་ཏེ། །དེ་ཕྱིར་རབ་དགའ་ཞེས་བརྗོད་དོ། །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཆོས་ཀྱི་སྣང་བ་ཆེན་པོ་ནི། །བྱེད་པའི་ཕྱིར་ན་འོད་བྱེད་དང་། །འདི་ལྟར་བྱང་ཆུབ་མི་མཐུན་ཕྱོགས། །གཉིས་པོ་བསྲེགས་པས་འོད་འཕྲོ་ཅན། །སེམས་ཅན་རྣམས་ཡོངས་སྨིན་བྱེད་ཅིང་། །རང་གི་(༢༢༨)སེམས་ཀྱང་བསྲུང་བའི་ཕྱིར། །བློ་ལྡན་རྣམས་ཀྱིས་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བརྗོད་དོ། །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་འདིར་མངོན་དུ་གྱུར་པས་ན། །མངོན་དུ་གྱུར་པའི་ས་ཞེས་བྱ། །བགྲོད་གཅིག་ལམ་དང་འབྲེལ་བའི་ཕྱིར། །རིང་དུ་གྱུར་པའི་ས་ཞེས་བྱ། །འདུ་ཤེས་གཉིས་ཀྱིས་མི་གཡོའི་ཕྱིར། །མི་གཡོ་བ་ཡི་སར་འདོད་དོ། །སོ་སོ་ཡང་དག་རིག་བློ་བཟང་། །ས་དེ་ལེགས་པའི་བློ་གྲོས་ཡིན། །སྤྲིན་བཞིན་གཉིས་ཀྱིས་ནམ་མཁའི་ཆོས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སོ། །ཡོན་ཏན་ནི་ས་དང་པོར་སྐད་ཅིག་སྔ་ཕྱི་མེད་བཞིན་དུ་སངས་རྒྱས་བརྒྱའི་ཞལ་བལྟ་བ་ལ་སོགས་པ་བརྒྱ་ཕྲག་བཅུ་གཉིས་མངོན་དུ་བྱེད་དེ། ཕལ་པོ་ཆེ་ལས། ཏིང་འཛིན་བརྒྱ་དང་སངས་རྒྱས་བརྒྱ་རྣམས་མཐོང་བྱེད་ཅིང་། །ཞིང་བརྒྱ་བསྐྱོད་ཅིང་རབ་ཏུ་སྣང་བྱེད་ཀུན་ཏུ་འགྲོ། །སེམས་ཅན་བརྒྱ་སྦྱོང་ཆོས་ཀྱི་སྒོ་ལ་འགོད་པར་བྱེད། །བསྐལ་པ་བརྒྱར་འཇུག་ལུས་བརྒྱ་རབ་ཏུ་སྟོན་པར་བྱེད། །རྒྱལ་བའི་སྲས་ཀྱང་བརྒྱ་ཡི་གྲངས་ཚད་རབ་ཏུ་སྟོན། །དེ་ཡི་གོང་ན་སྨོན་མཆོག་སྟོབས་ལྡན་ཚད་ཀྱང་མེད། །ཅེས་སོ། །དེ་བཞིན་དུ་ས་གཉིས་པར་སྟོང་ཕྲག་བཅུ་གཉིས། གསུམ་པར་འབུམ་ཕྲག་བཅུ་གཉིས། བཞི་པར་བྱེ་བ་བརྒྱ་ཕྲག་བཅུ་གཉིས། ལྔ་པར་བྱེ་བ་སྟོང་ཕྲག་བཅུ་གཉིས། དྲུག་པར་བྱེ་བ་ཁྲག་ཁྲིག་ཕྲག་བཅུ་གཉིས། བདུན་པར་བྱེ་བ་ཁྲག་ཁྲིག་འབུམ་ཕྲག་བཅུ་གཉིས། བརྒྱད་པར་སྟོང་ཆེན་འབུམ་ཕྲག་གཅིག་གི་རྡུལ་གྱི་གྲངས་དང་མཉམ་པ། དགུ་པར་འབུམ་ཕྲག་བཅུའི་རྡུལ་དང་མཉམ་པ། བཅུ་པར་བརྗོད་དུ་མེད་པའི་གྲངས་དང་མཉམ་པའི་སངས་རྒྱས་ཀྱི་ཞལ་བལྟ་བ་དང་། ཆོས་ཉན་པ་དང་། ཞིང་གཡོ་བར་བྱེད་པ་དང་། འོད་ཀྱིས་གསལ་བར་བྱེད་པ་དང་། ཞིང་དེ་དག་ཏུ་འགྲོ་བ་དང་། སེམས་ཅན་སྨིན་པར་བྱེད་པ་དང་། ཆོས་ཀྱི་སྒོ་འབྱེད་པ་དང་། ཏིང་ངེ་འཛིན་ལ་མཉམ་པར་འཇོག་པ་དང་། དུས་སྐད་ཅིག་མ་གཅིག་བསྐལ་པ་དུ་མར་སྟོན་ཞིང་། བསྐལ་པ་དུ་མ་སྐད་ཅིག་མ་གཅིག་ཏུ་སྟོན་པ་དང་། སྔོན་དང་ཕྱི་མའི་མཐའ་དེ་སྙེད་ལ་གཟིགས་པ་འཇུག་པ་དང་། རང་གི་ལུས་སངས་རྒྱས་ཀྱི་སྐུ་དུ་མར་སྤྲུལ་པ་དང་། དེ་རེ་རེའང་འཁོར་དུ་མས་བསྐོར་བར་སྟོན་པ་རྣམས་སྐད་ཅིག་སྔ་ཕྱི་མེད་པར་འབྱུང་བའོ། །

བཞི་པ་མཐར་ཐུག་སའི་ཐོབ་ཚུལ་ནི། དེ་ལྟར་ས་བཅུ་རྫོགས་ནས་འོད་ཟེར་མང་པོ་བཀྱེ་ནས་སེམས་ཅན་གྱི་དོན་མཛད་པ་བཅུ་གཅིག་ཀུན་ཏུ་འོད་ཀྱི་ས་དང་། ཡེ་ཤེས་ཀྱི་སྣང་བ་དང་ཐུགས་རྗེ་ཆེན་པོས་ཆགས་པ་མེད་པས་བཅུ་གཉིས་མ་ཆགས་པདྨ་ཅན་གྱི་ས་དང་། ཆོས་ཐམས་ཅད་(༢༢༩)ཀྱི་དབང་མཐར་ཐུག་པ་ལྷུན་གྱིས་རྫོགས་པས་བཅུ་གསུམ་རྡོ་རྗེ་འཛིན་པའམ། ཡི་གེ་འཁོར་ལོ་ཚོགས་ཆེན་ནམ། ཁྱད་པར་ཆེན་པོའམ། རིག་པ་འཛིན་པའི་ས་ཞེས་བྱ་བ་ལྷུན་གྲུབ་ཏུ་རྫོགས་པའོ། །དེའང་ས་བཅུ་གསུམ་པ་ཉིད་ཆོས་སྐུ་སྤྲོས་དང་བྲལ་བའི་ཆ་ནས་ཁྱད་པར་ཆེན་པོའོ། །དེའི་ངང་ལས་ལོངས་སྐུའི་འཆར་གཞི་བྱེད་པས་ཡི་གེ་ཚོགས་ཆེན། དེ་ཉིད་ཀུན་གྱི་བླ་མ་ཡིན་པས་རྡོ་རྗེ་འཛིན་པ། ཡེ་ཤེས་མཐར་ཐུག་གི་ངོ་བོ་ཡིན་པས་རིག་པ་འཛིན་པ་ཞེས་ཡོན་ཏན་གྱི་ཆ་ནས་དེ་སྐད་དུ་གྲགས་སོ། །ས་འདི་དག་ལ་སྐས་ཀྱི་གདང་བུ་ལྟར་མཐོ་དམན་ཡོད་པ་མ་ཡིན་ཏེ། སངས་རྒྱས་གཅིག་གི་ངོ་བོ་ལ་སྐུ་གསུམ་གྱི་ཆ་ནས་དེ་སྐད་བརྗོད་དོ། །ཡོན་ཏན་གྱིས་ཕྱེ་བས་དེ་དང་དེ་ལས་མང་བར་ཡང་གསུངས་ཏེ། བདེ་བ་ཚད་མེད་པས་བཅུ་བཞི་པ་བདེ་བ་ཆེན་པོ། བཅོ་ལྔ་པ་ཏིང་ངེ་འཛིན། བཅུ་དྲུག་པ་ཡེ་ཤེས་བླ་མ་ཞེས་གྲགས་ཤིང་། དོན་གྱི་ངོ་བོ་ལ་གྲུབ་བསལ་མེད་པས་ས་གཅིག་ཏུའང་བཤད་དེ། ཀུན་ཏུ་བཟང་པོ་དབྱེ་བ་མེད་པ་རྫོགས་པ་ཆེན་པོར་གཅིག་པ་སྟེ། ཀུན་བྱེད་ལས། གཅིག་ནི་ཀུན་བྱེད་བྱང་ཆུབ་སེམས་ཀྱི་ས། །ཞེས་སོ། །སྤྱི་དོན་བཤད་ཟིན་ཏོ། །

གཉིས་པ་གཞུང་གི་དོན་ལ་གསུམ་སྟེ། རིག་འཛིན་འགྲུབ་པའི་རྒྱུ། དེས་གྲུབ་པ་གནས་སྐབས་ཀྱི་འབྲས་བུ། དེ་མཐར་ཕྱིན་པ་མཐར་ཐུག་གི་འབྲས་བུའོ། །

དང་པོ་ལ་གཉིས་ལས། རྒྱུ་དངོས་ནི་ཆོས་ཐམས་ཅད་རྟོགས་པ་བཞིའི་ཚུལ་གྱིས་ཡེ་ནས་སངས་རྒྱས་པར་ཤེས་པའི་མཚན་ཉིད་ཀྱི་ལྟ་བ་ཕུན་སུམ་ཚོགས་པའི་གནས་ལུགས་རྒྱུད་ལ་འབྱོར་པའི་གཟུང་ནི་འབྲས་བུ་རིག་འཛིན་བཞིར་སྨིན་པར་བྱེད་པའི་རྒྱུ་ཡིན་ཞིང་ཤེས༵་ནས༵་སྒྲུབ་པ་ལ་འཇུག༵་པའི་མཚན༵་ཉིད༵་བསྐྱེད་རྫོགས་ཟུང་འབྲེལ་དུ་འབྱོར༵་པའི༵་གཟུང༵ས་ནི། འབྲས༵་བུ་རིག༵་འཛིན་བཞིར་སྨིན༵་པར་བྱེད༵་པའི་རྐྱེན༵་ཡི༵ན་ཏེ༵། མཚན་ཉིད་ཤེས་ནས་བསྒྲུབས་པའི་ཆོས་ཀྱི་འབྲས་བུ་ཐོབ་པའོ། །དེ་ལྟ་བུའི་རྒྱུ་རྐྱེན་ལ་གོམས་ཤིང་འདྲིས་པར་བྱས་པས་ནུས༵་མཐུ༵་ཁྱད་པར་ཅན༵་དུ༵་གང༵་གྱུར༵་པ༵་དེ་ནི། རྒྱུ་ས་བོན་གྲུང་པོ། རྐྱེན་ཆུ་ལུད་ཀྱིས་བྲན་པས། འབྲས་བུ་མྱུ་གུ་ནས་སྟོན་ཐོག་གི་བར་དུ་འབྱུང་བ་བཞིན་དུ། རྣམ་པར་སྨིན་པ་ནས་ལྷུན་གྱིས་གྲུབ་པའི་རིག་འཛིན་གྱི་བར་དུ་འབྱུང་ངོ་། །

གཉིས་པ་དེའི་གྲུབ་པའི་ཚུལ་ནི་དེ་ལྟ་བུའི་རིག༵་འཛིན༵་རྣམས་ནི་རྒྱལ༵་བ་བསྐྱེད་པར་བྱེད་པའི༵་ཞིང༵་ཡང་ཡིན་ལ། ཕྱོགས་བཅུའི་སངས་རྒྱས་ཀྱི་ཞིང་དུ༵་གྲག༵ས་ཤིང་ལུང་བསྟན་པ་ཐོབ་སྟེ། འདི་ལྟར་འཇིག་རྟེན་གྱི་ཁམས་ག་གེ་མོ་ཞིག་ན། རིག་འཛིན་ཆེ་གེ་མོ་ཞིག་གནས་ཏེ། དུས་འདི་ཞེས་བྱ་བ་ལ་སངས་རྒྱས་ཀྱི་མཛད་པ་བསྒྲུབ་བོ་ཞེས་པའོ། །

གཉིས་པ་(༢༣༠)དེས་གྲུབ་པ་གནས་སྐབས་ཀྱི་འབྲས་བུ་ལ་གཉིས་ལས། འགྲོ་བ་གང་གིས་བསྒྲུབ་པ་ནི། རིག་འཛིན་དེ་དག་ལས་ཁ་ཅིག་གླིང་བཞིའི་མི༵་དང༵་འདོད་པའི་ལྷ༵་དང༵་གཟུགས་ཀྱི་ཚང༵ས་པ༵་ལ་སོགས་པ་ཡི༵་གནས་སུ། དེ་དག་གི་རྣམ་པར་སྐྱེ་བ༵་རྣམ༵་པར་དག༵་པ་སྐྱོན་མེད་ཅིང་ཡོན་ཏན་ཕུན་སུམ་ཚོགས་པ་ཉིད་འཛི༵ན་མེ༵ད་ཀྱི༵་གནས་རིགས་དེ་དག་གི་འགྲོ་བ་རྣམས་དང་ཡོན་ཏན་གྱི་ཆོས་མཚུངས་པའམ་སྐལ་བ་མཉམ་པ་མ་ཡིན་ནོ། །དཔེར་ན་སངས་རྒྱས་དང་བྱང་ཆུབ་སེམས་དཔའ་རྣམས་འགྲོ་བའི་གནས་རིགས་སོ་སོའི་ལུས་སུ་སྣང་ཡང་སྐལ་བ་དང་ཡོན་ཏན་མི་མཚུངས་པ་བཞིན་ནོ། །དེའང་སྐྱེ་བ་འཛིན་ཚུལ་བཞི་སྟེ། མདོ་སྡེ་རྒྱན་ལས། བློ་ལྡན་རྣམས་ཀྱི་ལས་དང་ནི། །གཞན་དོན་སྨོན་ལམ་དབང་དག་དང་། །ཏིང་ངེ་འཛིན་དང་དབང་འབྱོར་པའི། །དབང་གིས་སྐྱེ་བར་འདོད་པ་ཡིན། །ཞེས་སོ། །དེ་ལས་སོ་སོའི་སྐྱེ་བོའི་སར་ལས་བཟང་ངན་གྱིས་མཐོ་རིས་དང་ངན་སོང་དུ་སྐྱེའོ། །ས་དང་པོ་ནས་བདུན་པའི་བར་དུ་སྨོན་ལམ་དང་ཐབས་ལ་མཁས་པའི་སྤྲུལ་པས་སྐྱེ་བར་འདོད་དོ། །དག་པ་ས་གསུམ་དུ་ཏིང་ངེ་འཛིན་དང་དབང་འབྱོར་པས་གང་ལ་གང་འདུལ་དུ་སྐྱེ་བར་སྣང་ངོ་། །སངས་རྒྱས་ཀྱི་སར་ལྷུན་གྱིས་གྲུབ་པའི་སྤྲུལ་པས་དབང་འབྱོར་པ་ཆེན་པོའི་རོལ་པ་མཛད་པ་བཅུ་གཉིས་ལ་སོགས་པར་སྣང་ངོ་། །འཕགས་པ་རྣམས་ལ་སྐྱེ་བ་མཚན་ཉིད་པ་མེད་དེ། སྐྱེ་རྒ་ན་འཆིའི་ཆུ་བོ་ལས་བརྒལ་བའི་ཕྱིར། འོན་ཀྱང་ཐུགས་རྗེས་སྤྲུལ་པ་སྟེ། རྒྱུད་བླ་མ་ལས། འཕགས་པས་འཆི་དང་ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཇི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཅིང་། །སྙིང་རྗེའི་བདག་ཉིད་སྐྱེ་བ་དང་། །འཆི་དང་རྒ་དང་ན་བར་སྟོན། །ཞེས་པ་དང་། སྡུད་པ་ལས། རྒ་དང་ན་དང་འཆི་བ་མེད་ཀྱང་འཆི་འཕོ་སྟོན། །ཞེས་སོ། །དེ་ལ་རྣམ་པར་སྨིན་པའི་རིག་འཛིན་ནི་ལས་ཀྱི་སྐྱེ་བ་ཟད་དེ་ལུས་བོར་མ་ཐག་ཏུ་འཕགས་པའི་ས་ཐོབ་པས་སྦྱོར་ལམ་མཐར་ཐུག་དང་གཅིག་པའི་ཕྱིར་རོ། །དེའང་སྦྱོར་ལམ་དྲོད་ནས་ཀྱང་ངན་འགྲོ་མེད་པར་མངོན་རྟོགས་རྒྱན་གྱི་དྲོད་ཀྱི་སྐབས་སུ། ཐེ་ཚོམ་མི་དལ་ཟད་པ་དང་། །ཞེས་པའོ། །དེས་ན་སྨོན་ལམ་གྱིས་དག་པའི་ཞིང་ལ་སོགས་པར་འགྲོ་བའི་དོན་དུ་སྐྱེའོ། །ཚེ་དབང་དང་ཕྱག་རྒྱ་ནི་ཏིང་ངེ་འཛིན་གྱི་སྐྱེ་བས་དོན་བྱེད་ཀྱི། སྐྱེ་བ་རང་མཚན་པ་མེད་དེ། ལུས་དེ་ཉིད་རྡོ་རྗེའི་སྐུར་གནས་གྱུར་པས་འཇིག་འབྲལ་མེད་པའི་ཕྱིར་རོ། །ལྷུན་གྲུབ་ནི་དབང་འབྱོར་པའི་སྐྱེ་བ་གང་ལ་གང་འདུལ་དེར་སྣང་བས་སྤྲུལ་པ་འགྱེད་པ་ཡིན་ནོ། །

གཉིས་པ་ས་གང་གིས་བསྡུས་པ་ནི། རིག་འཛིན་དང་པོ་གསུམ་རྒྱུའི་སས་བསྡུས་ཤིང་། ཕྱི་མ་འབྲས་བུའི་སས་བསྡུས་ལ། (༢༣༡)དེ་ཐམས་ཅད་ཕྱིར་མི་ལྡོག་པས་ཁྱད་པར་གྱི་སས་བསྡུས་པ་ཡིན་པའི་ཕྱིར། ཁྱད་པར་ས་ལ་གནས་འགྱུར་ཡིན། །ཕ་རོལ་ཕྱིན་པ་ཀུན་ཏུ༵་རྫོགས། །ཞེས་སོ། །རྒྱུའི་སས་བསྡུས་ཚུལ་དུ་བཤད་ན། རིག་འཛིན་དང་པོ་གསུམ་པོ་དེ་མི་དང་ལྷ་དང་ཚངས་པ་ཡི་སྐྱེ་བ་འཛིན་མོད་ཀྱི། ཁྱད༵་པ༵ར་དུ་ས༵་བཅུ་ལ༵་གན༵ས་པ༵ར་འགྱུར༵་བ་ཡི༵ན་ཏེ། ས་བཅུའི་ངོ་བོ་ཕ༵་རོལ༵་ཏུ་ཕྱིན༵་པ༵་བཅུ་པོ་ཀུན༵་ཏུ༵་རྫོག༵ས་པར་རྒྱུད་ལ་ཐོབ་པའི་ཕྱིར་རོ། །འབྲས་བུའི་སས་བསྡུས་ཚུལ་དུ་བཤད་ན། ལྷུན་གྲུབ་དེ་ཁྱད༵་པར༵་གྱི་ས༵་བཅུ་གསུམ་རྡོ་རྗེ་འཛིན་པ་ལ༵་གན༵ས་པར་གྱུར༵་པ་ཡི༵ན་ཏེ། འབྲས་བུ་མཐར་ཐུག་གི་སྒྲུབ་བྱེད་རྒྱུའི་ཕ༵་རོ༵ལ་ཏུ་ཕྱིན༵་པ༵་བཅུ་པོ་ཀུན༵་ཏུ༵་རྫོ༵གས་པའི་ཕྱིར་ཞེས་སོ། །ཕྱིར་མི་ལྡོག་པ་ཁྱད་པར་གྱི་སས་བསྡུས་ཚུལ་བཤད་ན་རིག་འཛིན་བཞི་པོ་ཐམས་ཅད་འབྲས་བུའི་རིག་འཛིན་ལ་གནས་པར་ངེས་པས་ཁྱད༵་པར༵་གྱི་ས༵་ལ༵་གན༵ས་པར་གྱུར༵་པ་ཡིན༵་ཏེ། ས་དེ་ཉིད་གྲུབ་པའི་ངོ་བོ་རྒྱུ་དང་འབྲས་བུའི་ཕ༵་རོལ༵་ཏུ་ཕྱིན༵་པ་ཀུན༵་ཏུ༵་རྫོ༵གས་པར་བསྒྲུབ་པའི་རིམ་པ་དཔེར་ན་ལྕགས་ཀྱུས་ཟིན་པའི་ཉ་སྐམ་སར་བཏོན་པ་བཞིན་ཞེས་པའོ། །

གསུམ་པ་མཐར་ཐུག་གི་འབྲས་བུ་ནི་བཅུ་གཅིག་ཀུན་ཏུ་འོད་ཀྱི་ས་ནི་ཐབ༵ས་མཐར་ཕྱིན་པ་རྣམ་པར་འཕྲུལ་པའི་སྤྲུལ་པ་དང༵་འཕྲིན་ལས་ཀྱིས་འགྲོ་བ་འདུལ་བའི་ས་ཡིན་ཏེ། མདོ་ལས། འོད་ཟེར་བཀྱེ་བའི་གདུལ་བྱ་སྣོད་དུ་རུང་བར་བྱེད་པའི་ཕྱིར་ཀུན་ཏུ་འོད་ཀྱི་སའོ། །ཞེས་སོ། །ཤེ༵ས་རབ༵་དང་ཐབས༵་ཀྱི༵་མཆོ༵ག་ཟུང་དུ་འབྲེལ་བ་མཐར་ཐུག་པ་བཅུ་གཉིས་མ་ཆགས་པ་པདྨ་ཅན་ལྷུན་སྟུག་པོ་བཀོད་པའི་ཞིང་ཁམས་རྩོལ་མེད་དུ་རང་སྣང་བའི་ས་སྟེ། ཀུན་གསལ་ལས། པདྨ་ཅན་ལ་ལོངས་སྤྱོད་རྫོགས། །ལྷུན་གྲུབ་ཡེ་ཤེས་རང་སྣང་བའོ། །ཞེས་སོ། །ཤེ༵ས་ར༵བ་མཆོ༵ག་གིས༵་ལོངས་སྤྲུལ་གཉིས་ཆོས་སྐུའི་གཞི་ལ་མྱ་ངན་ལས་འདའ་བ་དེའི་དབྱིངས་སུ་ཐིམ་པའི་གཞིར་གྱུར་པས་མཆོ༵ག་ཏུ་གྱུར༵་པ༵་ལྷུན་གྲུབ་རིན་པོ་ཆེའི་སྦུབས་ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བའི་ཞིང་ཁམས་གདོད་མའི་ཀུན་ཏུ་བཟང་པོ་སྟེ། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཉིད་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །དེ་ལྟར་གནས་སྐབས་དང་མཐར་ཐུག་གི་ས༵་ཡི༵་ཁྱད༵་པར༵་རབ་ཏུ་དགའ་བ་ལ་སོགས་པ་བཅུ༵་དང༵་ཀུན་ཏུ་འོད་ལ་སོགས་པ་གསུམ༵་ནི་རྒྱུ༵་དང་འབྲ༵ས་བུའི་ཁྱ༵ད་པ༵ར་གྱིས་ཕྱེ་བ་སྟེ། བཙལ་བ་མེད་པར་རང་བཞིན་ལྷུན༵་གྱིས༵་རྫོག༵ས་པ་ནི་མཐར་ཐུག་གི་ཐོབ་བྱའོ། །

གསུམ་པ་ཚོགས་ཀྱི་རྟེན་དཀྱིལ་འཁོར་ཀུན་འདུས་པ་ཆེན་པོས་དོན་བསྡུ་བ་ལ་གསུམ་སྟེ། ཀུན་ཏུ་བཟང་པོའི་བསྐྱེད་རྫོགས་བསྟན་པ། ཚུལ་དེས་དཀྱིལ་འཁོར་ཀུན་འགྲུབ་པ། ཕྲ་མོའི་ཉེས་པས་མི་གོས་པའོ། །

དང་པོ་ལ་གཉིས་ལས། བསྒོམ་ཚུལ་དངོས་ནི། ཏིང་ངེ་འཛིན་གསུམ་སྔོན་དུ་སོང་བས་ནམ་མཁའི༵་དཀྱིལ༵་འཁོར་རབ་ཏུ་དྭང༵ས་པའི༵་དབྱིང༵ས་ཡེ་ཤེས་ཀྱི་གཞལ་ཡས་ཁང་འོད་དང་བཅས་པའི་ནང་ན་ཉི༵་(༢༣༢)ཟླ༵་པདྨའི་གདན་ལ། ཡེ༵་ཤེ༵ས་རྒྱལ་པོ་ཀུན་ཏུ་བཟང་པོ་སྟང༵ས་དཔྱལ༵་གཉིས་ཟུང་དུ་སྦྱོར་བས་རྡོ་རྗེའི་སྐྱིལ་ཀྲུང་མཉམ་བཞག་དང་བཅས་པའི་སྐུ་ལས་འོད་ཟེར་དུ་མ་འཕྲོ་བར་བསྒོ༵མ་མོ། །དེའང་ཐུན་མོང་གི་ཐེག་པས་སངས་རྒྱས་རྣམས་ལ་རྒྱུ་ཐ་དད་ཞིང་ཐ་དད་དུས་ཐ་དད་ཚུལ་ཐ་དད་པར་འདོད་པ་ལས་ཁྱད་པར་དུ་བསྟན་ཏེ། དེའང་དེ་ལྟར་སྣང་བའི་སྤྲུལ་པའི་སྐུ་རྣམས་ཀྱང་གདུལ་བྱའི་སྣང་ངོར་ཡིན་གྱི། ཐུན་མོང་མ་ཡིན་པའི་ཐེག་པས་གཞན་ལ་ཆོས་སྐུ་སྐྱེ་བ་མེད་པ་དང་། ལོངས་སྐུ་འགག་པ་མེད་པ་འོག་མིན་ན་བཞུགས་པ་དག་གིས་བསྡུས་པས་དེའི་ཕྱིར་རང་གཞན་གྱི་སྐུ་གང་མོས་ཤིག་བསྒོམས་པས་ཐམས་ཅད་འགྲུབ་ཅིང་། ཁྱད་པར་དུ་སངས་རྒྱས་ཐམས་ཅད་ཀྱི་རང་བཞིན་ནམ་བྱེད་པོ་ཀུན་ཏུ་བཟང་པོ་ཡབ་ཡུམ་ཟུང་ཅིག་བསྒོམས་པས་རྒྱལ༵་བ༵འི་དཀྱིལ༵་འཁོ༵ར་ཐམ༵ས་ཅ༵ད་ཀྱང༵་མ༵་ལུས༵་པ༵ར་ནི༵་བསྒོ༵མ་པ༵ར་འགྱུར༵་ཏེ། ལྷའི་དཀྱིལ་འཁོར་ཐམས་ཅད་ཀྱང་སྐུ་གསུང་ཐུགས་དང་དབྱིངས་རང་བཞིན་གྱིས་དག་པ་གཅིག་ཏུ་འདུ་བའི་ཕྱིར་རོ། །དེའི་འཐད་པ་དགོད་པ་ནི། དེ་ལྟར་བསྒོམ་པའི་ལྷ་དེ་རང་གི་སེམས་ཡིན་པས་ཇི་ལྟར་འགྲུབ་སྙམ་པ་དང་། ཡང་ལྷའི་རང་བཞིན་གཞན་ཞིག་ནས་འོང་བས་དངོས་གྲུབ་སྟེར་བ་ཡིན་ནམ་སྙམ་པའི་ཐེ་ཚོམ་སྤང་བའི་ཕྱིར། འདས་པ་ལ་སོགས་པའི་དུས༵་བཞི༵་དང་ཤར་ལ་སོགས་པའི་ཕྱོག༵ས་བ༵ཅུ་པོ་གང༵་ནས༵་ཀྱ༵ང་རྫོ༵གས་པ༵འི་སང༵ས་རྒྱས༵་སེམས་ལས་ལོགས་སུ་གྱུར་པའི་རང་མཚན་པ་ཞིག་སྒྲུབ་རྒྱུའམ། འབྱོན་འབྱོན་པོར་རྙེད༵་པར་མི༵་འགྱུར༵་ཏེ། སེམ༵ས་ཀྱི་རང་བཞིན་ཇི་ལྟར་གནས་པ་དེ་ཉིད༵་རྫོག༵ས་པ༵འི་སང༵ས་རྒྱས༵་ཡི༵ན་གྱི། ཕྱོགས་གཞན་ནས་སངས་རྒྱས་འདི་ལྟ་བུ་ཞིག་ཅེའམ། སེམས་འདི་ཉིད་ད་ལྟ་སངས་རྒྱས་ཀྱི་ས་བོན་ནམ་རྒྱུ་ཡིན་པ་སྦྱངས་པས་ནམ་ཞིག་ན་སངས་རྒྱས་སུ་འགྱུར་གྱི་ད་ལྟ་སངས་རྒྱས་མ་ཡིན་ནོ་སྙམ་པ་སྟེ་ཡུལ་དུས་གཞན་དུ་ཕྱེ་བ་རྣམས་ཀྱིས་སངས་རྒྱས་རྙེད་པར་མི་འགྱུར་བས། དེའི་ཕྱིར་སང༵ས་རྒྱ༵ས་སེམས་ལས་གཞ༵ན་དུ༵་མ༵་འཚོ༵ལ་ཞིག༵་ཅེས་གདམས་སོ། །དེ་སྐད་དུའང་བརྒྱད་སྟོང་པ་ལས། བྱང་ཆུབ་སེམས་དཔའ་རྟག་ཏུ་ངུའི་མདུན་དུ་སངས་རྒྱས་ཀྱི་སྐུ་ཞིག་བཞུགས་པ་དེས་ལུང་བསྟན་ནས་མི་སྣང་བར་གྱུར་པ་དེའི་ཚེ། རྟག་ཏུ་ངུ་འདི་སྙམ་དུ་སེམས་ཏེ། དེ་བཞིན་གཤེགས་པ་དེ་ནི་གང་ནས་བྱོན། གང་དུ་བཞུད་སྙམ་མོ། ཞེས་པ་ནས། ཆོས་འཕགས་ཀྱིས་སྨྲས་པ། རིགས་ཀྱི་བུ་དེ་བཞིན་གཤེགས་པ་དེ་ནི་གང་ནས་བྱོན་པའང་མེད་ཅིང་གང་དུ་བཞུད་པའང་མེད་དོ། །དེ་ཅིའི་ཕྱིར་ཞེ་ན། འདི་ལྟ་སྟེ། དཔེར་ན་ལ་ལ་ཞིག་གི་རྨི་ལམ་དུ་དེ་བཞིན་གཤེགས་པ་བྱོན་ནས་མི་སྣང་བར་གྱུར་ན། དེ་གང་ནས་བྱོན་པའམ་བཞུད་པ་ཡོད་དམ། རྟག་ཏུ་ངུས་སྨྲས་(༢༣༣)པ། དེ་ནི་མ་མཆིས་ཏེ་གཉིད་ཀྱིས་ལོག་པ་ལས་གཞན་མེད་དོ། །ཆོས་འཕགས་ཀྱིས་སྨྲས་པ། དེ་བཞིན་དུ་སེམས་ལས་གུད་ན་མེད་དེ་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཕྱིར་རོ། །ཞེས་པ་དང་། སེམས་རྟོགས་ན་སངས་རྒྱས་ཡིན་པས། སངས་རྒྱས་གཞན་དུ་མི་འཚོལ་བའི་འདུ་ཤེས་རབ་ཏུ་བསྐྱེད་པར་བྱའོ། །ཞེས་གསུངས་པ་ལྟར་རོ། །

གཉིས་པ་ཚུལ་དེས་དཀྱིལ་འཁོར་ཀུན་འགྲུབ་པ་ནི། དཀྱིལ༵་འཁོ༵ར་ཀུན༵་ཏུ༵་བཟང་པོ་གཅིག་གི་བསྐྱེད་རྫོགས་ལ་ར༵བ་ཏུ་སྦྱོར༵་ཞིང་བསྒོམ་པར་བྱས་པ༵ས་དེ་ལས་འཕྲོས་པའི་དཀྱི༵ལ་འཁོ༵ར་མ༵་ལུས༵་པ་ཐམས་ཅད་འགྲུབ༵་པར༵་འགྱུ༵ར་ཏེ། ཉི་ཟླ་གྲུབ་པ་ན་དེའི་འོད་ཟེར་མ་ལུས་པ་ཐམས་ཅད་འགྲུབ་པ་བཞིན་ནོ། །

གསུམ་པ་ཉེས་པ་ཕྲ་མོས་མི་གོས་པ་ནི་ཐམས་ཅད་སེམས་ཀྱི་རང་བཞིན་དུ་ཤེས་པས་སྤང་བླང་གཉིས་སུ་མེད་པ་དེ་ལྟ་བུ་དོན་རྟོགས་ནས་རྫོགས་རིམ་ལ་དབང་འབྱོར་བས་བསྐྱེད་རིམ་གྱི་ཆོ༵་ག༵་ཕྲ་མོ་རྣམས་ལ་ལྷག༵་གམ༵་མ༵་ཚང༵་ན༵འང་། ཆོ་གའི་ཡན་ལག་ཉམས་པའི་སྐྱོན༵་ཉིད༵་ད༵ག་སྟེ༵་དེའི་ཉེས༵་པ༵་མེ༵ད་པ་དངོས་གྲུབ་ལ་སྒྲིབ་པར་མི་འགྱུར་ཏེ། རྡོ་རྗེ་ལས། ཆོས་ཉིད་དག་པས་རྣལ་འབྱོར་པས། །བསྐྱེད་པའི་ཆོ་ག་ལས་རབ་དག །ལྷག་དང་མ་ཚང་ཉེས་བྲལ་ཅིང་། །དངོས་གྲུབ་ཡ་མཚན་ཆེན་པོ་འགྲུབ། །ཅེས་སོ། །དེའང་མཚན་བཅས་བསྐྱེད་པ་དང་མཚན་མེད་རྫོགས་པའི་རིམ་པར་སྤྱི་ལ་གྲགས་ཀྱང་། རྣལ་འབྱོར་པའི་བློ་དངོས་པོ་དང་མཚན་མར་འཛིན་པ་དེའི་ཚེ་གང་བསྒོམ་ཀྱང་མཚན་བཅས་ལས་མི་འདའ་ཞིང་། བློ་མཚན་འཛིན་མེད་པའི་ཚེ་ཅི་བསྒོམས་ཀྱང་མཚན་མེད་ཡིན་ཏེ། རྔམ་གློག་ལས། དེས་ན་རྣལ་འབྱོར་སྐྱེས་བུ་ཡིས། །མཚན་མེད་ངང་ལ་གནས་བཅས་ནས། །མཚན་མའི་རྣལ་འབྱོར་བསྒོམ་པར་བྱ། །མཚན་མ་མེད་དང་མཚན་མ་ཡང་། །ཐ་དད་མིན་པར་ཤེས་པར་བྱ། །དེ་ལྟར་རིག་པའི་རྣལ་འབྱོར་པ། །དེ་ཉིད་ང་ཡི་ས་ཐོབ་ཡིན། །སངས་རྒྱས་ཞེས་ཀྱང་དེ་ལ་བྱ། །ཞེས་པ་དང་། ཡང་། ཇི་སྲིད་མཚན་མར་འཛིན་ཡོད་པ། །དེ་སྲིད་མཚན་བཅས་འཇིག་རྟེན་པ། །ནམ་ཞིག་དངོས་པོ་མཚན་མ་མེད། །དེ་ཚེ་རབ་ནི་འཇིག་རྟེན་འདས། །སྤྱོད་ཡུལ་ཀུན་ཏུ་བཟང་པོའི་ཞིང་། །ཉོན་མོངས་ཡེ་ཤེས་གཉིས་སུ་མེད། །ཅེས་སོ། །གསུམ་པ་སྐབས་ཀྱི་དོན་བསྡུ་བ་ནི་དེ་སྐད་ཅེས་རང་སྣང་དག་པའི་འཁོར་ལ་ཆེད༵་དུ༵་བརྗོ༵ད་པ༵ས། ཏིང་ངེ་འཛིན་གྱི་རོལ༵་མོ༵འི་སྤྲིན༵་བཀོད་པའི་མཆོད་པ་ཕྱོགས་བཅུར་མི་སྒྲིབ་པར་གསལ་བའི་རྒྱན་ཕུན་སུམ་ཚོགས་པ་རང་སྣང་བ་ཉིད་ཀྱིས༵་དེ་བཞིན་གཤེགས་པ་ཐམས་ཅད་མཉེས༵་པར༵་གྱུར༵་ཏོ༵། །ཐབས་ཀྱི་རོལ་པ་མཆོག་ཏུ་གསང༵་བ༵འི་སྙིང༵་པོ༵་སྣང་བཅས་ཚོགས་ཀྱི་དེ༵་ཁོ༵་ན༵་ཉིད༵་ངེ༵ས་པ༵་ལས༵། ལམ་བསོད་ནམས་དང་(༢༣༤)ཡེ་ཤེས་ཀྱི་ཚོག༵ས་བསྒྲུབ༵་པའི༵་ལེའུ༵་སྟེ༵་བཅུ༵་གཉི༵ས་པའི་རྣམ་པར་བཤད་པ༵འོ༵།། །།