ཞིང་ཆེན་ཡོངས་ནས་དཔྱད་རྩོམ་ཨང་དང་པོའི་གཟེངས་རྟགས་བཞེས་པའི་བསྐོར་གྱི་རྣམ་ཐར།
བོད་ཟླ་བཅུ་བའི་ཚེས་ཉི་ཤུ་གསུམ་གྱི་ཉིན་སློབ་གླིང་ནས་ལམ་ལ་ཆས་ཏེ། ཚེས་ཉེར་བཞི་ལ་མཚོ་སྔོན་ཞིང་ཆེན་དུ་ཞིང་ཆེན་ཡོངས་ཀྱི་ཁུལ་དྲུག་གི་མཁས་དབང་དགེ་བཤེས་སོགས་རྩོམ་པ་པོ་དང་མཁས་པའི་མཚན་གནས་མཐོ་བ་བརྒྱ་རྩ་ལྷག་གི་ནང་ནས། གྲྭ་བ་གྲྭ་རྐྱང་གི་ས་ནས་སློབ་གཉེར་འབད་བརྩོན་གྱིས་ནར་སོན་པའི་ངེས་པ་དོན་གྱི་མཁས་སྤྱོད་ཟུང་གི་བདག་ཉིད་བཤེས་གཉེན་རིན་པོ་ཆེ་གང་ཉིད་ཀྱི། ནང་བསྟན་རིག་གཞུང་སྤྱི་ཚོགས་ཀྱི་ལམ་ལུགས་དང་མཐུན་ཚུལ་ཅུང་ཟད་བརྗོད་པ། ཞེས་བྱ་བའི་དཔྱད་བརྗོད་ཀྱི་རྩོམ་ལ་བྱ་དགའ་ཨང་དང་པོའི་གཟེངས་རྟགས་ཐོབ། བཤེས་གཉེན་རིན་པོ་ཆེ་གང་ཉིད་ཀྱི་སྐབས་དེའི་འགྲུལ་བཞུད་ཀྱི་རྣམ་པ་ནི། ཚེས་ཉེར་གསུམ་གྱི་ཞོགས་ཀ་ཆུ་ཚོད་བདུན་ནས་ཕར་ཕྱིན་དང༌། འདུལ་བ། གསང་སྔགས་བཅས་ཀྱི་སློབ་ཁྲིད་བསྟུད་མར་གནང་བ་གྲུབ་མ་ཐགཆུ་ཚོད་བཅུ་དང་ཕྱེད་ཀྱི་སྟེང་གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོ་ནས། གཞུང་ཆེན་བཀའ་པོད་ལྔ་ཆ་ལག་དང་བཅས་པ་དང༌། གསང་ཆེན་སྔགས་ཀྱི་ལམ་རིམ་པ་གཉིས་ཀྱི་རྒྱུད་བཤད་མན་ངག་གི་རིམ་པ་མ་ལུས་པ་ལ་སློབ་གཉེར་མཐར་ཕྱིན་འཛིན་གྲྭ་གསུམ་པ་ཚང་གི་སྔགས་ཀྱི་དམ་བཅའ་ཆེན་མོར་དབུ་བཞུགས་དང༌། དགོང་མོ་ཆུ་ཚོད་དྲུག་ལྷག་ནས་དམ་བཅའ་མཇུག་གྲུབ་མི་རྣམ་ལ་གསུང་བཤད་བཀའ་སློབ་བསྩལ་ཞིང༌། དགེ་སློབ་མཉམ་པར་བཅས་སྒྲོན་ཏེ། གྲྭ་འཁོར་གང་ཡང་མེད་པར་ཐད་ཀར་ལམ་ལ་ཆས་ཏེ་ནུབ་མོར་གཅིག་སྒྲིལ་རྫོང་དུ་ཞག་བཞུགས་མཛད། ཁང་སར་ཉིན་ཡུལ་དགོན་གྱི་བཤད་གྲྭ་བ་རྣམས་ཀྱིས་མཇལ་ཁ་ཞུས། ཕྱི་ཉིན་ནངས་མོར་གླ་གཏོང་རླངས་འཁོར་ཞིག་གི་ནང་འཚང་ཁ་ཤིག་ཤིག་གིས་མཚོ་སྔོན་ཞིང་ཆེན་དུ་འབྱོར། ཕྱི་ཉིན་ཁོང་གི་དཔྱད་རྩོམ་ལ་ཞིང་ཆེན་ཡོངས་ཀྱི་ཁུལ་དྲུག་གི་མངའ་ཁོངས་ནས་བསྡུས་པའི་དཔྱད་རྩོམ་ཐམས་ཅད་ཀྱི་ནང་ནས་ཨང་དང་པོར་བདམས་ཐོན་བྱུང་བར་མ་ཟད། དཔྱད་རྩོམ་དེའི་སྟེང་ནས་གསུང་བཤད་མདོར་བསྡུས་ཤིག་ཀྱང་གནང༌། ཕྱི་དྲོའི་མཛད་རིམ་ཐ་མར། མཚོ་སྔོན་ནང་བསྟན་མཐུན་ཚོགས་དང་ཐབས་ཕྱོགས་གཅིག་གྱུར་པུས་མཉམ་འབྲེལ་གྱི་འོག་ནས། ཚོགས་མང་གི་དབུས་སུ་དཔྱད་རྩོམ་ཨང་དང་པོའི་གཟེངས་རྟགས་བྱ་དགའ་བསྩལ་ཞིང༌། ཚེས་ཉེར་ལྔའི་ཞོགས་པར་སླར་ཡང་གྲྭ་འཁོར་གང་ཡང་མེད་པར་གླ་གཏོང་ཞིག་གི་ནང་དུ་ཚང་ཁ་ཤིག་ཤིག་གིས་ཕྱིར་ལོགས། ཐེངས་དེར་ཕེབས་པའི་བླ་མ་དགེ་བཤེས་མཁན་པོ་དགེ་རྒན་སོགས་གང་ཡིན་ནའང་འདྲ། ད་དུང་ལས་བྱེད་འགོ་ཁྲིད་ཐམས་ཅད་ཕེབས་འཁོར་རྫིག་པོ་དང་གཡོག་པོ་ཡང་གཡོག་མང་པོ་བྱས་ཏེ་སླེབས་འདུག་པའི་ཁྲོད། ཐད་ཀར་བལྟས་ཙམ་ན་ཇི་འདྲའི་ཐབས་ཆག་པོ་འདྲ་ཞིག་གི་རྣམ་པས་ཐོན་འདུག་སྙམ་བྱེད་ཅིག་ཡིན་པ་ལ། དོན་ལ་ནི་དེ་ཡང་ནང་གི་དཔལ་ཡོན་གྱི་རྣམ་པ་ཕྱི་ལ་འཆར་བ་ཞིག་མ་ཡིན་ནམ། ལམ་བར་དུ་གླ་གཏོང་ནང་གི་རྒད་པོ་ཞིག་གིས་ཁྱེད་མཁན་པོ་ཞིག་ཡིན་འདུག་ན། དེང་སང་བླ་མ་ཁག་ལ་རླངས་འཁོར་དང་འཁོར་གཡོག་སྒེར་གཉེར་མེད་མཁན་སུ་ཡོད་པ་རེད་ཅེས་པར། ཁོང་གིས་དེ་ལ། འདི་འདྲའི་རིགས་མང་པོ་མི་མང་གི་གོ་རྟོག་མ་སད་པའི་སྐྱོན་ཆ་ལས་ཡོང་བ་རེད། དཔེར་ན། བླ་མ་ཞིག་གིས་རླངས་འཁོར་དང་གཡོག་འཁོར་རྫིག་པོ་བྱས་ཏེ་ཕེབས་ཤིང༌། ཁང་བ་སོགས་རྒྱས་སྤྲོས་བྱས་ན་མི་མང་གིས་དད་པ་འཇོག་གི་རེད། དེ་ལས་ལྡོག་སྟེ་གཉོམ་ཆུང་ཆོག་ཤེས་བྱས་སོང་ན་མི་མང་ཡིན་ཡང་རང་བཞིན་གྱིས་སྡང་འོང་པ་འདྲ་ཞིག་ཡོད་པས་རེད། དེ་ད་ལྟ་ང་ཚོའི་མི་མང་གི་གོ་རྟོག་མ་སད་པའི་སྐྱོན་ཆ་ཆེ་ཞིག་ཡིན་པ་རེད་ཅེས་ལབ་གླེང་ཞིབ་མོ་མཛད་རབས་ཤིག་ཀྱང་ཐོས་ཏེ། གསུང་བཤད་དེ་གཅིག་པུས་ང་ཚོ་ལ་བསམ་གཞིག་གཏོང་དགོས་པའི་གོ་བརྡ་ཆེ་ཞིག་སྤྲད་ཡོད་པ་མིན་ནམ་སྙམ། འདི་ནི་ཞོར་འཕྲོས་ཙམ་སྟེ། སྤྱིར་གང་ཉིད་ས་ཆ་གང་དུ་བཞུགས་ཀྱང༌། སློབ་གཉེར་བ་སྤྱིར་བཏང་བ་དག་དང་གསོལ་ཆས་འདྲ་འདྲ་དང༌། བཞུགས་ཤག །ན་བཟའ་སོགས་ཡོད་ཚད་ནས་ཡོད་ཚད་དཀྱུས་མ་ལས་ཀྱང་དཀྱུས་མའི་ངང་ཚུལ་ཁོ་ན་འཛིན་པ་ལས། ཐ་ན་ལག་འདོགས་ཆུ་ཚོད་ཙམ་ཡང་བཏག་པ་མི་སྲིད་དེ། རྒྱས་སྤྲོས་ཆེ་ཆེ་གཉན་གཉན་བཟོ་རྒྱུར་ཐུགས་གཏིང་ནས་སུན་པོ་ཡོད་པ་ཞིག་ཡིན། ནམ་རྒྱུན་གྱི་གསུང་གླེང་ན། གྲྭ་བ་གྲྭ་རྐྱང་གི་འཚོ་བ་ལས་སྐྱིད་པ་ཞིག་གཞི་ནས་རོལ་ཐབས་ཡོད་པ་མ་རེད། དེས་ན། ཁོ་བོ་ལ་མཚོན་ན་ཡང་ཚང་མས་ལོགས་བཀར་འདྲ་ཞིག་བཟོས་ནས་ཡར་ག་ཞིག་ལ་ཕུད་བཞག་ན། གུས་བཀུར་བྱས་མདོག་ཅན་པོ་ཡིན་རྒྱུ་རེད་དེ། གཙོ་བོ་སེམས་ཀྱི་ཁ་ཐག་ཉེ་དགོས་པ་རེད། བླ་མ་སློབ་མ་དགེ་རྒན་དགེ་ཕྲུག་ཅེས་པ་དེ་སེམས་པའི་བར་ཐག་ཉེ་མོ་ཡོད་དགོས་པ་རེད་མ་གཏོགས། གཅིག་གིས་གཅིག་ལ་རྒྱང་ནས་བཀྱེད་འདུག་ན་ཡག་པོ་མི་འདུག །མཚམས་ལན་རེར་ཁྱེད་ཅག་ལ་སྒྲིག་ལམ་བལྟ་དགོས་པའི་དབང་གིས་བར་ཐག་གཏན་ནས་མེད་ན་མི་ཡོང་ས་འགའ་རེ་འདུག་མ་གཏོགས། སྒྲིག་ལམ་དེ་ངའི་ཕྲག་པ་ལ་ཁུར་མ་དགོས་ན། མི་སུ་ལ་ཡང་རྒྱུས་མི་མངོན་པ་འདྲ་དང་ཅིག་ཡིན་ཡིན་འདྲ་འགྲོ་རྒྱུ་དགའ་མོས་རྩ་བ་ནས་མེད། ལ་ལས། བླ་མ་ཟཻར་དུས་རྒྱང་ལ་བཅད་བཞག་གི་འདུག །ཕྱི་མི་དངོས་མ་ཞིག་ཏུ་བཟུང་ནས་འཛེམས་དགོས་ས་དང་འབྲོ་དགོས་ས་ཞིག་ཡིན་སྙམ་གྱིན་ཡོད་པ་འདྲ། འགའ་རེས་རིག་བཞག་ན་ཉེན་རྟོག་པ་ཐོན་བཞག་པ་འདྲ་བའི་ལྟ་ཚུལ་བཟུང་གི་འདུག །ས་ཆ་ཐག་རིང་ཞིག་ནས་ངོ་ཐུག་བཞག་པ་ཡིན་ན་ཕན་ཚུན་མཚམས་འདྲི་འདྲ་བོ་བྱས་ཏེ། བློ་ཐག་ཉེ་མོ་འདང་ཡོད་པ་ཞིག་དགོས་པ་རེད་དེ། རིག་མ་ཐག་ཡིབ་སེར་འབྲོས་འགྲོ་ཁུལ་བྱེད་ཀི་འདུག །དེ་བརྩི་འཇོག་བྱེད་སྟངས་ཤིག་རེད་དམ། གཅིག་གིས་གཅིག་ལ་ཤ་ཚ་གྲོས་འདེབས་དགོས་པ་རེད། རང་རང་གི་དོན་དག་ལ་སེམས་པ་དཀར་པོས་སློབ་གསོ་བཏང་ན་ལག་ལེན་ཨེ་འཁྱོངས་བྱེད་དགོས་པ་རེད་མ་གཏོགས། མ་འོངས་པ་ཞིག་ལ། ངས་སློབ་གཉེར་ཞིག་བྱས་མྱོང་པ་ཡིན། དགེ་རྒན་འདི་དང་འདི་བསྟེན་མྱོང་པ་ཡིན་ཏེ། ཕར་སེམས་ཐག་ཉེ་ཉེ་ཐེངས་མ་གཅིག་ཀྱང་བྱེད་མ་མྱོང༌། ཁ་བརྡ་ལྷོད་པོ་ཞིག་ཀྱང་བྱེད་མྱོང་མེད་བསམ་ན་ཡག་པོ་ཞིག་ཡིན་རྒྱུ་ཨེ་ཡིན་ནམ། ཞེས་སོགས་བླ་སློབ་སེམས་ཐག་ཉེ་དགོས་པའི་གསུང་མོལ་ནམ་ཞར་ཞར་དུ་ཕེབས་པ་ཡིན། བོད་ཟླ་བཅུ་གཅིག་པའི་ཚེས་བཅོ་ལྔ་དང་བཅུ་དྲུག་གཉིས་ལ། གངས་ལྗོངས་རིས་མེད་མཐོ་སློབ་ཀྱི་གྲྭ་མང་ཡོངས་དང༌། ཕྱོགས་སོ་སོ་ནས་ཕེབས་པའི་རིས་མེད་ཀྱི་གྲྭ་བ་བདུན་བརྒྱ་ལྷག་ལ། སློབ་དཔོན་སེང་བཟང་གིས་མཛད་པའི་འགྲེལ་བ་དོན་གསལ་དང༌། གངས་ཅན་མཁས་གྲུབ་ཀུན་གྱི་གཙུག་ནོར་ཉ་དབོན་ཀུན་དགའ་དཔལ་གྱི་ཕར་ཕྱིན་བཤད་སྦྱར་ཡིད་ཀྱི་མུན་སེལ་གྱི་ལུང་གནང༌། བོད་ཟླ་བཅུ་གཉིས་པའི་ཚེས་དགུ་ལ། ལོ་འཁོར་གཅིག་གི་སློབ་གཉེར་ཐོས་བསམ་སྒོམ་གསུམ་གྱི་བྱ་བ་ཐམས་ཅད་མཇུག་ལེགས་པར་གྲུབ་ནས་སློབ་གཉེར་བ་རྣམས་ལ་བྱ་དགའ་ཕུལ་བ་དང༌། གངས་ལྗོངས་རིས་མེད་ལྔ་རིག་མཐོ་སློབ་གཙུག་ལག་སློབ་གཉེར་ཁང་ཆེན་མོའི་ལོ་འཁོར་གཅིག་གི་སློབ་གཉེར་ཐོས་བསམ་སྒོམ་གསུམ་གྱི་བྱ་བ་ཐམས་ཅད་མཇུག་ལེགས་པར་གྲུབ་ནས། རྡོ་རྗེ་མི་འཁྲུགས་པའི་དབང་སྐུར་ཟབ་མོ་དང༌། ཚེ་དབང་ཚེ་འགུག་བསྔོ་བ་སྨོན་ལམ་བཀྲ་ཤིས་ཀྱིས་མཐའ་བརྒྱན་ཏེ་ཆོས་མཚམས་གྲོལ་ལོ། །
སྡེབས་ལེགས་སྙན་འཇེབས་རྩོམ་པའི་དཔྱིད་གླུ་ལས། །
དོན་ཟབ་བརྗོད་བྱའི་བཅུད་ཀྱིས་ཡོངས་གཏམས་པ། །
སྙན་དང་ཡིད་ཀྱི་གསོས་སུ་ཉེར་ཕབ་པས། །
མཁས་པའི་རྣམ་ཐར་མཁས་པའི་བླ་ན་འཕགས། །
སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཞིང་ཆེན་ཡོངས་ནས་དཔྱད་རྩོམ་ཨང་དང་པོའི་གཟེངས་རྟགས་བཞེས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་སོ་བཞི་པའོ། །