དཀའ་སྤྱད་དང་སྡུག་རུས།
དཀའ་སྤྱད་དང་སྡུག་རུས།
དེ་ནས་དཀའ་སྤྱད་དང་སྡུག་རུས་དགོས་པར་གདམས་པ་ནི། ཀུན་བྱང་འཇུག་ལྡོག་ཚུལ་ལ་མ་རྨོངས་ཤིང༌། །ཚོགས་ཀྱི་དབུས་སུ་སྨྲ་མཁས་དཔལ་འདོད་ན། །ད་ལྟ་བཟའ་བཏུང་གཉིད་ཀྱི་བདེ་བ་ལ། །ཆགས་པའི་སྐྱིད་ཆོས་འདི་ཡིས་མི་འགྲུབ་པས། །དཀའ་སྤྱད་སྡུག་རུས་བཟོད་པར་གྱིས་ཤིག་ཨང༌། །ཞེས་གསུངས་ཏེ། ཀུན་ནས་ཉོན་མོངས་པའི་ཕྱོགས་དང་རྣམ་བྱང་ཐར་བའི་ཕྱོགས་ཀྱི་འཇུག་ལྡོག་གི་ཚུལ་ནི་བདེན་བཞིའི་འཇུག་ལྡོག་གི་རིམ་པ་སྟེ། འབྲས་བུ་སྡུག་བསྔལ་བདེན་པ་ཤེས་བྱ་དང་དེའི་རྒྱུ་ཀུན་འབྱུང་བདེན་པ་སྤང་བྱ་ཡིན་ཞིང༌། རྒྱུ་ཀུན་འབྱུང་ལྡོག་ན་འབྲས་བུ་སྡུག་བདེན་ཡང་ལྡོག་པ་དང༌། ཀུན་འབྱུང་བདེན་པའི་དབང་གིས་སྡུག་བདེན་འབྱུང་བ་དེ་ནི་ཀུན་ཉོན་ཕྱོགས་ཀྱི་འཇུག་ལྡོག་གི་རིམ་པ་རེད། དེ་ནས་གཉེན་པོ་ལམ་བདེན་སྒོམ་སྟོབས་ཀྱིས་སྤང་བྱ་ཟད་པའི་འགོག་བདེན་ཐོབ་པ་སོགས་མདོར་ན་ཀུན་བྱང་གི་འཇུག་ལྡོག་གི་ཚུལ་ལ་མ་རྨོངས་པ་དང༌། ཆོས་ཚོགས་ཀྱི་དབུས་སུ་སྨྲ་མཁས་པའི་དཔལ་འདོད་ན་ད་ལྟ་ཟ་བཏུང་དང་གཉིད་སོགས་རྣམ་གཡེང་གི་བདེ་བ་ལ་ཆགས་པའི་སྐྱིད་ཆོས་འདི་ཡིས་དམ་པའི་ཆོས་དེ་བསྒྲུབ་མི་ནུས་པར་གསུངས་པས་ན་དཀའ་སྤྱད་སྡུག་རུས་བྱེད་རྒྱུ་གལ་ཆེན་པོ་སྟེ། འཇམ་མགོན་ས་པཎ་གྱིས། མཁས་པ་སློབ་པའི་དུས་ན་སྡུག །བདེ་བར་སྡོད་ལ་མཁས་མི་སྲིད། །བདེ་བ་ཆུང་ལ་ཆགས་པ་དེས། །ཆེན་པོའི་བདེ་བ་ཐོབ་མི་སྲིད། །ཅེས་གསུངས་པ་བཞིན་དུ་མཐར་ཐུག་གི་བདེ་བ་ཆེན་པོ་དང༌། མཁས་པ་ཆེན་པོར་འགྱུར་དགོས་ན་དཀའ་སྤྱད་ལ་བརྟེན་དགོས་པ་ལས་སེམས་རྣམ་པར་གཡེང་ནས་གནས་སྐབས་ཀྱི་བདེ་བ་ཙམ་ལ་ཆགས་ན་མཐར་འཐོབ་བྱ་དེ་ལ་བདེ་བ་ཆེན་པོའམ་འཐོབ་བྱ་ཆེན་པོ་ཡོད་མི་སྲིད་པ་རེད། དེས་ན་ད་ལྟ་སོ་སོར་དམ་པའི་ཆོས་བསྒྲུབ་པའི་སྐལ་བ་ཡོད་པའི་དུས་འདིར་ཐོས་བསམ་སྒོམ་གསུམ་བྱས་ནས་དམ་པའི་ཆོས་རིན་པོ་ཆེ་འདི་བསྒྲུབས་ཏེ་མི་ཚེ་དོན་ལྡན་ཞིག་ཡོང་བ་ལ་འབད་བརྩོན་བྱེད་རྒྱུ་དང༌། གནས་སྐབས་ཀྱི་བདེ་བ་ཙམ་མིན་པར་མཐར་ཐུག་གི་བདེ་བཆེན་པོ་ཐོབ་པ་ལ་བརྩོན་རྒྱུ་ནི་ཅིས་ཀྱང་གལ་ཆེའོ། །