གཉིས་པ་ནང་གི་མཆོད་པ།
གཉིས་པ་ནང་གི་མཆོད་པ་ནི།
བདུད་རྩི་ལྔ་ཡི་བཟའ་བ་ནི། །དངོས་གྲུབ་ཀུན་གྱི་དེ་ཉིད་མཆོག །སྒྲོན་མ་ལྔ་ཡི་བཟའ་བ་ནི། །སངས་རྒྱས་ཀུན་གྱི་དམ་ཚིག་གཙོ། །ཉེས་བྲལ་ཞི་བའི་བཏུང་བ་མཆོག །སྦྲང་རྩི་བུ་རམ་འབྲུ་དང་ཤིང༌། །བཅོས་པའི་མྱོས་བྱེད་རྣམ་པ་ལྔ། །ཤེས་རབ་རང་བཞིན་དབུལ་བར་བགྱི། །ཐོད་པའི་སྣོད་སྟོང་གསུམ་དང་མཉམ་པའི་ནང་དུ་ཤ་ལྔ་བདུད་རྩི་ལྔ་དམ་རྫས་དཔག་ཏུ་མེད་པ་སྦྱང་སྤེལ་སྦར་གསུམ་གྱི་སྒོ་ནས་ཨོཾ་སྐུ་རྡོ་རྗེ་ཞུ་བ་ལས་བྱུང་བའི་དངུལ་ཆུ་ལྟར་དཀར་བ་དང༌། ཨཱཿགསུངརྡོ་རྗེ་ཞུ་བ་ལས་པདྨ་ར་ག་ལྟར་དམར་བ་དང༌། ཧཱུཾ་ཐུགས་རྡོ་རྗེ་ཞུ་བ་ལས་བེ་ཌཱུརྱ་ལྟར་སྔོ་བ་དང༌།དེ་དག་བདེ་སྟོང་གི་ཡེ་ཤེས་ལས་གྲུབ་པའི་བདུད་རྩིའི་རྒྱ་མཚོར་བྱིན་གྱིས་རླབས་ཏེ་འབུལ་བ་སྟེ།བདུད་རྩི་ལྔ་ནི། བྱང་སེམས། དྲི་ཆུ། དྲི་ཆེན། རཀྟ། གླད་པའམ་རྐང་དམར་སྟེ་བདུད་རྩི་ལྔ་ཡི་བཟའབ་ནི་རང་ཉིད་ཡུམ་ལྔའི་གཟུགས་སྐུ་འགྲུབ་པ་དང་ཐུན་མོང་གི་དངོས་གྲུབ་བརྒྱད་དང་མཆོག་གི་དངོས་གྲུབ་ཀུན་གྱི་དེ་ཉིད་རང་རྒྱུད་ལ་འགྲུབ་པར་བྱེད་པའི་ཐབས་མཆོག་དང༌། ཤ་ལྔ་ནི། མིའིཤ། བ་གླང་གི་ཤ། རྟའི་ཤ། གླང་པོ་ཆེའི་ཤ། ཁྱིའི་ཤ་སྟེ་སྒྲོན་མ་ལྔ་ཡི་བཟའ་བ་ནི་སངས་རྒྱས་སྟེརྒྱལ་བ་རིགས་ལྔ་ཀུན་གྱི་རང་ཉིད་ལྷའི་གསལ་སྣང་མ་སྐྱེས་པ་སྐྱེས་པར་བྱེད་པ་དང་མཐར་ཐུག་གི་གཟུགས་སྐུ་འགྲུབ་བྱེད་ཀྱི་དམ་ཚིག་གི་རྫས་ཀྱི་གཙོ་བོ་ཡིན་པ་དང༌། ཐ་མལ་གྱི་ཉེས་སྐྱོན་དང་བྲལ་བ་ཉོན་མོངས་པའི་སྐྱོན་ཞི་བའི་བཏུང་བ་མཆོག་སྦྲང་རྩིའི་ཆང་དང༌། བུ་རམ་གྱི་ཆང་དང༌།འབྲུའི་ཆང་དང༌། ཤིང་ལས་སྐྱེས་པའི་ཆང་དང༌། ཕབ་བཏབ་པའི་བཅོས་པའི་ཆང་སྟེ། མྱོས་བྱེདརྣམ་པ་ལྔ་ནི་ཤེས་རབ་ཡེ་ཤེས་སྐྱེ་བྱེད་ཀྱི་རང་བཞིན་ཏུ་བལྟ་བའི་སྒོ་ནས་མཆོད་ཡུལ་རྣམས་ལ་དབུལ་བར་བགྱིའོ་ཞེས་ནང་མཆོད་འབུལ་བ་དེ་ཡན་ཆད་དུ་སོང་ཟིན་པ་རེད། དེ་ཡང་ཤ་ལྔ་བདུད་རྩི་ལྔ་མྱོས་བྱེད་ཀྱི་ཆང་ལྔ་སོགས་ནང་གི་མཆོད་པ་རྣམས་ཐོག་མར་མ་དག་པ་སྦྱངས། དག་པའི་རྫས་དེ་མང་དུ་སྤེལ་ནས་ཟག་མེད་ཡེ་ཤེས་ཀྱི་བདུད་རྩི་རྒྱ་མཚོར་བསྒྱུར་བ་གསུམ་གྱི་དབང་དུ་བྱས་ན་དེ་ལྟར་དགོས་པ་དང་བཞིའི་དབང་དུ་བྱས་ན་མ་དག་པ་སྦྱངས་དག་པ་རྣམས་ཕན་ཚུན་སྤེལ་ནས་བསྲེས། དེ་མང་དུ་སྦར་དེ་ནས་ཟག་མེད་ཡེ་ཤེས་ཀྱི་བདུད་རྩི་རྒྱ་མཚོར་བསྒྱུར་ནས་ཨོཾ་ཨཱཿ་ཧཱུཾ་ཧོཿཞེས་པས་བྱིན་གྱིས་རླབས་དགོས་པ་རེད།