ཕུག་ལྷ་དཀོར་བདག་གི་བསང་མཆོད།
ཕུག་ལྷ་དཀོར་བདག་གི་བསང་མཆོད་བཞུགས་སོ།། ཧཱུྃ། བདག་ཉིད་མཚོ་སྐྱེས་པདྨ་འབྱུང་གནས་སྐུ། །བྱམས་དང་སྙིང་རྗེས་ལྷ་འདྲེ་དབང་དུ་སྡུས། །ཡུལ་ཕྱོགས་ས་ཕྱོགས་དབང་གི་ལྷ་འདྲེ་དང་། །འགོ་བའི་ལྷ་ལྔ་སྐྱོབ་པའི་ལྷ་དགུ་དང་། །ཡུལ་ཕྱོགས་གར་འདུག་གནས་བདག་ཡུལ་ལྷ་རྣམས། །མཆོད་སྦྱིན་དབང་གིས་གནས་འདིར་གཤེགས་སུ་གསོལ། །དགོན་གནས་གཙུག་ལག་ཁང་ལ་གནས་པ་དང་། །གྲོང་དང་གྲོང་ཁྱེར་རྒྱལ་པོའི་དཀོར་མཛོད་དང་། །སྦྲ་གུར་ཁང་ཁྱིམ་འདི་རུ་གནས་པ་དང་། །སྒྲུབ་པའི་ལྷ་དང་ཕ་མཉེས་རྒྱུད་ཀྱི་ལྷ། །མ་སྲུ་རྒན་རབས་དཀོར་མཛོད་ཁ་རྗེར་དབང་། །དཀོར་བདག་ཕུག་ལྷ་གཉན་པོ་གནས་འདིར་བྱོན། །གནས་བདག་དཀོར་བདག་ཕུག་ལྷ་གཉན་པོ་ཁྱོད། །བཙུན་པ་རབ་བྱུང་དགེ་སློང་ཚུལ་འཛིན་དང་། །རྣལ་འབྱོར་ཚུལ་བཟུང་སྔགས་པའི་ཆ་བྱད་དང་། །རྒྱལ་པོའི་ཚུལ་བཟུང་སྐྱེ་བོ་སྟག་ཆས་ཅན། །བུ་ཆུང་སྟག་ཕུད་བུ་མོ་གཡུ་བྱུར་ཅན། །བུད་མེད་ཆོས་སུ་བཟང་ངན་གང་བསྟན་པ། །ཁྱི་སྐྱ་ཁྱི་དམར་ཁྱི་རྒན་གར་སྤྲུལ་རྣམས། །གང་དུ་འདུག་ཀྱང་གང་དུ་འགྲོ་བའི་གནས། །ཡུལ་བདག་གྲོང་
བདག་ཕུག་ལྷ་དཀོར་བདག་རྣམས། །རུ་ང་ཕྲག་དོག་ཀོ་ལོང་མ་མཛད་པར། །མཆོད་པའི་གནས་འདིར་བདག་གིས་སྤྱན་འདྲེན་ནོ། །མགུ་ཚིམ་ཡི་རང་ངང་ནས་གཤེགས་སུ་གསོལ། །སྦྲ་ཁྱིམ་དཀོར་ནོར་རྟེན་ལ་བཞུགས་སུ་གསོལ། །ཁྱིམ་ལྷ་ཕུག་ལྷ་དཀོར་བདག་ཁྱེད་རྣམས་ལ། །དཀར་གསུམ་མངར་གསུམ་ཤ་ཁྲག་གཙང་མས་མཆོད། །ཇ་ཕུད་ཆང་ཕུད་གསེར་སྐྱེམས་གཙང་མས་མཆོད། །མཆོད་དོ་ཕུག་ལྷ་དཀོར་བདག་གཉན་པོ་མཆོད། །ཨ་གར་ཛཱ་ཏི་རྒྱ་ཤུག་སྤོས་སྣའི་ཚོགས། །སུར་ཤུག་མཁན་དཀར་མེ་ལ་བསྲེགས་ནས་ཀྱང་། །བསྲེགས་པའི་དུད་སྤྲིན་ལྷ་ལམ་ཡོངས་ལ་ཁྱབ། །ཕྱི་ནང་གསང་གསུམ་མཆོད་པ་སྣ་ཚོགས་འདིས། །ཁྱིམ་ལྷ་ཕུག་ལྷ་དཀོར་བདག་གཉན་པོ་བསང་། །ཀྱཻ། གསོན་ཅིག་ཉོན་ཅིག་ཡུལ་ལྷ་གཉན་པོ་རྣམས། །ཕ་མྱེས་རིང་ནས་ཁྱོད་ཉིད་ཡོད་པའི་ལྷ། །མ་གཡེལ་མ་སྐྱེད་རང་ལ་འཁོར་བར་གྱིས། །ད་ནི་བདག་གི་ལས་ལ་འཁོར་བའི་ལྷ། །ཞི་རྒྱས་དབང་དྲག་ལས་ཀ་གང་བྱེད་ཀྱང་། །རུ་ང་ཕྲག་དོག་མ་བྱེད་བརྟན་པར་བཞུགས། །སྒྲུབ་པའི་ལྷ་དང་མཆོད་པའི་ལྷ། །བདག་དང་འདུ་འབྲལ་མེད་པར་མགོན་
སྐྱོབ་མཛོད། །སྤུ་གཞོབ་གསུར་དང་འཁོན་འཛིན་གང་བྱས་ཀྱང་། །མནོལ་བ་མེད་པར་བསང་གིས་དག་གྱུར་ཅིག །སྦྲ་མཁར་རྩེ་ལྷ་ཁྱིམ་ལྷ་ཐབ་ལྷ་དང་། །ཕ་མཚུན་དགྲ་ལྷ་ནོར་ལྷ་གྲོང་གི་ལྷ། །ཁྱེད་རྣམས་ཀུན་ལ་བསང་གི་མཆོད་པ་འབུལ། །ཇི་སྲིད་འཁོར་བའི་སྦྱིན་པ་མ་ཟད་པར། །དེ་སྲིད་མཆོད་སྦྱིན་འདི་ཡང་མི་འཛད་པའི། །དེ་ལྟར་མཆོད་པའི་བསོད་ནམས་དཔག་མེད་ཀྱིས། །ཕུག་ལྷ་དཀོར་བདག་ཚོགས་རྣམས་མཉེས་གྱུར་ཅིག །མཉེས་ནས་བཅོལ་བའི་ཕྲིན་ལས་འགྲུབ་པར་མཛོད། །ཅེས་ཕུག་ལྷའི་བསང་མཆོད་འདི་མེད་ན། བསང་གཞན་འདོན་ན་དགོས་པའི་མགྲོན་དེ་སྒྱུར་ནས་གཞན་དོན་མེད་ལ་བྱིན་པ་དང་འདྲ་བས། དེ་ཕྱིར་ཕུག་ལྷ་དཀོར་བདག་མཆོད་པ་གལ་ཆེའོ།། ༧ ཞེས་རཱ་ག་ཨ་སྱས་སྦྱར་བའོ། །སརྦ་མངྒ་ལཾ། དགེའོ། །བཀྲ་ཤིས་དཔལ་འབར་འཛམ་གླིང་རྒྱན་གྱུར་ཅིག །