པོག་ཕོར།
པོག་ཕོར་གྱི་སྣོད་ནི། གསེར་དངུལ་ཟངས་ལྕགས་དང་། དུང་དང་ཙན་དན་རྫ་ཕོར་སོགས་ལས་བྱས་ལ། ལྟོ་ལྡིར་ལ་རྐང་བ་གསུམ་ཅན། པ་ཏྲས་བརྒྱན་ཅིང་། ལུང་ཐག་གསུམ་ལྡན་ཞིག་གོ ། བདུག་སྤོས་ཀྱི་རྫས་ནི། ལེགས་གྲུབ་ལས། ག་བུར་དུ་ཏུས་ཨ་ཀ་རུ། །གསུམ་ནི་དྲི་ཞིམ་མཆོག་ཅེས་བྱ། །དྲི་ཞིམ་ལྔ་ནི་དེ་རྣམས་ལ། །ཙན་དན་དང་ནི་བུ་རམ་མོ། །ར་ས་དང་ནི་ཞོས་བསྣན་ན། །དྲི་ཞིམ་རྣམ་པ་བདུན་ཞེས་བྱ། །བདུག་སྤོས་དམ་པ་དེ་གསུམ་ནི། །ལས་རྣམས་ཀུན་ལ་གཙོ་བོར་གསུངས། །ཞེས་དང་། གཞན་ཡང་མདོ་རྒྱུད་དག་ནས་གསུངས་པ་ལྟར། སྤོས་སྦྱོར་དག་མཁས་གྲུབ་དམ་པའི་ཚད་ལྡན་ཕྱག་ལེན་ལྟར་བྱའོ། །
ཡང་ལེགས་གྲུབ་ལས། རིལ་བུ་གོང་བུ་ཕྱི་མ་དང་། །རེང་བུ་དང་ནི་རྣམ་པ་བཞི། །སྡིག་སྤོས་རིགས་སུ་ཤེས་བྱས་ནས། །ལས་རྣམས་སོ་སོར་སྦྱར་བར་བྱ། །ཞེས་པ་ལྟར་ལས་སོ་སོར་སྦྱོར་ཚུལ་ཡང་། དེ་ཉིད་ལས། ཞི་བ་ལ་ནི་རིལ་བུ་མཆོག། རྒྱས་པ་ལ་ནི་གོང་བུ་མཆོག། དྲག་ཤུལ་སྤྱོད་ལ་ཕྱི་མ་ཤིས། །ཐམས་ཅད་ལ་ནི་རེང་བུ་ཤིས། །ཞེས་དང་། གཞན་ཡང་། གནོད་སྦྱིན་དང་ཕོ་ཉ་མོ་སོགས་བདུག་ཡུལ་གྱི་ཁྱད་པར་ལ་བརྟེན་ཏེ་སྤོས་སྦྱོར་མཐའ་ཡས་པ་ཞིག་ཡོད་དོ། །ད་ལྟ་སེར་སྦྲེང་སོགས་སུ་འང་པོག་ཕོར་གྱི་ནང་དུ་བདུག་སྤོས་བཏུད་ནས་ཕེབས་པའི་ཕྱག་སྲོལ་ཡོད་པ་དང་། ཡང་བགེགས་བསྐྲད་སོགས་ལ་གུ་གུལ་བདུག་པ་འང་རྒྱུད་ཀྱི་དགོངས་པའོ། །བདུག་སྤོས་ཀྱི་སྦྱར་རྫས་སུ་མི་རུང་བའང་། ལེགས་གྲུབ་ལས། བློ་ལྡན་རྣམས་ཀྱི་ངན་པ་དང་། །སེན་མོ་རྒྱ་སྐྱེགས་ཐམས་ཅད་དང་། །དགུ་བ་དང་ནི་ཆང་སོགས་ཀྱིས། །བདུག་སྤོས་སྦྱར་བར་མི་བྱའོ། །ཞེས་སོ། །