ཞབས་བརྟན་གསོལ་འདེབས་ཟླ་བ་འདོད་འཇོ།
ཞབས་བརྟན་གསོལ་འདེབས་ཟླ་བ་འདོད་འཇོ་བཞུགས།། ཨོཾ་སྭ་སྟི་སིདྡྷི། མཚོ་སྐྱེས་རྡོ་རྗེ་མཚོ་རྒྱལ་འབྲོག་བན་གྱི། །ཡེ་ཤེས་སྒྱུ་འཕྲུལ་དྲྭ་བའི་རོལ་མོ་ལས། །བསམ་བཞིན་མི་ཡི་སྲིད་པ་ཉེར་བཟུང་བ། །ཁྱབ་བདག་འཇིགས་བྲལ་ཛྙ་ནར་ཕྱག་བགྱིའོ། །གང་དེའི་ཆོས་དང་རིགས་ཀྱི་གདུང་འཚོབ་ཕྱིར། །གཞན་ཕན་བྱང་ཆུབ་སེམས་གཉིས་ཆུ་གཏེར་ལས། །ཡོངས་ཐོན་ཟླ་བ་ནོར་བུའི་མཚན་འཆང་ཁྱེད། །ཞབས་པད་རྡོ་རྗེའི་ཁྲི་ལ་རྟག་བརྟན་ཤོག །ཀུན་བཟང་ཐུགས་ཀྱི་བསྟན་པ་བཀའ་གཏེར་ལུང་། །མན་ངག་ཕ་ནོར་བུ་ལ་བཞག་པ་རྣམས། །འཛིན་སྐྱོང་སྤེལ་བའི་སྐབས་བབ་ལ་དགོངས་ནས། །འཛམ་གླིང་ཤར་ནུབ་གདུལ་བྱ་རྗེས་བཟུང་གསོལ། །ལས་ཉོན་དྲག་པོས་གཟིར་བའི་གདུལ་དཀའི་འགྲོ། །དྲང་དོན་རྒྱུ་འབྲས་ཐེག་
པས་ཐུལ་མིན་པས། །རང་བྱུང་ཡེ་ཤེས་རང་ཞལ་མངོན་བསྟན་ནས། །ཚེ་གཅིག་གདོད་མའི་རྒྱལ་སར་ཁྲིད་མཛད་གསོལ། །ཁྱད་པར་ཡབ་རྗེའི་ཟབ ཆོས་བྱིན་རླབས་ཀྱི། །ཚན་ཁ་མ་ཉམས་འཕྲད་གྲོལ་ཇི་སྙེད་པ། །ས་སྟེང་ནུབ་ཕངས་གསན་བསམ་བསྒོམ་པ་ཡིས། །གཞན་དྲིང་མི་འཇོག་བདག་གིར་མཛད་པར་གསོལ། །སྔ་འགྱུར་ཁྱད་ནོར་ཡིད་བཞིན་དབང་གི་རྒྱལ། །བཤད་སྒྲུབ་རྒྱལ་མཚན་ཏོག་ཏུ་རབ་མཆོད་དེ། །སྲིད་པའི་གདུང་བ་འཕྲོག་དང་ཆབས་ཅིག་པར། །ཟག་ཕུང་འོད་སྐུར་དེངས་གང་སྩོལ་མཛད་གསོལ། །མི་རིགས་ཡུལ་ཕྱོགས་ཀུན་སྤྱོད་མཚུངས་མིན་སྐྱོན། །ལུས་ངག་ཐོ་ཅོ་གྱ་ཚོམ་སྤྱི་བརྟོལ་སོགས། །ཐུགས་དང་འགལ་གྱུར་ཇི་མཆིས་བཤགས་པར་བགྱི། །སེམས་ཅན་སྙིང་རྗེའི་ཡུལ་དགོངས་བཟོད་པར་བཞེས། །མདོར་ན་
ཡབ་རྗེ་འགྲོ་བའི་མགོན་པོ་ཡིས། །སྔ་འགྱུར་བཀའ་གཏེར་བསྟན་པ་ཁོ་ནར་དགོངས། །སྔ་འགྱུར་བཀའ་གཏེར་བསྟན་པ་ཁོ་ནར་དགོངས། །སྙིང་པོའི་གནད་རྣམས་བཀའ་བསྡུ་མཛད་པའི་དོན། །ཆུད་མི་ཟ་བའི་ཐབས་ཚུལ་ལྷུར་བཞེས་གསོལ། །མགོན་ཁྱེད་གང་དུ་བཞུགས་པའི་ས་ཕྱོགས་སུ། །ནག་པོའི་རྩ་ལག་སྡེར་བཅས་མིང་མེད་ཆོས་མཐུན་བཞེད་རྒུ་ལྷུན་གྱིས་གྲུབ་པ་དང་། །དོན་གཉིས་འབྱོར་པ་རྒྱ་མཚོར་དབང་འབྱོར་ཤོག །གཞན་ཕན་ཚོགས་ཀྱི་ཟླ་བ་ཤར་བའི་་ མོད། །མི་ཤིས་རྒུད་པའི་སྨག་རུམ་མཐར་བྱས་ཏེ། །དགེ་ལེགས་སྣང་བ་དཀར་པོ་ཡུག་གཅིག་གིས། །འཛམ་གླིང་ས་ཆེན་ཁྱབ་པའི་བཀྲ་ཤིས་ཤོག ། ཅེས་པའང་ནུབ་ཕྱོགས་ཕ་རན་སིའི་ཡུལ་གྱི་རྗེ་གཏེར་ཆེན་བླ་མའི་ཆོས་ཚོགས་རྡོ་རྗེ་སྙིང་པོ་དང་། ཨོ་རྒྱན་བསམ་ཡས་ཆོས་གླིང་གི་སློབ་སྤྱི་མགྲིན་ནས་བསྐུལ་པའི་ངོར་རིག་པ་འཛིན་པ་ཁྲོ་རྒྱལ་རྡོ་
རྗེས་ས་མོ་སྦྲུལ་ལོ་འཕྲུལ་ཟླ་བའི་ཡར་ཚེས་༡༠ལ་གུ་རུའི་སྒྲུབ་གནས་ཡང་ལེ་ཤོད་དུ་བྲིས་པ་དགེ་ལེགས་འཕེལ།།