ལེའུ་བཅུ་གསུམ་པའི་རྣམ་པར་བཤད་པ།
༈ དོན་གཉིས་པ་སྙིང་པོའི་དོན་ལ་འཇུག་པ་རྫོགས་པའི་རིམ་པ་ལ་གསུམ་སྟེ། དོན་གྱི་འབྲེལ་དགོད། ཚིག་གི་དོན་བཤད། སྐབས་ཀྱི་དོན་བསྡུ་བའོ། །
དང་པོ་ནི། ལམ་བསྐྱེད་པའི་རིམ་པ་བསྟན་པ་དེ༵་ནས༵་རྫོགས་པའི་རིམ་པ་བསྟན་པའི་ཕྱིར་ཕྱོག༵ས་བཅུ༵་དུས༵་བཞིའི༵་དེ༵་བཞིན༵་གཤེ༵གས་པ༵་ཐམས་ཅད་ཀྱི་སྐུ༵་དང་གསུང༵་དང༵་ཐུག༵ས་རྡོ༵་རྗེ༵འི་དཀྱིལ༵་འཁོ༵ར་ཐམ༵ས་ཅ༵ད་གཅི༵ག་ཏུ༵་འདུ༵ས་ནས༵་གནས་པའི་སྟོན་པ་ཀུན་ཏུ་བཟང་པོ་ཡེ་ཤེས་བླ་ན་མེད་པའི་དགྱེས༵་པ༵་ཆེ༵ན་པོས༵་རོལ་ཏེ། སྣང་སྲིད་འཁོར་འདས་ཀྱིས་བསྡུས་པའི་ཆོ༵ས་ཐ༵མས་ཅ༵ད་ཡེ༵་ན༵ས་རྫོ༵གས་པ༵་ཆེ༵ན་པོར༵་ལྷུན༵་གྱིས༵་གྲུབ༵་པ༵འི་དམ༵་ཚི༵ག་ནི་སྣོད་དུ་མ་གྱུར་པ་རྣམས་ལ་ཤིན༵་ཏུ༵་གས༵ང་བ༵འི་རང་བཞིན་དེ་ཁོ་ན་ཉིད་ཀྱི་སྙིང༵་པོ༵འི་སྤྲིན༵་སྐལ་བ་མཆོག་དང་ལྡན་པ་རྣམས་ལ་བཀོ༵ད་པ༵འི་ཏི༵ང་ངེ༵་འཛི༵ན་ལ༵་སྙོམ༵ས་པ༵ར་ཞུག༵ས་ན༵ས་མན་ངག་དམ་པའི་ཆེ༵ད་དུ༵་བརྗོད༵་པ༵་འདི༵་དག་བརྗོ༵ད་པར་མཛད་དོ༵་ཞེས་སོ། །
གཉིས་པ་ལ་གཉིས་ཏེ། དོན་གསང་བ་རྡོ་རྗེའི་སློབ་དཔོན་གྱི་ཐུགས་ལ་གནས་ཚུལ་སྤྱིར་བསྟན་པ་དང་། རང་བཞིན་རྫོགས་པ་ཆེན་པོའི་དོན་བྱེ་བྲག་ཏུ་བཤད་པའོ། །
དང་པོ་ལ་གསུམ་ལས། དོན་ངོས་བཟུང་བ་ནི་སྤྱིར་ཐེག་པ་སོ་སོའི་དོན་མཐར་ཐུག་རང་རང་གི་སྟོན་བྱེད་སློབ་དཔོན་ལ་རག་ལུས་ཤིང་། ཁྱད་པར་དུ་རང་བཞིན་རྫོགས་པ་ཆེན་པོའི་དོན་མཐར་ཐུག་པ་རྒྱུད་ལུང་གི་གཞུང་ཚིག་ལ་གབ་ཅིང་སྦས་པ་རྣམས་བླ་མའི་ཐུགས་ལ་གནས་པས་གདམས་ངག་འདོད་པས་བླ་མ་མཉེས་པར་བྱ་བ་ལ་ཐུག་གོ། །དེའང་ཐེག་པ་བསམ་གྱིས་མི་ཁྱབ་ཅིང་བརྗོད་ལས་འདས་པ་སངས་རྒྱས་ཀྱི་ཞིང་དང་སེམས་ཅན་གྱི་གནས་རིས་གྲངས་མེད་པ་ན་ཡོད་པས་མ་ངེས་མོད་ཀྱི། ད་ལྟའི་བསྐལ་པ་བཟང་པོ་འདི་དང་མི་མཇེད་ཀྱི་འཇིག་རྟེན་འདིར་སངས་རྒྱས་ཀྱི་སྒྲོན་མ་བཀོད་ཅིང་། དམན་པ་དང་མཆོག་དང་ཕྱིན་ཅི་ལོག་གི་ཐེག་པ་དང་གཞུང་ལུགས་ཀྱི་ཚུལ་རྣམས་རེ་ཞིག་བསྡུས་ན་བརྒྱད་ལས། དང་པོ་ཡང་དག་པའི་དོན་མ༵་རྟོག༵ས་པ༵་ནི་གྲུབ་པའི་མཐའ་ལ་མ་ཞུགས་པའི་སྐྱེ་བོ་ཕལ་པ་སྟེ། ལེགས་པ་ཙམ་ཞིག་དོན་དུ་གཉེར་བས་བདེ་འགྲོ་བསྒྲུབ་པ་སོར་བཞག་ལྷ་དང་མིའི་ཐེག་པའོ། །དེའི་དོན་དགེ་བ་བཅུས་འདོད་པའི་ལྷ་དང་མིར་འཕེན་ཅིང་། བསམ་གཏན་གཟུགས་མེད་ཀྱི་ཁམས་གོང་མ་བསྒྲུབ་པ་སྟེ། དབུ་མ་ལས། འཇིག་རྟེན་པ་ཡི་ཡང་དག་ལྟ་ཞེས་པ་ལ་སོགས་པ་གསུངས་སོ། །འདི་ལ་ཁ་ཅིག་ཕྱལ་པ་དང་རྒྱང་འཕེན་པ་གཉིས་ལ་འདོད་པས་ནི་སྔ་ཕྱིའི་འབྲེལ་མ་འགྲིག་ཅིང་ཐེག་པའི་རྣམ་དབྱེ་མ་ཕྱེད་པར་ཟད་དོ། །དེའང་སྔར་ཐེག་པ་ལྔའི་སྐབས་སུ་ལྷ་མིའི་ཐེག་པ་གསུངས་(༢༣༥)པ་དང་། ཐེག་པ་སྲིད་དོ་ཅོག་གི་དོན་འདིར་བསྡུས་པས་སོར་བཞག་གི་ཐེག་པ་ལ་བརྗོད་དོ། །ཕྱལ་པ་དང་རྒྱང་འཕེན་ནི་ཕྱིན་ཅི་ལོག་ཏུ་རྟོག་པའི་མུ་སྟེགས་ཀྱི་ནང་ཚན་ཡིན་པས་འདིར་མ་འབྲེལ་ལོ། །ཡང་དག་པའི་དོན་ལས་ཕྱིན་ཅི་ལོག༵་པར༵་རྟོག༵་པ་ནི་མུ་སྟེགས་བྱེད་དེ། ལྟ་བ་ལོག་པའི་གྲངས་ཀྱིས་དེའི་དབྱེ་བ་བསམ་གྱིས་མི་ཁྱབ་ཀྱང་བསྡུ་ན་རྟག་པར་ལྟ་བ་སྡེ་བཞི་ཆད་པར་ལྟ་བ་དང་བཅས་པས་ཏིར་ཏི་ཀ་སྡེ་ལྔར་གྲགས་སོ། །རྟག་པ་བཞི་ནི། དབང་ཕྱུག་རྟག་པར་སྨྲ་བའི་རིག་པ་ཅན་དང་། ཁྱབ་འཇུག་རྟག་པར་སྨྲ་ཁྱབ་འཇུག་པ་དང་། གཙོ་བོ་རྟག་པར་སྨྲ་བ་གྲངས་ཅན་པ་དང་། རྡུལ་ཕྲན་རྟག་པར་སྨྲ་བ་བྱེ་བྲག་པའོ། །དེ་དག་ཀྱང་དྲང་སྲོང་སེར་སྐྱ་དང་། གཟེག་གཟན་དང་། རྐང་མིག་པ་དང་། འུག་ཕྲུག་པའི་རྗེས་སུ་འབྲང་བའོ། །ཆད་པར་ལྟ་བ་ནི་རྒྱང་འཕེན་པའམ། ཚུ་རོལ་མཛེས་པར་སྨྲ་བའམ། ནམ་མཁའི་གོས་ཅན་པ་ཞེས་བྱ་སྟེ། ཕུར་བུ་ལྷར་འཛིན་པའོ། །དེ་ཐམས་ཅད་ཀྱང་བདག་ཏུ་སྨྲ་བ་སྟེ། རྟག་པར་ལྟ་བ་རྣམས་ནི་བདག་གམ་གཙོ་བོ་རྟག་པ་གཅིག་པུ་རང་དབང་ཅན་ཡིན་ཞིང་། འབྱུང་བ་རྣམས་ལ་དབང་བྱེད་པ་ཁྱབ་པའི་རང་བཞིན་སེམས་ཅན་ཀུན་གྱི་སྙིང་ལ་གནས་པར་འདོད་ཅིང་། དབང་ཕྱུག་ཁྱབ་འཇུག་ལ་སོགས་པའི་ལྷ་རྟག་པས་མཐོ་རིས་སམ་ངན་སོང་དུ་འཕེན་པར་འདོད་ལ། ཆད་པ་པས་མའི་མངལ་དུ་བདག་གློ་བུར་དུ་བྱུང་ནས་གནས་ལ། ཤི་བས་ཚེ་བདག་རྒྱུན་ཆད་པས་ན་སྔ་ཕྱིའི་མུར་ཐུག་སྟེ་ཚེ་སྔ་ཕྱི་དང་། ཐར་པ་དང་ཐམས་ཅད་མཁྱེན་པ་མེད་པར་འདོད་པས་མུར་ཐུག་པའམ་རྒྱང་འཕེན་པ་ཞེས་བྱའོ། །བསྡུ་ན་རྟག་ཆད་གཉིས་སུ་འདུའོ། །ཡང་དག་པའི་དོན་གྱི་ཕྱོག༵ས་ཙམ་རྟོག༵ས་པ་ནི་ཉན་ཐོས་དང་རང་སངས་རྒྱས་གཉིས་ཏེ། བདག་མེད་གཅིག་དང་ཕྱེད་དང་གཉིས་རྟོགས་ཤིང་འཁོར་བ་ལས་གྲོལ་བའི་ཕྱིར་རོ། །ཉན་ཐོས་ལ་དབྱེ་ན་རྩ་བའི་སྡེ་བཞི་གྱེས་པ་བཅོ་བརྒྱད་དོ། །དེའང་གཞི་ཐམས་ཅད་ཡོད་པར་སྨྲ་བའི་སྡེ་ལས་ཕྱེ་བ་བདུན་ཏེ། འོད་སྲུང་བའི་སྡེ། ས་སྟོན་པའི་སྡེ། ཆོས་སྲུང་བའི་སྡེ། མང་དུ་ཐོས་པའི་སྡེ། གོས་དམར་ཅན་གྱི་སྡེ། རྣམ་པར་ཕྱེ་སྟེ་སྨྲ་བའི་སྡེ། རྩ་བའི་གྱེས་གཞི་དང་བདུན་པོ་འདི་དག་ནི་རྒྱལ་རིགས་སྒྲ་གཅན་འཛིན་རབ་ཏུ་བཟང་པོ་བཅོམ་ལྡན་འདས་ཀྱི་སྲས་སུ་གྱུར་པ་དེའི་སློབ་བརྒྱུད། སྃ་སྐྲྀ་ཏའི་སྐད་དུ་སྨྲ་ཞིང་སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་ལྔ་མན་ཆད་དེ། རྟགས་སུ་ཨུཏྤལ་དང་པད་མ་དང་རིན་པོ་ཆེ་འབྱུང་བའོ། །ཕལ་ཆེན་པའི་སྡེ་ལས་ཕྱེ་བ། ཤར་གྱི་རི་བོའི་སྡེ། གངས་ཀྱི་རི་བོའི་སྡེ། རྟག་པར་སྨྲ་བའི་སྡེ། འཇིག་རྟེན་ལས་འདས་པར་སྨྲ་བའི་སྡེ། གྱེས་གཞི་དང་ལྔའོ། །འདི་དག་ནི་(༢༣༦)བྲམ་ཟེའི་རིགས་གནས་བརྟན་འོད་སྲུངས་ཆེན་པོའི་སློབ་བརྒྱུད། པྲ་ཀྲ྇་ཏའི་སྐད་དུ་སྨྲ་བ། སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་གསུམ་མན་ཆད་དེ་རྟགས་སུ་གཡུང་དྲུང་འཁྱིལ་པ་དང་དཔལ་བེའུ་འབྱུང་བའོ། །གནས་བརྟན་པའི་སྡེ་ལ་གསུམ་སྟེ། རྒྱལ་བྱེད་ཚལ་ན་གནས་པའི་སྡེ། འཇིགས་མེད་རི་ལ་གནས་པའི་སྡེ། གཙུག་ལག་ཁང་ན་གནས་པའི་སྡེའོ། །འདི་དག་ནི་སྨྱུག་མ་མཁན་གྱི་རིགས་ལས་རབ་ཏུ་བྱུང་བ་འཕགས་པ་ཀཱ་ཏྱ་ཡཱ་ན་ཆེན་པོའི་སློབ་བརྒྱུད། ཨ་ཝ་བྷྲྃ་ཤའི་སྐད་དུ་སྨྲ་བ། སྣམ་ཕྲན་དགུ་ཡན་ཆད་ཉི་ཤུ་རྩ་གཅིག་མན་ཆད་ལ་རྟགས་སུ་དུང་བྲིས་པའོ། །མང་པོས་བཀུར་བ་ལ་གསུམ་སྟེ། ས་སྒྲོག་རིགས་ཀྱི་སྡེ། བསྲུང་བ་པའི་སྡེ། གནས་མ་བུའི་སྡེ། འདི་དག་འདྲེགས་མཁན་གྱི་རིགས་ལས་རབ་ཏུ་བྱུང་བ་འཕགས་པ་ཉེ་བ་འཁོར་གྱི་སློབ་བརྒྱུད། བི་ཤ་ཙིའི་སྐད་དུ་སྨྲ་བ། སྣམ་ཕྲན་ནི་གནས་བརྟན་པ་དང་མཐུན་པའོ། །དེ་དག་གིས་གང་ཟག་གི་བདག་དང་ང་དང་ང་ཡིར་འཛིན་པ་ཕུང་པོ་དང་། དེ་ལས་གཞན་ནའང་མེད་པར་རྟོགས་པས་འབྲས་བུ་མངོན་དུ་བྱེད་པའོ། །རང་སངས་རྒྱས་ལ་དབྱེ་ན། ཚོགས་སྤྱོད་ཆེ་བ། ཆུང་བ། བསེ་རུ་ལྟ་བུ་གསུམ་མོ། །ལྟ་བ་ནི་གང་ཟག་གི་བདག་མེད་དང་། ཕྱི་གཟུང་བ་རང་བཞིན་མེད་པར་རྟོགས་པས་ཕྱེད་དང་གཉིས་དང་། སྲིད་པ་ཐ་མས་དུས་སུ་རང་གི་བྱང་ཆུབ་འགྲུབ་པ་བླ་མ་ལ་དངོས་སུ་མི་ལྟོས་པར་རྟེན་འབྲེལ་གྱི་ཆོས་ཉིད་རང་ཤར་དུ་རྟོགས་ནས་གྲོལ་ཏེ། བརྡའི་ཆོས་སྟོན་གྱི་ངག་གིས་མི་སྨྲ་བ་ཡིན་ནོ། །གནས་ལུགས་ཀྱི་དོན་ཡང༵་དག༵་པ་ཉིད༵་ལྷག་མ་མ་ལུས་པར་མ༵་རྟོག༵ས་པ་ནི་རྒྱུ་མཚན་ཉིད་ཀྱི་ཐེག་པ་སྟེ། རྒྱུ་སེམས་ཅན་གྱིས་ཚོགས་གཉིས་བསྒྲུབས་པས་འབྲས་བུ་བསྐལ་པ་གྲངས་མེད་པ་དུ་མ་ནས་སངས་རྒྱས་གདོད་འགྲུབ་པར་འདོད་པ་སྟེ། དབྱེ་ན། དབུ་མ་དང་། སེམས་ཙམ་གཉིས་སོ། །དེ་ལ་ཕྱི་སྣོད་དུ་སྣང་བ་སེམས་སུ་ཁས་བླངས་ནས། སེམས་དེ་ཡང་རང་རིག་པ་གཟུང་འཛིན་གཉིས་སུ་མེད་པའི་ཡེ་ཤེས་དོན་དམ་པར་བདེན་པ་དང་བརྫུན་པར་འདོད་པས་རྣམ་བདེན་བརྫུན་གཉིས་ཏེ། དབུ་མ་སྤྱན་རས་གཟིགས་ཀྱི་བརྟུལ་ཞུགས་ལས། གང་དག་དངོས་པོ་སྣ་ཚོགས་སུ་སྣང་བ་རང་གི་སེམས་སུ་ཁས་བླངས་ནས། སེམས་དེ་ཡང་དོན་དམ་པར་སོ་སོ་རང་གི་རིག་པའི་ཡེ་ཤེས་གཟུང་བ་དང་འཛིན་པ་གཉིས་མེད་པ་བདེན་པའམ་བརྫུན་པར་སྨྲ་བའི་རང་བཞིན་གྱིས་ཕྱོགས་གཉིས་པོ་དགག་པར་བྱ་སྟེ་ཞེས་སོ། །དབུ་མ་ལའང་གཉིས་ལས། རང་རྒྱུད་པ་ནི་སྣ་ཚོགས་སུ་སྣང་བ་འདི་དག་ཀུན་རྫོབ་སྒྱུ་མ་ལྟར་གྲུབ་ཅིང་། དོན་དམ་པར་དེ་ཡང་གྲུབ་པ་མེད་པའི་རང་བཞིན་ནམ་མཁའ་ལྟར་(༢༣༧)འདོད་པའོ། །དབུ་མ་ཐལ་འགྱུར་པ་ནི་དུས་ཐམས་ཅད་དུ་རང་བཞིན་མེད་པས་སྒྱུ་མའི་དཔེ་བརྒྱད་དང་འདྲ་བར་སྣང་བ་དེ་ཉིད་སྤྲོས་པའི་མཐའ་ཐམས་ཅད་དང་བྲལ་བས་གང་དུའང་གྲུབ་པ་མེད་ཅིང་མཐའ་བཞིའི་དྲི་མ་ལས་འདས་པར་འདོད་དོ། །དེ་ཐམས་ཅད་ཀྱང་ལྟ་བ་བདག་གཉིས་ཀྱིས་སྟོང་པའི་ཆོས་ཉིད་དུ་ཐག་བཅད་ནས་ལམ་མི་དགེ་བ་འདོར་ཞིང་དགེ་བ་བསྒྲུབ་ལ་འབྲས་བུ་ཕྱིས་འགྲུབ་པར་ཁས་ལེན་ཏེ། ཐེག་པ་གོང་མས་གཞལ་དུས་དེ་དག་ཆོས་ཐམས་ཅད་བདག་མེད་ཅིང་མཉམ་པ་ཉིད་དུ་རྟོགས་པར་འདོད་ཀྱང་། ཆོས་ཐམས་ཅད་ཡེ་ནས་སངས་རྒྱས་པར་མཉམ་པའི་དོན་མ་མཐོང་བ་དང་། ལས་ཉོན་མོངས་པ་ཉིད་ཡེ་ཤེས་སུ་ཤར་བས་སྤང་བླང་མེད་པའི་རང་བཞིན་མ་རྟོགས་པ་དང་ཐབས་ཉུང་ཞིང་དཀའ་ཚེགས་དང་བཅས་པས་དུས་རིང་མོ་ཞིག་ན་འབྲས་བུ་འགྲུབ་པར་འདོད་པའི་ཕྱིར་ཡང་དག་ཉིད་མ་རྟོགས་པ་ཞེས་བྱའོ། །ཁ་ཅིག་ཤེས་རབ་ཁྱད་མེད་ཀྱང་ཐབས་ཀྱིས་འཕགས་སོ་ཞེས་འདོད་པའང་འདྲེས་པ་ཡིན་ཏེ། ཐབས་ཁྱད་ཞུགས་ཤིང་གོང་དུ་འཕགས་པས་ཐབས་དེས་བཞག་པའི་ཤེས་རབ་ཀྱང་ཁྱད་འཕགས་ཤིང་། ཆོས་ཐམས་ཅད་དཀྱིལ་འཁོར་དུ་གནས་པ་དང་། ད་ལྟའི་སེམས་འདི་ཉིད་སྤུ་མ་བརྗེས་པ་ནས་སངས་རྒྱས་སུ་གྲུབ་པར་འདོད་པའི་ཤེས་རབ་ཕ་རོལ་ཏུ་ཕྱིན་པའི་ཐེག་པ་ལ་ག་ལ་ཡོད། དེས་ན་ཐབས་དང་ཤེས་རབ་གཉིས་ཀས་འཕགས་ཏེ། ཚུལ་གསུམ་གྱི་སྒྲོན་མ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་སོ། །དེའི་ཕྱིར་ཕ་རོལ་ཏུ་ཕྱིན་པའི་ཚུལ་ལ་རྨོངས་པའི་སྒྲིབ་པ་ཕྱོགས་གཅིག་ཡོད་པར་བཤད་དོ། །གཞན་ཡང་ཐེག་པ་གསུམ་རྣམ་པར་བཞག་པ་ལས་ཀྱང་། དམིགས་པ་རྣམ་པར་དག་པ་དང་། །གྲོགས་ཀྱི་མཐུ་དང་སྤྱོད་པ་ཡིས། །བློ་ལྡན་རྣམས་ཀྱི་ཐེག་པ་ནི། །ཆེན་པོའི་ཆེན་པོར་ཡོངས་སུ་བསྒྲགས། །ཞེས་པ་དང་། ཐབས་ཞགས་ལས་ཀྱང་། གསང་སྔགས་ཚུལ་ཆེན་ཤིན་ཏུ་རྨད་བྱུང་ནི། །ལམ་གྱི་ནང་ནས་ཉེ་ལམ་ཆེན་པོ་སྟེ། །ཐབས་ཀྱི་ནང་ནས་མ་ནོར་དམ་པ་ཉིད། །ཤེས་རབ་ནང་ནས་ཤེས་རབ་ཁྱད་པར་ཅན། །ཞེས་སོ། །གཙང་སྦྲ་དང་དཀའ་ཐུབ་གཙོ་བོར་བྱེད་པས་སྒོ་གསུམ་གྱི་ཉེས་སྤྱོད་འདུལ༵་བ༵་ནི་བྱ་སྤྱོད་ཀྱི་རྒྱུད་དེ། དབྱེ་ན་སེམས་བསྐྱེད་ཙམ་ལ་བརྟེན་ནས་ལྷ་བསྒྲུབ་པ་དང་། དཀའ་ཐུབ་དང་སྨྱུང་གནས་ཙམ་ལ་བརྟེན་ནས་ལྷ་བསྒྲུབ་པ་དང་། རིག་གཏད་རྗེས་གནང་ཙམ་ལ་བརྟེན་ནས་ལྷ་བསྒྲུབ་པ་སྟེ་གསུམ་དུ་ཡོད་དོ། །དེའང་གཟའ་སྐར་དང་དུས་ཚིགས་བཟང་པོ་(༢༣༨)ལ་སྒྲུབ་པའི་མགོ་བརྩམ་ཞིང་འཇུག་པ་དག་གྲོལ་ཏུ་བྱེད་དོ། །དགོ༵ངས་པ༵་ནི་རྣལ་འབྱོར་གྱི་རྒྱུད་དེ། ཨ་པཱི་པྲ་ཡི་སྒྲ་ལས་སེམས་ཀྱི་དགོངས་པ་ལ་འཇུག་ཅིང་། སེམས་རྩེ་གཅིག་པའི་ཏིང་ངེ་འཛིན་གཙོ་བས་ལྷ་བསྒྲུབ་བོ། །དེའང་དབང་མ་ཐོབ་པར་ལྷ་བསྒྲུབ་པའི་ལུགས་མེད་དོ། །སྐུ་གསུང་ཐུགས་ཀྱི་གསང༵་བ༵་གསལ་བོར་སྟོན་པ་ནི་རྣལ་འབྱོར་ཆེན་པོའི་རྒྱུད་དེ། དངོས་པོ་ལ་མངོན་པར་ཞེན་པའི་བློ་ཅན་ཐེག་པ་འོག་མ་རྣམས་ལ་བསྟན་པར་བྱ་བ་མ་ཡིན་པས་གསང་བའོ། །དབྱེ་ན་བསྐྱེད་རིམ་གཙོ་བོར་སྟོན་པ་ཕའི་རྒྱུད་དང་། རྫོགས་རིམ་གཙོ་བོར་སྟོན་པ་མའི་རྒྱུད་དང་། ཟུང་འཇུག་གཙོ་བོར་སྟོན་པ་གཉིས་སུ་མེད་པའི་རྒྱུད་དོ། །ཡེ་ནས་ལྷུན་གྱིས་གྲུབ་པའི་རང༵་བཞིན༵་གས༵ང་བ༵འི་དོན༵་རྨད་དུ་བྱུང་བ་ནི་རྫོགས་པ་ཆེན་པོའི་སེམས་དང་ཡེ་ཤེས་རང་སྣང་བར་སྟོན་པ་སྒྱུ་འཕྲུལ་ཆེན་པོ་སྟེ། ཀུན་གྱི་སྤྱོད་ཡུལ་མ་ཡིན་པ་ངོ་བོ་ཉིད་དང་རང་བཞིན་དང་ཐབས་ཁྱད་པར་གྱིས་གསང་བ་སྟེ། དབྱེ་ན་སེམས་དང་ཡེ་ཤེས་གཉིས་མེད་དུ་སྟོན་པ་བསྐྱེད་རྫོགས་ཟུང་འཇུག་གི་རྫོགས་པ་ཆེན་པོ། སེམས་གཙོ་བོར་སྟོན་པ་སེམས་ཀློང་ཡེ་གྲོལ་གྱི་རྫོགས་པ་ཆེན་པོ། ཡེ་ཤེས་གཙོ་བོར་སྟོན་པ་འོད་གསལ་ཆོས་ཉིད་ཀྱི་རྫོགས་པ་ཆེན་པོའོ། །དེ་ལྟར་ཐེག་པ་སོ་སོའི་ཚུལ་རྣམ༵ས་ནི༵་རྟོགས་པར་བྱ་བའི་དོན་ཡིན་ནོ། །
གཉིས་པ་དོན་དེ་གང་གི་དབྱིངས་ན་གནས་ཚུལ་བསྟན་པ་ནི་ཐེག་པ་དེ་དག་གི་དོན་རྣམས་རྗོད་བྱེད་ཀྱི་གཞུང་ལ་གནས་ཤིང་། གཞུང་ཡང་ཡི༵་གེ༵་སིལ་བུའི་ཁོང་ན་གནས་ཏེ། དབྱངས་དང་གསལ་བྱེད་ཀྱི་སྒྲ༵་ཐ་སྙད་བཏ༵གས་པ་ཨ་དང་མ་འདུས་པ་ལས་རང་གི་མར་མཚོན་པ་ལྟ་བུའི་མིང་འབྱུང་ཞིང་། མིང་དུ་མ་ཚོག༵ས་པའི་སྤྱི་ལ༵་ཚིག་རྣམས་བརྟེན༵་པ༵འི་ཚི༵ག་གི༵ས་ཤོ་ལོ་ཀ་དང་རབ་ཏུ་བྱེད་པ་དང་། བསྟན་བཅོས་སམ་རྒྱུད་སྡེ་སོ་སོའི་ལུས་གྲུབ་ཅིང་། སོ་སོའི་གཞུང་དེས་རང་རང་གི་བརྗོད་བྱའི་དོན་རབ༵་ཏུ་མཚོན༵་ཏེ༵་གནས་སོ། །
གསུམ་པ་དོན་དེ་མ་ནོར་བར་གང་གིས་སྟོན་པ་ནི་དེ་ལྟ་བུའི་གཞུང་ཚིག་སོ་སོའི་ཁོང་ན་རང་རང་གི་བརྗོད་བྱའི་དོན་གནས་ཤིང་། ཁྱད་པར་དུ་རང་བཞིན་གསང་བའི་སྙིང་པོ་འདི་རྒྱུད་ཚིག་སོ་སོའི་ཁོང༵་ན༵་ཆོས་ཐམས་ཅད་ཡེ་ནས་སངས་རྒྱས་པ་ལ་སོགས་པ་རང་བཞིན་གྱིས་རྟོགས་པར་དཀའ་བའི་དོན་རྣམས་ག༵བ་ཅིང་། ཐ་མལ་པའི་སྤྱོད་ཡུལ་དུ་བསྒྲག་ཏུ་མི་རུང་བའི་གསང་བ་ཟབ་མོ་རྣམས་སྐལ་མེད་རྣམས་ཀྱིས་མི་གོ་བར་བྱ་བའི་ཕྱིར་བརྡ་ལ་སོགས་པས་སྦས༵་པའི་རང་བཞིན། ཨཱ་ལི་ཀཱ་ལིའི་ཕྱག་རྒྱ་ཡིས། །ཞེས་པ་ལྟ་བུའི་དོན༵་རྣམས་མངོན་སུམ་དུ་འབྱིན༵་པ༵་ནི་རྒྱུད་ཀྱི་དོན་ཕྱིན་ཅི་མ་ལོག་པར་སྟོན༵་པ༵་རྡོ༵་རྗེ༵འི་སློབ་དཔོན་གྱི་ཐུག༵ས་ལ༵་གནས༵་པས་དེ་ལ་ཕུག་(༢༣༩)ཅིག་པའོ། །ཁ་ཅིག་འོག་མིན་དུ་སྟོན་པ་ཀུན་ཏུ་བཟང་པོས་འབྱིན་ལ། ཐ་མལ་པ་རྣམས་ལ་རྡོ་རྗེ་སློབ་དཔོན་གྱིས་འབྱིན་ཟེར་བ་ནི་འགྲིག་འགྲིག་འདྲ་ཡང་མ་འབྲེལ་ཏེ། རྒྱུད་འདིའི་ཁོང་ནས་དོན་འབྱིན་པ་རྒྱུད་གསུང་བ་པོ་ལས་གཞན་ཞིག་བསྟན་པ་ཡིན་གྱི། ཀུན་ཏུ་བཟང་པོ་ཉིད་ཀྱིས་འཆད་ཉན་བྱེད་ཅིང་དོན་འབྱིན་པ་ག་ལ་རིགས་དེ་བས་དོན་མ་གོ་བར་ཟད་དོ། །
གཉིས་པ་རང་བཞིན་རྫོགས་པ་ཆེན་པོའི་དོན་བྱེ་བྲག་ཏུ་བཤད་པ་ལ་གསུམ་སྟེ། སྙིང་པོའི་ཟབ་དོན་དངོས་བསྟན་པ། དེ་གཞན་ལས་ཁྱད་པར་དུ་འཕགས་ཚུལ། གང་ལ་གདམས་པའི་སྣོད་བསྟན་པའོ། །དང་པོ་ལ་གསུམ་སྟེ། མདོར་བསྟན་པ། རྒྱས་པར་བཤད། དོན་བསྡུ་བའོ། །
དང་པོ་ལ་གསུམ་ལས། ཐབས་བསྐྱེད་པའི་རིམ་པ་ནི་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པ་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་དུ་སངས་རྒྱས་ཏེ་རང་བཞིན་གྱིས་རྣམ་པར་དག་པ་ལས། ཕྱིས་ལམ་གྱིས་སྔར་སངས་རྒྱས་མ་ཡིན་པ་སངས་རྒྱས་སུ་བསྒྲུབ་པ་ལྟ་བུ་མ་ཡིན་ཏེ། འགྲོ་བ་ཀུན་ལ་ཡེ་ནས་དེ་ལྟར་གནས་པ་ནི་གཞི་ལྷུན་གྱིས་གྲུབ་པའི་དཀྱིལ༵་འཁོ༵ར་རང་ཆས་སུ་ལྡན༵་པའི་རང་བཞིན་ཏེ། དེ་ལྟར་རྟོགས་ནས་ཏིང་ངེ་འཛིན་གྱི་དཀྱིལ༵་འཁོ༵ར་གྱིས༵་ཡེ་ནས་ཡིན་པའི་དཀྱིལ༵་འཁོ༵ར་ལ༵་ནི༵་ཡིན་པར་ཤེས་པའི་དཀྱིལ༵་འཁོ༵ར་དུ་གསལ་འདེབས་ཤིང་བསྒོ༵མ་པར་བྱའོ། །དེ་ལྟར་ཆོས་ཐམས་ཅད་ཀྱི་རང་བཞིན་དེ་ལྟ་བུ་ཡིན་ཡང་ཡིན་པ་ཙམ་གྱིས་ཕན་མི་ཐོགས་པས། གཞི་དེ་ལྟར་ཡིན་ཀྱང་ལམ་གྱིས་བསྒྲུབ་དགོས་ཏེ། གསེར་དང་དངུལ་གྱི་རྡོའི་ཁམས་ལ་གསེར་དངུལ་དུ་ཡོད་ཀྱང་། བཞུ་བཏུལ་མ་བྱས་ན་མི་སྣང་བ་དང་། དུང་དཀར་པོར་གནས་ཀྱང་བད་ཀན་མ་སྦྱངས་ཀྱི་བར་སེར་པོར་སྣང་བས་བད་ཀན་སྦྱོང་དགོས་པ་བཞིན་ནོ། །
གཉིས་པ་ཤེས་རབ་རྫོགས་པའི་རིམ་པ་ནི་བདེ་གསལ་རྣམ་པར་མི་རྟོག་པའི་དཀྱིལ༵་འཁོར༵། རྟོག་ཚོགས་ཉོན་མོངས་སུ་སྣང་བ་ཐབས་ཀྱིས་ཟིན་པའི་དཀྱི༵ལ་འཁོ༵ར་ལས༵་བྱུང༵་བ༵་སྟེ། དེ་ཉིད་མ་སྤངས་རང་སར་དག་པའི་རང་བཞིན་ཡིན་པས་ཐུག༵ས་ཀྱི༵་དཀྱིལ༵་འཁོ༵ར་ཞེས་བྱ་སྟེ་དཀྱི༵ལ་འཁོ༵ར་ཐམས་ཅད་ཀྱི་ནང་ནས་མཆོ༵ག་ཏུ་གྱུར་པའོ། །
གསུམ་པ་གཉིས་མེད་འོད་གསལ་གྱི་རིམ་པ་ནི། སྙིང་ག་ཆོས་ཀྱི་འཁོར་ལོ་ལ་སོགས་པ་ན་ཡེ་ནས་ལྷུན་གྱིས་གྲུབ་པ་སྐུ་དང་ཡེ་ཤེས་ཀྱི་རང་བཞིན་དུ་གནས་པ་ནི་གས༵ང་བ༵འི་ཐི༵ག་ལེ༵་རྨད་དུ་བྱུང་བ་སྟེ། རྐྱེན་བླ་མའི་མན་ངག་གིས་ཉམས་སུ་བླངས་ན་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་དཀྱིལ༵་འཁོར༵་ཐམས་ཅད་འབྱུང་བའི་དབྱི༵ངས་ཡིན་ནོ། །ཚུལ་འདི་ནི་རྒྱུད་འདིར་ཤིན་ཏུ་གབ་ཅིང་སྦས་(༢༤༠)པས་སྔོན་གྱི་སྒྱུ་འཕྲུལ་མཁན་པོ་ཕལ་གྱིས་མ་རྟོགས་པར་སྣང་ངོ་། །
གཉིས་པ་རྒྱས་པར་བཤད་པ་ལ་གསུམ་སྟེ། ཕྱི་བསྐྱེད་པའི་རིམ་པ། ནང་རྫོགས་པའི་རིམ་པ། གསང་བ་འོད་གསལ་གྱི་རིམ་པའོ། །
དང་པོ་ལ་གཉིས་ལས། ལྟ་བས་ཐག་བཅད་པ་ནི་ཕྱི་འབྱུང༵་བ༵་ལྔར་སྣང་བའི་གཟུགས་བརྙན་ནི་མེད་བཞིན་སྣང་བའི་ཆོས་ཉིད་རང་བཞིན་གྱིས་རྣམ་པར་དག་པའི་གནས་ལུགས་ཤེས༵་རབ༵་ཀྱི་ཕ་རོལ་ཏུ་ཕྱིན་མ་སྟོང་པ་ཉིད་གཟུགས་སུ་སྣང་བ་སྟེ་གདོད་མ་ནས་ངོ་བོ་ཉིད་མེད་པའི་རིག༵ས་ཆོས་ཉིད་ཀྱི༵་རོལ་པའམ་ཡུམ༵་དུ་གནས་པའོ། །དེའང་ཆོས་ཅན་སྣང་བ་ལ་ཆོས་ཉིད་སྟོང་པ་དབྱེར་མེད་དུ་གནས་པའི་དོན་ཏེ། ངེས་བརྗོད་བླ་མ་ལས། སྣ་ཚོགས་ཆོས་ཀྱི་རང་བཞིན་གྱིས། །སྟོང་པ་ཉིད་ནི་གཟུགས་སུ་བརྗོད། །ཅེས་པ་དང་། ཤེས་རབ་སྙིང་པོ་ལས། སྟོང་པ་ཉིད་གཟུགས་སོ་ཞེས་སོ། །ཕུང་པོ་ལྔ་ལ་འབྱུང་བ་ཆེ༵ན་པོ༵འི་སྒྲས་བརྗོད་པ་ནི་རིག༵ས་ཀྱི༵་ཡབ་ལྔའི་དེ༵་བཞི༵ན་ཉིད༵་གཟུགས་སྟོང་པའི་རང་བཞིན་ཏེ་མེ་ལོང་ནང་གི་གཟུགས་བརྙན་བཞིན་ནོ། །དེའང་འབྱུང་བ་དངོས་ནི་ནང་གི་ཕུང་པོས་བསྡུས་པའི་རང་བཞིན་སྲ་བ་དང་གཤེར་བ་དང་དྲོ་བ་དང་ཡང་ཞིང་གཡོ་བ་དང་གོ་འབྱེད་པ་ཡིན་ལ། ཕྱི་རོལ་གྱི་འདི་དག་ནི་འབྱུང་འགྱུར་རམ་འབྱུང་གཟུགས་ཞེས་བྱ་སྟེ། བཞིན་དང་མེ་ལོང་གི་གཟུགས་བརྙན་ལྟར་ནང་གི་རྣམ་པ་ཕྱི་རོལ་ཏུ་སྣང་བའོ། །དེ་ལྟར་ཕུང་པོ་ལྔའི་ཆོས་ཅན་རང་གི་ངོ་བོས་སྟོང་པ་ནི་སྣང་ལ་རང་བཞིན་མེད་པའི་ཆོས་ཉིད་དེ། གཟུགས་སྟོང་པའོ་ཞེས་པ་ལ་སོགས་པ་དང་། དབུ་མ་ལས། གཟུགས་ཀྱི་རང་བཞིན་གང་ཡིན་པ། །དེ་ནི་སྟོང་པ་ཉིད་དུ་བརྗོད། །ཅེས་པ་ལྟར་རོ། །རིག་པ་བྱང༵་ཆུབ༵་ཀྱི་སེམ༵ས་གཞི་དང་རྩ་བ་མེད་པའི་རང་བཞིན་ཡེ་ནས་རྣམ་པར་རྟོག་པ་ཡུལ་ལ་མི་རྟོག་པ་ནི་རྡོ༵་རྗེ༵འི་རང་བཞིན་ཀུན་ཏུ་བཟང་པོ་ཡབ་ཡུམ་གྱི་ཚོག༵ས་སོ། །དེའང་རིག་པ་གསལ་བ་དང་སྟོང་པ་གཉིས་སུ་མེད་པའི་དབྱིངས་བརྗོད་དུ་མེད་པ་ནི་བགྲང་བ་ལས་འདས་པའི་ཡེ་ཤེས་ཀུན་གྱི་འབྱུང་གནས་ཡིན་པས་ཀུན་ཏུ་བཟང་པོ་ཡབ་ཡུམ་གྱི་ཚོགས་ཞེས་བཏགས་པ་ཡིན་ནོ། །མིག་ལ་སོགས་པའི་དབ༵ང་པོ༵་དང་། གཟུགས་ལ་སོགས་པའི་ཡུལ༵་དང་། འདས་པ་ལ་སོགས་པའི་དུས༵་དང་མིག་གི་རྣམ་པར་ཤེས་པ་ལ་སོགས་པའི་རིག༵་པ༵་རྣམ༵ས་ཀྱང་སེམས་དཔའ་དང་སེམས་མ་དང་སྒོ་བའི་བར་དུ་རྣམ་པར་དག་ལ། དེ་དག་གི་རང་བཞིན་ཡང་སྣང་ལ་ངོ་བོ་མེད་པ་ཀུན༵་ཏུ༵་སྟེ་ཆོས་སྣ་ཚོགས་པའི་ངོ་བོ་སྟོང་པར་རོ་གཅིག་པས་བཟང༵་པོའི༵་ཆོས་ཉིད་གྲུབ་བསལ་མེད་པའི་དཀྱི༵ལ་འཁོར༵་དུ་ཡེ་ནས་གནས་པ་ལ༵་དེ་ལྟར་རྟོགས་པ་ནི་ལྟ་བའོ། །དེའང་དབུ་མ་ལས། དངོས་གཅིག་དངོས་པོ་ཀུན་གྱི་ངོ་བོ་(༢༤༡)ཉིད། །གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང་། །ཞེས་དང་། ཡུམ་བར་མ་ལས། ཆོས་གཅིག་ཤེས་ན་རྣམ་པ་ཐམས་ཅད་མཁྱེན་པ་ཉིད་ཅེས་བྱ་སྟེ། འདི་ལྟ་སྟེ་ཆོས་ཉིད་ཞི་བའི་རྣམ་པའོ་ཞེས་སོ། །
གཉིས་པ་བསྒོམ་པས་ཉམས་སུ་བླང་བ་ནི་སྣང་སྲིད་ཀྱི་ཆོས་ཐམས་ཅད་སྣང་དུས་ཉིད་ནས་ངོ་བོ་མེད་པ་ཀུན་ཏུ་བཟང་པོའི་དཀྱིལ་འཁོར་དུ་ཤེས་ནས་དེའི་ངང་ལ་བསྒོམ་པ་སྟེ། ལས་དང་པོ་པ་བློ་ཡི་ནུས་པ་ཆུང་བ་རྣམས་ཀྱིས་བསྐྱེད་རིམ་གསལ་བར་བསྒོམས་པ་རིམ་གྱིས་མི་དམིགས་པའི་ངང་དུ་མཉམ་པར་འཇོག་ཅིང་། གོམས་པ་ཀློང་དུ་གྱུར་པའམ་བློ་མཆོག་རྣམས་ཀྱིས་སྣང་སེམས་གང་ཤར་གྱི་རང་བཞིན་ཡེ་སྟོང་རྩ་བ་དང་བྲལ་བར་ལྟ་བའམ། བསྐྱེད་རིམ་དེ་ཉིད་རང་བཞིན་མེད་པ་གཟུགས་བརྙན་ལྟ་བུའི་ངང་ལ་མཉམ་པར་འཇོག་པའོ། །དེའི་ཚེ་དངོས་པོ་དང་མཚན་མར་འཛིན་ཞེན་མེད་པའི་བློ་སྤྲོས་པ་དང་བྲལ་བའི་ངོ་བོ་དེ་ཉིད་བདག༵་ཉིད༵་ཆེན༵་པོ༵་ཀུན་ཏུ་བཟང་པོ་ཡབ་ཡུམ་གྱི་ལྷག༵་པ༵་ཡི༵་དགོངས་པ་ཟབ་མོ་ཡིན་ཏེ། དེ་ཉིད་ཀྱི་ངང་ལ་མེ་ལོང་ལྟ་བུ་ལ་སོགས་པ་ཐུག༵ས་ཀྱི༵་ཡེ༵་ཤེས༵་ལྔས༵་བལྟ༵་ཞི༵ང་ཚང་བར་ལྡན་པ་ཡིན་ནོ། །དེའང་ཕྱི་ཡུལ་གྱི་རྣམ་པ་མ་འགགས་པར་སྣང་བ་ནི་མེ་ལོང་ལྟ་བུའི་ཡེ་ཤེས་སོ། །དེའི་ངོ་བོ་སྟོང་པ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །དེར་འཛིན་མེད་པ་ནི་མཉམ་པ་ཉིད་ཀྱི་ཡེ་ཤེས་སོ། །གཟུགས་སྒྲ་ལ་སོགས་པ་སོ་སོར་སྣང་བ་ནི་སོ་སོར་རྟོག་པའི་ཡེ་ཤེས་སོ། །དགག་སྒྲུབ་ལ་སོགས་པའི་ཉོན་མོངས་གྲོལ་བ་ནི་བྱ་བ་གྲུབ་པའི་ཡེ་ཤེས་སོ། །ཡང་དུག་ལྔ་ཤར་དུས་ངོས་ཟིན་པ་ཙམ་གྱིས་མ་སྤངས་གནས་སུ་དག་པ་ནི་ཡེ་ཤེས་ལྔའོ། །ཡང་སེམས་རྩེ་གཅིག་མཉམ་པར་བཞག་པའི་ཚེ་ངོ་བོ་སྟོང་པ་ཉིད་ནི་ཆོས་དབྱིངས་ཡེ་ཤེས་སོ། །རིག་པའི་གསལ་དྭངས་མ་འགགས་པ་མེ་ལོང་ཡེ་ཤེས། གཉིས་འཛིན་མེད་པ་མཉམ་ཉིད་ཡེ་ཤེས། ཡུལ་སྣང་མ་འགགས་པ་སོར་རྟོག་ཡེ་ཤེས། གཟུང་འཛིན་གྲོལ་བ་བྱ་བ་གྲུབ་པའི་ཡེ་ཤེས། དེའང་སྐབས་འདིར་བསྐྱེད་རིམ་དེ་ཉིད་ཀྱི་ཆོས་ཉིད་དེའི་ངང་ལ་བཞག་པར་བསྟན་པ་ཡིན་གྱི། བསྐྱེད་རིམ་སྨོས་པ་མ་ཡིན་ནོ། །ཁ་ཅིག་བསྐྱེད་རིམ་ལྷའི་དཀྱིལ་འཁོར་ལ་སྦྱོར་བ་དེ་དག་གིས་ཕྱོགས་ཙམ་མ་མཐོང་ཞིང་འཛོལ་བར་ཟད་དོ། །
གཉིས་པ་ནང་རྫོགས་པའི་རིམ་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། ཐབས་ལམ་དང་། གྲོལ་ལམ་མོ། །
དང་པོ་ནི། རྒྱ་མཚོ་ལས། བྱེ་བྲག་རླུང་ལས་གྱུར་པ་ཡི། །ཡེ་ཤེས་འབྱུང་བའི་སྟེང་འོག་སྒོ། །དབུག་དང་དགུག་པའི་ཐབས་ཉིད་དེ། །འཁོར་ལོ་གསུམ་གྱི་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །བཀུག་པ་གསུམ་གྱི་སེམས་ལྔའི་རིམ། །སྐྱེས་པས་བཅུ་དྲུག་ས་ཐོབ་པའི། །རང་བཞིན་ལྷན་ཅིག་སྐྱེས་པའི་ཕྱིར། །འཆིང་བ་ཉིད་ཀྱིས་ཐར་པའི་ལམ། །ཞེས་པས། འདི་ལ་གསུམ་སྟེ། (༢༤༢)སྟེང་སྒོ་རླུང་ལ་བསླབ་པ། འོག་སྒོ་ཐིག་ལེ་ལ་བསླབ་པ། དེའི་གྲོགས་ཙཎྜ་ལཱིའི་སྒོམ་ཐབས་སོ། །དང་པོ་ལ་གཉིས་ལས། རང་བཞིན་ཤེས་པར་བྱ་བ་ནི་རྡོ་རྗེའི་ལུས་ལ་རྩའི་གཙོ་བོ་གསུམ་སྟེ། གཡས་རོ་མ་དཀར་བ། གཡོན་རྐྱང་མ་དམར་བ། དབུས་ཀུན་འདུར་མ་མཐིང་ག་སྟེ། སྲོག་ཤིང་གསུམ་པོ་དེས་སྒོ་གསུམ་དང་དུག་གསུམ་གྱི་རྟེན་བྱེད་པ། ཐབས་ཤེས་ཟུང་འཇུག་གིས་སྦྱངས་པས་སྐུ་གསུམ་གྱི་རྟེན་བྱེད་པའོ། །དེ་ལས་གྱེས་པའི་འཁོར་ལོ་གསུམ་ནི་སྤྱི་བོ་བདེ་ཆེན། མགྲིན་པ་ལོངས་སྤྱོད། སྙིང་ག་ཆོས་ཀྱི་འཁོར་ལོ་སྟེ་ཡེ་ཤེས་ཀྱི་ཁམས་དང་རླུང་བསྒོམ་པའི་དབང་དུ་བྱས་པའོ། །དེའི་སྟེང་དུ་ཙནྜ་ལཱི་བསྒོམ་པས་ལྟེ་བ་སྤྲུལ་པའི་འཁོར་ལོ་དང་བཞིར་ཕྱེ་བའོ། །རྩ་འདབ་ཀྱང་རིམ་པ་བཞིན་སུམ་ཅུ་རྩ་གཉིས་དང་། བཅུ་དྲུག་དང་། བརྒྱད་དང་། དྲུག་ཅུ་རྩ་བཞིའོ། །དེ་ལས་ཀྱང་ཕྱེ་ན་ཡེ་ཤེས་ཀྱི་རྩ་སྟོང་ཕྲག་བདུན་ཅུ་རྩ་གཉིས་ཏེ། ཀྱེ་རྡོ་རྗེ་ལས། སྟོང་ཕྲག་བདུན་ཅུ་རྩ་གཉིས་ཏེ། །རྩ་རྣམས་ཀྱིས་ནི་རིགས་བཤད་དོ། །ཅེས་པ་ལྟར་རོ། །རྩ་དེ་དག་ཏུ་ཉིན་ཞག་ཕྲུགས་གཅིག་ལ་ཡེ་ཤེས་ཀྱི་རླུང་བག་ལ་ཞ་བའི་ཚུལ་གྱིས་གྲངས་མཐུན་པར་རྒྱུ་ཡང་། གསལ་པོར་མི་རྒྱུ་བས་ཡོན་ཏན་ཁྱད་པར་ཅན་མངོན་དུ་མ་གྱུར་པ་ཡིན་ཞིང་། རླུང་བཅིངས་པ་ན་ཉོན་མོངས་པའི་རླུང་ཉིད་ཡེ་ཤེས་ཀྱི་རླུང་དུ་གྱུར་པ་རྒྱུ་བས་རྣལ་འབྱོར་པ་ལ་ཡོན་ཏན་འཆར་རོ། །སྤྱིར་རགས་པའི་རླུང་ཉི་ཁྲི་ཆིག་སྟོང་དྲུག་བརྒྱ་ཉིན་ཞག་གཅིག་ལ་རྒྱུ་བ་ཡིན་ནོ། །དེའང་རགས་པར་རྒྱུ་བ་ནི་ལས་སམ་ཉོན་མོངས་པའི་རླུང་ཡིན་ལ། དེ་བཅིངས་པས་གསལ་ལ་མི་རྟོག་པའི་ཡེ་ཤེས་སྐྱེས་པ་ནི་ཡེ་ཤེས་ཀྱི་རླུང་ངོ་། །དེ་འང་གྱེན་རྒྱུ། ཐུར་སེལ། མཉམ་གནས་གསུམ་ནི་ལུས་ཀྱི་སྟེང་འོག་བར་གསུམ་ན་རྒྱུ་ཞིང་། ཕྱིར་འགྲོ་བ། ནང་དུ་འཇུག་པ། དེ་གཉིས་མཉམ་པར་གནས་པ་གསུམ་ལའང་དེ་སྐད་ཅེས་གྲགས་སོ། །དེ་དག་ཀྱང་སྣ་བུག་གཡས་ནས་རྒྱུ་བའི་ཕོ་རླུང་དང་། གཡོན་ནས་རྒྱུ་བའི་མོ་རླུང་དང་། མཉམ་པར་རྒྱུ་པའི་ཚེ་མ་ནིང་གི་རླུང་ཞེས་བྱའོ། །རླུང་གི་ཁ་དོག་ལྔ་ནི། ས་རླུང་སེར་པོ། ཆུ་རླུང་དཀར་པོ། མེ་རླུང་དམར་པོ། རླུང་གི་རླུང་ལྗང་གུ། ཡེ་ཤེས་ཆེན་པོ་ནམ་མཁའི་རླུང་ནི་མཐིང་ག་སྟེ། སྙིང་གའི་རྩ་འདབ་ཀྱི་ཕྱོགས་བཞི་དབུས་དང་ལྔར་བརྟེན་ཞིང་། རླུང་དེ་དག་ཀྱང་དབུ་མར་ཚུད་པ་ན་ཡེ་ཤེས་ཀྱི་རླུང་དུ་གྱུར་པས་རླུང་ལྔའི་གདངས་དུ་བ་དང་སྨིག་རྒྱུ་དང་སྟོང་གཟུགས་སྣ་ཚོགས་སུ་འཆར་བ་ཡིན་ནོ། །
གཉིས་པ་ཤེས་ནས་ཉམས་སུ་བླངས་པ་ལ་གསུམ་ལས། དང་པོ་བྱ་བའི་རིམ་པ་ནི་རོ་རྐྱང་གི་སྣ་གཉིས་སྨིན་མཚམས་ནས་སྣ་བུག་གཡས་གཡོན་ལ་ཟུག་པ་ནས་རླུང་དལ་བུས་བཏང་བས་སྒྲིབ་པ་(༢༤༣)སངས་ཤིང་སྣང་བ་ཐམས་ཅད་ཡེ་ཤེས་ཀྱི་དཀྱིལ་འཁོར་དུ་གསལ་བཏབ། ནང་དུ་རྔུབས་པས་ཡེ་ཤེས་ཀྱི་རླུང་དེ་ནས་ཞུགས་པ་མར་སྣ་གཉིས་སྤུ་ན་གུའི་མཚམས་ནས་དབུ་མར་ཆུད་པའི་ནང་དུ་སོང་བས་འཁོར་ལོ་བཞི་དང་རྩ་འདབས་རྣམས་ཡེ་ཤེས་ཀྱིས་ཁྱབ་པར་བསྒོམ་ཞིང་ཐུབ་ཐང་དུ་འཛིན་པའོ། །
དེ་ལ་ཅུང་ཟད་བརྟན་ནས་མན་ངག་དངོས་བསྒོམ་པ་ནི་རིམ་པས་བསླབ་ཅིང་གོམས་ནས་ཅིག་ཆར་དུ་བྱ་བ་ལ་བཞི་སྟེ། ཀུན་ཏུ་བཟང་པོའི་མན་ངག་སྙིང་ལ་བསྒོམ་པ། ཀུན་ཏུ་བཟང་མོའི་མན་ངག་ལྟེ་བ་ལ་བསྒོམ་པ། སྦྱོར་བ་དག་པའི་མན་ངག་མགྲིན་པ་ལ་བསྒོམ་པ། བརྡལ་ཁྱབ་ཆེན་པོའི་མན་ངག་སྤྱི་བོ་ལ་བསྒོམ་པའོ། །
དང་པོ་ནི། སྙིང་ག་ཆོས་ཀྱི་འཁོར་ལོ་རིན་པོ་ཆེའི་སྒྲོམ་ན་དྭངས་མ་ལྔ་འདུས་ཀྱི་ཐིག་ལེ་ཡུངས་འབྲུ་ཙམ་པ་ལྔའི་ངོ་བོ་ཡབ་ལྔའི་རྒྱུར་སེམས་སྦྱང་། དེ་བརྟན་ནས་འོད་ཀྱི་གང་བུ་ལྔ་ལ་སེམས་སྦྱང་། དེ་བརྟན་ནས་རིགས་ལྔའི་སྐུར་སེམས་སྦྱང་ངོ་། །དེ་བཞིན་དུ་ལྟེ་བ་མགྲིན་པ་སྤྱི་བོ་རྣམས་སུ་ཤེས་པར་བྱའོ། །དེ་ལྟར་བསྒོམས་པས་གནས་སྐབས་སུ་མངོན་པར་ཤེས་པ་དང་། ཏིང་ངེ་འཛིན་དང་། རྫུ་འཕྲུལ་ལ་སོགས་པ་འགྲུབ་ཅིང་མཐར་ཐུག་སངས་རྒྱས་ཀྱི་ས་མཆོག་ཐོབ་པར་འགྱུར་རོ། །
གཉིས་པ་འོག་སྒོ་ཐིག་ལེ་ལ་བསླབ་པ་ལའང་གཉིས་ལས། རང་བཞིན་ཤེས་པར་བྱ་བ་ནི་ཟླ་གསང་ལས། འདོད་ཆགས་མེད་ལ་བྱང་ཆུབ་མེད། །ཅེས་པ་དང་། རྒྱས་པ་ལས། ཉོན་མོངས་རང་དང་སྤྱི་བསྟན་པ། །མཚན་ཉིད་མ་ནོར་དོན་རྟོགས་ན། །རྣམ་པར་བྱང་བའི་ལམ་དུ་འགྱུར། །སྐུ་གསུང་ཐུགས་ཀྱི་དངོས་གྲུབ་ཀྱང་། །འདི་ཉིད་ཡིན་ཏེ་གཞན་དུ་མེད། །སྒྱུ་མའི་རྩལ་འཛིན་ཐབས་སུ་འགྲོ། །མཚན་རྣམས་མི་གནས་ཤེས་རབ་སྦྱོར། །ཞེས་པ་དང་། སྒྲོན་གསལ་ལས། སྐྱེས་བུ་འདོད་ཆགས་ཅན་དོན་དུ། །དེ་ཡི་བྱེད་པོ་རྡོ་རྗེ་སེམས། །ཞེས་པས་འདི་ལ་དབྱེ་བ་དང་། ས་ལམ་གྱི་རྫོགས་ཚུལ་གཉིས་ལས། དང་པོ་ནི། དགའ་བ་དང་། མཆོག་དགའ་དང་། ལྷན་ཅིག་སྐྱེས་དགའ་དང་། དགའ་བྲལ་གྱི་དགའ་བ་བཞིའོ། །དེའང་རེ་རེ་བཞིན་དགའ་བའི་དགའ་བ་ལ་སོགས་པ་བཅུ་དྲུག་གོ། །དེ་དག་ཀྱང་རྣམ་པ་གསུམ་ལས། སྤང་བྱ་ལ་ལྟོས་པའི་དགའ་བ་བཞི་ནི། སྙོམ་འཇུག་གི་ལྷན་ཅིག་སྐྱེས་པའི་ཡེ་ཤེས་ཀྱིས་ཡབ་ཀྱི་རྣམ་རྟོག་རགས་རིམ་སྤོང་བ་དགའ་བ་དང་། ཐམས་ཅད་སྤོང་བ་མཆོག་དགའ། ཡུམ་གྱི་རགས་རིམ་སྤོང་བ་དགའ་བྲལ། ཐམས་ཅད་སྤང་བ་ལྷན་ཅིག་སྐྱེས་དགའ་འོ། །གནས་ལ་ལྟོས་པའི་དགའ་བ་བཞི་ནི་ཡབ་ཀྱི་ལུས་ཁོལ་བུར་བདེ་བ་སྐྱེས་པ་དགའ་བ། ཁྱབ་པར་སྐྱེས་པ་མཆོག་དགའ། ཡུམ་ལ་ཁོལ་བུར་སྐྱེས་པ་དགའ་བྲལ། ཁྱབ་པར་སྐྱེས་པ་(༢༤༤)ལྷན་ཅིག་སྐྱེས་དགའ་འོ། །གོ་རིམ་ལ་ལྟོས་པའི་དགའ་བ་བཞི་ནི་སྤྱི་བོར་དགའ་བ། མགྲིན་པར་མཆོག་དགའ། སྙིང་གར་དགའ་བྲལ། གསང་བར་ལྷན་ཅིག་སྐྱེས་དགའ་འོ། །
གཉིས་པ་ས་ལམ་གྱི་རྫོགས་ཚུལ་ནི་རྡོ་རྗེ་ལས་རིམ་ལས། གནས་ཀྱི་ཡེ་ཤེས་བཅུ་དྲུག་པོ། །ཚོགས་སྦྱོར་ས་སོགས་དང་པོ་ནས། །མཐར་ཕྱིན་སངས་རྒྱས་ས་ཉིད་དེ། །གནས་བཞི་དེ་བཞིན་དབྱེ་བ་ལས། །གཉིས་པའི་བར་པ་རབ་དགའ་སོགས། །ཕ་རོལ་ཕྱིན་དང་ས་མཚན་ཉིད། །མཚུངས་ཕྱིར་རྫོགས་པར་བཤད་པ་ཡིན། །ཞེས་པས། སྤྱི་བོ་ནས་རྡོ་རྗེའི་བར་དུ་ཡས་བརྟན་གྱི་དགའ་བ་བཞི་ཕྱེ་བས་བཅུ་དྲུག་ལ་རྒྱུའི་ས་རྣམས་རྫོགས་ཏེ། དེའང་དགའ་བའི་དགའ་བ་བཞི་ནི་ཚོགས་ལམ་མོ། །མཆོག་དགའི་དགའ་བ་ནི་སྦྱོར་ལམ་མོ། །མཆོག་དགའ་ནི་ས་དང་པོ། དགའ་བྲལ་ནི་གཉིས་པ། ལྷན་ཅིག་སྐྱེས་དགའ་ནི་འོད་བྱེད་པའོ། །དགའ་བྲལ་གྱི་དགའ་བ་ས་བཞི་པ། མཆོག་དགའ་ལྔ་པ། དགའ་བྲལ་དྲུག་པ། ལྷན་ཅིག་སྐྱེས་དགའ་བདུན་པའོ། །ལྷན་ཅིག་སྐྱེས་དགའི་དགའ་བ་ས་བརྒྱད་པ། མཆོག་དགའ་དགུ་པ། དགའ་བྲལ་བཅུ་པ། ལྷན་ཅིག་སྐྱེས་དགའ་ཀུན་ཏུ་འོད་ཀྱི་ས་སྟེ། དེའི་ཚེ་སྙིགས་མ་གཉིས་ནང་དུ་ལུས། དྭངས་མ་གཉིས་རྡོ་རྗེའི་རྩེར་ཟིལ་པ་ལྟ་བུར་བྱུང་བ། ཡུམ་ལའང་དགའ་བ་བཅུ་དྲུག་རྫོགས་པས་སྙིགས་མ་གཉིས་ནང་དུ་ལུས། དྭངས་མ་གཉིས་ཕྱིར་པདྨའི་རྩེར་འཐོན་པས་ཡབ་ཡུམ་གྱི་ཐིག་ལེ་དཀར་དམར་བཞི་འདྲེས་པའི་ཚེ་ཡབ་ལ་བདེ་བ་གསལ་བའི་རོ་ཡོད། ཡུམ་ལ་མི་རྟོག་པ་སྟོང་པའི་རོ་ཡོད། དེ་གཉིས་འདྲེས་པས་བདེ་སྟོང་ཟུང་འཇུག་གི་དགོངས་པ་ཤར་བ་ནི་མཐའ་གཉིས་ཀྱིས་མ་བསྒྲིབས་པར་གསལ་བའི་ཕྱིར། ཀུན་ཏུ་འོད་ཀྱི་ས་སྟེ་ཤེས་རབ་ཡེ་ཤེས་ཀྱི་དབང་གི་ངོ་བོའོ། །དེའི་ཚེ་ཕ་རོལ་ཏུ་ཕྱིན་པ་བཅུ་ཡང་རྫོགས་ཏེ། བྱང་ཆུབ་སེམས་ཀྱིས་རྩ་གནས་ཐམས་ཅད་ཁྱབ་པར་གཏོང་བ་སྦྱིན་པ། མི་འཛག་པར་སྡོམ་པས་ཚུལ་ཁྲིམས། སྦྱོར་བའི་ཐབས་ལ་མི་སྐྲག་པས་བཟོད་པ། བདེ་བའི་ཐབས་ལ་འབད་པས་བརྩོན་འགྲུས། དེའི་ངང་ལ་སེམས་རྩེ་གཅིག་པ་བསམ་གཏན། རྟོག་ཚོགས་བདེ་བའི་དཀྱིལ་འཁོར་དུ་ཤར་བ་ཤེས་རབ། དེ་ལྟར་སྤྱད་ཀྱང་ཉོན་མོངས་པས་མི་གོས་པ་ཐབས། རྣམ་པར་རྟོག་པ་དུས་གཅིག་འཇོམས་པ་སྟོབས། འབྲས་བུ་ལ་དམིགས་པས་སྨོན་ལམ། ལྷན་ཅིག་སྐྱེས་པའི་ཡེ་ཤེས་མྱོང་བས་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །དེའང་རྒྱས་པ་ལས། ཕ་རོལ་ཕྱིན་བཅུ་རྒྱུ་འབྲས་རྫོགས། །ཞེས་སོ། །བདེ་བ་ཆེན་པོ་དོན་གྱི་དབང་ནི། དེ་ལྟར་བདེ་སྟོང་གི་རོ་མྱོང་བའི་ཉི་ཟླ་འདྲེས་པའི་ཐིག་ལེ་རླུང་གིས་གྱེན་དུ་(༢༤༥)དྲངས་ཏེ་ཆོས་ཉིད་ཀྱི་ངང་དུ་འཇོག་པའོ། །དེའང་མས་བརྟན་གྱི་དགའ་བཞི་ཕྱེ་བས་བཅུ་དྲུག་པོ་ལྷན་ཅིག་སྐྱེས་དགའ་ནས་བརྩམས་ཏེ། གསང་སྔགས་ཀྱི་ས་ལམ་ལ་སྦྱར་ཏེ། དེའང་ལྷན་ཅིག་སྐྱེས་དགའི་དགའ་བ་བཞི་ནི་ཚོགས་ལམ་མོ། །དགའ་བྲལ་གྱི་ལྷན་ཅིག་སྐྱེས་དགའ་ནི་སྦྱོར་ལམ་མོ། །དགའ་བྲལ་ནི་མཐོང་ལམ་ས་དང་པོའོ། །མཆོག་དགའ་ས་གཉིས་པ། དགའ་བ་ས་གསུམ་པའོ། །མཆོག་དགའི་ལྷན་ཅིག་སྐྱེས་དགའ་བཞི་པ། དགའ་བྲལ་ལྔ་པ། མཆོག་དགའ་དྲུག་པ། དགའ་བ་བདུན་པའོ། །དགའ་བའི་ལྷན་ཅིག་སྐྱེས་དགའ་བརྒྱད་པ། དགའ་བྲལ་དགུ་པ། མཆོག་དགའ་བཅུ་པ། དགའ་བ་སངས་རྒྱས་ཀྱི་ས་སྟེ། དེའང་ཐིག་ལེ་རྡོ་རྗེའི་རྩ་བ་ནས་ལྟེ་བའི་བར་དུ་ཀུན་ཏུ་འོད། སྙིང་ག་ནས་མགྲིན་པའི་བར་པདྨ་ཅན། སྤྱི་བོ་ནས་ལུས་ཐམས་ཅད་ལ་ཁྱབ་པ་རྡོ་རྗེ་འཛིན་པའམ་འཁོར་ལོ་ཚོགས་ཆེན་གྱི་སའོ། །དེའང་ཐིག་ལེ་རྡོ་རྗེའི་རྩ་བ་ནས་རྩེ་མོར་ཕར་འགྲོ་བ་ན་རྒྱུའི་ས་རྣམས་དང་། རྩེ་མོ་ནས་ནང་དུ་འོང་བ་ལ་འབྲས་བུས་ས་སྦྱར་ནས་རྫོགས་པར་འདོད་པའི་ལུགས་ཡོད་ཀྱང་། འདིར་བླ་མའི་མན་ངག་གིས་ཡས་བརྟན་དང་མས་བརྟན་གྱི་རིམ་པ་ལ་སྦྱར་བ་ཡིན་ནོ། །དེ་བཞིན་དུ་མངོན་ཤེས་དྲུག་དང་མཚན་དཔེ་ཡང་རྫོགས་ཏེ། ཐབས་ཀྱིས་དྲངས་པས་ཐིག་ལེ་རང་གནས་སུ་སླེབས་པ་སྔོན་གྱི་གནས་རྗེས་སུ་དྲན་པའི་མངོན་པར་ཤེས་པ། ཐིག་ལེ་འགྲོ་འོང་བྱེད་པ་རྫུ་འཕྲུལ་གྱི་མངོན་ཤེས། བདེ་སྟོང་བརྗོད་པ་དང་བྲལ་བ་ལྷའི་རྣ་བ། སངས་རྒྱས་ཀྱི་ས་གསུམ་མཐོང་བ་ལྷའི་སྤྱན། བདེ་ལ་དེར་འཛིན་མེད་པས་ཟག་པ་མེད་པ་ལྷའི་ཤངས་ཡབ་ཡུམ་གཅིག་གིས་གཅིག་གི་རོ་མྱོང་ཚུལ་ཤེས་པས་གཞན་གྱི་སེམས་ཤེས་པའི་མངོན་པར་ཤེས་པའོ། །ཡབ་ཡུམ་གྱི་དགའ་བ་བཅུ་དྲུག་ཉི་ཟླ་ཟུང་དུ་འབྲེལ་བ་ནི་མཚན་སུམ་ཅུ་རྩ་གཉིས། ཡབ་ཀྱི་ཟླ་བའི་ཐིག་ལེ་དགའ་བ་བཅུ་དྲུག་པོ་རེ་རེའང་ཡེ་ཤེས་ལྔ་ལྔ་དང་ལྡན་པས་དཔེ་བྱད་བཟང་པོ་བརྒྱད་ཅུའོ། །ཡུམ་ལ་མི་ལྡན་དེ་ཆོས་ཉིད་སྟོང་པ་ཡིན་པའི་ཕྱིར་རོ། །དེ་དག་གི་དོན་ཡང་རྒྱ་མཚོ་ལས། ཐབས་ཀྱིས་ལྡོག་པས་སྔོན་གནས་ཤེས། །འགྲོ་འོང་རྫུ་འཕྲུལ་དེས་ལུང་གསལ། །བརྗོད་འདྲར་ཐོས་ཤིང་ས་གསུམ་གསལ། །ཕུང་ཁམས་ཡུལ་གྱི་ཟག་པ་མེད། །ཨཱ་ལི་ཀཱ་ལིའི་བདེ་བ་ཉིད། །ཕན་ཚུན་འདྲེས་ཤིང་གཅིག་པར་ཤེས། །བཅུ་དྲུག་ངོས་གཉིས་མཚན་དང་ལྡན། །ཕྱོགས་གཅིག་ཡེ་ཤེས་ལྔ་ལྡན་པ། །བརྒྱད་ཅུ་བཟོད་སོགས་རྒྱུ་ལས་འཕགས། །ཐིག་ལེ་གཉིས་མེད་བདེ་ཆེན་ཉིད་ཅེས་སོ། །དེའང་རྒྱུའི་ཐེག་པས་བཟོད་པ་ལ་སོགས་པ་ཕྱི་རོལ་ཏུ་བསྐྲུན་པའི་དགེ་བས་མངོན་ཤེས་(༢༤༦)དང་མཚན་དཔེ་ཐོབ་པར་འདོད་པའི་ལུགས་ལས་ཁྱད་པར་དུ་འཕགས་སོ། །
གཉིས་པ་ཤེས་ནས་ཉམས་སུ་བླང་ཚུལ་ནི་རླུང་སེམས་ལས་སུ་རུང་བས་ལས་ཀྱི་ཕྱག་རྒྱ་ལ་རོལ་པའི་བདེ་བས་བསྐུལ་ཏེ། ཡབ་ཡུམ་ལྷར་བསྐྱེད་པ་དང་། མཁའ་གསང་རྡོ་རྗེ་དང་པདྨར་བྱིན་གྱིས་རློབ་པ་དང་། ཐིག་ལེ་དབབ་པ་དང་། རྡོ་རྗེའི་བུམ་པར་བཟུང་བ་དང་། གྱེན་དུ་ཧཱུྃ་གི་བ་ཐག་བརྒྱུས་པ་ལྟར་དྲང་བ་དང་། ལུས་ཐམས་ཅད་ལ་ཁྱབ་པར་དགྲམ་པ་དང་། དེ་ཐམས་ཅད་གནས་ལུགས་རྫོགས་པ་ཆེན་པོའི་ངང་ལ་རང་བཞིན་གཉིས་སུ་མེད་པར་མཉམ་པར་བཞག་པའོ། །དེའི་འབྲས་བུ་ནི་མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པ་སྟེ། ཨཱ་ལི་ཀཱ་ལིའི་ཕྱག་རྒྱ་ཡིས། །ཐམས་ཅད་ཐམས་ཅད་འགྲུབ་པར་འགྱུར། །ཞེས་སོ། །
གསུམ་པ་དེའི་གྲོགས་ཙཎྜ་ལཱི་བསྒོམ་པ་ནི་རྒྱ་མཚོ་ལས། ཟག་མེད་བདེ་བའི་མེ་སྦར་ཏེ། །བསྲེག་པ་སྟེང་གི་འཇོ་བར་བཤད། །ཅེས་པས། ལྟེ་འོག་སོར་བཞིའི་ཐད་རྩ་གསུམ་འདུས་པས་མདོར་ཨཱཿཐུང་མེའི་རང་བཞིན་རེག་བྱ་ཤིན་ཏུ་ཚ་བ་ཡུང་འབྲུ་ཙམ་ལ་སེམས་གཟུང་ངོ་། །དེ་བརྟན་ནས་མཐེ་བོང་ཙམ་ལ་མེ་འབར་བས་ལུས་ཀྱི་རྩ་གསུམ་པོའི་རྩ་འདབ་དང་བཅས་པའི་ནང་ཁེངས་པས་ལས་དང་སྒྲིབ་པ་བསྲེགས། ཁམས་དྭངས་མ་དཀར་དམར་གྱི་བདུད་རྩིའི་རྒྱུན་སྤྱི་བོའི་ཧཾ་ལས་བབས་པས་ལུས་ཀྱི་ནང་ཐམས་ཅད་བདེ་སྟོང་གིས་ཁྱབ་པར་བསྒོམ་མོ། །དེ་ལྟར་བསྒོམས་པས་དྲོད་སྐྱེ་ཞིང་བདེ་སྟོང་གི་ཡེ་ཤེས་འཆར་བར་བྱེད་པའི་ཐབས་དམ་པའོ། །
གཉིས་པ་གྲོལ་ལམ་ལ་གཉིས་ཏེ། སྣང་བ་ལྷའི་ཏིང་ངེ་འཛིན་བསྒོམ་པ་དང་། སྟོང་པ་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པའོ། །
དང་པོ་ནི། ལྷ་སྐུ་སྒྱུ་མ་ལྟ་བུ་བསྒོམས་པའི་ངང་ལ་བྱུང་ཚོར་གྱི་རྣམ་རྟོག་ཅི་སྐྱེས་བསྐྱེད་རིམ་གྱིས་ཟིན་པར་བྱེད་པའོ། །དེའི་མཐུས་ཏིང་ངེ་འཛིན་ལ་སོགས་པའི་ཡོན་ཏན་ཐམས་ཅད་འགྲུབ་སྟེ། སེམས་རྩེ་གཅིག་པ་ཉིད་ཏིང་ངེ་འཛིན་གྱི་ངོ་བོ་དང་རྒྱུ་ཡིན་པའི་ཕྱིར་རོ། །
གཉིས་པ་ནི། མཉམ་བཞག་ཏུ་སྣང་བའི་ཡུལ་དང་དེར་འཛིན་གྱི་བློ་གཉིས་སུ་མེད་པར་གང་སྣང་གི་ཐོག་ཏུ་མ་ཡེངས་པར་ཕྱམ་མེ་བཞག་པས་གཉིས་སུ་མེད་པའི་དོན་ལ་ངང་གིས་གནས་ཤིང་། རྗེས་ཐོབ་ཏུ་སྣང་བ་སྒྱུ་མ། རིག་པ་རང་གྲོལ་ཆོས་ཉིད་རྫོགས་པ་ཆེན་པོར་རྩལ་སྦྱང་བར་བྱའོ། །དེ་ལྟར་སྦྱངས་པས་སེམས་གནས་པའི་ཞི་གནས་དང་། རང་བཞིན་མེད་པའི་དོན་རྟོགས་པའི་ལྷག་མཐོང་ཟུང་འབྲེལ་དུ་འཆར་རོ། །དེ་ལྟར་ཞི་གནས་ཀྱིས་ཟིན་པའི་ལྷག་མཐོང་བསྒོམས་པས་ཉོན་མོངས་པ་མགོ་ནོན་པ་དང་རྩ་བ་དྲུངས་ནས་འབྱིན་པ་ཡིན་ཏེ། ཡེ་ཤེས་རྒྱས་པ་ལས། ཞི་གནས་ཀྱིས་ནི་ཉོན་མོངས་མགོ་ནོན་ཞིང་། །ལྷག་མཐོང་དམ་པས་རྩ་བ་རབ་ཏུ་འབྱིན། །ཞེས་པ་དང་། སྤྱོད་འཇུག་ལས། ཞི་(༢༤༧)གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱ་སྟེ། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་པ་ལྟར་རོ། །དེའང་། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །ཞེས་པའང་འདི་ཉིད་ཀྱི་དོན་ལ་ཟེར་རོ། །ཚུལ་དེའི་འབྲས་བུ་ནི་གནས་སྐབས་དང་མཐར་ཐུག་གི་ཡོན་ཏན་ཕུན་སུམ་ཚོགས་པ་འགྲུབ་པའོ། །དེའང་གང་ཟག་རྟོག་པ་ཤས་ཆུང་ཞིང་ཉོན་མོངས་པ་རགས་པ་རྣམས་ལ་ཐབས་ལམ་སྟེང་འོག་གི་སྒོ་གཉིས་བསྟན་ཞིང་། རྟོག་པ་ཤས་ཆེ་བ་ལ་ནི་ལྷ་དང་མི་རྟོག་པ་བསྒོམ་པའི་རིམ་པ་བསྟན་པ་ཡིན་ནོ། །
གཉིས་པ་གཞུང་གི་དོན་ལ་གཉིས་ལས། བདེ་སྟོང་གི་དོན་ལ་བསྒོམ་པའི་ཚུལ་ནི་ཡབ་ཡུམ་གྱི་དྭངས་མ་དཀར་དམར་གྱི་སྙིང༵་པོ༵་ཐིག༵་ལེ༵་རྡོ་རྗེ་དང་པདྨའི་རྩེར་ཕན་ཚུན་འདྲེས་ཤིང་མཉམ༵་པར་སྦྱོར༵་བ༵ས་ཐོབ་པའི་བདེ༵་བ་དང་སྟོང་པའི༵་ཡེ༵་ཤེ༵ས་མཆོག་ཏུ་གསང་བའི་རོལ༵་མོ༵་ཡི༵ས་མཁའ་གསང་གི་དཀྱིལ་འཁོར་དུ་སྤྱན་དྲངས་པའི་ལྷ་རྣམས་མཆོད་ཅིང་། རླུང་གིས་གྱེན་དུ་དྲངས་ཏེ་འཁོར་ལོ་བཞིའི་རྩ་དང་ལུས་ཐམས་ཅད་ན་རང་བཞིན་གྱིས་གནས་པའི་སངས་རྒྱས་ཀྱི་དཀྱིལ་འཁོར་དང་རང་གི་སེམས་ཉིད་བདེ་བ་ཆེན་པོའི་ཡེ༵་ཤེས༵་ཀྱིས་རབ་ཏུ་དགྱེ༵ས་པ་ཆེན་པོར་གྱུར་པ་ལ༵་བདེ་སྟོང་གཉིས་སུ་མེད་པའི་མཆོ༵ད་པ༵་འབུལ༵་བའོ། །གཉིས་པ་དེའི་འབྲས་བུ་ནི་དེ་ལྟར་ཟ༵ག་པ༵་མེད༵་པའི༵་མཆོད་པ་ཕུལ་བའི་བསོ༵ད་ནམ༵ས་ཀྱིས༵་གནས་སྐབས་རིག་འཛིན་གསུམ་དང་གྲུབ་པ་ཆེན་པོ་བརྒྱད་ཐོབ་ཅིང་། མཐར་ཐུག་ལྷུན་གྱིས་གྲུབ་པའི་རིག་འཛིན་གྱི་ཞིང་ཡེ༵་ཤེས༵་ཀྱི་སྒྱུ༵་མར༵་སངས་རྒྱས་ཉིད་ལ་རང༵་སྣང༵་བ༵་ལྷུན་སྟུག་པོ་བཀོད་པའི་རང་བཞིན་བཀོད་པ་ཚད་མེད་པའི་རོལ༵་མོ༵་རིགས་ལྔའི་དཀྱིལ༵་འཁོ༵ར་བས༵མ་ཡ༵ས་དང་མཆོག༵་ཆོས་སྐུའི་ཞིང་ཁམས་ཀུན་ཏུ་བཟང་པོའི་གཞི་ལ་མཐར་ཕྱིན་པ་ཉིད་འཐོབ་བོ། །
གསུམ་པ་གསང་བ་འོད་གསལ་གྱི་རིམ་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་གཉིས་ཏེ། འོད་གསལ་གྱི་རང་བཞིན་ཤེས་པར་བྱ་བ་དང་། ཤེས་ནས་ཉམས་སུ་བླང་བའི་རིམ་པའོ། །
དང་པོ་ནི། རྒྱ་མཚོ་ལས། ཡེ་ནས་མངོན་རྫོགས་སངས་རྒྱས་ཆོས། །ལུས་ཅན་ཀུན་ལ་གནས་པའི་ཕྱིར། །ལྷུན་གྲུབ་རྒྱལ་བའི་དཀྱིལ་འཁོར་ནི། །ལུས་ཅན་ཀུན་གྱི་ལུས་ལ་གནས། །ཞི་དང་ཁྲོ་ཚུལ་དཔག་མེད་འཆང་། །ཚེ་འདི་ཉིད་དམ་བར་མ་དོར། །གོམས་པའི་དབང་གིས་གསལ་བར་བྱེད། །ཅེས་པས། སེམས་ཅན་ཐམས་ཅད་ཀྱི་སྙིང་ག་ན་རྒྱལ་བ་བཞི་བཅུ་རྩ་གཉིས་དང་། སྤྱི་བོ་ན་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ཆ་(༢༤༨)ཕྲ་ལ་དྭངས་པ་འོད་ལྔའི་རང་བཞིན་ཀུན་རྫོབ་ཀྱི་ཐིག་ལེའི་དྭངས་མ་ལ་བརྟེན་ནས་རྩ་འདབ་རྣམས་ལ་ཚོམ་བུའི་ཚུལ་དུ་གནས་པ་ནི་གཞི་རྡོ་རྗེ་དབྱིངས་ཀྱི་དཀྱིལ་འཁོར་འོག་མིན་ན་བཞུགས་པ་ཞེས་བྱ་སྟེ། བསྐྱེད་རྫོགས་གོམས་པར་བྱས་པས་དེའི་རང་བཞིན་གསལ་བར་མཐོང་ངོ་། །དེའང་རྣམ་སྨིན་གྱི་རྒྱ་ལས་མ་གྲོལ་བར་མི་སྣང་སྟེ། ཤ་ཁྲག་གི་ལུས་རགས་པས་བསྒྲིབས་པའི་ཕྱིར་རོ། །འདི་ཉིད་བསྐྱེད་རྫོགས་བརྟན་ཞིང་ཡིད་ལྷའི་སྐུ་འཇའ་ཚོན་ལྟ་བུ་ཤིན་ཏུ་གསལ་ཡང་ལུས་རྒྱ་ལས་མ་གྲོལ་ལ། གྲོལ་མ་ཐག་ཏུ་ཕྱག་རྒྱ་ཆེན་པོའི་དོན་མཐོང་བ་རྣམས་ནི་རྣམ་པར་སྨིན་པའི་རིག་འཛིན་ཏེ་བར་དོར་ལྷའི་སྐུར་གྲོལ་ནས་སེམས་ཅན་གྱི་དོན་བྱེད་པའོ། །དེ་ལྟ་བུའི་བསྐྱེད་པ་དང་རྫོགས་པ་ལ་བརྟེན་ནས་ལུས་འདི་ཉིད་སྐྱེ་ཤི་མེད་པར་གྱུར་པ་སྒྲིབ་པ་ཅུང་ཟད་སྦྱོངས་པ་ནི་ཚེ་དབང་དང་། ཕྱག་རྒྱ་ཆེན་པོས་ལུས་མ་བོར་བར་སངས་རྒྱས་ཐོབ་ཅིང་། ལྷུན་གྲུབ་ནི་སངས་རྒྱས་ཉིད་དེ་དཀྱིལ་འཁོར་དེ་ཉིད་མངོན་དུ་གྱུར་པའོ། །དེ་ལྟ་བུའི་འོག་མིན་ཡེ་ནས་རང་ལ་ཡོད་པས་བསྐྱེད་རྫོགས་གསལ་བཏབ་པས་འཚང་རྒྱ་བ་ཡིན་གྱི། སྐུ་དང་ཡེ་ཤེས་ཀྱི་ཞིང་ཁམས་དག་པ་ཕྱོགས་བཅུའི་འཇིག་རྟེན་གཞན་ནས་བཙལ་ཅིང་བསྒྲུབ་ཏུ་མེད་དེ། ཕྱོགས་བཅུ་དུས་བཞི་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་འཚོལ་ཅིག །ཅེས་གསུངས་པ་ཡིན་ནོ། །
གཉིས་པ་ནི། མཚན་མོའི་ཁང་པ་ཡིད་དང་མཐུན་པར་རྣམ་པར་སྣང་མཛད་ཀྱི་ཆོས་བདུན་བཅས་ཏེ་མི་གཡོ་བར་བྱས་ཏེ། ལམ་རིམ་ལས། དེ་ཕྱིར་ལྷག་མ་ཆ་མཉམ་པའི། །བདེ་ལྡན་བྲོད་པའི་ཆོས་བདུན་ཚུལ། །ལྡན་བྱས་རྗེ་བཙུན་རྣམ་སྣང་ཚུལ། །འཛིན་རྩོལ་མེད་པའི་སེམས་ཀྱིས་འདུག །ཅེས་སོ། །འདིས་མི་གཡོ་བ་གསུམ་བསྟན་པའོ། །ཆོས་བདུན་ནི་རྐང་པ་སྐྱིལ་ཀྲུང་། ལག་པ་མཉམ་གཞག །སྐེད་པ་དོང་རྩེ་ལྟར་བསྲང་བ། མགྲིན་པ་ཡིད་ཙམ་དགུ་བ། མིག་སྣ་རྩེ་ལ་དབབ་པ། ལྕེ་ཡ་རྐན་ལ་སྦྱར་བ། མཆུ་དང་སོ་ཐ་མལ་པར་གཞག་པའོ། །ཁྱད་པར་དུ་སྨིན་མཚམས་ནས་སོར་བཅུ་གཉིས་ཀྱི་ནམ་མཁའ་ལ་བལྟ་ཞིང་ངག་མི་སྨྲ་བ་དང་། སེམས་གང་དུ་མི་བསམ་པར་ནམ་མཁའི་ངང་དུ་གཞག་པའོ། །དེ་ལྟར་ཞག་གཅིག་དང་། གསུམ་པ་དང་། བདུན་དུ་བྱས་པས་དུ་བ་ལ་སོགས་པའི་མཚན་མ་མཐོང་ངོ་། །དེ་བཞིན་དུ་བཅུ་བཞི་དང་། ཉེར་གཅིག་དང་། ཟླ་བ་གཅིག་ཏུ་བྱས་པས་དང་པོར་དུ་བ་ལྟ་བུ་དང་། སྤྲིན་དང་། མིག་སྒྱུ་དང་། མེ་ཁྱེར་དང་། མར་མེ་དང་། ཉི་མའི་སྣང་བ་འདྲ་བ་མཐོང་སྟེ། ལམ་རིམ་(༢༤༩)ལས། སྨིག་རྒྱུ་དུ་བ་སྤྲིན་མེ་ཁྱེར། །མར་མེ་ཉི་མའི་ཚུལ་དུ་སྦྱར། །ཞེས་སོ། །དེ་དག་གི་ཚེ་ལུས་ངག་ཡིད་གསུམ་གྱི་ཕྱི་ནང་གསང་བའི་བྱ་བ་ཐམས་ཅད་སྤངས་ལ་གནས་པར་བྱ་སྟེ། དེ་ཉིད་ལས། རྒྱུ་འབྲས་མཚམས་སྦྱོར་བར་སྐབས་ཀུན། །ཆོས་སྤྱོད་དགུ་ཡི་སྤྲོས་པ་དོར། །རྒྱུད་ལ་ལྡན་ཀྱང་བླང་བྱ་མིན། །མཚན་མའི་གཡེང་བ་ཡིན་ཕྱིར་རོ། །ཞེས་སོ། །དེ་ལྟར་མུན་པའི་རྣལ་འབྱོར་ལ་གོམས་ནས་ཉིན་མོའི་ཚེ་སྔ་མ་བཞིན་དུ་འདུག་ལ་གང་དུའང་དྲན་བསམ་མ་བྲལ་བའི་ངང་དུ་བཞག་སྟེ། དེ་ལས། མི་དམིགས་ཤིན་ཏུ་མི་དམིགས་དང་། །རྗེས་སུ་མི་དམིགས་རིམ་པ་ཡིས། །མི་གནས་མི་རྟོག་རློམ་སེམས་མེད། །རྟོག་པའི་སྨྲ་བསམ་ཡུལ་ལས་འདས། །དེ་བཞིན་ཉིད་དབྱིངས་ཡེ་ཤེས་ཏེ། །དེ་ཉིད་རང་གསལ་མི་གཡོ་བ། །ཞི་གནས་ལྷག་མཐོང་ཟུང་དུ་འབྲེལ། །ཅེས་སོ། །དེའང་ཕྱི་གཟུང་བའི་ཡུལ། ནང་འཛིན་པའི་སེམས། བར་རང་གི་ལུས་ངག་དང་བཅས་པ་ལ་འཛིན་པ་མེད་པས་ཤིན་ཏུ་མི་དམིགས་པ་ལ་སོགས་པའོ། །དེའི་ཚེ་གང་དུའང་མི་རྟོག་པས་ཞི་གནས་ལ། གསལ་བས་ལྷག་མཐོང་སྟེ་ཟུང་དུ་འབྲེལ་བའོ། །དེ་ལྟར་ཟླ་བ་དྲུག་དང་། ལོ་གཅིག་དང་། ལོ་གཅིག་ཟླ་བ་གཉིས་སམ་བཞིར་བརྩོན་པ་བྱས་ན་སྟེང་གི་རླུང་རྒྱུ་བ་རགས་པ་རྣམས་འགགས་ཏེ། ཡེ་ཤེས་ཀྱི་རླུང་ལ་དབང་ཐོབ་ནས་རྣམ་སྨིན་དང་ཚེ་དབང་ཕྱག་རྒྱ་ཆེན་པོའི་རིག་འཛིན་གསུམ་རིམ་པས་ཐོབ་ཅིང་། ལོ་སྟོང་དྲུག་བརྒྱ་ནས་སངས་རྒྱས་ཀྱི་མཛད་པ་བསྒྲུབ་སྟེ། འདི་ལས། ཞག་ནི་སུམ་ཅུ་ཕྲག་ཕྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཞེས་སོ། །ཚུལ་འདི་འོད་གསལ་གྱིས་ཟག་མེད་འགྲུབ་པའི་དུས་ལ་སྦྱར་བ་ཡིན་ནོ། །དེའང་རྟགས་ནི་འོད་ལྔའི་སྣང་བ་སྣ་ཚོགས་དང་། ཐིག་ལེ་དང་། རིན་པོ་ཆེ་འབར་བ་འདྲ་བ་དང་། སྒྲ་གཅན་གྱི་དཀྱིལ་འཁོར་ལྟ་བུ་བཞི་སྣང་ངོ་། །འཇམ་དཔལ་མཚན་བརྗོད་ལས། འོད་བཟང་འབར་བ་དཔལ་གྱི་བེའུ། །ལག་ན་འོད་འབར་སྣང་བའོ། །ཞེས་པ་དང་། ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །གཟི་བརྗིད་ཕྲེང་བ་ལྟ་ན་སྡུག །ཅེས་པ་དང་། ཕལ་པོ་ཆེ་ལས། རིན་ཆེན་རྒྱ་མཚོ་འབྲེལ་བ་ཡིས། །འོད་ཀྱི་དཀྱིལ་འཁོར་རྣམ་པར་བཀྲ། །ལ་ལ་ནམ་མཁའི་དཀྱིལ་ན་གསལ། །ཞེས་སོ། །དཔལ་བེའུ་དང་རིན་ཅེན་ནི་སྙིང་གའོ། །རྒྱ་མཚོ་ནི་མིག་གོ། །འབྲེལ་བ་ནི་ཤར་བ་སྟེ་སྟོང་གཟུགས་ནམ་མཁར་སྣང་བའོ། །དེ་ལྟར་སྣང་བ་ནི་ཆོས་ཉིད་མངོན་སུམ་གྱི་སྣང་བའོ། །དེའི་ཚེ་ཚེའི་དུས་བྱས་ན་ཕྱི་མ་(༢༥༠)ལ་སངས་རྒྱས་ཀྱི་ཞིང་དག་པར་སྐྱེ་སྟེ་ཚེ་དབང་ཐོབ་ནས་འཚང་རྒྱའོ། །དེའི་ཡོན་ཏན་ནི་གསང་བའི་ཐིག་ལེ་ཞེས་པ་ལ་སོགས་པའོ། །དེ་ནས་གོམས་པས་འབྱུང་བ་ལྔའི་རླུང་རྒྱུ་བ་ཡེ་ཤེས་སུ་ནུབ་སྟེ། ཡེ་ཤེས་ལྔའི་རང་བཞིན་སྣང་བས་ཁྱབ་པ་ནི་ཉམས་གོང་འཕེལ་གྱི་སྣང་བའོ། །དེ་ནས་གོམས་པ་ལས་སངས་རྒྱས་ཀྱི་ཞིང་ཁམས་རིག་ལྔ་མཐོང་བ་ནི་རིག་པ་ཚད་ཕེབས་ཀྱི་སྣང་བ་སྟེ། རྒྱན་དུ་དཀྱིལ་འཁོར་མ་ལུས་ཐོགས་ཞེས་པའོ། །དེ་ནས་འབྱུང་བ་ལྔའི་རླུང་ཡེ་ཤེས་ལྔར་འཇུག་པའི་འཕེལ་ཟད་པས་སྣང་བ་ཐམས་ཅད་ནམ་མཁའ་སྤྲིན་མེད་པ་བཞིན་གྱུར་པ་ནི་ཆོས་ཉིད་ཟད་པའི་སྣང་བ་སྟེ་ལྷུན་གྲུབ་ཏུ་ཉེ་བའོ། །དེའང་སྣང་བ་དང་པོ་གཉིས་ནི་རྣམ་སྨིན་གྱི་རྟེན་ལ་མཐོང་ཞིང་། ཚད་ཕེབས་ནི་ཚེ་དབང་། ཟད་པ་ནི་ཕྱག་རྒྱའི་རིགས་འཛིན་ཏེ། དེ་དག་རྫོགས་ནས་སངས་རྒྱས་ཀྱི་ས་ལྷུན་གྱིས་གྲུབ་པའི་རིགས་འཛིན་འཐོབ་བོ། །ཚུལ་འདི་ལ་འཁྲུལ་ནས་ཁ་ཅིག་སྤྲུལ་སྐུ་ལོངས་སྐུ་གཉིས་འཁོར་ལོ་ཚོགས་ཆེན་དུ་འཇུག་པའི་འོག་ན་ཡོད་ཅེས་ཟེར་བ་ནི། ལམ་སྣང་གི་ལོངས་སྐུ་སྤྲུལ་སྐུ་དང་། མཐར་ཐུག་གི་ལོངས་སྤྲུལ་གཉིས་མ་ཕྱེད་པ་ཡིན་ནོ། །དེའང་སྣང་བ་དེ་དག་གི་ཚེ་སྣང་བ་དེར་འཛིན་མེད་པའི་ཡེ་ཤེས་ནང་གི་ཉམས་འཆར་ཏེ། ལམ་རིམ་ལས། མཐའ་དང་དབུས་ཀྱང་བརྟག་ཏུ་མེད། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་དེར་སྣང་ངོ་། །ཞེས་སོ། །སྣང་བ་དང་པོའི་ཚེ་སྒོ་གསུམ་ལྷུག་པར་གནས་པས་ལུས་བདེ་ངག་གསལ་སེམས་མི་རྟོག་པའི་དྲོད་གསུམ་དང་དབུགས་ཕྱི་ནང་དུ་རྒྱུ་བ་རགས་པ་ལ་དབང་ཐོབ་སྟེ། དེ་ཉིད་ལས། དེ་ལྟར་བྱ་བྱེད་མེད་བསྲིངས་ན། །ལུས་ངག་སེམས་ལ་དྲོད་འབྱུང་སྟེ། །བཟོད་པ་ཕྲ་མོ་ཐོབ་པ་དང་། །འགྱུ་བའི་དབུགས་ལ་དབང་ཐོབ་སྟེ། །དོན་ལ་རྣལ་དུ་ཕེབས་པ་དང་། །ངེས་པར་དྲོད་གསུམ་མྱོང་བའོ། །ཞེས་སོ། །དེའང་ཕྱི་རྟགས་སུ་འོད་དང་ཐིག་ལེའི་སྣང་བ་ནི་ཟད་པར་ཡི་གེའི་སྐྱེ་མཆེད་ཡིན་པས་མཐོང་བ་དང་། ནང་རྟགས་སུ་ལུས་ངག་ལ་བཟོད་པ་ཐོབ་པ་དང་། ཉོན་མོངས་པ་ལྔ་ཤས་ཆུང་དུ་འགྲོ་བ་དང་། ཏིང་ངེ་འཛིན་བརྟན་པ་དང་སྣང་བ་མཆེད་པ་སྟེ། དེ་ལས། དེ་ལའང་སྔ་མ་ཕྱི་ནང་སྟེ། །ཕྱི་རོལ་ཟད་པར་སྐྱེ་མཆེད་དངོས། །མཐོང་དང་པདྨོའི་འོད་སོགས་མཐོང་། །ནང་དུ་བཟོད་ཐོབ་བྱེ་བྲག་དང་། །ཆུ་ལྔ་རྒྱུན་ལམ་བགས་ཀྱིས་བཅད། །ཅེས་སོ། །རྨི་ལམ་དགེ་བའང་མཐོང་སྟེ། དེ་ལས། རྣལ་འབྱོར་གནས་པའི་རྨི་ལམ་ཡང་། །གཅེར་བུར་ཕྱུང་ཞིང་དྲི་མ་དག །ཅེས་སོ། །སྣང་བ་གཉིས་པའི་ཚེ་ཆོས་ཐམས་ཅད་སྒྱུ་མ་ལྟ་བུ་ལ་སོགས་པའི་རྣམ་པར་རྟོགས་ཤིང་སྣང་བ་ཆེར་མཆེད་(༢༥༡)པ་སྟེ། ལམ་རིམ་ལས། གཟུང་འཛིན་བྲལ་བའི་རིག་པ་ཉིད་། །ཡེ་ཤེས་སྒྱུ་མར་མི་གཡོ་གསལ། །ཆུ་དང་ཆུ་ཟླ་ཇི་བཞིན་དུ། །མཚུངས་པར་གསལ་བའི་ངོ་བོར་བརྗོད། །རྣམ་རྟོག་མཚན་མ་ཅི་སྐྱེས་ཀྱང་། །ཡེ་ཤེས་སྒྱུ་མར་རང་སྣང་ཕྱིར། །ཆགས་སྡང་རེ་དོགས་མི་འབྱུང་སྟེ། །ཡེ་ཤེས་སྒྱུ་མ་གཞན་དུ་མིན། །ཞེས་སོ། །དེའི་ཚེ་འགྲོ་བ་ལ་རང་དབང་མེད་པའི་སྙིང་རྗེ་འབྱུང་སྟེ། རྡོ་རྗེ་ལས། དེ་ལྟར་སྒྱུ་མ་ཐོབ་གོམས་པས། །འཁོར་བའི་ཆོས་ལ་ཚད་མེད་པའི། །བྱང་ཆུབ་སེམས་ཀྱིས་ཕྲོགས་པར་འགྱུར། །མ་འཁྲུལ་འཁྲུལ་ལ་ངོ་མཚར་སྐྱེ། །དོན་མེད་འདུག་ལ་དེ་བཞིན་ཏེ། །ཚེ་འདི་སྤྱོད་ཡུལ་ཐམས་ཅད་ཀུན། །རྨི་ལམ་དུ་འང་སྒྱུ་མར་མཐོང་། །ཞེས་སོ། །དེའི་ཚེ་ཡོན་ཏན་ཚད་མེད་པ་སྐྱེ་སྟེ། དེ་ལས། ཡོན་ཏན་ནམ་མཁའི་མཐའ་དང་མཉམ། །སྤྱོད་ཡུལ་སངས་རྒྱས་ཉིད་དང་གཅིག །རྒྱུ་སྤྱོད་བསོད་ནམས་ཚོགས་ཆེན་ལྡན། །དེ་ཉིད་མ་ཆགས་ཡེ་ཤེས་ཆེ། །རྣལ་འབྱོར་ཕྱི་མ་རྩོལ་བ་མེད། །ཅེས་སོ། །ཚེ་དབང་ཐོབ་པར་བྱེད་དོ། །རྨི་ལམ་ན་ཡང་སྒྱུ་མར་མཐོང་བས་ཆོས་ཐམས་ཅད་ལ་འཛིན་ཞེན་མེད་པའོ། །དེའི་ཚེ་ལུས་ཤིང་བལ་ལྟར་ཡང་བ་དང་། དབུགས་ཕྱི་ནང་དུ་རྒྱུ་བ་མི་ཚོར་བ་དང་། ཕྱི་ནང་གི་སྲིན་བུ་དང་ཤིག་སྲོ་མེད་པ་ལ་སོགས་པའི་རྟགས་དང་ལྡན་པའོ། །སྣང་བ་གསུམ་པ་ནི་སྣང་བ་ཐམས་ཅད་ལྷའི་དཀྱིལ་འཁོར་དུ་རང་སྣང་བ་སྟེ། ལམ་རིམ་ལས། ཕུང་སོགས་དཀྱིལ་འཁོར་ལྷར་སྣང་བ། །རྒྱ་མཚོ་དྭངས་པའི་གཟུགས་བརྙན་བཞིན། །ཀུན་དངོས་རང་རིག་ལྷར་གསལ་བ། །གཅིག་དང་དུ་མ་ཡོངས་ཀྱི་མེད། །གསལ་ལ་ཡུལ་མེད་མི་གཡོ་བ། །རྣལ་འབྱོར་ངོ་བོར་རྒྱལ་བས་གསུངས། །རང་བཞིན་སྤྲོས་དང་རྣལ་འབྱོར་སྤྲོས། །དེའང་གདུག་འདུལ་ཞི་ཁྲོར་སྤྲོས། །འཁོར་ལོ་སྤྲོས་དང་ཕྱག་རྒྱ་སྤྲོས། །ཚོམ་བུ་སྤྲོས་དང་དཀྱིལ་འཁོར་སྤྲོས། །ཀུན་ནས་སྤྲོས་ཕྱིར་འབྲས་བུ་སྤྲོས། །སྤྲོས་པ་ཉམས་གསལ་རྣལ་འབྱོར་སྒྲའོ། །ཞེས་སོ། །སྣང་བ་འདི་དག་སངས་རྒྱས་སྟོང་ལ་སོགས་པའི་དཀྱིལ་འཁོར་བསྒོམས་པ་ལས་ཀྱང་སྣང་ཞིང་། འོད་གསལ་བ་ལས་དངོས་སུ་སྣང་བའོ། །དེའི་ཚེ་རྟགས་ཀྱང་ཁྱད་པར་དུ་འཕགས་པ་སའི་བདེན་པ་མཐོང་བ་རྣམས་དང་། ཁྱད་པར་དུ་དེ་ལས། མངོན་ཤེས་དྲུག་དང་རྩ་ལྔ་རྫོགས། །རབ་འབྲིང་ཆ་ཡིས་ཡུལ་ཁམས་གླིང་། །ཚུན་ཆད་གསལ་ཞིང་འདུལ་བར་བྱེད། །ཅེས་སོ། །རྩ་ལྔ་ནི་སྐུ་གསུང་ཐུགས་ཡོན་ཏན་འཕྲིན་ལས་རེ་རེ་ལ་ལྔ་ལྔར་ཕྱེ་བའི་ཡེ་ཤེས་ཐོབ་པའོ། །གསལ་བ་ནི་ལྷའི་མིག་གིས་བར་དུ་ཆོད་ཀྱང་མཐོང་བའོ། །འདི་ནས་རྨི་ལམ་མེད་དོ། །སྣང་བ་བཞི་པའི་ཚེ་ལུས་དང་སྣང་བའི་རྒྱ་ལས་གྲོལ་ཏེ། རྡོ་རྗེ་ལས། ཡེ་ཤེས་སྐུ་ཡི་ཆ་ལུགས་(༢༥༢)ཅན། །འབྱུང་བ་རྡོ་རྗེའི་ལུས་ལས་གྲོལ། །ཞེས་སོ། །དེའང་སྔོན་གོམས་པ་ལས་འབད་མེད་ལྷུན་གྱིས་གྲུབ་སྟེ། དེ་ལས། རང་གི་མི་གཡོ་མཐོང་གོམས་དང་། །དོན་དུ་གཉེར་རིམ་བརྩལ་བ་ཡིས། །ལམ་ཀུན་རྫོགས་པའི་སྟོབས་ཕྱིན་ཅིང་། །རྣལ་འབྱོར་ལ་ནས་ལྷུན་གྱིས་གྲུབ། །ལྷན་ཅིག་གནས་པའི་དྲི་མ་དག །ཅེས་སོ། །དེའི་ཡོན་ཏན་ཡང་ལམ་རིམ་ལས། མཉམ་པར་བཞག་ལས་མ་གཡོས་ཤིང་། །སྟོང་གི་འཇིག་རྟེན་བརྒྱ་སྟོང་ཕྲག །བཅུ་ཡི་རྡུལ་སྙེད་འཇིག་རྟེན་དང་། །ཞིང་གྲངས་མེད་པ་བརྒྱ་སྟོང་ཕྲག །བཅུ་ཡི་རྡུལ་སྙེད་ཞིང་ཁམས་སུ། །རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །དེ་ལྟར་སྣང་བ་བཞི་མཐར་ཕྱིན་ནས་འབྲས་བུ་སངས་རྒྱས་ཀྱི་ས་མཆོག་གསུམ་ལྷུན་གྱིས་གྲུབ་བོ། །དེའི་ཚེ་ཡོན་ཏན་ནི་ཉི་ཤུ་རྩ་ལྔར་གནས་པའི་དང་པོ་སྐུ་ལྔ་ནི། ཆོས་སྐུ་སྤྲོས་པ་དང་བྲལ་བ། ལོངས་སྐུ་འོད་གསལ་ཆེན་པོ། སྤྲུལ་སྐུ་ངེས་མེད་སྣ་ཚོགས། མངོན་བྱང་སྤང་རྟོགས་མཐར་ཕྱིན། རྡོ་རྗེ་མི་འགྱུར་ཆེན་པོ་སྟེ། ལམ་རིམ་ལས། ཆོས་དང་ལོངས་སྤྱོད་སྣ་ཚོགས་སྤྲུལ། །མངོན་བྱང་རྡོ་རྗེའི་རང་བཞིན་སྐུ། །ཞེས་སོ། །གསུང་ལྔ་ནི། ཆོས་སྐུའི་གསུང་བརྗོད་མེད་ཆེན་པོ་ནི། དེ་ལས། མ་སྐྱེས་དོན་གྱི་གསུང་མཆོག་གིས། །སྨྲ་བརྗོད་མེད་པར་གོ་བར་མཛད། །ཅེས་སོ། །ལོངས་སྐུའི་གསུང་འགག་མེད་རང་གསལ་ནི་མེ་ལོང་ལྟ་བུ་སྟེ། དེ་ལས། མེ་ལོང་ལྟ་བུར་ཆོས་བརྒྱད་ཀྱིས། །མཚོན་པའི་དབང་ཕྱུག་སྐུ་མཐོང་བས། །བྱང་ཆུབ་སེམས་དཔའ་སེམས་དཔའ་ཆེའི། །རྒྱུད་ལ་རྡོ་རྗེའི་དོན་སྣང་བྱེད། །ཅེས་སོ། །སྤྲུལ་སྐུའི་གསུང་ཡན་ལག་དྲུག་ཅུ་ནི། དེ་ལས། དྲུག་ནི་རྩ་བ་ཡན་ལག་ཚུལ། །ཚངས་པའི་ངག་ལྟར་ལས་ཅན་ལ། །སྣང་བ་ཤ་ཡི་རྣ་བས་ཐོས། །ཞེས་སོ། །མངོན་བྱང་གི་གསུང་ཡེ་ཤེས་རང་གསལ་ནི། ཡང་དེ་ལས། རིག་པའི་ཡེ་ཤེས་མིང་ལྔ་ཡང་། །ཡི་གེ་ཕྲེང་བའི་བྱིན་རླབས་ཀྱིས། །རང་བཞིན་གསང་བའི་རྒྱུད་རྣམས་ཀུན། །ཉི་མ་ལྟ་བུར་གསལ་བར་སྣང་། །ཞེས་སོ། །
རྡོ་རྗེའི་གསུང་གྲགས་སྟོང་དབྱེར་མེད་ནི། དེ་ལས། སྒྲ་ལྟར་གྲགས་དང་དབྱེར་མེད་པར། །མཐོང་ཐོས་བྱེད་པའང་དེ་ཉིད་མཐུས། །ཞེས་སོ། །དེའང་རང་སྣང་ལོངས་སྐུ་ནི་སྐབས་འདིར་ཆོས་ཀྱི་སྐུའི་ཁོངས་སུ་བསྡུས་ཏེ་སངས་རྒྱས་ཉིད་ཀྱི་སྤྱོད་ཡུལ་འབའ་ཞིག་ཡིན་པའི་ཕྱིར་རོ། །ཐུགས་ལྔའི་དང་པོ་དངོས་པོ་མེད་པར་གསལ་བ་སྟོང་པ་ཉིད་ཀྱི་ཡེ་ཤེས་ནི། རྡོ་རྗེ་ལས། ནམ་མཁའ་ལྟ་བུར་ཡེ་གསལ་སྟོང་། །ཞེས་སོ། །རྟོག་པ་མེད་པར་གསལ་བ་མེ་ལོང་ལྟ་བུའི་ཡེ་ཤེས་ནི། ཡུལ་མེད་མེ་ལོང་ལྟར་གསལ་བ། །ཞེས་སོ། །བཟང་ངན་མེད་པར་གསལ་(༢༥༣)བ་མཉམ་པ་ཉིད་ཀྱི་ཡེ་ཤེས་ནི། མི་ཕྱེད་བླང་དོར་མེད་མཉམ་ཞིང་། །ཞེས་སོ། །ཆོས་སྤྱི་དང་མཚན་ཉིད་མ་འདྲེས་པར་གསལ་བ་སོ་སོར་རྟོག་པའི་ཡེ་ཤེས་ནི། ཉིད་ཀྱི་དབྱིངས་ལས་མི་གཞན་ཕྱིར། །ཤེས་དང་རང་སྤྱི་དབྱེར་མེད་གསལ། །ཞེས་སོ། །བདག་གཞན་གྱི་བྱ་བ་རྩོལ་མེད་དུ་བསྒྲུབ་པ་བྱ་བ་ནན་ཏན་གྱི་ཡེ་ཤེས་ནི། དོན་གཉིས་ལྷུན་རྫོགས་བྱ་བ་གྲུབ། །ཅེས་སོ། །དེ་དག་ནི་སྐུ་ལྔའི་ཐུགས་སོ། །ཡོན་ཏན་ལྔ་ནི་རིག་པ་ཞིང་ཁམས་རྣམ་དག་རྒྱ་དང་བྲལ་བའི་རང་བཞིན་ཆོས་ཀྱི་དབྱིངས་ཀུན་ཁྱབ་པར་སྣང་སྟེ། རང་རྒྱུད་མེད་པར་རིག་སྣང་བ། །སེམས་ཀྱི་ཡིད་བཞིན་སྤྲིན་ཚོགས་ཀྱི། །ཕྱོགས་བཅུ་མ་ལུས་སངས་རྒྱས་ཞིང་། །ཞེས་སོ། །རིག་པ་གཞལ་ཡས་ཁང་དུ་སྣང་སྟེ། ལྷུན་རྫོགས་རིག་པ་རང་སྣང་བ། །གཞལ་ཡས་ཁང་དང་གཟུང་དང་འཛིན། །བྲལ་བའི་རང་བཞིན་རྟེན་པ་དང་། །བརྟེན་ཅན་མིན་པ་ཀུན་གྱི་གནས། །ཞེས་སོ། །རིག་པ་འོད་ཟེར་དུ་སྣང་སྟེ། རང་བཞིན་མ་བསྒྲིབས་གསལ་བའི་ཕྱིར། །སྣ་ཚོགས་འོད་ཟེར་ཕྱོགས་བཅུར་གསལ། །ཞེས་སོ། །རིག་པ་ཉིད་གདན་ཁྲིར་སྣང་སྟེ། སྟོབས་སོགས་འབྲས་བུ་ཀུན་རྫོགས་ཕྱིར། །གདན་ལྔའི་བྱེ་བྲག་སྣང་བའོ། །ཞེས་སོ། །རིག་པ་ཉིད་རྒྱན་དུ་སྣང་སྟེ། མ་སྤངས་ལྷུན་གྱིས་རྫོགས་པའི་ཕྱིར། །སྣ་(༢༥༣)ཚོགས་དཀྱིལ་འཁོར་ཆེན་པོའི་རྒྱན། །ཞེས་སོ། །དེ་དག་ལྷུན་སྟུག་པོ་བཀོད་པའི་ཞིང་ངོ་། །འཕྲིན་ལས་ལྔ་ནི་མཛད་པ་ལྔ་སྟེ། གདུལ་བྱའི་རྒྱུད་མཉེན་ཞིང་ཞི་བར་མཛད་པ་དང་། ཆོས་དང་ཟང་ཟིང་གིས་སེམས་ཅན་ཚིམ་ཞིང་རྒྱས་པར་མཛད་པ་དང་། འགྲོ་བ་དབང་དུ་མཛད་པ་དང་། གདུག་པ་ཅན་རྣམས་མངོན་སྤྱོད་དྲག་པོས་ཚར་གཅོད་པ་དང་། རིགས་ཐམས་ཅད་ཀྱི་བདག་པོས་ཕྱོགས་དང་རིས་ཐམས་ཅད་དུ་ཉེ་རིང་མེད་པར་ལྷུན་གྱིས་གྲུབ་པའི་ཕྲིན་ལས་ཏེ། གདུལ་བའི་བྱ་བ་ཐ་དད་པས། །ཞི་དང་ཁྲོ་དང་མ་མོས་ཉམས། །ཞི་ཕྱིར་རྣམ་བཞི་རོལ་པ་རྣམས། །གང་ལ་འཚམ་པར་འདུལ་བར་མཛད། །དེ་ཉིད་རིགས་བཞིའི་ཆ་འཛིན་པ། །ལས་ཀྱི་རིགས་ལ་ལྷུན་གྱིས་གྲུབ། །ཅེས་སོ། །
ཚུལ་འདི་ནི་རྒྱུད་འདི་ཡི་ཤིན་ཏུ་གསང་བ་གབ་ཅིང་སྦས་པའི་བརྗོད་བྱ་སྟེ། སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པའི་འོད་གསལ་རིན་པོ་ཆེའི་སྒྲོན་མ་ལས་འབྱུང་བ་ལྟར་བཀོད་པ་ཡིན་ནོ། །སློབ་དཔོན་ཆེན་པོ་བི་མ་ལ་མི་ཏྲའི་འདའ་ཀ་མའི་གདམས་ངག་དང་སྦྱར་ན། དེ་ལྟར་བསྒོམས་པའི་དབང་པོ་ཐ་མ་རྣམ་སྨིན་གྱི་བར་དོར་གྲོལ་བར་བྱ་བའི་ཕྱིར། འཆི་ཁར་བསྐྱེད་རིམ་ལྷའི་དཀྱིལ་འཁོར་དང་། རྫོགས་རིམ་སྤྲོས་པ་མེད་པའི་ངང་ལས་མ་ཡེངས་(༢༥༤)པར་བྱས་པས། བར་དོར་ལྷའི་སྐུར་འཚང་རྒྱ་བར་བྱེད་དོ། །དབང་པོ་དམན་པ་རྣམ་སྨིན་མ་ཐོབ་པ་རྣམས་ནི། སྙིང་གའི་འོད་གསལ་ལ་སེམས་བཟུང་སྟེ་འོད་ཀྱི་གོང་བུ་དག་པའི་ཞིང་དུ་ཉི་ཟླའི་རླུང་འཕོ་བ་དང་མཉམ་དུ་འཕངས་པས་ཕྱི་མ་དེ་ལ་རྣམ་སྨིན་ནམ་ཚེ་དབང་ཐོབ་ནས་དག་པའི་ཞིང་དུ་འཚང་རྒྱ་བར་བཤད་དོ། །ཡང་ཁ་ཅིག་བར་དོར་ཞི་ཁྲོའི་དཀྱིལ་འཁོར་ཤར་བ་ལ་རང་ངོ་ཤེས་པས་གྲོལ་བར་ཡོད་པ་ཡང་གསུངས་ཏེ། ཕྱག་རྒྱའི་རིག་འཛིན་ལྷུན་གྲུབ་ཐོབ་ནས་དེ་ཉིད་དུ་གྲོལ་བར་ངེས་སོ། །དེ་བས་ན་ལེའུ་འདིའི་བརྗོད་བྱའི་དངོས་གཞི་ནི་འོད་གསལ་གྱི་དོན་ལ་འཇུག་པས་ཤིན་ཏུ་ཟབ་ཅིང་རྒྱ་ཆེ་བ་ཡིན་ནོ། །དེ་དག་གིས་སྤྱིའི་དོན་བཤད་ཟིན་ཏོ། །
གཉིས་པ་གཞུང་གི་དོན་ལ་གསུམ་ལས། དང་པོ་གཞི་འོད་གསལ་གྱི་རང་བཞིན་ངོས་གཟུང་བ་ནི་འཁོར་ལོ་བཞི་དང་ཁྱད་པར་སྙིང་ག་ན་གནས་པ་འོད་གསལ་གས༵ང་བའི༵་ཐིག༵་ལེ༵་སྐུ་དང་ཡེ་ཤེས་ཀྱི་དཀྱིལ་འཁོར་ནི་ལྷུན་གྱིས་གྲུབ་པའི་དེ་བཞིན་ཉིད་ཀྱི་ཆོས་དབྱི༵ངས་འོག་མིན་སྟུག་པོ་བཀོད་པའི་རང་བཞིན་དུ་གནས་པ་དེ༵་ནི༵་ཡེ་ནས་སངས༵་རྒྱས༵་ཀུན༵་གྱི༵་དངོ༵ས་པོར་ལྷུན་གྱིས་གྲུབ་པས་སྐུ་གསུམ་རང་ལ་གནས་པ་ཞེས་བྱའོ། །དེ་ལས་ལོངས་སྤྲུལ་མངོན་པར་སྣང་བའི་གཞི་བྱེད་པའོ། །
གཉིས་པ་ལམ་ཡེ་ཤེས་ཀྱི་སྣང་བ་ངོས་བཟུང་བ་ནི་དེ་ལྟ་བུའི་དཀྱིལ་འཁོར་བསྒོམས་པས་ཏིང་ངེ་འཛིན་གྱི་སྣང་ཡུལ་འོད་དང་ཐིག་ལེ་ལ་སོགས་པ་རྟགས་བཅུའི་རང་བཞིན་མཐོང་བ་ནི། ཕྱོག༵ས་བཅུ༵་དུས༵་བཞི༵ར་མངོན༵་པར་རྫོག༵ས་པ༵ར་སངས་རྒྱས་པའི་སངས་རྒྱས་ཐམས་ཅད་ཀྱི་སྐུ༵་དང་གསུང༵་དང་ཡོན༵་ཏན༵་དང་འཕྲིན༵་ལ༵ས་དང་ཐུག༵ས་ཀྱི་དཀྱིལ་འཁོར་མ༵་ལུས༵་པའི་བད༵ག་ཉིད༵་ཀྱི་ཞལ༵་མཐོང༵་བ༵་ཡིན༵་ཏེ། རྒྱས་པ་ལས། མཚན་མ་མེད་པའི་དོན་མཐོང་ན། །སངས་རྒྱས་ཀུན་གྱི་དཀྱིལ་འཁོར་མཐོང་། །ཞེས་པ་དང་། ཆོས་གཅིག་མཐོང་བས་ཀུན་མཐོང་བ་དང་། སངས་རྒྱས་མཐར་ཐུག་ཆོས་སྐུར་བཤད་པ་དང་། སྐྱེ་མེད་ཀྱི་དོན་ལ་གོམས་པས་སངས་རྒྱས་ཀྱི་ཞལ་མཐོང་བར་གསུངས་པའི་ཚུལ་གྱིས་སེམས་ཉིད་རང་བཞིན་གྱིས་དག་པའི་སངས་རྒྱས་ལ་ཏིང་ངེ་འཛིན་གྱིས་དབང༵་སྒྱུར༵་བ་དེ་ཉིད་ཆོས་ཐམས་ཅད་ཀྱི་མཆོ༵ག་ཉིད༵་ཀྱི་དམ༵་པ༵་ཡི༵ན་ཏེ། གནས་ལུགས་མཐར་ཐུག་གི་དོན་བསྒོམས་པ་ཡིན་པའི་ཕྱིར་རོ། །ཡེ་ཤེས་དམ་པ་ལས། ངང་གིས་མི་གཡོ་ཏིང་འཛིན་མཆོག །ཆོས་རྣམས་ཀུན་གྱི་སྙིང་པོ་འོ། །ཞེས་སོ། །དེ་ལྟར་བསྒོམས་པའི་ཚེ་རང་བཞིན་གྱི་དཀྱིལ་འཁོར་དང་ཏིང་ངེ་འཛིན་བསྐྱེད་པའི་དཀྱི༵ལ་འཁོ༵ར་ལ༵་གནས༵་པ་དེས་རང་སྣང་འོད་གསལ་གྱི་དཀྱི༵ལ་འཁོར༵་བསྒོམ་པ་ཉིད༵་ཤེས་རབ་རྫོག༵ས་པའི༵་རིམ་པ་ཡེ་ཤེས་ཆེན་(༢༥༥)པོའི་དཀྱི༵ལ་འཁོ༵ར་དུ་ལྷུན༵་གྱིས༵་གྲུབ༵་པས་ལམ་གོང་ནས་གོང་གི་ཡོན་ཏན་རྫོགས་པར་མངོན་དུ་བྱེད་དོ། །ཁྱད་པར་རང་སྣང་རིགས་ལྔའི་ཞིང་དུ་གྱུར་པ་དེའི་ཚེ་ཕྱི་དང་ནང་གི་རྩ་གནས་འཁོར་ལོ་ཐམས་ཅད་ན་ཡེ་ཤེས་ཀྱི་རང་བཞིན་རིག་པའི་རྒྱན༵་དུ༵་ལྷ་སོ་སོའི་དཀྱི༵ལ་འཁོ༵ར་མ༵་ལུས༵་པ་ཐོ༵གས་ཏེ། ཡོན་ཏན་བརྒྱ་ཕྲག་བཅུ་ལ་སོགས་པས་མཛེས་སོ། །དེ་ནས་དེ་དག་གི་འཛིན་པ་ཐམས་ཅད་ཟད་པ་ན་ས་དང་ལམ་གྱི་རང་བཞིན་ཡེ་ནས་དག་པའི་ཆོས་ཉིད་ཟད་པ་ལ་ཐུག་གོ། །
གསུམ་པ། འབྲས་བུ་ནི་ལོངས་སྤྱོད་རྫོ༵གས་པའི༵་དཀྱིལ༵་འཁོ༵ར་ཆོས་སྐུའི་དཀྱིལ་འཁོར་དང་གཉིས་སུ་མེད་པར་མཉ༵མ་པར་སྦྱོར༵་བ༵་ལ༵ས་ཐུག༵ས་རྗེ༵་སྤྲུལ་པའི་དཀྱི༵ལ་འཁོ༵ར་མ་ལུས་པ་ལྷུན་གྲུབ་ཆེན་པོར་ཡོང༵ས་ཀྱིས༵་འབྱུང༵་ཞིང་། དེའི་མཐུས་ཕྱོག༵ས་བཅུ་དུས༵་བཞིའི་འཇིག་རྟེན་དྲུག་གི་དཀྱི༵ལ་འཁོ༵ར་མ་ལུས་པ་འདུལ༵་བ༵འི་མགོ༵ན་དུ་གྱུར་པ་སྟེ། ཐུབ་པ་དྲུག་ལ་སོགས་པའི་རང་བཞིན་དུ་སྣང་བས་སེམས་ཅན་སྒྱུ༵་མ༵་ལྟ་བུའི༵་དཀྱི༵ལ་འཁོ༵ར་མ་ལུས་པ་ཐམས་ཅད་འཁོར་བའི་རྒྱ་མཚོ་ཆེན་པོ་ལས་སྒྲོལ༵་བའི་འཕྲིན་ལས་ཕུན་སུམ་ཚོགས་པ་མཛད་པ༵་ཡི༵ས་གང་ལ་གང་འདུལ་དུ་སྣང་ཡང་། སྣང་དུས་ཉིད་ནས་བསྒྲལ་བར་བྱ༵་བའི་སེམས་ཅན་རང་མཚན་པ་དང་སྒྲོལ་བར་བྱེ༵ད་པའི་སྤྲུལ་སྐུ་བདེན་པར་མེད༵་པའི༵་ཚུལ་གྱིས་གདུལ་བྱ་དང་འདུལ་བྱེད་ཀྱི་དཀྱི༵ལ་འཁོ༵ར་གཟུགས་བརྙན་དང་སྤྲུལ་པ་ལྟ་བུར་སྤྱོད༵་པ་འཐོབ་པའོ། །དེ་སྐད་དུའང་སྒྱུ་འཕྲུལ་དྲྭ་བ་ལས། སེམས་ཅན་སྒྱུ་མ་ལྟ་བུའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་སོགས་ལ་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པ་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། །བྱུང་བའི་ཚོགས་ཀྱིས་བགོས་པའི་སེམས། །སེམས་ཅན་རྣམས་ཀྱིས་བསམ་པ་ལ། །བླ་མེད་བྱང་ཆུབ་སྣང་བར་བྱེད། །ཅེས་སོ། །
གསུམ་པ་དོན་བསྡུ་བ་ནི། ཆོས་ཐམས་ཅད་ཡེ་ནས་སྐུ་དང་ཡེ༵་ཤེ༵ས་སུ་རྫོག༵ས་པ༵འི་དཀྱི༵ལ་འཁོ༵ར་དུ་གནས་པ་ལ༵། དེ་ལྟར་ཤེས་པར་བྱེད་པའི་ཐོས༵་པ་དང་དེའི་དོན་སེམས་ཀྱིས་དཔྱོད་པའི་བས༵མ་པ་དང་། དེ་ཐོག་ཏུ་སྒོམ༵་པར་བྱེད་པའི༵་རང་བཞིན་ཐབས་བསྐྱེད་པ་དང་ཤེས་རབ་རྫོགས་པའི་རིམ་པ་མཉ༵མ་པར་སྦྱོར༵་བའི་དོན་གྱིས༵་བསྒྲུབས་པའི་འབྲས་བུ་རང༵་བྱུང༵་གི་ཡེ་ཤེས་གདུལ་བྱའི་དོན་ལ་ཐུགས་རྗེ་ཆེན་པོས་ཀུན༵་ནས་ངོམ༵་པར་མཛད་པའི་འཕྲིན་ལས་དང་བཅས་པ་ལྷུན༵་གྱིས༵་གྲུབ༵་པར་འཐོབ་པའོ། །དེ་ལྟ་བུའི་ཚུལ་ཕུན་སུམ་ཚོགས་པ་(༢༥༦)འདི༵་ནི༵་སང༵ས་རྒྱས༵་ཐམ༵ས་ཅད༵་ཀྱིས༵་བསླུ་བ་མེད་པའི་ཆོས་སུ་ཞལ་གྱིས་བཞེས་ཤིང་ལམ་བསྐྱེད་རྫོགས་གཉིས་སུ་མེད་པར་བསྒོམས་པས་འབྲས་བུ་སངས་རྒྱས་འགྲུབ་པའི་རང་བཞིན་ལས་འདའ༵་བར༵་མི༵་མཛ༵ད་པའི་དམ༵་ཚིག༵་གི་མཆོ༵ག་ཏུ་བསྟན་པ་ཡིན་ནོ། །
གཉིས་པ་དེ་གཞན་ལས་ཁྱད་པར་འཕགས་པའི་ཚུལ་ལ་གསུམ་ལས། སྒྲུབ་པོ་གང་ཟག་གི་ཆེ་བ་ནི། རྣལ་འབྱོར་པ་གང༵་ཞིག༵་ཐེག་པ་འདི༵་ལ༵་མོས༵་པར་གྱུར༵་པ༵་ཙམ་ཡང་ཕྱོགས་བཅུའི་སངས༵་རྒྱས༵་ཐམས་ཅད་ཀྱི་དཀྱི༵ལ་འཁོ༵ར་ཐམ༵ས་ཅ༵ད་ཀྱིས༵་རང་རང་བཞུགས་པའི་ཕྱོག༵ས་དང་དུས༵་མ་ལུས་པ་ཀུན༵་ནས༵་དུས་དང་རྣམ་པ་ཐམ༵ས་ཅ༵ད་དུ༵་གསང་ཆེན་དོན་གྱི་དཀྱི༵ལ་འཁོ༵ར་མ༵་ལུས༵་པ་ཐམས་ཅད་རྒྱུད་ལ་བསྙེ༵ན་པ༵་སྟེ་མྱུར་དུ་ཐོབ་པ་ཡི༵་རང་བཞིན་རྨད་དུ་བྱུང་བའི་གསང་བ་ལ་ཉེ༵་བའི༵་སྲས༵་སུ༵་དགོ༵ངས་བར༵་འགྱུ༵ར་རོ། །དཔེར་ན་འཁོར་ལོས་སྒྱུར་བའི་རྒྱལ་པོ་ལ་བུ་སྟོང་ཡོད་ཀྱང་མཚན་དང་ལྡན་པ་དེ་བུའི་དམ་པར་འཛིན་པ་བཞིན་དུ་ཉན་རང་དང་རྒྱུ་ལ་གནས་པའི་བྱང་ཆུབ་སེམས་དཔའ་རྣམས་ཉེ་བའི་སྲས་མ་ཡིན་ཏེ། དེ་དག་གིས་སངས་རྒྱས་ཀྱི་དགོངས་པ་རང་བཞིན་གསང་བའི་སྙིང་པོ་ཐོས་པ་ལ་སོགས་པའི་སྤྱོད་ཡུལ་དུ་མ་གྱུར་པའི་ཕྱིར་རོ། །
གཉིས་པ་སྒྲུབ་ཐབས་ལམ་གྱི་ཆེ་བ་ལ་བཞི་ལས། ལམ་ཀུན་གྱི་འབྲས་བུ་ཡིན་པའི་ཆེ་བ་ནི། དུས་ཀྱི་ཡུན་བསྐ༵ལ་པ༵་སངས་རྒྱས་ཀྱི་ཞིང༵་གི༵་རྡུལ༵་ཕྲ་བ་སྙེད༵་དུ༵་རྒྱུའི་ཐེག་པ་སྣ་ཚོགས་ལ་ཤིན༵་ཏུ༵་སྦྱང༵ས་ཏེ་དེ་ལ༵་རབ༵་ཏུ་གན༵ས་པར་བྱས་ཤིང༵་བརྩོན་པ་དང་། གསང་སྔགས་ཀྱི་ཐེག་པའི་སྒོ་ནས་ཕྱི་ནང་གི་དཀྱི༵ལ་འཁོ༵ར་མ༵་ལུས༵་པ་བསྙེ༵ན་ཅིང་བསྒྲུབ་པ༵་དེ་ཐམས་ཅད་ཀྱི་དོན་དུ་གཉེར་བྱ་ཡི༵་འབྲས༵་བུ༵་གསང༵་ཆེན༵་ཨ་ཏི་ཡོ་གའི་ཐེག་པ་འདི༵་ཡིན༵་ཏེ༵། འཚང་རྒྱ་བ་ལ་ཐམས་ཅད་ལམ་འདི་ལ་རག་ལུས་པའི་ཕྱིར་རོ། །
གཉིས་པ་རྒྱལ་བ་ཀུན་གྱི་གཤེགས་ཤུལ་ཡིན་པར་བསྟན་པ་ནི། སྣྲེལ་གཞི་དང་སྟེང་འོག་ལ་སོགས་པའི་འཇིག༵་རྟེན༵་དྲུག༵་གི་ཕྱོག༵ས་བཅུ༵་ན༵་སྔར་འདས༵་པ་དང༵་ད༵་ལྟར༵་བྱུང༵་ནས་འགྲོ་བའི༵་དོན་མཛད་པ་ཡི༵་རྒྱལ༵་བ༵འི་དཀྱིལ༵་འཁོ༵ར་མ༵་ལུས༵་པ༵་ཐམས་ཅད་ཀྱང་ལམ་འདི་ལ་མངའ་བརྙེས༵་ནས༵་སྐུ༵་ལྔ༵་ལྷུན༵་གྱིས༵་རྫོག༵ས་ཏེ། དུས་གསུམ་གྱི་སངས་རྒྱས་ཐམས་ཅད་བགྲོད་ལམ་གཅིག་པུ་འདི་ལས་གཞན་མེད་པའི་ཕྱིར་རོ། །དེའང་རྒྱུའི་ཐེག་པས་བགྲོད་ཀྱང་འབྲས་བུའི་ཐེག་པར་འཇུག་དགོས་ཏེ། སངས་རྒྱས་འབྲས་བུའི་ཐེག་པ་ལས་འབྱུང་བའི་ཕྱིར་ཏེ། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པས་འགྲུབ་བོ། །
གསུམ་པ་རྣལ་འབྱོར་པ་ཀུན་གྱི་ལམ་ཡིན་པར་བསྟན་པ་ནི། སྔར་དང་(༢༥༧)ད་ལྟར་བྱུང༵་བའི་རྣལ་འབྱོར་པ་ཀུན་དང༵་མ༵་འོང༵ས་པ་ན་འབྱུང་བའི་རིག་འཛིན་གྱི་རྣལ་འབྱོར་པ་ཐམ༵ས་ཅ༵ད་ཀུན༵་ལམ་འདི༵་ཡིས༵་ལྷུན༵་གྱིས༵་གྲུབ༵་པའི་རིག་འཛིན་སངས་རྒྱས་ཀྱི་ས་འགྲུབ༵་པར༵་འགྱུར༵་ཏེ། དུས་གསུམ་གྱི་སངས་རྒྱས་ཐམས་ཅད་ཀྱི་ལམ་ལ་ཐ་དད་མེད་པའི་ཕྱིར་རོ། །རྣལ་འབྱོར་གྱི་རྒྱུད་ལས་ཀྱང་། སྐུ་གསུང་ཐུགས་ཀྱི་རྡོ་རྗེ་ཆེ། །དུས་གསུམ་བཞུགས་པའི་སངས་རྒྱས་རྣམས། །རྡོ་རྗེ་གསང་སྔགས་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །ཞེས་སོ། །
བཞི་པ་རྒྱུའི་ཐེག་པ་ལས་ཁྱད་པར་འཕགས་པའི་ཚུལ་ནི། རྫོགས་པ་ཆེན་པོ་ཨ་ཏི་ཡོ་གའི་ཚུལ་འདི༵་ནི༵་ཐེག་པ་འོག་མ་ལ་མ་གྲགས་པའི་གསང༵་ཆེན༵་འབྲས་བུ་མངོན་དུ་བྱེད་ངེས༵་པ༵་ཡི༵་མན་ངག་ཚེ་འདི་ཉིད་ལ་འབྲ༵ས་བུའི༵་ངོ་བོ་ཡེ་ནས་སངས་རྒྱས་པའི་དཀྱིལ་འཁོར་ལམ༵་དུ༵་བྱས་པས་གཞན་ནས་བསྒྲུབ་མ་དགོས་པར་རང་ཆས་སུ་གྲུབ་པའི་སངས་རྒྱས་ཉེ་ལམ་འདིས་མངོན་དུ་གྱུར༵་པ༵་ཡིན༵་ཏེ། རྡོ་རྗེ་རྩེ་མོ་ལས། སོ་སོ་སྐྱེ་བོས་སངས་རྒྱས་ཉིད། །འགྲུབ་པར་འགྱུར་ཏེ་གཞན་དུ་མིན། །ཞེས་སོ། །
གསུམ་པ་དེ་ལས་མཆོག་ཏུ་གྱུར་པའི་ལམ་གཞན་མེད་པར་བསྟན་པ་ནི། ཕྱོགས་བཅུ་དུས་བཞིའི་རྒྱལ༵་བ་སྔ་ཕྱིར་གཤེགས་ཤིང་ད་ལྟར་བཞུགས་པའི༵་དཀྱིལ༵་འཁོར༵་སྲས་དང་བཅས་པ་མ༵་ལུས༵་པ་ཐམས་ཅད་ལ༵་ཨ་ཏིའི་ཐེག་པ་ཡེ་གྲོལ་ལྷུན་གྱིས་རྫོགས་པ་འདི༵་ལ༵ས་གཞན་གྱི་ཉེ་ལམ༵་གས༵ང་བ༵འི་ངེས༵་དོན༵་ཅུང་ཟད་ཀྱང་མེད༵་དེ། དེ་བས་བཟང་བའི་ཆོས་གཞན་མེད་པའི་ཕྱིར་རོ། །གལ་ཏེ་ཡོད་ན་སངས་རྒྱས་ཀྱིས་བཙལ་བས་རྙེད་པར་རིགས་པ་ལ་གཞན་དུ་བཙལ༵་ཀྱང༵་རྒྱལ༵་བ༵ས་དེ་ལས་བཟང་བའི་ཆོས་ནམ་ཡང་མི༵་བརྙེས༵་སོ༵་ཏེ་མི་རྙེད་པའི་དོན་ཏོ། །འདིར་གསང་སྔགས་འབྲས་བུ་ལམ་དུ་བྱེད་པའི་དོན་ཡང་འགྲོ་བའི་སེམས་དང་དབང་པོ་ལ་སོགས་པ་ཡེ་ནས་སངས་རྒྱས་པ་ཉིད་མཐར་ཐུག་གི་འབྲས་བུ་ཐོབ་དུས་ནའང་དེ་ཐོག་ཏུ་ཕྱིན་པ་ལས་གཞན་མེད་པས་དེ་སྐད་ཅེས་བྱ་སྟེ། རྒྱ་མཚོ་ལས། དཔག་བསམ་ཤིང་དང་རིན་ཅེན་ལྟར། །དེ་ཀུན་ངོ་བོ་ཉིད་རྒྱུར་གནས། །འཇིག་རྟེན་བརྟན་གཡོ་ལ་སོགས་པ། །སྣང་བ་ཉིད་ན་ངོ་བོ་མེད། །དེ་ཉིད་ཆོས་སྐུ་ཆེན་པོ་ཡིན། །རང་བཞིན་ངང་གིས་དེ་ལྟར་གནས། །དེ་ལས་གཞན་པའི་ཐོབ་བྱ་མེད། །ཀུན་ཀྱང་སྨིན་ཟིན་བགྲོད་དུ་མེད། །དེ་ཉིད་ལམ་གྱི་ངོ་བོ་སྟེ། །ཞེས་སོ། །འོ་ན་འབྲས་བུ་ཡིན་ན་གདོད་བསྐྱེད་རྫོགས་ལ་སོགས་པས་ཅི་བྱ་སྙམ་ན། དེ་ལྟར་གནས་པ་དེ་མཐར་ཐུག་གི་བགྲོད་བྱའི་ཆ་ནས་འབྲས་བུར་བཞག་ཅིང་། དེའི་ངོ་བོ་མ་རིག་པས་བསྒྲིབས་ཏེ་ཡིན་ཡང་ཕྱིན་ཅི་ལོག་ཏུ་སྣང་བ་དུང་སེར་འཛིན་བཞིན་གྱུར་པ་སྦྱོང་དུས་རང་གི་ངོ་བོ་དང་པོའི་གཞི་ཐོག་ཏུ་ཕེབས་ཤིང་འཁྲུལ་སྣང་གློ་བུར་བ་ལྡོག་པ་ལས་འབྲས་བུ་གཞན་(༢༥༨)ཞིག་སྔར་མེད་གསར་བྱུང་དུ་བསྒྲུབ་པ་མ་ཡིན་ཏེ། ཀུན་འདུས་ལས། བཙལ་ནས་ཐོབ་པ་མ་ཡིན་ཏེ། །རྒྱུ་ཉིད་དུས་ན་འབྲས་བུའི་མཆོག །ཅེས་སོ། །
གསུམ་པ་གང་ལ་གདམས་པའི་སྣོད་བསྟན་པ་ལ་གཉིས་ལས། སྐལ་བཟང་སྦྱིན་པའི་སྣོད་ནི། སངས་རྒྱས་ཀུན༵་གྱི༵་གསང་བ་ཕྱག༵་རྒྱ༵་ཆེ༵ན་པོ༵་གསང་སྔགས་ནང་པ་གསུམ་ཡིན་ལ། དེ་དག་གི་ནང་ནས་ཀྱང་མཆོག༵་ཏུ་འཕགས་ཤིང་ངོ་མཚར་བའི་མཆོག་རང་བཞིན་གསང་བའི་སྙིང་པོའི་རྒྱུད་ཡིན་པས་གང་ཟག་མང་དུ་ཐོས༵་པས་ཚིག་གི་རིམ་པ་ལ་མཁས་ཤིང་དེའི་དོན་བས༵མས་བྱུང་གི་ཤེས་རབ་ཀྱིས་དཔྱད་པས་དོན་གྱི་གནས་ལུགས་ལ་མཁས་པ་དེས་ཡང་དག་པའི་དོན་དེ་ཉིད་བསྒོམ༵་པ་ལ༵་ཡང་དང་ཡང་དུ་ལེགས་པར་རབ༵་ཏུ་སྦྱང༵ས་པའི༵་ཤེས༵་རབ༵་ཀྱི་མིག༵་དང་ལྡན༵་པ་རྣམ༵ས་ཀྱིས༵་ཟུང༵ས་ཤིག་པའོ། །དེའི་ནང་ནས་ཀྱང་རང་བཞིན་གསང་བའི་སྙིང་པོའི་སྣོད༵་དང་ལྡན༵་པས་ཟབ་མོའི་དོན་རླབས་པོ་ཆེ་ལ་མི་སྐྲག་ཅིང་མོས་པ་སེམས་ཀྱི་ངང༵་ཚུལ༵་དགེ་ཞིང་བཟ༵ང་བས་སྡིག་པ་སྤོང་ཞིང་རྐྱེན་གྱིས་མི་འགྱུར་ལ༵་དད་པ་བརྟན༵་པ་དེ་ལ་ཆོས་འདི་གཏད་པར་བྱ་ཞིང་རང་གི་ལུས༵་དང༵་ལོངས༵་སྤྱོད༵་ཐམས་ཅད་བླ་མ་དང་ཆོས་ཀྱི་ཕྱོགས་སུ་གཏོང༵་ནུས་པ་ལ༵་ཡོངས་སུ་རྫོགས་པར་སྦྱིན༵་སྟེ། སྡུད་པ་ལས། ཆོས་ཕྱིར་སྲོག་ཀྱང་གཏོང་ལ་ཞུམ་པའི་སེམས་ཀྱང་མེད། །རང་གི་ས་ལ་དོགས་མེད་རྟག་ཏུ་རི་རབ་འདྲ། །ཞེས་པས། ནོར་བཟང་དང་རྟག་ཏུ་ངུ་བ་ལྟ་བུ་ལ་ཚིག་དོན་རྫོགས་པར་སྦྱིན་ནོ། །
གཉིས་པ་ལ་སྐལ་མེད་ལ་མི་སྦྱིན་པར་བསྟན་པ་ནི། སྦྱིན་པར་བྱ་བའི་སྣོད་ལས་གཞ༵ན་དུ༵་བསྟན་ཡང་མི་གོ་བ་དང་གོ་ཡང་ཕྱིན་ཅི་ལོག་ཏུ་སྤྱོད་ཅིང་སྡོམ་པ་དང་དམ་ཚིག་འཆལ་པ་བསྙེན་སྒྲུབ་ཚོགས་གཉིས་ལས་གཡེལ་བའམ་དངངས་ཤིང་སྐྲག་པ་སྐྱེ་བ་རྣམས་ལ་དུས་ནམ༵་ཡང༵་སྦྱིན༵་པར་མི༵་བྱ༵་སྟེ། ཉེས་པ་ཆེན་པོས་གདུང་བར་བྱེད་པའི་ཕྱིར་རོ། །གང་ཞེ་ན་ཡང་དག་པའི་དོན་ལ་རྨོང༵ས་པ༵་མི་ཤེས་ཤིང་སྐལ་བ་མེད་པ་དང་། སྒོ་གསུམ་འཕྱ༵ར་བ་མ་བསྡམས་མ་ཞི་བས་སྡིག་པ་བྱེད་ཅིང་གསང་བ་སྒྲོགས་པ་ལ་སོགས་པ་རྣམས་ལ༵་གལ༵་ཏེ་བྱིན༵་ན་མཁའ་འགྲོ་དང་དམ་ཅན་གྱི་ཆད་པས་དུས༵་མི༵ན་པ༵ར་ནི་སྲོག༵་ཟ༵ད་ན༵ས་ཚེའི་དུས་བྱེད་ཅིང་། ཕྱི་མ་ལ་ཚ་དམྱལ་མུན་པ་མི་བཟད་པས་འཁྲིགས་པ་རྣམས་སུ་དམྱལ་བའི་མེས་བསྲེ༵གས་ཤིང༵་གྲང་དམྱལ་གྱི་གངས་དང་བུ་ཡུག་ལ་སོགས་པས་སྦྲེབ༵ས་ནས་སྲོག་གི་ཟུངས་ཙམ་ལུས་ཀྱང་ཉམ་ཐག་པའི་སྡུག་བསྔལ་གྱིས་གདུངས་པར༵་ཡུན༵་རིང༵་གནས༵་ཏེ་བསྐལ་པ་སྟོང་ཕྲག་ཉི་ཤུ་ལ་སོགས་པར་ཐར་པའི་སྐབས་མེད་དོ། །དེ་སྐད་དུ་ཡང་རྣམ་སྣང་སྒྱུ་འཕྲུལ་དྲྭ་བ་ལས། མཚོན་དང་མེ་དང་དུག་དང་ནི། །དེ་བཞིན་གདོན་དང་རིམས་རྣམས་དང་། །སྦྲུལ་དང་ཤ་ཟ་དག་གིས་ཀྱང་། །བསད་ནས་དམྱལ་(༢༥༩)བ་ཆེན་པོར་སྐྱེ། །ཞེས་པ་དང་། མདོ་ལས། ཆོས་ཀྱི་ཕོངས་པའི་ལས་བསགས་པ་དེ་ནི་སེམས་ཅན་དམྱལ་བ་ཆེན་པོ་ནས་དམྱལ་བ་ཆེན་པོར་འགྲོ་བར་འགྱུར་རོ། །ཞེས་སོ། །
གསུམ་པ་སྐབས་ཀྱི་དོན་བསྡུ་བ་ནི། དེ་སྐད་ཅེས་དཀྱིལ་འཁོར་གྱི་དབང་ཕྱུག་དེ༵་བཞིན༵་གཤེ༵གས་པ༵་ཀུན་ཏུ་བཟང་པོ་ཉིད༵་ཀྱིས༵་རང་སྣང་དུ་བཀོད་པ་རིགས་ལྔ་ལ་སོགས་པའི་དེ༵་བཞིན༵་གཤེ༵གས་པ༵་ཉིད༵་ལ༵་ཆེ༵ད་དུ༵་བརྗོ༵ད་པར་མཛད་དོ༵། །མཆོག་ཏུ་གས༵ང་བ༵འི་སྙིང༵་པོ༵་རྫོགས་པ་ཆེན་པོའི་གདམས་ངག་ཚེ་འདི་ཉིད་དུ་གྲོལ་བར་བྱེད་པའི་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། ཚེ་གཅིག་ལ་སངས་རྒྱས་ཐོབ་པར་བྱེད་པའི་དོན་ཐེག་པ་འོག་མ་ལ་ཤིན༵་ཏུ༵་གས༵ང་བ༵འི་མ༵ན་ང༵ག་གི་སྙིང༵་པོ༵འི་ལེ༵འུ༵་སྟེ༵་བཅུ༵་གསུམ༵་པའི་རྣམ་པར་བཤད་པ༵འོ༵།། །།