ཞི་བའི་སྦྱིན་སྲེག་ནད་གདོན་ཀུན་སྦྱོང་།
ཕག་མོ་དཀར་མོའི་ཟབ་ཐིག་ལས༔ ཞི་བའི་སྦྱིན་སྲེག་ནད་གདོན་ཀུན་སྦྱོང་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ བདེ་ཆེན་དཀར་མོ་བསྒྲུབ་པའི་རྣལ་འབྱོར་པས༔ རྐྱེན་ངན་ནད་གདོན་བར་ཆད་ཞི་འདོད་ན༔ སྟེགས་བུ་ཟླུམ་པོ་དཀར་པོའི་སྟེང་༔ རཾ་གྱི་ཁོག་པར་ཧ་བྲི་ཞིང་༔ དཀར་པོ་ཞི་བ་བྱང་ཆུབ་ཤིང་༔ ཟླུམ་པོར་བརྩེག་ཅིང་ཕག་མོར་བསྒོམ༔ སྔགས་དང་དམིགས་པས་བསྙེན་ཅིང་བསྒྲུབ༔ མེ་ཐབ་བསང་ཞིང་སྟོང་བར་སྦྱངས༔ ཧཱུྃ༔ རཾ་ལས་མེ་ལྷ་དྲང་སྲོང་དཀར༔ སྤྱི་བླུགས་གཡས་ལ་བགྲང་འཕྲེང་གཡོན༔ ཕྱེད་སྐྱིལ་ར་སྐྱེས་ཆིབས་ལ་རོལ༔ ཐུགས་ཀའི་འོད་ཀྱིས་ཤར་ལྷོ་ནས༔ མེ་ལྷ་འཁོར་བཅས་སྤྱན་དྲངས་གྱུར༔ ཨོཾ་ཚུར་བྱོན་འབྱུང་བ་མེ་ཡི་ལྷ༔ དྲང་སྲོང་ཆེན་པོ་གཟི་བརྗིད་འབར༔ བསྐྱེད་པའི་ཐབ་འདིར་བཞུགས་ནས་ཀྱང་༔ སྲེག་བླུགས་མཆོད་པ་འདི་བཞེས་ལ༔ ནད་གདོན་བར་ཆད་ཞི་བར་མཛོད༔ ཨོཾ་ཨགྣཱེ་ཡེ་སོགས་ནས་མཆོད༔ མེ་ལྷའི་ལྟོ་བར་གཞལ་ཡས་དབུས༔ བདེ་ཆེན་རྡོ་རྗེ་རྣལ་འབྱོར་མ༔ འབུམ་ཕྲག་ཡངས་པའི་འཁོར་དང་བཅས༔ གསལ་བར་བསྐྱེད་ཅིང་གསལ་བར་བསྟིམ༔ རྩ་སྔགས་སྲེག་རྫས་ཞི་ཆས་དབུལ༔ ནད་གདོན་བགེགས་དང་བར་དུ་གཅོད་པ་ཐམས་ཅད་ཤཱནྟིང་ཀུ་རུ་སྭཱ་ཧཱ༔ བརྒྱ་རྩས་མཆོད་ཅིང་རྣམ་ལྔ་འབུལ༔ ལྷ་ཚོགས་དགྱེས་ཤིང་བར་ཆད་ཞི༔ དངོས་གྲུབ་ཐམས་ཅད་ཐོབ་པར་བསམས༔ ཡེ་ཤེས་པ་གཤེགས་དམ་ཚིག་བསྡུ༔ གཏང་རག་མཆོད་པ་མེ་ལྷ་ལ༔ དགྱེས་བསྐང་བསྟོད་ཅིང་བཟོད་གསོལ་བཤགས༔ དགེ་བ་བསྔོ་ཞིང་མཐའ་རྒྱས་འདེབས༔ ཆོས་རྣམས་སྟོང་ཉིད་ལ་ཟླ་ཞིང་༔ མ་བཅོས་ཏིང་འཛིན་ངང་ལ་བཞག༔ ཐལ་བ་ཆུ་འམ་རླུང་ལ་འཕྱར༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་བརྩམས་པས་ཉམས་ཆག་སྐོངས༔ སྡིག་སྒྲིབ་འདག་ཅིང་རྐྱེན་ངན་གྲོལ༔ བརྩམས་པའི་འཕྲིན་ལས་འགྲུབ་པར་འགྱུར༔ དེ་བས་ཉམས་སུ་ལོངས་ཤིག་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་ཤིང་མོ་གླང་གི་ལོ་ལ་ཆགས་རུ་ཕུག་དཀར་ལྷའི་གཞལ་ཡས་ནས་གདན་དྲངས་ཤིང་༔ མེ་ཕོ་སྟག་གི་ལོ་ལ་གནས་མཆོག་ཆེན་པོ་ཁམས་སྲིང་མོ་རྫོང་གི་ཕུག་ནག་བདེ་བ་ཆེན་པོའི་རྡོ་རྗེའི་ཀེའུ་ཚང་དུ་ཧོར་ཟླ་དྲུག་པའི་ཚེས་བཅུ་ལ་ཤོག་སེར་ལས་ཞལ་བཤུས་པ་དགེ་ལེགས་འཕེལ། །མངྒལཾ། །