གཉིས་པ་བྱང་སེམས་ཀྱི་སྡོམ་པའི་བསླབ་བྱ།
གཉིས་པ་བྱང་སེམས་ཀྱི་སྡོམ་པའི་བསླབ་བྱ་ལ།
བྱང་སྡོམ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པ་བསྲུང་བའི་ཚུལ། ཉམས་ན་ཕྱིར་བཅོས་པའི་ཚུལ། བསྲུང་བའི་ཕན་ཡོན་དང་བཞི། དང་པོ་ནི། སྡོམ་པ་ཉི་ཤུ་པ་ལྟར། སངས་རྒྱས་སྲས་བཅས་ལ་གུས་པས་ཕྱག་འཚལ་བ་དང༌། མཆོད་པ་ཅི་ནུས་བྱས་ནས་སྨོན་པའི་སེམས་བསྐྱེད། དེ་ལ་བླ་མས་བྱང་སེམས་ཀྱི་བསླབ་པའི་གཞི་རྣམས་བསྟན་ཏེ་ནུས་སམ་མི་ནུས་བརྟགས་ནས་ལེན་པ་ལ་སྤྲོ་བར་གྱུར་ན། བྱང་སེམས་ཀྱི་སྡོམ་པ་དེ་སེམས་ཅན་ཐམས་ཅད་ཀྱི་དོན་དུ། ལེན་ཡུལ་བླ་མ་བྱང་སེམས་ཀྱི་སྡོམ་པ་ལ་གནས་ཤིང་བྱང་སེམས་ཀྱི་སྡེ་སྣོད་ལ་མཁས་པ། སློབ་མ་སྐྱོང་བའི་ནུས་པ་དང་ལྡན་པ་ལ་གསོལ་བ་ནན་གྱིས་བཏབ་སྟེ། བྱང་ས་སོགས་ལས་གསུངས་བའི་ཆོ་ག་རྒྱས་པའམ། ཡང་ན་སྤྱོད་འཇུག་ལས། ཇི་ལྟར་སྔོན་གྱི་བདེ་གཤེགས་ཀྱིས། །ཞེས་སོགས་ཀྱིས་བླ་མ་ཡོད་ན་དེའི་དྲུང་དང༌། བླ་མ་མ་རྙེད་ན་རྟེན་གྱི་མདུན་དུ་བླང་བར་བྱའོ། །བྱང་སྡོམ་གྱི་ཆོ་ག་རྗེ་སྒྲོལ་མགོན་གྱིས་མཛད་པའི་སྐྱེས་བུ་གསུམ་གྱི་ལམ་རིམ་བདུད་རྩིའི་སྙིང་ཁུ་དང༌། ཉ་ཊཱིཀ་ཡིད་ཀྱི་མུན་སེལ་སོགས་ལས་ཤེས་པར་བྱའོ། །