རྩ་གསུམ་དྲིལ་བསྒྲུབ་བསྡུས་པ།
རྩ་གསུམ་དྲིལ་བསྒྲུབ་བསྡུས་པ་བཞུགས་སོ༔
ཧཱུྃ༔ ཕྱི་སྣོད་ཐམས་ཅད་འོག་མིན་གནས༔ ཁང་ཁྱིམ་རྒྱན་རྫོགས་གཞལ་ཡས་ཁང་༔ རང་ལུས་རིག་འཛིན་བླ་མའི་སྐུ༔ དབུ་ལ་ཁྲག་འཐུང་སྒྲུབ་སྡེའི་ལྷ༔ ཐུགས་ཀར་ཞི་བ་རྒྱུད་སྡེ་རྫོགས༔ བ་སྤུའི་གྲངས་མཉམ་རྩ་འཁོར་ལ༔ དཀར་དམར་ཐིག་ལེ་དཔའ་བོ་དང་༔ མཁའ་འགྲོ་ཡོངས་འདུས་དཀྱིལ་འཁོར་དུ༔ མ་འདྲེས་ཡོངས་སུ་རྫོགས་པ་ཡིས༔ གནས་གསུམ་འོད་ཟེར་རབ་འཕྲོས་པས༔ རང་བཞིན་གནས་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པར་བསྟིམ༔ ཕྱག་འཚལ་མཆོད་འབུལ་གླུ་ཡིས་བསྟོད༔ གསང་སྔགས་སྙིང་པོའི་ཐིག་ལེ་ཆེ༔ མ་ཡེངས་མི་རྟོག་བྱང་ཆུབ་སེམས༔ དུ་མ་རོ་མཉམ་ངང་ནས་བཟླ༔ ཨོཾ་ཨཱཿཧཱུྃ༔ འདི་ཡི་རབ་འབྱམས་ལས་ཀུན་འགྲུབ༔ ས་མ་ཡཱ༔ ཧཱུྃ༔ ཚོགས་རྫས་འདོད་ཡོན་ལྷ་མོར་དག༔ དབྱིངས་ནས་ལྷ་ཚོགས་སྤྱན་འདྲེན་གཤེགས༔ ཞལ་ཟས་ཚོགས་ཀྱི་མཆོད་པ་འབུལ༔ ཚེ་རབས་ཉམས་ཆགས་སྡིག་ལྟུང་བཤགས༔ གཟུང་འཛིན་རུ་ཏྲ་དབྱིངས་སུ་བསྒྲལ༔ ཡེ་སངས་ཆོས་ཉིད་ཆེན་པོར་སྟོབས༔ ཚོགས་གཉིས་རྫོགས་སླད་ཐུགས་དམ་བསྐངས༔ ཚིམ་པ་དྲུག་གིས་ཚོགས་ལ་སྤྱོད༔ ལྷག་སྐྱོང་ཕོ་མོ་ལྷག་ལ་རོལ༔ སེམས་ཅན་དོན་དུ་ཐུགས་དམ་བསྐུལ༔ བསྟན་བསྲུང་རྒྱ་མཚོའི་ཚོགས་རྣམས་མཆོད༔ ཆོས་སྐྱོང་རྐྱེན་བཟློག་ཕྲིན་ལས་མཛོད༔ རྟོག་གཉིས་སྐྱེ་མེད་ངང་དུ་མནན༔ འོད་གསལ་མངོན་གྱུར་དངོས་གྲུབ་སྩོལ༔ མ་རིག་ལས་ཉོན་མཐོལ་ལོ་བཤགས༔ ལྷར་སྣང་སྟོང་ཉིད་ཆེན་པོར་བསྡུ༔ སྟོང་པའི་རང་མདངས་འོད་གསལ་ལྷ༔ ཚོགས་གཉིས་མཐར་ཕྱིན་འདི་ཡི་དགེའི༔ འགྲོ་ཀུན་རང་གྲོལ་བཀྲ་ཤིས་ཤོག༔ བདྡྷའི་ངོར་ག་གཱས་སོ། །