བར་དོའི་གདམས་པ་ཚངས་སྤྲུགས་སུ་གདབ་པ་གནད་ཀྱི་མན་ངག
༄༅། །བར་དོའི་གདམས་པ་ཚངས་སྤྲུགས་སུ་གདབ་པ་གནད་ཀྱི་མན་ངག་ཅེས་བྱ་བ་བཞུགས་སོ། །
༄༅། །བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །དལ་འབྱོར་རྙེད་ཀྱང་མི་རྟག་འགྲོ་དགོས་པས། །འཆི་ཀའི་གདམས་ངག་སེམས་ལ་འདི་ལྟར་བཞག །སྐྱེ་འཆི་བར་དོ་ད་ལྟའི་གནས་སྐབས་འདིར། །རང་རིག་ཡེ་ཤེས་ཆོས་སྐུར་ཐག་བཅད་དེ། །རང་གདངས་སྒོམ་པ་ངང་དྭངས་ངང་ལ་བསྐྱང་། །ཐམས་ཅད་རང་བྱུང་ཡེ་ཤེས་རྩལ་སྦྱང་བྱ། །འཆི་ཀའི་བར་དོར་འབྱུང་བཞི་སྡུད་པའི་ཚེ། །ཕྱ་ཕྱོ་ཡམ་ཡོམ་བན་བུན་སྒྱུ་མར་སྣང་། །ས་ཆུ་མེ་རླུང་ནམ་མཁར་ཐིམ་པ་སོགས། །དབང་པོ་འགག་ཚུལ་མཐོང་ཚེ་གསལ་གདབ་པ། །ད་ནི་འཆི་སྟེ་འདི་ལ་འཇིགས་མི་དགོས། །གང་འཆི་སུ་འཆི་ཅི་རུ་གྲུབ་པ་ལྟོས། །བེམས་པོ་འབྱུང་བཞིའི་གཡར་པོ་གཏོང་ཙམ་ལས། །རིག་པའི་ངོས་ལ་སྐྱེ་འཆིར་གྲུབ་པ་མེད། །རིག་སྟོང་ཀ་དག་ཆོས་སྐུའི་རང་གཟུགས་ལ། །གང་འཆི་སུ་འཆི་ཅི་རུ་གྲུབ་པ་ལྟོས། །ཅིར་ཡང་མེད་པས་འཆི་བ་རྣམ་བདེན་ཡིན། །དེ་ཀའི་ངང་ལ་དཔའ་གདེང་ལྡན་པར་བྱ། །རིག་པའི་འཆར་ཚུལ་ཅིར་ཡང་མ་འགགགས་པས། །ས་ཆུ་མེ་རླུང་རྣམ་ཤིས་ནམ་མཁར་ཐིམ། །ནམ་མཁའ་འོད་གསལ་དག་ལ་ཐིམ་པའི་ཚེ། །ཚོགས་དྲུག་ཀུན་གཞི་ཆོས་དབྱིངས་ངང་དུ་ཐིམ། །བེམས་རིག་བྲལ་ཏེ་རིག་པ་ཆོས་ཟད་དང་། །བློ་ཟད་ཆོས་སྐུ་ཀ་དག་(༡༠)ཆེན་པོར་འཆར། །ད་ལྟ་དགེ་སྦྱོར་དེ་རུ་ངོས་ཟིན་པས། །སྐད་ཅིག་གཅིག་པ་ཡར་གྱི་ཟངས་ཐལ་གྲོལ། །དག་པ་གཉིས་ལྡན་ཆོས་སྐུ་ཐོབ་པ་ལགས། །དེ་ལྟར་ཤར་ཡང་རང་ངོས་མ་ཟིན་ན། །དེ་རྗེས་སྣང་བའི་འོད་གསལ་གཞི་སྣང་འཆར། །སྒྲ་འོད་ཟེར་གསུམ་ཞི་ཁྲོས་ནམ་མཁའ་གང་། །སྣང་བ་དེ་ཀུན་རང་སྣང་ངོ་ཤེས་པས། །གདོད་མར་གྲོལ་ཏེ་བྱང་ཆུབ་ཐོབ་པ་ཡི། །དེ་བས་ཐམས་ཅད་རང་སྣང་ཤེས་པ་གཅེས། །རང་ངོ་ཤེས་པས་སངས་རྒྱས་ཐོབ་པ་ཡིན། །དེ་ལྟར་ཤར་ཡང་རང་ངོ་མ་ཤེས་ན། །སྲིད་པ་བར་དོ་རྨི་ལམ་འདྲ་བ་འཆར། །དེ་ཚེ་དག་པའི་ཞིང་ཁམས་དྲན་པ་དང་། །བླ་མ་ཡི་དམ་ལྷ་ལ་སྐྱབས་སོང་བས། །ཁ་ཅིག་དག་པའི་ཞིང་སྐྱེ་གྲོལ་བར་འགྱུར། །ལ་ལ་མཐོ་རིས་ཡོན་ཏན་བདུན་ལྡན་ལུས། །ཐོབ་ནས་སྐྱེ་བ་ཕྱི་མར་གྲོལ་བར་ངེས། །དེ་ཕྱིར་གདམས་པའི་སྙིང་པོ་ཡང་ཟབ་འདི། །སངས་རྒྱས་ལག་བཅང་ལག་ཏུ་གཏན་པ་ཡིན། །སྐལ་ལྡན་སྙིང་གི་བུ་རྣམས་དགའ་བར་མཛོད། །རང་བཞིན་རྫོགས་པ་ཆེན་པོའི་རྣལ་འབྱོར་པ། །ཀློང་ཆེན་རབ་འབྱམས་བཟང་པོས་ལེགས་པར་བཀོད། །དགེ་བས་མཁའ་མཉམ་འགྲོ་བ་མ་ལུས་པ། །གདོད་མའི་དབྱིངས་སུ་མངོན་པར་སངས་རྒྱས་ཤོག །འཆི་ཀ་མ་ལ་ཚངས་སྤྲུགས་སུ་གདབ་པའི་མན་ངག་གསང་བ་བླ་ན་མེད་པའི་ངོ་སྤྲོད། རྒྱལ་སྲས་དྲི་མེད་འོད་ཟེར་གྱིས། དད་ཅན་གྱི་སློབ་མ་འགས་གསོལ་བ་བཏབ་པའི་ངོར། ཁོ་ཐང་རིན་ཆེན་གླིང་གི་དབེན་གནས་སུ་བཀོད་པ་རྫོགས་སོ།། །།