དགུ་པ་ས་ལམ་གཉིས་སུ་ཕྱེ་བའི་སའི་མཚན་ཉིད་དང༌།ས་བཅུའི་སྤང་བྱ་སྐོར་ཇི་ལྟར་བྱས་པ།

དགུ་པ་ས་ལམ་གཉིས་སུ་ཕྱེ་བའི་སའི་མཚན་ཉིད་དང༌།ས་བཅུའི་སྤང་བྱ་སྐོར་ཇི་ལྟར་བྱས་པ་དང༌། ས་དང་པོའི་སྒོམ་ལམ་ཡོད་མེད་དང༌། ས་ནས་སར་འཕོ་ཚུལ་དང༌།ས་བཅུར་ཆོས་ཉིད་ལ་ངེས་པ་འདྲེན་ཚུལ་ཇི་ལྟར་ཡིན་ཞེས་པའི་ལན།

ས་ལམ་གཉིས་སུ་ཕྱེ་བའི་སའི་མཚན་ཉིད་དང༌། ས་བཅུའི་སྤང་བྱ་སྐོར་ཇི་ལྟར་བྱས་པ་དང༌། ས་དང་པོའི་སྒོམ་ལམ་ཡོད་མེད་དང༌།ས་ནས་སར་འཕོ་ཚུལ་དང༌། ས་བཅུར་ཆོས་ཉིད་ལ་ངེས་པ་འདྲེན་ཚུལ་ཇི་ལྟར་ཡིན་ཞེས་པའོ། །གཉིས་པ་ལན་ནི། ཡོན་ཏན་དུ་མའི་རྟེན་དུ་གྱུར་བའི་ལམ་དེ། ས་ལམ་གཉིས་སུ་ཕྱེ་བའི་སའི་མཚན་ཉིད། མཚན་གཞི་ནི། ཚོགས་ལམ་ལྟ་བུའོ། །ཡོན་ཏན་དུ་མའི་རྟེན་དུ་གྱུར་བའི་ཐེག་ཆེན་གྱི་ལམ་དེ། ཐེག་ཆེན་གྱི་སའི་མཚན་ཉིད། །ཡོན་ཏན་དུ་མའི་རྟེན་དུ་གྱུར་བའི་ཐེག་ཆེན་འཕགས་རྒྱུད་ཀྱི་ལམ་དེ། ཐེག་ཆེན་འཕགས་པའི་སའི་མཚན་ཉིད།ཡོན་ཏན་དུ་མའི་རྟེན་དུ་གྱུར་བའི་བྱང་འཕགས་ཀྱི་རྒྱུད་ཀྱི་ལམ་དེ། བྱང་འཕགས་ཀྱི་སའི་མཚན་ཉིད། མཚན་ཉིད་དེ་དག་འཐད་དེ། བླང་དོར་རབ་གསལ་ལས། ས་ཡི་དོན་ནི་ཡོན་ཏན་རྣམས་ཀྱི་རྟེན། །ཞེས་དང༌། བླང་དོར་རབ་གསལ་རྩ་འགྲེལ་ལས། ས་བཅུའི་མཚན་ཉིད་ནི། ཁྱད་པར་བྱང་ཆུབ་སེམས་དཔའི་ས་བཅུ་ནི། །འཕགས་པ་སློབ་པའི་ཡེ་ཤེས་མཚུངས་ལྡན་དང༌། །བཅས་པའི་ཡོན་ཏན་ཀུན་གྱི་རྟེན་ཡིན་ཏེ། །ཡོན་ཏན་གནས་པས་གནས་པ་ཞེས་ཀྱང་བསྟན། །དེ་ཡང༌། དབུ་མ་འཇུག་པར་བྱང་ཆུབ་སེམས་དཔའ་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ནར་ཕྱེ་བ་ལ་ནི་སའི་མིང་ཐོབ་སྟེ། ཡོན་ཏན་གྱི་རྟེན་དུ་གྱུར་པའི་ཕྱིར། ཞེས་པ་དང༌། དབུས་མཐའི་ཊཱི་ཀར་ཡང༌། ཀུན་ཏུ་འགྲོ་བ་ལེགས་པའི་དོན་ཁོང་དུ་ཆུད་པའི་གནས་སྐབས་རྣམས་ནི་དེ་ལས་སྐྱེས་པའི་ཡོན་ཏན་གྱི་གཞིའི་ཚུལ་གྱི་ས་རྣམས་སོ། །ཞེས་གསུངས་པ་ལྟར། བྱང་ཆུབ་སེམས་དཔའ་འཕགས་པ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་རྣམས་ཀྱི་རྟེན་དུ་གྱུར་པའོ། །དེ་ཉིད་དགེ་བ་བསྒྲུབ་པ་རྣམ་པ་སྣ་ཚོགས་པ་རྣམས་ལ་དགའ་བས་རྟག་པར་ཐམས་ཅད་དུ་གནས་པའི་གཞིའི་རྟེན་དུ་གྱུར་པའི་ཕྱིར་གནས་པ་ཞེས་ཀྱང་བྱ་སྟེ། རྒྱན་ལས། དགེ་བ་སྒྲུབ་པ་སྣ་ཚོགས་ལ། །དགའ་བས་རྟག་པར་ཐམས་ཅད་དུ། །གནས་ཕྱིར་བྱང་ཆུབ་སེམས་དཔའ་ཡི། ས་རྣམས་གནས་པ་ཡིན་པར་འདོད། །ཅེས་གསུངས་པ་ལྟར། ཞེས་གསུངས་པས་སོ། །ཡང་རྒྱན་གྱི་ས་འགྲེལ་ལས། མཚན་ཉིད་ནི། བྱང་ཆུབ་སེམས་དཔའ་སློབ་པའི་ཡེ་ཤེས་མཚུངས་ལྡན་དང་བཅས་པ་ཡོན་ཏན་ཁྱད་པར་ཅན་གྱི་རྟེན་དུ་གྱུར་པ་སྟེ། དབུ་མ་འཇུག་པའི་རང་འགྲེལ་པར། བྱང་ཆུབ་སེམས་དཔའི་སྙིང་རྗེ་ལ་སོགས་པས་ཡོངས་སུ་བཟུང་བའི་ཡེ་ཤེས་ཁོ་ན་ཆར་ཕྱེ་བ་ལ་ནི་སའི་མིང་འཐོབ་སྟེ།ཡོན་ཏན་གྱི་རྟེན་དུ་གྱུར་པའི་ཕྱིར་རོ་ཞེས་པ་དང༌། ཞེས་ཚིག་ཟིན་ལ་འཕགས་པ་ལ་མ་སྦྱར་བ་དང༌། གོང་དུ་བཀོད་པ་ལྟར་བླང་དོར་རབ་གསལ་ལས་བྱང་འཕགས་ལ་སྦྱར་བ་དང༌། ཉ་ཊཱིཀ་ལས། མཚན་ཉིད་ནི། ཐེག་ཆེན་གྱི་སྙིང་རྗེ་ཆེན་པོ་སོགས་ཀྱིས་ཟིན་པའི་ཟག་མེད་ཡེ་ཤེས་གང་ཞིག ཐེག་ཆེན་གྱི་སྤངས་རྟོགས་ཡོན་ཏན་གྱི་རྟེན་དུ་གྱུར་པའོ། །འཇུག་པའི་བཤད་པར། བྱང་པ་རྣམས་ཀྱི་སྙིང་རྗེ། ལ་སོགས་པའི་བཟུང་བའི་ཟག་པ་མེད་པའི་ཡེ་ཤེས་ཁོ་ན་ཆར་རྣམ་པར་ཕྱེ་བ་ནི་སའི་མིང་འཐོབ་སྟེ། ཡོན་ཏན་གྱི་རྟེན་དུ་གྱུར་པའི་ཕྱིར་རོ། །ཞེས་སོགས་གསུངས་པ་རྣམས་ཀྱི་དོན་ལ་དཔྱད་པར་བྱའོ། །ཡང་རྒྱན་ལས། ཡོན་ཏན་དཔག་མེད། ཅེས་དང༌། དེའི་ས་འགྲེལ་ལས། ས་རེ་རེའང་ཡོན་ཏན་དཔག་ཏུ་མེད་པ་དང་ལྡན་པ། ཞེས་དང༌། །ཉ་་ཊཱིཀ་ལས། ཡོན་ཏན་དཔག་ཏུ་མེད་པ་དང་ལྡན་པའི་ས་དེ་དག་ལ་ཡང་ཡང་ས་གོང་མ་གོང་མར་འགྲོ་བ་དང་ལྡན་པས་སའོ། །ཞེས་དང༌། གཟུང་འཇུག་རབ་གསལ་ལས། ཏིང་ངེ་འཛིན་གྱི་ས་རྣམས་ནི་འཕགས་པའི་ས་མ་ཡིན་ཏེ། འཕགས་པའི་ས་དང་པོ་ཐོབ་ནས་ཡིད་ཀྱི་རང་བཞིན་གྱི་ལུས་ལེན་པར་དཔལ་གྱི་མགུར་ནས་གསུངས་པའི་ཕྱིར་རོ། །གཞན་ཡང་འཕགས་པའི་ས་བཅུ་པའི་ཡོན་ཏན་གཞལ་དུ་མེད་པར་གསུངས་ན་བཅུ་གཅིག་པའི་ཡོན་ཏན་གཞལ་དུ་ཡོད་པར་གསུངས་པ་དང་འགལ་བའི་ཕྱིར་འདི་དག་ནི་སྦྱོར་ལམ་གྱི་ནང་ཚན་ཞིག་ལས་ཕྱེ་བ་ཁོ་ནའོ། །ཞེས་དང༌། ཏིང་ངེ་འཛིན་གྱི་སྐད་ཅིག་ཐ་མ་ནི་མཐོང་ལམ་ཡིན་པས། ཞེས་གསུངས་པས་ས་དང་པོ་སོགས་ཀྱི་ཡོན་ཏན་དཔག་མེད་ཡིན་མིན་བརྟག་པར་བྱའོ། །འོན་ཀྱང་ཀུན་སྤངས་པའི་སྦྱོར་དྲུག་ལས། གཙུག་ཏོར་གྱི་འཁོར་ལོའི་བར་བྱང་སེམས་བརྟན་པས་ས་བཅུ་གཉིས་པ་རྡོ་རྗེ་འཆང་གི་ས་ཚེ་འདི་ཉིད་ལ་ཐོབ་པ། ཞེས་དང༌། ས་བཅུ་བའི་མདོ་ལས། ས་དང་པོ་ལ་ཡོན་ཏན་བརྒྱ་ཕྲག་བཅུུ་གཉིས། ས་གཉིས་པ་ལ་ཡོན་ཏན་སྟོང་ཕྲག་བཅུ་གཉིས་སོགས་གསུངས་པས་དཔྱད། ས་བཅུའི་སྤང་བྱ་སྐོར་ཇི་ལྟར་བྱས་ནས་སྤངས་ཚུལ་ནི། མཐོང་སྤང་སྐོར་བཞི་བྱས་ནས་སྤངས་པ་དང་སྒོམ་སྤང་སྐོར་བཅུ་གཅིག་བྱས་ནས་སྤངས་པ་ཡིན་ལ།དེ་ཡང་བདེན་བཞིའི་མཐོང་སྤང་བཞི་རིམ་གྱིས་སྤོང་པ་ཡིན་ཏེ། རྒྱུད་བླའི་འགྲེལ་བ་ལེགས་བཤད་ཉི་མའི་འོད་ཟེར་དང་རྒྱུད་བླ་ས་འགྲེལ་གཉིས་ལས། ཆོས་ཀྱི་དབྱིངས་དོན་དམ་པའི་དེ་ཁོ་ན་ཉིད་རིམ་གྱིས་མཐོང་བ་ཡིས། མཐོང་བས་སྤང་བར་བྱ་བའི་ཉོན་མོངས་པ་རྣམས་ནི་རིམ་གྱིས་ལྡོག་པར་འགྱུར་རོ་ཞེས་པས་མཐོང་སྤང་རྣམས་ནི་འབྲས་ཤུན་ལྟ་བུ་དང༌། ཞེས་དང༌། ཞང་སྟོན་པའི་རྒྱུད་བླའི་འགྲེལ་བ་ལས། ཇི་ལྟར་ཤིང་གི་འབྲས་བུ་ལས་མྱུ་གུ་དང་སྡོང་བོ་ལ་སོགས་པ་རིམ་གྱིས་སྐྱེས་པས་ས་བོན་གྱི་ཤུན་པ་རིམ་གྱིས་གཅོད་པ་ལྟར། དེ་བཞིན་དུ་དེ་ཁོ་ན་ཉིད་མངོན་སུམ་དུ་མཐོང་བའི་ལམ་རིམ་གྱིས་སྐྱེས་པ་ཡིས་མཐོང་སྤང་གི་དྲི་མ་རྣམས་ནི་རིམ་གྱིས་ལྡོག་པར་འགྱུར་རོ། །ཞེས་དང༌། ཉ་ཊཱིཀ་ལས།དེས་ན་མཐོང་སྤང་བཞི་རྣམས་ཀྱང་རིམ་གྱིས་སྤོང་སྟེ། ཆོས་བཟོད་བཞི་རིམ་གྱིས་སྐྱེ་བར་བཤད་པས་སོ། །རྒྱུད་བླར། ཇི་ལྟར་མྱུག་སོགས་རིམ་སྐྱེ་བས། །ས་བོན་ཤུན་པ་གཅོད་པ་ལྟར། །དེ་བཞིན་དེ་ཉིད་མཐོང་བ་ཡིས། །མཐོང་སྤང་རྣམས་ནི་ལྡོག་པར་འགྱུར། །ཞེས་སོ། །བསྡུ་བར། མཐོང་བས་སྤང་བར་བྱ་བ་ནི་གཅིག་ཅར་སྤོང༌། ཞེས་སོགས་ནི།སྡུག་བསྔལ་ཆོས་བཟོད་སྐྱེས་པ་དང་སྡུག་བསྔལ་མཐོང་སྤང་གཅིག་ཅར་སྤོང་བ་ལྟ་བུ་ལ་དགོངས་ཀྱི་ཐམས་ཅད་མིན་ཏེ། ཞེས་གསུངས་པའི་ཕྱིར་རོ། །དེ་མི་རིགས་པར་ཐལ།སྡུལ་བསྔལ་ཆོས་བཟོད་ཀྱིས་སྡུག་བསྔལ་མཐོང་སྤང་སྤངས་ནུས་ལ་ཀུན་འབྱུང་མཐོང་སྤང་སྤངས་མི་ནུས་པའི་རྒྱུ་མཚན་མེད་པའི་ཕྱིར་དང༌། སྔོན་མེད་ལེགས་བཤད་ལས། མཐོང་བའི་སྤང་བར་བྱ་བ་རྣམས་ནི་དུས་གཅིག་ཏུ་སྤོང་པ་ཡིན་ལ། སྒོམ་པས་སྤང་བར་བྱ་བ་རྣམས་ནི་རིམ་གྱིས་སྤོང་ཞིང༌། ཞེས་གསུངས་པའི་ཕྱིར་ན་དེའི་དགོངས་པ་གཞན་དུ་ཚོལ་དགོས་སོ། །ཡང་རྒྱན་ལས། ལུས་ལ་གནས་ངན་ལེན་པ་ཀུན། །སྐད་ཅིག་རེ་རེ་ལ་ཟད་འགྱུར། །ཞེས་དང༌། ཉ་ཊཱིཀ་ལས། སྐད་ཅིག་རེ་རེ་གནས་ངན་ལེན་ཟད་པར་བྱེད་དེ། །ཞེས་སྐད་ཅིག་རེ་རེ་ལ་སྤང་བྱ་སྤངས་ན་སྤང་བྱ་སྐོར་མཐའ་ཡས་པ་བཅས་ནས་སྤངས་པ་ཡིན་མིན་དཔྱད། རང་ལུགས་ལ་ས་དང་པོའི་སྒོམ་ལམ་ཡོད་དེ། སྔོན་མེད་ལེགས་བཤད་ལས། མཐོང་ལམ་རྗེས་ཐོབ་དང་བཅས་པས་ས་དང་པོའི་ཕྱེད་འཁྱེར་ཞིང༌།དང་པོའི་ཕྱེད་ཕྱི་མ་ནི་སྒོམ་ལམ་ཡིན་ནོ། །ཞེས་དང༌། རྒྱན་གྱི་ས་འགྲེལ་ལས། མདོར་ན་ས་དང་པོའི་སྟོད་ཀྱི་ཆ་ལ་མཐོང་སྤང་སྤངས་ཏེ་མཐོང་ལམ་ཡོངས་སུ་རྫོགས་པར་ཐོབ་ནས། སྨད་ཀྱི་ཆ་ནས་ས་བཅུ་བའི་བར་ལ་སྒོམ་ལམ་གྱིས་ཤེས་བྱའི་སྒྲིབ་པ་གཙོ་བོར་སྤོང་ཞིང༌། ཞེས་གསུངས་པའི་ཕྱིར་རོ། །ཡང་ས་དང་པོའི་སྒོམ་ལམ་མེད་བར་ཐལ། སྒོམ་ལམ་ལ་སའི་སྒོ་ནས་དབྱེ་བ་དྲི་མ་མེད་པའི་ས་སོགས་དགུ་ལས་མེད་པ་དང༌། ཨཱརྱས།འཇུག་སྒྲུབ་ས་བཅུ་ཅར་ན་ཡོད་པར་བཤད་པ་དེ་འཕགས་པ་ཐོགས་མེད་དང་འགལ་ཚུལ་ཡོད་པའི་ཕྱིར་ཏེ། ཉ་ཊཱིཀ་ལས། སའི་སྒོ་ནས་དྲི་མ་མེད་པ་སོགས་དགུ ཞེས་དང༌། དེ་ལས། ཨཱརྱས། ས་བཅུ་ཅར་ན་ཡོད་པར་བཤད་པར་མངོན་ཅིང་དེ་ལྟར་བཞེད་པ་ནི་ནོར་བར་མངོན་ཏེ། འཕགས་པ་ཐོགས་མེད་དང་འགལ་བས་སོ། །ཞེས་འཕགས་པ་ཐོགས་མེད་དང་འགལ་སའི་ལུང་ནི། ཐོགས་མེད་ཀྱི་གསུང་འགྲེལ་ཆེན་དང་ཐུབ་དགོངས་སུ་དྲངས་པ། ངེས་པར་འབྱུང་བའི་སྒྲུབ་པ་ནི་སྒོམ་པའི་ལམ་ལ་བརྟེན་པ་ཡིན་ནོ་ཞེས་གསུངས་དེ་ཡིན་པའི་ཕྱིར་ཟེར་ན་བརྟག་པར་བྱའོ། །ཡང་ས་གོང་མར་འཕོ་ཚུལ་ནི་ཇི་སྲིད་དུ་རང་རང་གི་ཡོངས་སྦྱོང་མ་རྫོགས་ཀྱི་བར་དེ་སྲིད་དུ་ས་དེ་དང་དེ་ཡིན་ཞིང་རྫོགས་ནས་གོང་མ་གོང་མར་འཕོ་བ་སྟེ་བརྒྱད་སྟོང་འགྲེལ་པར། ས་གང་གི་ཡོངས་སུ་སྦྱོང་བར་འགྱུར་བའི་ཆོས་གང་ཡིན་པ་དེ་དག་མ་རྫོགས་ཀྱི་བར་དུ་ནི་ས་དེ་ཡིན་ལ། ཡོངས་སུ་རྫོགས་ནས་ནི་ས་གཞན་ཡིན་པར་ཤེས་པར་བྱའོ་ཞེས་གསུངས་པ་ལྟར་རྒྱན་གྱི་ས་འགྲེལ་ལས་གསུངས་ལ། དེ་ལྟརབཞག་པ་དེ་ཉ་ཊཱིཀ་ལས། མདོ་དང་མཐུན་ནོ། །ཞེས་མདོ་དང་མཐུན་པར་གསུངས་སོ། །ཉ་ཊཱིཀ་ལས། ས་དང་པོ་ནི་རྫོགས་པར་ཐོབ་པར་འགྱུར་རོ། །ཞེས་སོགས་ཀྱིས་ས་དེ་དང་དེའི་ཡོངས་སྦྱོང་གིས་ས་དེ་དང་དེ་མ་ཐོབ་པ་ཐོབ་བྱེད་མ་ཡིན་པར་རྫོགས་པར་ཐོབ་བྱེད་ཡིན་གསུངས་པ་མི་རིགས་པར་ཐལ། མདོ་ལུགས་མ་ལས། ཡོངས་སུ་སྦྱོང་བའི་ཆོས་དུ་ཞིག་གིས་ས་དང་པོ་འཐོབ་པར་འགྱུར་ཞེ་ན། ཡོངས་སུ་སྦྱོང་བ་རྣམ་བཅུ་ཡིས། །ས་ནི་དང་པོ་འཐོབ་འགྱུར་ཏེ། །ཞེས་གསུངས་པའི་ཕྱིར་ཟེར་ན་མ་ཁྱབ་སྙམ་མོ། །ས་བཅུར་ཆོས་ཉིད་ལ་ངེས་པ་འདྲེན་ཚུལ་ནི། མཉམ་གཞག་ཏུ་ཆོས་ཉིད་ཙམ་རྟོགས་པ་ལ་ཁྱད་མེད་དུ་བསྟན་པ་དང༌། ཆོས་ཉིད་བཅུ་ལ་སྒྲིབ་པ་བཅུ་སྤངས་པའི་རིམ་གྱིས་ངེས་པ་འདྲེན་ཚུལ་ལ་ཁྱད་ཡོད་པར་བསྟན་པ་དང་གཉིས། དང་པོ་ནི། ས་བཅུ་གཅིག་གི་མཉམ་བཞག་ན་ཆོས་ཉིད་ཙམ་མངོན་གསུམ་དུ་རྟོགས་པར་ཁྱད་པར་མེད་དེ། ཆོས་ཐམས་ཅད་ཀྱི་ཆོས་དབྱིངས་གཅིག་ཉིད་ཡིན་པའི་ཕྱིར་ཏེ། མདོ་ལས། འཇམ་དཔལ་ཆོས་ཀྱི་དབྱིངས་གཅིག་ཡང་དག་པའི་མཐའ་གཅིག་ཡིན་ན་སྣོད་དང་སྣོད་མིན་པར་ཇི་ལྟར་བརྟགས། ཞེས་དང༌། ཨཱརྱ་དེ་བས། གང་གིས་དངོས་གཅིག་དེ་བཞིན་ཉིད་མཐོང་བ། །དེ་ཡིས་དངོས་ཀུན་དེ་བཞིན་ཉིད་དུ་མཐོང༌། །ཞེས་སོགས་མཐའ་ཡས་སོ། །གཉིས་པ་ནི། དེ་ལྟར་ཡིན་ཀྱང་ཆོས་དབྱིངས་བཅུས་སྒྲིབ་པ་བཅུ་སྤངས་པའི་སྒོ་ནས་རྗེས་ཐོབ་ཀྱི་ཡང་དག་པའི་ངེས་པ་འདྲེན་པའི་སྒོ་ནས་རྟོགས་པ་ལ་ཁྱད་པར་ཡོད་དེ། ཐམས་ཅད་ཀྱིས་ཀྱང་མཉམ་གཞག་ཏུ་ཆོས་ཉིད་དོན་དམ་པ་ཇི་ལྟ་བའི་ཚུལ་སྤྲོས་པའི་མཐའ་དང་བྲལ་བ་ན་ནམ་མཁའ་ལྟ་བུར་རྟོགས་ཤིང༌། རྗེས་ཐོབ་ཏུ་ཆོས་ཅན་ཀུན་རྫོབ་ཇི་སྙེད་པའི་ཚུལ་སྣང་ལ་རང་བཞིན་མེད་པ་སྒྱུ་མ་ལྟ་བུར་རྟོགས་ཏེ། རྣམ་པར་མི་རྟོག་པ་ལ་འཇུག་པའི་གཟུངས་ལས། རྣམ་པར་མི་རྟོག་པའི་ཡེ་ཤེས་ཀྱིས་ནི་ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་མཐོང་ངོ༌། །དེའི་རྗེས་ལས་ཐོབ་པའི་ཡེ་ཤེས་ཀྱིས་ནི་ཆོས་ཐམས་ཅད་དང་སྒྱུ་མ་ལ་སོགས་པ་བརྒྱད་དང་མཚུངས་པར་མཐོང་ངོ་ཞེས་གསུངས་པ་ལྟར་རོ། །སོ་སོས་ནི་ས་དང་པོར་ཆོས་ཀྱི་དབྱིངས་རང་གཞན་ཐམས་ཅད་ཀྱི་བདག་ཉིད་དུ་ཀུན་ཏུ་འགྲོ་བའི་ཚུལ་དུ་རྟོགས་ཤིང་དེ་བཞིན་དུ་ས་གཉིས་པར་རང་བཞིན་གྱིས་འོད་གསལ་བར་མཐོང་བས་མཆོག་གི་དོན་དང༌། གསུམ་པར་བསྟན་པ་ཆོས་ཐམས་ཅད་རྟོགས་པའི་རྒྱུ་མཐུན་པའི་དོན་དང༌། བཞི་པར་གང་ལ་ཡང་བདག་གི་བར་ཡོངས་སུ་འཛིན་པ་མེད་པའི་དོན་དང༌། ལྔ་པར་རྣམ་པར་དག་པའི་དབྱིངས་སུ་རང་གཞན་གྱི་རྒྱུད་རྣམས་ཐ་དད་མེད་པའི་དོན་དང༌།དྲུག་པར་ཉོན་མོངས་རྣམས་ནི་གློ་བུར་བ་ཡིན་གྱི་རང་བཞིན་མ་ཡིན་ལ། རང་བཞིན་གྱིས་རྣམ་པར་དག་པས་གསར་དུ་རྣམ་པར་དག་པ་མིན་པའི་དོན་དང༌། བདུན་པར་མདོ་ལ་སོགས་པའི་ཆོས་ཀྱི་མཚན་མ་ཐ་དད་མེད་པའི་དོན་དང༌། བརྒྱད་པར་མི་སྐྱེ་བའི་ཆོས་ལ་བཟོད་པ་ཐོབ་པས་ཉོན་མོངས་པ་བྲི་བ་དང་རྣམ་པར་བྱང་བ་འཕེལ་བ་མེད་པའི་དོན་དང༌།ཉོན་ཡིད་གནས་གྱུར་པས་རྣམ་པར་མི་རྟོག་པ་ལ་དབང་བའི་དོན་དང༌། དབང་ཤེས་གནས་གྱུར་པས་ཞིང་དག་པ་ལ་དབང་བའི་དོན་དང༌། དགུ་པར་ཡིད་ཤེས་གནས་གྱུར་པ་ལས་སོ་སོ་ཡང་དག་པར་རིག་པའི་ཡེ་ཤེས་ལ་དབང་བའི་དོན་དང༌། བཅུ་པར་ཇི་ལྟར་བཞེད་པ་བཞིན་སྤྲུལ་ནས་སེམས་ཅན་གྱི་དོན་བྱེད་པའི་འཕྲིན་ལས་ལ་དབང་བའི་གནས་ཀྱི་དོན་དུ་རྟོགས་ཏེ། དབུས་མཐའ་ལས། ཀུན་ཏུ་འགྲོ་དོན་མཆོག་གི་དོན། །རྒྱུ་མཐུན་དོན་གྱི་མཆོག་ཉིད་དང༌། །ཡོངས་སུ་འཛིན་པ་མེད་དོན་དང༌། །རྒྱུད་རྣམས་ཐ་དད་མེད་པ་དང༌། །ཉོན་མོངས་རྣམ་དག་མིན་དོན་དང༌། །ཐ་དད་མེད་པའི་དོན་ཉིད་དང༌། །བྲི་མེད་འཕེལ་བ་མེད་དོན་དང༌།༼བརྒྱད་པ་ལ)མི་རྟོག་དང་ཞིང་དང་(དགུ་བ་ལ)ཡེ་ཤེས་(བཅུ་བ་ལ)ལས་དག་པ། །༽དབང་ནི་རྣམ་པ་བཞི་ཡི་གནས། །ཞེས་གསུངས་པ་ལྟར་རོ། །ཁ་ཅིག་སྒྲོ་འདོགས་གཅོད་ཚུལ་ལ་ཁྱད་ཡོད་ཀྱང་རྟོགས་བྱའི་དོན་ལ་ཁྱད་པར་མེད་པའི་ཕྱིར་ཆོས་ཀྱི་དབྱིངས་རྟོགས་པ་ལ་ཁྱད་པར་མེད་དོ་ཞེས་ཀྱང་གསུངས་མོད་ཀྱི། གློ་བུར་གྱི་དྲི་མ་རིམ་གྱིས་སྤངས་པ་ལས་ཆོས་ཀྱི་དབྱིངས་རྟོགས་པའང་གོང་ནས་གོང་དུ་འཕེལ་བར་འགྱུར་ཏེ། ཆོས་དབྱིངས་བསྟོད་པ་ལས། ཇི་ལྟར་ཚེས་པའི་ཟླ་བ་ནི། །སྐད་ཅིག་སྐད་ཅིག་རྒྱས་པར་མཐོང༌། །དེ་བཞིན་ས་ལ་ཞུགས་རྣམས་ཀྱིས། །རིམ་གྱིས་རིམ་གྱིས་འཕེལ་བར་མཐོང༌། །ཞེས་གསུངས་པ་ལྟར་རོ། །སྤངས་རྟོགས་དེ་དག་རྒྱན་གྱི་ས་འགྲེལ་ལྟར་བཤད་པའོ། །ཉ་ཊཱིཀ་ལས་ཀྱང་ཆོས་ཉིད་ཀྱི་ངོ་བོ་རྟོགས་པ་ལ་ཁྱད་མེད་ཅིང་ཇི་སྙེད་པ་རྟོགས་པ་སོགས་ནི་ཁྱད་ཤིན་ཏུ་ཆེ་ལ་ཆོས་དབྱིངས་བཅུའི་སྒྲིབ་པ་སྤངས་པའི་སྒོ་ནས་རྟོགས་མ་རྟོགས་ཀྱི་ཁྱད་ཡོད་པར་བཤད་དོ། །ཡང་ཉ་ཊཱིཀ་ལས། ཁ་ཅིག་ཆོས་ཉིད་ལ་ལྡོག་པའི་ཆ་ཤས་ཡོད་ཀྱི་རྫས་ཀྱི་ཆ་མེད་པའོ་ཞེ་ན། ཆོས་ཐམས་ཅད་ཀྱི་ཆོས་ཉིད་དེ་སྤྱིའི་མཚན་ཉིད་ཀྱིས་སོ་སོར་གཅད་དུ་མེད་པར་བཤད་པ་དང་འགལ་ཞིང་གཅིག་ཏུ་བཤད་པ་དང་ཡང་འགལ་ལོ། །ཡང་སྒྲོ་བཏགས་སུ་ཡང་འགྱུར་ཏེ། ལྡོག་པ་ཐ་དད་པའི་ཐ་དད་དེ་ཡིན་པས་སོ། །ཞེས་པའི་ཁྱབ་པ་སྡེ་བདུན་མདོ་དང་བཅས་པར་བཤད་དོ། །ཞེས་གསུངས་པ་ལ་ཆོས་ཉིད་ལྡོག་ཆ་སོ་སོར་ཡོད་མེད་དང༌། ཐ་དད་ཡིན་ན་སྒྲོ་བཏགས་ཡིན་དགོས་མིན་དཔྱད། ཡང་ཉ་ཊཱིཀ་ལས། ཡང་མཐོང་ལམ་པ་ཆོས་ཅན། མཆོག་གི་དོན་ལ་སོགས་པ་ལ་སྒྲིབ་པ་སྤངས་པར་ཐལ། དེ་འདྲའི་ཆོས་ཉིད་མངོན་སུམ་དུ་རྟོགས་པས་སོ་ཞེ་ན། ཁྱབ་པ་མེད་དེ། དེ་ལ་ཆོས་གོམས་པ་གསལ་བས་རང་སྟོབས་ཀྱིས་ངེས་པ་དངོས་སུ་འདྲེན་པའི་སྒོ་ནས་མངོན་སུམ་དུ་རྟོགས་ན་དེར་འགྱུར་གྱི་མངོན་སུམ་དུ་མཐོང་བ་ཙམ་གྱིས་དེར་མི་འགྱུར་ཏེ། ཞེས་གསུངས་པ་ལ། འོ་ན་ཆོས་ཉིད་དང་ཆོས་ཉིད་མཆོག་གི་དོན་སོགས་མངོན་སུམ་དུ་མཐོང་བ་ལ་གེགས་བྱེད་ཀྱི་སྒྲིབ་པ་མེད་པར་ཐལ་བར་འགྱུར་རོ་ཞེ་ན་ཅུང་ཟད་དཔྱད་རྒྱུ་སྣང་ངོ༌། །ཡང་དབུ་མ་ཡིད་བཞིན་ནོར་བུ་ལས། ཉན་ཐོས་སོགས་ཀྱིས་དད་པས་རྟོགས་བྱ་ཙམ། །ས་བདུན་གནས་པའི་ཀྱང་ནི་མངོན་སུམ་མིན། །མཛོད་ནང་ནོར་བཞིན་ཕྱོགས་མགོ་མཐོང་བ་ཙམ། །དག་སར་གནས་པའི་ཟུར་ཙམ་འོལ་སྤྱི་ཙམ། །མཐའ་དག་མ་ལུས་གཟིགས་པ་སངས་རྒྱས་ཉིད། །ཅེས་དང༌། ལྷན་ཐབས་འོད་བརྒྱ་འབར་བ་ལས། སེམས་འདིའི་རང་བཞིན་གནས་ལུགས་བདེ་གཤེགས་སྙིང་པོ་དེ་ཡིན། འདི་རྫོགས་པའི་སངས་རྒྱས་ཀྱིས་ཇི་ལྟ་བ་རང་དེ་མཁྱེན། བྱང་སེམས་ས་བཅུ་པ་པས་གསལ་བར་མཐོང༌། བརྒྱད་པ་དགུ་པ་གཉིས་ཀྱི་འོལ་སྤྱི་ཙམ་མཐོང༌། མ་དག་ས་བདུན་ལ་གནས་པས་ཟུར་ཙམ་མཐོང༌། ཉན་རང་འཕགས་པ་དང༌། གསང་སྔགས་ཀྱི་ཐབས་ཟབ་མེད་ན་བྱང་སེམས་སོ་སྐྱེ་རྣམས་ཀྱིས་དད་པས་རྟོགས་བྱ་ཡིན་གྱི་དངོས་སུ་མཐོང་བ་མེད། སོ་སོ་སྐྱེ་བོ་ཕལ་པ་རྣམས་ཀྱིས་དད་པས་ཀྱང་མི་རྟོགས་ཏེ། ཞེས་གསུངས་པའི་ཕྱིར་རོ། །