གཉིས་པ་ཐོབ་པ་མི་ཉམས་པར་བསྲུང་བའི་ཚུལ

གཉིས་པ་ཐོབ་པ་མི་ཉམས་པར་བསྲུང་བའི་ཚུལ་ནི།

བྱང་སེམས་ཀྱི་སྡེ་སྣོད་ལ་མཁས་པའི་བཤེས་གཉེན་དམ་པ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་བྱང་ཆུབ་སེམས་དཔའི་བསླབ་པའི་གནས་རྣམས་ཤེས་པར་བྱ་ཞིང༌། ཁྱད་པར་དུ་མི་མཐུན་ཕྱོགས་རྩ་ལྟུང་དང་ཉེས་བྱས་རྣམས་ཤེས་དགོས་པས། དེ་ལ་ཐུན་མོང་གི་ཡན་ལག་བྱང་སྡོམ་ཐོབ་ལ་མ་བཏང་བ་དང༌། བསམ་པ་རྣལ་དུ་གནས་པ་གཉིས་ཀུན་ལ་དགོས་ཏེ། བླང་དོར་རབ་གསལ་འགྲེལ་བ་ལས། རྟེན་བྱང་ཆུབ་སེམས་དཔའི་སྡོམ་པ་ཐོབ་པ་དང༌། ཤེས་པ་རང་བཞིན་དུ་གནས་པ་སྟེ་ཐུན་མོང་གི་ཡན་ལག་གཉིས་དང༌། ཞེས་གསུངས་སོ། །ཐུན་མོང་མ་ཡིན་པ་སོ་སོར་བཤད་པ་ལ། ལྷན་ཐབས་འོད་བརྒྱ་འབར་བ་ལས། ཁྱད་པར་དུ་འཇུག་སྡོམ་ལ་རྩ་བ་བཞི་དང་སྦོམ་པོ་ཞེ་དྲུག་སྤོང་བ་སོགས་དང་ནམ་མཁའི་སྙིང་པོའི་མདོ་ལས་རྩ་ལྟུང་བཅུ་བཞི་གསུངས་པ། ཞེས་གསུངས་པ་ལྟར་ཕམ་པའམ་རྩ་ལྟུང་གི་སྡེ་ཚན་དང༌། སྦོམ་པོའམ་ཉེས་བྱས་ཀྱི་སྡེ་ཚན་གཉིས་ལས། དང་པོ་ལ་ལྔ་ལས། དང་པོ་རྩ་ལྟུང་སོ་སོའི་རང་བཞིན་ནི། ༡ དཀོན་མཆོག་མཆོད་པ་སོགས་ཀྱི་ཕྱིར་མིན་པར་རྙེད་པ་ཟས་གོས་སོགས་དང༌། བཀུར་སྟི་ཁྲི་སྟན་སོགས་ཀྱིས་རྙེད་བཀུར་གང་རུང་ལ་ཆགས་པས་ཀུན་ནས་བསླངས་ཏེ་ཡུལ་སྨྲ་ཤེས་དོན་གོ་བ་རང་དང་རིགས་མཐུན་པའི་འགྲོ་བ་ལ། རང་གི་ཡོན་ཏན་དང་གཞན་གྱི་སྐྱོན་ལས་བརྩམས་ཏེ་བདག་བསྟོད་གཞན་སྨོད་པ་གཉིས་ཀའམ་གང་རུང་བརྗོད་པ་ཕ་རོལ་བོས་དོན་གོ་བ་ན། བདག་བསྟོད་གཞན་སྨོད་ཀྱི་རྩ་ལྟུང༌། འདི་ལ་བདག་བསྟོད་དང་གཞན་སྨོད་ཀྱི་རྩ་ལྟུང་གཉིས་སོ། །༢ སློང་པ་པོ་ཆོས་དང་ནོར་དེ་དག་སྟེར་བའི་མགོན་གཞན་མེད་པ་རང་གི་དྲུང་དུ་སློང་དུ་འོངས་པ་ལ་དེ་ལ་མི་གནོད་པའི་ཆོས་དང་ནོར་སོགས་རང་ལ་ཡོད་བཞིན་དུ་སེར་སྣས་ནོན་ནས་མི་སྟེར་བར་ཐག་བཅད་པ་ན། སེར་སྣས་ཆོས་ནོར་མི་སྟེར་བའི་རྩ་ལྟུང༌། དབྱེ་ན། ཆོས་དང་ནོར་མི་སྟེར་བའི་རྩ་ལྟུང་གཉིས་སོ། །༣ རང་དང་རིས་མཐུན་པའི་འགྲོ་བ་དོན་གོ་བ་ལ། ཁྲོས་ནས་ཚིག་རྩུབ་སྨྲ་ཞིང་ལུས་སེམས་དེ་དང་འབྲེལ་བས་བརྡེགས་པ་དང་གོ་རར་འཇུག་པ་སོགས་མཐོ་འཚམས་པའམ། སྔར་རང་ལ་གནོད་པ་བྱས་པ་ད་ལྟ་བསམ་པ་ཐག་པས་ཤད་སྦྱང་དུས་དང་མཐུན་པ་དང་ཆོས་དང་མཐུན་པར་བཟོད་གསོལ་བྱས་པ། འཁོན་འཛིན་གྱིས་མི་ཉན་ཞིང་བཟོད་པ་ཁས་མི་ལེན་ན། བཤགས་ཀྱང་མི་ཉན་པར་གཞན་ལ་འཚོགས་པའི་རྩ་ལྟུང༌། དབྱེ་ན། འཚོགས་པ་དང་ཤད་སྦྱང་མི་ལེན་པའི་རྩ་ལྟུང་གཉིས་སོ། །༤ ཟབ་རྒྱས་གཉིས་ཀ་སྟོན་པའི་ཐེག་ཆེན་གྱི་སྡེ་སྣོད་སྤྱི་ལ་འདི་སངས་རྒྱས་ཀྱིས་གསུངས་པ་མིན་ནོ། །ཞེས་སྐུར་བ་འདེབས་པའམ། ཆོས་ལྟར་སྣང་ཕྱི་རོལ་བའི་བསྟན་བཅོས་ལ་རང་ཉིད་དགའ་བཞིན་གཞན་ལ་སྟོན་པ་ན། ཐེག་ཆེན་སྤོང་ཞིང་དམ་ཆོས་ལྟར་སྣང་སྟོན་པའི་རྩ་ལྟུང༌། དབྱེ་ན། ཐེག་ཆེན་སྤོང་བ་དང་དམ་ཆོས་ལྟར་སྣང་སྟོན་པའི་རྩ་ལྟུང་གཉིས་སོ། །འདི་བཞི་བྱང་ས་ལྟར་སྡོམ་པ་ཉི་ཤུ་བ་ལས། ཉེས་པ་བཞི་བོ་དེ་དག་ཀྱང་གང་ཞེ་ན། རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང༌། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང༌། གཞན་གྱི་བཤགས་ཀྱང་མི་ཉན་པར། །ཁྲོས་པས་གཞན་ལ་འཚོག་པ་དང༌། །ཐེག་པ་ཆེན་པོ་སྤོང་བྱེད་ཅིང༌། །དམ་ཆོས་འདྲར་སྣང་སྟོན་པའོ། །ཞེས་གསུངས་སོ། །༥ སངས་རྒྱས་དངོས་སམ་སྐུ་གཟུགས་དང་ལུང་རྟོགས་ཀྱི་ཆོས། དགེ་འདུན་སོ་སྐྱེ་དགེ་སློང་བཞི་ཡན་འཕགས་པའི་གང་ཟག་རེ་རེ་སྟེ། དཀོན་མཆོག་གང་རུང་ལ་ཕུལ་བའི་རྫས་མ་བྱིན་པར་ལེན་པའི་ལས་ལམ་དུ་འགྱུར་བའི་མཐའ་ཚད། ཀུན་སློང་ཉོན་མོངས་ཅན་གྱིས་རང་མི་དབང་ཡང་གཏན་དུ་འབྲལ་འདོད་ཀྱིས་རང་དགེ་འདུན་དེའི་ནང་དུ་མི་གཏོགས་པས། སྦྱོར་བ་འཕྲོག་གམ་འཕྲོག་ཏུ་བཅུག་པས་རང་གཞན་གང་རུང་གི་ཆེད་དུ་བླངས་ཏེ་ཐོབ་བློ་སྐྱེས་ན། དཀོན་མཆོག་གི་དཀོར་འཕྲོག་པའི་རྩ་ལྟུང༌། དབྱེ་ན། དཀོན་མཆོག་གསུམ་གྱི་དཀོར་འཕྲོག་པའི་རྩ་ལྟུང་གསུམ་ཡོད་དོ། །༦ ཐེག་པ་གསུམ་རང་རང་གི་ལམ་ཡོངས་རྫོགས་སྟོན་པའི་ཐེག་པ་གསུམ་གྱི་སྡེ་སྣོད་གང་རུང་ལ། འདི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྐུར་བ་བཏབ་ན་དམ་ཆོས་སྤོང་བའི་རྩ་ལྟུང༌། དབྱེ་ན། ཐེག་ཆེན་གྱི་ཟབ་རྒྱས་གཉིས་དང་ཉན་ཐོས་ཀྱི་བདེན་བཞི་དང༌། རང་རྒྱལ་གྱི་རྟེན་འབྲེལ་བཅུ་གཉིས་སྟོན་པའི་སྡེ་སྣོད་གསུམ་སྤངས་པའི་རྩ་ལྟུང་གསུམ། ༧ ནང་པའི་རབ་བྱུང་བསླབ་པའི་གཞི་བཟུང་མ་བཟུང་དང་ཚུལ་འཆལ་དང་ཚུལ་ལྡན་གང་རུང་དགེ་སློང་བཞིར་མ་ཚང་བ་ལ། གནོད་ཅིང་འཚེ་བའི་བསམ་པས། གོས་ངུར་སྨྲིག་འཕྲོག་པ་དང་རབ་བྱུང་ལས་ ཕབ་སྟེ་ཁྱིམ་ན་གནས་པར་བྱེད་པ་གང་རུང་བྱས་ན། ངུར་སྨྲིག་འཕྲོག་པ་དང་རབ་བྱུང་ལས་ཕབ་པའི་རྩ་ལྟུང༌། དབྱེ་ན། ངུར་སྨྲིག་འཕྲོག་པ་དང༌། རབ་བྱུང་ལས་ཕབ་པའི་རྩ་ལྟུང་གཉིས་སོ། །༨ ཕ་དང་མ་དང་དགྲ་བཅོམ་པ་བསད་པ་དང་དགེ་འདུན་གྱི་དབྱེན་བྱས་པ་དང་དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་ལྔ་བོ་གང་རུང་བྱས་ན་མཚམས་མེད་བྱེད་པའི་རྩ་ལྟུང༌། དབྱེ་ན། མཚམས་མེད་ལྔའི་རྩ་ལྟུང་ལྔ་ཡོད་དོ། །༩ ལས་འབྲས་དང་སྐྱེ་བ་སྔ་ཕྱི་མེད་དོ་ཞེས་ཞེ་ནས་སྐུར་བ་འདེབས་ན་ལོག་ལྟའི་རྩ་ལྟུང༌། ༡༠ གྲོང་དང་གྲོང་ཁྱེར་དང་ལྗོངས་དང་ཡུལ་འཁོར་གང་རུང་གཞིག་པའི་བསམ་པ་ཉོན་མོངས་ཅན་གྱིས་ཀུན་ནས་བསླང་སྟེ་ཐབས་གང་ཡང་རུང་བས་བཤིག་ན། གྲོང་གི་གནས་སོགས་འཇོམས་པའི་རྩ་ལྟུང༌། དབྱེ་ན། གྲོང་གྲོང་ཁྱེར་ལྗོངས་ཡུལ་འཁོར་བཞི་འཇོམས་པའི་རྩ་ལྟུང་བཞིའོ། །༡༡ བློ་མ་སྦྱངས་པ་ལ་སྟོང་ཉིད་བསྟན་ན་སྐྲག་པར་འགྱུར་ཞིང་རྫོགས་བྱང་དུ་སེམས་བསྐྱེད་པ་དང་ལྡན་པའི་སེམས་ཅན་ལ་སྣོད་མ་བརྟགས་པར་སྟོང་ཉིད་བསྟན་པས་སྐྲག་ནས་སེམས་བསྐྱེད་ལས་ལོག་སྟེ་ཐེག་དམན་གྱི་སེམས་བསྐྱེད་ན་བློ་སྦྱངས་མ་བྱས་པ་ལ་སྟོང་ཉིད་བསྟན་པའི་རྩ་ལྟུང༌། ༡༢ སེམས་བསྐྱེད་ནས་ཐེག་ཆེན་ལ་ཞུགས་པའི་གང་ཟག་ལ་ཁྱོད་ཀྱིས་ཕྱིན་དྲུག་ལ་སྤྱད་པ་དང་འཚང་རྒྱ་བར་མི་ནུས་ཀྱི་ཉན་རང་གི་སེམས་བསྐྱེད་དང་འཁོར་བ་ལས་ཐར་བར་འགྱུར་རོ། །ཞེས་སྨྲས་པས་ཡུལ་དེ་རྫོགས་བྱང་ལས་ལོག་སྟེ་ཐེག་དམན་གྱི་སེམས་བསྐྱེད་ན་རྫོགས་བྱང་ལས་བཟློག་པའི་རྩ་ལྟུང༌། ༡༣ སོ་ཐར་གྱི་ཚུལ་ཁྲིམས་ལ་ཚུལ་བཞིན་དུ་གནས་པ་ལ་སོ་ཐར་གྱི་ཚུལ་ཁྲིམས་དག་པས་ཅི་ཞིག་བྱ་རྫོགས་བྱང་དུ་སེམས་བསྐྱེད་ལ་ཐེག་ཆེན་ལྷོགས་ཤིག་དེ་ཙམ་གྱིས་སྒོ་གསུམ་གྱི་ཉེས་སྤྱོད་ཐམས་ཅད་དག་པར་འགྱུར་རོ་ཞེས་སྨྲ་བས་ཡུལ་དེས་སོ་ཐར་གྱི་ཚུལ་ཁྲིམས་ལས་ལོག་ན་སོ་ཐར་སྤོང་བའི་རྩ་ལྟུང༌། ༡༤ ཉན་རང་གི་ཐེག་པ་གང་རུང་ལ་ཇི་ཙམ་བསླབས་ཀྱང་ཉོན་མོངས་མ་ལུས་པ་སྤོང་མི་ནུས་ཞེས་བསམ་པ་ཐག་པ་ནས་སྐུར་བ་བཏབ་ན་ཉན་རང་གི་རྟོགས་པའི་ཆོས་ལ་སྐུར་བའི་རྩ་ལྟུང༌།གཞན་གྱི་རྙེད་བཀུར་ལ་ཕྲག་དོག་གིས་རང་རྙེད་བཀུར་སོགས་ཀྱི་ཕྱིར་ཐེག་ཆེན་འདོན་པ་དང་ཀློག་པ་དང་སྟོན་པ་སོགས་བྱེད་བཞིན་དུ་བདག་ནི་རྙེད་བཀུར་སོགས་ལ་མི་བལྟ་བའི་ཐེག་ཆེན་པ་ཡིན་གྱི་གཞན་ནི་མིན་ནོ། །ཞེས་རྫུན་གྱིས་བསྟོད་སྨད་སོ་སོར་སྨྲས་ཏེ་དོན་གོ་ན་ཚིགས་བཅད་རྒྱུ་ཡིས་གཞན་སྨོད་པའི་རྩ་ལྟུང་ཡིན། འདི་རྩ་ལྟུང་དང་པོའི་བྱེ་བྲག་ཡིན་པས་ཟུར་དུ་མི་བགྲང་ངོ༌། །༡༥ ཕ་རོལ་པོས་དོན་གོ་བ་ལ་ཕྲག་དོག་ལས་གཞན་པའི་ཉོན་མོངས་ཅན་གྱི་བསམ་པས་སྟོང་ཉིད་བསྟན་ནས་འདི་ནི་ཁོ་བོས་མངོན་སུམ་དུ་བྱས་ནས་བསྟན་གྱི་ཁྱོད་ཀྱིས་ཀྱང་དེ་ལྟར་སྒོམས་ཤིག་དང་ཁོ་བོ་དང་འདྲ་བར་འགྱུར་རོ་ཞེས་རྫུན་སྨྲ་བ་ཕ་རོལ་བོས་དོན་གོ་ན་མི་ཆོས་བླ་མ་སྨྲ་བའི་རྩ་ལྟུང༌། ༡༦ རང་གི་དགེ་སྦྱོང་ལ་ཆད་པས་གཅོད་པ་ན་དགེ་སྦྱོང་དེས་དགེ་སློང་གཅིག་གམ་ཕྱོགས་བཞིའི་དགེ་འདུན་དང་དཀོན་མཆོག་ལ་ཕུལ་བའི་ཡོ་བྱད་རྐུས་སམ་རྐུར་བཅུག་ནས་གསུག་ཏུ་ཕུལ་བ་ཐོབ་པ་ན་དཀོན་མཆོག་གི་དཀོར་བྱིན་པ་ལེན་པའི་རྩ་ལྟུང༌། འདི་ནི་རྒྱལ་བློན་སོགས་ཀྱི་དཀོན་མཆོག་གི་དཀོར་རམ་དགེ་འདུན་དང་དགེ་སློང་ལ་ཆད་པ་བཅད་པའི་ཡོ་བྱད་དེ་རང་ལ་ཕུལ་བའི་ཚེ་བླངས་ནས་ཐོབ་པ་ན་འབྱུང་བར་འགའ་ཞིག་ན་གསུངས་སོ། །༡༧ ཆོས་སྤྱོད་པའི་དགེ་སློང་རྣམས་ལ་བརྩེ་བའི་བསམ་པས། ཞི་ལྷག་དང་མཐུན་པའི་ཡིད་བྱེད་འདོར་བ་དང་ཉོན་མོངས་འཕེལ་བའི་ཁྲིམས་བཅས་ཏེ་ཞི་གནས་འདོར་བར་བྱེད་པའམ། བསམ་གཏན་པ་ལ་སྡང་སེམས་ཀྱིས་སྤོང་བ་ལ་བརྩོན་པའི་དགེ་སློང་སོ་སྐྱེ་བཞི་མ་ལོངས་པའི་ལོངས་སྤྱོད་གང་ཡང་རུང་བ་མ་བྱིན་པར་བླངས་ནས་ཁ་ཏོན་པ་ལ་བྱིན་ན་ཁྲིམས་ངན་འཆའ་བ་སོགས་ཀྱི་རྩ་ལྟུང༌། རྩ་ལྟུང་ལྔ་བ་ནས་འདི་བར་བཅུ་གསུམ་མམ་བཅུ་བཞི་ནམ་སྙིང་གི་མདོ་ལྟར་བསླབ་བཏུས་སུ་གསུངས་སོ། །༡༨ བྱང་ཆུབ་ཀྱི་སེམས་གཏོང་ན་བྱང་ཆུབ་སེམས་འདོར་གྱི་རྩ་ལྟུང༌། འདི་ཐབས་ལ་མཁས་པའི་མདོ་ལས་སོ། །གཉིས་པ་བྱེད་པའམ་ཉེས་དམིགས་ནི། རྩ་ལྟུང་གཅིག་བྱུང་ན་ཡང་ཚེ་དེ་ལ་ས་དང་པོ་ཐོབ་མི་ནུས་པ་དང༌། དེ་དང་ཉེ་བའི་རྒྱུ་ཚོགས་རྒྱ་ཆེན་པོ་སྔར་ཡོད་འཕེལ་བ་དང༌། སྔར་མེད་སྐྱེད་པའི་སྐལ་བ་མེད་ལ། རྩ་ལྟུང་ཡང་ཡང་བྱུང་ན་ལྟ་ཅི་སྨོས། དེའི་ཕྱིར་ཕམ་པའམ་རྩ་ལྟུང་བྱུང་ཡང་བྱང་སེམས་ཀྱི་སྡོམ་པ་བླང་དུ་ཡོད་པས་སོ་སྙམ་དུ་མི་བསམ་པར་རྩ་ལྟུང་གིས་གཏན་ནས་མ་གོས་པ་སྲོག་བསྡོས་ཏེ་འབད་པར་བྱའོ། །གསུམ་པ་ཀུན་དཀྲིས་ཀྱི་དབྱེ་བ་ནི། རྩ་ལྟུང་དགུ་བ་དང་བཅོ་བརྒྱད་པ་གཉིས་སྐྱེས་ཙམ་ནས་རྩ་ལྟུང་དུ་འགྱུར་བས་ཀུན་དཀྲིས་ཆེན་པོ་ཚང་མི་དགོས་ལ། རྩ་ལྟུང་གཞན་རྣམས་བཅུ་དྲུག་ལ་ཐུན་མོང་གི་ཡན་ལག་ཀུན་དཀྲིས་ཆེན་པོ་ཚང་དགོས་པར་བླང་དོར་རབ་གསལ་ལས་ གསུངས་པས། དེའི་ཡན་ལག་བཞི་ནི། ལྟུང་བ་དེའི་ཀུན་སློང་བྱུང་བ་ནས་བརྩམས་ཏེ་དངོས་གཞི་རྫོགས་པའི་དེ་མ་ཐག་ཡན་ཆད་དུ་དགོས་པས། དང་པོ་རྒྱུན་མ་ཆད་པར་ཀུན་ཏུ་སྤྱོད་པ་ནི། དུས་དེ་དག་གི་བར་ལྟུང་བ་དེ་སྤྱོད་འདོད་མ་ལོག་པའོ། །གཉིས་པ་ངོ་ཚ་ཁྲེལ་ཡོད་ཆུང་ངུ་ཙམ་ཡང་མི་སྐྱེ་བ་ནི། འདི་ནི་བདག་གི་བྱ་བའི་ཆ་མ་ཡིན་ནོ་སྙམ་ནས་རང་རྒྱུ་མཚན་དུ་བྱས་ཏེ་འཛེམ་ན་ངོ་ཚ་ཤེས་པ་དང༌། གཞན་གྱིས་སྨོད་ན་མི་རུང་ངོ་ཞེས་གཞན་རྒྱུ་མཚན་དུ་བྱས་ཏེ་འཛེམ་པ་ཁྲེལ་ཡོད་པ་ཡིན་ལ། དུས་དེར་དེ་གཉིས་ཆུང་ངུ་ཙམ་ཡང་མི་སྐྱེས་པའོ། །གསུམ་པ་དེས་མགུ་བར་བྱེད་ཅིང་དེ་ལ་དགའ་བ་ནི། དུས་དེར་མགུ་བ་ཉེས་སྤྱོད་དེ་ལ་དགའ་བ་དང༌། དགའ་བ་ཉེས་སྤྱོད་དེ་སྒྲུབ་པའི་སྦྱོར་བ་ལ་དགའ་བ་སྐྱེས་པའོ། །བཞི་བ་དེ་ཉིད་ལ་ཡོན་ཏན་དུ་བལྟ་བ་ནི། དུས་དེར་ཉེས་སྤྱོད་དེ་ལ་ཉེས་དམིགས་སུ་མི་བལྟ་བར་འདོད་པའི་ཕྱོགས་སུ་བལྟ་བའོ། །དེ་བཞི་ག་ཚང་ན་ཀུན་དཀྲིས་ཆེན་པོ་སྟེ་རྩ་ལྟུང་དང༌། ཕྱི་མ་འདིའི་སྟེང་དུ་དང་པོ་གསུམ་ལས་གཉིས་ཙམ་དང༌། གཅིག་ཙམ་དང༌། ཕྱི་མ་གཅིག་པུ་ཙམ་ཟག་པ་འབྲིང་དང༌། ཕྱི་མ་མེད་ན་གཞན་གསུམ་ག་ཚང་ཡང་ཟག་པ་ཆུང་ངུ་ཡིན་པས། དེ་གཉིས་ཕམ་པའི་སྡེར་གཏོགས་པའི་ཉེས་བྱས་སོ། །ཉེས་དམིགས་སུ་བལྟ་བ་ངོ་ཚ་ཁྲེལ་ཡོད་ཀྱི་ རྒྱུ་ཡིན་པས། ངོ་ཚ་ཁྲེལ་ཡོད་བྱུང་ན་དེ་ཡོད་པས་ཁྱབ་ཀྱང༌། དེ་ཡོད་ན་ངོ་ཚ་ཁྲེལ་ཡོད་ཡོད་མི་དགོས་སོ། །བཞི་བ་སླར་གསོ་མི་རུང་བའི་ཁྱད་པར་ནི། ཉེ་བར་འཁོར་གྱིས་ཞུས་པའི་མདོ་དང༌། ཐབས་ལ་མཁས་པའི་མདོ་ལྟར་ཐེག་དམན་པ་ཉོན་མོངས་སྤོང་ཕྱིར་མགོ་ལ་མེ་ཤོར་བ་གསོད་པ་ལྟར་བརྩོན་ལ། ཕམ་པ་བྱུང་ན་དེ་ལྡོག་པས་ཕམ་པ་ཆབ་བཅས་སླར་མི་སྐྱེ་ལ། འཆབ་མེད་ཅན་ལ་རྣམ་དག་མི་སྐྱེའོ། །བྱང་སྡོམ་ནི་རྩ་ལྟུང་བྱུང་ཡང་དགོས་པའི་གཙོ་བོ་མི་ལྡོག་པས་སླར་རྣམ་དག་སྐྱེའོ། །