བདུན་པ་རྒྱུ་མཚན་གང་གིས་སྦྱར་བ།

བདུན་པ་རྒྱུ་མཚན་གང་གིས་སྦྱར་བ་ལ་གསུམ་སྟེ།

དགག་བྱའི་རྒྱུ་མཚན་དང༌།དགོས་པའི་རྒྱུ་མཚན་དང༌། དགག་དགོས་མེད་པའི་རྒྱུ་མཚན་ནོ། །དང་པོ་ལ་བཞི་ལས། དང་པོ་དགག་བྱ་ངོས་གཟུང་བ་ནི། འདིར་དགག་བྱ་གང་ཞེ་ན། ཉེས་སྐྱོན་གང་ཞིག་འདུལ་བའི་ཚུལ་ཁྲིམས་སུ་བཅའ་བའི་སྒོ་ནས་དགག་པར་བྱ་བ་སྟེ། དངོས་སམ་བརྒྱུད་པས་རང་གཞན་གྱི་རྒྱུད་ལ་ལམ་གོང་མ་སྐྱེ་བའི་གེགས་ཀྱི་བྱེ་བྲག་གོ། །དགག་བྱ་ལ་ཕྱེ་ན་གཉིས་ཏེ། སྤྱིའི་དགག་བྱ་དང༌། སྒོས་ཀྱི་དགག་བྱའོ། །དང་པོ་ནི། ཚོད་ཡོངས་སུ་མི་ཤེས་པ་དང༌། ཧ་ཅང་ཐལ་པར་འགྱུར་བ་དང༌། དེའི་རིགས་དང་ལྡན་པ་དང་གསུམ་སྟེ། སྒོས་ཀྱི་དགག་བྱ་ལ་ཐུག་པར་འགྱུར་མི་འགྱུར་གྱི་ཚོད་མི་ཤེས་པ་དང༌། བཅས་པའི་རྒྱ་རལ་ཏེ་ཧ་ཅང་ཐལ་བར་འགྱུར་བ་དང༌། བྱ་བ་དེ་ལ་གནས་སྐབས་དེ་ན་སྒོས་ཀྱི་དགག་བྱ་མེད་ཀྱང་སྤྱིར་བྱ་བ་དེ་ལ་དགག་བྱ་དེ་ཡོད་པའི་རིགས་ཅན་ཡིན་པའོ། །དེ་དག་གང་ནས་བཤད་ན་འོད་ལྡན་ལས། མྱོས་པར་འགྱུར་བའི་ཚོད་ཡོངས་སུ་མི་ཤེས་པའི་ཕྱིར་དང༌། ཧ་ཅང་ཐལ་བར་འགྱུར་བའི་ཕྱིར་དང༌། དེའི་རིགས་དང་ལྡན་པ་ཉིད་ཡིན་པས། ཞེས་སོ། །དེ་དག་ནི་བཅས་པ་རྣམ་འཇོག་གི་དགག་བྱ་ཞེས་ཀྱང་བྱའོ། །ཞེས་གསུངས་སོ། །སྤྱིའི་དགག་བྱ་དང་བཅས་པ་རྣམ་འཇོག་གི་དགག་བྱ་གཉིས་དོན་གཅིག་གོ། ། གཉིས་པ་སྒོས་ཀྱི་དགག་བྱ་ནི། བྱ་བ་དེ་འབྲེལ་གྱི་དགག་བྱ་ཞེས་ཀྱང་བྱ་སྟེ། ས་རྐོས་པས་སྲོག་ཆགས་ལ་གནོད་པ་དང༌། དོན་དང་བྱ་བ་མང་བ་དང༌། གཞན་མ་དད་པ་སྐྱེ་བ་ལྟ་བུའོ། །སྒོས་ཀྱི་དགག་བྱ་དང་བྱ་བ་དེ་འབྲེལ་གྱི་དགག་བྱ་གཉིས་དོན་གཅིག་གོ། །