གསུམ་པ་རྗེས་ཀྱི་ཁྲིད།

འཕོ་བའི་གདམས་པ།

ཐུན་མོང་གི་འཕོ་བ།

ཞི་བའི་བསམ་པས་འཕོ་བ།

གསུམ་པ་རྗེས་ཀྱི་ཁྲིད་ལ་བཞི་སྟེ། འཕོ་བའི་གདམས་པ་དང་། བར་དོའི་གདམས་པ་དང་། གསང་བར་གདམས་པ་དང་། ཉམས་སུ་བླང་པར་གདམས་པའོ། །

དང་པོ་འཕོ་བའི་གདམས་པ་ལ་གཉིས་ཏེ། ཐུན་མོང་གི་འཕོ་བ་དང་། ཐུན་མོང་མ་ཡིན་པའི་འཕོ་བའོ། །

དང་པོ་ཐུན་མོང་གི་འཕོ་བ་ལ་ལྔ་སྟེ། ཞི་བའི་བསམ་པས་འཕོ་བ་དང་། འདུ་ཤེས་བཅུ་ཡི་འཕོ་བ་དང་། ཟུང་འཇུག་ཡི་དམ་གྱི་འཕོ་བ་དང་། བྱིན་བརླབས་བླ་མའི་འཕོ་བ་དང་། དཀོན་མཆོག་རྗེས་དྲན་གྱི་འཕོ་བའོ། །

དང་པོ་ཞི་བའི་བསམ་པས་འཕོ་བ་ནི། འཆི་བའི་དུས་ཀྱི་ཚེ་ཆགས་པ་དང་། ཞེ་སྡང་སྐྱེ་བའི་སེམས་ཡོད་སེམས་མེད་གང་ཡང་མིག་གིས་མཐོང་ས་དང་། རྣ་བས་ཚོར་སར་མེད་པ་གལ་ཆེ་སྟེ། ཆགས་སྡང་ཞི་བས་བསམ་པ་དེ་ཡི་ངང་ལ་ཤི་ན་ལྷ་ཉིད་དུ་སྐྱེ་བར་འགྱུར་རོ། །དྲི་མེད་འོད་ལས། འདིར་འཆི་བའི་དུས་སུ་དགེ་བའི་ལས་ཀྱི་དབང་གིས་ཞི་བའི་བསམ་པར་འགྱུར་ཏེ། སྙིང་སྟོབས་ཀྱི་ཡོན་ཏན་གྱི་བདག་ཉིད་དོ། །བསམ་པ་དེ་ཉིད་སྐྱེས་པར་གྱུར་ན་ཤི་བའི་མཐར་ལྷ་ཉིད་དུ་སྐྱེ་བར་འགྱུར་རོ། །ཞེས་གསུངས་པའི་དོན་ཏོ། །

འདུ་ཤེས་བཅུ་ཡི་འཕོ་བ།

གཉིས་པ་འདུ་ཤེས་བཅུ་ཡི་འཕོ་བ་ནི། འདུ་ཤེས་བཅུ་སྟན་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འཆི་བའི་དུས་ཀྱི་ཚེ་དགེ་སློང་གི་འདུ་ཤེས་བཅུ་མངོན་དུ་བྱའོ། །བཅུ་གང་ཞེ་ན། ཚེ་འདི་ལ་མ་ཆགས་པའི་འདུ་ཤེས་དང་། སེམས་ཅན་ཐམས་ཅད་ལ་བྱམས་པའི་འདུ་ཤེས་དང་། ཁོན་དུ་འཛིན་པ་ཐམས་ཅད་དོར་བའི་འདེུས་དང་། འཆལ་པའི་ཚུལ་ཁྲིམས་ཐམས་ཅད་བཤགས་པའི་འདུ་ཤེས་དང་། ཚུལ་ཁྲིམས་ཐམས་ཅད་ཡང་དག་པར་སླང་པའི་འདུ་ཤེས་དང་། ཉེས་པ་བྱས་པ་ཆེན་པོ་དག་ལ་ཡང་པའི་འདུ་ཤེས་དང་། དགེ་བའི་རྩ་བ་ཆུང་ངུ་དག་ལ་ཆེ་བའི་འདུ་ཤེས་དང་། འཇིག་རྟེན་ཕ་རོལ་དག་ལ་བྲོད་པའི་འདུ་ཤེས་དང་། འདུས་བྱས་ཐམས་ཅད་མི་རྟག་པའི་འདུ་ཤེས་དང་། ཆོས་ཐམས་ཅད་བདག་ཉིད་པའི་འདུ་ཤེས་དང་། མྱ་ངན་ལས་འདས་པ་ལ་ཞི་བའི་འདུ་ཤེས་མངོན་དུ་བྱའོ། །ཞེས་གསུངས་པའི་དོན་ཏོ། །

ཟུང་འཇུག་ཡི་དམ་གྱི་འཕོ་བ།

ཟུང་འཇུག་ཡི་དམ་གྱི་འཕོ་བ་ནི། འཆི་བའི་དུས་ཀྱི་ཚེ་སེམས་ཡོད་སེམས་མེད་ཐམས་ཅད་ལ་ཆགས་སྡང་སྤངས་ནས་ཡི་དམ་གྱི་ལྷ་གང་ཡིན་སྐད་ཅིག་དྲན་རྫོགས་སུ་བྱ་སྟེ། གཞན་དུ་མ་ཡེངས་པར་ཡི་དམ་གྱི་ལྷ་དེ་ལ་མོས་གུས་དང་དམིགས་པ་བརྩེ་གཅིག་ཏུ་གནས་པར་བྱའོ། །

བྱིན་བརླབས་བླ་མའི་འཕོ་བ།

བྱིན་བརླབས་བླ་མའི་འཕོ་བ་ནི། འཆི་བའི་དུས་ཀྱི་ཚེ། སེམས་ཡོད་སེམས་མེད་ཐམས་ཅད་ལ་ཆགས་སྡང་སྤངས་ནས། སྔར་གྱི་ཐུན་མོང་དང་། ཐུན་མོང་མ་ཡིན་པའི་བླ་མའི་རྣལ་འབྱོར་གང་བདེ་བ་སྐད་ཅིག་དྲན་རྫོགས་སུ་བྱའོ། །བླ་མ་དེ་ཉིད་ལ་མོས་གུས་རྩེ་གཅིག་པའི་ངང་ལ་གནས་པར་བྱའོ། །ནི་གུ་ཆོས་དྲུག་ལས་འབྲིང་དང་ཐ་མས་ཆགས་སྡང་སྤངས་བྱས་ནས། གང་ཞིག་མོས་གུས་དམིགས་པ་རྩེ་གཅིག་གིས། གྱེན་དུ་འཕང་ཞིང་སྨོན་ལམ་རྒྱན་པར་བྱ། ཞེས་གསུངས་པའི་དོན་ཏོ། །

དཀོན་མཆོག་རྗེས་དྲན་གྱི་འཕོ་བ།

ལྔ་པ་དཀོན་མཆོག་རྗེས་དྲན་གྱི་འཕོ་བ་ནི། འཆི་བའི་དུས་ཀྱི་ཚེ། ཚེ་འདིའི་ལུས་ལོངས་སྤྱོད་ལ་སོགས་པ་སེམས་ཡོད་སེམས་མེད་ཐམས་ཅད་ལ་ཆགས་པ་དང་སྡང་པ་སྤངས་ནས། དཀོན་མཆོག་ལ་བློ་ལིངས་ཀྱིས་གཏད་དེ། དཀོན་མཆོག་དེ་ཉིད་ལ་མོས་གུས་རྩེ་གཅིག་པའི་ངང་ནས་བདེ་བ་ཅན་ལ་སོགས་པ་དག་པའི་ཞིང་ཁམས་གང་མོས་སུ་འདུན་པ་རྩེ་གཅིག་ཏུ་གནས་པར་བྱའོ། །སྤྱོད་འཇུག་ལས། ཇི་སྲིད་སྐྱེས་བུ་བཞི་ཡིས་ནི། །དེ་ལས་དེ་ནི་མི་རྟག་པ། །དེ་སྲིད་དུ་ནི་ནགས་སུ་སོང་། །བཤེས་མེད་འཁོན་པའང་མེད་བྱས་ནས། །ལུས་འདི་གཅིག་པུ་དབེན་གནས་ཏེ། །སྔ་ནས་ཤི་དང་འདྲ་རྩེས་ནས། །ཤི་ནའང་མྱ་ངན་བྱེད་པ་མེད། །དྲུང་ན་འཁོད་པ་སུ་དག་ཀྱང་། །མྱ་ངན་གནོད་པ་བྱེད་མེད་པས། །འདི་ཡི་སངས་རྒྱས་རྗེས་དྲན་སོགས། །སུས་ཀྱང་གཡེངས་པར་འགྱུར་བ་མེད། །ཞེས་གསུངས་པའི་དོན་ནོ། །དེས་ན་འཆི་ཁ་མའི་རྩར་སྐྱབས་འགྲོ་དང་། དམིགས་པ་འདི་འདྲ་གསལ་འདེབས་དང་། སངས་རྒྱས་ཀྱི་བཀའ་ཡང་དག་གི་གསུང་རབས་ཀློག་པ་མ་གཏོགས་པ། སྡུག་བསྔལ་དང་། ངུ་ཆོ་དང་། གཡེང་འཚེ་མེད་པ་ནི་ཤིན་ཏུ་གལ་ཆེའོ། །འཕོ་བ་ལྔ་ཀའི་སྐབས་སུ་ནུབ་ཕྱོགས་བདེ་བ་ཅན་ནམ། ཤར་ཕྱོགས་མངོན་པར་དགའ་བའམ། བྱང་ཤམ་བྷལ་ལ་སོགས་པ་དག་པའི་ཤིང་ཁམས་གང་མོས་སུ་འདུན་པ་དྲག་པོའི་སྒོ་ནས་ཤེས་པ་འཕང་ཞིང་གཏད་དེ། དེར་སྐྱེ་བར་སྨོན་ལམ་དང་མོས་གུས་དུང་དུང་པ་བྱའོ། །བདག་ནི་འཆི་བའི་དུས་བྱེད་གྱུར་པ་ན། སྒྲིབ་པ་ཐམས་ཅད་དག་ནི་ཕྱི་བསལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོད། །དེར་སོང་ནས་ནི་སྨོན་ལམ་འདི་དག་ཀུན། །ཐམས་ཅད་མ་ལུས་མངོན་དུ་འགྱུར་བར་ཤོག །དེ་དག་མ་ལུས་བདག་གིས་ཡོངས་སུ་བཀང་། །འཇིག་རྟེན་ཇི་སྲིད་སེམས་ཅན་ཕན་བགྱིད་ཤོག །རྒྱལ་བའི་དཀྱིལ་འཁོར་བཟང་ཞིང་དགའ་དེར། །པད་མོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློ་ཡི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། ཞེས་གསུངས་པའི་དོན་ནོ། །

ཐུན་མོང་མ་ཡིན་པའི་འཕོ་བ།

གཉིས་པ་ཐུན་མོང་མ་ཡིན་པའི་འཕོ་བ་ནི། ནི་གུ་ཆོས་དྲུག་ལས། འཕོ་བྱ་འཕོ་བྱེད་བྲལ་བ་དབང་པོ་ཡང་རབ་སྟེ། ཞེས་པ་དང་། ཆོས་སྐུ་དེ་བཞིན་ཉིད་ཀྱི་འཕོ་བ་ཞེས་གསུངས་པའི་དོན། ཆོས་རྗེ་རིན་པོ་ཆེ་ཐམས་ཅད་མཁྱེན་པས་གསུངས་པའི་འཕོ་བའི་མན་ངག་ཁྱད་འཕགས་ཡིན་ལ། འཕོ་བ་འདི་གང་ཟག་ཇི་ལྟ་བུ་ཞིག་གིས་ཉམས་སུ་ལེན་ན། ཁྲིད་ཟབ་མོ་འདི་ཉིད་ཐོབ་ཅིང་། ངོ་ཡང་འདི་ལྟར་དུ་ལེན་པར་འཕྲོད་པའི་རྣལ་འབྱོར་པས་ཉམས་སུ་ལེན་ནོ། །འཆི་ཁའི་དུས་སུ་ཕྱི་དབུགས་ཆད་ནས་ནང་དབུགས་མ་ཆད་ཀྱི་བར་དུ། འོད་གསལ་རྒྱ་ཆེན་རབ་འབྱམས་ཚད་ལས་འདས་པ་འཆར་རོ། །དེ་ཡང་དགེ་བ་འབའ་ཞིག་བྱེད་པའི་སྐྱེས་བུ་དམ་པ་རྣམས་ལ་དགེ་བའི་ཆོས་ཉིད་སྐྱིད་པ། དགའ་བ། ཡིད་དུ་འོང་པ། ཕུན་སུམ་ཚོགས་པའི་འོད་གསལ་འཆར་རོ། །སྡིག་པ་ཅན་རྣམས་ལ་སྡིག་པའི་ཆོས་ཉིད་བཟོད་པར་དཀའ་བ། ཉམ་ང་བ། ཀྱི་ཡ་བ། མུན་ནག་དང་། གཅོང་རོང་དང་། གཤིན་རྗེའི་གཟུགས་ལྟ་མི་བཟོད་པ་སྣ་ཚོགས་པ་དང་། དམྱལ་བའི་སྣང་བ་ལ་སོགས་པ་འཇིགས་སུ་རུང་པའི་འོད་གསལ་སྣ་ཚོགས་པ་འཆར་རོ། །དེ་དག་གི་དོན་དཔལ་ལྡན་རྒྱུད་ལས། སེམས་ཙམ་སྔགས་ཀྱི་ངོ་བོ་ལྷ་ཡིས་ཡོངས་སུ་བསྐོར་བ་སྡུག་བསྔལ་དང་ནི་བདེ་བའི་རང་བཞིན་ཏེ། དམ་པ་རྣམས་ལ་ཞི་བའི་གཟུགས་ནི་རང་གིས་བྱས་པའི་ཉམས་མྱོང་མི་བཟད་རྣམས་ལ་མི་ཟད་པ། གང་གིས་ལས་གང་རབ་བྱས་རང་གི་སེམས་ལ་ཆོ་ག་བཞིན་དུ་དེའི་འབྲས་བུ་དེས་སྐྱེད་པ། འཇིག་རྟེན་དབང་པོ་སྣ་ཚོགས་གཟུགས་ཅན་སྲིད་གསུམ་སྐྱེད་མཛད་རྡོ་རྗེ་སེམས་དཔའ་ལ་ཡང་ཕྱག་འཚལ་ལོ། ཞེས་གསུངས་པའོ། །དེས་ན་སྡུག་བསྔལ་གྱི་ཆོས་ཉིད་འཇིགས་སུ་རུང་བ་སྣ་ཚོགས་པ་དང་། བདེ་བའི་ཆོས་ཉིད་ཡིད་དུ་འོང་བ་སྣ་ཚོགས་པ་འཆར་བ་དེའི་ཚེ་དགག་སྒྲུབ་བླང་དོར་ཆགས་སྡང་དང་། འཇིགས་སྐྲག་མེད་པར་གང་ཤར་བ་དེ་ཉིད་ལ་རིག་པ་རྩེ་གཅིག་ཏུ་གཏད་ནས་གནས་པར་བྱའོ། །རྗེ་ཏཻ་ལོ་པས། སྣང་བ་དགག་སྒྲུབ་མི་བྱ་རང་སོར་ཞོག །སྤང་བླང་མེད་ན་ཕྱག་རྒྱ་ཆེན་པོར་གྲོལ། ཞེས་པའི་དོན་ནོ། །ཕྱག་ཆེན་གའུ་མ་ལས། ཉིན་མཚན་བར་དོའི་འོད་གསལ་མ་བུར་བཅས། ཞེས་པའི་དོན། ད་ལྟ་ཉིན་མཚན་གྱི་རྣལ་འབྱོར་བསྒོམས་པས་མཐོང་པའི་འོད་གསལ་བུ་དང་འདྲ་ལ། འཆི་ཁའི་འོད་གསལ་ཆེན་མོ་མ་དང་འདྲའོ། །ད་ལྟར་གྱི་འོད་གསལ་ངོ་ལེགས་པར་འཕྲོད་པར་བྱས་ནས། འཆི་ཁའི་དུས་སུ་འོད་གསལ་ཆེན་མོ་ཤར་བའི་ཚེ། མའི་པང་དུ་བུ་འགྲོ་བ་ལྟ་བུར་ངོ་ཤེས་པ་དང་། སྔར་འགྲིས་ཀྱི་མི་དང་འཕྲད་པ་ལྟ་བུར་ངོ་ཤེས་པ་དང་། ཆུ་དང་ཆུ་འདྲེས་པ་ལྟ་བུར་ངོ་ཤེས་པ་ཤིན་ཏུ་གཅེས་སོ། །ཞེས་པའི་དོན་ཏོ། །ཆོས་རྗེ་རིན་པོ་ཆེ་ཐམས་ཅད་མཁྱེན་པས། འཕོ་བའི་མན་ངག་ཁྱད་འཕགས་སུ་འཕོ་བའི་འགག་དོན་གསུངས་པ་འདི་ལྟ་སྟེ། དེ་ཕྱིར་དང་པོའི་སངས་རྒྱས་གདོད་ནས་གྲོལ། །སངས་རྒྱས་ཀུན་པས་སྔར་སངས་རྒྱས་ཞེས་གསུངས། དེ་ཐོབ་དོན་དུ་ཟབ་མོའི་རྣལ་འབྱོར་མཆོག །ཡང་ཡང་གོམས་པས་ཚེ་འདིར་ཐོབ་པའམ། །འཆི་ཁ་བར་དོ་སྐྱེ་བདུན་ཚུར་བཅད་དུ། ངེས་པར་འཐོབ་ཅེས་དཔལ་གྱི་མགུར་ནས་གསུངས། གལ་ཏེ་ཚེ་འདི་ཉིད་ལ་མ་ཐོབ་ན། །འཆི་ཁར་ཐོབ་པར་བྱེད་པའི་གདམས་ངག་གཅེས། །དེ་ལ་སྡིག་སྤོང་དགེ་བ་བསྒྲུབས་པ་ཡི། དམ་ཚིག་མ་ཉམས་ཞེན་ཆགས་མེད་པ་ཅེས། དེས་ནི་འཆི་ཁའི་གོང་དུ་མ་བསྒོམ་ཀྱང་། འོད་གསལ་རབ་འབྱམས་ཇི་ཞིག་ལྟར་ལ་མཐོང་། མྱུར་དུ་འཆི་བའི་རྟགས་སུ་ཤེས་བྱས་ནས། །ཆགས་ཞེན་སྐྱེ་བའི་དངོས་ཀུན་སྦྱིན་པར་བཏང་། །འདུ་འཛི་ཀུན་སྤངས་དབེན་པའི་གནས་མཆོག་ཏུ། །ཉམས་རྟོགས་ཅན་གྱི་གྲོགས་དང་བཅས་པའམ། ཡང་ན་རང་ཉིད་གཅིག་པུར་གནས་བཅས་ནས། །རིག་པ་ཆོས་སྐུའི་དབྱིངས་སུ་འཕོ་བ་ལ། །དགའ་ཞིང་སྤྲོ་བའི་ངང་བཅས་འདི་ལྟར་བསམ། །འོད་གསལ་ཆོས་སྐུ་རྣམ་པ་ཐམས་ཅད་པའི། །རྣམ་པ་ཐམས་ཅད་སྔར་ཡང་མཐོང་མོད་ཀྱི། །རྒྱ་ཆེ་རབ་འཇམ་ཚད་འདས་མཐོང་པ་མེད། །ད་ནི་ཚད་འདས་རྩི་བགྲང་ལས་འདས་པ། །རྣམ་པ་སྣ་ཚོགས་མཐོང་པ་ཉམས་རེ་དགའ། །རྒྱལ་བའི་སྐུ་དང་འགྲོ་བ་བཟང་ངན་སོགས། །བཟང་ངན་དུ་མར་སྣང་ཡང་བཟང་ངན་མེད། །ཐམས་ཅད་ཆོས་སྐུའི་རྣམ་པར་རོལ་པ་ཡིན། །དེ་ཕྱིར་གང་ཤར་དེ་ལ་ལྟ་བ་ཙམ། །རེ་དོགས་སྤང་བླང་དགག་སྒྲུབ་མི་བྱེད་པར། །སྤྲོས་བྲལ་མཉམ་ཉིད་ངང་ལ་ལྷན་གྱིས་བཞག །དྲུང་ན་ཡོད་པས་གཡེང་འཚེ་མ་བྱས་ན། །ཕྱི་དབུགས་ཆད་ནས་ནང་དབུགས་ཆད་པའི་བར། ཉིན་ཞག་གསུམ་བཞི་ཡང་ན་ལྔ་དྲུག་སོགས། །འོད་གསལ་ངང་ལ་རྒྱལ་བ་བཞིན་དུ་གནས། །སྔོན་དུ་ཆེར་གོམས་ངོ་ཡང་ལེགས་འཕྲོད་ན། །རིག་པ་འོད་གསལ་དབྱིངས་ལ་ཐིམ་པར་འགྱུར། །མ་ཐིམ་ན་ཡང་གཞན་དུ་ལོ་ཟླ་ནི། །མང་པོ་འབད་མེད་བསྒོམས་པ་བས་ཀྱང་ལྷག །ཅེས་པའོ། །གཞན་ཡང་ནཱ་རོ་ཆོས་དྲུག་དུ་གྲོང་འཇུག་གི་འཕོ་བ་དང་། ནི་གུ་ཆོས་དྲུག་ཏུ་མཁའ་སྤྱོད་ཀྱི་འཕོ་བ་གསུངས་པ་ནི། རྣལ་འབྱོར་པ་རླུང་སེམས་ལས་སུ་རུང་པའི་རླུང་སེམས་ལ་དབང་ཐོབ་པའི་བྱ་བའོ།། །།

བར་དོའི་གདམས་པ།

གསུམ་པ་བར་དོའི་གདམས་པ་ནི། ཆོས་རྗེ་རིན་པོ་ཆེ་ཐམས་ཅད་མཁྱེན་པས་འཕོ་བའི་མན་ངག་ཁྱད་འཕགས་སུ་གསུངས་པ་འདི་ལྟ་སྟེ། གལ་ཏེ་དེ་ལས་བར་དོར་འཕོ་བ་ན། །ཀུན་གཞིའི་རྣམ་ཤེས་ནོར་རྒྱས་རླུང་དང་བཅས། །ཐིག་ལེ་གཉིས་དང་ལྷན་གཅིག་ལུས་ལས་འཕོ། །དེ་ཡང་ཐིག་ལེ་དམར་པོ་སྟེང་དང་ནི། །དཀར་པོ་འོག་གི་ལམ་ནས་འབྱུང་བར་འགྱུར། །དེ་ཚེ་ཤེས་པ་རྒྱལ་བ་སངས་ཞེས་བྱ། །བར་དོ་རྫུས་སྐྱེས་བག་ཆགས་ཙམ་གྱི་ལུས། །སྐད་ཅིག་དེ་ལ་རྨི་ལམ་ལུས་བཞིན་འགྲུབ། །དུས་དེར་བར་དོའི་མན་ངག་ཟབ་མོ་གཅེས། །སྔོན་དུ་བར་དོ་ཡིན་སྙམ་ཡང་དང་ཡང་། །གོམས་པར་བྱ་ཞིང་ཡིན་མིན་བརྟག་པའི་ཐབས། །སྒྲིབ་པ་ཡོད་མེད་སྔར་འདྲིས་མི་རྣམས་ཀྱིས། །ཤེས་གཅིག་མི་ཤེས་བྲག་རི་ལ་སོགས་ལ། །ཐོགས་པ་ཡོད་མེད་བརྟག་པའང་གོམས་པར་བྱ། །ཤིན་ཏུ་གོམས་ན་བར་དོའི་སྐབས་སུའང་། །བར་དོ་ཉིད་དུ་རང་གིས་ཤེས་པ་དང་། །གཞན་གྱིས་ཁྱོད་ནི་བར་དོ་ཡིན་ནོ་ཞེས། །བརྗོད་པ་ལས་ཀྱང་བར་དོར་ཤེས་པ་འབྱུང་། །དེ་ལྟ་མིན་ན་རྨི་ལམ་རྨི་ལམ་དུ། །གཉིད་དུས་ཉིད་ན་ཤེས་པ་མིན་པ་ལྟར། །བར་དོ་རྣམས་ཀྱིས་བར་དོར་ངོ་མི་ཤེས། །མ་ཤི་སྙམ་ནས་སྔར་བཞིན་བག་ཆགས་སོགས། །དེ་ཕྱིར་དེ་ཚེ་བར་དོར་ཤེས་པ་གཅེས། །ཤེས་ནས་སྔར་གྱི་གདམས་ངག་བསྒོམས་པ་གཅེས། །དེར་ཡང་འོད་གསལ་སྣང་བ་གང་ཤར་ལ། །འཛིན་མེད་ངང་ནས་གཏད་དེ་ལྟ་བ་ཙམ། །མ་ཡེངས་རྩེ་གཅིག་གནས་ན་འཇིགས་སྣང་དང་། །བྲལ་ནས་འོད་གསལ་ཉིད་ལ་ཐིམ་པར་འགྱུར། །འཆི་ཁ་བར་དོའི་གནས་སྐབས་ཐམས་ཅད་དུ། །རང་ལ་ངེས་ཤེས་བརྟན་པོ་ཡོད་པའམ། །གཞན་གྱིས་ཟབ་མོའི་གསལ་འདེབས་ཡང་ཡང་གཅེས། །གལ་ཏེ་བར་དོ་ཉིད་དུ་མ་གྲོལ་ནའང་། །ཆོས་པའི་རིགས་སུ་རྣལ་འབྱོར་ལྡན་པར་སྐྱེ། །དེ་གོམས་པ་ལས་མཆོག་གི་དབྱིངས་སུ་འགྲོ། །གལ་ཏེ་ཡུན་རིངས་བསྒོམས་པར་མ་གྱུར་ཀྱང་། །ཆོས་དབྱིངས་ཉམས་མྱོང་ངེས་ཤེས་བརྟན་པོ་དང་། །མི་དགེ་སྤངས་ཤིང་དམ་ཚིག་མ་ཉམས་ན། །འཆི་ཁའི་འོད་གསལ་བར་དོའི་འོད་གསལ་དག །ཡང་ཡང་གོམས་པས་སྐྱེ་བ་བདུན་གྱི་མཐར། །ངེས་པར་འགྲོ་བ་འདི་ལ་ཐེ་ཚོམ་མེད། །ཅི་སླད་ཅེ་ན་མགོན་པོ་སྤྱན་རས་གཟིགས། །ཚད་མར་གྱུར་ཅིང་དཔང་དུ་གྱུར་པ་དེས། །ངེས་པ་ཉིད་དུ་དེ་ལྟར་གསུངས་ཕྱིར་དང་། །ལུང་ལ་རྟེན་པའི་རིགས་པས་འགྲུབ་ཕྱིར་རོ། །འདི་ལས་གཞན་པའི་འཕོ་བ་བར་དོ་ཡི། །མན་ངག་ཟབ་ཟབ་ལྟ་བུ་ཕལ་ཆེ་ལ། །འཕོ་ཡུལ་འོད་གསལ་ཆོས་སྐུ་མཐོང་པ་དཀོན། །གལ་ཏེ་མཐོང་ཡང་ཆོས་སྐུར་ཤེས་པ་དཀོན། །དེ་དག་འཕོ་ཡུལ་བློ་ཡིས་བཀོད་པ་ལ། །རྣམ་ཤེས་འཕོས་སོ་སྙམ་ནས་རློམ་པ་ཙམ། །དེ་ཕྱིར་འོད་གསལ་བདེ་གཤེགས་སྙིང་པོ་དང་། །རྣམ་ཤེས་བློ་བུར་དྲི་མ་ཕྱེད་པ་ཅེས། །དེ་སླད་འདི་ནི་ཁྱད་འཕགས་ཆེན་པོ་སྟེ། །སྣོད་མིན་རྣམས་ལ་ཤིན་ཏུ་གསང་ཞིང་སྦ། །སྣོད་ལྡན་རྣམས་ལ་བཀའ་རྒྱ་དམ་པོ་ཡིས། །རིམ་པ་རིམ་པར་གདབ་ཀྱིས་གཞན་དུ་མིན། ཞེས་པའོ།། །།

གསང་བར་གདམས་པ།

གསུམ་པ་གསང་བར་གདམས་པ་ནི། མངོན་ཚན་ཅན་ལ་བར་ཆད་འབྱུང་པར་སླད། གསང་སྤྱོད་ཉམས་སུ་ལོང་གཅིག་དེང་རི་བ། ཞེས་པའི་དོན། རྣལ་འབྱོར་ཟབ་མོ་བསྒོམས་པའི་བྱེད་པ་བཅིང་པའི་སྦྱོར་བ་དང་། དུ་བ་ལ་སོགས་པའི་རང་གི་ཉམས་མྱོང་ངོ་སྤྲོད་པ་དང་བཅས་པ་རྣམས་གཞན་ལ་བཤད་དུ་མི་རུང་སྟེ། གལ་ཏེ་བཤད་ན་སྣོད་མིན་ལ་བཤད་དུ་མི་རུང་པའི་ཟབ་མོ་རྣམས་གསང་སྒྲོགས་བྱས་པས་དཀོན་མཆོག་དང་། མཁའ་འགྲོ་ཆོས་སྐྱོང་གི་བཀའ་ཆད་འབྱུང་ཞིང་། རྟེན་འབྲེལ་འཆུགས་ནས་ཚེ་འདིར་ཡང་འཇིགས་པ་བརྒྱད་ལ་སོགས་པ་ཕྱིའི་སྣོད་པ་སྣ་ཚོགས་པ་དང་། །ནད་ལ་སོགས་པ་ནང་གི་སྣོད་པ་སྣ་ཚོགས་དང་། ཅི་ཞིག་ལྟར་སྐྱེ་བོ་ཕལ་ཆེར་སྡང་བ་དང་། མདུན་མ་གང་བྱས་མི་འགྲུབ་པ་ལ་སོགས་པ་འོང་ཞིང་། ཕྱི་ལ་ཆོས་ཟབ་མོ་དང་མི་འབྱལ་ཞིང་། །ངན་སོང་དུ་ལྟུང་པའི་ཉེན་ཡོད་དོ། །དེས་ན་ཟབ་མོ་འདི་ལྟ་བུ་ལ་མ་དད་པ་དང་། ཆགས་སྡང་བྱེད་པ་དང་། ཁ་ཟེར་བ་ལ་སོགས་པ་སྣོད་མིན་རྣམས་ལ་གསང་བ་དང་། འབད་པས་རྦ་བ་དང་། ཤིན་ཏུ་སྦ་བ་དང་། ལེགས་པར་སྦར་བར་བྱ་དགོས་ཏེ། བརྟག་གཉིས་ལས། མ་གསང་སྦྲུལ་དང་ཆོམ་རྐུན་དང་། །ས་སྤྱོད་མེ་ཡིས་སྡུག་བསྔལ་བྱེད། ཞེས་པ་དང་། གལ་ཏེ་སྐལ་མེད་མཐོང་ན་ནི། སྐྱེ་བ་འདིར་ནི་དངོས་གྲུབ་མེད། འཇིག་རྟེན་ཕ་རོལ་སྤྱོད་ཡུལ་མིན། ཞེས་པ་དང་། མགོན་པོ་སྤྱན་རས་གཟིགས་ཀྱི་ཞལ་སྔ་ནས་ཀྱང་། དེ་ཕྱིར་བླ་མ་དམ་པས་གནང་པ་ཡིན། །ལམ་བཟངས་རིན་ཆེན་འདི་ནི་སློབ་མ་ཡིས། །ཆོམ་རྐུན་རྩ་ལག་ཡོངས་སུ་སྤང་བྱས་ཏེ། །འབད་པས་ཤིན་ཏུ་ལེགས་པར་སྦ་བར་བྱ། ཞེས་པ་དང་། དཔལ་ལྡན་རྒྱུད་ལས། དུ་བ་ལ་སོགས་རྣམས་ཀྱི་མཚན་མ་འཛིན་པ་དག་ཀྱང་གང་ཞིག་འདི་རྣམས་ཐམས་ཅད་གསང་བར་བྱ། ཞེས་པ་དང་། དེའི་བཤད་པ་དྲི་མེད་འོད་ལས། དུ་བ་ལ་སོགས་ཀྱི་མཚན་མ་འཛིན་པ་ནི་ཨ་བ་དྷུ་ཏཱིའི་སྒོ་ནས་ཏེ། ཀྱང་གི་སྒྲས་ལྟེ་བ་དེ་ཉིད་ལའོ། །འདི་རྣམས་ཐམས་ཅད་གསང་པར་བྱ་ཏེ་བྱིས་པའི་སྐྱེ་བོ་རྣམས་ལ་སྦ་བར་བྱའོ། །ཞེས་པ་དང་། དཔའ་བོ་ས་ར་ཧས། ཀྱེ་མ་བསྟན་པའི་ས་ལ་ཕྱིན་ནས་དམ་ཚིག་མི་ལྡན་ན། །རྒྱལ་པོའི་ཆད་པས་བཅད་ཕྱིར་མི་ནི་བཟུང་བ་ལྟར། །རྣམ་སྨིན་ལྕགས་ཀྱུས་སྲོག་གི་རླུང་ནི་བཟུང་ནས་ཀྱང་། །ཁྲོ་ཆུ་ཁོལ་མ་ཁར་བླུགས་པ་ནི་བཟོད་པར་དཀའ། ཞེས་པ་དང་། འཕགས་པ་ཀླུ་སྒྲུབ་ཀྱིས་རིམ་ལྔར། བླ་མ་ལ་བརྙས་སྒྱུ་ཅན་དད་པ་མེད། །སྔགས་ཀྱིས་རློམ་ཞིང་གླེགས་བམ་མཐོང་པས་ཁེངས། །དད་པ་མེད་ཅིང་དབང་བསྐུར་དམན་པ་ལ། །གཏམ་གྱི་རིམ་པའང་དེ་ལ་བརྗོད་མི་བྱ། ཞེས་གསུངས་པ་རྣམས་ཀྱི་དོན་ནོ། །དེ་བཞིན་དུ། རྣལ་འབྱོར་ཟབ་མོའི་གདམས་ངག་ཐོབ་ནས་མི་སྦེད་ན། བགེགས་དང་བར་ཆད་ཀྱི་དབང་དུ་འགྱུར་བས། རང་བསྒྲུབས་པ་མཐར་ཕྱིན་པའི་དོན་དུ་ཡང་སྦེད་དགོས་ཏེ། བསྡུད་པ་ལས། དེ་བཞིན་རྒྱལ་བའི་ཤེས་རབ་ཕ་རོལ་ཕྱིན་པ་མཆོག །རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བ་མང་། ཞེས་པ་དང་། འབུམ་དང་ཉི་ཁྲི་སོགས་ལས། བར་དུ་གཅོད་པའི་བདུད་ལས་བཞི་བཅུ་ཞེ་དྲུག་འབྱུང་པ་ནི། མངོན་རྟོགས་བརྒྱན་ལས། སྐྱོན་ནི་བཅུ་ཚན་བཞིར་བཅས་པ། དྲུག་ཏུ་ངེས་པར་ཤེས་པར་བྱ། ཞེས་པའོ། །དེ་བཞིན་དུ་གདམས་ངག་ཟབ་མོ་འདི་ཐོབ་ནས་མི་སྦེད་པའི་མངོན་ཚན་ཅན་ལ། བགེགས་དང་བར་ཆད་འབྱུང་པར་དྲི་མེད་འོད་ལས་ཀྱང་གསུངས་སོ། །དེས་ན་ལུས་གནད་ལ་སོགས་པ་ཉམས་སུ་ལེན་ལུགས་དང་། རང་གི་ཉམས་སུ་མྱོང་པ་ངོ་སྤྲོད་དང་བཅས་པ་ཐམས་ཅད་ཤིན་ཏུ་འབད་པས་གསང་ཞིང་སྦ་བར་བྱའོ།། །།

ཉམས་སུ་བླང་པར་གདམས་པ།

ཉམས་སུ་བླང་བར་གདམས་པ་ནི། སྔར་སྟན་པའི་བྱེད་པ་བཅིང་པའི་སྦྱོར་བའི་ཐབས་ཀྱིས་རྣལ་འབྱོར་ཡན་ལག་དྲུག་ཉམས་སུ་བླངས་ན། འཇིགས་པ་བརྒྱད་དང་བཅུ་དྲུག་ལ་སོགས་པ་ཕྱི་ནང་གི་གནོད་འཚེ་ཐམས་ཅད་ཞི་བ་དང་། སྐྱེ་རྒས་ན་འཆི་ལ་སོགས་པ་སྲིད་བཞིའི་དགྲ་ཐམས་ཅད་བཅོམ་ནས། ཐུན་མོང་དང་མཆོག་གི་དངོས་གྲུབ་འཇིག་རྟེན་དང་འཇིག་རྟེན་ལས་འདས་པའི་བདེ་སྐྱིད་དང་། ཡོན་ཏན་ཕུན་སུམ་ཚོགས་པ་ཐམས་ཅད་ཐོབ་ཅེས་བཀའ་མདོ་རྒྱུད་ཀྱི་ཕན་ཡོན་ཐམས་ཅད་ལས་གསུངས་སོ། །མགོན་པོ་སྤྱན་རས་གཟིགས་དབང་ཕྱུག་གི་ཞལ་སྔ་ནས། དུ་བ་ལ་སོགས་མཚན་མ་རྣམས་དང་ནི། །སྲོག་རྩོལ་གྱིས་ནི་དབུ་མར་འབབ་པ་དང་། །རིག་མའི་བརྟུལ་ཞུགས་དག་གིས་རྡོ་རྗེ་ནི། །བཏུང་མིན་དེ་བཞིན་སྟེ་དུ་ཁུ་བ་དེ། །ལམ་འདི་རྣམས་ཀྱིས་སངས་རྒྱས་རྣམས་ཀྱིས་ནི། །བདེ་བ་མཆོག་ཏུ་འགྱུར་བ་མེད་པ་ཞེས། །མངོན་པར་བརྗོད་པའམ་ཕོ་ཉ་མོ་ཀུན་གྱི། །ལྷན་ཅིག་སྐྱེས་པ་རྣལ་འབྱོར་པས་ཐོབ་འགྱུར། ཞེས་པ་དང་། དྲི་མེད་འོད་ལས། དུ་བ་ལ་སོགས་ལམ་གྱིས་ལྷན་ཅིག་སྐྱེས་པའི་བདེ་བའི་གོ་འཕང་བསྒོམས་ན་དེ་ནི་འདིར། འགྲོ་བའི་བླ་མ་སུམ་ཅུ་རྩ་གཉིས་མཚན་ལྡན་སྐུ་འདི་ཆོས་ཀྱི་སྐུ་འཁོར་ལོ་ཡང་དག་གནས། ལྷ་རྣམས་མགོ་ཡི་གཙུག་གི་ནོར་བུའི་འོད་ཟེར་ཚོགས་ཀྱི་པདྨལ་གཏུགས་ཤིང་། དམ་པའི་ལམ་ནི་སྟོན་མཛད་ཉིན་བྱེད་བཞིན་དུ་མུན་པ་ཀུན་འཇོམས་དུས་ཀྱི་འཁོར་ལོར་འགྱུར། ཞེས་པ་དང་། བརྟག་གཉིས་ལས། རང་གཞན་དོན་དམ་རབ་སྒྲུབ་ཕྱིར། །འཁོར་བར་ཐབས་གཞན་ཡོད་མ་ཡིན། །རིག་མ་ལྷན་ཅིག་གོམས་བྱས་པས། །འཕྲལ་དུ་མངོན་དུ་བྱེད་པ་ཉིད། །འཇིགས་སྨྱོ་དེ་བཞིན་སྡུག་བསྔལ་དང་། །མྱ་ངན་གདུང་པ་འཚེ་བ་དང་། །འདོད་ཆགས་ཞེ་སྡང་གཏི་མུག་ཆེ། །སྒྲུབ་པ་པོ་ཉིད་ཉོན་མི་མོངས། །ཕན་དང་གནོད་པའི་འབྲས་འབྱུང་བར། །དེ་ལྟར་ངེས་པར་ཤེས་ནས་ནི། །ཇི་ལྟར་དེ་ནི་སྐད་ཅིག་ཀྱང་། །རྣལ་འབྱོར་པ་རྣམས་ངུ་འབོད་གནས། ཞེས་པ་དང་། རྣལ་འབྱོར་ཟབ་མོ་འདི་བསྒོམས་པའི་ཕན་ཡོན་དང་། མ་སྒོམ་ན་འཁོར་བར་གནོད་པ་འབྱུང་པར་ཤེས་ནས་སྐད་ཅིག་ཀྱང་མི་སྒོམ་ན་འཁོར་བར་གནོད་པའི་འབྲས་བུ་ངུ་འབོད་དུ་ཡང་གནས་པའི་ཉེན་ཡོད་དོ། །ཞེས་པའི་དོན། དུས་འཁོར་རྩ་རྒྱུད་ལས། འདི་ཡིས་རྫོགས་སངས་རྒྱས་ཀུན་གྱིས། །ཆོས་ཀྱི་འཁོར་ལོ་རབ་ཏུ་བསྐོར། །རང་དང་གཞན་དོན་བསྒྲུབས་པའི་སླད། །སྟོང་ཉིད་སྙིང་རྗེ་དབྱེར་མེད་པ། །ཁམས་གསུམ་དབང་ཕྱུག་ཡེ་ཤེས་ནི། །འདི་ལས་གཞན་པ་ཡོད་མ་ཡིན། ཞེས་པ་དང་། རྗེ་ཏཻ་ལོ་པའི་ཞལ་ནས། དོན་འདིར་མི་མོས་སྐྱེ་བ་བླུན་པོ་རྣམས། །འཁོར་བའི་ཆུ་བོས་རྟག་ཏུ་ཁྱེར་བར་ཟད། །ངན་སོང་སྡུག་བསྔལ་མི་བཟོད་སྙིང་རེ་རྗེ། ཞེས་པ་དང་། བསྡུད་པ་ལས། དེ་ལྟར་བྱང་ཆུབ་མཆོག་ཞུགས་རིན་ཆེན་ལྟ་བུ་ཡི། །ཤེས་རབ་ཕ་རོལ་ཕྱིན་ལ་རྣལ་འབྱོར་དོར་མི་བྱ། ཞེས་པ་དང་། སྤྱོད་འཇུག་ལས། གསེར་འགྱུར་རྩིའི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་སྒྱུར་བས་ན། །བྱང་ཆུབ་སེམས་ཞེས་བྱ་བར་རབ་བརྟན་ཟུང་། ཞེས་པ་རང་དོན་དང་གཞན་དོན་བསྒྲུབས་པའི་མཆོག་རྣལ་འབྱོར་ཟབ་མོ་ཡིན་ལ། དེ་ནི་དོན་དམ་བྱང་ཆུབ་ཀྱི་སེམས་འོད་གསལ་ཡིན་ཞིང་། འོད་གསལ་དེ་སྒྲིབ་བྲལ་དུ་སྐྱེད་པ་ནི་དོན་དམ་བྱང་ཆུབ་ཀྱི་སེམས་ཟབ་མོ་སྣང་བའི་ཏིང་ངེ་འཛིན་བཟུང་བ་ཡིན་ནོ། །བྱང་ཆུབ་ཏུ་སེམས་སྐྱེད་པའི་མདོ་ལས། བྱང་ཆུབ་སེམས་དཔའ་འོད་སྲུངས་ཀྱིས་གསོལ་པ། བྱང་ཆུབ་ཏུ་སེམས་ཇི་ལྟར་སྐྱེད་པར་བགྱི། བཀའ་རྩལ་པ། འོད་སྲུངས་ཆོས་ཐམས་ཅད་ནམ་མཁའ་ལྟར་མཚན་ཉིད་མེད་ཅིང་ཡེ་ནས་འོད་གསལ་བ་རྣམ་པར་དག་པ་ནི་བྱང་ཆུབ་ཅེས་བྱའོ། །དེ་དང་མཐུན་པ་སྔར་ནས་མ་སྐྱེད་པའི་སེམས་རིན་པོ་ཆེ་སྐྱེད་པ་ནི་བྱང་ཆུབ་ཏུ་སེམས་སྐྱེད་པ་ཞེས་བྱའོ། །ཞེས་གསུངས་པའི་དོན་ནོ། །དེས་ན་སེམས་ཀྱི་རང་བཞིན་འོད་གསལ་དོན་དམ་བྱང་ཆུབ་ཀྱི་སེམས་རྣལ་འབྱོར་ཡན་ལག་དྲུག་གི་ངོ་བོ་ཟབ་མོ་སྣང་པ་ཞེས་བྱ་བའི་ཏིང་ངེ་འཛིན་འདི། ངན་སོང་དང་སྐྱེ་རྒ་ན་འཆི་ལ་སོགས་པ་འཁོར་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པ་ཡིན་ཞིང་། ཏིང་ངེ་འཛིན་འདི་ཐོབ་ནས་མེས་མི་ཚུགས། ཆུས་མི་ཚུགས། དུག་གིས་མི་ཚུགས། དབྱིག་དུག་གིས་མི་ཚུགས། དུག་སྦྱར་མས་མི་ཚུགས། མཚོན་གྱིས་མི་ཚུགས། བྱད་ཀྱིས་མི་ཚུགས། བཟུང་དུ་མེད། བཅིང་དུ་མེད། ཆད་པས་བཅད་དུ་མེད། མགོ་བྲེག་ཏུ་མེད། གཞུར་མེད། ཚིག་པར་བྱར་མེད། དགྲའི་དབང་དུ་མི་འགྲོ་བའི་ཕྱིར། སྡུག་བསྔལ་དང་སྐྱོན་ཐམས་ཅད་ཟད་པར་འདོད་པ་དང་། བདེ་བ་དང་ཡོན་ཏན་ཐམས་ཅད་ཐོབ་པར་འདོད་པ་དང་། རང་དང་གཞན་གྱི་དོན་གཉིས་མཐར་ཕྱིན་པར་འདོད་པ་རྣམས་ཀྱིས། ཏིང་ངེ་འཛིན་འདི་ཁོ་ན་ཉམས་སུ་བླང་བར་བྱའོ། །དེ་ཅིའི་ཕྱིར་ཞེ་ན། ཏིང་ངེ་འཛིན་འདི་ཁོ་ན་ལ་རྟེན་ནས་བྱང་ཆུབ་སེམས་དཔའ་ཐམས་ཅད་ཀྱང་ཕྱིན་ཅི་ལོག་ལས་འདས་ཏེ། མྱ་ངན་ལས་འདས་པ་ཆེན་པོའི་མཐར་ཕྱིན་པའི་ཕྱིར་དང་། ཏིང་ངེ་འཛིན་འདི་ཁོ་ན་ལ་རྟེན་ནས་དུས་གསུམ་གྱི་སངས་རྒྱས་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་ཕྱིར་རོ། གང་གི་ཕྱིར་དེ་ལྟ་ཡིན་པ་དེའི་ཕྱིར་ཏིང་ངེ་འཛིན་འདི་ཉམས་སུ་ལེན་པ་ལས་དགོས་པ་ཆེ་བ་སྐྲའི་རྩེ་མོ་ཙམ་ཡང་མེད་པས། འཁོར་བའི་མདུན་མ་ཐམས་ཅད་བློས་བཏང་ཞིང་། ལུས་དང་སྲོག་ལ་ཡང་ལྟོས་པ་མེད་པར་བྱང་ཆུབ་སེམས་དཔའ་རྟག་ཏུ་ངུ་དང་། རྗེ་བཙུན་ཆེན་པོ་མི་ལ་རས་པ་བཞིན་དུ་བསྒོམས་པར་བྱའོ། །འཕགས་པ་ཀླུ་སྒྲུབ་ཀྱི་ཞལ་སྔ་ནས་སྔགས་པས་ཏིང་འཛིན་དམིགས་པའི་ཚེ། གང་ཚེ་ལུས་ནི་སྐམས་གྱུར་ནའང་། །ལུས་ངག་ཡིད་ནི་ཚིམ་བྱེད་པའི། །རྣལ་འབྱོར་འདི་ནི་བསྒོམས་པར་བྱ། ཞེས་པ་དང་། མགོའམ་གོས་ལ་བློ་བུར་མེས་ཤོར་ན། །དེ་དག་སླར་ཟློག་བགྱི་བ་བཏང་ནས་ཀྱང་། །ཡང་སྲིད་མེད་པའི་ཐབས་ལ་འབད་འཚལ་ལོ། །དེ་བས་ཆེས་མཆོག་དགོས་པ་གཞན་མ་མཆིས། ཞེས་པ་དང་། བྱས་པས་ཟིན་པར་མི་འགྱུར་ལས་ཀྱི་མཐའ། འཁོར་བའི་མདུན་མ་བོར་གཅིག་དེང་རེ་བ། ཞེས་པ་དང་། བྲེལ་དོན་ཚར་ནས་ཆོས་ལ་ཕྱིན་པ་མེད། །ནམ་དྲན་ཚེ་ན་རྒྱུག་གཅིག་དེ་རེ་བ། ཞེས་པ་དང་། བརྟག་གཉིས་ལས། ཆུ་བོའི་རྒྱུན་ནི་རབ་འབབ་དང་། །མར་མེའི་རྩེ་མོ་རབ་བཅིངས་ལྟར། །རྟག་ཏུ་གོས་པའི་རྣལ་འབྱོར་གྱིས། །ཉིན་དང་མཚན་དུ་མཉམ་པར་བཞག །ཞེས་པ་དང་། སྤྱོད་འཇུག་ལས། ཡུངས་མར་བཀང་པའི་སྣོད་བསྐུར་ནས། །རལ་གྲི་ཐོགས་པས་དྲུང་བསྡད་དེ། །བོ་ན་གསོད་སྡིག་འཇིགས་པ་ལྟར། །མཁས་པས་རྟག་ཏུ་དེ་བཞིན་སྒྲིམ། །ཞེས་གསུངས་པ་ལྟར་ཤིན་ཏུ་འབད་པ་དང་། བརྩོན་འགྲུས་དྲག་པོས་རྣལ་འབྱོར་ཡན་ལག་དྲུག་གི་ཏིང་ངེ་འཛིན་ནི་ཉམས་སུ་བླང་པར་བྱའོ། །ཁྲིད་ཟབ་མོ་འདི་གཞན་ལ་འབོགས་ཤིང་། གཞན་དོན་བྱེད་ནུས་པ་དང་། ལོ་སྦྲེལ་ནས་འདི་བསྒྲུབས་པ་ཉམས་སུ་ལེན་པ་མ་གཏོགས་པ་གཞན་ལ་དཔེ་སྤྱོད་དུ་ཡང་མི་འཇུག་པ་ཞུའོ།། །།