ལྔ་བ་གཏོང་རྐྱེན།

ལྔ་བ་གཏོང་རྐྱེན་ནི།

བྱང་སར་རྫོགས་བྱང་དུ་སྨོན་པ་བཏང་བ་དང༌། རྩ་ལྟུང་གི་ཆོས་ཀུན་དཀྲིས་ཆེན་པོ་སྤྱད་པ་གཉིས་གསུངས་ལ། གཏན་ལ་ཕབ་པ་བསྡུ་བས་ཐེག་དམན་དུ་སེམས་བསྐྱེད་པ་དང༌། མི་དོན་གོ་བའི་དྲུང་དུ་བྱང་སེམས་ཀྱི་བསླབ་པ་ཕུལ་བའི་ཚིག་བརྗོད་པ་དང༌། ཕམ་པའི་གནས་ལྟ་བུའི་ལྟུང་བ་སྤྱད་པ་དང༌། འདི་ལ་ཀུན་དཀྲིས་ཆེན་པོ་ཚང་བ་དང་བཞི་གསུངས་ཀྱང༌། དང་པོ་བྱང་སའི་དང་པོ་ཡིན་ལ། གཉིས་པའང་དེར་གཏོགས་སོ། །ཕྱི་མ་གཉིས་བྱང་སའི་གཉིས་པ་ཡིན་ནོ། །བསླབ་པ་ཕུལ་བ་ནི་ངན་སོང་དུ་ངེས་པར་ལྟུང་བའི་རྒྱུར་འགྱུར་བས་རྣམ་པ་ཐམས་ཅད་དུ་མི་བྱ་བར་གསུངས་སོ། །དེ་འདྲའི་གཏོང་རྒྱུ་དེ་དག་མ་བྱུང་བར་བྱང་སྡོམ་དང་ལྡན་ལ། དེ་ལྡན་བཞིན་དུ་ཚེ་འཕོས་ན་ཕྱི་མར་ཡང་བྱང་སེམས་ཀྱི་སྡོམ་པ་དང་ལྡན་ཞིང་བྱང་སེམས་དང་མི་འཚམས་པའི་ལས་ལ་མི་འཇུག་པར་གསུངས་པས། རྩ་ལྟུང་འདི་དག་གིས་མ་གོས་པ་ལ་འབད་པར་བྱའོ། །