ཚེ་མགོན་བླ་མ་ཐར་ལི་ལ་གནང་བ།

བླ་མ་ལ་ཕྱག་འཚལ་ལོ། །མཆོག་གསུམ་ངོ་བོ་དཔལ་ལྡན་བླ་མ་ལ། །སྒོ་གསུམ་གུས་པའི་ཚུལ་གྱིས་ཕྱག་བགྱིས་ནས། །དུས་གསུམ་གཟིགས་པའི་བླ་མའི་བཀའ་བཞིན་དུ། །བསླབ་གསུམ་འཛིན་པ་ཁྱོད་ལ་འདི་སྐད་ཞུ། །དལ་འབྱོར་མི་ལུས་ལན་གཅིག་ཐོབ་དུས་འདིར། །རྣམ་གཡེང་ལེ་ལོའི་དབང་དུ་མི་གཏང་བར། །རྩེ་གཅིག་དམ་ཆོས་སྒྲུབ་ལ་གཞོལ་བ་ནི། །ཆོས་མཛད་སྐྱེས་བུ་སྔ་མའི་རྣམ་ཐར་ལགས། །རྒྱལ་ཀུན་སྙིང་རྗེའི་རང་གཟུགས་སྤྱན་རས་གཟིགས། །གྲོགས་མཆོག་ཁྱོད་ཀྱིས་ཡི་དམ་མཛད་ནས་ནི། །དཀའ་སྤྱད་དྲག་པོས་བྱང་ཆུབ་སྒྲུབ་པ་ལ། །བདག་ནི་སྙིང་ནས་རྗེས་སུ་ཡི་རང་ངོ་། །ཕ་མར་གྱུར་པའི་འགྲོ་བ་འདི་རྣམས་ཀྱི། །སྡུག་བསྔལ་ཐམས་ཅད་མྱུར་དུ་ཞི་བའི་ཕྱིར། །བདག་གིས་སྒོ་གསུམ་ཆོས་ལ་སྦྱོར་སྙམ་པའི། །ལྷག་བསམ་བཟང་པོ་རྒྱུན་དུ་བསྐྱེད་པར་མཛོད། །བདག་གིས་ད་ལྟར་ལུས་ངག་ཡིད་གསུམ་གྱི། །དཀའ་སྤྱད་སྤྲོ་བས་དང་དུ་བླངས་པ་འདིས། །གཞན་གྱི་སྡུག་བསྔལ་མཐའ་དག་ཞི་ནས་ནི། །དམ་ཆོས་སྒྲུབ་པའི་སྐལ་བ་ཡོད་པར་སྨོན། །གཞན་གྱི་དོན་དུ་སངས་རྒྱས་ཐོབ་འདོད་ཀྱི། །སྨོན་སེམས་འདི་དང་ནམ་ཡང་མི་འབྲལ་ཞིང་། །དགེ་བ་ཆེ་ཆུང་ཇི་བསགས་ཐམས་ཅད་ཀུན། །གཞན་གྱི་དོན་དུ་བསྔོ་བ་གནད་འགག་ཡིན། །ལུས་སེམས་གཉིས་ལ་སྡུག་བསྔལ་གང་བྱུང་ཡང་། །ཚུལ་འདིས་རིགས་དྲུག་འགྲོ་བ་ཐམས་ཅད་ཀྱི། །སྡུག་བསྔལ་འབྱུང་འགྱུར་ཀུན་གྱི་གོ་བཅད་ནས། །ཀུན་ཀྱང་བདེ་བར་གྱུར་ཞེས་སྨོན་ལམ་བྱ། །མི་དགེའི་རྣམ་རྟོག་མང་པོ་སྐྱེ་བའི་དུས། །དྲན་ཤེས་ལྡན་པས་ལྷོད་པར་སྐྱོང་ཤེས་ན། །འཁྲུལ་རྟོག་ངན་པའི་རྒྱུ་འགྲུལ་ཆད་ནས་ནི། །དམ་ཆོས་སྒྲུབ་ལ་སྤྲོ་བ་ངང་གིས་སྐྱེ། །སྐྱབས་གནས་ཀུན་འདུས་རྩ་བའི་བླ་མ་ལ། །ཁ་ཞེ་མེད་པའི་དད་པའི་གདུང་ཤུགས་ཀྱིས། །ཉིན་མཚན་ཀུན་ཏུ་གསོལ་བ་འདེབས་ནུས་ན། །བསམ་དོན་ཐམས་ཅད་ཡིད་བཞིན་འགྲུབ་པར་འགྱུར། །མདོར་ན་དུས་དང་གནས་སྐབས་ཐམས་ཅད་དུ། །བླ་མ་དྲན་པའི་མོས་གུས་འདི་ཡོད་ན། །བླ་མའི་བྱིན་རླབས་སེམས་ལ་ཞུགས་ནས་ནི། །གནས་ལུགས་རང་ངོ་ཤེས་པའང་འབྱུང་བར་འགྱུར། །ཁྱད་པ་རང་ཉིད་འཆི་བའི་དུས་ཀྱི་ཚེ། །བླ་མ་དྲན་པའི་མོས་གུས་མ་ཤོར་ན། །ཕྱི་མ་དག་པའི་ཞིང་དུ་སྐྱེ་བ་ཡི། །རྒྱུ་ཡི་གཙོ་བོ་ཡིན་པར་གསུང་པའང་ཡོད། །ཀུན་ཏུ་བཟང་པོའི་རྣམ་ཐར་ཇི་བཞིན་དུ། །མཐའ་ཡས་འགྲོ་བའི་དོན་ཆེན་བྱེད་སྙམ་ནས། །བཟང་པོ་སྤྱོད་པའི་མདོ་འདི་ཞལ་འདོན་དུ། །ཡང་ཡང་མཛད་ན་ཚོགས་གཉིས་ཟུང་འཇུག་ཡིན་། །དུས་དང་དུས་སུ་རང་གི་སེམས་རྒྱུད་ལ། །ཡང་ཡང་བརྟགས་ནས་མི་དགེ་ཀུན་སྤངས་ཏེ། །བྱང་ཆུབ་སེམས་ལ་འདྲིས་གོམས་བྱེད་པ་ནི། །གནད་དོན་སྙིང་པོར་དྲིལ་བའི་མན་ངག་ཡིན། །དེ་ལྟར་བྱས་ནས་གྲོགས་མཆོག་ཁྱོད་ཉིད་ཀྱང་། །འཆི་ཚེ་རང་ལ་འགྱོད་པ་མི་འབྱུང་བར། །དག་པའི་ཞིང་དུ་རྒྱལ་བ་སྲས་བཅས་དང་། །མཇལ་ནས་ཆོས་ལ་སྤྱོད་པའི་སྨོན་འདུན་ཞུ། །ཞེས་པའང་སྤྲུལ་མིང་ཨ་འཇམ་པས་བྲིས་པ་དགེའོ།། །།