གཉིས་པ་སེམས་ཅན་ཐམས་ཅད་ཀྱིས་ཚོགས་གཉིས་བསགས་པར་ཐལ་བ་སྤངས་པ།
གཉིས་པ་སེམས་ཅན་ཐམས་ཅད་ཀྱིས་ཚོགས་གཉིས་བསགས་པར་ཐལ་བ་སྤངས་པ་ནི།
འོ་ན་སེམས་ཅན་ལ་སངས་རྒྱས་རང་ཆས་སུ་བཞུགས་ན་སེམས་ཅན་རྣམས་ཚོགས་གཉིས་བསགས་ཤིང་སྒྲིབ་གཉིས་སྤངས་པ་ཡིན་པར་འགྱུར་རོ་ཞེ་ན་འདི་ལ་ཡང་ཁྱབ་པ་མེད་དེ་སེམས་ཅན་རྣམས་སངས་རྒྱས་ཡིན་པར་ཁས་མ་བླངས་པ་ལ་སོགས་རྒྱུ་མཚན་སྔ་མ་བཞིན་ནོ། །གཞན་ཡང་ཚོགས་གཉིས་བསགས་པ་ལ་བདེན་གཉིས་རྣམ་དབྱེ་ཤེས་དགོས་ཤིང༌། དོན་དམ་པའི་ཚོགས་གཉིས་བསགས་པ་ནི་དོན་དམ་པའི་བདེན་པ་ལ་གདོད་ནས་རང་བཞིན་གྱིས་ཚང་སྟེ། དོན་དམ་བདེན་པ་ནི་གདོད་ནས་རང་བཞིན་པའི་བསོད་ནམས་ལྡན་པ་དང་བསོད་ནམས་ཚོགས་ཡིན་ཞིང་། །གདོད་ནས་རང་བཞིན་པའི་ཡེ་ཤེས་དང་ཡེ་ཤེས་འབྱུང་གནས་ཆེ་ཡིན་ལ། །གདོད་ནས་རང་བཞིན་པའི་ཡེ་ཤེས་ལྡན་པ་ཡོད་མེད་ཤེས་ཡིན་པས། །གདོད་ནས་རང་བཞིན་པའི་ཚོགས་གཉིས་ཚོགས་ནི་བསག་པ་པོ་ཡིན་པའི་ཕྱིར་རོ། ། ལམ་ལ་མ་ཞུགས་པའི་སེམས་ཅན་རྣམས་ཀུན་རྫོབ་ཀྱི་ཚོགས་གཉིས་བསགས་པ་མ་ཡིན་ཡང་གྲུབ་མཐའི་སྐྱོན་དུ་མི་འགྱུར་ཏེ། སེམས་ཅན་རྣམས་སངས་རྒྱས་ཡིན་པར་ཁས་མ་བླངས་པ་ལ་སོགས་རྒྱུ་མཚན་སྔ་མ་བཞིན་ནོ། །དེ་བཞིན་དུ་སྒྲིབ་གཉིས་སྤངས་པ་ལ་ཡང་ཚུལ་གཉིས་ཏེ་སྔར་སྤངས་པའི་སྐབས་སུ་བཤད་པ་བཞིན་ནོ། །དེས་ན་ཁ་ཅིག་སེམས་ཅན་ལ་སངས་རྒྱས་ཡོད་ན་ལས་དང་ཉོན་མོངས་དང་སྡུག་བསྔལ་ཐམས་ཅད་མེད་པར་འགྱུར་རོ། ། ཞེས་སོགས་དང༌། སེམས་ཅན་གྱིས་ཤེས་བྱ་ཐམས་ཅད་མཁྱེན་པར་འགྱུར་རོ། །ཞེས་སོགས་ལོག་པའི་ཀླན་ཀ་ཤིན་ཏུ་མང་པོ་རྣམས་ནི་ཡོད་པ་དང་ཡིན་པའི་ཁྱད་པར་མ་ཤེས་པ་རྣམས་ཀྱི་བབ་ཅོལ་ཡིན་ཏེ། ཡོད་པས་ཡིན་པར་མི་འགྲུབ་པའི་ཕྱིར་རོ། །གལ་ཏེ་འགྲུབ་ན་མི་རྣམས་ལ་བཤང་བ་ཡོད་པས་མི་རྣམས་བཤང་བ་ཡིན་ནམ་ཅི། དེས་ན་ཀུན་རྫོབ་བདེན་པར་རྟོགས་པའི་སྤངས་རྟོགས་དང་ཚོགས་གཉིས་ནི་ལམ་བདེན་ཡིན་ལ། དོན་དམ་བདེན་པར་རྟོགས་པའི་སྤངས་རྟོགས་དང་ཚོགས་གཉིས་ནི་འགོག་བདེན་ཡིན་པས། དེ་དག་རིམ་པ་ལྟར་ཀུན་རྫོབ་གཟུགས་སྐུ་དང༌། དོན་དམ་ཆོས་སྐུ་ལ་ཚང་ཞིང༌། དང་པོ་ནི་རབ་ཏུ་གྲགས་ལ། གཉིས་པའི་དབང་དུ་མཛད་ནས་གདོད་ནས་རང་བཞིན་གྱིས་ཡེ་ཤེས་སྐུ་རྣམས་མ་ལུས་འཆང་དང༌། ཡེ་ཤེས་སྐུ་སྟེ་རང་བྱུང་བ་དང༌། ཡེ་ཤེས་ལུས་ཅན་དེ་བཞིན་གཤེགས་དང༌། ཀུན་མཁྱེན་ཡེ་ཤེས་མཛོད་འཛིན་པ་དང༌། སངས་རྒྱས་ཀུན་གྱི་རང་བཞིན་འཆང་དང༌། སངས་རྒྱས་བྱང་ཆུབ་བླ་ན་མེད་པ་ལ་སོགས་པ་རྒྱ་ཆེར་གསུངས་པ་རྣམས་ཀྱི་དགོངས་པ་ནི་དོན་དམ་བདེན་པ་ཉིད་རང་བཞིན་གཉུག་མ་གནས་ལུགས་ཟབ་མོའི་སངས་རྒྱས་ཡིན་ཞེས་པའི་དོན་ཡིན་ལ། དེ་སེམས་ཅན་ལ་བཞུགས་པ་ནི་དྲི་བཅས་དེ་བཞིན་ཉིད་ཡིན་པས་དྲི་མ་སྦྱང་བའི་གཞིར་བཞུགས་པ་ཡིན་ནོ། །