ལེའུ་བཅུ་བདུན་པའི་རྣམ་པར་བཤད་པ།

༈ སྤྱི་དོན་གཉིས་པ་དམིགས་པའི་རྟེན་གཟུགས་བརྙན་གྱི་དཀྱིལ་འཁོར་ལ་གསུམ་སྟེ། དཀྱིལ་འཁོར་འབྱུང་བའི་རྒྱུ་སྤྱིར་བསྟན། དཀྱིལ་འཁོར་གྱི་རང་བཞིན་རྒྱས་པར་བཤད། ངོ་མཚར་གྱི་ལྟས་སྣང་བའོ། །

དང་པོ་ནི། གསུང་གསང་སྔགས་ཀྱི་དཀྱིལ་འཁོར་བསྟན་པ་དེ༵་ན༵ས་བཅོ༵མ་ལྡན༵་འད༵ས་དགྱེས༵་པ༵་ཆེ༵ན་པོ༵ས་ཁྲོ་བོའི་སྤྲིན་ཕུང་གསང་སྔགས་དང་བཅས་པ་དེ༵་ད༵ག་གི༵་རྣམ་པ་གསལ་བར་བྱེད་པ་ན་དམིགས་པའི་རྟེན་དགོས་པས་ཕྱི་རབས་ཀྱི་གདུལ་བྱ་ལ་ཕན་པའི་དོན་དུ་གཟུགས་བརྙན་གྱི་དཀྱི༵ལ་འཁོ༵ར་བསྟན༵་པ༵འི་ཕྱིར༵་ཆེ༵ད་དུ༵་བརྗོ༵ད་པ༵་འདི༵་དག་བརྗོད༵་དོ༵། །

གཉིས་པ་ལ་གཉིས་ཏེ། རྟེན་གཞལ་ཡས་ཁང་དང་། བརྟེན་པ་ལྷའི་དཀྱིལ་འཁོར་རོ། །

དང་པོ་ལ་གསུམ་ལས། གཞལ་ཡས་ཁང་དངོས་ནི། ཡེ་ཤེས་ལྔ་མཚོན་པའི་ཕྱིར་ཕྱི་ནང་མེད་པར་མེ་དཔུང་འབ༵ར་བ༵འི་ཀློང་ཕོ་བྲང་གི་འོག་གཞི་ལྟེ་བ་མུ་འཁྱུད་དང་བཅས་པའི་འཁོ༵ར་ལོ༵་རྩིབ༵ས་བཞི༵་པ༵་ནི་རིགས་ལྔའི་རང་བཞིན་གྱི་བརྡའོ། །དེའང་ཚད་མེད་པ་བཞི་དང་བདེན་པ་བཞི་མཚོན་པའི་ཕྱིར་གྲུ༵་ཆད༵་བཞི༵་ཡིས༵་རྣམ༵་པ༵ར་བརྒྱན༵་པའོ། །དེའི་སྟེང་དུ་ཡེ་ཤེས་ཀྱི་གཞལ་ཡས་ཁང་ཡོན་ཏན་རྒྱས་པའི་བརྡར་གྲུ༵་བཞི༵་པ་རྣམ་པར་ཐར་པ་བཞིའི་མཚོན་བྱེད་དུ་སྒོ༵་ཁྱུད༵་བཞི༵་ད༵ང་ལྡ༵ན་པའི་དབུས་སྐུ་ལྔའི་བརྡར་འཁོར་ལོ་རྩིབས་བཞི་གྲུ་ཆད་དང་བཅས་(༢༩༣)པས་མཛེས་པའོ། །དེས་མཚོན་པ་རྣམ་ཐར་བརྒྱད་ཀྱི་རྟ་བབས་དང་བདེན་པ་གཉིས་ཀྱི་དོན་མཚོན་པ་ཡེ་ཤེས་འབ༵ར་བ༵འི་བར༵་ཁྱམ༵ས་ཕྱི་ནང་གཉིས༵་ཀྱིས༵་མཛེ༵ས་ཤིང་བནྡྷའི་རྩིག་པ་ཆེན་པོས་ལྷུན་མཐོ་བའོ། །

གཉིས་པ་དེ་མཛེས་པར་བྱེད་པའི་རྒྱན་ནི། ཕལ་ཆེར་གོང་དང་མཚུངས་ཤིང་། ཁྱད་པར་དུ་ཐོད༵་པ་སྐམ་རློན་གྱི་རྩིག་པ་ལ་སྦྲུལ༵་ནག་གི་ཆུན་པོས་དཀྲིས་ཤིང་། ཐོད་པ་སྦྲུལ་གྱི་ཟར་ཚགས་དང་། ཉི་མ་དང་ཟླ་བའི་མཐོང་ཁུང་དང་། ཚངས་པའི་གདུང་དང་། མཆོག་ཆེན་གྱི་ཀ་བ་དང་། རུས་སྦལ་གྱི་ཀ་གདན་དང་། ཞིང་གི་ཕྱམ་དང་། མཆོག་ཕྲན་གྱི་གྲལ་བ་དང་། གཡང་གཞིའི་ཐོག་གཡམ་དང་། རྒྱུ་མའི་དྲྭ་བ་དང་། དོན་སྙིང་གི་དྲྭ་ཕྱེད་དང་། སྒོ་བཞི་རུས་སྦལ་གྱི་མ་ཐེམ་དང་། ཆུ་སྲིན་གྱི་ཡ་ཐེམ་དང་། སྦྲུལ་ནག་གི་སྐྱེས་བུ་དང་། ཞིང་ཆེན་གྱི་སྒོ་གླེགས་ལ་སོགས་པ་སྣ༵་ཚོག༵ས་པས་བརྒྱན་ཞིང་། ཉི༵་མ༵་དང་ཟླ་བ་དང་གཟའ་སྐར་གྱི་ཁ་བད་དང་རྒྱན་གྱིས༵་བརྗི༵ད་ཅིང་མེ་དཔུང་འབ༵ར་བ༵འི་རྩེ་ལས་མེའི་ཚ་ཚ་ཕྱོགས་བཅུར་འཕྲོ༵་བའི་ཕྲེང་བ༵་མ༵ང་པོ༵་དང་འོད་ཟེར་འཁྲུག༵ས་པས་མཛེས་པའོ། །

གསུམ་པ་གདན་གྱི་ཁྱད་པར་ནི་འགྲོ་བ་ཟིལ་གྱིས་གནོན་པ་ཁྱུ༵་མཆོ༵ག་དང་། གཟི་བརྗིད་ཆེ་བ་མ༵་ཧེ༵་དང་། གདུག་པ་ཆེ་བ་གཟི༵ག་ད༵ང་། དཔའ་བརྟུལ་ཆེ་བ་སྟག༵་དང་། རང་བཞིན་གྱིས་གཏུམ༵་པ༵འི་དོམ༵་རྣམས་ཀྱི༵་སྤར༵་བ༵ས་ནི༵་བཏེགས་པའོ། །མི་ཤེས་པ་དག་སྡེར་མོས་ལྷ་ཆེན་པོ་བཟུང་ཞེས་འཆད་པ་ནི་མ་ཡིན་ཏེ། འདི་དག་གི་ཁྲིའི་སྟེང་དུ་དྲེགས་པ་ཕོ་མོ་བསྣོལ་བ་ལ་བཞུགས་པ་ཡིན་ནོ། །དེའི་སྟེང་དུ་དྲེགས་པའི་དབ༵ང་ཕྱུག༵་ལྷ༵་ཆེ༵ན་པོ་ལ༵་སོ༵གས་པ་ཁྱོ་ཤུག་ཟུང༵་དུ་བསྣོལ་བའོ། །བཟུང་ནི་ཡི་གེ་མ་དག་པའོ། །སྲོག་ཆགས་འདི་དག་ཀྱང་སྐུ་གསུང་ཐུགས་ཡེ་ཤེས་ལྔའི་མཚོན་བྱེད་དུ་རང་སྣང་བའོ། །

གཉིས་པ་བརྟེན་པ་ལྷའི་དཀྱིལ་འཁོར་ལ་གཉིས་ཏེ། གཙོ་བོའི་བཞུགས་ཚུལ་དང་། འཁོར་གྱི་བཀོད་པའོ། །

དང་པོ་ལ་གསུམ་ལས། སྐུ་མདོག་དང་ཞལ་ཕྱག་གི་རྣམ་པ་ལས། སྐུ་མདོག་ནི་གཏི་མུག་གནས་སུ་དག་པས་གཙོ་བོ་སྨུག༵་ནག༵་ཞེ་སྡང་དག་པས་བཛྲ་ཧེ་རུ་ཀ་སྔོ༵་ན༵ག །ང་རྒྱལ་དག་པས་རཏྣ་སེར༵་ན༵ག་ད༵ང་། འདོད་ཆགས་དག་པས་པདྨ་དམ༵ར་ན༵ག །ཕྲག་དོག་དག་པས་ཀརྨཱ་ཡབ་ཡུམ་ལྗང༵་ན༵ག་སྟེ་རྩ་ཞལ་དང་བཅས་པའོ། །དབུས་དང་ཤར་ནུབ་བྱང་བཞིའི་ཧེ་རུ་ཀའི་གཡས་དཀར་ཞིང་། ལྷོའི་གཡས་སྔོན་པོའོ། །དབུས་དང་ལྷོ་དང་བྱང་གི་གཡོན་དམར་ཞིང་། ཤར་དང་ནུབ་ཀྱི་གཡོན་སེར་པོའོ། །དེའང་དྲག་པོའི་འཕྲིན་ལས་མཐར་ཕྱིན་པའི་རྟགས་སུ་ཐམས་ཅད་ལ་ནག་པོའི་སྒྲ་སྨོས་སོ། །གདུལ་བྱ་གདུག་པ་ཅན་གྱི་སྣང་ངོར་རབ་ཏུ་འཇི༵གས་པ༵འི་སྐུ༵་སྟེ། ཞལ་ཕྱག་གི་གནས་ལུགས་ནི་དུག་གསུམ་དག་ཅིང་སྐུ་གསུམ་མངའ་བའི་ཕྱིར་ཐམས་ཅད་(༢༩༤)ཀྱང་དབུ༵་གསུ༵མ་པ། ཡེ་ཤེས་དྲུག་ལ་དབང་བསྒྱུར་ཞིང་ཕ་རོལ་ཏུ་ཕྱིན་པ་དྲུག་གིས་འགྲོ་བ་དྲུག་སྒྲོལ་བའི་ཕྱིར་ཕྱག་དྲུག་པ་རྫུ་འཕྲུལ་བཞི་དང་བདུད་བཞི་འདུལ་བའི་བརྡར་ཞབ༵ས་བཞི༵་བརྐྱང་བསྐུམ་དུ་བགྲད༵་པའོ། །

གཉིས་པ་རྒྱན་ཆས་དང་གསུང་གི་ང་རོ་ལ། རྒྱན་ཆས་ནི་དཔལ་གྱི་ཆས་བརྒྱད་དེ། ཐེག་པ་ཆེན་པོའི་དོན་ལ་མངའ་བརྙེས་པའི་མཚོན་བྱེད་དུ་གླང་ཆེན་ལྤགས་པའི་སྟོད་གཡོགས། དྲེགས་པ་དབང་དུ་སྡུད་པ་ཞིང་གི་གཡང་གཞིའི་སྟོད་གཡོགས། གཟུང་འཛིན་གྱི་མཐའ་ལས་གྲོལ་བ་སྟག་ལྤགས་ཀྱི་ཤམ་ཐབས་ཏེ་ཀོ༵་རློན༵་གྱི་གོ༵ས་ནི༵་རྣམ་པ་སྣ༵་ཚོག༵ས་དང་ལྡན༵་པའོ། །སྦྲུལ་ནི་རྒྱལ་རིགས་དཀར་པོའི་དབུ་རྒྱན། རྗེ་རིགས་སེར་པོའི་སྙན་ཆ་དང་མགུར་ཆུ། བྲམ་ཟེའི་རིགས་དམར་པོའི་དོ་ཤལ་དང་དཔུང་རྒྱན། རྨོངས་རིགས་ལྗང་གུའི་སྐེད་རག །གདོལ་བའི་རིགས་ནག་པོའི་ཕྱག་ཞབས་ཀྱི་གདུ་བུའོ། །ཐོད་ཕྲེང་ནི་མི་མགོ་སྐམ་པོའི་དབུ་རྒྱན། རྙིད་པའི་སེར་རལ་ཁ། རློན་པ་ལྔ་བཅུ་རྩ་གཅིག་གི་དོ་ཤལ་ལོ། །ཉི་མ་དང་ཟླ་བའི་ཆས་ནི་ཕྲག་པ་གཡས་གཡོན་ནས་འོད་འགྱེད་པ་སྟེ་ཐབས་དང་ཤེས་རབ་ཀྱིས་སྣང་བའི་བརྡའོ། །དེ་དག་གིས་མཚོན་ནས། རཀྟའི་ཐིག་ལེ། ཞག་གི་ཟོ་རིས། ཐལ་ཆེན་གྱི་ཚོམ་བུ་དང་བརྒྱད་དོ། །དེའང་ཀོ་རློན། སྦྲུལ། ཐོད་ཕྲེང་། ཉི་ཟླ་གཉིས། རཀྟ། ཞག །ཐལ་བ་རྣམས་དུར་ཁྲོད་ཆས་བརྒྱད་དོ། །གསུང་གི་ང་རོ་ནི་རྔམ༵ས་པ༵འི་སྒྲ༵་སྐད་ཆེ༵ན་པོ་འཇིག༵ས་པ༵ར་སྒྲོག༵ས་པ་འབྲུག་སྟོང་ལྡིར་བ་ཙམ་མོ། །

གསུམ་པ་ཕྱག་མཚན་དང་བཙུན་མོའི་སྦྱོར་ཚུལ་ལ། ཕྱག་མཚན་ནི། སངས་རྒྱས་གསང་བ་ཕྱག་གཡས་གཡོན་གྱི་དང་པོ་གཉིས་ན་རྡོ་རྗེ་དང་འཁོར་ལོ། བར་པ་ནི་རལ་གྲི་དང་དུང་ཆེན། ཐ་མ་གཉིས་ན་དགྲ་སྟ་དང་ཐོང་གཤོལ་ལ་སོགས་ཀྱི་སྒྲ་དབྱུག་ཏོ། །ཏྲི་ཤུལ། བཻ་ཅོན་ལ་སོགས་པའོ་ཞེས་གསུངས་ཤིང་། རོང་པ་ནི་གཡས་དང་པོ་རང་རང་གི་ཕྱག་མཚན། གཡོན་དང་པོ་བནྡྷ་རཀྟས་བཀང་བ། གཞན་རྣམས་རིམ་པ་བཞིན་སྦྱོར་བར་བཞེད་ཀྱང་། འདི་སྒྱུ་འཕྲུལ་རྡོ་རྗེ་དང་མཐུན་པར་སྦྱར་ན། གཡས་དང་པོ་རྣམས་རང་རང་གི་ཕྱག་མཚན་འཛིན་པ་སྟེ། དེའང་བཛྲ་ཧེ་རུ་ཀའི་གཡས་དང་པོ་རྡོ༵་རྗེ༵་རྩེ་དགུ་པའོ། །རིགས་ལྔ་གའི་གཡས་བར་མ་རྡོ་རྗེ་རྩེ་ལྔ་པ་དང་། གཡོན་བར་མ་དུང༵་ཆེ༵ན་ཏེ་ཐོད་པ་ལྕང་ལོ་མེད་པ་ཁྲག་གིས་གང༵་བ༵འོ༵། །ཀརྨ་ཧེ་རུ་ཀའི་གཡས་དང་པོ་རལ༵་གྲི༵། དེ་བཞིན་གཤེགས་པའི་གཡོན་དང་པོ་དང་། རིན་པོ་ཆེའི་གཡོན་ཐ་མ་གཉིས་ན་དགྲ༵་སྟ༵། ལས་ཀྱི་གཡོན་དང་པོ་ཐོང་གཤོ༵ལ། རྡོ་རྗེའི་གཡོན་ཐ་མ་དང་། ལས་ཀྱི་གཡོན་ཐ་མ་གཉིས་སྟོང་གི་འཇིག་རྟེན་འཁོར་ཡུག་དང་བཅས་པ་མཚོན་པའི་ཕྱིར་རྔེ་ཆུང་ངོ་། །ལ༵་སོ༵གས་(༢༩༥)ཀྱིས་བསྡུས་པ། བུདྡྷའི་གཡས་དང་པོ་འཁོར་ལོ། རཏྣའི་རིན་པོ་ཆེ། པདྨའི་པདྨ། བུདྡྷའི་གཡོན་ཐ་མ་ཁ་ཊཱཾ་ག །རིན་པོ་ཆེའི་གཡོན་དང་པོ་རྒྱུ་ཞགས། རྡོ་རྗེ་དང་པདྨའི་གཡོན་དང་པོ་དྲིལ་བུ། པདྨའི་གཡོན་ཐ་མ་རྔེ་ཆུང་། ཐམས་ཅད་ཀྱི་གཡས་ཐ་མ་ཏི་ར་སྟེ་ཞིང་དབྱུག་གདེངས་པ་སྟེ། རང༵་གི༵་ལ༵ག་ཆ༵་སྣ༵་ཚོག༵ས་བསྣམ༵ས་པའོ། །དེའང་རྡོ་རྗེ་ལས། རྡོ་རྗེ་རྡོ་རྗེ་དྲིལ་བུ་དང་། །འཇིག་རྟེན་འཁོར་ཡུག་བཅས་པ་འདེགས། །དེ་བཞིན་འཁོར་ལོ་དགྲ་སྟ་དང་། །ཁ་ཊྭཱྃ་རབ་ཏུ་འཁྲོལ་བའོ། །ནོར་བུ་རིན་ཅེན་རྒྱུ་ཞགས་དང་། །རྡོ་རྗེ་དགྲ་སྟ་རབ་ཏུ་བསྡེབས། །ཆགས་མཆོག་པདྨ་ཆེན་པོ་དང་། །དྲིལ་བུ་རྔ་ཡི་སྒྲ་སྒྲོགས་པའོ། །ལས་ཀྱི་རལ་གྲི་གཤོལ་ཆེན་དང་། །འཇིག་རྟེན་རྒྱང་མར་འཕེན་པ་སྟེ། །བར་མ་རྡོ་རྗེ་དུང་དམར་འཁྲུག །ཏི་ར་ཆེན་པོ་རབ་བསྡེབས་པའོ། །ཞེས་སོ། །བཙུན་མོའི་འཁྲིལ་ཚུལ་ནི་རང་རང་གི་རིགས་ཀྱི་བཙུན༵་མོ༵་ལྔ་ནི་ཞལ་གཅིག་ཕྱག་གཉིས་མ་འཇི༵གས་པའི༵་ཚོག༵ས་གཡས་ཡབ་ལ་འཁྱུད་ཅིང་གཡོན་ཐོད་ཁྲག་གཙོ་བོའི་ཞལ་དུ་སྟོབས་པ་དང༵་འཁྲི༵ལ་བའོ། །

གཉིས་པ་འཁོར་གྱི་བཀོད་པ་ལ་གཉིས་ལས། དང་པོ་ཁྲོ་མོ་ཉི་ཤུའི་བཀོད་པ་ནི། གནས་ཀྱི་མ་མོ་བརྒྱད་ནི། དེའང་རྣམ་ཤེས་ཚོགས་བརྒྱད་འཁོར་བ་བསྐྱེད་པའི་གནས་ཡིན་ལ། དེ་རྣམས་གནས་སུ་དག་པར་བྱེད་པའི་ཕྱིར་གནས་ཀྱི་ཕྱག་རྒྱ་ཞེས་བྱའོ། །དེ་ལ་གཽ་རཱི་དཀར་མོ་ཞིང་དབྱུག་དང་བྷན་དམར། ཙཽ་རཱི་སེར་མོ་མདའ་གཞུ་འགེངས་པ། ཕྲ་མོ་ཧ་དམར་མོ་ཕྱག་གཉིས་ཆུ་སྲིན་གྱི་རྒྱལ་མཚན་བསྒྲེང་བ། བཻ་ཏྟ་ལཱི་ནག་མོ་རྡོ་རྗེ་འཕྱར་ཞིང་བྷན་དམར་ཐུགས་ཀར་འཛིན་པ། པུཀྐ་སཱི་དམར་སེར་བྱིས་པའི་རྒྱུ་མ་འདྲེན་པ། གྷསྨ་རི་ལྗང་ནག་དུང་དམར་དཀྲུག་ཅིང་གསོལ་བ། སྨ་ཤ་ནི་མཐིང་ནག་བྱིས་པའི་སྙིང་ཟ་བ། ཙཎྜ་ལཱི་སེར་སྐྱ་བམ་གྱི་མགོ་ལུས་འབྲལ་བའོ། །ཡུལ་གྱི་ཕྱག་རྒྱ་ཕྲ་མེན་བརྒྱད་ལ། དེའང་སྒོ་ལྔའི་རྣམ་ཤེས་ཀྱི་ཡུལ་གཟུགས་སྒྲ་དྲི་རོ་རེག་བྱ། ཡིད་ཀྱི་ཡུལ་ཆོས། ཉོན་མོངས་པ་ཅན་གྱི་ཡུལ་ཀུན་གཞི། ཀུན་གཞིའི་ཡུལ་ཕྱི་ནང་གི་ཆོས་ཐམས་ཅད་གནས་སུ་དག་པས་ཡུལ་གྱི་ཕྱག་རྒྱའོ། །དེའང་སེང་ཧ་སེར་མོ་ལག་པས་རོ་བསྣོལ་ནས་ཁའི་ཐད་དུ་འཛིན་པ། བྱཱ་གྲི་དམར་མོ་རོ་ལ་མིག་འབྲུ་ཚུགས་སུ་བལྟ་བ་དང་། སྲི་ལ་ནག་མོ་ཞིང་ལ་འདག་པ་དང་། ཤྭ་ན་མཐིང་ག་རོའི་ལྟོ་བ་འདྲལ་བ་དང་། ཀྲི་ཏ་དམར་མོ་རོའི་རྒྱུ་མ་འདྲེན་པ་དང་། ཀང་ཀ་སེར་མོ་ཞིང་ཆེན་ཕྲག་ལ་ཁུར་བ་དང་། ཀཱ་ཀ་ནག་མོ་བྷན་གྲི་ཐོག་པ་དང་། ཧུ་ལུ་མཐིང་ག་ལྕགས་ཀྱུ་འདེབས་པའོ། །སྒོ་མ་བཞིའི་ཕྱག་རྒྱས་རབ་ཏུ་མཛེས་པ་ནི། ཕྱིན་ཅི་ལོག་གི་བདུད་བཞི་འཇོམས་ཤིང་ཡེ་ཤེས་བཞི་ཡིས་རྒྱས་འདེབས་པ་སྟེ། རྟ་གདོང་དཀར་མོ་ལྕགས་ཀྱུ་(༢༩༦)འཛིན་པ། ཕག་གདོང་ནག་མོ་ཞགས་པ་འཛིན་པ། དྲེད་གདོང་དམར་མོ་ལྕགས་སྒྲོག་འཛིན་པ། སྤྱང་གདོང་ལྗང་གུ་དྲིལ་ཆེན་འཛིན་པའོ། །

གཉིས་པ་དབང་མོ་ཉི་ཤུ་རྩ་བརྒྱད་ཀྱི་བཀོད་པ་ནི་སླས་ཆུང་མ་དང་བྱི་མོ་མཛའ་མོ་དང་བྲན་མོའི་ཚོགས་ནི་གཡོག་གི་ལས་བྱེད་པའི་ཆ་ནས་བཏགས་ཏེ་དེ་ལྟར་བཅུ་ཕྲག་གཉིས་དང་ནི་བརྒྱད་ཀྱིས་མཛེས་པར་བསྐོར་བའོ། །དེ་དག་རང་རང་གི་འོག་ན་རོའི་གདན་དང་ཐོད་རློན་ལ་སོགས་པའི་ལག་ཆ་དང་བཅས་ཏེ་ཕྲིན་ལས་ཅི་བགྱི་ཞེས་ནི་ཆས་ཏེ་འཁོར་བར་གནས་སོ། །ཇི་ལྟར་གནས་ན། སྲིན་མོ་སྨུག་ནག་ཐོད་རློན་འཆང་བ་དང་། ཚངས་པ་དམར་སེར་པདྨ་འཛིན་པ་དང་། འཁྲུག་མོ་དཀར་ལྗང་ཏྲི་ཤུལ་འཛིན་པ་དང་། གཏོགས་འདོད་སྔོན་མོ་འཁོར་ལོ་ཐོགས་པ་དང་། གཞོན་ནུ་དམར་མོ་མདུང་ཐུང་འཛིན་པ་དང་། དབང་མོ་དཀར་མོ་རྡོ་རྗེ་འཛིན་པ་དང་། འདོད་པ་དམར་མོ་ཙནྡན། བདུད་རྩི་དམར་མོ་པདྨ། ཟླ་བ་དཀར་མོ་པུནྜ་རི་ཀ །བཻ་ཅོན་ལྗང་གུ་དབྱུག་ཏོ། །སྲིན་མོ་དམར་ནག་དུང་ཁྲག་འཐུང་བ། ཟ་བ་ལྗང་ནག་རོ་ཡི་རྒྱུ་མ་འདྲེན་པ། དགའ་བ་དམར་མོ་གྲི་གུག །མྱོས་མ་དམར་མོ་གཤོལ། གཅིག་པུར་སྤྱོད་མ་སེར་མོ་སྤུ་གྲི། ཡིད་འཕྲོག་དམར་མོ་མདའ་གཞུ། གྲུབ་མོ་དཀར་མོ་བུམ་པ། རླུང་ལྷ་སྔོན་མོ་བ་དན། གསོད་བྱེད་དཀར་མོ་རལ་གྲི། མེ་མོ་དམར་མོ་གསལ་ཤིང་། ཕག་མོ་ནག་མོ་མཆེ་ཞགས། རྒན་བྱེད་ནག་མོ་ཞིང་ཟ་བ་དང་། སྣ་འཕྱང་དཀར་མོ་ཐོད་ཁྲག་འཐུང་བ། ཆུ་ལྷ་དམར་མོ་སྦྲུལ་ཞགས། ནག་མོ་ཆེན་མོ་ལྕགས་ཀྱུ། སེར་མོ་ཞགས་པ། དམར་མོ་ལྕགས་སྒྲོག །ནག་མོ་དྲིལ་བུ་འཁྲོལ་བའོ། །ལེའུ་འདི་ནི་བྲི་བ་དང་སྒོམ་པ་ལ་སོགས་པ་སྤྱིའི་དོན་དུ་སྨོས་ཀྱི་གཅིག་ཁོ་ནའི་ཕྱོགས་སུ་ཆད་པ་ནི་མ་ཡིན་ནོ། །

གསུམ་པ་ངོ་མཚར་གྱི་ལྟས་སྣང་བ་ནི་དེ་སྐད་ཅེས་བརྗོད་པས་འཇིག་རྟེན་དྲུག་གི་ཕྱོགས་བཅུ་ཐམས་ཅད་དུ་ཡེ་ཤེས་ཀྱི་ཁྲོ་བོ་མེ་དཔུང་འབར་བའི་དཀྱིལ་འཁོར་ཞིང་གི་རྡུལ་སྙེད་ནམ་མཁའི་དབྱིངས་དང་ཆོས་ཀྱི་དབྱིངས་ཀྱིས་ཁྱབ་པ་ཀུན་ཏུ་སྐུ་གསུང་ཐུགས་ཀྱི་སྣང་བས་གང་བར་གྱུར་ཏོ། །ར༵ང་བཞིན༵་གས༵ང་བ༵འི་སྙིང༵་པོ༵་དཀྱིལ་འཁོར་གྱི་དེ༵་ཁོ༵་ན༵་ཉིད༵་ངེ༵ས་པ༵་ལ༵ས། ཁྲོ༵་བོ༵འི་དཀྱིལ༵་འཁོར༵་གྱི༵་རྣམ་དབྱེ་བསྟན་པའི་ལེ༵འུ༵་སྟེ༵་བཅུ༵་བདུན༵་པའི་རྣམ་པར་བཤད་པ༵འོ༵།། །།