གཉིས་པ་མཐའ་རགས་ཙམ་དཔྱད་པ།
གཉིས་པ་མཐའ་རགས་ཙམ་དཔྱད་པ་ལ།
སེམས་བསྐྱེད་ཀྱི་མཚན་ཉིད་ཀྱི་སྐབས་སུ་ཉ་ཊཱིཀ་ལས། བྱང་ཆུབ་མཆོག་ཏུ་སེམས་བསྐྱེད་པའི་མཚན་ཉིད། གཙོ་བོ་སེམས་གང་ཞིག གཞན་དོན་ཕྱིར་དུ་རྫོགས་པའི་བྱང་ཆུབ་འདོད་པ་དང་མཚུངས་ལྡན་ཞེས་པ་འཕགས་སེང་ངོ༌། །ཞེས་འཕགས་སེང་ལུགས་ལ་སེམས་བསྐྱེད་གཙོ་སེམས་དགོས་པར་གསུངས་ལ། འཕགས་སེང་རང་གིས་མདོ་རྒྱུད་ཀྱི་ལུང་གང་ལ་བརྟེན་པ་ཡིན་དཔྱད་པར་བྱའོ། །གཞན་ཡང་ཐེག་ཆེན་སེམས་བསྐྱེད་ཡིན་ན་ཡོན་ཏན་གསུམ་ལྡན་ཡིན་པས་ཁྱབ་པར་ཐལ། མདོ་ལུགས་མ་ལས། ཡོན་ཏན་གསུམ་དང་སེམས་ཅན་དང་བྱང་ཆུབ་ཆེན་པོ་ལ་དམིགས་པ་དང་ལྡན་པའི་འདོད་པ་ནི་མཚན་ཉིད་དོ། །ཐེག་པ་ཆེན་པོའི་སེམས་བསྐྱེད་ནི་མཚོན་བྱའོ། །ཞེས་དང༌། མདོ་སྡེ་རྒྱན་ལས། སྤྲོ་བ་ཆེ་དང་རྩོམ་པ་ཆེ། །དོན་ཆེ་བ་དང་འབྱུང་བ་ཆེ། །བྱང་ཆུབ་སེམས་དཔའི་སེམས་པ་སྟེ། །དོན་གཉིས་ལྡན་པའི་སེམས་འབྱུང་བ། །ཞེས་གསུངས་པའི་ཕྱིར། འདོད་ན། ཐེག་ཆེན་སེམས་བསྐྱེད་ཡིན་ན་སྤྲོ་བ་ཆེན་པོ་དང་ལྡན་པས་ཁྱབ་པར་ཐལ། འདོད་པའི་ཕྱིར། འདོད་ན། ལམ་ཐེག་ཆེན་དུ་ཞུགས་ལ་གྲུབ་མཐའ་ཐེག་དམན་དུ་ཞུགས་པའི་སྟོང་ཉིད་མ་རྟོགས་པའི་བྱང་སེམས་ཀྱི་རྒྱུད་ཀྱི་སེམས་བསྐྱེད་ཆོས་ཅན། སྐབས་འདིའི་སྤྲོ་བ་ཆེན་པོ་དང་ལྡན་པར་ཐལ། ཐེག་ཆེན་སེམས་བསྐྱེད་ཡིན་པའི་ཕྱིར། མ་གྲུབ་ན། དེར་ཐལ། དེ་འདྲའི་གང་ཟག་གི་རྒྱུད་ཀྱི་སེམས་བསྐྱེད་ཡོད་པའི་ཕྱིར། དེར་ཐལ། ལམ་ཐེག་ཆེན་དུ་ཞུགས་ལ་གྲུབ་མཐའ་ཐེག་དམན་དུ་ཞུགས་པའི་ཉན་ཐོས་ཀྱི་ལྟ་བ་ཁས་ལེན་པའི་བྱང་སེམས་ཡོད་པའི་ཕྱིར་ཏེ། མདོ་ལུགས་མ་ལས། ལྟ་བ་ཁས་ལེན་པའི་དང༌། སྤྲུལ་བའི་དང༌། རིགས་མ་ངེས་པའི་དང༌། ངེས་པའི་ཉན་ཐོས་སོ། །དང་པོ་ནི་སེམས་བསྐྱེད་དང་ལྡན་ལ་ཉན་ཐོས་དང་ལྟ་བ་མཐུན་པ་ཕྱི་རོལ་གྱི་གཟུང་འཛིན་བདེན་པར་འདོད་པའོ། །ཞེས་དང༌། གཞན་སྟོང་སྙིང་པོ་ལས། གྲུབ་མཐའ་ཐེག་དམན་འཛིན་ལ་ལམ་ཐེག་ཆེན་དུ་ཞུགས་པ་ཡོད། ཅེས་གསུངས་པའི་ཕྱིར། གོང་དུ་འདོད་ན། ཟབ་མོ་སྟོང་ཉིད་ལ་སྤྲོ་བ་དང་ལྡན་པར་ཐལ། སྐབས་འདིའི་སྤྲོ་བ་ཆེན་པོ་དང་ལྡན་པའི་ཕྱིར། ཁྱབ་སྟེ། སྐབས་འདིའི་སྤྲོ་བ་ཆེན་པོ་ནི་ཟབ་མོ་སྟོང་ཉིད་ལ་སྤྲོ་བ་ཞིག་དགོས་པའི་ཕྱིར། མདོ་ལུགས་མ་ལས། སྤྲོ་བ་ཆེན་པོ་ནི་གོ་ཆའི་བརྩོན་འགྲུས་ཀྱིས་དེ་ཟབ་མོ་དང༌། ཞེས་དང༌། མདོ་སྡེ་རྒྱན་གྱི་རྣམ་བཤད་ལས། གོ་ཆའི་བརྩོན་འགྲུས་ཀྱིས་ཟབ་མོ་སྟོང་བ་ཉིད་སྒོམ་པ་དང་ཡུན་རིང་པོའི་དཀའ་སྤྱད་ལ་སྤྲོ་བ་ཆེན་པོ་དང༌། ཞེས་གསུངས་པའི་ཕྱིར་ཞེ་ན་ལན་ཇི་ལྟར་འདེབ་དགོས་ཚུལ་དཔྱད། ཡང་ཐེག་ཆེན་སེམས་བསྐྱེད་ཡིན་ན་དངོས་སུ་ཚོགས་གཉིས་ལ་བརྩོན་པ་ཆེན་པོ་དང་ལྡན་པས་ཁྱབ་བར་ཐལ། དེ་ཡིན་ན་ཡོན་ཏན་གསུམ་དང་ལྡན་པས་ཁྱབ་པའི་ཕྱིར། ཁྱབ་སྟེ། མདོ་ལུགས་མ་ལས། རྩོམ་པ་ཆེན་པོ་ནི་གོ་ཆ་ཇི་ལྟ་བ་བཞིན་དུ་སྦྱོར་བའི་བརྩོན་འགྲུས་ཀྱིས་སོ། །ཞེས་དང༌། མདོ་སྡེ་རྒྱན་གྱི་རྣམ་བཤད་ལས། སྦྱོར་བའི་བརྩོན་འགྲུས་ཀྱིས་དངོས་སུ་ཚོགས་གཉིས་སྒྲུབ་པ་ལ་རྩོམ་པ་ཆེན་པོ་དང་ལྡན་པའོ། །ཞེས་སོ། །གོང་དུ་འདོད་ན། སྒྲུབ་པ་ལ་དངོས་སུ་བརྩོན་པ་དང་བྲལ་བའི་བྱང་སེམས་ཀྱི་རྒྱུད་ཀྱི་སེམས་བསྐྱེད་ཆོས་ཅན། དེར་ཐལ། དེའི་ཕྱིར། འདོད་མི་ནུས་པ་འདྲ། མ་གྲུབ་ན།དེར་ཐལ། དེ་འདྲ་ཡོད་པའི་ཕྱིར་ཏེ། མདོ་སྡེ་རྒྱན་ས་འགྲེལ་ལས། ཆོ་གས་མ་བསྐྱེད་ཅིང་སྤྱོད་པ་དང་མ་འབྲེལ་བའི་སྨོན་པ་ཙམ་སྐྱེས་པ་ལྟ་བུའོ། །ཞེས་དང༌། ས་བཟང་གི་སྤྱོད་འཇུག་གི་འགྲེལ་བ་ལས། སྒྲུབ་པ་དང་བྲལ་ཡང་བྱང་ཆུབ་ཏུ་སྨོན་པ་ཙམ་གྱི་སེམས་སྐྱེས་པ་ལས། ཞེས་དང༌། ཉ་ཊཱིཀ་ལས། ལམ་དུ་འགྲོ་བའམ་ཞུགས་པ་མིན་པར་འགྲོ་འདོད་པ་ལྟར་བྱང་ཆུབ་ཆེན་པོའི་ལམ་ཉམས་ལེན་ལ་སྦྱོར་བས་མ་ཞུགས་པར་དེ་ཐོབ་པར་སྨོན་པའི་སེམས་བསྐྱེད་དེ། ཞེས་སོ། །ཡང་ཐེག་ཆེན་སེམས་བསྐྱེད་ཡིན་ན་འབྱུང་བ་ཆེན་པོ་དང་ལྡན་པས་ཁྱབ་པར་ཐལ། ཡོན་ཏན་གསུམ་ལྡན་ཡིན་པས་ཁྱབ་པའི་ཕྱིར། འདོད་ན། དམན་ལམ་དུ་ལྟུང་ངེས་ཀྱི་བྱང་སེམས་ཀྱི་སེམས་བསྐྱེད་ཆོས་ཅན། དེར་ཐལ། དེའི་ཕྱིར། འདོད་ན། དེ་ཆོས་ཅན། བྱང་ཆུབ་ཆེན་པོ་ཡང་དག་པར་འགྲུབ་པ་ཡིན་པར་ཐལ། འབྱུང་བ་ཆེན་པོ་ཡིན་པའི་ཕྱིར། ཁྱབ་སྟེ། མདོ་ལུགས་མ་ལས། འབྱུང་བ་ཆེན་པོ་ནི་བྱང་ཆུབ་ཆེན་པོ་ཡང་དག་པར་འགྲུབ་པའི་ཕྱིར་རོ། །ཞེས་དང༌། མདོ་སྡེ་རྒྱན་གྱི་རྣམ་བཤད་ལས། འབྲས་བུ་ཡོངས་སུ་འཛིན་པའི་ཡོན་ཏན་ནི། བྱང་ཆུབ་ཆེན་པོ་ཡང་དག་པར་འགྲུབ་པས་འབྱུང་བ་ཆེན་པོ་དང་ལྡན་པ་ཡིན་ཞིང༌། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །ཡང་སེམས་བསྐྱེད་ཡིན་ན་འདོད་པ་ཡིན་དགོས་སམ་ཅི། དགོས་ན་འདོད་པ་ལ་སེམས་བྱུང་དགོས་སམ་ཅི། མི་དགོས་ན། མདོ་ལུགས་མ་ལས། ཁྲི་བརྒྱད་སྟོང་པར་འདོད་པ་ཞེས་པའི་ཚིག་འདི་དགུ་བཅུ་རྩ་དྲུག་འགྱུར་ཞིང༌། བར་མ་དང་རྒྱས་པ་གཉིས་སུ་ཡང་སྐབས་དེ་དང་དེར་འདོད་པ་ཞེས་པའི་ཚིག་འདི་ཉིད་ཡང་དང་ཡང་དུ་བྱུང་བའི་ཕྱིར་རོ། །དེས་ན་རྒྱལ་བས་སེམས་བསྐྱེད་འདོད་པ་ཡིན་པར་གསུངས་ཤིང༌། གསུངས་པ་དེ་ཉིད་ཡིན་ལུགས་ལྟར་སྡུད་པར་མཛད་པ་པོ་རྒྱལ་ཚབ་ཀྱིས། ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པའི་ཕྱིར། རྒྱལ་བའི་དགོངས་པ་སྟོན་པ་ལ་རྒྱལ་ཚབ་ལས་མཁས་པ་ནི་སུ་ཡང་མེད་དོ། །ཞེས་སོགས་ཀྱིས་འཕགས་སེང་གིས་སེམས་བསྐྱེད་གཙོ་སེམས་འདོད་པ་དགག་པ་འགྲོ་ཚུལ་གང་ཡིན་དཔྱད། འདོད་པ་ལ་སེམས་བྱུང་དགོས་ན། ཉ་ཊཱིཀ་ལས། ཐེག་ཆེན་སེམས་བསྐྱེད་དེས་དེ་ལྟར་མི་འདོད་ནའང་དེ་ལྟར་འདོད་པ་དང་དམིགས་རྣམ་མི་མཚུངས་པར་འགྱུར་ཞིང་འདོད་ན་དེ་ཡང་འདོད་པ་ཡིན་མོད་ཅི་ཞིག་འགལ། ཞེས་གསུངས་པ་དང་འགལ་བ་མ་ཡིན་ནམ་དཔྱད། གཞན་ཡང་སེམས་བསྐྱེད་ལ་སེམས་བྱུང་དགོས་པར་ཐལ། སེམས་པ་དགོས་པའི་ཕྱིར་ཏེ།མདོ་སྡེ་རྒྱན་ལས། བརྟན་པ་རྣམས་ཀྱི་སྨོན་ལམ་ནི། །སེམས་པ་འདུན་དང་བཅས་པ་སྟེ། །ཞེས་དང༌། ལྷན་ཐབས་འོད་བརྒྱ་འབར་བ་ལས། ཀུན་རྫོབ་བྱང་ཆུབ་ཀྱི་སེམས་འདི་ནི་བྱང་ཆུབ་རྫོགས་པའི་སངས་རྒྱས་ཀྱི་གོ་འཕང་ལ་དམིགས་ནས་རང་གཞན་རྣམས་དེ་ཐོབ་འདོད་ཀྱི་འདུན་པ་དང་བཅས་པའི་སེམས་པ་ཡིན་པའི་ཕྱིར་བྱང་ཆུབ་ཀྱི་སེམས་ཞེས་བྱ་སྟེ།ཀུན་རྫོབ་བྱང་སེམས་སུ་འཇོག ཅེས་གསུངས་པའི་ཕྱིར་ཟེར་ན་བརྟགས་པའི་གནས་སོ། །ཡང་སེམས་བསྐྱེད་ལ་སེམས་དགོས་པར་ཐལ། མདོ་སྡེ་རྒྱན་ལས། དོན་གཉིས་ལྡན་པའི་སེམས་འབྱུང་བ། །ཞེས་དང༌། དེའི་ཐད་ཀྱི་ས་བཟང་གི་རྣམ་བཤད་ལས། བྱང་ཆུབ་སེམས་དཔའི་སེམས་ཡུལ་ལ་གཡོ་བར་བྱེད་པའི་འདུ་བྱེད་སེམས་པ་དང་མཚུངས་པར་ལྡན་པ་སྟེ།བྱང་ཆུབ་ཆེན་པོའི་དོན་དང་སེམས་ཅན་ཐམས་ཅད་ཀྱི་དོན་བྱ་བ་ལ་དམིགས་པ་དོན་གཉིས་དང་ལྡན་པའི་སེམས་ཁྱད་པར་ཅན་འབྱུང་བ་དེ་ནི་སེམས་བསྐྱེད་ཀྱི་ངོ་བོ་ཉིད་དོ། །ཞེས་གསུངས་པའི་ཕྱིར་ཟེར་ན་དཔྱད་རྒྱུ་ཅུང་ཟད་སྣང་ངོ༌། །ཐེག་ཆེན་སེམས་བསྐྱེད་ལ་སེམས་སེམས་བྱུང་གཉིས་ཀ་ཡོད་པར་ཐལ། ཉ་ཊཱིཀ་ལས། དེས་ན་སེམས་སེམས་བྱུང་གང་ཡིན་ཡང་རུང་བཤད་ཟིན་འཆད་འགྱུར་གྱི་མཚན་ཉིད་ཚང་བའི་བློ་ཞིག་མཚན་གཞིར་གཟུང་ངོ༌། །ཞེས་དང༌། དག་ལྡན་ལས། སེམས་བསྐྱེད་པའི་དངོས་པོ་ཞེས་བྱ་བ་ལ་སེམས་ནི་ཡིད་དང་འདོད་པ་སྟེ། ཞེས་གསུངས་པའི་ཕྱིར་རོ། །ཡང་སེམས་བསྐྱེད་ཀྱི་མཚན་ཉིད་ཉ་ཊཱིཀ་ལས། མཚན་ཉིད་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློའོ། །ཞེས་གསུངས་པ་ལ་ཐེག་ཆེན་སེམས་བསྐྱེད་ཡིན་ན་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློ་ཡིན་པས་ཁྱབ་བར་ཐལ། མཚན་ཉིད་བཞག་ཚུལ་དེའི་ཕྱིར། འདོད་ན་སངས་རྒྱས་ཀྱི་རྒྱུད་ཀྱི་སེམས་བསྐྱེད་ཆོས་ཅན། གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློ་ཡིན་པར་ཐལ། ཐེག་ཆེན་སེམས་བསྐྱེད་ཡིན་པའི་ཕྱིར། ཁྱབ་པ་ཁས། མ་གྲུབ་ན། དེར་ཐལ། སངས་རྒྱས་ཀྱི་རྒྱུད་ལ་སེམས་བསྐྱེད་ཡོད་པའི་ཕྱིར་ཏེ། མདོ་སྡེ་རྒྱན་ལས། སེམས་བསྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང༌། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །ཞེས་དང༌། ཞིང་སྟོན་གྱི་རྒྱུད་བླའི་འགྲེལ་བ་བཀའ་འཁོར་ལོ་ཐ་མའི་གསལ་བྱེད་ལས། མཚན་ཉིད། ཅེས་པ་ནས། དང་པོ་ནི། མངོན་རྟོགས་རྒྱན་དུ། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པས། གཞན་དོན་དུ་རྫོགས་པའི་བྱང་ཆུབ་འདོད་པའོ། །འོ་ན་སངས་རྒྱས་ཆོས་ཅན། སེམས་བསྐྱེད་མེད་པར་ཐལ། རྫོགས་པའི་བྱང་ཆུབ་འདོད་པ་མེད་པའི་ཕྱིར་ཞེ་ན། འདོད་ཅེས་པ་མ་འོངས་པ་ན་འདོད་པ་དང་སྔོན་འདོད་པར་བྱས་ཟིན་པ་ལ་འཇུག་པས་སྐྱོན་མེད་དེ། ཐུབ་པ་དགོངས་རྒྱན་དུ། དོན་དུ་གཉེར་བར་བྱས་ཟིན་པའི་སེམས་རྣམ་པར་རྟོག་པ་མེད་པ་ཁོ་ན་ནི་བཅོམ་ལྡན་འདས་ཀྱི་སྟེ་དེ་ལྟར་མངོན་པར་འདོད་པའོ། །ཞེས་པ་ལྟར་རོ། །ཞེས་གསུངས་སོ། །འདོད་ན། སངས་རྒྱས་ལ་བླ་མེད་བྱང་ཆུབ་ཐོབ་ཟིན་ཀྱང་དེ་དོན་དུ་གཉེར་བ་ལ་དགོས་པ་ཞིག་ཡོད་པར་ཐལ། འདོད་པའི་ཕྱིར་ཟེར་ན་དོགས་པའི་གནས་སོ། །ཡང་སངས་རྒྱས་ལ་སེམས་བསྐྱེད་ཡོད་པར་འདོད་ན།སྔོན་མེད་ལེགས་བཤད་ལས། ལས་དང་པོ་བ་ནས་སངས་རྒྱས་མ་ཐོབ་ཀྱི་བར་དུ་སེམས་བསྐྱེད་ཀྱི་མཚན་ཉིད་དང་ལྡན་པ་ཡིན་ལ། སངས་རྒྱས་ཀྱི་སར་ནི་དེའི་རིགས་རྒྱུན་དམིགས་པ་མེད་པའི་སྙིང་རྗེ་ཆེན་པོ་ནི་ཡོད་ཀྱང་སེམས་བསྐྱེད་ཀྱི་མཚན་ཉིད་ནི་ལོག་པ་ཡིན་ཞིང༌། ཞེས་གསུངས་པའི་ཚིག་ཟིན་ལ་དཔྱད་པར་བྱའོ། །ཡང་ཉ་ཊཱིཀ་ལས། མཚན་ཉིད་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློའོ། །ཞེས་གསུངས་པ་ལ་དྲུག་པ་ལྷག་བསམ་པའི་རྒྱུད་ན་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློ་ཡོད་མེད་དཔྱད་དགོས་ཏེ། དེ་འདྲའི་བློ་བཅོས་མ་མ་ཡིན་པ་མེད་ཀྱང་བཅོས་མ་ཞིག་ཡོད།དེ་འདྲའི་བཅོས་མའི་བློ་ཡོད་ན་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་འདོད་པའི་བློ་མ་ཡིན་པའི་རྒྱུ་མཚན་མེད་པའི་ཕྱིར་དང༌། ལམ་རིམ་བདུད་རྩི་ཉིང་ཁུ་ལས། རྫོགས་བྱང་དོན་གཉེར་ཙམ་བསྒོམ་པ་ཡིན་ལ། དེ་ཙམ་གྱིས་བྱང་ཆུབ་སེམས་ཀྱི་མཚན་ཉིད་རྫོགས་པར་མི་འགྱུར་ཞིང༌། འདིར་གཞན་དོན་ཁོ་ནར་རྫོགས་བྱང་དོན་གཉེར་གྱི་བསམ་པ་སྒོམ་པས་སྨོན་པ་བྱང་ཆུབ་སེམས་ཀྱི་མཚན་ཉིད་ཚང་བར་འགྱུར་རོ། །གོང་དུ་གཞན་དོན་བསམ་པ་ཙམ་ཡོད་མོད། ཅེས་གསུངས་སོ། །ཡང་སེམས་བསྐྱེད་ཡིན་ན་སྟོང་ཉིད་སྙིང་རྗེའི་སྙིང་པོ་ཅན་གྱིས་སེམས་བསྐྱེད་ཡིན་པས་ཁྱབ་པར་ཐལ། ཉ་ཊཱིཀ་ལས། རྩ་བ་ནི། སྟོང་ཉིད་སྙིང་རྗེའི་སྙིང་བོ་ཅན་གྱིས་བྱང་ཆུབ་མཆོག་ཏུ་སེམས་བསྐྱེད་པ་ནི་མཚོན་བྱ། མཚན་ཉིད། གཞན་ནི་རང་ལས་གཞན་པའི་སེམས་ཅན་ཐམས་ཅད་དོ། །ཞེས་གསུངས་པའི་ཕྱིར། འདོད་ན། སེམས་བསྐྱེད་ཡིན་ན་སྟོང་ཉིད་རྟོགས་པའི་རྒྱུད་ཀྱི་སེམས་བསྐྱེད་ཡིན་པས་ཁྱབ་པར་ཐལ།འདོད་པའི་ཕྱིར། འདོད་མི་ནུས་ཏེ། སྔར་བཤད་ལྟར་ལམ་ཐེག་ཆེན་དུ་ཞུགས་ལ་གྲུབ་མཐའ་ཐེག་དམན་དུ་ཞུགས་པ་སོགས་ཡོད་པ་དང༌། དབུ་མ་རྒྱན་གྱི་རང་འགྲེལ་ལས། ཡང་དག་དད་པའི་རྗེས་འབྲང་བ། །རྫོགས་པའི་བྱང་ཆུབ་སེམས་བསྐྱེད་ནས། །ཐུབ་པའི་བརྟུལ་ཞུགས་བླངས་བྱས་ཏེ། །དེ་ནི་ཡང་དག་ཤེས་ཚོལ་བརྩོན། །ཞེས་གསུངས་པས་སོ། །གོང་དུ་ཁྱབ་བ་ཡོད་དེ། སྟོང་ཉིད་སྙིང་རྗེའི་སྙིང་པོ་ཅན་ནི་རང་གི་སྟོང་ཉིད་རྟོགས་ནས་དེ་མ་རྟོགས་པའི་སེམས་ཅན་རྣམས་སྡུག་བསྔལ་ལས་བསྒྲལ་བར་འདོད་པའི་བློ་དང་ལྡན་པ་ཞིག་དགོས་པའི་ཕྱིར་ཏེ། ལམ་རིམ་བདུད་རྩི་ཉིང་ཁུ་ལས། སྟོང་ཉིད་སྙིང་རྗེའི་སྙིང་པོ་ཅན་ནི། དེ་ལ་སྟོང་རྐྱང་གིས་ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་པར་མི་འགྲོ་བས་སྟོང་ཉིད་སྙིང་རྗེ་ཟུང་འཇུག་ཅིག་དགོས་པ་ཡིན། ཞེས་པ་ནས། བདེན་མེད་ཀྱི་སྡུག་བསྔལ་མྱོང་བ་འདི་ལས་ལྷག་པའི་སྡུག་བསྔལ་མྱོང་རྒྱུ་མེད། འདི་མེད་པར་རྟོགས་ན་རང་གྲོལ་དུ་འདུག་པ་ལ་དེ་ལྟར་མ་རྟོགས་པ་སྙིང་རེ་རྗེ། ཞེས་ཡང་ཡང་བསམ་ཞིང་བསྒོམ། ཞེས་གསུངས་སོ། ། ཡང་སྨོན་འཇུག་ལ་དཔྱད་པར་བྱ་བ་འདི་ལྟ་སྟེ། ས་བཟང་སྤྱོད་འཇུག་འགྲེལ་བ་༤༢ལས། དེས་ན་སེམས་བསྐྱེད་ཡིན་ལ་སྡོམ་པ་མ་ཡིན་པ་ཡོད་དེ། ཆོ་གས་མ་བསྐྱེད་ཅིང་སྤྱོད་པ་དང་མ་འབྲེལ་བའི་སྨོན་པ་ཙམ་སྐྱེས་པ་ལྟ་བུའོ། །སྡོམ་པ་ཡིན་ལ་སེམས་བསྐྱེད་མ་ཡིན་པ་ནི་མེད་དེ། ཐེག་ཆེན་གྱི་སྡོམ་པ་གང་ཡིན་ལ་སེམས་བསྐྱེད་ཀྱིས་ཁྱབ་པའི་ཕྱིར་རོ། །ཞེས་ཐེག་ཆེན་སྡོམ་པ་དང༌། ལྷན་ཐབས་འོད་བརྒྱ་འབར་བ་ལས། སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་བྱ་ཞེས་བསྒོམ་པ་ནི། དཔེ་འགྲོ་བར་འདོད་པ་དང་མཚུངས་པའི་དོན་སྨོན་པ་བྱང་སེམས་ཡིན་ལ། དེའི་ཕྱིར་དུ་ཟབ་ལམ་རྡོ་རྗེའི་རྣལ་འབྱོར་སྒོམ་པར་བགྱིའོ་སྙམ་པ་ནི། དཔེ་ལམ་དུ་འགྲོ་བ་དང་མཚུངས་པའི་དོན་འཇུག་པ་བྱང་སེམས་ཡིན་ནོ། །ཞེས་པ་ནས། འདིའི་ངོ་བོ་ནི་ད་ལྟ་ཉིད་སློབ་འདོད་ཡིན་ཞིང༌། ཞེས་ཟབ་ལམ་རྡོ་རྗེའི་རྣལ་འབྱོར་སྒོམ་པར་བགྱིའོ་སྙམ་པ་དང༌། ཡུམ་མདོ་ལས།ལམ་གྱི་རྣམ་པར་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པ་དང༌། ཐམས་ཅད་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པ་དང༌། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་རྣམ་པར་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་བྱའོ། །ཞེས་ལམ་གྱི་རྣམ་པར་ཤེས་པ་ཉིད་ཡོངས་སུ་རྫོགས་པར་བྱ་བར་འདོད་པ་དང༌། མདོ་ལུགས་མ་ལས། གཞན་དོན་འདོད་པ་སྨོན་པའི་སེམས། ཞེས་གཞན་དོན་འདོད་པ་དེ་རྣམས་ནི་གཞན་དོན་དུ་ཡང་དག་པར་རྫོགས་པའི་བྱང་ཆུབ་འདོད་པ་ཡིན་མིན་དང༌། མིན་ན་སེམས་བསྐྱེད་མ་ཡིན་པར་འགྱུར་བ་ཡིན་ནམ་དཔྱད། ཡང་སྨོན་འཇུག་གི་ཁྱད་པར་ལ། སྨོན་སེམས་དང་འཇུག་སེམས་གཉིས་ཀས་གཞན་དོན་དང་བྱང་ཆུབ་གཉིས་ཀར་འདོད་པ་ཡིན་ན་མདོ་ལུགས་མ་ལས། སྨོན་པ་དང་འཇུག་པའི་ཁྱད་པར་ཡང་རང་གཞན་གྱི་དབྱེ་བ་ལས་གཞན་དོན་འདོད་པ་སྨོན་པའི་སེམས་དང༌། བྱང་ཆུབ་འདོད་པ་འཇུག་པའི་སེམས་ཡིན་ཏེ། ཞེས་གཞན་དོན་འདོད་པ་དང་བྱང་ཆུབ་འདོད་པའི་སྒོ་ནས་དེ་གཉིས་ཀྱི་ཁྱད་པར་འགྲོ་ཚུལ་ལ་དཔྱད། སྔོན་མེད་ལེགས་བཤད་ལས། གང་ལ་འཇུག་པ་ཡོད་པ་དེ་ལ་སྨོན་སེམས་ཀྱང་ཡོད་དོ། །ཞེས་གསུངས་པ་ལྟར་འཇུག་སེམས་ཡོད་ན་སྨོན་སེམས་ཡོད་དགོས་ཀྱང་དེ་གཉིས་རྣམ་པ་མི་འགལ་ན་མདོ་ལུགས་མ་ལས་དེ་གཉིས་ཀྱི་ཁྱད་པར་གསུངས་ཚུལ་གང་ཡིན་སོགས་ཀྱི་སྒོ་ནས་འཇུག་སེམས་ཡིན་ན་སྨོན་སེམས་ཡིན་དགོས་མིན་དང་སངས་རྒྱས་ཀྱི་ས་ན་དེ་གཉིས་ཡོད་མེད་དཔྱད། ཡང་བྱམས་པའི་རྣམ་ཐར་གྱི་མདོ་ལས། རིགས་ཀྱི་བུ་འདི་ལྟ་སྟེ། དཔེར་ན་རྡོ་རྗེ་རིན་པོ་ཆེ་ཆག་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་གནོན་ཅིང་རྡོ་རྗེ་རིན་པོ་ཆེའི་མིང་ཡང་མི་འདོར་ལ། དབུལ་བ་ཐམས་ཅད་ཀྱང་རྣམ་པར་བཟློག་གོ །རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་ཡང་ཉན་ཐོས་དང་རང་སངས་རྒྱས་ཀྱི་ཡོན་ཏན་གྱི་གསེར་གྱི་རྒྱན་ཐམས་ཅད་ཟིལ་གྱིས་གནོན་ཅིང་བྱང་ཆུབ་སེམས་དཔའི་མིང་ཡང་མི་འདོར་ལ་འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ །ཞེས་དང༌། བསླབ་བཏུས་ལས། ཅི་སར་མ་ཆུད་པ་རྣམས་ལ་བྱང་ཆུབ་སེམས་དཔའི་སྡོམ་པའི་དབང་དུ་བྱས་ནས་ཡོད་པར་རིག་པར་བྱ་སྟེ། ནམ་མཁའི་སྙིང་པོའི་མདོ་ལས། རྙེད་པ་དང་བཀུར་སྟིའི་རྒྱུ་ལས་རྩ་བའི་ལྟུང་བ་བྱུང་བར་གསུངས་པའི་ཕྱིར་ལ། ཞེས་པ་ལྟར་རྩ་ལྟུང་བྱུང་བའི་བྱང་སེམས་ཡོད་ན་དེའི་རྒྱུད་ལ་སྒྲུབ་པའི་སྦྱོར་བས་ཟིན་པའི་སེམས་བསྐྱེད་ཡོད་མེད་བརྟག་གོ ། ལོ་ཙྪ་བ་སོགས་ཀྱིས་སོ་སྐྱེ་ལ་འཇུག་སེམས་མེད་པར་འདོད་པ་ལ་ཉ་ཊཱིཀ་ལས། འོ་ན་སོ་སྐྱེ་ལ་བྱང་སེའི་ཚུལ་ཁྲིམས་ཀྱི་སྡོམ་པ་མེད་པར་འགྱུར་ཏེ། དེའི་རྟེན་ནམ་ངོ་བོ་འཇུག་པ་སེམས་བསྐྱེད་མེད་པས་སོ། །ཞེས་གསུངས་པ་དང་འགལ་བར་འགྱུར་རོ། །ཞེས་འཇུག་སྡོམ་གྱི་རྟེན་ནམ་ངོ་བོ་འཇུག་སེམས་དགོས་པར་གསུངས་པ་དང༌། ས་བཟང་སྤྱོད་འཇུག་འགྲེལ་བ་ལས། རྒྱལ་སྲས་འདིའི་དགོངས་པ་ནི་ཆོ་ག་མེད་ཀྱང་སངས་རྒྱས་ཀྱི་སྐུ་མཐོང་བ་དང་སེམས་ཅན་ལ་སྙིང་རྗེ་སྐྱེས་པ་ལ་སོགས་པའི་དབང་གིས་རྫོགས་པའི་བྱང་ཆུབ་ཏུ་འགྲོ་བར་འདོད་ཅིང་དོན་དུ་གཉེར་བ་སྨོན་པ་སེམས་བསྐྱེད་དང༌། ཆོ་གས་སྡོམ་པ་ཡང་དག་པར་བླངས་ཏེ་ཕ་རོལ་ཏུ་ཕྱིན་པ་དྲུག་ལ་སྤྱོད་ཅིང་བྱང་ཆུབ་ཆེན་པོའི་ལམ་དུ་ཞུགས་ནས་འགྲོ་བཞིན་པ་ནི་འཇུག་པ་སེམས་བསྐྱེད་ཅེས་བྱ་སྟེ། ཞེས་འཇུག་སེམས་ལ་ཆོ་གས་སྡོམ་པ་ཡང་དག་པར་བླངས་དགོས་པར་གསུངས་པ་གཉིས་ལ་བརྟག་པར་བྱ་བ་ཡོད་དོ། །ས་བཟང་གི་མདོ་སྡེ་རྒྱན་གྱི་རྣམ་བཤད་ལས། སྡོམ་པ་ཡིན་ལ་སེམས་བསྐྱེད་མ་ཡིན་པ་ནི་མེད་དེ། ཐེག་ཆེན་གྱི་སྡོམ་པ་གང་ཡིན་ལ་སེམས་བསྐྱེད་ཀྱིས་ཁྱབ་པའི་ཕྱིར། ཞེས་གསུངས་ཟིན་ལྟར་ཐེག་ཆེན་སྡོམ་པ་ལ་སེམས་བསྐྱེད་ཀྱིས་ཁྱབ་ན་བྱང་སེམས་ཀྱི་རྒྱུད་ཀྱི་སོ་ཐར་གྱི་སྡོམ་པ་དང་ཉེས་སྤྱོད་སྡོམ་པའི་ཚུལ་ཁྲིམས་དག་སེམས་བསྐྱེད་ཡིན་པར་འགྱུར་ལ། དེ་ཡང་འདོད་པར་མི་རིགས་ཏེ། དེ་དག་དང་སེམས་བསྐྱེད་འཛིན་སྟངས་འགལ་བའི་ཕྱིར། ཁྱབ་སྟེ། ཉ་ཊཱིཀ་ལས། དེ་ཐོབ་འདོད་དང་དེ་དཔུང་གཉེན་དུ་འཛིན་པའི་བློ་གཉིས་སྔ་ཕྱིར་འབྱུང་ཞིང་འཛིན་སྟངས་མི་འདྲ་བས་ངོ་བོ་གཅིག་ཏུ་ག་ལ་རུང༌། ཞེས་གསུངས་པའི་ཕྱིར་ཟེར་ན་དཔྱད་པའི་གནས་སུ་སྣང་ངོ༌། །ཡང་སེམས་བསྐྱེད་ཀྱི་སྔོན་དུ་སྡོམ་པ་འགྲོ་དགོས་པར་ཐལ། བྱང་སྡོམ་དེ་སེམས་བསྐྱེད་ཀྱི་རྟེན་ཡིན་པའི་ཕྱིར་ཏེ། མདོ་སྡེ་རྒྱན་ལས། སྡོམ་པ་རྒྱ་ཆེན་དེ་ཡི་རྟེན། །ཞེས་དང༌། དེའི་ས་འགྲེལ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་རྒྱ་ཆེན་པོ་བསྲུང་བ་ནི་དེའི་རྟེན་ཡིན་ལ། ཞེས་དང༌། མདོ་ལུགས་མ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ནི་རྟེན་ནོ། །ཞེས་གསུངས་པའི་ཕྱིར་ཟེར་ན་སེམས་བསྐྱེད་སྐྱེ་བ་ལ་དེའི་རྟེན་དུ་ངེས་པར་དགོས་པའི་སྡོམ་པ་ཞིག་བཤད་པ་ཡིན་མིན་བརྟག་དགོས་སོ། །ཡང་བྱང་སྡོམ་གྱི་སྔོན་དུ་སེམས་བསྐྱེད་འགྲོ་དགོས་པར་ཐལ། ཉ་ཊཱིཀ་ལས། འདིའི་རྟེན་ནམ་སྔོན་དུ་སེམས་བསྐྱེད་འགྲོ་དགོས་ཤིང་དེའི་རྟེན་ནམ་སྔོན་དུ་འདི་འགྲོ་མི་དགོས་པ་སོགས་ཁྱད་པར་དུ་མ་ཤེས་པར་བྱའོ། །ཞེས་བྱང་སྡོམ་གྱི་རྟེན་ལ་སྔོན་དུ་སེམས་བསྐྱེད་འགྲོ་དགོས་པ་ཡིན་ན་ལམ་མ་ཞུགས་ན་བྱང་སྡོམ་སྐྱེས་པ་མེད་དགོས་ལ། དེ་ལྟར་ན་ལམ་མ་ཞུགས་ན་དབང་སོགས་ཀྱི་སྐབས་བྱང་སྡོམ་ལེན་ཀྱང་མི་སྐྱེ་ན་དོན་མེད་པར་འགྱུར་རམ་ཅི་ཡིན་དཔྱད། ཡང་བྱང་ས་ལས། རྒྱུ་གཉིས་ཁོ་ནས་བྱང་སེམས་ཀྱི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་བཏང་བར་འགྱུར་ཏེ་བླ་མེད་ཡང་དག་རྫོགས་བྱང་དུ་སྨོན་པ་ཡོངས་སུ་བཏང་བ་དང༌། ཕམ་པའི་གནས་ལྟ་བུའི་ཆོས་ཀྱིས་ཀུན་ནས་དཀྲིས་པ་ཆེན་པོ་ཀུན་ཏུ་སྤྱོད་པའོ། །ཞེས་རྒྱུ་གཉིས་ཁོ་ནས་བྱང་སྡོམ་བཏང་བར་གསུངས་མོད་ཀྱང་ལས་འབྲས་མེད་པར་ལྟ་བའི་ལོག་ལྟ་དང་སྐྱབས་འགྲོ་བཏང་བ་དང་བྱང་སྡོམ་ཕུལ་བས་ལྡོག་པ་ཡིན་མིན་དཔྱད་དགོས་ཏེ། ལོག་ལྟས་དགེ་རྩ་གཅོད་པ་དང་བྱང་སྡོམ་ཕུལ་བས་ལྡོག་སྟེ། མཛོད་ལས། མེད་པར་ལྟ་བས་རྩ་བ་གཅོད། །ཞེས་དང༌། ཉ་ཊཱིཀ་ལས། ཕུལ་བས་ཀྱང་ལྡོག་སྟེ། བསྡུ་བར། མི་བརྡ་ཕྲད་པའི་དྲུང་དུ་འབུལ་བ་དང་ལྡན་པའི་ཚིག་རྗོད་པར་བྱེད་པ་དང་ཞེས་སོགས་གསུངས་པའི་ཕྱིར་རོ། །ཡང་ཐུབ་དགོངས་ལས། སྡེ་སྣོད་དུ་གསུངས་པའི་བཞི་བོ་རྣམས་ཉིད་དུ་གཞན་རྣམས་འདུས་པའི་ཕྱིར་རོ། །ཞེས་བྱང་ས་ལས་བཤད་པའི་རྩ་ལྟུང་བཞིའི་ནང་ནམ་མཁའི་སྙིང་པོའི་མདོ་ལས་བསྟན་པའི་རྩ་ལྟུང་རྣམས་འདུ་ཚུལ་ཡིན་པའི་ཚུལ་གྱིས་ཡིན་ནམ་གང་ཡིན་དང༌། དེ་ལྟར་རང་ལུགས་ལ་འཐད་པ་ཡིན་མིན་གོང་དུ་བཀོད་པའི་ཞང་སྟོན་པའི་རྒྱུད་བླའི་འགྲེལ་བའི་ལུང་དང་སྐབས་འདིར་ཉ་ཊཱིཀ་ལས་བྱང་ས་ལས་བཤད་པའི་དེ་བཞིའི་ནང་དུ་ནམ་སྙིང་གི་མདོར་བསྟན་པའི་རྩ་ལྟུང་བསྡུ་ཚུལ་བཤད་པ་དག་གིས་དཔྱད་པར་བྱའོ། །གཞན་ཡང་མདོ་ལུགས་མ་ལས། སྨོན་པ་སེམས་བསྐྱེད་ཀྱི་ངོ་བོ་གཞན་དོན་འདོད་པ་དེ༷་ད༷ང༌། འཇུག་པ་སེམས་བསྐྱེད་ཀྱི་ངོ་བོ་བྱང་ཆུབ་འདོད་པ་དེ༷་ནི༷་ཤེར་ཕྱིན་གྱི་མདོ༷་ཇི་ལྟ་བ་བཞི༷ན་དུ༷་རྒྱས་འབྲིང་བསྡུས་པ་གསུམ་ཆར་ལས་བསྡུ༷ས་པའི་སྒོ་ནས་བརྗོད་པ་ནི་འདི་ལྟ་སྟེ། ཞེས་དེ་སྒྲ་སྔ་ཕྱི་གཉིས་ཀྱི་སྙེགས་གཞི་དེ་ལྟར་འཇོག་པ་མི་འཐད་པར་ཐལ། ཉ་ཊཱིཀ་ལས། གོ་འཕང་གང་འདོད་པའི་བདག་ཉིད་ཡང་དག་པར་རྫོགས་པའི་བྱང་ཆུབ་དེ་ནི་གང་ཡིན། ཕུགས་ཀྱི་ཆེད་དུ་བྱ་བ་གང་གི་དོན་དུ་སེམས་བསྐྱེད་པ་གཞན་གྱི་དོན་ནི་གང་ཡིན་ཞེ་ན། གཉིས་པའི་རྩ་བ་ནི། ཇི་ལྟར་དྲིས་པ་དེ་དང་དེ་ནི་བླ་མའི་ལུང་གིས་མདོ་ལས་ཇི་སྐད་བསྟན་པ་བཞིན་དུ་ཤེས་པར་བྱ་ཞིང་མདོ་ལས་ཀྱང་དེ་དག་བསྡུས་པ་དང༌། རྒྱས་པའི་སྒོ་ནས་བརྗོད་པར་ཤེས་པར་བྱའོ། །ཞེས་གསུངས་པ་དང༌། ཡང་ཉ་ཊཱིཀ་དེར་རྩ་བར། དེ་དང་དེ་ནི་མདོ་བཞིན་དུ། །བསྡུས་དང་རྒྱས་པའི་སྒོ་ནས་བརྗོད། །ཅེས་པ་སེམས་བསྐྱེད་ཀྱི་དམིགས་ཡུལ་འཆད་བྱེད་དུ་སྦྱར་བའི་ཕྱིར་ཞེ་ན་དཔྱད། འོན་ཀྱང་ཆོས་རྗེ་ཀུན་མཁྱེན་རིན་པོ་ཆེ་ནི་འཕགས་སེང་ལྟར་མི་འཆད་པར་སྔར་མདོ་ལུགས་མར་བཀོད་པ་ལྟར་བཤད་དགོས་ཏེ། ཉ་ཊཱིཀ་ལས། སེམས་བསྐྱེད་དེ་དང་དེ་ནི་མདོ་བཞིན་བརྗོད་ཅེས་པ་ཡིན་གྱི་འཕགས་སེང་སོགས་ཀྱི་འདི་མིན་ཞེས་ཀུན་མཁྱེན་ཆེན་པོས་གསུང་ངོ༌། །ཞེས་གསུངས་སོ། །ཉ་ཊཱིཀ་ལས། གང་གི་སྒོ་ནས་ན། ཡུམ་བསྡུས་པ་ལས་མདོར་བསྡུས་པ་དང་རྒྱས་འབྲིང་གིས་རྒྱས་པར་བསྟན་པའི་སྒོ་ནས་སོ། །ཞེས་ཡུམ་བསྡུས་པ་ལས་མདོར་བསྡུས་པ་དང་རྒྱས་འབྲིང་གིས་རྒྱས་པར་བསྟན་གསུངས་པ་མི་རིགས་པར་ཐལ། ཡུམ་གསུམ་གར་རྒྱས་བསྡུས་གཉིས་གཉིས་ཀྱིས་བཤད་པའི་ཕྱིར་ཏེ། མདོ་ལུགས་མ་ལས། རྒྱས་འབྲིང་བསྡུས་པ་གསུམ་ཆར་ལས་བསྡུས་པའི་སྒོ་ནས་བརྗོད། ཅེས་པ་ནས། གཞན་དོན་འདོད་པ་དང་བྱང་ཆུབ་འདོད་པ་དེ་དང་དེ་ནི་ཡུམ་གསུམ་ཆར་ལས་རྒྱས་པའི་སྒོ་ནས་བརྗོད་པ་དང༌། ཞེས་གསུངས་པའི་ཕྱིར་ཟེར་ན་དཔྱད། ཡང་ཡུམ་མདོ་བཞིན་དུ་ཡུམ་མདོ་ལས་བརྗོད་ཅེས་པར་འགྱུར་ན་འབྲེལ་ཡོད་མེད་དང༌། མདོ་ལུགས་མའི་དེའི་འོག་ཏུ་དེ་རྣམས་ཀྱིས་ནི་བསྡུས་པ་དང་རྒྱས་པའི་སྒོ་ནས་ཡུམ་གྱི་མདོ་བཞིན་དུ་བརྗོད་པ་བཤད་ཟིན་ཏོ། །ཞེས་སོགས་གོང་འོག་གི་འབྲེལ་ལ་བརྟག་དགོས་སོ། །ཡང་འཕགས་པ་རྣམ་གྲོལ་སྡེ་དབྱིག་གཉེན་གྱི་སློབ་མ་ཡིན་ཏེ། རྒྱ་གར་ཆོས་འབྱུང་ལས། འདིར་འཕགས་ཡུལ་ན་གྲགས་ཆེ་བ་ལྟར་ན་དཀྱུས་ཉིད་དེ། དབྱིག་གཉེན་གྱི་སློབ་མའི་ཐ་མ་ཡིན་ནོ། །ཞེས་གསུངས་པའི་ཕྱིར་ཞེ་ན། དེ་མི་རིགས་པར་ཐལ། མདོ་ལུགས་མ་ལས། ངེས་དོན་ལ་དེ་ལྟ་ཡིན་པར་འདོད་དུ་ཆུག་ན་ཡང་དྲང་དོན་ལ་ཉི་ཁྲི་སྣང་བ་རྩོམ་པ་པོ་དེ་སློབ་དཔོན་དབྱིག་གཉེན་ལས་མཁས་པ་མི་སྲིད་པའི་ཕྱིར་རོ། །དེ་དང་མཐུན་པར་འཆད་པ་འཐད་དོ། །དེས་ན་ཉི་ཁྲི་སྣང་བ་རྩོམ་པ་པོ་ནི་དངོས་སློབ་མ་ཡིན་པ་ཙམ་དུ་མ་ཟད་ཀྱི། སློབ་དཔོན་དབྱིག་གཉེན་དང་དེ་གཉིས་ཀྱི་བར་དུ་ཡུམ་གྱི་མདོ་སྡེའི་བླ་མ་བརྒྱུད་པའི་རིམ་པ་ཡང་འཆད་པར་གསལ་ལོ། །ཞེས་སོགས་སྐབས་དུ་མར་གསུངས་པའི་ཕྱིར་ཟེར་ན་དཔྱད་པར་བྱའོ། །
ས་མཚམས་ལ་གོང་དུ་བཀོད་པ་བཞིན་སྔོན་མེད་ལེགས་བཤད་ལས་ཐེག་ཆེན་སེམས་བསྐྱེད་མཚན་ཉིད་སངས་རྒྱས་ས་ན་ལོག་པ་ལྟ་བུ་གསུངས་མོད་སངས་རྒྱས་ཀྱི་ས་ན་ཐེག་ཆེན་སེམས་བསྐྱེད་མེད་ན་དེ་ཐེག་ཆེན་མ་ཡིན་པར་འགྱུར་ཏེ། ཐེག་ཆེན་པ་ཡིན་མིན་སེམས་བསྐྱེད་དེ་ཡོད་མེད་ཀྱི་རྗེས་སུ་འགྲོ་ལྡོག་བྱེད་པའི་ཕྱིར་ཏེ། ལྷན་ཐབས་འོད་བརྒྱ་འབར་བ་ལས། གང་ཟག་དེ་ཐེག་ཆེན་པར་འགྲོ་མི་འགྲོ་བྱང་ཆུབ་ཀྱི་སེམས་རྒྱུད་ལ་སྐྱེས་མ་སྐྱེས་ལ་རག ཅེས་གསུངས་ལ། འོན་ཀྱང་བྱང་སེམས་འགོག་སྙོམས་པ་དང་གཉིད་ལོག་པའི་རྒྱུད་ལ་སེམས་བསྐྱེད་ཡོད་མེད་དཔྱད་དགོས་ཏེ། ཉ་ཊཱིཀ་ལས། བྱང་སེམས་འགོག་སྙོམས་པའི་རྒྱུད་ལ་སེམས་བསྐྱེད་མེད་པར་འགྱུར་ཏེ་ཡིད་ཤེས་མེད་པས་སོ། །འདོད་ན། དེ་དུས་བྱང་སེམས་མིན་པར་འགྱུར་རོ་ཞེ་ན། གནས་མ་གྱུར་པའི་དབང་དུ་བྱས་ཏེ་དེ་དུས་སེམས་བསྐྱེད་མངོན་གྱུར་མེད་པ་འདོད་ཅིང་བྱང་སེམས་སུ་མི་འགལ་ཏེ་དེ་དུས་ན་སེམས་བསྐྱེད་ཐོབ་ལ་མ་བཏང་བའི་ཕྱིར་བྱང་སེམས་གཉིད་ལོག་པའི་དུས་བཞིན་ནོ། །གནས་གྱུར་དུས་ཡེ་ཤེས་ཡོད་པས་སྐྱོན་མེད་དོ། །འོན་ཀྱང་དེ་འདྲའི་འདོད་པའམ་འདུན་པ་དབང་རྒྱུན་ཆགས་སམ་འཕགས་སེང་ལྟར་ནའང་དེ་འདྲའི་མཚུངས་ལྡན་དབང་རྒྱུན་ཆགས་སུ་འདོད་དགོས་སོ། །ཞེས་གསུངས་ལ། དབང་རྒྱུན་ཆགས་ནི་ས་བོན་ཞིག་ལ་འཇོག་དགོས་ཏེ། དབྱིག་གཉེན་གྱི་ཕུང་ལྔའི་རབ་ཏུ་བྱེད་པ་ལས། དེ་ལ་ཐོབ་པ་གང་ཞེ་ན། རྙཻད་པ་དང་ལྡན་པའོ། །དེ་ཡང་ས་བོན་དང་དབང་དང་མངོན་དུ་གྱུར་པ་དང་ཅི་རིགས་སུ་སྦྱར་རོ། །ཞེས་དང༌། དེའི་སྐབས་ཀྱི་བློ་བརྟན་གྱི་ཕུང་ལྔའི་རབ་ཏུ་བྱེད་པ་བྱེ་བྲག་ཏུ་བཤད་པ་ལས། ཐོབ་པ་གང་ཞེ་ན། ཞེས་པ་ནས། དེ་ཡང་ས་བོན་དང་དབང་དང་མངོན་དུ་གྱུར་པ་དང་རྣམ་པ་གསུམ་དུུ་དབྱེའོ། །ཞེས་པ་ནས། ས་བོན་ཅི་ལ་བྱ་ཞེ་ན། དགེ་བ་དང་མི་དགེ་བ་དང་ལུང་དུ་མ་བསྟན་པའི་ཆོས་རྣམས་ཀྱི་རྣམ་པར་ཤེས་པ་ལ་མ་འོངས་པ་ན་དེ་དང་རིགས་གཅིག་པའི་ཆོས་ཀྱི་རྒྱུ་བསྐྱེད་པའི་ནུས་པའི་བྱེ་བྲག་ནི་ས་བོན་ནོ། །ས་བོན་རྙེད་ནས་དེ་ལ་རག་ལས་པའི་མངོན་དུ་མ་གྱུར་ཀྱང་དེའི་ས་བོན་གང་ཡིན་པ་དེ་ཐོབ་པ་ཞེས་བྱའོ། །དབང་ནི་དེའི་རྐྱེན་ལ་ལྟོས་ནས་རྒྱུན་གྱི་འབྲས་བུ་བསྒྲུབ་པའི་གནས་སོ། །མངོན་དུ་གྱུར་བ་ནི་དེའི་འབྲས་བུ་གྲུབ་པའི་དུས་སོ། །ཞེས་གསུངས་སོ། །སེམས་བསྐྱེད་བཏང་ན་ངན་སོང་དུ་ལྟུང་བ་ཡིན་ཏེ། ཉ་ཊཱིཀ་ལས། མཚམས་མེད་པས་ཀྱང་ཉེས་པ་ལྕི་བས་དམྱལ་སོགས་ལས་མི་ཐར་ཞིང་བརྒྱ་ལམ་ཐར་ན་ཡང་ལམ་གོལ་བར་ལྟུང་སྟེ། སྡུད་པར། སེམས་བསྐྱེད་དེ་ནི་ཕས་ཕམ་པས་ཀྱང་ཤིན་ཏུ་ལྕི། །ཞེས་གསུངས་སོ། །དེ་ལ་ཅུང་ཟད་དཔྱད་རྒྱུ་ནི་ཤཱ་རིའི་བུས་སེམས་བསྐྱེད་བཏང་ཡང་ངན་སོང་དུ་མ་ལྟུང་བ་ཡིན་ཏེ། སྤྱོད་འཇུག་ས་འགྲེལ་ལས། ཤཱ་རིའི་བུས་སྔོན་བྱང་ཆུབ་ཏུ་སེམས་བསྐྱེད་ནས། ཞེས་པ་ནས། བྱང་ཆུབ་ཀྱི་སེམས་བཏང་ཡང་དེ་དག་ངན་འགྲོར་མ་ལྷུང་བར་ཐར་པ་ཐོབ་ཅིང་གཞན་དག་ཀྱང་ཐར་བར་མཛད་པ་ནི། ལས་ཀྱི་ཚུལ་སྟོབས་ཆེ་ཆུང་སྣ་ཚོགས་པ་རྣམས་ཚུ་རོལ་མཐོང་བས་བསམ་གྱིས་མི་ཁྱབ་སྟེ། ཞེས་གསུངས་སོ། །ཡང་སྐྱེས་རབས་ལས། ལས་ཀྱི་རྣམ་པར་སྨིན་པ་བསམ་མི་ཁྱབ། །བརྩེ་བའི་བདག་ཉིད་ཅན་ཡང་དུད་འགྲོར་སྐྱེས། །ཞེས་དང༌། ཉ་ཊཱིཀ་ལས། སྤྱིར་ཐེག་ཆེན་སེམས་བསྐྱེད་ཙམ་ཞིག་ཐེག་ཆེན་ཆོས་ཀྱི་སྐལ་བ་ཡོད་པའི་སེམས་ཅན་ལྷ་མི་དུད་འགྲོ་སོགས་དྲུག་ཅར་ལ་སྐྱེ་ཞིང་གནས་སུ་རུང་ངོ༌། །ཞེས་དང༌། དེ་ལས། ཐ་ན་བྱང་ཆུབ་ཏུ་སེམས་བསྐྱེད་པ་དུད་འགྲོར་གྱུར་པ་ལ་ཡང་ཕྱག་འཚལ་ལོ་ཞེས་བསླབ་བཏུས་སུ་དྲངས་སོ། །ཞེས་དང༌། མདོ་སྡེ་རྒྱན་གྱི་ས་འགྲེལ་ལས། སྐྱེས་རབས་ལས་དུད་འགྲོར་གྱུར་པའི་བྱང་ཆུབ་སེམས་དཔའ་མང་དུ་གསུངས་པ་དང༌། མ་དྲོས་པས་ཞུས་པར་ཡང༌། ཀླུའི་རྒྱལ་པོ་དེ་ཉིད་ས་བཅུ་པར་གསུངས་པ་ལྟར་རོ། །ཞེས་བྱང་སེམས་ངན་འགྲོར་ལས་དབང་གི་སྐྱེ་བ་ལྟ་བུ་དང༌། ངན་འགྲོའི་རྟེན་ལ་སེམས་བསྐྱེད་ཡོད་པར་གསུངས་ཀྱང་དེ་དག་ངན་འགྲོ་བ་མ་ཡིན་ཏེ། དེ་དག་བདེ་འགྲོ་བ་ཡིན་པའི་ཕྱིར་ཏེ། རིན་ཆེན་ཕྲེང་བ་ལས། བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུགས་འགྱུར། །ཞེས་དང༌། སྤྱོད་འཇུག་ཏུ། བྱང་ཆུབ་སེམས་བསྐྱེད་གྱུར་པའི་སྐད་ཅིག་ལ། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་རབ་རྗོད་ཅིང༌། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་གསུངས་པའི་ཕྱིར་ཟེར་ན་དཔྱད་དགོས་སོ། །ཡང་ཉ་ཊཱིཀ་ལས། མི་ཟད་པ་བརྒྱད་ཅུར་བརྗོད་དེ། དང་པོ་ནི་སེམས་བསྐྱེད་པ་ཉིད་དོ་ལྷག་མ་ནི་དེའི་གྲོགས་ཏེ་སྦྱོར་བ་དང་བསམ་པ་ལ་སོགས་པ་སྣ་ཚོགས་པའོ། །ཞེས་སོ། །འདི་ལེགས་སོ། །ཞེས་དང་པོ་སེམས་བསྐྱེད་ཉིད་ཡིན་པ་དང་ལྷག་མ་གྲོགས་ཡིན་པར་གསུངས་པ་ལེགས་པར་འདོད་ན། དང་པོ་ལ་གྲོགས་དང་སྦྱར་ཚུལ་མེད་པར་ཐལ། འདོད་པའི་ཕྱིར། འདོད་མི་ནུས་ཏེ། ཞང་སྟོན་གྱི་རྒྱུད་བླའི་འགྲེལ་བ་ལས། འདུན་པ་དང་བསམ་པ་དང་སྦྱོར་བ་དང༌། ཞེས་པ་ནས། གྲོགས་དེ་དག་མི་ཟད་པ་བརྒྱད་ཅུ་ཡིན་ནོ། །ཞེས་དང༌། མདོ་སྡེ་རྒྱན་ས་འགྲེལ་ལས། འདུན་པ་བསམ་པ། ཞེས་པ་ནས། བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་དང་པོ་མོས་པ་ལས་བྱུང་བའམ་ཐེག་པ་ཆེན་པོ་ལ་འདུན་པ་དང་མཚུངས་པར་ལྡན་པ་ནི། ཞེས་གསུངས་པས་བརྟག་པའི་གནས་སོ། །སེང་བཟང་ལུགས་ལ་གཞུང་གི་དངོས་བསྟན་གྱི་སེམས་བསྐྱེད་ཉེར་གཉིས་ཀྱྀ་ས་མཚམས་དེ་དང་དེ་ནས་འཇོག་པའི་རྒྱུ་མཚན་ལ་དཔྱད་པར་བྱའོ། །ཡང་ཉ་ཊཱིཀ་ལས། རྒྱན་འགྲེལ་དང་དག་ལྡན་དུ། སྦྱོར་ལྡན་ཡར་ངོའི་ཟླ་ཚེས་བཞིན་ཏེ། དགེ་ཆོས་འཕེལ་བར་འགྱུར་བས་སོ། །ལྷག་བསམ་ལྡན་པ་མེ་དང་འདྲ་སྟེ། ཤིང་གི་བྱེ་བྲག་གིས་མེ་བཞིན་དུ་གོང་ནས་གོང་དུ་ཁྱད་པར་དུ་འགྲོ་བའི་ཕྱིར་ཞེས་ཏེ། བློ་གྲོས་མི་ཟད་པའི་མདོ་འགྲེལ་དུ་ཡང་ངོ༌། །འདི་དང་སྔ་མ་དཀོན་བརྩེགས་སུ་གོ་བཟློག་སྟེ་བསྟན་པ་དང་མི་འགལ་ཏེ་སྤྱིའི་རིགས་ནས་གཅིག་གི་སྔོན་དུ་གཅིག་འབྱུང་བར་སྟོན་ཞེས་ཟླ་ཟེར་དང་ཐུབ་དགོངས་ཀྱི་དོན་ནོ། །མི་རིགས་པར་མངོན་ནོ། ཞེས་གསུངས་པ་འདི་ལ་དཔྱད་རྒྱུ་སྣང་ངོ༌། །སེམས་བསྐྱེད་ཉེར་གཉིས་ཀྱི་ས་མཚམས་བྱང་སེམས་ཀྱི་རྒྱུད་ཀྱི་གྲོགས་ཉེར་གཉིས་རང་རང་ཐོབ་པ་ནས་འཇོག་དགོས་པར་སྣང་ངོ༌། །
སྨྲས་པ། གང་ཞིག་སྐྱེས་ན་རྒྱལ་བའི་གདུང་འཚོབ་ཅིང༌། །འཇིག་རྟེན་ལྷ་དང་མིར་བཅས་ཕྱག་འོས་གནས། །རླབས་ཆེན་ཕ་རོལ་ཕྱིན་པའི་ཐབས་རྨད་བྱུང༌། །བརྩེ་ཆེན་བདག་ཉིད་ཅན་གྱི་རྒྱན་གྱི་མཆོག །
ཅེས་བར་སྐབས་ཀྱི་ཚིགས་སུ་བཅད་པའོ། །